⚡️ Цікавае назіранне – у Пінскім раёне Наталля Косар сустрэла чырвоную чаплю (рыжую цаплю), вельмі рэдкі залётны від. Гэта першая рэгістрацыя для 2022 года ў Беларусі.

Чырвоная чапля вельмі падобная да шэрай чаплі, але шыя і галава ржавага колеру. У палёце значна цямнейшая, без кантрасных белых плямаў на згібе крылаў, больш стройная.

📷 Дзякуй за фота Паўлу Сацуту, якому пазней таксама пашчасціла яе ўбачыць.

Чайка-рыбачка танцуе чачотку? Старанна мые лапкі? 😁

Не, яна проста каламуціць ваду, каб з'есці больш смачных насякомых.😋

Цікава, што калі чайка вось так тупае нагамі па зямлі, яна імітуе падзенне кропель дажджу, гэта дапамагае выманіць земляных чарвякоў і насякомых! Такой жа хітрасцю карыстаюцца і кулікі. 👏🏻 #птушыныяцікавосткі

📷 Відэа: Павел Сацута. Калі ты таксама хочаш дзяліцца з намі сваімі птушынымі фота і відэа – далучайся да чату @ptushkafota.

🔥Пачалася рэгістрацыя на Адкрыты чэмпіянат па спартыўнай арніталогіі – BirdRace-2022! Ён пройдзе ў суботу 3 верасня.

Збірай каманду і рыхтуйся да сапраўдных гонак за птушкамі! 🦆🦉🐦Хто адзначыць найбольш відаў за 12 гадзін?🏆

Азарт, нечаканасці, адрэналін, асалода ад дзікай прыроды і дзень у выдатнай кампаніі аднадумцаў-птушкароў настрояць цябе на выдатную восень. 😊

Чэмпіянат сёлета праводзіць Біялагічны факультэт Беларускага дзяржаўнага ўніверсітэта.

Правілы чэмпіянату, парадак рэгістрацыі і іншыя падрабязнасці чытай у анонсе: https://ptushki.org/news/718213.html

📷Дзякуй Паўлу Сацуту за фота для афішы!

🧺 Хутка пачнецца сезон збору брусніц і журавін. Збіраешся ў ягады? Лаві парады!

❓ Што нельга рабіць у ягадах?
Паліць вогнішчы. Агонь і пажар – самая вялікая небяспека для лесу. Пік пажараў - пачатак верасня ў перыяд самай нізкай вады ў лесе.

❌ Кідаць акуркі і запалкі. Будзь пільны, тушы любую крыніцу агню.

❌ Карыстацца піратэхнікай.

❌ Рабіць шматдзённыя стаянкі ў недазволеных месцах.

❌ Пакідаць, закопваць ці паліць смецце.

❓Што можна і трэба рабіць у лесе?
✅ Збіраць ягады ў сезон. Інфармацыю пра пачатак сезона знойдзеш у лясніцтве, адміністрацыі ахоўнай тэрыторыі, на сайтах выканкамаў і ў раённай прэсе.

✅ Забіраць смецце з сабой.

✅ Карыстацца спецыяльна абсталяванымі стаянкамі.

✅ Збіраць ягады дазволенымі прыладамі. З 2019 г. можна збіраць ягады грабянямі – але каб паміж зубцамі было не менш за 5 мм.

✅ Паведаміць пажарнікам ці лясніцтву, калі заўважыш агонь. Тэл. 101, 112.

✅ Мець з сабой мабільнік і навігатар з запоўненай батарэяй, каб быць на сувязі і не заблукаць.

📷 Марыя Шуманская.

"Я цябе бачу, не шчоўкай дзюбай, а рэгіструйся на BirdRace!" 😏

3 верасня на працягу 12 гадзін каманды будуць шукаць птушак па ўсёй краіне, задача – убачыць як мага больш відаў. 🦉🦢🦆🐦

Ужо зарэгістравалася першая каманда – "Troglodytes". 🙋‍♀️ Паспрабуй свае сілы і ты, далучайся! https://ptushki.org/news/718213.html

Чэмпіянат сёлета праводзіць Біялагічны факультэт Беларускага дзяржаўнага ўніверсітэта.

❓Няма каманды? Шукай птушкароў у "Ціў-Ціў"-чаце @ptushkachat.

📷 Фота: @ptu6ki.

❗️🏢 Птушка ўдарылася ў шыбу – як дапамагчы?

🔹1. Акуратна ловім птушку, каб не нашкодзіць ёй. Калі птушка ўцякае, можна накінуць на яе шалік, кашулю ці нешта іншае з тонкай тканіны.
🔹2. Садзім птушку ў каробку ці іншую бяспечную ёмістасць з доступам свежага паветра. Не трэба яе паіць ці карміць.
🔹3. Прытрымліваемся правіла “Тры Ц”: ціха, цёмна, цёпла. Так птушка будзе адчуваць сябе ў бяспецы.
🔹4. Калі птушка не атрымала сур’ёзных траўм, то праз некалькі дзясяткаў хвілін ці некалькі гадзін яна ажывіцца, будзе спрабаваць выбрацца са скрыні і рэагаваць на тваю прысутнасць. Тады птушку можна выпускаць. Лепш за ўсё побач з месцам, дзе яна была знойдзена, толькі падалей ад шыб.

Калі стан птушкі не паляпшаецца, паспрабуй звярнуцца па дапамогу да ветэрынара, у цэнтр рэабілітацыі дзікіх жывёл https://ptushki.org/dzikaya-pryroda-pobach/help_birds/paranenyya-ptushki, папрасіць дапамогі ў @ptushkachat.

🙌🏻 Дзякуем за ілюстрацыйную памятку фонду Fundacja Szklane Pułapki.

🏢 Птушка ўдарылася ў шыбу – чаго НЕЛЬГА рабіць?

Ні ў якім разе:
❌ не поім,
❌ не кормім,
❌ самастойна не ўпраўляем канцавіны,
❌ не падкідваем, каб птушка паляцела.
Усё гэта небяспечна для яе!

Прытрымлівайся правіла "Тры Ц": ціха, цёмна, цёпла. Так птушка будзе адчуваць сябе ў бяспецы. Абараняй птушку ад пераахаладжэння і перагрэву.

Калі стан птушкі не паляпшаецца, паспрабуй звярнуцца па дапамогу да ветэрынара, у цэнтр рэабілітацыі дзікіх жывёл, папрасіць дапамогі ў чаце "Ціў-Ціў" www.tg-me.com/ptushkachat.

🙌🏻 Дзякуем за ілюстрацыйную памятку фонду Fundacja Szklane Pułapki і аўтарцы Марце Жыльска.