ወግ ብቻ

" # መስቀሌስ_ለሚሹት_ነው !!"
------------
በወሎና ጎጃም መገናኛ ረዥም ድልድይ፣ አባይ በርሃ ውስጥ ጭርር ባለው ቦታ ከመኪናችን
ወርደን አከባቢውን ስንቃኝ አንድ መነኩሴ አገኘን። መቼስ ምንኩስና ዝምታ ነው፣ ብቸኝነት
ነው፣ ጭርር ባለው ቦታ ሰውነትንና ቃልን መመርመር ነው!! ወቅቱ ክረምት ነው፥ የአባይ
በሙላት ማግሳት ለመነኩሴ የነብስ ምናኔ አደለም የሩህ ጥያቄ ለምትንጠው አለማዊ
ሰውም ሃሴት ይሰጣል።
----------
ወዲያ ወሎ ወዲህ ጎጃም ሆነን ስናይ ወረተኛ ልባችን በማየት ቆዩ አለችን። ዛዲያ በዛ
ግዲም መቆየት መነኩሴ የመሆንን አቅም፣ በዝግታና በርጋታ ሃይማኖትን የመመርመር
ጥናትን፣ ውርውር የማለት የነብስያን ክጃሎት የመክላት መብቃቃትን ሲበዛ ያሻል። የኛ
ነብስ፣ አደለም ዝምታው በሚያስፈራው የአባይ በርሃ ሰው በቃኝ ብላ ልትከትም፣ ከፌስቡክ
ጫጫታ ብትርቅ ባንዴ ህቅ ብላ ትሞታለች!! እኛ ላፍታ ስንነጠል የምንፈራ፣ የውስጣችንን
ጫጫታ በገበያው መሃል የምንፈውስ፣ የጠፋንን የሰረቀን ጋር ሆነን የምንፈልግ ለሁሉም
ነገር ጓድ ፈላጊ ሰነፎች ነን!! ሰው ራሱ ጋር ሰብሰብ ብሎ ዝምምምም ሲል ወደ ውስጥ
ያያል!! ምንኩስና ይሄን እድል ይሰጣል!!
----------
ወደ እሳቸው ስጠጋ ሊባርኩኝ ወደ ኪሳቸው ገብተው መስቀላቸውን አወጡ።
"አባ፣ ያሲን መሃመድ እባላለሁ፥ የማይሳለም ሰላም አይሉዎትንም? ያልተሳለመስ
አይባረክምን?" ስል ጠየቅኳቸው፣
ከመልሳቸው ሳቃቸው ቀደመ፥ ፊታቸው በሳቅ ብርሃን ሞላ። ሰው ሲስቅ ሰውነቱ እንጂ
ሃይማኖቱ አይታይም። ሰው ሲስቅ ማስመሰል አይችልም።
"የለም የለም፥ መስቀሌስ ለሚሹት ነው፥ አንተማ የተባረክ ነህ" እያሉ ወደ ዘረጋሁት እቅፌ
በናፍቆት እንደሳሳ ስጋ ተጠግተው ታቀፉኝ።
"#መስቀሌስ_ለሚሹት_ነው" የሚለው ሃረግ ቢጥፉት መጥሃፍ ነው። ወደ መሬት
ቢያወርዱት ሰላም ነው። መስቀሉን የሚሹ እንደመሻታቸው ይድናሉ፣ ይባረካሉ።
መነኩሴውን የሚሹም ይባረካሉ፣ ይድናሉ። መስቀሉ በመነኩሴው ሰው እጅና ውስጥ
ነውና!! ደሞስ የክርስትና ትልቁ መስቀል በኔ ከተማ አደለምን?
----------
የኛ አይነቱ ባዛኝ፣ አባይና ዝምታውን ለፎቶ እንጂ ለኑሮ አንችለውም። እዛ ልንኖር አደለም
የመነኩሴውን ቡራኬ ልንቀበል ጊዜ አጠረን፣ የሚጮህ የሾፌራችን ክላክስ አስሮጠን።
ሩጫ ነው፣ መድረሻ አልባ ድክ ድክ፥ ኤዲያ!!
በጸሎታቸውና ምልጃቸው እንዲያስቡን አደራ ብለን ተለየናቸው።
------------
ይሄ ትውልድ የመዳኛውን ጥንተ-ስሪቶች በርትቶ ይይዝ ዘንድ ሳንሰለች ትንንሽ
የሚመስሉትን የመተለቂያ መንገዶች አጥብቀን እንጮሃለን።

((( ያሲን መሀመድ )))

ሸጋ ሸጊቱ ቅዳሜ!!!!

@balmbaras
@wegoch
@wegoch

7.4K viewsባላምባራስ, 08:09