بصوت. مسلم المطيري
نعي مفجع


أفــز وأتـذكـرچ بـالـلـيـل
                وتــســعــــر نــار دلاّلـي

بـعـد شينشف ادمـوعـي
                وموحش بيتنه وخـالـي

اطـب الحـجـرتـچ ضلمه
               وصـورّچ تـلـتــم أبـالـي

رحـتـي ابـسـاع يـايـمـه
                وموتچ حـلـم حـسبـالـي

بعدنـي ابـعـازت الـيـمـه
                 وغـابـت زهــرة أمـالـي

ابتدت دمعاتي يالـزهـره
                   وراح اتـعـيش لـلـتـالـي

ادري ابلحظه ما انـسـه
                 وأدري الـنـوح يحـلالـي

بجروحـي اصـد لـلـبـاب
                وأسـمـه ايغيّر احـوالـي

يـذكرّنـي لـمـن دفـعـوه
                اشما هَـزّه الهوه الـعـالـي

بـعـد هـيـهـات نـتـلاگــه
               واغـفـه بحظنچ الـغـالـي

مشيتي وضلت الحسرات
               كـلـهـه ودمّـعتـي اتـلالـي


ابوذيه

أيـات الــحــزن دهــري  .. تلالي
وشـريان الگلب بُـعـدچ  .. تلالي
مشيتي وضلت الدمعـه  .. تلالي

ومـضلـمـه الدار يالـزهـره عـليـه

*------------------------*--------------------*

✍خـادم الـزهـراء ع
الشاعر رعد الجريخي

بصوت. مسلم المطيري

الزهراء ع تگول

ادور عالمجالس  وين عله ابني

وبيها ابچي وانوحن  وانعه لبني

المن گلبه اشوفه  ون عله ابني

احضر بيوم تلفاه المنيه ..


لشاعره رحيم النجار

ماهو بعيد المنتظر يالزهره
لابد يجي ويبنيلچ اكبر حضره
****
ابنچ يفاطم ما يطول اغيابه
البابچ حرگها بيده يحرگ بابه
ويصرخ يويلي اعله الضلع ومصابه
وعالمحسن او عينچ نوايح يقره
****
ما يبقه ظالم بالبقيع ايحرسه
الحجه الامين العام هوه بنفسه
رايات حيه اعله الضلوع ايترسه
وبي منبر ايسوي ذهب وشكبره
****
ماهي بعيده والگبر نندله
مشايه من طف كربله نوصله
رايه بكتر رايه الطريق اندگله
بهيده الدرب نمشي ولا نختصره
****
اندگ المواكب واليجينه انحضنه
يالزاير بچاي الزچيه اتهنه
بسم الله سمي وادخل الهل جنه
والعتبه قبلها وتهل العبره
****
بينه يباهيها الامم مهدينه
بصحنچ لون صار اللطم شوفينه
واحدنه لو يلطم ضلع لو عينه
حرگه تظل يم الحسن عالسطره
****
المهدي بحضرتچ شيعته يرثيهم
كل الخدم يالزهره يحسب بيهم
وانتي بسجلچ يم حسن سجليهم
بزينب نحلفچ واللي گطعو نحره
****

الشاعر اياد الديراوي

بصوت. مسلم المطيري

ماهو بعيد المنتظر يالزهره

كلمات الشاعر
اياد الديراوي

بصوت. مسلم المطيري

ابوذيات عن القاسم بن الإمام
الكاظم عليهما السلام

الوكت كل يوم اله صوله وجوله
على المامروا   أحبابه  وجوله
النشدوا نار  بضلوعه  وجوله
صعبه يگلهم انا ابن الزچيه
★★★★★
القاسم  خالقه يرحل  وحاله
بوسط غربة تظل روحه وحاله
فوض أمره للباري وحاله
بغربه يعيش حد يوم المنية
★★★★★
بالغربه الصبر كاسه وجوده
القاسم مايفل عزمه وجوده
ابدار الغرب ميطوَّل وجوده
عرف تلفيه بالغربه المنيه

الشاعر حسن لعيبي الحريشاوي

شوط كربلائي للزهراء عليها السلام

باب الي بلا استئذان جبرائيل ميچهبه
يحرگونه على الزهراء ويدوسونها العتبه
_______________________________

دوسة بيت ابو الحسنين خلت بل گلب جمره
لا تبرد ولا تشفه اولا تطفيها كل عبره
تضل تسعر ليوم الدين حسره وشنهي من حسره

چا. ام الحسن تنطگ ؟؟
ومن عدها الجفن ازرگ
ولا گصة بشر تعرگ

بس حيدر يدير العين حاير ياهو اليعتبه
_________________________

يعين الله علي الكرار مثله يا بشر يحمل
امگيد بل وصيه او ضال بسكوت الدمع يهمل
يسمع ونّة ام احسين او ونة فاطمه تكتل

جدامه يعصروها
ومنها اضلوع كسروها
وعله خدها يسطروها

واهي كوثر إِلٓه الكون بس شيطان اليضربه
_________________________

من هيسوها خلف الباب عن حگ الولي اتدافع
عصروها عله الحايط حدما گامت اتنازع
او من احشاها هل بسمار ياشيعه وذر شالع

طاحت والبدن مالوم
من كل كتر يجري ادموم
ما بيها نفس واتگوم

والگوم عليها اتدوس ناس ابناس تتشلبه

_________________________

علي ابعينه يصد الها يشوف ام الحسن راحت
هاي ارويحته اعله الگاع من گد الضرب طاحت
ما صاحت يضلعي احا . احا يل الولد صاحت

محسن راح من ايدي
دامي او ميت اوليدي
عيد او ما يهل عيدي

زحف زحفت لعد محسن تشم ابوجهه واتحبه
_________________________

كل هاذه وابو الحسنين الها شابحه اعيونه
مثل لون ام حسن يا ناس حيدر منخطف لونه
اصوابه ابفاطمه چتال ما يرهم يداوونه

كلساعه نظرها وگال
لو ميت ولا هل حال
يضي عيني الهظم چتال
سحن روحي وبعد ماشوف يشهدلي السمه او كتبه
_________________________

تون الزهره ليل انهار ولا ساعه الجرح يسكن
وعلي يا شيعه فد ونه ويه الزهره من اتون
يحن الها ويهل ادموع واهي يمه او عليه اتحن

چا هل الاجل لو جاها
يعني يموت وياها
لذلك يوم واراها

رجع بس بالجسد للبيت روحه اتوارت ابتربه
_________________________

ابو فاطمة الطائي

شوط كربلائي بصوت. مسلم المطيري

كلمات الشاعر
ابو فاطمة الطائي

ياكسرتك  ياعلي  **  ياغـربتك  ياعلي
                             وأنت ماخــذ فاطمه للمكـبره
             -------------------------------------------------------
1= جني بيك وأنت رايـح  هوه الصدرك ما يفوت
     أتكل لروحك  هاي  هـيه الفارك الزهره يموت
     شويه  بعـد شويه  تـزغـر تزغـر لحد ماتموت
     يونس بفد حوت وحده وهجر  فاطم ألف حوت
     ------------------------------------------------------
                يامحنتك  ياعلي   **  يادمعــتك  ياعلي
                       شنهي تفكيرك  وكتها  ياتره
                       وأنت  ماخذ فــاطمه  للمكبره








2= بين خطوه وخطوه تعثر مامش أسم الله تصيح
     ياحرام  تصير   وركه  وتـــندفع  والدنيا  ريح
     تلتفت  محد  يعــــينك  ماكو  وادم  من   تطيح
     ياعلي  وتكـــــوم  كوه  ومحد  يصيح  أستريح
    ----------------------------------------------------------
           ياوكعتك  ياعلي   **   يامحنتك  ياعلي
                   تغورك عيونك بعبره مكسره
                   وأنت  ماخذ  فاطمه  للمكبره
    ***
3= تحجي  والتابوت  ساكت   ياخضاري  شيبسك
     شكد  نزل من  وزن جسمك وكع منك  محبسك
     أتغــــيرت  والشيب أجالك ثـــوب أبيض   لبسك
     يارئيس الحك عجـــــيبه  الحزن  صاير   ريسك
     ---------------------------------------------------
               ياجمرتك  ياعلي   **  يادمعتك  ياعلي
                    دموع عينك بالطريق مطشره
                    وأنت  ماخذ  فــاطمه  للمكبره


4= سكته بس أذان واحـــد يصيح حي على الوداع
      والهضم طشر  عــــيونك وين ماعــد  الله  كاع
      الدارك  الصعبه  شيرجعك ومنك العنوان  ضاع
      ياعلي غـــير أنت  ديره  شلون  يلفيك  الضياع
      ------------------------------------------------------
                   ياصدمتك  ياعلي   **  يادهشــــتك  ياعلي
                           تطلع من الصدر عبره مجمره
                           وأنت  مـاخذ  فاطمه   للمكبره
     ******
5= عيونك  تخوف  عشيره  وتالي  ذبلها  النعاس
      حقـك  ومن  بعد  فاطم   ياعلي  ماتــلكه   ناس
      وادم  بشجرة  محمد  كل حلمها   تصـير   فاس
      أدفـــن  وللبيت  أرجع وأشرب  من الغربه كاس
      --------------------------------------------------
              يارجعتك  ياعلي    **  ياوكعـــتك  ياعلي
                    الله يعلم ياعلي عليك شجره
                    وأنت ماخذ  فاطمه  للمكبره
*  الخادم عبد الجليل المالكي **

بصوت. مسلم المطيري

ياكسرتك. ياعلي. ياغربتك ياعلي
وانت ماخذ فاطمة للمگبرة

كلمات الشاعر
عبدالجليل المالكي

بصوت. مسلم المطيري

يحسين  اخيتك رجبت النوك
وحجايه  صرت ابنص الحلوك
ترضاهه  اطب يحسين للسوك
جفي ابحــــبل ياخويه مشبوك


لمن  وكفــــــــــت بين الازلام
كلبي احترك جن حركت اخيام
جلمت سبيه اتحــــــــز بالعظام
مو سهله اطب مجتوفه للشام


مو سهله طولي اتشوفه العين
وسمع يصــــــيحون الملاعين
يمخدره ويــــــــن اخوتج وين
شو وحــــدج جا وين الحسين  

للشام لمن طــــــــــب ظعنه
إسهام العـــــــيون اتباوع لنه
غربه الخلك مـوش من اهلنه
بكلوبهم مامــــــــــش محنه


#حسين #عبد #الزهرة الدراجي

بصوت. مسلم المطيري

ابوذيه


شرفنه نعيش بالدنيه   خدمكم
يمن  جبريل كل عمره   خدمكم
يسطره شلون هالظالم  خدمكم
وجرت دم ودمع عين الزجيه


اضحي  الروح  للزهره  وخاطر
اول  من   حمه  البيعه وخاطَر
ضلع مكسور من عدها  وخاطر
كسرين إحملت بالباب هيه

#############

ابو سجادالتميمي

صيحة القائم .. يم گبر فاطم
يا لثارچ فاطمة .. يا لثارچ فاطمة
*
بحلمي شفت المهدي واگف يم گبر مبني بذهب
يالثارچ يمي يصرخ صرخة ماليها التعب
غيضة تارس طرف سيفة ايصيح و اينگط عتب
احرگ ابيوته اعله راسة الحارگ الباب ابلهب

المعتدي عليها .. ايده الويها
يالثارچ فاطمة .. يالثارچ فاطمة
***
و أخيراً اجه الياخذ ثارها وثار الطفل
أولاً يكسر اجدامة الدافع الباب برجل
ثانياً يشلع اعيونه اليضحك بوقت القتل
ثالثاً يقتلع عقلة الهاجم ابلاية عقل

ايطلعه من گبرة .. ايصلبة عالشجرة
يالثارچ فاطمة .. يالثارچ فاطمة
***
حالف المهدي بظهورة ايجيبهم كلهم سرة
بنار گلبه ايصب عليهم ما يتاني الآخرة
عوج: والأعوج يوادم ما تعدله المسطرة
من بقاية الحطب ذاكه بأيدة يحرگهم ترة

حالف اعليهم .. إله يغليهم
يالثارچ فاطمة .. يالثارچ فاطمة
***
مركز الكون اعله چفة وسيفة حلال الصعب
صاح طلعوا الكتلوا امي إله احطلهم گلب
صاح انه القاضي الاقضي ومحكمة دم تنصب
الثاني اعرفنه علاجه هذا يتعالج صلب

الهاجم اعله امة .. امن الهوه ايحرمة
يالثارچ فاطمة .. يالثارچ فاطمة
***
المهدي حصن الله الچبير اليدخل ابحصنه أتمِن
المهدي اشارة امن الله نزلت حوّلت قطب الزمن
جاي ويدلينا وينه الگبر ويسويه وطن
باچر ايخلي المدينة كلها بسم ام الحسن

باچر الحظرة .. توصل الگمرة
يالثارچ فاطمة .. يالثارچ فاطمة
**
غيرة يتلافح بياضة بالجمال الهاشمي
سيّد الايام كلهن يوم ثارة العالمي
باچر لدولة الحجّة كُلُّ كائِن ينتمي
و عالكرة الارضية يكتب هذا كوكب فاطمي

وكوكب الزُهْرَة .. حصة الزهرة
يالثارچ فاطمة .. يالثارچ فاطمة
**
#علي #هادي #الخزعلي

بصوت مسلم المطيري

صيحة القائم.

كلمات الشاعر
علي هادي الخزعلي

يافاطمه عذريني // خافن سنه آمن اسنيني
ماحاظر بمجلس الج // وماباجي دمعت عيني


مجلسج عالم حقيقي ساطع النور
فاطمه وذني الليالي عندي عاشور
امنيتي كون إبدال ظلعج ظلعي مكسور
شكبره حظي انتي لو كلتيلي مأجور

المجلس دمع صليته// شكد تختلف روحيته
اكثر من امي حسيت// انتي تره تذكريني
___

انتي شخصيتج عظيمه تنحجي ابدقه
بالشعر اسمج اكتبه وقاصر ابحقه
خاف اكتب باب يركض يحرك الورقه
رزقي عبدج بالبواجي وباركي ابرزقه

شفت الكرامه العندج// الخدام جنهم ولدج
ولو انه خادم محسوب// بس بالشعر رزقيني
___

الدنيه هايه بدونج انتي كلشي ماتعني
ليش كلما اذكر اسمج كلبي يوجعني
فاطمه البسمار والله قهر شابعني
الج أقرب نقطه داله وكلهه تسمعني
اباب المجالس تكعد// وعل مااجه تظل تنشد
تفكدينه واحد واحد // ادري انتي ماتنسيني
___

كالو المجنون صعبه ينسه سالفته
وهالمثل كلش عليه ينطبق شفته
وين مااكعد يسولف لساني حلفته
وصاحبي اليخدم حظرتج هذا ماعفته

بطارييج ايهل دمعي// من اكعد انه وربعي
كسرج دعيناله يطيب// بجرح العشك لجميني
___

كصت بيه وتعبتي الدنيه فد مره
وانه اكلهه شما كصيتي توكف الزهره
الكاع من تعطش محنه تنروي ابمطره
ومالهه غير الله وانتي الوادم الفقره

اطلب جذب من غيرج// مغركتني انتي بخيرج
للدنيه ماطخن راس // وما كلهه عود انطيني
___

ظاله بكلبي الصراحه وتنحجي لازم
مجلسج مولاتي بس اليجمع الوادم
فرحتج لو شفتي خادم شابك الخادم
عمري بالخدمه اخلصه وانه مو نادم
تعذرين اعرف طيبج// مايزعل ادري اكليبج
عني اريدج ترظين // وبكل سنه توفقيني
__

علاء الزيدي

بصوت. مسلم المطيري

يافاطمة عذريني

كلمات الشاعر
علاء الزيدي

بصوت. مسلم المطيري

السيده زينب(س)

حگـي امن المصـايب *لووعاني*
الهلي شيفيـد طارش *لووعاني*
الشمر يحسين عگبك *لووعاني*
دفعني ابكعب سيفه وهد عليه.




*السيده زينب تخاطب* 
      *اخيها محمد ابن الحنفيه*

محمـد ليـش مــا تـرگــه *خيالك*
تهـاب الـزلـم لـو شـافـت *خيالك*
دريت انذبح برض الطف *خيالك*
  وخواتك مشن علهزل سبيـه.

📜… .ك:
      *ملا عاشور الصيداوي*

اسمج وطن ،، ابـﮕـلبي واشتاﮔـله
يم الحســن ،، ودمـعـتــي اتـرتـّلـه

اشكر واحمد الله ،، كلما كلبي صلى،، اعله احروفج واجفوفج بيبان العطف 
اسمج تحفـة منّه ،، رحمه ونزلت النه ،، امن الواحد للعابد خاطر ينعرف
يامذهب غرامي ،، ياسلمي وسلامي ،، واشعاري وافكاري لعيونج وقف
ياروح النبوؤه ،، يا أم المروؤه ،، ماتنحد اسمائچ لا حدّچ وصف
يم نرجسج ،، كل عطــر ينحني
وابمجسلج ،، مـذهبي وموطني


الوحدانيه كلها ،، ابحبچ نختزلها ،، يا ايــد الله البــاري المافـوكاها يَـد
رحمة ربي يمج ،، واشتق منه اسمج ،،  يم بابج مولاتي ايضيع الماسجد
اقرب من وريدي ،، كلما ارفع ايدي ،، تنطينـي ومـا افكّـر واستغرب ابد
استغربها منـج ،، مولاتي لونــــج ،، ما تكضين الحاجه لـو صحت المدد
ام الولي ،، وانتي باب السمه
لبوة علي ،، ابكل علم عالمه


باكورة حياتي ،، وتسبيحة صلاتي ،، يازهراء غيثيني ابشــرياني انكتــب
ياجرحي العشكتهه ،، ابهالبيت اختصرته ،، كل الاسماء طين واسمج مـن ذهب
ياديني وكتابي ،، ياوردي وحجابي ،، ايسموني الزهرائي واعشك هاللقب
يا اعظم اميره ،، خدمتكــم جبيــره ،، بمروتـج سجلينـي خــادم لام وهب
ابجي اشكثر ،، وكلبج اتوسله
يبدي العمر ،، وينتهي ابكربله
 


حيدر وابعظمته ،، من تثكل محنته ،، مايدعي الا ابجاهج واتزول المحن
يامولاتي دومه ،، ما يبدي ابهجومه ،، عالكــوم الا اينـادي ياام الحســن
لهينه ابمصابج ،، وخلينه اعله بابج ،، مولاتي وبعدينا امن الشك والفتن
يل اسمج هويه ،، وسيف الجعفريه ،، عالناصب والغاصب هاليوم وغداً
وي شيعتج ،، يبتلي اللي عثر    
يل دولتـــج ،، دولــة المنتظـر



ياگلب الصميده ،، وحيله وقوّة ايده ،، واجروحه وآياته اليقراهن دمع
يا أصل الامامه ،، ويا أم النشامه ،، وكل معصوم ايشيلچ للشدّة درع
وخدامچ ترى إحنا ،، ابغيرچ ما فلحنا ،، ولا خير إبها الدنيا ابدونج لانفع
واليعشگ مصابچ ،، مفطوم اعله بابچ ،، كلما يسمع باب ايدگ اعله الظلع
يصبح مثل ،، الماشي فوك السمه
ميت عدل ،، اينادي يافاطمه


احمد الهلباوي

بصوت. مسلم المطيري

اسمچ وطن بگلبي واشتاگله

كلمات الشاعر
احمد الهلباوي

نعي للام
… ..
اخ من الزمن شمسوي بينه
خذه امنه غفل من بين ادينه

ياشمعه وضواچ التارس البيت
ظلمه البيت من بعدچ طفينه

صار البيت ظلمه امغنتبه الدار
يالبحظنچ ربينه ازغار وكبار
بس ذكراچ يمه الليله تذكار
عفتي البيت نمتي ابوسط الحجار

يمه والليله ذكراچ مر الوكت والليله ذكراچ
مااگدر انساچ صعبه وعلي مااگدر انساچ
نتمنه وياچ كلنه ابگبر نتمنه وياچ

امنه الحنينه ابمگبره اتنام
طگ گلبي عليها وحيل محتام
جرح العزيزه شلون ينلام
وعليه تحزمت يالظيم الايام

كون التموت امه يخلوه
يبچي ولاوادم يسكتوه
وياها بگبر لمن ينزلوه
بالموته بعد امه يرحموه
حگ اليون لازم يعذروه
ميت عليها وعيب يدروه

امنه العزيزه الفارگتنه
ظعنه ولاوادم لگتنه
چبيره العافيه چانت بختنه
امنه الراحت وماودعتنه

يمه وداعتچ كثرانه الجروح
ومحزم بواچي وعاشگ النوح
انه بلياچ مثل الطاح مذبوح
احس يمه بغيابچ مابقت روح

التموت أمه ابدليله ماتت امه
وبعد يادهر موتي ماتت امه
تگول الناس عني ماتت امه
ونه الميت لچن مادروا بيه
… ..
علي الحاج الصبيحاوي

بصوت. مسلم المطيري

اخ من الزمن شمسوي بينه
خذه امنه غفل من بين ادينه

كلمات الشاعر
علي الحاج الصبيحاوي