أوك مثل ما أكو طبيب كشفيته كذا مبلغ ومتعاون وي كذا فرع طبي، مو أكو طبيب حتّىٰ ما ياخذ من الّي ما عنده؟ مو أكو الّي مخلي يوم مجاني للي ما يگدرون؟ مو أكو الّي كشفيته ٥ لو ١٠ لهسّة؟ وأكو حتّىٰ الّي ما يگدر علىٰ تكلفة العلاج يسهله أمره بيها، أكو لو لا!

إذا أكو ليش ما تحسبون حساب اله وتقدروا وتخلوا بالصورة، ليش تعممون علىٰ الكل أنهم مو شي؟ ليش لغة الجهلاء مطبقيها بخصوص هالموضوع! ..

ومنو يصعد الطبيب ويخليه معروف من بعد علميته غير حچي النّاس عنه، يعني النّاس تعظم وتكبر وتخلي الواحد لو يتغير لو يبقىٰ وبعدين يحچون عليه ويسووا مزق.

شفت الطبيب قصر لا تجيه بعد،
شفته يبالغ لا أدوس باب عيادته،
شفته قصر بحقك وما سوا الّي عليك أشتكي عليه يم المدير بدل التهجم الجسدي واللفظي،
شفته يدخل هواي للفحص حاجيه،
شفته ما فاد الحجي أترك عيادته.
ترا أكو الزينين والمتمكنين وممتازين من كل النواحي، بس منو ملتفت الهم ومكتشفهم ؟ محد، لأن الكل يركض ورا الّي عنده هواي مراجعين وكشفيته هواي ويدخل أكثر من واحد وبالأخير هم يحچون عليه.

أنتوا مدركين بخس الحق والظلم الّي صاير بهذا الجانب؟ مدركين كمية التهجم والأهانات الّي يحصلها الطبيب بس يعلن الوفاة لو ما يسرع، ما أحچي من يمي وإنما شايفة وسامعة ومن ثقة، والّي ينشر بمواقع التواصل نقطة ببحر من الّي يصير، بس أكو الّي ينصح الناس ويوعيهم؟ لا، أكو الّي نصف الطبيب بگد ما ينتقد المقصر؟ لا .. وأبسط مثال أدخل علىٰ أي صفحة طبية أو ميمز طبي وشوف الحقد والغل من يسطروا علىٰ الكل والتعليق المنصف شلون ينعد بالأصابع.

هضيمة هاي العنصرية الّي تصير بين البشر، عنصرية بالأهانة والتعرض والقتل، مو كأنوا كلنا بشر وروحنا وحدة ماكو فرق، الّي ينقتل لو ينهان ومشهور يبقىٰ بالأشهر ينحچي بيه ويصير رأي عام ويصعد ترند، والطبيب الّي ينضرب وتنهان كرامته وينقتل ما يكمل أسبوع وينسي، هاي الطبقية الّي صارت بالأرواح تكسر الخاطر، تخليك شگد ما تحاول تبذل لهالبلد وتخليه أحسن ترجعك لنقطة الصفر إنه ما راح يتغير بيوم ومحاولاتك تنفع يوم وتفشل أشهر.

والّي يحرض ويذم ويعمم بكلامه وما يخلي الله بين عيونه من يحچي حرفيًا ما راح يسلم، ويجي يوم ينظلم بيه ويحس بكلّ كلمة گالها، أتقوا الله شوية وكافي حقد، ولو چان الّي يصير بأسلوب نصيحة ومحاولة ما چان وصلنا لهالحال، بس إحنا نحب الهوبزة المهم ننتقد ونحصل كم لايك.

ممكن كلامي ما يروق للكل ولا ينفع بس المهم نحاول عسىٰ ولعل يتغير شي، ونتعلم إنو نوسع نظرتنا ونشوف من كلّ الجوانب ما نبقىٰ علىٰ جانب واحد لو رأي واحد ونتبعه، مو بس بخصوص هالموضوع وإنما بكلّ مراحل حياتنا إحنا معرضين لهيچ شي.

﴿عَسَىٰ رَبُّنَا أَن يُبۡدِلَنَا خَيۡرًا مِّنۡهَا﴾.

من الفرصة الّي ضاعت منه،
والحلم الّي ما تحقق،
والمحاولة الّي ما نجحت،
والسعي الّي ما كمل،
والنتيجة الّي ما أجت مثل ما نريد،
والتعب الّي أنبخس،
والشخص الّي خذلنا،
والمناسب الّي فرطنا بيه بسبب جهلنا،
والمكان الّي ما حوانا،
والوجهه الّي ما أستقبلتنا،
والأشياء الّي ما بقت حلوة مثل قبل،
وعن الحچي الّي بقىٰ بگلبنا يدور وما حچيناه،
عسىٰ التفاتة گلبنا الّي ما تقدرت وخابت يبدلنا عنها گلب يسعالنه ويستاهلنه ونستاهله.

مرة شفت ڤيد لـ أحمد الشقيري يحچي عن قيمة الإنسان وشلون يلگاها حتّىٰ يكتشف نفسه.
فَ يگول كلّش طبيعي النّاس تحتاج إنو يحسون الهم قيمة، بس أختلاف النّاس بأختلاف مصدر القيمة الّي يحصلوها لنفسهم،
يعني أكو ناس مصدر قيمتهم بالشكل الخارجي وأكو بوعيهم وأكو بشهادتهم وأكو بفلوسهم، وأكو بعدد المتابعين اله، وأكو بالكلام الحلو الّي يحصله، فَ المصادر متعددة، من يعرف مصدر قيمته راح يعرف إنه متعلق بشنو، وراها يعرف مرضه وين وهاي اول خطوة للعلاج، وهذا هم اله علاقة بقانون اللاتعلق، علمود السلام النفسي يحصله يحتاج يقلل تعلقه، ويحول هالحاجة من تعلق بالنّاس الىٰ تعلق بالله، ويخلي مصدر قيمته داخلية بسيطرته مو بتحكم وسيطرة خارجية من قبل النّاس، والّي يصير بيها أداة النّاس تتحكم بيها مو شخصه هوَّ.

ماكو إنسان مثالي،
ولا فكرة مثالية،
ولا علاقة مثالية،
ولا حياة مثالية،
ولا طاقة بقوة مثالية،
أنت مو آلي بلا شعور،
ولا تمثال متخذ وقفة وحدة ومتحمل كلّ فصول حياته وتقلبات أحوال الّي وياه،
ما مجبور تعيش المثالية،
محد اله حق يعتب عليك بـ ليش ما تشيل كلشي علىٰ ظهرك وتتحمله وتبين كلشي أنه تمام وماكو مشكلة،
ما دام ربّ العزّة بالقرآن ذاكر ﴿لَا يُكَلِّفُ الله نَفۡسًا إِلَّا وُسۡعَهَاۚ﴾، ليش تشيل شيلة مو شيلتك وفوگ سعتك، ترا طبيعي تنهار، تحزن، تضوچ، تبچي، تنعزل، طبيعي ما تحب تسوي شي بيومك وتكمله بالفراش، دور الآلة مو ألك أنت بشر يعني مجموعة مشاعر، تقبل هالشي حتّىٰ تعيش حياتك صح وحتّىٰ تهون علىٰ نفسك، عيش الحياة بخفة لا الّي حارم نفسه كلّش ولا بالرفاهية فد مرة .. توازن، الطبيعي والمثالي هوَّ أعتدالك.

خلي نتقبل إنو إحنا مكتملين بنقصنا، بالجزء الّي بيه أختلاف ويميزنا عن غيرنا، ما يحتاج أغير من نفسي وأتشبه بفلان شخص بس علمود النّاس تتقبلني، إذا أنت ما تقبلت نفسك من داخلك، بعمرك لا تتخيل المحيط يتقبلك، قيمتك وحبك وفخرك ومحاولاتك إذا ما چان منبعهن ذاتك، فَ كلشي راح يكون مؤقت وينتهي شي يوم، بكلّ واحد بينا "أنطوىٰ العالم الأكبر" بداخله لا تنسىٰ هالشي.

"أحتمي خلفَ اللحظاتِ الوديعة خشيةَ أن تحتلَ قلبي الأيّامُ الشاحِبة."

وأني أقرا هالأقتباس تذكرت إنو كلّ ما يصيرلي حدث سيّئ أتذكر النِعم الّي عندي، واللحظات الحلوة الّي عشتها قبل هالحدث، وأخلي أبالي شگد ما يطول هالسيّئ مصيره ما يدوم وأطمئن، وما أجه هالأمر بيوم وليلة وإنما بتدريب ومحاولات يلا ضبطت بالأخير.

بگد ما أكره الماضي بگد ما حاولت وأحاول لحد هاللحظة ما أخليه يلحگني للحاضر ويوگفني.

تذكير اليوم:

ـ تگدر تتجاهل أي مكالمة/رسالة مزعجة وما ترد عليها ولا تخليها بقائمة المحادثات.
ـ تگدر تمسح الرسائل الّي ضايقتك وسببتلك شعور عدم الراحة.
ـ تگدر تقفل بابك بوجه أي شخص أذاك وعيشك علاقة سامة.
ـ تگدر تاخذ إستراحة تعيد أفكارك ونشاطك بيها.
ـ إذا قرار التغيير بيدك فَ تگدر تغير الّي ما يعجبك.
تگدر تغير مكانك، وتغير طريقك وتستبدل الّي حواليك إذا ما حسيت بالأمان.
ـ تگدر تسد الصفحة الّي زاعجتك وقالقة راحتك وتستبدلها بورقة بيضة تمليها باللي يناسبك وتحبه.
ـ تگدر تعيد المُحاولة إذا الطريق يستاهل.

من تكون عندك القدرة، والفرصة من جانبك حتّىٰ تغير لا تگول "شلون" والحل واضح وبس يريد المبادرة منك، ذكر نفسك دائمًا، من أنت تگدر يعني أكو حل وإذا ماكو أصنع حل.

أحِب شخصيتي الّي تكون علىٰ حقيقتها بدون تكلف ومبالغة، شخصية علىٰ طبيعتها من تحچي وتصرف وبكل أريحية، أحِب النّاس الّي تخليني بهيچ موضع ونفسية مرتاحة، أحِب هالنوع من الحقيقة الّي أكون بيها أني.

صارلي أيّام أمر بفترة ركود، مالي طاقة تخليني أسوي شي حتّىٰ لو أحبه، رغم أبالي شنو أريد أسوي بس يحتاج الفعل مني، حاولت أفهمني أكثر، وليش هيچ أحس رغم ما جاهدة نفسي أخر فترة، جربت إنو اسأل داخلي شنو يحتاج ويريد، أفهم نفسي أكثر، وشنو الّي أثر عليها، أدور علىٰ رغبتي بين الأشياء الأحتاجها، وشنو ممكن يصير وأسوي من بعد هالركود والأدبار الّي حصل، مثلًا هسّة أكتشفت إنو الأنستا مأثر عليه ومخليني أريد كلشي يمشي بسرعة وأني واگفة، ريلزات الأنستا القصيرة خلتني ما أكمل مقطع حتّىٰ لو چان ٥ دقايق، ولا إلي رغبة أقرا كتاب من الكتب الّي چنت أحسب يوم يوم شوكت أقراها، هالدهاليز الّي بالداخل والّي أحاول أكتشفها أكثر، توصلني لنقاط أگدر أعالجها بس يحتاج "أبدي"، ومنها ركود الخارج إذا تصلح معناها عواصف الداخل هدئت.

ـ شلون ينتقل الدم داخل القلب؟.

= مثل ما نعرف القلب يتكون من ٤ حجرات،
٢ بالجزء العلوي الّي هنَّ
"الأذين الأيمن والأذين الأيسر
Right Atrium + Left Atrium"
و٢ بالجزء السفلي الّي هنَّ
"البطين الأيمن والبطين الأيسر
Right Ventricle + Left Ventricle"

القلب راح يستلم الدم من مكانين، مكان من الجسم عن طريق الأذين الأيمن "Right Atrium" من خلال وريدين كبار الّي هنَّ
"Inferior and Superior Vena Cava"
ومكان ثاني الّي هوَّ من القلب نفسه، بأعتبار الدم هم يغذي عضلة القلب مو بس الجسم.
فَ ينتقل الدم من الأذين الأيمن إلىٰ البطين الأيمن يعني من العلوي إلىٰ السفلي وراها ينتقل إلىٰ الرئة، بعدين من يستلم الدم المؤكسج من الرئة راح ينقله للـ أذين الأيسر والّي بعدها ينتقل إلىٰ البطين الأيسر ومنها يمر بصمام اسمه "Aortic Valve" هوَّ واحد من الصمامات الّي تنظم تدفق الدم عبر القلب.

وهنا الدم من عبر بالصمام يروح للجسم.

ـ هذا كله شلون يصير؟ حركه الدم داخل القلب ومن مكان لمكان؟

= يتم من خلال تقلصات عضلات القلب، والّي يتحكم بهاي التقلصات هيَّ موجات كهربائية يكون مصدرهن من العقدة الجيبية الأذينية
"Sinoatrial (SA)Node"
الّي هوَّ المنظم لنبض القلب، بعدين يرحن للعقدة الأذينية البطينية
"Atrioventricular (AV) Node"
وهنا بالـ AV Node راح تتأخر الموجة شوية وراها تنتقل بسرعة چبيرة من خلال نسيج موصل وتنقلنا الإشارات الكهربائية من الأذينين إلىٰ البطينين. أضافة إنو الـ AV Node تتحكم بمعدل ضربات القلب.