ياحسين

للدفن



جثته بالحصيره حسين
من الگاع لمّوها
جثته بالحصيره حسين
من الگاع لمّوها

🏴🏴


جثته تارسه الحومه
عليها جامده دمومه
وضلوعه المهشومه


ضلع هناك ضلع هناه
منّا لمّوا  ومنّاه
صدره طالع لمگفاه


شافوا ناقصه ضلوعه
ويّه السحگ مشلوعه
حته متونه مخلوعه

توگع من يشيلوها


🏴🏴

شلون يوسده بالحفره
وجسمه مگطّع بكبره
بالخيل انطحن صدره

ماكو امچان لوليده
فوگ اضلوعه يريده
اوريد ابنه عله وريده

مذبوح وشبگ مذبوح
مجروح بحضن مجروح
جروح اتسولف اويه جروح

اسم الله لا يلچموها

🏴🏴

دم يابس عله المنحر
ريحة مسچ والعنبر
ماينحمل هلمنظر

حسين مسلّبه هدومه
ومغسّل من ادمومه
عليه  لرماح ملمومه

والمثلّث ابنص صدره
طالع چبده من ظهره
واويلاه شيجرّه

ضلوعه وياه يجرّوها

🏴🏴

يادفان ابو اليمه
براضه لمن تلمه
حافر ساحگ بجسمه

دور اشراح من جثته
خاف الخيل ماخذته
والتربان دافنته

عرض وطول طشّنّه
صوب النهر ودّنّه
جسمه شويه ظل منّه

ضلوعه وين تلگوها

وا حسيناه
وا مظلوماه

🏴🏴


ام محمد الحجاج


http://www.tg-me.com/ommohamadalaebaadey

نعي لدفن الاجساد الطاهرة

  اجه الإمام زين العابدين عليه السلام يوم ثلثطعش يدفن اهله وعمامه وانصار ابوه  .... بهل حين لگه بني اسد يردون يدفنون الاجساد  ... توسط مولاي بينات الجثث  وصاح......



يهل الشيم مووكت نومه

تدرونّي ما بيه گومه

وكت المعاتب هاذ يومه 



حيهم اصيح وماتگعدون

يهل المروه ماتفزون

شصار بحرمكم كون تدرون



جاء لدفن الأنصار توسط بينهم ونادى برفيع الصوت ودموعه تسيل على لحيته المقدسة   ..... قال بلسان الحال.....


اجيت الليله ادفنكم يالاحباب

الله يعين گلبي بهاذ المصاب

على عزازي اهيلن بيدي لتراب



دفن اصحاب ابوه ويجري دمعه

گعد يم الانصار ومحني ضلعه

عفتوني وحيد شلون فجعه



ولما فرغ من دفن الانصار جاء لدفن اخيه علي الاكبر عليه السلام   قال بلسان الحال


اگعد شوف حالي ياعضيدي

عفتني ياعلي الاكبر اوحيدي

ريت السيف خويه حز وريدي 

او وياكم خذت روحي المنيه



ولتني الگوم من بعدك يالاكبر

الماعده اخو يمناه تگصر

اگعد شوف حالي يالمشكّر

يرخه احزام ظهره الراح اخيه



ولما فرغ من دفن علي الاكبر  توجه للقاسم  وقف بالقرب من جسده وراه مقطع بالسيوف ومطعون بالرماح  .... وكأني به يقول    .....


يالنايم بحر الترايب

ياترف من الشمس ذايب

زفوك جاسم للحرايب

وامك مشت عنك سبيه



عريس للحومه يزفوه

من دم وريده ليش حنوه

بيوم العرس جسام ذبحوه

وبالشمس يمدلل رميه



ثم توجه الى شاطيء الفرات  وهو بأي حال منكسر يرتجف من شدة مااصابه من اللوعة والحسرة  وصل الى عمه العباس  انحنى على الجسد  وجلس  يبكي بكاءا عاليا  ويقول بلسان الحال  ........


فك عينك يبو الشيمه عليه

ماتنشدني وين الهاشميه

اختك مشت عنك سبيه

يحدون بيهه ارذال اميه



اختك مشت للكوفه اسيره

فروها من ديره لديره 

مچتوفه اخت شيخ العشيره

وامتربه مثل الفقيره



تتلافت ومحد تبعها

تعاتب اخوها وما سمعها

يوم الشمر طگها ودفعها

مكسور اظن عمي ضلعها



ثم توجه الى الجسد المقدس وصل الى المولى ابي عبدالله الحسين عليه السلام  ..... رمى بنفسه على  الجثمان الطاهر وهو يبكي بكاءا عاليا   وكأني به   يقول  .......

جسمك يبويه شلون المه

ومطحون لحمه ويّه عظمه

والرمل يابس فوگ دمه

للغسل ماصحّت اميّه

.....
.....

ماضل كتر سالم واشيله

والخيل رضت مفاصيله

ممرود يابويه اعله حيله

كون اتحضر ليك الزچيه

.....
.....

شمسويه بويه بصدرك الخيل

مرضوض ماضلن مفاصيل

عوانه اريد لجسمك اتشيل

هدتلي حيلي هالرزيه

.....
.....


قال يابني اسد هل عندكم بارية قالوا وماتصنع بها يبن رسول الله  قال اجمع بها جثة ابي الحسين  لانه كلما حملنا منه جانب سقط جانب  الا ترون ماذا فعلت به السيوف والرماح وكيف رضته الخيول  .... قال مولاي السجاد  بلسان الحال .....


بغير تغسيل
يامظلوم ليش بغير تغسيل

مراكض الخيل
عظامك طحنه مراكض الخيل

المدمع يسل
لم جثّته والمدمع يسيل

.....
.....

شاله ابّاريّه ونزّله بگبره 

وگعد يم الگبر ينحب بعبره

من وسد وليده بكتره

.....
.....

شصاير بلونك يالزغيرون

نايم ثلث تيام بالكون

بالمهد المثلك ينامون


لاحول ولا قوة الا بالله العلي العظيم 

انا لله وانا اليه راجعون
.....
.....


ام محمد الحجاج/ العبادي

هذا الخطيب فاقد لاخلاقيات وادب الشعائر

ولايستحق ان يصعد المنبر الذي طالما جسد مفاهيم الاسلام المحمدي الحقيقي

لايفقه ابجديات ثورة عاشورء


كونوا زيناّ لنا

عن الامام الرضا عليه السلام

من تذكّر مُصابنا وبكی لِما ارتُكِبَ منَّا
كانَ معنا يوم القيامة ، ومن ذكرنا وبكی وابكی لم تبكِ عينه يومَ تبكي العيون ، ومن جلسَ مجلساً يُحيی فيهِ امرنا لم يمُت قلبه يوم تموت القلوب .

نعي لدخول السبايا الى الكوفه
حوار بين مولاتي رقيه ومولاتي العقيله زينب عليهما السلام


.....
.....


قالت مولاتي رقيه عليها السلام

عمه زينب موش بالكوفه ابوچ
طروش وديله يگللوله سبوچ
يحضر يخلصنه  وابنيات اخوچ
ودي مرسولچ يعمه بالعجل

.....
.....

يسرع يخبره يحماي الدخيل
حمل زينب ياعلي كلچ ثجيل
مگيّده اعله الناگه والناگه تميل
شلون ياحيدر ومچتوفه بحبل

.....
.....

قالت مولاتي زينب  عليها السلام

عمه وديت لعلي خط العتب
گتله ياحيدر الكوفه جاي اطب
جيت مسبية ودمع عيني يصب
مدري مكتوبي وصل لو ماوصل

.....
.....

عاليات النوگ وانه مچتّفه
واليتامه بالشموس مچشّفه
من وصل مكتوبي ياحيدر عفه
حيف ابو الحملات لسه ماحمل

.....
.....

ماگلت عونج يحيدر من نخيت
وانه مسبيه يبو الحملات اجيت
موش گتلك بويه مهظومه وبچيت
تری كل ساعة يعيرني النذل

.....
.....

قالت مولاتي رقيه عليها السلام

شلون عمه لو خذونه للقصر
بين شمات ويشتّمنه الشمر
وتنشد الناس اعله زينب والخدر
ليش مسبيه اجت وين الكفل.

.....
.....


عمه زينب للقصر مچتوفه اطب
يشوفني ابن زياد والناس الغرب
بين هاي الوادم بصوط انضرب
وين حماي الحمه خير العمل


.....
.....



هنا مولاتي زينب عليها السلام وجهت وجهها ناحية النجف وكاني بها 😭😭



يبويه شأخرك ماجيتنه بساع
تنزلنه يحيدر عاليه النوگ
تتفرج علينه طلعت الناس
دخيلك ياعلي من دخلت السوگ
عيني للغري تتفكر اليوم
وبجمر الهظايم گلبي محروگ
يحامي الجار بالكوفه ونخيناك
تفزعلي وتفك الحبل والطوگ
ترضى شلون فرجه نصير لناس
واتعاين عله ابناتك المخلوگ
راح الحيل مني وخدري ماراح
بس گلبي يبويه بعبره مخنوگ
امس بالكوفه اميره اليوم طبيت
مسبيه وعليّه الهضم ميلوگ
يحماي الدخيل وحامي الجار
وللينخاك بويه اتطلع الحگوگ
بناتك يالصميدة اليوم اسيرات
مكسورات خاطر حگنه مبيوگ
والشمّات يابو الحمله صفّين
تعال اسمع علَينه اشتحچي الحلوگ
الحچي يوجع ويوجع شَمر الحجار
وبمتوني يبويه صارن اشگوگ


لاحول ولاقوة الا بالله العلي العظيم

عظم الله اجوركم واجورنا



.....
.....

ام محمد الحجاج /العبادي



https://www.tg-me.com/ommohamadalaebaadey

نعي لسان حال مولاتي زينب عليها السلام
من وصلت للكوفة  والناس طلعت تتفرج علی السبايا مولاتي تذكرت بالامس كانت اميرة الكوفة واليوم تاتيها علی ظهور عجف النياق  . تلتفت يميناً ويساراً لم تجد  احداً ذو رحمٍ  يرأف بحالها ويرق قلبه عليها  ..   كاني بها  قالت والالم يحرق قلبها والحسرة  بانت بعينيها   ..


آه   آه   آه  يامولاتي


حسبالي هلي يتبعون ظعني
لسه ولا زلمه ال تبعني
ابوي اظنّه ماسمعني
درب السبي ذلّه شبعني

🏴

ياحيدر بطرگ العبايه
طبيت آنه والسبايه
وجه الخدر يتبدّه مايه
لاهودج او  لا فوگه رايه


🏴

بويه
گوم واستقبل بناتك
غطّيهن بهيبة عباتك
ياحيدر وداعة غلاتك
الهظم مسنه ورايداتك

🏴

ممشه البراري ماهو انّه
من الفشل ميتات چَنّه
حته الهزل ونن الونّه
يابويه اجاك اعتاب منّه

🏴

امن المستحه يبست لهاتي
اخاف الهوه يحرّك عباتي
نندب الغوث آنه وخواتي
ماگلت حي الله بناتي

🏴


ماندري بعد الكوفه لا وين ؟
چم ليله چم يوم  ومرحلين ؟
مانعلم ليا ديره ماشين
ياعلي جاي ادخل دواوين

🏴


لا حول ولا قوة الا بالله العلي العظيم

ام محمد الحجاج



https://www.tg-me.com/ommohamadalaebaadey

خروج ضعن السبايا من الكوفة إلى الشام

🏴



يبو الحملات جاي اطلع أمن الكوفه
تتفرج صفوف الناس مصفوفه


🏴🏴


علينه التمت الشمات من كل صوب
تعال أدرك بناتك خايفه وتلوب
جاي امشي يبويه دروب لاهي دروب
ياضيم البعد ماشفنه ونشوفه

🏴🏴


صفين الخلگ ملتمه للفرجه
أمن أهل الكوفة ياحيدر اشتترجه
مشامر بالحچي صار السلف ضجه
وضعننه الجاي والرايح غده يطوفه

🏴🏴


ندبتك ياعلي شلون اصعد الناگه
وعيني بعين هاي الناس تتلاگه
حادي اليسر طووح والضعن ساگه
وبناتك عالهزل ودوها مچتوفه

🏴🏴


مشيت او لا علم لاكافل ال وياي
ماصارت يهل زينب گبل من هاي
علويه وسبيه ياعظم بلواي
چم جرح بدليلي ياعلي وخوفه

🏴🏴


چم جرح بدليلي والعتب يوجع
ضعني بلايه كافل ياهلي يرجع
يانوح اليطفي النار يامدمع
وچفيلي ماتباري محملي
چفوفه

🏴🏴


ثجيله حمولي يابويه وردت عونه
نتلافت واهلنه ما يتبعونه
يرد بضعونه كون الكافل ضعونه
ظلت رايته اعله الشاطي ملفوفه

🏴🏴


أم محمد الحجاج

https://www.tg-me.com/ommohamadalaebaadey

زماني شمره عن اهلي شِمرني
اسيره امشي وعلی الحومه شِمرني
اگل عباس من عگبك شمرني (شامرني )
الشمر ياخويه وشينهی عليّه


آه يامولاتي يازينب


ما لايگه لزينب
(سبيه)


ام محمد الحجاج

طريق الشام

نعي
😭😭


درب الشام مايرّاد
ابد ماماشيته آنه

مره وتمشيه ابلا وليان
تشبع هظم وامهانه

درب يرّيد زلم اسباع
يمن كون الله گوانه

وينطينه الصبر والحيل
نمشي وزجر ويانه

الهزل ويلاه وممشه الليل
منهه نطيح خلانه

مضلعه وظلمه درب البر
والنسوان تعبانه

هزل نوگ الصعدناها
وامن السير هلكانه

ليل وخطر  ممشه الليل
والايتام نعسانه

تغفه عله ظهور النوگ
من گد ماهي جوعانه

لو عثرت الناگه تطيح
اطفال ونسه بممشانه

عمه تصيحلي اسمعها
الضعن مايرضه يتوانه

ورمح الشال راس حسين
التفت من هييس ابچانه

عجز ماحرّكه  الشيّال
ظل الرمح بمچانه

عين يديرهه اعله اخته
ويتفگّد برضعانه

سمع بنته رقيه تصيح
يا بويه رقية آنه

🏴🏴

عظم الله اجورنا واجوركم


ام محمد الحجاج 

https://www.tg-me.com/ommohamadalaebaadey

اَللَّـهُمَّ ارْزُقْنِي شَفَاعَةَ الْحُسَيْنِ يَوْمَ الْوُرُودِ، وَثَبِّتْ لِي قَدَمَ صِدْقٍ عِنْدَكَ مَعَ الْحُسَيْنِ وَأَصْحَابِ الْحُسَيْنِ اَلَّذِينَ بَذَلُوا مُهَجَهُمْ دُونَ الْحُسَيْنِ عَلَيْهِ السَّلامُ..