#قصص_الأنبياء(٢)
#السيرة_النبوية
#الحلقة_الأولى
#قبل_مولد_رسول_الله(١)
#أصحاب_الأخدود(١)

إن شاء الله هنبدأ النهاردة الجزء الأول من السيرة النبوية،
السلسلة دي تكملة لقصص الأنبياء،
لأن السيرة النبوية طويلة وفيها تفصيل كبير فخليتها سلسلة لوحدها😉
وطبعا هيدخل معانا قصص القرآن يعني هنحكي قصص القرآن واحنا بنحكي السيرة، لأن القصص دي لها أسباب نزول فلما نوصل للأحداث بتاعتها هنقولها إن شاء الله😊


في نقطة لازم أوضحها قبل ما نبدأ وهي إن السيرة دي مش حكاية بنسمعها ..السيرة النبوية دي دييين 👌
رسول الله صلى الله عليه وسلم قال :
"ألا إني أوتيت القرآن ومثله معه"
يعني ربنا أنزل القرآن إللي هو الوحي الأول وكمان وحي ثاني وهو السنة أو خلينا نقول السيرة،
يعني قصة حياة رسول الله صلى الله عليه وسلم إللي بتشرح القرآن وتوضح معناه👌
فانتي لما تقرإي السيرة معانا تبقى نيتك طلب العلم لأنك بتتعلمي دينك...بتتعلمي القرآن والسنة إللي فيهم كوووول أحكام الإسلام😉
والإيمان لا يكتمل إلا بحب رسول الله صلى الله عليه وسلم،
ومش أي حب😀
ده حبه لازم يكون مُقدم على كل حب في حياتك ،
فإزاي هتحبي حد وانتي متعرفيش عنه أي حاجة 🤷‍♀️

يعني إننا نتعلم السيرة ده مش حاجة اختيارية ده فرض علينا💁‍♀️
عارفين ليه؟
لأن احنا عندنا امتحان مكون من ثلاثة أسئلة لازم نجاوب
عليهم ..لو مجاوبناش على الأسئلة دي هنتعذب في النار😱
الأسئلة هي : من ربك..من نبيك ..ما دينك؟

احنا سهل أوي نجاوب عليها دلوقتي لكن في القبر غييير😶
هتجاوبي إزاي على من ربك وانتي متعرفيش أي حاجة عنه ولا من نبيك وانتي متعرفيش سنته ولا حياته ولا بتعملي زيه،
هتجاوبي إزاي على ما دينك وإنتي متعرفيش عن الدين إلا حاجات متفرقة من هنا وهنا😕
فاعملوا حسابكم إنكم بتتعلموا دينكم 👌
طبعا هعتمد على الأحاديث الصحيحة وأنا بشرح ولو في أحاديث ضعيفة مشهورة بين الناس،
هقول لكم يا جماعة خدوا بالكم الحديث ده ضعيف...زي حديث الحمامة إللي باضت والعنكبوت إللي عمل خيوط على باب الغار لما رسول الله صلى الله عليه وسلم كان مهاجر واختبأ فيه...الحديث ده ضعيف مع إنه مشهور بين الناس😉

وإن شاء الله هنربط السيرة بالواقع بتاعنا عشان نقدر نخليها منهج نقدر نطبقه في حياتنا 👌

قبل ما ندخل في تفاصيل السيرة نعرف الأول إيه إللي حصل بعد رفع عيسى عليه السلام وإزاي النصرانية انتشرت مع إن اتباع عيسى عليه السلام كانوا قليلين🤔

☆ممكن واحدة تسأل طيب وده إيه علاقته بالسيرة 🤨
بكل بساطة لسببين:
الأول إن في أحداث حصلت مذكورة في القرآن وقبل ما يُولد رسول الله بسنين طويلة زي قصة أصحاب الأخدود💁‍♀️
وكمان قصة أصحاب الفيل.
الثاني : عشان نعرف الأرض كانت عاملة إزاي في الوقت ده😑
ونشوف كمية الكفر والفجور إللي كان على وجه الأرض لدرجة إن رسول الله صلى الله عليه وسلم قال:
"إن الله نظر إلى أهل الأرض فمَقَتَهم عربهم وعجمهم إلا بقايا من أهل الكتاب". 《صحيح مسلم》
والمقت معناه شدة الكراهية...يعني ربنا نظر لأهل الأرض قبل البعثة النبوية فكرههم لشدة كفرهم وطغيانهم في الأرض،
فطبعا لازم نعرف الأرض كانت عاملة إزاي ،
عشان نشوف الفرق إللي هيحصل لما رسول الله صلى الله عليه وسلم يُبعث بالرسالة،
وهل احنا عندنا أمل إن حال الأمة يتصلح ونقدر نرجع الناس للدين تاني ولا لأ👌

بعد رفع عيسى عليه السلام تفرق الحواريين وبقوا يدعوا الناس للنصرانية،
وكان لهم أتباع ولكن اليهود مكنوش بيسيبوهم كانوا بيحرضوا الملوك عليهم ،
وإن الناس دي هيخربوا ملكك فكانت الملوك تعذبهم من يتبع الحواريين فكانوا بيؤمنوا في السر،
والحواريين نفسهم اتعرضوا للتعذيب الشديد جدا،
فهربوا لأماكن مختلفة من العالم وبدأوا ينشروا النصرانية بين الناس،
ومع مرور الوقت تعرضت النصرانية لتحريفات كثيرة،
لأن الإنجيل لم يُكتب هو كمان زي التوراة،
وكانوا بيعلموا بعض النصرانية عن طريق رسائل بيبعتوها لبعض،
وبعد مائتين سنة من رفع عيسى عليه السلام كتبوا أناجيل كثيرة جدا،
وطبعا فيها تحريف كبير جدا😶
وقالوا إن عيسى ابن الله وكلام كتير كده مش موضوعنا
فالنصارى بدأوا يتفرقوا في الأرض ويعبدوا ربنا منعزلين عن الناس ،
《راجعوا سلسلة خط الزمن لدكتور راغب السرجاني》

وكان في ناس قليلة جدا جدا هي إللي استمرت على دين عيسى عليه السلام الأصلي بدون أي تحريف👌
وكان في برده أحبار يعني علماء من اليهود بيسافروا من مكان لمكان عشان ينشروا اليهودية ويعرفوا الناس الدين،
في اليمن كان في ملك اسمه ربيعة بن نصر ،
شاف رؤيا فجمع الكُهّان والسحرة ففسروا له الرؤيا بإن الأحباش يعني أهل الحبشة هيحكموا اليمن،
فخاف على أهله وذريته فأرسلهم للعراق يقعدوا هناك،
وهو استمر يحكم اليمن ومات ربيعة بن نصر وجاء بعده أبناؤه حكموا اليمن،
وكان من أبناؤه إللي حكموا واحد اسمه أسعد ولقبه تُبَّع وكان مشرك وكان بيسافر للتجارة،
ففي مرة وهو مسافر مر على المدينة وساب ابنه فيها للتجارة،

فاختلف مع أهل يثرب فقتلوه، فرجع لهم تُبّع عشان يقاتلهم ويخرب يثرب،
فلما وصل وحاصرهم طلع له اثنين من أحبار اليهود وقالوا له إنه مش هيقدر يخرب يثرب عشان البلد دي هيهاجر لها نبي في المستقبل،
فقال لهم وإنتم عرفتم منين 🤨
فقالوا عندنا في التوراة مكتوب الكلام ده😤
"أَوَلَمْ يَكُن لَّهُمْ آيَةً أَن يَعْلَمَهُ عُلَمَاءُ بَنِي إِسْرَائِيلَ"

فسألهم يعني إيه توراة فشرحوا له التوحيد فعجبه الموضوع ودخل في اليهودية👌
وأخذ العالمين دول معاه عشان يعلموا أهل اليمن اليهودية،
وهم ماشيين مرّوا على مكة فكان عايز يهدم الكعبة فأحبار اليهود إللي كانوا معاه قالوا له : متعملش كده ..ربنا هيهلكك لأن مفيش على ظهر الأرض بيت لله غير ده،
لكن طُوف به وعظّمه،
فكان تُبّع ده أول واحد كَسى الكعبة، الكعبة كانت حجر عاري كده من غير أي حاجة لحد ما كساها تُبّع ملك اليمن،
ولما وصل لليمن بدأ يدعو قومه لليهودية فآمن معه معظم الناس ،
وبعد ما مات تُبّع الناس كفروا فربنا عاقبهم وأهلكهم.
"أَهُمْ خَيْرٌ أَمْ قَوْمُ تُبَّعٍ وَالَّذِينَ مِن قَبْلِهِمْ ۚ أَهْلَكْنَاهُمْ ۖ إِنَّهُمْ كَانُوا مُجْرِمِينَ"

مرت السنين بعد بعثة عيسى عليه السلام والناس من أهل اليمن كانوا متفرقين وكان في قاطع طريق ومعاه عصابة فوسط التفرق ده جمع عدد أكبر من أفراد العصابة واستولى على الحكم ،
وكان الرجل ده ظالم والناس كلها بتكرهه،
في واحد من سلالة تُبّع اسمه ذو نُوّاس تَسلّل للرجل ده وقتله واستعاد حكم اليمن تاني،
في نفس الوقت ده كان في راهب من رهبان النصارى على التوحيد على دين عيسى عليه السلام،
كان مهاجر من بلاد الشام طلع عليه قُطّاع طُرق أخذوه وباعوه في حتة اسمها نجران في شبه الجزيرة العربية،
فكان بيشتغل عند سيده ويتعبد وقت فراغه،
فدخل عليه سيده في يوم في الليل لقى حواليه نور،
كان الراهب ده له كرامات،
فالرجل سأل الراهب إنت إيه حكايتك ..فالراهب شرح له التوحيد ودين عيسى عليه السلام،
فالرجل تردد وكان عندهم شجرة بيعبدوها ، فالراهب قال للرجل لو إلهي أهلك إلهك تعبد إلهي 🤔
فالرجل قال له ماشي 😕
فالراهب قال للرجل اجمع الناس ..فبدأ الراهب يصلي ويدعو لحد ما ربنا أنزل صاعقة من السماء وأحرقت الشجرة فدخل أهل نجران كلهم في النصرانية😮

☆عايزاكم تركزوا في تسلسل الأحداث وتشوفوا إزاي إن ربنا لما يريد شيء بيهيء أسبابه👌

في بعض الرهبان من أهل نجران بدأوا يسافروا هنا وهناك عشان يدعوا لعبادة الله على دين عيسى عليه السلام،
من الرهبان دول واحد راح لليمن عند الملك ذو نواس،
فكان ذو نواس ده كافر وطبعا السحر والكهانة كان حاجة أساسية في تثبيت ملكه بين الناس،
فكبير السحرة قال للملك ده :
أنا كبرت في السن فشوف لي ولد صغير كده ذكي أعلمه السحر ويبقى خليفة من بعدي يساعدك،
فلقوا غلام فعلا واضح عليه علامات الذكاء، وبدأ الساحر يعلمه أمور السحر،
في يوم من الأيام والغلام ماشي عدى على صومعة لراهب،
فسمع الغلام صوت حد بيتكلم وبيدعي،
فلقى رجل فسأله الغلام إنت بتعمل إيه هنا فقعد يشرح له التوحيد ودين عيسى عليه السلام،
فالولد كان بيروح للساحر متأخر فكان بيضربه،
ولما كان بيرجع لأهله متأخر كانوا بيضربوه، فاشتكى للراهب فقال له قل للساحر أهلي إللي أخروني،
وقل لأهلك الساحر هو إللي أخرني ومحدش هيعمل لك حاجة،
مرت الأيام والغلام بيتعلم من الراهب والساحر،
ففي يوم وهو ماشي لقى الناس متجمعين ومش عارفين يكملوا طريقهم بسبب إن في دابة كبيرة سدت عليهم الطريق،
حيوان كبير يعني ويُقال إنه كان أسد والله أعلم 🤷‍♀️

فالغلام قال : النهاردة أعرف الساحر أفضل ولا الراهب أفضل👌
فأخذ حجر من الأرض ودعا ربنا وقال : يارب لو أمر الراهب أحب إليك من أمر الساحر فاقتل الدابة دي ورمى الحجر على الدابة فقتلها😮
والناس شافت إللي حصل وكل واحد مشي في طريقه وهم بيتكلموا في إللي حصل،
فالغلام راح للراهب وحكى له إللي حصل،
فالراهب قال له: بص يابني إنت بقيت أحسن مني وربنا أجرى على إيدك المعجزات،
فانت هتُبتلى ..لأن الإنسان يبتلى على قدر دينه،
فلو ابتليت متقولش لحد على مكاني ولا تقول إنك تعرفني،👌
وكان الغلام يُشفي الناس من البرص ويرجع للأعمى بصره ويشفي الناس من أمراض كثيرة ..طبعا كل ده بإذن الله،
هي كرامات ربنا بيثبت بها قلب الغلام الصغير،
فمين إللي سمع بموضوع الغلام إنه بيشفي الأعمى، واحد من جلساء الملك وكان أعمى،
فراح للغلام البيت بتاعه وأخذ معاه أموال وكنوز كثيرة ودخل على الغلام وقال له:
شوف كل الأموال والكنوز دي لك لو إنت شفيتني،
فالغلام قال له :
أنا مش بشفي حد..ربنا هو إللي بيشفي فلو إنت آمنت بالله أنا هدعو الله لك إنه يشفيك،
فآمن جليس الملك وربنا رد عليه بصره، وراح يقعد مع الملك زي ما بيقعد معاه كل يوم،
فالملك بص له واستغرب وسأله : من إللي رجع لك بصرك🤨
فالرجل قال له: ربي😤
فالملك قال له : وإنت عندك رب غيري🤔
فالرجل قال له : ربي وربك الله😤

فالملك قعد يعذبه لحد ما دلّهم على الغلام 😑
فالملك عارف الغلام ..ده ساحر المستقبل 💁‍♀️

فأمر الجنود إنهم يجيبوا الغلام، فلما جاء الغلام الملك قال له:
إنت وصل من سحرك إنك تشفي الأبرص وترجع للأعمى بصره وتعمل الحاجات دي كلها😈
فالغلام قال له: أنا لا أشفي احد..ربنا هو إللي بيشفي😒
فالملك قعد يعذب الغلام لحد ما دلهم على الراهب😮
فجابوا الراهب وقالوا له يا ترجع عن دينك يا إما هنقتلك،
فقال لهم : مش هرجع عن ديني😤

فجابوا منشار وبدأوا ينشروا الراهب من رأسه لحد ما سقط نصين..قصاد الغلام وقصاد جليس الملك كنوع من الإرهاب والتخويف يعني عشان يرجعوا،
فالملك قال لجليسه ترجع عن دينك ولا تُقتل زي زيه،
قال :مش هرجع عن ديني، فنُشر بالمنشار هو كمان😶

مش باقي غير الغلام..الملك مش عايز يخسره وخصوصا إنه لسه صغير😕
فالملك قال نهدده بالقتل يمكن يرجع،
فأمر الجنود إنهم يأخذوا الغلام ويطلعوا على قمة جبل ويحاولوا يقنعوه إنه يرجع عن دينه،
ولو رفض خلاص اقتلوه..فلما طلعوا على قمة الجبل الجنود هددوا الغلام قالوا له :
ترجع عن دينك وتبقى مُقرب من الملك وخليفة الساحر ولك شأن بيننا ولا نرميك من الجبل ده😈

يا ترى هل الغلام هيوافق إنه يرجع عن دينه ويعيش مُنعم في الدنيا ولا هيختار الموت؟

ده إللي هنعرفه الجزء الجاي إن شاء الله😊




#السيرة_النبوية
#ايمان_شلبي

*كيف نتغلب على اليأس بعد كثرة الدعاء وعدم رؤية الاستجابة ؟*
رااااااااائع نفعنا الله به🍃

💎💎 يُنْبِتُهَا مِنْ شُقُوقِ الصَّخْرِ لِيُخْبِرْكَ أنْ لا تَيْأَس ! صبحكم الله بفرجه وجبره 🤍

موعظة عظيمة لكل مرأة 💔

(لنختم القرآن سماعا)

الورد (١٥٠)

(الربع الثاني & الحزب الثامن والثلاثين)

#القارئ: عبدالله الخلف
#ليدبروا على التليجرام
https://www.tg-me.com/GhRoooh/11905

إن لم ترغب بتحميل الملف الصوتي:
فتابعه مباشرة(مكتوبا) على اليوتيوب👇🏻

https://youtu.be/BTnQngE9O_0?feature=shared

#صباحكم_قرآنٌ_يُتلى

قصص الأنبياء بقلم إيمان شلبي بالعامية🌴:
#قصص_الأنبياء(٢)
#السيرة_النبوية
#الحلقة_الثانية
#قبل_مولد_رسول_الله(٢)
#أصحاب_الأخدود(٢)

وقفنا المرة إللي فاتت عند الغلام لما جنود الملك أخذوه وطلعوا به على قمة جبل وبدأوا يساوموه..يعني يقولوا يابني اعقل وهتبقى إنت الساحر وهتبقى كلمتك مسموعة، ده غير النعيم إللي هتكون فيه،
ولو مسمعتش الكلام هنرميك من فوق الجبل..

الغلام إللي لسه مبلغش حتى ..يعني عمره أقل من خمسة عشرة سنة عمل إيه؟
بكل هدوووء وثقة ويقين دعا ربنا وقال :
اللهم اكفنيهم بما شئت🤲

☆أصله يا جماعة الموضوع منتهي بالنسبة له..هو عارف إنه على حق ..هو مش دعا ربنا قبل كده إنه يخليه يشوف آية لو الراهب على حق يقتل الدابة 😁

وكانت النتيجة إن الجبل اتهز ووقعوا كلهم وماتوا ماعدا الغلام💁‍♀️
لكن الغلام عمل حاجة غريبة أوي🤨
المفروض والطبيعي إنه يهرب بجلده ويبعد عن الملك وينقذ نفسه🤷‍♀️
لكن الغلام رجع للملك تاني😳

فلما دخل على الملك سأله فين الجنود إللي كانوا معاك😧
قال له الغلام : ربنا كفاني شرهم👌

الملك بقى مش يتعظ ولا حتى يفكر في إللي حصل ولا يسأل الغلام عن دينه🤔

لأ ..ده أمر جنود تانيين إنهم يأخذوا الغلام ويركبوا سفينة ويهددوه بالقتل ...يا إما يرجع عن دينه أو يقتلوه😑
فلما ركبوا السفينة والجنود هددوا الغلام،
الغلام برده دعا: اللهم اكفنيهم بما شئت🤲

فاتقلبت السفينة وماتوا كلهم ماعدا الغلام هو الوحيد إللي نجى😮
مش يهرب بقى... ده رجع تاني للملك😶
فالملك لما شافه سأله فين الجنود إللي كانوا معاك😳
فالغلام قال له : ربنا نجاني منهم👌
وقبل ما الملك يأمر جنود تانيين إنهم يقتلوا الغلام،
قال له الغلام:
شوف إنت مش هتقدر تقتلني إلا لو عملت إللي هقول لك عليه👌
فالملك قال له : أعمل إيه😕

☆الواحد مش عارف يتعجب من مين أكثر ..من الغلام إللي رجع عشان الملك يقتله،
ولا من الملك إللي معندهوش ذرة عقل ومش بيفكر إلا في قتل الغلام ومش قادر يشوف قدرة ربنا ومعجزاته😑

الغلام قال له:
اجمع الناس في مكان واحد واصلبني في جذع شجرة وبعدين خذ سهم من الأسهم إللي معايا وضَعْه في القوس وقل بصوت عالي يسمعه الناس بسم الله رب الغلام وارمني بالسهم ،
لو عملت كده هتقدر تقتلني👌
فالملك جمع الناس وعمل زي ما الغلام قال له بالضبط..وقال بسم الله رب الغلام ورمى السهم فنزل السهم في صُدْغِه فقتله،
وطبعا الناس كانت عارفة إللي بيحصل مع الغلام وإزاي إن الملك مكنش قادر يقتله وإن الجنود هم إللي بيموتوا كل مرة وإنه مقدرش يقتله إلا لما قال:
بسم الله رب الغلام،
فبعد ما قُتل الغلام الناس كلها في نفس واحد قالت : آمنا بالله رب الغلام😮
وهو ده السبب إللي منع الغلام إنه يهرب ..عنده رسالة عايز يوصلها للملك وللناس..الراهب ..المعلم الأول قُتل،
ومفيش غيره ينشر الدين فلو كان هرب مين إللي كان هينقذ الناس دي من ضلال الكفر والشرك👌

بس سبحان الله كل ما أراد إنسان إنه يحارب دين ربنا ..حربه دي بتكون سبب في انتشار الدين أكثر 👌
وموت شخص واحد أهه كان سبب في إحياء قلوب الآلاف 😊

☆نقف هنا وقفة مهمة جدا 👌
طبعا احنا شايفين في واقعنا الأطفال إللي بتُقتل وتُذبح وبتموت من البرد والناس إللي بتُعتقل وبتُعذب وممكن تموت تحت التعذيب،
الناس دي لها رسالة زي الغلام بالضبط...هم لما يُعذبوا أو يموتوا جزاؤهم الجنة إن شاء الله ونحسبهم شهداء،
وربنا بيخفف عنهم ألم التعذيب وألم القتل،
إحنا ممكن نتخيل إنهم بيتألموا ألم شديد جدا ..زي الراهب إللي نُشر بالمنشار نصفين..متخيلين منشار بينشر جمجمة على الحي كده لحد ما يتقسم نصين 😶
الموضوع تخيله بس مرعب..فما بالنا باللي حصل معاه كده فعلا😐
لكن دي من وجهة نظرنا إحنا البشرية ،
أما في حسابات ربنا فالموضوع مختلف تماما، رسول الله صلى الله عليه وسلم قال إن الشهيد مش بيحس بأي وجع إلا زي ماحنا بنحس بوجع القرصة،
فالعذاب والقتل بالنسبة لهم أجر وبالنسبة لنا إحياء لقلوبنا،
لما تشوفي طفل بيموت من البرد ولا إنسان معتقل ولا...ولا...،
قلبك القاسي بيلين وترفعي إيدك بالدعاء للناس دي،
وبيخليكي تشكري نعمة ربنا إللي إنتي فيها وغيرها وغيرها من الحكم التي لا يعلمها إلا الله،
وفي نفس الوقت هو فتنة للناس إللي في قلوبها مرض ونفوسها خبيثة،
عشان ربنا يطلع إللي جواهم عشان يُقيم عليهم الحُجة لما يقولوا هو فين ربنا ..وفين رحمة ربنا..وإزاي ربنا يقبل بالظلم ..وإزاي...وإزاي...

ربنا مش بيقول لنا القصص من باب التسلية...القصص للعبرة.. لكن العبرة لمن يعتبر👌
ربنا حكيم رحيم ولا يرضى بالظلم لكن إحنا إللي مش شايفين حكمة ربنا وبدل ما نتهم عقولنا بالعجز عن فهم حكمة ربنا،
بنَتّهم ربنا بالظلم وعدم الرحمة 😑

أصحاب الملك لما شافوا الناس آمنت قالوا له حصل إللي كنت خايف منه😏
كنت خايف من ثلاثة بس أهه الناس كلهم آمنوا 💁‍♂️

فأمر الملك بحفر الأخاديد يعني حفر طويلة عميقة ويولعوا فيها النار ويسأل الناس إللي يصمم على إيمانه برب الغلام يرموه في النار،
فقتل الملك ده ناس كثيرة جدا،
"قُتِلَ أَصْحَابُ الأُخْدُودِ"
ويُقال إن المحرقة دي مكنتش في اليمن بس، ده حتى في نجران وفي أماكن تانية عشان يرد الناس عن دينهم😞
"إذْ هُمْ عَلَيْهَا قُعُودٌ"
يعني الناس دي كان ذنبها بس إنها آمنت بالله،
مطلبوش ملك ولا فلوس ولا أي حاجة مجرد الإيمان بالله خلى الملك يقتلهم بالمنظر ده😑
"وَمَا نَقَمُوا مِنْهُمْ إِلاَّ أَن يُؤْمِنُوا بِاللَّهِ الْعَزِيزِ الْحَمِيدِ"

المشهد مخلصش يا جماعة..في يوم قيامة..والناس إللي فتنت المؤمنين وعذبتهم دول ربنا هيعذبهم في نار جهنم،
ونار جهنم مش أي نار...ده نار الدنيا بتاعتنا دي جزء من سبعين جزء من نار جهنم👌
"إِنَّ الَّذِينَ فَتَنُوا الْمُؤْمِنِينَ وَالْمُؤْمِنَاتِ ثُمَّ لَمْ يَتُوبُوا فَلَهُمْ عَذَابُ جَهَنَّمَ وَلَهُمْ عَذَابُ الْحَرِيقِ"

والناس إللي اتعذبت وقُتلت دي جزاؤهم الجنة..والجنة دي غمسة واحدة فيها بتُنسي أبأس أهل الأرض بُؤسه وشقاؤه فما بالكم باللي هيعيش خالدا فيها أبدا👌
"إِنَّ الَّذِينَ آمَنُوا وَعَمِلُوا الصَّالِحَاتِ لَهُمْ جَنَّاتٌ تَجْرِي مِن تَحْتِهَا الأَنْهَارُ ذَلِكَ الْفَوْزُ الْكَبِيرُ"

◇ملحوظة:
الحديث بتاع المرأة إللي ابنها تكلم وهو رضيع وقال لها ترمي بنفسها في النار لأنها على الحق حديث ضعيف،
وحتى لو كان صحيح فالرواية بتقول امرأة كان معها صبي،
والصبي هو الصغير إللي لسه بيرضع أو هو الطفل إللي لسه مبلغش،
وده غير حديث لم يتكلم في المهد إلا ثلاثة وشرحناه قبل كده وهو حديث صحيح،
والكلام في المهد معناه إن الطفل بيكون عمره أيام.
《هتلاقوا شرح الموضوع بالتفصيل في موقع الإسلام سؤال وجواب》

☆شوفتم إزاي إذا أراد الله شيئا هيأ أسبابه،
فاكرين الراهب إللي قُطاع الطرق أسروه وبعدين باعوه وبقى عبد،
أكيد ساعتها هو زعلان إن حاجة زي كده حصلت،
لكن شوفوا تقدير ربنا وحكمته...بسبب حادثة بسيطة زي كده،
أهل نجران كلهم آمنوا بسببه وكمان أهل اليمن وحصلت قصة أصحاب الأخدود دي كلها بسببه وفي ميزان حسناته،
ولحد دلوقتي وإلى قيام الساعة هنفضل نحكي قصص الناس دي،
فلما يحصل لك ابتلاء أو أي حاجة ظاهرها شر لكِ متزعليش وأبشري بالخير ..فرب الخير لا يأتي إلا بالخير😊

محدش نَجَى من المجزرة دي غير رجل اسمه دَوْس ذو ثَعلبان،
استطاع إنه يهرب لكن جنود الملك ذو نواس راحوا وراه عشان يمسكوه، فدخل في أرض رملية والجنود معرفوش يمسكوه،
فقعد يفكر يعمل إيه عشان يثأر للناس إللي قتلت ظُلم دي،
ففكر في قيصر ملك الروم وكان على النصرانية،
فراح له دَوس ذو ثعلبان وحكى له إللي حصل فغضب جدا،
لكن قال له اليمن بعيدة ومش هقدر أروح بجيشي هناك،
لكن أنا هبعث معاك رسالة للنجاشي ملك الحبشة وهو يساعدك👌

☆حكام الروم بيُقال لهم قيصر وحكام الحبشة بيُقال لهم النجاشي، وحكام الفرس بيقال لهم كِسرى.

فراح دَوس ذو ثعلبان للنجاشي ملك الحبشة في الوقت ده وهو غير النجاشي أصحمة إللي هيكون في زمن رسول الله صلى الله عليه وسلم😉
وحكى له إللي حصل وغضب النجاشي جدا وكان على النصرانية هو كمان،
فجهز جيش قوي كان حوالي سبعين ألف مقاتل بقيادة واحد اسمه أَرْياط،
وكان في جيش أرياط واحد اسمه 《أبرهة》،
وصل الجيش لليمن وحصل القتال وبدأ القتال بين ملك اليمن ذو نواس وجيشه وجيش أرياط،
وانهزم ذو نواس وهرب للبحر في سفينة، فلما خاف إنهم يلحقوا به ويقتلوه انتحر 😑
وحكم الأحباش اليمن وكان الحاكم هو أرياط،
فاكرين الرؤيا إللي شافها ربيعة بن نصر وكان تفسيرها إن الأحباش هيحكموا اليمن 😀...أهه اتحققت💁‍♀️

أرياط ده كان ظالم جدا حتى كان بيظلم الأحباش إللي كانوا معاه،
فالأحباش اشتكوا لأبرهة فجمعهم وجيش الحبشة بقى مُنقسم لقسمين ..قسم مع أرياط وقسم مع أبرهة،
فأبرهة طلب إنه يتكلم مع أرياط قال له:
دلوقتي لو احنا اتقاتلنا جيش الحبشة هيفنى وأهل اليمن هيرجعوا يحكموا تاني،
فخلينا أنا وأنت نتقاتل وإللي يغلب هو إللي يحكم 👌
فوافق أرياط وبدأ القتال بين الإثنين ،
وهم بيتقاتلوا أرياط ضرب أبرهة على راسه بالحربة فشقت حاجبه وأنفه وشفته ..وبقى اسمه أبرهة الأشرم،
لكن أبرهة استطاع إنه يتغلب على أرياط وقتله وبقى هو حاكم اليمن،
وصل الكلام للنجاشي فغضب جدا...إزاي أبرهة يقتل القائد بتاعه فحلف إنه مش هيسيب أبرهة إلا لما يدوس أرض اليمن ويحلق له شعره أبرهة ،
فأبرهة حلق شعره وأخذ شوية من تراب اليمن وحطها في جراب زي كيس كده وأرسله للنجاشي مع رسالة بيقول له:
إن هو عبد له وإنه مش هيخالف أمره ،
وإن القتال إللي حصل كان بسبب ظلم أرياط وإن هو أقوى من أرياط في حكم اليمن،
وأنا حلقت لك شعري وبعثت لك تراب اليمن تدوس عليه عشان أبر حلفانك،
فرضي النجاشي عنه وأقرّه على حكم اليمن،
فأبرهة عشان يثبت ولاؤه للنجاشي بنى كنيسة عظيمة جدا محدش بنى زيها قبل كده أبدا،

وسماها القُلَيْس وأمر الناس إنهم يحجوا لها،
وبعث للنجاشي وقال له أنا بنيت لك كنيسة عظيمة وهخلي العرب يحجوا لها،

فوصل الكلام ده لواحد من العرب من قبيلة كِنانة،
فتسلل للكنيسة وتبرّز فيها يعني عمل فيها حمام إهانة لها ،
فلما عرف أبرهة باللي حصل قال مين إللي عمل كده😠
فقالوا له واحد من أهل البيت إللي العرب بتحج له بعد ما عرف إنك عايز تخليهم يحجوا للقليس😕

فغضب أبرهة وحلف إنه هيروح ويهدم البيت ده،
وبدأ يجهز جيشه عشان يروح مكة ويهدم البيت الذي يحج إليه العرب👌
《البداية والنهاية لابن كثير》

☆نقف هنا ثواني ونرجع بالزمن للوراء شوية حلوين كده😁

كل كلامنا في قصص الأنبياء إللي فاتت من بعد إبراهيم عليه السلام كان في فرع يعقوب،
،إللي هو ابن إسحاق بن إبراهيم عليهم جميعا السلام يعني فرع بني إسرائيل،
وكان الفرع ده موجود في خط فلسطين ومصر زي ما قلنا في شرح قصة يوسف وموسى عليهما السلام والأحداث إللي حصلت😉

احنا هنسيب الفرع ده ونأخذ فرع إسماعيل عليه السلام،
احنا طبعا عارفين إن إسماعيل عليه السلام كان سكن مكة مع أمه هاجر ،
وحصلت قصة زمزم وبعدين بناء الكعبة، واستقرار إسماعيل في مكة وزواجه من قبيلة جُرهم و...و..إلخ
كل ده شرحناه في قصة إسماعيل عليه السلام فمش هنعيد تاني 😊

الجزيرة العربية في عهد إسماعيل عليه السلام وما بعده استمرت على التوحيد، يعني الناس كانت بتعبد ربنا سنين طويلة جدا على دين إبراهيم عليه السلام،
لحد ما أتى رجل اسمه《 عمرو بن لُحَي》 وكان رئيس قبيلة خُزاعة، وكانت قبيلة قوية،
فالقبيلة دي كانت عايزة تاخد الحكم من قبيلة جُرهم إللي هي أصلا موجودة من زمن إسماعيل عليه السلام،
وحصل بينهم حرب فانتصرت قبيلة خزاعة بقيادة عمرو بن لُحَي،
فقبيلة جُرهم حبت تنتقم من خزاعة وتعطّل عليهم عيشتهم بمكة راحوا دافنين بئر زمزم ومبقاش لها أي أثر😶
وهربت قبيلة جُرهم من مكة إلا قليل منهم،
فاضطرت قبيلة خزاعة إنهم يجيبوا الماء من خارج مكة🤷‍♀️

عمرو بن لحي ده كان هو سيد مكة بلا مُنازع،
وكان غني جدا وكريم جدا ومحدش يقدر يرفض أي أمر بيقوله،
تقدروا تقولوا كلامه بالنسبة لهم كان زي الشرع كده لا يُرد 😅
في مرة سافر عمر بن لُحي إلى الشام للتجارة، فكان في قبيلة اسمها العماليق وكانوا بيعبدوا الأصنام،
واحنا فاكرين لما اتكلمنا عن العماليق دول وإللي كان بيحصل بينهم وبين بني إسرائيل على مر السنين في الشام😉

فسألهم عمرو بن لُحي عن الأصنام دي لأن العرب كانوا على التوحيد وميعرفوش يعني إيه أصنام ،
فقالوا له: بيساعدونا إذا جُعنا وينصرونا ويسقونا الماء وبيقربونا إلى الله💁‍♀️

فعجبه الموضوع وقال لهم أعطوني واحد من الأصنام دي يمكن يعينا لأننا معندناش مية 😮
فأعطوه صنم اسمه هُبَل، فكان أول صنم أُدخل في الجزيرة العربية👌
وبدأ عمرو بن لحي يأمر الناس بعبادة هُبل فأطاعه الناس🤦‍♀️
فكان هو أول من بدّل دين العرب 😑
ومش بس كده ده عمل كوارث تانية ...

هنعرفها إن شاء الله الجزء الجاي وهنعرف رسول الله صلى الله عليه وسلم قال إيه عن عمرو بن لحي 😉


#السيرة_النبوية
#ايمان_شلبي

اللهم ارزقنا القناعة والطمأنينة بك🤲🏻

(لنختم القرآن سماعا)

الورد (١٥١)

(الربع الثالث & الحزب الثامن والثلاثين)

#القارئ: ماجد الدعوس
#ليدبروا على التليجرام
https://www.tg-me.com/GhRoooh/11912

إن لم ترغب بتحميل الملف الصوتي:
فتابعه مباشرة(مكتوبا) على اليوتيوب👇🏻

https://youtu.be/vAhY5I7Gfyw?feature=shared

#صباحكم_قرآنٌ_يُتلى

احذرن أيتها النساء 👆🏻👆🏻

*إضـــــــ💡ــــــــاءة*

•إنما أعطاكم الله الدنيا لتطلبوا بها الآخرة؛ ولم يعطيكموها لتركنوا إليها.

عثمان بن عفان رضي الله عنه،

#قصص_الأنبياء(٢)
#السيرة_النبوية
#الحلقة_الثالثة
#قبل_مولد_رسول_الله(٣)
#أصحاب_الفيل

كنا واقفين عند عمرو بن لُحي لما سافر بلاد الشام وعجبه عبادة الأصنام فأتى بصنم وأدخله الجزيرة العربية وأمر الناس إنهم يعبدوا الصنم ده فالناس عبدوه فعلا،
وكان العرب على التوحيد يعني بيعبدوا الله فكان هو مَن بدّل دين العرب 👌
وأدخل آلهة تانية غير هُبل وأمر كل قبيلة في مكة إن يكون لها صنم عند الكعبة تعبده،
وانتشرت الأصنام في مكة ومن أشهر الأصنام بعد هُبل اللات والعُزّى،
وغيّر تلبية الحج..التلبية المعروفة :
لبيك اللهم لبيك ..لبيك لا شريك لك لبيك..إن الحمد والنعمة لك والملك ..لا شريك لك.
فراح مزوّد عليها:
"إلا شريكا هو لك تملكه وما ملك"
يعني معندكش شريك إلا شريك أنت تملكه،

وبدأ يُشرّع الشرائع لأهل مكة ويخترع حاجات غريبة ،
يعني سَن لهم سنة الأنعام التي لا تُمس، عارفين الآية إللي بتقول :
"مَا جَعَلَ اللَّهُ مِن بَحِيرَةٍ وَلَا سَائِبَةٍ وَلَا وَصِيلَةٍ وَلَا حَامٍ ۙ وَلَٰكِنَّ الَّذِينَ كَفَرُوا يَفْتَرُونَ عَلَى اللَّهِ الْكَذِبَ ۖ وَأَكْثَرُهُمْ لَا يَعْقِلُونَ "

ناخدهم واحدة واحدة 😉
◇البَحِيرة يعني الناقة إللي ولدت خمس مرات يشقوا أذنها ومحدش لا يركبها ولا يذبحها يسيبوها كده..بقت مقدسة🙂
السائبة يعني واحد بينذر نذر ..يقول يارب لو أنت شفيتني أو يارب لو فلان الغائب رجع أو...أو...فأنا هسيب الناقة بتاعتي دي ومش هركبها تاني،

◇الوصيلة يعني لو الشاة إللي هي المعزة ولدت ذكر ذبحوه للآلهة بتاعتهم ولو ولدت أنثى هم يأخذوها يذبحوها لنفسهم،
ولو ولدت ذكر وأنثى قالوا :وصلت أخاها فميذبحوش الذكر للآلهة،
◇الحام يعني ذكر الناقة لو اتولد بسببه عشرة ذكور يحمي ظهره يعني محدش يركبه ولا يُحمل عليه أي شيء ولو مات الرجال والنساء يأكلوه.

والناس عادي تسمع كلامه وتنفذ ..مفيش أي مخ يفكروا به😑
قال رسول الله صلى الله عليه وسلم عن عمرو بن لُحي:
"رأيت عمرو بن لُحي يجر قُصُبَه في النار"
قُصُبه يعني أمعاؤه.
ودي كانت قصة دخول الأصنام إلى مكة وإللي هنلاقيها بعدين في عهد رسول الله صلى الله عليه وسلم😉

نرجع لأبرهة الحبشي إللي كان بنى كنيسة وكان عايز العرب يحجوا لها وجاء رجل من العرب من《 أهل النسيء》وتبرّز في الكنيسة فحلف إنه هيهدم البيت إللي العرب بيحجوا له👌
☆أهل النسيء دول كانوا بيعظموا الكعبة جدا وهم لهم قصة
عارفين الآية إللي بتقول :
"إِنَّمَا النَّسِيءُ زِيَادَةٌ فِي الْكُفْرِ ۖ "
كلمة النسيء معناها التأخير...احنا عارفين إن الأشهر الحُرم أربعة: رجب و ذو القعدة و ذو الحجة ومحرم،
"إِنَّ عِدَّةَ الشُّهُورِ عِندَ اللَّهِ اثْنَا عَشَرَ شَهْرًا فِي كِتَابِ اللَّهِ يَوْمَ خَلَقَ السَّمَاوَاتِ وَالْأَرْضَ مِنْهَا أَرْبَعَةٌ حُرُمٌ"

والأشهر الحرم معناها إن مينفعش يكون فيها حرب والعرب أصلا عيشتهم على الحرب بينهم،
ففي ثلاثة شهور ورا بعض حُرم 《ذو القعدة و ذو الحجة ومحرم》
وده كده عامل لهم أزمة، يعملوا إيه😕
فاختاروا مجموعة من الناس وسموهم أهل النّسِيء وقالوا الناس دي من حقهم يؤخروا الاشهر الحرم،
يعني يؤخروا محرم لصفر ،يبدلوا شهر صفر مع شهر محرم،
فيكون ذو القعدة حرام وذو الحجة حرام وبعدين ميجيش شهر محرم يجي شهر صفر ويطلعوا من الورطة 👉😉

فكانوا بيعملوا كده سنة وسنة..آخر لخبطة يعني😶
وده تفسير آية :
"يُضَلُّ بِهِ الَّذِينَ كَفَرُوا يُحِلُّونَهُ عَامًا وَيُحَرِّمُونَهُ عَامًا لِّيُوَاطِئُوا عِدَّةَ مَا حَرَّمَ اللَّهُ فَيُحِلُّوا مَا حَرَّمَ اللَّهُ ۚ "
لكن الترتيب في الأشهر رجع زي ما كان تاني والأشهر فعلا مظبوطة دلوقتي👌

♡شوفتوا إزاي إحنا لسه مدخلناش في شرح السيرة لكن عرفنا تفسير كم آية في القرآن😉

جهز أبرهة جيشه لهدم الكعبة ،ودي تاني محاولة لهدم الكعبة😉
الأولى كانت على يد تُبّع إللي اتكلمنا عنه في الجزء الأول 😊
وكان من ضمن الجيش بتاعه فيل ضخم اسمه محمود،
وبدأ يتحرك من اليمن متجه ناحية الكعبة، وسمعت العرب بأن أبرهة عايز يهدم الكعبة،
وكان في رجل من أشراف العرب اسمه ذو نفر جمع بعض المقاتلين وجهزوا نفسهم عشان يحاولوا يوقفوا جيش أبرهة من إنه يهدم الكعبة،
وحاولوا يوقفوا جيش أبرهة لكنهم انهزموا وتم أسر ذو نفر،
وأخذه أبرهة معاه في الجيش أسير،

خرجت لجيش أبرهة قبيلة تانية تقاتله عشان ميهدمش الكعبة بقيادة واحد اسمه نُفيل بن حبيب،
واتهزمت القبيلة وأُسر نُفيل، وصل جيش أبرهة للطائف فخاف أهل الطائف من جيش أبرهة وإنه يهدم عليهم الطائف،
فقالوا له ملناش دعوة مش هنعترض طريقك ولا هنعمل حاجة وعشان نثبت إننا مسالمين ممكن نبعث معاك واحد يدلك على مكان الكعبة،
فتطوع واحد اسمه أبا رغال وقال له أنا هدلك على مكان الكعبة،
وطبعا دي خيانة 😑
وراح مع أبرهة عشان يَدُله على طريق الكعبة ،وهو في الطريق بين مكة والطائف مات واندفن فكانت العرب بترجم قبره بالحجارة بسبب خيانته 👌

المهم وصل أبرهة وجيشه لأطراف مكة وفي الطريق كان في إبل ..جِمال يعني في الطريق فأخذها جيش أبرهة،
وكانت الجمال دي حوالي مئتين جمل يملكها سيد مكة في الوقت ده أو خلونا نقول رئيس مكة،
وكان اسمه عبد المطلب، وكان رجل كبير في السن فجاء له الخدم بتوعه وقالوا له جيش أبرهة جاء وأخذ البعير بتاعتك،
فخرج له عبد المطلب وطلب إنه يقابله،

لكن أبرهة رفض فتوسط عبد المطلب عند الأسير ذو نفر إنه يكلم أبرهة فقال له :
أنا أسير مقدرش أعمل لك حاجة😕
لكن أنا اتصاحبت على سائس الفيل، يعني الرجل المسؤول عن قيادة الفيل،
وسائس الفيل ده كان له مكانة عند أبرهة،
فكلم ذو نفر سائس الفيل عشان يتوسط لعبد المطلب عند أبرهة عشان يرضى يقابله،
فوافق أبرهة إنه يقابله وكان عبد المطلب عليه هيبة ووقار وكان جميلا جدا فلما شافه أبرهة قام له توقيرا له،

وكان قاعد على حاجة زي العرش كده فنزل من على العرش ده وجلس جنب عبد المطلب على بساط في الأرض وبعدين قال للترجمان اسأل عبد المطلب عايز إيه؟
فعبد المطلب قال له:
جيشك أخذ مئتين بعير بتوعي فأنا عايزك ترجعهم لي😒
فأبرهة قال له:
أنت عجبتني لما شفتك وتوقعت إنك هتطلب مني إني أسيب البيت إللي هو دينك ودين آباءك،
لكن لما تكلمت أنا زهدت فيك😑...يعني استقليتك أوي😐
بتكلمني وتطلب مني أسيب البعير وحتى متطلبش مني أسيب البيت المعظم عندكم😶
فقال له عبد المطلب :
أنا رب الإبل ..والبيت له رب سيمنعه ويحميه😤

خرج عبد المطلب من عند أبرهة وأمر أهل مكة إنهم يخرجوا برة مكة ويطلعوا على الجبال عشان جيش أبرهة ميؤذيش أهل مكة ويسيبوا البيت الحرام لأبرهة عشان يهدمه،


الجنود جابوا الفيل عشان يهدم الكعبة في اللحظة دي الأسير نُفيل بن حبيب إللي كان معاهم عرف يفك نفسه من الأسر ،
وجري ناحية الفيل واتعلق في أذنه وقعد يقول له :
ابْرُك محمود ..ابْرُك محمود فإنه بيت الله العظيم
يعني اقعد يا محمود ومتسمعش كلامهم...إللي عايزينك تهدمه ده بيت الله الحرام،
راح الفيل قاعد في الأرض ومرضاش يقوم😮
قعدوا يضربوا فيه عشان يقوم مش راضي،
وجّهوه نحو اليمن قام يجري وجهوه ناحية الشام اتحرك وجهوه ناحية الكعبة قعد ومتحركش😮
هرب حبيب بن نُفيل وطلع على رؤوس الجبال مع أهل مكة،
"أَلَمْ تَرَ كَيْفَ فَعَلَ رَبُّكَ بِأَصْحَابِ الْفِيلِ"

جنود أبرهة وهم عمالين يحاولوا يحركوا الفيل لقوا سواد جاي من بعيد بيقرب عليهم🤨
السواد بيقرب وبدأ يظهر إيه هو السواد ده ..لقوها طيور جاية عليهم ورا بعض من كل مكان،
"أَلَمْ يَجْعَلْ كَيْدَهُمْ فِي تَضْلِيلٍ"
بيوصفها العلماء إنها طيور عاملة زي العصافير،
"وَأَرْسَلَ عَلَيْهِمْ طَيْرًا أَبَابِيلَ"
كل طير معاه ثلاثة حجارة واحدة في منقاره وحجارة واحدة في كل قدم،
حجم الحجرة الواحدة في حجم حبة العدس أو الحمص،
ويُقال إن الحجارة دي كانت من نار ويُقال إنها كانت من طين يابس متحجر شديد القوة،
"تَرْمِيهِمْ بِحِجَارَةٍ مِنْ سِجِّيلٍ"
بدأت الطيور ترمي الحجارة دي على جنود جيش أبرهة وأي حد يتصاب بالحجارة دي كأن مرض بينتشر في جسمه ويبدأ لحم جسمه يسقط😮
بدأ جيش أبرهة يهرب حتى أبرهة نفسه هرب بس هيهرب من منين 😏
الحجارة أصابته وقُتل أبرهة وكل من كان في جيش أبرهة👌
"فَجَعَلَهُمْ كَعَصْفٍ مَأْكُولٍ"
والعصف المأكول يعني الزرع إللي الحيوانات أكلته وداسته،

☆في ناس ممكن تسأل طيب ماهو ربنا أنقذ قريش أهه وأهلك جيش أبرهة..ليه ربنا لا يرسل الطير الأبابيل على الكفار إللي بيعذبوا المسلمين وبيقتلوهم زي بورما مثلا😞

بكل بساطة لأننا لسنا في زمان أبرهة 💁‍♀️
أولا:
ربنا لم يهلك جيش أبرهة عشان خاطر أهل قريش،
ربنا أهلك جيش أبرهة لأنه كان عايز يهدم الكعبة،
وإلا فأبرهة وجيشه نصارى..أهل كتاب.. يعني أقرب إلى الله من المشركين إللي بيعبدوا الأصنام👌

ثانيا :
سنة إهلاك الظالمين أو الكافرين بخارقة.. بمعجزة يعني بدون تدخل من المؤمنين، زي الطوفان أو زي إللي حصل مع أبرهة انتهت خلاص ،
آخر معجزة لنصر الدين بدون تدخل من المؤمنين كانت حادثة الطير الفيل
بعد ما الإسلام جاء الوضع تغير...ممكن تحصل المعجزة لكن بعد ما المسلمين أو المؤمنين يعملوا إللي عليهم،
زي ما حصل في غزوة بدر ..حصلت معجزة نزول الملائكة وقاتلوا مع المؤمنين،
بعد ما المؤمنين أخذوا بالأسباب وعملوا كووول إللي يقدروا عليه زي ماهنشوف في وقتها بالتفصيل إن شاء الله😉
فربنا ساعدهم بمعجزة نزول الملائكة👌
لكن لو المسلمين مقصرين في الأخذ بالأسباب ومش عاملين إللي عليهم مش هتنزل أي معجزة🤷‍♀️
يعني القاعدة في الإسلام دلوقتي :
"يَا أَيُّهَا الَّذِينَ آمَنُوا إِن تَنصُرُوا اللَّهَ يَنصُرْكُمْ"

خدوا بالكم من القاعدة دي كويس لأنها هتكون معانا طووول السيرة النبوية 👌
《إن تنصروا الله ينصركم》
بعد هزيمة جيش أبرهة بالمعجزة إللي حصلت وإللي شافها أهل مكة كلهم،
في نفس عام الفيل ده يُقال بعد خمسين يوم وُلد لعبد المطلب حفيد..

الحفيد ده هيكون سبب في تغير الأرض في المستقبل،
مين هو الحفيد واسمه إيه ومين أبوه ومين أمه؟

ده إللي هنعرفه الجزء الجاي إن شاء الله😊



#السيرة_النبوية
#ايمان_شلبى