قصيدة 14 معصوم سلام الله عليهم
متباركين بولادة الزهراء ع




صلاوات صلاوات  عالمصطفى وآله
...............

يلا يادنيانه .. اليله افرحي ويانه
وجونه غيري الوانه .. بالمسرات
احله شي اعيادنه  .. وبذكر اسيادنه
هوه هذا مرادنه  .. احله كلمات
من الگلب نجريهه  .. للنبي نوديهه
بهل حفل نهديهه  .. هاي الاصوات
للرسول الهادي .. وكل فؤاد اينادي
بيهه اشوف اسعادي  .. و الكرامات

والافراح والافراح  للنبي تحلاله
صلاوات صلاوات   عالمصطفى واله
.....................

يازمن حبينه  .. حيدره والينه
وهالاسم يكفينه .. اغله محبوب
بالشدد لو صحنه  .. ياعلي يحضرنه
وهالفرح يجمعنه  .. نذكره ونذوب
وفاطمه نذكرهه  .. الله يعرف سرهه
الخادم بدفترهه  .. اسمه مكتوب
 فاطمه ام العتره  .. للموالي ذخره
تشفع النه الزهره  .. تفرح الگلوب

يزهراء يزهراء هل صوت يتعاله
صلاوات صلاوات عالمصطفى واله
....................

العاشك يعرفونه  .. مبين من عيونه
الحب يغير لونه  .. ايذبل العين
للحسن عشاكه  .. كل نفس مشتاكه
الشيعي هاي اشواكه   ايحب الثنين
من تهب النسمه  .. بالهوه النشتمه
نعمه واكبر  نعمه  حب الحسين
ندعي من بارينه  .. بخيمته يخلينه
ايزيد حبه البينه  .. طول السنين

والگلوب والگلوب  خل تفرح بجاله
صلاوات صلاوات عالمصطفى واله
....................

بعلي زين عبادهه  .. الفرحه تحله اعيادهه
الروح زاد ودادهه  .. الزين العباد
وبالدعاء انذكره  .. يناجي خلص عمره
منه ناخذ عبره  .. والامل زاد
والامام الباقر  .. بكل علم هل حاضر
ذكره سر الخاطر  .. عالي الامجاد
من صميم گلوبنه  ..  وبعطر مكتوبنه 
نبعث المحبوبنه  .. هاي الاعياد

مسرات مسرات من نذكر افضاله
صلاوات صلاوات عالمصطفى واله
......................

ياحلات البشره  .. وبفخر من نقره
مدرستنه الكُبره   .. الصادق القول
حقنه من نتباهه  .. ونعرف بمعناهه 
اليله يامحلاهه  .. الحاضر يكول
من نكصده البابه  .. ونهوه فوك اعتابه
الكاظم احنه احبابه  ..  ندعي ونول
الحاجه تكضي بداره  .. وناخذ احله بشاره
مايرد خطاره  ..  بلطفه مشمول

يعلمون يعلمون بالكاصد وحاله
صلاوات صلاوات عالمصطفى واله
.......................

للرضا نتعنه  .. لحضرته نتمنه
نشم عطر الجنه .. بطيب الانفاس
نردد من نطوفه  .. ارواحنه ملهوفه
والعيون تشوفه  .. سيد الناس
من الجواد ويانه  .. ناخذ المولانه
علك من بيبانه  .. نشيله عالراس
والورد نهديله  .. عطره عطر الهيله
 اليله اجمل ليله  .. برقه وحساس
 
يمحبوب يمحبوب كل محب مواله
صلاوات صلاوات عالمصطفى واله
.....................

 الهادي ويه افراحنه  .. بي يطر مصباحنه
للامام اشواكنه  .. ونشعل شموع
نحضر بسامره .. والخلك مبتشره
ياجمال الفطره  .. وهاي الجموع
العسكري بمعروفه  .. يبسط النه جفوفه
احنه اجينه ضيوفه  .. وحبه مزروع
بينه من اصبانه  .. ونهتف المولانه
وصوتنه ابيبانه  .. عنده مسموع

نهنيه نهنيه  وبالفرحه نقراله
صلاوات صلاوات عالمصطفى واله
....................

والختام البينه  .. دايم المهدينه
ننتضر والينه  .. وكحل العيون
المهدي ماينسانه .. بكل زمن ويانه
بالفرح يلكانه  .. مناليفرحون
نشكر الله ونبدي  .. بالدعاء للمهدي
والزمن هل يحدي  .. وحبنه مضمون
تبقه اخر كلمه  .. وهيه هاي النعمه
حبنه لهل الرحمه  .. يعادل الكون

تحيات تحيات كل گلب مرساله
صلاوات صلاوات عالمصطفى واله



محمد هادي العقابي.

مهجتي اعله الفرح هليوم صــارت
وصور عن مولد أم الحسن صـارت
بجمادي الثاني و(العشرين) صارت
ولادة فاطمه الزهره الزچيّـــــــــــه

🌷20🎉🌷20🎉🌷20🎉🌷

ولادة السيدة الزهراء عليها السلام

يا هلا بيـوم الفرح ــ هاتف البشرى صدح
بمولد الزهره تِغَنّى ــ هاتف البشرى صدح

ليله حاطتها السعاده وابتشر وجــه الجنــان
سِرها باين من سَناها ليله حَــل بيهــا الأمان
نور مــن مكــه تِعالـه وابتسم ثغــر الزمـــان
مولد البضعه الوديعه نوِلدت ابحجر الحنان

ردد الســان الزمـــن ــ يـا هــلا ابــأم الحسن
ولأرض مكـــه تِعَنّـه ــ هاتــف البشرى صدح

يــا عُظُــم هذي الوليده ابريحــة العصمــه تفوح
تعكــس انــوار الهدايــه تحمل اطهر وازكى روح
ابتسمت الشمس بعُلاها والگمـــر وجهـه صبـوح
هَلَّـــت اعلينــا الزچيـــه والسَّــعد منهــــا يلــوح

فاطمـــه أصــل النقاء ــ اتنورت منهـــا السمـاء
ينقبــــل بيهـــا عملنه ــ هاتــف البشـرى صـدح

مِنّي اسمــع هالروايه والسنــد بيـهــا رصيــن
تروي قصتها خديجه ابمحضر الهـادي الأمين
من دخل ليها وسألها مَــعَ مـَـــن تتحــدثيـــن
يارسول الله اخبــرك ابطني يؤنسني الجنين

بالفرح وجها انغمـر ــ من سِمَع سيد البشر
هذي ريحانة الجنه ــ هاتف البشرى صدح

تنقــل اربـــاب المجالس حادثــه وبيهــا سنـد
مثل ما عيسى بن مريم حچــى بـدوار المهـد
فاطمــه بدور الرضاعــه اتكَلِّمَـت والكـل شِهَد
حروف تكشــف منزلتها كل حرف يگطر شَهَد

ســرها مــن ســر الإله ــ نورها ابلا حـَد مـداه
بمولد البضعه انجمعنه ــ هاتف البشرى صدح

بالفــرح هــذي المحافـل ازدانت او عَمها السرور
حاضـــر وثغـــره تبسـم المهدي مابيــن الحضور
ايبارك الفرحــه حضوره والحفـــل بسمــه ينــور
ندري وانحس ابوجوده اجمـــل واحلــى شعــور

انسلم اعله ابن الحسن ــ يا هلا بمحيي السنن
لَمَّــن بأسمــك صدحنه ــ هاتــف البشرى صدح

سيــدي يـا يـوم شمسك تجلي واتزيـل الغيوم
جـــارت الايــــام بينــــا وكثرة اعلينا الخصوم
وانــتَ رجوانـــه واملنـا غيـر شخصك مانروم
تدري من كل صوب بينا حاطت اشراك الهموم

العيشه من دونك عدم ــ بغيبتـــك زاد الألـــم
يابــو صالـح مِن هتفنه ــ هاتف البشرى صدح


كلمات عمار الراشدي.

بصوت. مسلم المطيري

عطر …..🤍

اليوم الشـوگ جمعنـه و لمنـه
ونسينه كل حزن بينه و لمنـه
ونقـدم تهنئـه الحيـدر و لمنـه
بمولدهـا الاغـر اُمنـه الـزچيـه

كريم الحاج فليح

بصوت. ( مسلم المطيري)

بصوت. مسلم المطيري

عطر…….🤍

- 🌷في حق مولاتي الزهراء ع🌷

الزهره فـــاز التـمسك حبلها
الله يحب كل مؤمــن حبلها
لون اندلها كون احبي حبلها
حافي واشم تربتهــا الزكيه

فراس المحمداوي

ولادة الزهراء عليها السلام

يا زهراء يفاطمه يا زهراء يفاطمه
يا سر الإسرار يا ام الأطهار
* * *

هالليله فرحــان المَلك ومعَيده الأكــــوان
وطشت علـــــى الدنيا ورد وترتل القرآن
ولفاطمه الكوثر أجت وي سورة الإنسان
من نور خالقهه لعلي لا مو أنس لا جـان

كونهه ربهـــه ســـر وحجبهه
يا زهراء يفاطمه

* * *

رب الخليقه من خلق كْون وبسط سبعـــه
وأنشاء سما رب السمه وبحكمته يرفعه
من نور عرشه وقدرته رد كون البضعه
أزهر الكون أبفاطمه لا مو ضوه الشمعه

نـــور الزچيــــه عــــم البريـــه
يا زهراء يفاطمه

* * *

تفاحــــة الجنه صفت أنسيه وحــــوراء
أقرأ الحديث وغايته بسر رحلة الاسراء
ياكل ثمر جنه النبي ويكــــّون الزهــراء
الحور بولادتـــه أجن وي مريم العذراء

مولدهه رحمه مولدهه نعمه
يا زهراء يفاطمه
* * *
بيوم الولاده لفاطمه طـــش الـــورد جبريل
وكتب الله بيهه أتنورت فــــي محكم التنزيل
خل يسمع الضد هل الخبر والعايش أبتظليل
ســــورة الكوثر فاطمه مــا ترهم أي تأويل

مشكاة الأنــــوار مكنونه الإســـرار
يا زهراء يفاطمه
* * *

ياهي الشفيعه للبشـــر بعـــد النبي وحيدر ــــــــ بس فاطمه الكوثر
ولو تعطش أنته يالمحب بيمن تروي الحر ــــــــ بس فاطمه الكوثر
تفطم الشيعه من لضه جـــاوب لا تتحير ــــــــ بس فاطمه الكوثر
ألمن رضا البري رضاه رد طالع المصدر ــــــــ بس فاطمه الكوثر

فـــــاز اليودهه خــــاب اليضدهه
يا زهراء يفاطمه
*****
الشاعر
موسى البديري..