بمناسبة ولادة الصديقة الزهراء سلام الله عليها

اعلن رب الكون وبشر
بشر طه يصلي وينحر
انا اعطيناك الكوثر

ة***

بارك الله بهاي الدار
من نزل هاي الانوار
لتضل مهموم ومحتار
الخالق ناده المختار
انا اعطيناك الكوثر

**

مهجة طاها ونور العين
نور التنفع بالدارين
معنى الحق ومعنى الدين
الله ينادي جد حسين
انا اعطيناك الكوثر

*

لاتحزن من ضلمه وليل
ميهمك لودنيا تميل
لحد بابك ارسل جبريل
وايكلك رب التنزيل
انا اعطيناك الكوثر

****

ياطاها الكال واذاك
هوالابتر من عاداك
مايعلم ربك شنطاك
من سابع كال وناداك
انا اعطيناك الكوثر

*

الكون تلون بأجمل لون
لله الهادي شكد ممنون
يشكر رب الكاف ونون
لمن ناداه رب الكون
انا اعطيناك الكوثر
،،،،، ،،،،،،،،،،،،،
مفتاح العالم للخير
من الكوثر والتطهير
نادى الباري بهلتذكير
لاتحزن طه ولتحير
انا اعطيناك الكوثر

،،،،،،،،،،،،،،،،،،،،،،،،
حب الزهره من الايمان
ينفع ويزيد الانسان
يوم المحشر والميزان
يا احمد ناده الرحمان
انا اعطيناك الكوثر


الشاعر حسن لعيبي الحريشاوي

➿➿➿➿➿➿➿➿➿➿➿➿.

ألحان ناجي القرناوي

لولادة الزهراء🌹🌹
يا عطر جــنة عدن عشــنه ابهواچ
النشـــمه ابدونـــچ اصلن موهــوه
هــوه لو ما نور وجهــچ بالوجــود
كلشي ضلمه ايصير وبعازت ضوه
محفلــچ اتحــفه وتعــــــناله كون
مثل ما موسى دخـل وادي طــوه

✍كامل السعيدي

ذكرى ولادة آية السماء فاطمة الزهراء ع.

طلبها مـــن الله ابوالقاسم #وطه
اله وجنـــح الملك صــــاير #وطه
ابمولدها افرحو حيـــــــدر #وطه
وخديـــــــجه وآسيا ومريم سويه

كامل السعيدي

ولادة السيدة الزهراء عليها السلام

بالمولــد انحييهـــا
الف الصلاة اعليها
برواحنـــه نفديهـا
بت سيـد الاكـوان

من عالم الذر احنــه حبيناهــا
كلمــة عهـد للزهـــره خطيناها
شما عشنه بالدنيه نظل وياها
مثل النبض بالگلب ما ننساها

حبهـا نجــاة الأمـــه
نشكر فضل هالنعمه
للناس خيـر ورحمـه
بت سيـــد الاكــوان

سهــم الشفاعــه حصــة الوالاهـا
خصها الجليل وهالكرامه انطاها
خيــر النسا بارينـــا هل خلاهـــا
حجــة المعبــود وحبيبـــة طـــه

اصل اونبــع للكوثــر
شافعه بيوم المحشر
الها فضــل ما ينكـــر
بت سيـــد الاكـــوان

أم الاطايب والنعم مـن عدهــا
نلنه السعاده من بـزغ مولدهــا
جينــا نهنـــي بالحفـل والدهــا
كلمـــة تهانينـــا الثغــر رددهـا

احبابــهـــا مجتمعـــه
بالفرحه تعلگ شمعـه
حضرت تهني البضعه
بـت سيـــد الاكـــوان

نجم السعد شع بسماء السبعه
حـور الجنـان أصواتها مرتفعه
يردد صداها يــا هلا بالبضعـه
أم المياميـن الهـداة التسعـــه

للعتره هيــه المصـدر
بيهـم الكــون اتنـــور
فاطمه قطب المحور
بت سيـــد الاكــــوان

نبعث رسايـــل تهنئه لمهدينا
انبارگلك ابهـذا الحفل والينـا
مولانا من كثـر الظلم عانينـا
ندعي يعجل طلعتـك بارينـا

عَجّــل يلاهــي امره
منــك انريد البشـرى
بجاه الوديعه الزهره
بت سيــد الأكـــوان


كلمات عمار الراشدي

مواليد وأفراح أهل البيت
هلا بضعة الهادي …. وام ابيها
اهي تتباهه بمي …. وام ابيها
تحيات المنابر …. وام ابيها
بلستعداد ياخذلج تحيه

ملا اكرم الابراهيمي

مولد الزهراء عليها السلام

تفاحة الكون  ام ابيها فاطمه
أنوار العيون   ام ابيها فاطمه

زهراء قدسيه    مرأة سماويه

        ام ابيها فاطمه

_
١

فاطمه مشكات من رب البريه
فاطمه شجّرة الدر الاحمديه 
ماي من نبع الجنان الكوثريه
واعلى من نور الشمس نور الزجيه

نور السماوات   ام ابيها فاطمه
قرآن وآيات      ام ابيها فاطمه

حوريه حوريه    مرأة سماويه
   
        ام ابيها فاطمه

_
٢

ماكو مثل اوصافها والباري يشهد
صارت ام المصطفى الهادي محمد
من غصنها العطف والايمان ورّد
صلوات السانها كل لحظه ردد

خِيرة الأعمال     ام ابيها فاطمه
ربحان من كَال   ام ابيها فاطمه

رحمه وعطف هيه    مرأة سماويه
   
        ام ابيها فاطمه

_
٣

الباري أعلى من السمه رافع عُلاها
للنبي ماخلى ذريه سواها
من أجلها انخلق حيدر ويه طه
هيه أولى والنسه كلهن وراها

   ام الموالين         ام ابيها فاطمه
هاي ام الحسين      ام ابيها فاطمه

آيات كونيه    مرأة سماويه    

        ام ابيها فاطمه

_
٤

إذا عيسى الناس من مهده كَلَمها
فاطمه قبل الولاده اتحاجي امها
عالمه والاسم الاعظم من علمها
غير حيدر والنبي محد فهمها

منبع الاسرار   ام ابيها فاطمه
ما ترد محتار   ام ابيها فاطمه

لكل حاجه مكَضيه    مرأة سماويه    

        ام ابيها فاطمه

_

#الشاعر_مصطفى_الشافعي

كعديه لولادة فاطمة الزهراء ع

نولدت فاطمة الزهره الزجيه
التشبه لنبي وحامي الحمـيه
انبــــارك للنبي انريد
ونقره اجمل اناشيد
       ـ🌷🌷🌷🌷🌷🌷ـ

نورها نور الجلاله ـ ومن غصن شجرة محمد
جنة الفردوس هيه ـ وسيده اعله الكون تنعد
فاطمه طوق النجاة ـ وعنها رب العرش يشهد
بفيايها الكل تستضل
اهواي الها عالدوام فضل
ابمولدها جينه نحتفل ـ هالفرح عدنه تجدد

لدرة ســـــيد الامه العظيمه
وسط گلوبنه المحفل نقيمه
بينه الواهس ايزيد
ونقره اجمل اناشيد
    ـ🌷🌷🌷🌷🌷🌷ـ

فرحت الاملاك كلها ـ وبأسمها العرش كبر
آية الله العظيمه  ـ استبشر ابمولدها حيدر
محجبه نولدت الزهره  ـ وللحجاب اصبحت مصدر
بيها النواضر تنترس
للعفه انطت چـــم درس
بيها الله يذهب كل رجس. ونطفه ابمولدها كل شر

فرحه امن العمر هاي الولاده
اوياها انفتحت ابواب السعاده
عدنه اويه النبي عيد
ونقره اجــمل اناشيد

   ـ🌷🌷🌷🌷🌷🌷ـ

بگلبي جنح الشوگ رفرف ـ واعلن لفاطم غرامه
وللنبي ايقــــدم تهاني ـ انصاغة اوياها ابتسامه
وردة الجنه الزجيه ـ النابته ابيت الكرامه
بخدودها ايحط الندى
والحزن خلص موعده
موسم سعادتنه ابتده ـ وفاطمه اول علامه

مرجع للنســـاء وبنت ابوها
الكتبو عجزو اشما وصفوها
الشــاعر يقره وعيد
ونقره اجمل اناشيد



✍الخادم
كامل السعيدي

الاداء كامل السعيدي

نبارك مولد الزهره الزجيه
🌺🌺🌺🌺🌺🌺🌺🌺🌺🌺🌺🌺
إله الكون فاطمها وسماها
وسمت من نور يامحلى سماها
اهي جنه وعلي حيدر سماها
وحسن وحسين لنجوم الزهيه
نبارك مولد الزهره الزجيه
❤️❤️❤️❤️❤️❤️❤️❤️❤️❤️❤️❤️
ياسامع عطني فكرك ونتباها
إلك اخبار عندي ونتباها
اقلك بيج نفخر ونتباها
حبيبة طه فاطمة الزجيه
🌹🌹🌹🌹🌹🌹🌹🌹🌹🌹🌹🌹
أباها  أباها  أباها  أباها
بس فاطمه التسمة أم اباها
ابو مريم الأفضل ام اباها
مثل مريم اختلف أم اباها
لعند المصطفى نزلت هديه
🌷🌷🌷🌷🌷🌷🌷🌷🌷🌷🌷🌷
سماها سماها سماها سماها
شمس للعصمه وتحفها سماها
سمت والخالق ابفضله سماها
اسمها فاطمه وربها سماها
وفطمت شيعتها نار السريه
🥀🥀🥀🥀🥀🥀🥀🥀🥀🥀🥀🥀
وردها وردها وردها وردها
تروح الروح من جسمي وردها
الفرح هاليوم جاذبها وردها
الليله الدنيا فواحه وردها
تفوح بمولد الزهره الزجيه
🌸🌸🌸🌸🌸🌸🌸🌸🌸🌸🌸
لبتها  لبتها  لبتها  لبتها
كرامة فاطمه الزهره لبتها
قصد جبريل يخدمها لبتها
تهاني الليله اقدمها لبتها
وبارك زينب لأمها الزجيه
🌿🌿🌿🌿🌿🌿🌿🌿🌿🌿🌿🌿
شملنه شملنه شملنه شملنه
يحب اعطور للخوه شملنه
خدمة فاطمه الزهره شملنه
فضلها شاء يلتم وشملنه
ونحيي بكربله حفل الزجيه
🌺🌺🌺🌺🌺🌺🌺🌺🌺🌺🌺🌺
هوالج هوالج هوالج هوالج
ليله اعله المحب نسم هوالج
قلبي ماهوى لغيرج هوالج
كل مايملك الشيعي هوالج
شفيعتنا يبت سيد البريه
💐💐💐💐💐💐💐💐💐💐💐
الشاعر الاديب جابر الكاظمي