القصيدة إلى سيدة النساء فاطمة الزهراء عليها السلام

قال الرسول    عن البتول

باب  فاطمة بأبي     وحجابها حجابي
يؤذيني من اذاها     يؤذيني من اذاها


*--------------*--------------*----------------*

شتكول  يا  من   حاربتها   بظلمك
يوم   الحشر  رب العداله  يحكمك
ما  انصفت  حق    النبوه   بجرمك
عند القيامه الزهره توكف خصمك
              
وشكايتها عظيمه     من أمة اثيمه
         سوف تبث شكواها 
*---------------*--------------*--------------*

بنت  النبي  بها  الأمه عاشت غربه
مرت   عليها   أيام    مره   و صعبه
ما   أن   محمد   لبى   دعوة   ربه
اباب الزجيه وحوش صارو صحبه
              
في وقعة سقيمه     من عصبة لئيمه
             أصحاب لم ترعاها
*----------------*--------------*-------------*

دمعة حزن  بالباب طاحت تسعر
لطيحة طفل لو ضلع ظل يتكسر
هذا  الكسر   للحشر    ما   يتجبر
لكل المظالم  هالكسر  ظل مصدر
              
وجراحها للحشري     مسمار والدم يجري
             دفع الباب وادماها
*---------------*---------------*--------------*

ماحفظو الهادي وطغو اصحابه
ما  أن  رحل  بالشر   تعنو   بابه
لدارك  يبو  إبراهيم  اجو طلابه
راس الشرور  السامري  واذنابه
                 
ثاراته قديمه       ومراده  الغنيمه
         من فاطمة استوفاها
*----------------*--------------*---------------*

شوصه النبي وكال اعله باب الزهره
لا مو  صحابه  اللي  تعدو   أمره
جانت حرايرهم أعز   من   خدره
عين  الزجيه  حيف تصبح حمره
             
ومصيبتها اليمه   وجراحها  مقيمه
                أي مصاب ارداها
*---------------*-------------*--------------*

محمد دعبل النوري

قال الرسول عن البتول

محمد النوري

الأمام علي وفقد الزهراء عليهما السلام

(نعي)


سالت دموعه وحن عليها
يذكر الزهره وحجيها
من تمشي جن مشية ابيها
راحت الزهره وصفك راحات

ينظر علي للحسن وحسين
وتسيل منه دمعة العين
ولو شاف زينب يسمع ونين
ويشوف لمها تسيل دمعات

كلش صعب فركة الزهره
ولاتنسي حلوة العشره
راح النبي واحتار بأمره 
والزهره ماظن ترد هيهات

حلت علي ساعات الفراك
ولحبابي انه كل ساعه اشتاك
راحو احبابي والصدر ضاك
ياريت تحظر ساعة الموت

ياموت وديني عليهم
اشوفهم واتسلى بيهم
مشتاك انه لنبرة حجيهم
ياحيف اخذهم مني الفوت


محمد دعبل النوري

سالت دموعه وحن عليها

محمد النوري

ياريت صابانه العمه
راحت يحيدر فاطمه
واملاك صاحت بالسمه
يهل المصيبه .. يهل المصيبه
~~~
يحيدر گلبك شلونه
انكسر ضلع التحبونه
گلبها الصبن عيونه
... عزيزك غاب

بواجي وتعب يا ويلي
وبعد حيله انهدم حيلي
شيخلص عالمشوا ليلي
... يضيم الباب

دفعوا فاطمه وطاحت هاي شلون شده
حيدر منكسر گلبه وتبجي اگباله ولده

وحسين كض گلبه وبجه
والحسن للباري اشتكه
حيدره عله اولاده انتجه
يهل المصيبه .. يهل المصيبه
~~~
شسوي وتلتم جروحي
وصل حد العرش نوحي
يفاطم غربة روحي
... بعد هيهات

خذوا من عندي عافيتي
طفوا گلبي وطفوا بيتي
ادري شلون تاليتي
... عزيز ومات

كون ضلوعي مكسوره ولا ضلع الزجيه
رحمة الله يا وادم ماتت بين اديه

يا روحي فدوه اتحملي
تعبان وتهدم علي
يا گلبي حگك تبتلي
يهل المصيبه .. يهل المصيبه
~~
الحنين اليفگد اعزازه
اعله كلشي يگوم يتوازه
يحط بحضنه الجنازه
... ويظل يصيح

امرك هذا يا ربي
لجن مات وشلع گلبي
بعدهم ما اندل دربي
... يگوم يطيح

اعذره اليلطم عيونه اذا فاگد حنينه
هو الشوفه راحاله بعد شتفيده عينه

خل يبجي لحد يعترض
خل يوگف بگلبه النبض
كون الدمع يركض ركض
يهل المصيبه .. يهل المصيبه
~~~~
يهاشم گعدوا حلوها
طلابت روحي شوفوها
اگبالي الزهره خلوها
... تريد اتموت

غير امريتي وسنيني
تدللني وتباريني
بعد ياهو اليحاجيني
... من اصيحن صوت

والله اطلابتي اطلابه ولا تنحل يهلنه
واثغب لا تلوموني مشت عني المحنه

انه اگضي كل شده وتفض
بس هسه ما بيه انتهض
والهجر بضلوعي يرض
يهل المصيبه .. يهل المصيبه
~
زينب طايحه وتنعه
وتگول البيت طگ ضلعه
بجي عابر عله السبعه
... يويلي ام عون

من هذا الضلع نبدي
واظل بكربله الوحدي
واتاني يعجل المهدي
... وهلي يردون

باجر تنذبح كلها وكلشي يصير بيه
وبنفس الحبل تنجر زينب وي رقيه

يم عون من هسه الجرح
باجر گطع روس وذبح
وعليج ما يطلع صبح
يهل المصيبه .. يهل المصيبه
°°°°°°°°°°°°°°°°°°°°°°°°°°°°°°



🎤 أداء: مسلم الوائلي
🖋 كلمات: علي مالك الموسوي

الاداء ملا مسلم الوائلي

حال مولاتنا فاطمة صلوات الله عليها

#######################

ست اشهور احسبله احساب
وضيع تعبي ذاك الباب
ابني ومنتضرته يصير
وتالي ايموت بچف سلاب

ليش اوليدي ما مرتاح
شفته بعيني المحسن طاح
ردته شويه بحضني ينام
وجاله البسمار الذبااح

الطفل لو طاح غير يصيح يمه
المحسن ما حچه المسكته دمه
تطشر انتظاري بدفعة الباب
وردت بس مره وحده كون اشمه

رايح حناني .. يمه يمه
الخاين زماني .. يمه يمه
بس مره گلي .. يمه يمه
ليش ابقى اعاني .. يمه يمه

###

اغفه براحه أوليدي ونام
بلكي وتطلع هاي احلام
شده وتخلص يمه انگول
حضني لطولك ضل محتام

اگـعـد بـعـد أمــــك والروح
ما اريدك من حضني تروح
ماني مصدگه أوليدي تموت
بلـكــي وتـطــلع ما مذبوح

ردت بس مره كون تصيح بسمي
ما ميـت واگـعـدك بـيـدي يـبني
من النسمه اخاف اعليك تدريني
چا تاليها اشــوف تـمـوت يمي

راح انتظاري .. يمه يمه
يبسو خظاري .. يمه يمه
تعبتني روحي .. يمه يمه
وباگو نهاري .. يمه يمه

##

فدوه اتنفس ليش اتموت
اشويه اضحكلي لو بسكوت
التاكل بيه يـبـني اهـواي
ما يـرهـمـلك اي تابـــوت

رحت من ايدي يمه ابساع
المثلي تربي وتاخذ گاع
ما همني ضلعي المكسور
الهمني اوليدي مني ضاع

صـعــبـه الـيـتـعب يضيعونه تعبه
اريده بحضني مـو بالگـاع يـربه
أعطشت مثل الحسين وانه احسك
وجبتلك ماي گلت اوليدي اشربه

الماي اشطلبنه .. يمه يمه
اهوايه تعبنه ... يمه يمه
شعده وي بزري .. يمه يمه
ما چنه حبنه ... يمه يمه

###

چنت امحضرتلك كاروك
وجاني الموت بگلبي يروك
ياعطر امك واحله اوليد
ليش الوادم ما شموك

يالما مشتم حتى انفاس
تهضمني وتجرحلي احساس
ما گالو بأبني أعله الخير
الله يعوضه تگول الناس

اشم بريـحـتك وأدمـوعي تجري
يشمامـة الزهره وتـعـب عـمـري
اريد اسأل الفگدن عن الأولاد
خاطر لو رضن اقـبـل بكسري

گلبي كسرته .. يمه يمه
بيوم الهجرته .. يمه يمه
ليهسه اصيحن .. يمه يمه
وابني خسرته .. يمه يمه

####

✍️ابو فضه الحميداوي

((ملح العشگ))




ملـــح العــــشگ من عتبتچ ... يافاطمه
الخدمه الصدگ من نضرتچ ... يافاطمه
يافاطمه
يافاطمه ...

***

يـــريعان الـــموده الشيمتني
بــخـــدمتها الـــزجيه كبرتني
وبــــالرئفه الحنينه وشملتني
ومن ايدي المجالسها خذتني

عـــزيز وأهـمل العين
وصرت بدفتر حسين
عفـــت الــناس للناس
وخذاني حب الحسين

دام الــــوفه مــــــن خيمتچ ... يافاطمه
الخدمه الصدگ من نضرتچ ... يافاطمه
يافاطمه
يافاطمه ...

***

ألــــچ ممنون كل صبح ومسيه
ألــــچ مــديون يــــايمه الزجيه
فهمت الخدمه مو غايه وقضيه
الخدمه الـــوحدي بدمعه سريه

عشــگ النـيه تسديد
اليخدمچ هذا شيريد
المــــهم يافاطمه ويآ
وبــيدچ ماسكه الايد

كـــل القـــصـص من قصتچ ... يافاطمه
الخدمه الصدگ من نضرتچ ... يافاطمه
يافاطمه
يافاطمه ...

***

يـــمـــولاتي بديـــچ الدنيا كلها
وأمـــلاك الســمه هــيه وأهــلها
أنـــه بــس دمـعه جايبلچ اهلها
وأحس الدمعه خدمه وما أملها

أمــلن دمعتي شلون
أمـــلن لــطم المتون
نخيتچ يأم الحسين
أريـدن ابچي عيون

تبــچي الســمه مــــن ونتچ ... يافاطمه
الخدمه الصدگ من نضرتچ ... يافاطمه
يافاطمه
يافاطمه ...

******

ألچ طشــيت يايمه سنيني
وبيدچ كون ريت تحزميني
ومن هذا وهــذاك اتبعديني
ومن حسين ريـت اتقربيني

بـــعد يــايمه أقرب
عـــليچ بخدر زينب
عليچ الماشرب ماي
وألــ بدمه تخــضب

هـــــذا الــــطلب من رئفتچ ... يافاطمه
الخدمه الصدگ من نضرتچ ... يافاطمه
يافاطمه
يافاطمه ...

***

يسالوفةْ محنه بماي جاري
الــمايدري بحنانچ آنه داري
أريد بخدمتچ ماتطفه ناري
هيچ آنه ردت هــــذا قراري

أريـــدن نار تلضه
مثل مولاتي فضه
وأضلن دوم وياچ
وبـالنضره أتوضه

اصـــل الـــكرم من حضرتچ ... يافاطمه
الخدمه الصدگ من نضرتچ ... يافاطمه
يافاطمه
يافاطمه ...



عبد زينب
محمد الابراهيمي

لحن(ملح العشگ)
بصوت
ملا حيدر المنصوري

لاستشهاد فاطمة الزهراء عليها السلام بحر الطويل (طور اهوازي )

الله ايعينچ على الظيم   واحزانچ يمظلومه
گضيتي الباقي من عمرچ  حزينة حال مهظومه

★★★★★
أمتحن بعض الذمم ربها. حتى ايشوف تاليها
من يرحل رسول الله.    شتسوي الخلگ بيها
ويبَيَّن  ياهو يخذلها.  الزچيه ومن يراعيها
ذمم كل خير مابيها . طلَّعَت حيل مذمومة
★★★★★
استَوَّه  بلگبر مدفون.  ماجف النبي اترابه
من ابن عمها الحكم سلبوه والشر واضحه اسبابه
وما إلها ورث گالوا.    طلعوا گوم سلابه
هيچ الحال بيها يصير. ترد علدار مهمومه
★★★★★
للواضح طلب توضيح. وعلشاهد يريد اشهود
حديث المنع كله اوهام   لابيه سند لاموجود
خايف لانفوذ الها.   الزچيه وبلعطايا اتجود
وخايف شوكه الكرار تقوه.   وتنجمع گومه
★★★★★
ويل على الشباب الراح.  بين اللوعه والحسره
بين العصره والبسمار. ودفع الباب.  والكسره
ماخافوا غضب ربهم.  وماندموا.  ولا مره
ولاخجلوا من المختار. ومن يلفي الحشر يومه
★★★★★
ضلت لوعه بالتاريخ.  وجروح اشيضمدها
قصه حزن ماترحل.   الوكت دومه يرددها
المحسن والكسر والباب  ولوعتها وسطر خدها
يشهدون على حرگ الدار بفعلة زمره مأثومه

الشاعر حسن لعيبي الحريشاوي

نزلة لمولاتي فاطمة الزهراء عليها السلام

تنزف جروحي.   عذبوا روحي.     يموعود
والله أذّوني     بچّوا عيوني.     يموعود
٠٠٠٠٠٠٠٠٠٠٠٠٠٠
فاطمه امك يمهدي تدري بالصار
هجموا علية يغالي وحركوا الدار
دفعو الباب عله صدري انصاب بسمار
يمته تظهر يا حبيبي وتاخذ الثار

اظهر لثاري.     ما طفت ناري.    يموعود
يبني ظلموني.    بچّوا عيوني.     يموعود
٠٠٠٠٠٠٠٠٠٠٠٠٠٠
لذت خلف الباب يبني وضلعي مجروح
ومن عصرني الطاغي بيده شاغت الروح
طاح يالمهدي جنيني ودمي مسفوح
وأثر سطرة أيده هذه يبني متروح

سطرته بعيني.    نار تجويني.    يموعود
ضربو امتوني.    بچّوا عيوني.     يموعود
٠٠٠٠٠٠٠٠٠٠٠٠٠٠
ما صحت وينك يحيدر  ظلعي مكسور
مچتف بأمر الوصية. ادري معذور
صحت يابويه مّحمّد ضربو النور
اكشف ترابك وعاين  وجهي مسطور

ادري تكليفه.    ما يسل سيفه.    يموعود
لهالسبب جوني.   بچّوا عيوني.     يموعود
٠٠٠٠٠٠٠٠٠٠٠٠٠٠
لا تظن ضلعي يطيب واشفه ورتاح
لحدما تظهر يمهدي دمعه ونياح
ادري عندك يبقه ثاري ثاري ما راح
ثار ضلع امك يمهدي ومحسن الطاح

انتظر تظهر.    يا شبل حيدر.    يموعود
ثكله خلوني.    بچّوا عيوني.     يموعود
٠٠٠٠٠٠٠٠٠٠٠٠٠٠
فاطمه امك يمهدي حقي مغصوب
يمته يبقه يابوصالح گبري محجوب
عَجّلَ اللهُ ظهورك گلبي مكروب
اظهر وزيح الضُلامه وشفي لگلوب

بيدك الرايه.     سيفك الغايه.     يموعود
تدري هضموني.   بچّوا عيوني.     يموعود

سيد زيد الفحام
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

الاداء ملا ستار الصالحي