اهوازي  (( هدهد الاصحاب  ))

……………………………………………………………

هدهد اجه وحيهم صاح • يزلم حسين وانصاره
اجيت امن الخيم بخبار  • بت الزهره محتاره

……………………………………………………………


سمعوا والمصايح صار . وضاگت گاع الـ چبيره
دخن غيظهم غيمات .  بالطف مطرت الغيره
طلگنه بأمس نسوان  . عفنه الاهل و الديره
انطم ارواحنه ابتربان . ولا بت النبي ابحيره

يريت ابصارنه انعميت
سماوات ابأرض طبگت
شنگول العلي الكرار • من انلوذ بكتاره

……………………………………………………………


حبيب الشيخ دمه ايفور . صاح وذب العمامه
التراب وصار اصفر لون . ظل ايبوس بجدامه
يلا امشونه لخت حسين . يمها انهبط الهامه
نگلها الهوه ولو طب ليج . نذبح ريحه وانسامه

ما نتأخر اشويه
خل نوصل العلويه
هاي امها اصعدت ليفوگ • صارت للعرش جاره

……………………………………………………………


ما لحگو رچب الخيل . حفاي اركضو  ليها
زلم جن طايره والگاع . فلا حست ابرجليها
ابوجهم گبل للخيمه . و سوو دائره اعليها
يا كعبة خدر واحجاب . واحنه انطوف حوليها

خيمه والله صانعها
خل ناخذ علگ منها
روح الزهره بيها ادور • بيها المصطفى انواره

……………………………………………………………


عراضه وعابس المهوال . ابحرگه ومن قره الهوسه
اخيامج اغلى من الروح . بهاي الزلم محروسه
تلاميذه وابوج استاذ . درسنه الزود بدروسه
هذا الجيش صم اتراب . عابس باجر يدوسه

احنا ابفخر متخرجين
من الجمل وي صفين
طاري الحرب لجل الدين • احلى واجمل ابشاره

……………………………………………………………


علي الاكبر اجه بأخبار . حبيب احملّك اوصيه
اتسلم عمتي وتگول . هله ابعمي الفزع ليّه
سمعها وظل يدگ الراس .يبچي وغاب عن وعيه
شنهو قيمتي يا ناس . وهي اتسلم اعليه

فدوه يروحلج عمج
اصيرن سور لخيمّج
عمج بعده شاب ازغير • يعشگ رِگب بتاره

……………………………………………………………


شويه ولن ضرب بركان . و اوتاد الخيم رَيّت
الشمس لبدت ابكتر الغيم . وارمال الارض عَيّت
ما ينشاف بس ريشات . سعفات النخل وَيّت
غاضب شافن العباس . خيل او يالابل صَيّت

شلون ابحيره تبگه اختي
وانا الهوه ايطب ريتي
اجيب الجيش الچ مگيود • وحگ محسن وبسماره

……………………………………………………………
✍️ ( سيد خضر الزاملي  )
لحن واداء ابوجلیل الدردوشی

دكت اطبول الحرب حل القتال
وبرزت الأنصار كلهم للنزل
تعنو وصارت عيايه ومغبره
سبعين لاجن قاتلو ابلا محال

حسين عنده نصار كلها مسنعه
خلو روس وجثث متكطعه
هاي تربات اليحب بلواقعه

حسين انصارك هد بينه
صاحو وبصوت اتعنينينه
نجيب العسكر والشط لينه

نجيب الطائر بالجو
لو اشر بيده
@@@@@@@@@@@@@@@@@@
لف حبيب عمامته وهد مرتجل
وكال هاذ الجيش شدو بلحبل
هوه هاذ اليوم يوم المفخره
هنا تبين إلزلم ما تبقى عدل

هدو عله الميمنه وعل ميسره
الجيش والخياله لزموهم سره
الحومه خلوها قيامه الاخره

عابس شك هدومه وناده
فدوه نروح الشيخ الساده
هدو كل واحد بعناده

زلم حسين اليوم تبين
@@@@@@@@@@@@@@@@@@
سمعو بزينب تخاف من النصار
وگبت عمايمهم وادوت نار
وهوسو يم خيمت الحر مفرعين
ااركاب نطي للخدر يا بنت الخيار


عيب تبقه ركاف فوك جسامنه
مادام زينب خايفه من اجدامنه
كومو طيحوها يخوتي اخياامنه

ذبو رباط وعلكوها
الحومه اليوم يطيحوها
ومعمايم منهم شالوها

شلون تخاف الحره
وحنه اركبنه طيح اليوم
@@@@@@@@@@@@@@@@@@
روس خلو كربله وكثر الدمه
صريخ واصل صوتها لسابع سمه
ذب صليبه وهب من شاف الحسين
الله يكون ابعونه من شافه انعمه


من حبيب اتعلم شلون العشك
دره بيضه وكلبه بلحب يدك
تريد تعرف بصدك همه الصدك

لحسين انطو معنه الصحبه
لكابلهم رد واكف كلبه
وليشرد ما يندل دربه

خياله شردت من عدهم خياله




خادم القصيده
عباس اللامي

قصيدة في أنصار الامام الحسين عليه السلام ....
ـــــــــــــــــــــــــــــــــــــــــــــــــــــــــــ


ثِـلّة بالــطف آية
دگّوا ٱلـــهم ثاية
ـــــــــــــــــــــــــــــــــــــــــــــــــــــــــــــــــ

ضجّت الـطف بيهم
ونـــعم مـن طاريهم
لو تگـــلي ٱشــبيهم
حسين اللي مربّيهم

ذوله تربــات الحــمولة ذوله زلــم النيـبة
ذوله ما حضروا مجالس للحـقد والغيـبة
ذوله طينتهم خليط ٱمن الشرف والطيبة
ذوله بحـــسين وقضـــيته ما لِفَـتهم ريبة

بكل زمن وفــاية
دگّــوا ٱلــهُم ثاية
ـــــــــــــــــــــــــــــــــــــــــــــــــــــــــــــــــــ

أخلِـصوا نِيّـــتهم
طلّــگوا دنـــيتهم
والصدق شيمتهم
وكربله جمـعـتهم

ويه أبو السـجاد طلعوا للمصــير الواضح
واليصـــير بـصــفه حـتماً هـو هذا الرابح
عن قــناعة ومو تعصّب أو تســرّع جامح
دقّت أجراس التنافس والوقت مو سانح

للچـــتِل عَنّاية
دگّوا ٱلهُم ثاية
ــــــــــــــــــــــــــــــــــــــــــــــــــــــــــــــ

چنّه ليـــث الـغابة
من نـَـظِرته ٱتـهابه
وصَـرّح لأصــحابه
بغــيرته اللّـــــهّابة

هذا ٱبن ظاهر حبيب وبيده شايل سـيفه
صاح حيهم يالنشامى حسين لا منـــعيفه
هذا مــــيدان الشـــــهادة واليــريد بكيفه
من غريم حسين سيفي اليوم ياخذ حيفه

وبيميني الراية
دگّـوا ٱلهُم ثاية
ــــــــــــــــــــــــــــــــــــــــــــــــــــــــــــــــ

يحچي ويّه ٱخوانه
الله بـــس ويّــــانه
بِـت علي تنـــخـانه
بــمدمـع الحــيرانة

نادى ٱبن قَــين بأخوته والعزم يبراله
گلهم اليـنصر إمـامه بهالوضع هنــياله
هذا بَـتّاري ويـفارگ عمـره من يـدناله
هنانه توقيع المفازة ويا بخت من ناله

الباري هُوّ الغاية
دگّـوا ٱلهُــم ثاية
ـــــــــــــــــــــــــــــــــــــــــــــــــــــــــــــــــــ

لَـف بُرير ٱلثــامه
يمشي رافع هامة
بجـــمرته وآلامـه
بعزّة شَدّ ٱحزامه

وگفـته وگفة عرندس من خِـطَب بالحومة
ما أهـــاب ٱمن المنايا وكــلمن وحَد يومـه
إبن أبوي وثـــاري آخــذ مـن يزيد وگــومه
أفدي الحسين وأريد بسيفي أجلي همومه

وآنه أمشي برَايه
دگّــوا ٱلــهُم ثاية
ـــــــــــــــــــــــــــــــــــــــــــــــــــــــــــــــــ
يا أخـــوتي وربــــعي
مــا أريـــــدن درعـــي
يا ســيـوف ٱجتـــمعي
حسين شوفي وسمعي

وگف جــدام العساكر والغضب بعيونه
آنه ذايب بالحـسين وأصبحت مجنونه
إلاّ أسحگ عالجماجم عابس ٱتـعرفونه
حســين قــرآن الإله وفِــنكم ٱتمـسّونه

إحنا بينه ٱكفاية
دگّــوا ٱلـهُم ثاية
ـــــــــــــــــــــــــــــــــــــــــــــــــــــــــــــــــ

بقلم الأستاذ / ستار عذاب الحچامي

قصيدة في بطولات أنصار الإمام الحسين عليه السلام  … 
ـــــــــــــــــــــــــــــــــــــــــــــــــــــــــــــــ

بالروح  ٱنوَفّي  الدّين
إحنا أنصارك يحسين

يَبنِ الكرار
يَبنِ الكرار

ـــــــــــــــــــــــــــــــــــــــــــــــــــــــــــــــ

يحسين يا روح النبي    والدّين عندك كِلّه
هيهات واحد يوصَلَك    يالماقِبَلت   الذّلّة
عالموت نِسحق سيدي   شِنسَوّي بيها المُهلة
والگاع كاتلها الظّما     ودَمّ المناحِر دِهلَة

بَس  أشّر  بالإبهام 
نِگطَع روس الظّلّام

يَبنِ الكرار 
يَبنِ الكرار 

ـــــــــــــــــــــــــــــــــــــــــــــــــــــــــــــــ

والشيخ ونعومه هِتَف   بيهم   حبيب  الهيبة
بالناس شاعت سيرته   معروف صاحب شِيبة
هاليوم يوم المرجلة     والحگ لزوم إنجيبه
بإيمان ثابت وبعزم     ما يوم  حَسّ  برِيبة

وَيل اليوصل لحسين
وِحنا هنا موجودين

يَبنِ الكرار 
يَبنِ الكرار 

ـــــــــــــــــــــــــــــــــــــــــــــــــــــــــــــــ

وزُهير بِن قَين ٱرتِجَز  ويصيح وسط الحومة
لحسين  ناذر مهجتي   والروح  بي  مهيومة
هاليوم لَترِك هالجِثَث   مِتچَدّسَة  و مركومة
مولاي ظَلّت صورته   بالبال  ها  مرسومة

مَحلاها الموتة ٱوياه
شنهو  الدنيا   ٱبلَيّاه

يَبنِ الكرار 
يَبنِ الكرار 

ـــــــــــــــــــــــــــــــــــــــــــــــــــــــــــــــ

ويصيح عابس يا خَلَگ  بحسين جَنّ جنوني
ماعوف مهجة  فاطمة   هالكون  لو تنطوني
ما ريد درعي ولامِتي   بسيف الحقد گطعوني
بحسين جَنّني العِشِگ   يا   ناس   لَتلوموني

ٱشما  أنذِبح   أرتاح
بنحري ويطگ سِبّاح

يَبنِ الكرار 
يَبنِ الكرار 

ـــــــــــــــــــــــــــــــــــــــــــــــــــــــــــــــ

مِن بين أنصاره نِطق   وياك  يَبنِ الزهرة
يحسين رايد  يِختلِط    دمّي  بدمايه العِترة
لَئيم أصلي وأرتجي    مولاي مِنّك  نظرة
مبخوت كلمن يِخدمك  خَلّص حياته وعُمرَه

حَد سَيفَه بيهم جَون
مِن ضربته يشردون

يَبنِ الكرار 
يَبنِ الكرار 

ـــــــــــــــــــــــــــــــــــــــــــــــــــــــــــــــ

أبرار كِلهُم صُحبِتَه   
وبالغيرة إلهُم حِصّة

أحرار لِلموت بشَرَف 
بالطّف إجَتهُم فُرصة

أنصار واحدهم غِده
بحلگ النواصب غُصّة

ثُوّار سووا كِل عَجَب
وحسين بيهم وَصّى

يحسين إلَك هالروح
فدوة  لثراك  تروح

يَبنِ الكرار 
يَبنِ الكرار 

ـــــــــــــــــــــــــــــــــــــــــــــــــــــــــــــــ

بقلم الأستاذ / ستار عذاب الحچامي

#محرم_ليلة_الأنصار

حي الله الأنصار حي الله الأنصار
.............................
شالو الرايه الجبيره .. وهوسو بالميدان
هدو بسوح المعاره .. وخلو الطف حيران
هجت الحومه بزلمها .. وعالي صار الدخن

والله كلهم شجعان ،، وللمخيم قربان
حي الله الأنصار حي الله الأنصار
..............................
اذن اذان الحريبه .. وهدلت ضهور الخيل
عيت وهبتو رسنها .. وكربله انگلبت ليل
عثرت الگوم بهدمها .. ومابعد زلمه يعيل

الحومه صارت طشار ،، وعتلت بيها النار
حي الله الأنصار حي الله الأنصار
.............................
شالو البيرغ نشامه .. وترسو الطف هوسات
غيمت شيبت حبيب .. شمحله هاي الشيبات
وطبها وتمرجل زوهير .. الكابله مگبل مات

هتزت وجون ختاض ،، وشبعت الخيل ركاض
حي الله الأنصار حي الله الأنصار
.............................
عابس تمرجل دخيله .. وثوبه بالطف نيشان
شردت الخيل بزلمها .. ومابقه اعليها امجان
ماشرب ماي بطلعته .. اتضامن او يالعطشان

الله يستر لوصاح .. يقبض بسيفه ارواح
حي الله الأنصار حي الله الأنصار
.............................
طبهم الحر الرياح .. ومسلم ربات الزود
صارت الفزعه الاصيله .. وردو الگوم ردود
من وهب اخذ الوفاء .. الضحه للخيمه زنود

كلشي صاير محتار ،، ودخلت الحومه نذار
حي الله الأنصار حي الله الأنصار
العبد ابوفايز الرافضي

انصار الشهيد حسين

#الشاعر_الميرزا_محمد_الساعدي