مسلم والعباس (عليهم السلام)

اذا هسه حضر
ابن عمي الگـمر
ندگ ظهر بظهر
ونذل القاده
ــــــــــــــــــــــــــــــــــــــ
ينادي مسلم اليوم .. ابو فاضل أريده
يهد اوياي عباس .. يشيل الرايه بيده
ندوس الروس الاكبار .. والشارد نصيده

نطب الهه .. نزلزلهه نسوي العالي سافلهه
تموج الكوفه بينه منو اليگدر علينه

ابن عمي .. يشد عزمي تمنيت الگمر يمي
واعرفه الكله غيره وعلي ايشرّد عشيره

خبر وي الهوه
بعثت النينوه
أنه بعازة گوه
يعم الساده
ــــــــــــــــــــــــــــــــــــــ
اذا يحضرني عباس .. قصرهم كله يشرد
ونسوي الكوفه دخان .. حصد بالجيش نحصد
اذا يسمعنه ٱدم .. أظن من گبره يگعد

علي هوه .. زلم يسوه ياخذهم ركض كوه
اعرفه مايجامل من زغره مقاتل

وانه بظهره .. أشد أزره واكتل حته بالخزره
واليمي ايتقدم اشمرنه بجهنم

سبع هد وي سبع
الطرق خل تنكطع
نطب بلا درع
زلم صياده
ــــــــــــــــــــــــــــــــــــــ
چفافينه الخضر هاي .. مصاحف للرجوله
خوذنه البيهه ريشات .. علايم للبطوله
علي افرح يكرار .. تلاميذك هذوله

يشوفونه .. يحسبونه عشيره ومايلاگونه
مسلم وابن عمه زلـمه اكبال زلـمه
عمايمهه .. جماجمهه نطشر بيهه وانلمهه
نسوي الكوفه هيمه ابقيادتنه العظيمه

عله اخشوم الزلم
ندوس ومانهم
المواقف تنحسم
بعلي واولاده
ــــــــــــــــــــــــــــــــــــــ
اخوي وصاحبي جان .. وابن عمي وعضيدي
گمر متربي عالسيف .. وأنه الصولات عيدي
الركاب ايصيحن ادخيل .. اذا حط ايده بيدي

وحيد آني .. يكوفاني واريدن مسلم الثاني
نصير اثنين زائد بخت گبه ومراقد

اهل نيبه ..صدگ هيبه مضيف ولم معازيبه
اذا طوعه تهلهل غضب من الله ينزل

ونفض المساله
بقراءة بسمله
مدد يا كربله
سفيرچ ناده
ــــــــــــــــــــــــــــــــــــــ
أبوه الدفن سلمان .. قادر عالـمعاجز
المسافه برمشة العين .. الگمر يعبرهه جائز
الزلم للنجف والله .. يوديهم جنائز

اعرفنه .. واشبهنه اخوه المجتبه جنه
المابردن دلاله يعزب للاجاله

يضرباته .. يحملاته تطيح الطير خزراته
اذا سيفه يشيله ابوفاضل دخيله

يجي اوياي الكفو
منو ايخبره منو
يساوي مية اخو
الگمر تعداده
ــــــــــــــــــــــــــــــــــــــ
حمل مسلم على الجيش .. يطوعه هلهليله
مناره وطاخ بالغيم .. يدنگ مسـتحيله
خلاهم يركضون .. قبيله اتجر قبيله

اجو كثره .. منو اينصره خناجر تطعن بظهره
اهل قصر الاماره يريدون انكساره

بقه الوحده .. ولاعنده صديق ايعينه وايسنده
إبنبل وارماح اجوله يحيف اتوصلوله

خذوه اعله السطح
لقد حان الذبح
وهذا اول جرح
وفه بميعاده

محمد الجماسي

للسيدة حميدة ع لسان حال السيدة زينب ع


گومَّن يا بنـــات حســـــين وَيَّايه
عدچن يم حميدة مجلس اقراية
و انـــتي يا رقية
شادود العــزية
ـــــــــــــــــــــــــــــــــــــــــــــــــــــ
مــن الكوفة مـــــرسال و خبر جانه
مسلم يبَس عـوده و ذبلت أغصانه 
ظلـــــــــت وردة منــه تمشي وَيَّانه
حميدة هواي گال حســـين حزنانة

مــــا بطلت مناحة تريد والدها
امشَّن عالمصيبة خل نساعدها
محتاجة المسية
شادود الـــــعزية
ـــــــــــــــــــــــــــــــــــــــــــــــــــــ
مكسورة گلب بالخيمــــــــة تتلوه
مخـــــــنوگة و تـجــر انفاسها گوة
ما ظنها بعـــــــــد من الدمع تروه
باگوا مــن عُمـــرها سنينها الحلوة

روحن يمَّها افتحـن للعزه ساحة
و خلنها ابوسطچن تلطم ابراحة
ما تحمل أذية 
شادود العزية
ـــــــــــــــــــــــــــــــــــــــــــــــــــــ
تجـري اعله الابو دمعتها محنية
عمت عيني وگع ما شــارب امَّيه
اريدنچن تســـــــون يمها لطمية
بلكت تستراح و تهـــــجع اشوية

وحيدة لا تحس والدها خلاها
يعمَّة اتشاركن باللـوعة وياها
مكسورة خطية
شادود العــزية
ـــــــــــــــــــــــــــــــــــــــــــــــــــــ
صوبين الدمـــــــــع بالحرگة صبَّنه
و بالطـور العــــراقي جــــذّبن الونة
مُلاية انتي صيري عمــــــة يا سكنة
و انتن يالبقيـــة اللـــــــــطم شدَّنه

دم أويه الدمع كـــون الجفن ينبع
و اريدن باللطم لحم الصدر يوگع
ذوبن بالــرزية
شادود العزية
ـــــــــــــــــــــــــــــــــــــــــــــــــــــ
چلمة بويه لاحـــــد يمها تحچيها
من تسمعها منچن ينغمي اعليها
عنهـــا لا تغفلــــــن و اعتنن بيها
و اذا عالعين لطمت كضَّن ايديها

سَمعَّنها كــــــــلام ايطَيب الخاطر
واسنها اوتواسيچن ظــــــــهر باچر
بطف الغاضرية
شادود العـــزية
ـــــــــــــــــــــــــــــــــــــــــــــــــــــ
لابو ابراهـــــيم خلـي اعيــــونچ تعمه
سفــير حسين هـــــذا الغالي ابن عمه
طاح امن القـــصر فوگ الارض جسمه
و عالحيطان نَثَّر لحــــــــــمه وي دمه

مجتوف ارتمه و امـربطه اچتافه
يابس ريجه و الدم تارس اشفافه
نيرانه ســــرية
شادود العزية
ـــــــــــــــــــــــــــــــــــــــــــــــــــــ
الحمدلله
علي حسين الكناني

الاداء ملا امير الفتلاوي

#موشح


ارد اناشد طوعه شنهو اخبارها
شلون بالكوفه انذبح خطارها
*
تگول طوعه وگف بالباب العصر
طلب ماي ومن شرب ظل ينتظر
انصرف لهلك گتله ما عندك مصر
گال وين اهلي بعيد ديارها
***
گال وين اهلي بعد يا حره وين
وحيد وبهذا البلد مالي معين
انه مسلم انه ابن عم الحسين
النسب هاشم من قريش اخيارها
**
تگول ظيفته وگلت حي هل الظيوف
وخاني ابني وطوقت داري السيوف
تگول طوعه الجيش ما ينعد ألوف
خيل ورجال ويجر جرارها
*
تگول سل السيف وتچنه وركب
وغاص بيها وحمت نيران الحرب
تگول طوعه وساگها صفوف وسرب
تگول چن حيدر علي كرارها
**
تشوف چن حيدر على الجيمه انحدر
وصاح شجعيني بهلاهل من اكر
طوعه ذكريني بعلي القاتل عمر
وصال وصفوف وكتايب دارها
*
بالمراجل مثل مسلم ما وجد
دارت عليه الألوف وما ارتعد
بالسيوف- وبالرماح- وبالعمد
والنسا فوگ السطوح بنارها
**
تگول طوعه ومن نزل بمهنده
تگول طوعه وغبر وجوده العده
والله فارس فوگ فارس وسده
ورجعت بخيبه الجيوش وعارها
*
تگول طوعه وشبچت اعليه الرماح
العطش والحر واذخنو بيه الجراح
تگول طوعه وبعد من غير السلاح
بنار ترميه العده وبحجارها
*
تگول طوعه وشان اهل كوفه الغدر
تگول طوعه وحفروا بدربه حفر
تگول طاح وشبچت اعليه السمر
بهلحفيره ومادره بحفارها
*
وخذو مسلم للقصر ياحيف اسير
وحيد لاناصر إله ولاظل مجير
ودخل گالو ماتسلم عالامير
گال اميري النصبه مختارها
***
تگول طوعه وريتها عميت العين
وصى گال بهل بلد مطلوب دين
وبعد من ياخذ وصيتي للحسين
خله يرجع بالحرم لمصارها
****
تگول طوعه وريت لاطال العمر
تگول طوعه ارموه من عالي القصر
تگول طوعه وبالحشر شنهو العذر
واهل كوفه تحملت بوزارها

الشاعر
حافظ السعيدي

الاداء ملا جواد الغرباوي

الى اولاد مسلم ع

لحظه ياسيف... هذا اخوي وارد اشمه وارد اودعه
لحظه ياسيف... امي وصت يمه اخوك ولا تضيعه

گلبي ما ينطيني اشوف تحز وريده
گبله تاخذ عمري اطلب ما اريده
لحظه ياسيف....لحظه ياسيف
...........................
خاف  تاذيه.. وچنه ورده ..من تجيله بهيده لو توصل رگبته

ها لتغير..شوفه ذابل .. مصيبة الطف ذوبت گلبه ومهجته

من يعاين..فوگ الاخدود..گطره گطره اتطيح هالنزلت دمعته

تاني ياسيف..امي وصت..لو بچه وليدي اريدنك تسكته

خاف تاذيه....هاك اخذ روحي ابداله وعوف نحره
خاف تاذيه....بعده  ما شابع  حنان زغير  عمره

شگد صعب لوفارگ الواحد عضيده
گبله تاخذ عمري اطلب ما اريده
لحظه ياسيف ... لحظه ياسيف
.............................
لو  تخليه ..يروح لختي ..علينه خاف اتدور وتسأل حميده

يتيمه تدري..وخاف تمشي..
تدري للشام المسافه شگد بعيده

لا ابوها..وماهو عمهه..شلون لو بالليل فزت لو تريده

خاف ترحل..هم رقيه..يلعبن تعودن واخاف اتضل وحيده

فوگ الاشواك..لو مشت اختي وتعورها جدمهه
فوگ الاشواك..يصبّر عليهه ويخفف من المهه

ماهو ابوها وتغفه چانت فوگ ايده
گبله تاخذ عمري اطلب ما اريده
لحظه ياسيف...لحظه ياسيف
.............................
يالله ياخوي..ماهي حلوه..دنيه  وبلايه اهل هم واذيه

 نمشي لهناك..يم ابونه..نگعد   بحظنه ويجمعنه سويه

 آخر وداع..خويه خويه..ماهي بيدي واشگف سهام المنيه

حان الافراگ..يا زماني..خل اشم نحرك واظمك بين ايديه

علينه مكتوب... ننسبي لو ننذبح هم مثل ابونه
علينه مكتوب...مثل  عمنه عله الفرات يگطعونه

عله الذبح احنه انفطمنه ومو جديده
گبله تاخذ عمري اطلب ما اريده
لحظه ياسيف....لحظه ياسيف
................................
ارد  اوصيك..يا حياتي..بالنهر  لو قرر يذبهن جثثنه

راح اتانيك..ما اخليك..ايدي  بيدك نمشي ونكمل دربنه

لو جرى الماي..ابقى وفاي .. واعدت امي سوه نگضي عمرنه

ياهوه الهاب.اخذ الاوداع..وصله لختي وگلهه ياريح انذبحنه

مسحي الادموع...يا حميده وامشي مسبيه ويعمتچ
مسحي الادموع...لا اخو وياچ وينشفلچ  دمعتچ
امشي ويسكنه المسافه شگد بعيده
گبله تاخذ عمري اطلب ما اريده
لحظه ياسيف ....لحظه ياسيف
................................
يالله ياسيف..خلي الاعتاب.. مسلم يعاين علينه وهاليتاني

هناكه وياه..عمي عباس..ظهره محني يعاين العمتي ويعاني

آه وويلاه ..شلون اگله..عمتي اتعاتب عجب بس لا نساني

خاف احاچيه..وانه ادري..راسه  مفضوخ ابعمد آه يا زماني

بعدك شصار...زينب احتارت شني يسكت اليتامه
بعدك شصار...حرمله شسوه بأخوك اهوه وسهامه

والعليل الحبل لفوها عله ايده
گبله تاخذ عمري اطلب ما اريده
لحظه ياسيف .....لحظه ياسيف
ــــــــــــــــــــــــ
 علاء المياحي

ثواب النشر هدیة الی روح امي و ابوي

قصيدة بحق اولاد مسلم
............. .........

غربـــــة ويتامة أزغار بيـــــهم دهرهم دار
فـروا غصب خـوف ورعب
غـــربة ويتـــــــامة أزغــــــار
------------------------------------------
فزع كل جيش امية العيلة سلبوها
ويـنادون الخيم بالنار احركـوها
وبالـخيل اليتامة ازغار اسحكَوها
يتـامة اثنين هاي الحالة شافوها
حطوها ايد بأيد نمشي لبونة انريد
من السلب خوف ورعب
غــــربة ويتــــــامة أزغــــــــــار
---------------------------------
فروا بالبراري ابلــــيل ممشاهـم
يتامة والمصايب شــــدت وياهـم
الوكت من العذاب اشكال راواهم
ينادون الابو كل ســـاعة ماجاهـم
بالغربة ظلوا عام بسحن العدة الظلام
وكل السبب خوف ورعب
غــــربة ويتــــــامة أزغــــــــــار
--------------------------------
يبچون اعلى غربتـهم نهار وليـل
وياليل اليتامة امن البواچي طـويل
السجن والغربة وايتام ودموع اتسيل
حـــالة مؤلمة اتشـــــــيب وتهد الحيل
وياهم بچة السجان عليه الامر ماهان
دمعة يصب خوف ورعب
غــــربة ويتــــــامة أزغــــــــــار
-------------------------------------------
مسح دمع اليتامة وانـــــــكسر كَلبـــة
ودمعة اعلى اليتامة بالوجن صبة
يحفظهم ويسلمهم دعـــــــــــة ربـــــة
ومن غربة مشوا تالي لــــبلد غربـــة
الحارث يصيح بصوت ياهو اليريد الموت
موت وغرب خوف ورعب
غــــربة ويتــــــامة أزغــــــــــار
-------------------------------------------------
ابراهيم ذب روحة اعلى ابن امة
كَبل الموت اخية ايودعة ويشمة
يحارث خل يصب دمي كَبل دمة
ذبحهم بلا رأفة ولا رحـــــــمـــة
دمهم جرة الخوان بيهم دهرهم خان
ابلا ذنب خوف ورعب
غــــربة ويتــــــامة أزغــــــــــار
________

أسالكم الدعاء رائد الاسدي

الاداء ملا عدي الربيعي

يوم مسلم بن عقيل ع..
ضياع اولاد مسلم ع بعد حرق المخيم وهروب الاطفال في الصحراء وكانت معهم حميده بنت مسلم ع.. فقالت..

وين يخواني الدرب منانه
بالظلام الليل لحگوا جانه
لركض بالظلمه صعب .. لا تضيعون الدرب
بالظلام الليل لحگوا جانه
………………………………
هاي بت مسلم حميده طفله ماخذها الجمر
وياليتامه گام تركض من المخيم يستعر
وين وي اخوتها حارت اولاد مسلم من تفر
نار واجيوش ال اميه بكل مكان ابكل كتر

اولاد مسلم ياهضم محتاره
منين ماتدري الدرب اثاره
تگلهم وترجف رعب .. لا تضيعون الدرب
بالظلام الليل لحگوا جانه
………………………………
طلعوا ولزمت اديهم بالدرب رگضو سوه
وعلى محمد گام طاهر ينتچي جدمه انچوه
عليهم اتعاين حميده والگلب منها انلوه
منين للمچوي حميده تجيب هالساعه دوه

تگله ياريت الحرگ بجدامي
ولا يطاهر تركض اعرج ضامي
خويه هديت الگلب .. لا تضيعون الدرب
بالظلام الليل لحگوا جانه
………………………………
خويه خل منانه نركض گالت وبيها ألم
لا نتيه الليل اجانه خل نرد صوب الخيم
لويخوتي هناك نمشي هناك يم ذاك العلم
ذاك اظن عباس عمي لايذه بجثته حرم

خويه يمحمد نروح انشوفه
بلكت بزينب تدلنه چفوفه
ضعنه والديره غرب .. لا تضيعون الدرب
بالظلام الليل لحگوا جانه
………………………………
گالها محمد يخويه هالدرب كله خطر
شوفي ذيچ اطفال تركض وبجثث كلها تعثر
صدت وشافت زغيره خايفه تحاچي بنحر
ذيچ يمكنها رقيه عليها شوگلبي نفطر

هنانه تانوني انگطع دلالي
خل اروحن يمها اشوف الغالي
حسين ذاك العالترب .. لا تضيعون الدرب
بالظلام الليل لحگوا جانه
………………………………
ركضت الصوب ابو اليمه ولنها زينب صادفت
وحيل شبگتها حميده وبحظن زينب بچت
وزينب تگلها حميده رقيه يمكن تيهت
لايعمه هناك هيه يم نحر عمي شفت

عمه اخوتي هناك ايتانوني
راح اردن خافن ايضيعوني
وضل دمع زينب يصب .. لا تضيعون الدرب
بالظلام الليل لحگوا جانه
………………………………
رجعت وشافت حميده ماكو لخوتها اثر
تصيح وين اولاد مسلم والظهر منها انكسر
ركضت الصوب المخيم رجعت الصوب النهر
صدت وشافت اثرهم حيل بعدو عالنظر

ودعتهم من بُعد مهضومه
وضلت ابين الجثث بالحومه
ابين ويلات الحرب .. لاتضيعون الدرب
بالظلام الليل لحگوا جانه

الشاعر عقيل الحسناوي

الاداء ملا عدي الربيعي