مسلم حاير ظل بالكوفه مسلم حاير
ريتك حاضر يابو الحملة ريتك حاضر
مسلم حمل لوعات يالتحضر الشدات
ريتك حاضر يابو الحمله ريتك حاضر
........................
ابجرح كلبي وجفن مافارك المدمع الك اشرح مصيبة مسلم وتسمع
مصيبه ومن حزنها الطود يتصدع امن الكوفه بعد ياعلي اشتتوقَّع
مصيبه ولو ردت اذكرها يالأنزع أخاف اعليك اخاف الطبره تتوسَّع
تلهب ناري امن اذكر مسلم تلهب ناري
وهاي اعباري تفيض وتنزف هاي اعباري
واشتنفع العبرات يالتحضر الشدات
ريتك حاضر يابو الحمله ريتك حاضر
....................................
عله الموعد وصل مسلم يبو السبطين للكوفه وتعنَّه بأمر من حسين
عكب ما بايعوا نقضوا عهود الدين لصوب الظالم ابن ازياد منجرفين
ومسلم ظل وحيد وظل يدير العين ما يدري يحيدر يتجه لا وين
نكروا عهده اهل الكوفه نكروا عهده
كلهم ضده شاف الوادم كلهم ضده
وانعقدت الرايات يالتحضر الشدات
ريتك حاضر يا بو الحمله ريتك حاضر
........................
بالكوفه واهلها مسلم اتحيَّر مايدري النتيجه اشلون يا حيدر
كعد يم دار طوعه الحره يتفكَّر وابحسرة كلب مجروح يتحسَّر
ابدلاله مواقد ضيم تتوجَّر يفت صم الصخر هالحال والمنظر
شافت طوعه حالة مسلم شافت طوعه
نار اللوعه ابكلبه استعرت نار اللوعه
يومك جزاه وفات يالتحضر الشدات
ريتك حاضر يابو الحمله ريتك حاضر
........................
طوعه تنادي ومنها الكلب مرتاب شنهي وكفتك يا هذا يم الباب
امنين انته ولعلَّك من بلد اجناب لنها تستمع من ابن اخوك اجواب
غريب آنه يكلها وما إلي اصحاب أريد الماي ضامي واحس كلبي ذاب
بس هالمطلب منج عندي بس هالمطلب
ماي ارد اشرب وآنه الضامي ماي ارد اشرب
أشرحلك المأساة يالتحضر الشدات
ريتك حاضر يابو الحمله ريتك حاضر
........................
لمن شرب منها الماي ظل محتار لنها اتناشده اشعندك اباب الدار
تتلفَّت أشوفنك يمين ايسار جنك ما الك لا أهل لا أنصار
جاوبها يحرَّه أهلي ناس اطهار عقيل الوالد وعمي علي الكرار
أريد اتعذر لا معرفتك أرد اتعذر
عمك حيدر صيح وحشَّم عمك حيدر
وإصرخ يبو الكلفات يالتحضر الشدات
ريتك حاضر يابو الحمله ريتك حاضر
........................*
لن طوعه تكلَّه وأدت المعروف هاي الدار دارك واعتبرنه اضيوف
إدخل بيها امن لا يمسَّك خوف ولمن بزغ وجه الفجر لنَّه يشوف
دار الحرَّه طوعه طوكتها اصفوف طلع والكوم حاطوه ابحجر وسيوف
عكب الهمه وسفه اتيسَّر عكب الهمه
وذابوا جسمه من قلعتهم ذبوا جسمه
وبالغربه مسلم مات يالتحضر الشدات
ريتك حاضر يابو الحمله ريتك حاضر

بقلم الاستاد الحاج جابر الکاظمی
الحان وأداء الرادود الحسيني ابوجليل الدردوشي

حميده بنت مسلم


الطول غيبته ايجيب الغنايم
وانته طــــولت بالگــــبر نايم
يمـــــته اترد عليه
يالرحت امن اديه  ـ يمسلم
°°°°°°°°°°°°°°°°°°°°°°°°°°

الك يشتاگ گلبي اهواي
الورد يتريه جاري الماي
بعيد وصورتك بالعين…
بخيالك عايش انته اوياي

يهلال الفرح ليش غايب وانه اعاني
فراگك شيب الراس يتمـني وعماني
اتاني وانته ماجيت لا طارش لفاني
بويه وجـــمر فرگاك ما يبـــرد ثواني

نومك بالگـــــبر موش ابمحله
رحلت موتك والله ادهه رحله
منك ماكو جــــــيه
يالرحت امـن اديه  ـ يمسلم
°°°°°°°°°°°°°°°°°°°°°°°°°°

بعد صعبه استــــــلذ ابنوم
الوسن ماشاف عيني بيوم
انتــه راحــتي ابدنياي…..
رحت والگلب ضل ملچوم

ينفعني العمر بيش ميته اوياك ودي
شمحله الموته وياك وتمـدد ابلحدي
من اشرحلك الحال من ياجرح ابدي
سهم الهجر چتال وتوســط ابچبدي

ضل يبچي الصخر دم اعله حالي
راحـــت ذيــچ گعــــــدات الليالي
الموت ارحــم أليه
يالرحت امن اديه  ـ يمسلم
°°°°°°°°°°°°°°°°°°°°°°°°°°

غايب يا عمـــــــود البيت
بحميده ابنيتك اشخليت
يمسلم بويه من بعدك…
يتيمه ابلا ابو ضـــــليت

رحت وصــعبه انســـــــاك وتحمل الفرگه
سنيني يخلصن وياك نوح وبچي وحرگه
غرگانه ابحر شــــــــــــوگ وتأملك شهگه
حضني اعليك ملهوف حن ويريد شـبگه

يالعايفـــــني ورگـه والزمـــــن ريــح
دمعي اعله الوجن مثل النده ايطيح
رد ونضل ســويه
يالرحت امن اديه  ـ يمسلم
°°°°°°°°°°°°°°°°°°°°°°°°°°

شجره آنه ويبس عودي
ودمعي امفطر اخدودي
طفح بركان صبري اعليك…
وطلب عون معبــــودي


عطشانه اعله ملگاك يالظهري حنيته
گلبي بشوفتك ليش ماجيت ورويته
ضاگت بيه دنياي طــــــولك مالگيته
ماخففلي اي نار كل دمعي البجـــيته

انتظرك يبــويه ولازمه الباب
يدمي ناضري امناطر الغياب
شدهتـــني الرزيه
يالرحت امن اديه  ـ يمسلم
°°°°°°°°°°°°°°°°°°°°°°°°°°

اسولف بيك وتحـــلم
تضعضع حيلي وتهدم
مكسورة گلب بعدك
مـــن فرگاك ما اسلم

بروحي اتهيج الاشواگ يتفايض حنيني
مــنك بويه ياريت بس طيفك يجـــيني
يخـــلص ليلي حســــبات وتسله بونيني
يامـــن تارس العـــــين رد لا تطفه عيني

مهجت روحي انته وسر حياتي
بمـــوتك ودعـــــت كل امنياتي
شــــوف اصار بيه
يالرحت امن اديه  ـ يمسلم
°°°°°°°°°°°°°°°°°°°°°°°°°°

✍الخادم
كامل السعيدي

الاداء كامل السعيدي

نهض مسلم تلثم        وتلون سيفه بالدم

تنخه بيا علي             تنخه بيا علي
*****
سحب سيفه وتوضه ونتده يا راعي الكلافه
يقتال العرب ياعمي يا سيد الخلافه
وحيد وماله ناصر والعطش يبس شفافه
صفه بديره غريبه بوحده والله حسافه

شهر سيفه وندبهم           وذبح خيرة زلمهم

تنخه بيا علي           تنخه بيا علي
*****
اصيل وابن اصايل طيب وطاهر حليبه
خنك ريت هواهم والشرد منهم يصيبه
علي معلمه المعارك والحرب عرسه ونصيبه
حمت والحومه صارت حمره من شدت لهيبه

اصيل وسيفه غاضب           لوه بجفه الشوارب
تنخه بيا علي             تنخه بيا علي
*****
فتح باب المعارك ورتجز وسط العساكر
شمر جثه اعله جثه وصفن عقول العشاير
ولا زين التدنه لمسلم ومن يمه عابر
اليجي ويوصل حدوده خل يحسب راسه طاير

الكتايب كلها تخضع       الكرب يمه يتكطع
تنخه بيا علي               تنخه بيا علي
*****
سليل من الهواشم بالفخر والغيره مجده
تسرفن للمعصيه وارتجز واحزامه شده
تخاوه ويه المنايه وزعل السيف اعله غمده
نزل طول وعرض بيهم ولا واحد يرده

بلا خوذه يقاتل           ملك للحومه نازل
تنخه بيا علي               تنخه بيا علي
*****
بجت عين اليالي وطفو انوار المدينه
وبده يستنكي بيهم يذبح الي وينه وينه
صبغ دربه بدماهم والنعم سلمت يمينه
صفت بس بالاشاره انتبه بالك يجينه

هلك جيش بجموعه          تهلهل يمه طوعه
تنخه بطا علي               تنخه بيا علي
*****
عذر ما خله ليهم بارز القاده وذبحها
ونعم يابو حميده خالط الليل وصبحها
يمنبع للشهامه وريحت الغيره وملحها
خزر عين التجي بعينه وتناوشها وشلعها

ذبح جا باها ما مل         السبع يمه يتزلزل
تنخه بيا علي                تنخه بيا علي
*****
الشاعر عبدالله علوان

الاداء ملا ستار الصالحي

نزال لمولاي مسلم بن عقيل عليه السلام


جدح غيض ابعينه وتسرفن للحرب
هلا براعي الغيره الدخل بيهم رعب
ابو طاهر واحد ولاغيره بشر
ابو طاهر مغضب دخيله من يطب


شد عمامته وطبهم .. دخيله
وسط الكوفه شمرهم .. دخيله
خيال الحرب مغضب اجاهم
من چفوفه شيهدهم .. دخيله
////////////////////////////////////
ياخيال البيده ويافراس الشدد
اهو واحد لكن فلا همه عدد
ابن ذاك الفدائي الاسد وكت الحرب
علي عمه وابوه الولد من هالاسد


مسلم صعب تفسيره .. دخيله
هوه ولاتضن غيره .. دخيله
مسلم واحد وراعب زلمهم
الهاشم ورث هالغيره .. دخيله
/////////////////////////////////
عليهم ناوي ونزل يفرض فرض
تفت شمرة سيفه وغدت كلهه ركض
يسبع الكوفه وتتعب يمنتك
بعزم سيفه يحارب سحلهم بالأرض


مسلم طبهم بسيفه .. دخيله
العدو يتراوه اله بطيفه .. دخيله
مسلم ياسلام الله اعله اسمك
بيهم يذبح بكيفه .. دخيله
/////////////////////////////////
هلا براعي الزود وهلا براعي الستر
ياصمصام الغيره الردع بيده الكفر
هلا بزود حسين وابن عمه الكفو
ابو طاهر هيبه وكلف وكت العسر

عالي الشان طب ليها .. دخيله
القاده ينتچي اعليها .. دخيله
كلهم بالقصر دخلهم انذار
الكوفه بسيفه داحيها ... دخيله
///////////////////////////////////

أداء الملا ابو أمير الفاطمي

الكوفه الكوفه الكوفه مسلم وصل للكوفه
:::::-----:::::
مسلم وصل طب الجيش انذار ميه الميه
و منك نعم كلك جود يمشييم العلويه
شيخ الوصل للميدان طب لابس الخاجيه
تسيوره سير عل كوم بعكتله والجفيه
مو واحد وياه ألفين الكوم هيج تشوفه
:::::-----:::::
بوقي الحرب دك انذار طوعه تهلهل كامت
مسلم رعب طب للكوم وعيونهم ما نامت
يرعد زلازل شافوه بكاع البراري هامت
زلزال طبها و بركان جن القيامه قامت
يوم الحجيج بكوفان مذعوره كلها اطوفه
:::::-----:::::
طش الخبر بين الكوم صفين حارت بيها
قاسم قسم بالكرار الحره روحي افديها
اجيوش اذا كد الكون والزهره اله افنيها
زينب تريد الاخبار اسرع وكت ايدريها
جرحه كلف ما يراف بس الحسين يروفه
:::::-----:::::
مثل الاسد بالميدان تاج الامامه براسه
غيرة علي داحي الباب منه اخذ موماسه
الماخذ شجاعت عباس متشيم بعباسه
شده وصلابه وايمان مايوم يضعف باسه
الماصار راح يسويه والجرح يصعب روفه
:::::-----:::::
زعلان طك راس براس نعمين ابن الساده
ألاف طشرها السيف سوه العلي وزياده
القائد نزل بالميدان يختار وين القاده
لو زاد لو قل الجيش ما يهتم التعداده
يبس بلاعيم الكوم الزارع بيهم خوفه
:::::-----:::::
حسن صالح العيساوي

✍حسن العيساوي

الاداء ستار الصالحي

نعي بقلم الشاعر تحسين الخفاجي
بصوت الرادود ستار الصالحي

قصيدة نزال بحق مسلم ابن عقيل عليه السلام

وية مسلم لو حظرعباسها
چا الكوفة اختنكَت ابانفاسها
------------------------------------------------
مسلم وعباس لو حظروا  ســـــوة
اعلى الزلم من خوفهة ايظع الهوة
وابو فاضل سيفة من دمهم روة
وجا برجلة  جيوش امية  داسها
-----------------------------------------------
مسلم وعباس تربيت الــــــــولي
وهالشجاعة كلها من حيدر علي
من يطبون العساكر تبتـــــــــلي
كبار امية تشرد وحراســــــها
---------------------------------------------
مسلم وعباس لو متجمعــــــــــــين
للرچاب ايصير  دم الظالمــــــين
وكَلبوا الكوفة بهلها اجمعـــــــــين
اتظل تدوس الخيل فوكَ ارجاسها
----------------------------------------------
مسلم وعباس ما هابوا خطر
بالحرب لوحطوا الظهر ابظـهر
اشما يصير  الجيش الاف البشر
ما يهم اشما كثر  مقياســــــــها
---------------------------------------
مسلم وعباس جــــيش لوحدة
لو حمل واحد الثانـــي ايساندة
شلون لو طــبوا تكَابـــلهم عدة
عروش امية تنهدم من ساسها
----------------------------------------
مسلم وعباس للشدة ظـــــخر
حزام ظهر حسين بيهم يفتخر
العمر لجل الدين نذرولة نـذر
وراية الاسلام محد جاســها
-----------------------------------------
مسلم وعباس وفوا بالعهـد
بالبشر بالكون مامنهم احــد
ظل ذكر هم دوم خالد للابد
تاج للامة وبقوا نوماســها
--------------------------------------------
مسلم وعباس كتبوا عالــسنين
احنة فدوة انروح بس يبقى الحسين
نفدي لجلة الروح احنا امعاهـدين
ولجلة فدوة الدنيا هية وناســـــها
------------------ ------------------
أسألكم الدعاء رائد الاسدي