የትምህርት ማስረጃዎችን የማጥራት ሥራ በክልሎች ደረጃ ተግባራዊ ሊደረግ ነው፡፡

በፌደራል ተቋማት ላይ የተጀመረው ሐሰተኛ የትምህርት ማስረጃዎችን የመመርመር ሥራ በክልሎች ደረጃ እንደሚጀመርም የትምህርትና ስልጠና ባለሥልጣን ም/ዋ/ዳይሬክተር ቢኒያም ሔሮ ለአሐዱ ሬዲዮ ተናግረዋል፡፡

ማስረጃዎችን የመመርመር ሥራው በጠቅላይ ሚኒስትር ቢሮ እንደሚመራ ም/ዋ/ዳይሬክተሩ ገልፀዋል፡፡

በቀጣይ የትምህርት ማስረጃዎችን በዲጂታል አማራጭ ብቻ ለመስጠት ሙከራ እየተደረገ እንደሆነም ኃላፊው አብራርተዋል፡፡

ማስረጃዎችን በመፈተሽና በማረጋገጥ የህግ ተጠያቂነትን ለማረጋገጥ እየተሠራ እንደሚገኝም ጠቁመዋል፡፡ #AhaduFM

@tikvahuniversity

ባለ ብዙ ሙያ ተመራቂው

ጅማ ዩኒቨርሲቲ ባሳለፍነው ቅዳሜ ካስመረቃቸው ተማሪዎች መካከል ባለ ብዙ ሙያ ተመራቂ የሆኑት ዶ/ር በዛብህ ብርሃኑ ይገኝበታል።

የቴሌቪዥን ድራማዎች ፅሁፍ ዝግጅት እና መፃሕፍት ማሳተም ዶ/ር በዛብህ የሚታወቅባቸው ሌሎች ጉዳዮች ናቸው፡፡

ዶ/ር በዛብህ በቅርቡ የሚያሳትመውን ጨምሮ አራት መፃሕፍትን የፃፈ ሲሆን፤ ስድስት ሲትኮም ድርሰቶችን በመድረስ ለህዝብ አድርሷል፡፡

በጥርስ ህክምና የዶክትሬት ዲግሪ ተመራቂው በዛብህ፤ በሀገራችን በተለያዩ ቴሌቪዥን የሚተላለፉ ተከታታይ ድራማዎች ላይ በደራሲነት ተሳትፏል፡፡

ዘጠነኛው ሺ ከ35 ክፍል በላይ፣ መስሪያ ቤት፣ ሳሎኑ፣ ዶክተሮቹ፣ ፊሽካዎቹ እና አንድ ላይ የተሰኙ ድራማዎች ላይ በደራሲነትና በዳይሬክተርነት ተሳትፏል። በርካታ የቴሌቪዥን እና የራዲዮ ማስታወቂያዎችንም አዘጋጅቷል።

ደራሲ እና የጥርስ ሐኪም ዶ/ር በዛብህ ብርሃኑ፤ በቅርቡ ለህትመት የሚበቃ "የአፍ ጤና አጠባበቅ ለልጆች እና ለወላጆች" የሚል መማሪያ መፅሐፍ አዘጋጅቶ ማጠናቀቁንም ገልጿል።

@tikvahuniversity

#ጥቆማ

የመሬት ሕግ እና ፖሊሲ ቅኝት በኢትዮጵያ የተሰኘ መፅሐፍ አርብ ሚያዝያ 11/2016 ዓ.ም ይመረቃል፡፡

በአዲስ አበባ ዩኒቨርሲቲ ፕሬስ ለህትመት የበቃው መፅሐፉ፤ በዳንኤል በሀይሉ የተፃፈ መሆኑ ታውቋል፡፡

መፅሐፉ አርብ ሚያዝያ 11/2016 ዓ.ም ከሰዓት 8፡00 በራስ መኮንን አዳራሽ ይመረቃል፡፤

@tikvahuniversity

የ12ኛ ክፍል ብሔራዊ ፈተና መቼ ይሰጣል?

የ2016 ዓ.ም የ12ኛ ክፍል ብሔራዊ መልቀቂያ ፈተና መቼ እንደሚሰጥ በርካቶች ጥያቄ አድርሰውናል።

የ12ኛ ክፍል ብሔራዊ ፈተና በሰኔ ወር እንደሚሰጥ የትምህርት ምዘናና ፈተናዎች አገልግሎት መግለፁ ይታወቃል።

በዚህ ዓመት የሚሰጠውን የ12ኛ ክፍል ሀገር አቀፍ ፈተና ለመውሰድ ከ670 ሺህ በላይ ተማሪዎች ምዝገባ እንዳደረጉ መገለፁም ይታወሳል፡፡

ለሦስተኛ ጊዜ በዩኒቨርሲቲዎች ውስጥ የሚሰጠው ብሔራዊ ፈተናው፤ ዘንድሮ ለተፈጥሮ ሳይንስ እና ለማኅበራዊ ሳይንስ የትምህርት መስኮች ለእያንዳንዳቸው በስድስት የትምህርት አይነቶች እንዲሰጥ ትምህርት ሚኒስቴር መወሰኑ አይዘነጋም፡፡

@tikvahuniversity

#ጥቆማ

አሶሳ ዩኒቨርሲቲ በቀርከሃ ላይ ትኩረቱን ያደረገ ዓለም አቀፍ ጉባኤ ያካሒዳል፡፡

"Climate-smart Bamboo Forest Economy for Sustainable Development” በተሰኘ ጭብጥ ላይ የሚመክረው ጉባኤው፤ ሚያዝያ 11 እና 12/2016 ዓ.ም ይካሔዳል፡፡

ቀርክሃ ከምግብነት እስከ ቤት ውስጥ መገልገያ እቃ፣ ለቢሮ እና ለመኖሪያ እንዲሁም ለቢዝነስ፣ ዘርፈ ብዙ ጥቅም ያለው አረንጓዴ ወርቅ ነው፡፡

ኢትዮጵያ አንድ ሚሊዮን ሄክታር የተፈጥሮ ቀርክሃ ሃብት እንዳላት የሚገመት ሲሆን በቢኒሻንጉል ጉሙዝ ክልል ከፍተኛ የቀርክሃ ሃብት ይገኛል፡፡

ለሁለት ቀናት በሚካሔደው ጉባኤ፤ በርካታ የዘርፉ ተዋናዮች እና ተመራማሪዎች እንደሚሳተፉ ይጠበቃል፡፡

@tikvahuniversity

#ጥቆማ

የኢትዮጵያ ሳይንስ አካዳሚ “የባህላዊ ቅርሶች ጥበቃ ተግዳሮቶችና መፍትሔዎች” በተሰኘ ጭብጥ ላይ የፓናል ውይይት መድረክ አዘጋጅቷል፡፡

ውይይቱ ዛሬ ሚያዝያ 10/2016 ዓ.ም ከቀኑ 10፡00 ሰዓት ጀምሮ፣ በአዲስ አበባ ዩኒቨርሲቲ የቢዝነስና ኢኮኖሚክስ ኮሌጅ እሸቱ ጮሌ መታሰቢያ አዳራሽ ይካሔዳል፡፡

መርሐግብሩን የኢትዮጵያ ሳይንስ አካዳሚ በኢትዮጵያ ከሚገኘው የአሜሪካ ኢምባሲ ፐብሊክ ዲፕሎማሲ ክፍል ጋር በመተባበር የተዘጋጀ መሆኑ ተገልጿል፡፡

በባህላዊ ቅርሶች ጥበቃ ዘርፉ ታዋቂ የሆኑ ምሁራን በመድረኩ በአቅራቢነትና ተወያይነት ይሳተፋሉ፡፡ ሁላችሁም ተጋብዛችኋል፡፡

@tikvahuniversity

#ጥቆማ

“ኢትዮጵያ:- ከግብርናና ከምግብ ቀውስ ነጻ ስለ መውጣት” በሚል ርዕስ ለህትመት የበቃ መፅሐፍ ተመረቀ፡፡

“ኢትዮጵያ:- ከግብርናና ከምግብ ቀውስ ነጻ ስለ መውጣት” የተሰኘው የአቶ ጌታቸው ድሪባ የጥናት ውጤት የሆነው መፅሐፉ፤ በአዲስ አበባ ዩኒቨርሲቲ ፕሬስ ለህትመት መብቃቱ ታውቋል፡፡

በሀገሪቱ የግብርና ዘርፍ ልማት ላይ ጥልቅና ሳይንሳዊ ዕይታን ያቀረበው መፅሐፉ፤ በዘርፉ ለሚደረጉ ጥናትና ምርምሮች ማጣቀሻ ሆኖ ያገልግላል ተብሏል፡፡

መፅሐፉ ETHIOPIA: OVERCOMING AGRICULTURAL AND FOOD CRISES በሚል ርዕስ በእንግሊዘኛ መታተሙም ተገልጿል፡፡

@tikvahuniversity

#Update

የመውጫ ፈተና መቼ ይሰጣል?

ትምህርት ሚኒስቴር ሚያዝያ 9/2016 ዓ.ም ለከፍተኛ ትምህርት ተቋማት በፃፈው ደብዳቤ፤ የመውጫ ፈተና ከሰኔ 14 እስከ 21/2016 ዓ.ም ድረስ እንደሚሰጥ ለማወቅ ተችሏል፡፡

የግል ከፍተኛ ትምህርት ተቋማት የመውጫ ፈተና ለመጀመሪያ ጊዜ የሚወስዱ የቅድመ ምረቃ ዕጩ ተመራቂ ተማሪዎችን መረጃ በማሰባሰብ በትምህርትና ስልጠና ባለሥልጣን በኩል አረጋግጠው ባሳለፍነው ሳምንት ለትምህርት ሚኒስቴር መላካቸውን ያገኘነው መረጃ ያሳያል።

@tikvahuniversity