قصيدة في ولادة الإمام الحسن المجتبى عليه السلام


عاشگ وهواك. بالروح ألگاك
يبن الزهراء. هيهات انساك
💜💛💜💛💜💛

يالحسن حبـك بالگـلـب لگيته حبيبي
عهدي العقدتّـه وياك مانسيته. حبيبي
وگلبي الملكته بحبك وخذيته حبيبي
بالمـولــد الّليله الـك هـديتــــه. حبيبي
ليـلة افـــراح. وجهك مصباح
فرحان وجيت. اسـهـر ويّـاك
💜💛💜💛💜💛

ليلة نصف رمضان ياعظُـمـها. حبيبي
بنورك سطـع يالمجتبه نجمها. حبيبي
هبّت نسـايم عـطـرك ونشمـها. حبيبي
هالليله بسمك يالحسن اسمها. حبيبي
يالغالي سلام ياثاني امام
دايم مولاي. خلّيني معاك
💛💜💛💜💛💜

للزهــره امّـك ابـعـث التهـــاني. حبيبي
فرحــانه بيـك اتحقق الامـــاني. حبيبي
بگلبـي اهنّـي فاطـمـه ولســاني. حبيبي
شوگي لحضرّتك هالمسه خذاني حبيبي
بنفاسي ادّور. گلبي المسرور
رفّ ونـاداك. يامحله ضواك
💛💜💛💜💛💜

وجهك بدر ضوّه الأرض ضيائه. حبيبي
حتى الـگـمـر غـاب وترك سمائه حبيبي
شــــالـك عــلي وظلّلّك بـردائـه. حبيبي
ياوارث علــومـه وحسِـن بهــائه. حبيبي
شافك ورتاح. كل همّه نزاح
عن طه علي. بسمك سمّاك
💜💛💜💛💜💛

انت الامام الثاني وعتصامي حبيبي
ابعث الك وي الهوى سلامي. حبيبي
يالحسن يحله بمولدك كلامي حبيبي
يمك بداية رحلتي وختـامي. حبيبي
ليلة ميلاد. بسمك تنعاد
بفراح ونور. للموت وياك

سيد زيد الفحام
___________________________

قصيدة ( يا اغله محبوب )
اداء ملا غسان الزبيدي
كلمات خادمكم زيد الفحام

قصيدة في عيد الغدير ذكرى تنصيب امير المؤمنين علي عليه السلام خليفه بعد النبي بأمر الله جل جلاله


بلّغ يامٌحمّد. للكرار اشهد
سلّمله الولاية بعدك للنهاية
والرحمن أيّد والرحمن ايّد
.................

بلّغ يامُــحــمّـــــد وخبر الناس
علي هوه الأمير وتاج عالراس
علي مثلك يبوالزهراء ينقاس
نفس اخلاق روحك نفس الاحساس
سلّمله الامامه. تحلاله الزعامه
سيّد عالبراية. بعدك للنهاية
والرحمن ايّد. والرحمن ايّد
.....................

اذا ما بلّغت ما يكمل الدين
بلّـغ يارسـول اللّه هالحين
علي بعدك خليفه عالمسلّمين
ارفع چفّه خل تشوف كل عين
گلهم الله راده. خصّاه بالسّياده
نزلت لجله آية. بعدك للنهاية
والرحمن ايّد. والرحمن ايّد
.......................

رقه المنبر رسول الباري محلاه
صاح بصوت صاح الكون ويّاه
ألا مَن کُنتُ يا هالناس مولاه
علي هـذا اميره وهـوه مولاه
من بعدي خليفه. خسران اليعيفه
منهاج الهداية بعدك للنهاية
والرحمن ايّد. والرحمن ايّد
........................

علي هوه الخليفه واللّه راده
رسول الله حصر بسمه القياده
حله براس الوصي تاج السياده
مثل طه يعيّشنـه بـسـعــاده
بالحق والعداله يحفظها الرساله
معروف السجاية. بعدك للنهاية
والرحمن ايّد. والرحمن ايّد
..........................

احنه الشيعه متمسكين بامره
بايعنه علي وهيهات نبره
غصباً عالنواصب نحيي ذكره
قدر المصطفى المختار قدره
نرفضها السقيفه. بس حيدر خليفه
هوه من البداية. بعدك للنهاية
والرحمن ايّد. والرحمن ايّد

سيد زيد الفحام
_______________________________________

هوسات وابوذيات في عيد الغدير


دين الله كتمـل بـولايـــة الـكـرار
الله ختاره من بعد النبي المختار
والي عله البريه ومخزن الاسـرار
( والبايع حيدر هنياله )



شال ايده الرسول وصاح يالاصحاب
هـذا المـرتضـه الكـرار داحــي البـاب
حـاضـركـم يوصـل هـالخبـر للغـــاب
( حيدر واليكم بغيابي )



رافـع ايـد ابوالحسنيـن ابوالزهـراء
تشهدله الشمس والناس والصحراء
صـاح بصـوت منكـم رايـد الإصغاء
( مو آنه الخالق مختاره )



كلمـن واله ابوالحسنيـن والاني
والعـاده الوصـي الكـرار عاداني
علي بعدي الإمام ومايصح ثاني
( والينكر حيدر ماريده )



علي رب العُله ختـاره. وراده
رفض كلمن نكر فضله. وراده
ربيـع ولايتــه فـاحـت. وراده
عطر حب الوصي حامي الحميه



رسـول الله بغـدير الخم. جمعها
النـاس وقـرر ونـاده بــ جمعها
الولاية بحب علي الباري جمعها
وتنصّب للنبي حيدر وصيّه



صفات المصطفه حيدر حملها
شريعة ربنه بس حيدر. حملها
ورث علم النبي وشايل. حملها
علي وطه النبي نفس السجيه

خادم امير المؤمنين علي عليه السلام
سيد زيد الفحام
_____________________________

قصيدة في عيد الغدير

ياعلي مدد بايعنه بالولاية
ياعلي مدد بيعتنه للنهـاية
.................

بعد النبي مُحـمّـد. انت الولي المسدد
بيك الشرع تجسّد. ياحيـدر وتـأيّــد
بيعـه للأبـد يالطاعتك هداية
ياعلي مـدد. بيعتنــــه للنهاية
..................

بارينــه بالاراده. خصصلك القياده
تحلالك السياده. تاج عله كل عباده
حافظ العهد ياطيّب السجاية
ياعـلي مـدد. بيعتنــه للنهــاية
.....................

يابيعـــة الغــديـــري. يافرحة البشيـري
هالصرخه من ضميري. حيدر علي اميري
واضح السند. ترويها چم رواية
ياعـلي مــدد. بيعتنـــة للنهــاية
.......................

بايعنــه عـن عقيده. بس شخصك النّريده
بس شيعتك سعيده والينــــــــه يالصميـده
رادك الصمد سيّد عله البراية
ياعلي مـدد بيعتنــه للنهــاية
.......................

ياسيّدي اجينه. مدّينه الك ادينه
يالنصّبَك علينه. رب العُله ونبينه
توفي بالوعد. ياوافر العطاية
ياعـلي مــدد. بيعتنــه للنهاية

سيد زيد الفحام
________________________________

قصيدة في تتويج الإمام المهدي المنتظر عجل الله فرجه الشريف


ياوريث المصطفى وجامع خصاله
علمه وخلاقه وفضل جاها وجماله
..

سيدي يالمهدي خصّك بالكـــرامه
خالق الأكـوان ونطـاك الزعـــــامه
لبّسك يالمنـتـظــر تـاج الامـــــامه
سيدي وكل شيعي يبعثلك سلامه
الله خـصّـك بالـعـــلم جـلّه جــلاله
..

اليوم تتويجك ياقـــائـدنه واملنه
الله مـن دونـك فـلا يـقـبـل عملنه
انبـايـعـك يالمهدي هالليله بحفلنه
نـشـكـر المعبـــود خـدامـك جعلنه
بيك يالمـهــدي كـمـل نهج الرساله
..

توّجك رب العرش يالمـهـدي قــائد
وارث أهل البيت غيرك ماكو واحد
انّـجـمـعـنـه الليله اتبـاعــك نعــاهد
انبايعك بعد الحسن والباري شـاهد
كل محب يمته الفرج تسمع سؤاله
..

فرحـت الزهــراء بيـك وفرحة هيّـه
مـن تـسـلّمـت الأمــر هــاي المسيّــه
انـت تـاخــذ ثـارها امن النـاصبيّــــه
وثـار ابـوالأكـبـر ذبيــح الغـاضـريّــه
بسيفـك تبـيـد الظلم وهـل الضــلاله
..

بفـرحــة التتويـج هالليله انجمعنــه
سيـدي انـهـنّـيـك يالمهدي ابفـرحنـه
احنه انصـارك يـمـهـدي العترة احنـه
يمته يايوم الفـرج يالمـهـدي صحنـه
كل ظلم يـنـزاح وتـســود العـــــداله

سيد زيد الفحام
________________________________

قصيدة في مولد سيد الكائنات محمد رسول الله صلى الله عليه واله


مُحمّد اشرقت انواره
مُحمّد. والأله اختــاره

🌿🌿🌿🌿🌿🌿🌿🌿

اشرقـت انـوار طه يافرح مر بينه
نَـوّر الأكــوان نـوره بمولده تهنّينه
ذا حبيب الله مُحمّد ياهلا بهادينه
انبارك المهدي مُحمّد بالمحافل جينه
مُحمّد. النه احله بشاره
مُحمّد. والألـه اخـتــاره

🌿🌿🌿🌿🌿🌿🌿🌿

بمـولـد المختار احمد نـفـرح ونتباها
حلوه لحظات الولاده بالفرح عشناها
يارسـول الله مُحـمّـد كـلـمـة رددناها
جَمعَه وافراح وتهاني الليله يامحلاها
مُحمّد. ياعظيم اسراره
مُحمّد. والألـه اخـتــاره

🌿🌿🌿🌿🌿🌿🌿🌿

آدم وكـل المــلائـك سجدت لمحبوبنه
نـور هادينـه مُـحـمّـد هالبـزغ بـدروبنه
والصـلاة عليـه هـيّ تمحي كـل ذنوبنه
بالحشر منّه الشفاعه هذا بس مطلوبنه
مُحمّد. شيعته وانصاره
مُحمّد. والألـه اخـتــاره

🌿🌿🌿🌿🌿🌿🌿🌿

الله خص طه نبيّـه وميّـزه باوصــــافه
من جماله ينور وجهه بعين كلمن شافه
سيّد عله الناس كلـــها بتقوتـه وألطافه
عشگته گلوب البـرايـا كل گلب ما عافه
مُحمّد. خالد بـآثــاره
مُحمّد. والأله اختاره

🌿🌿🌿🌿🌿🌿🌿🌿

سيّـد الأكــوان كلــــها نـفـرح ابميـلاده
هذا هوه الهادي أحمد سيّد عله الساده
للـرسـاله الاحـمـديّـة الله خـصّـه وراده
لاشك المهدي يشـــارك يحضر باعيـاده
مُحمّد ما تجف انهاره
مُحمّد. والألـه اخـتــاره

سيد زيد الفحام
____________________________________

ابوذيات وهوسات في ولادة رسول الله مُحمّد صلى الله عليه واله


اجتنه وبشّرت نفـرح. رسلنه
بولادة سيّـد وآخــــر. رسلنه
تهاني الفرحة للمهدي. رسلنه
نهنّي المنتظر هاي المسيــه ( صلوات )



خبر عن مولد الهادي. وردنه
يفوح بعطره هالليله. وردنه
حضرنه بمولده نفرح. وردنه
نشارك بالفرح بنته الزچيـه. ( صلوات )




مُـحـمّـد ما وصل واحد. لفضله
رسـول وعالبشـر كلـــها. لفضله
ربـنـه بأعـظـم الفــاضه. لفضله
يمدحه بخُلقه وخلاقه السخيه. ( صلوات )


هوسات //

سُبحـــانـه الإلــه شـصـوّر وابـدع
خلق طه النبي من نوره وتشعشع
من وجه النبي نور وحِسِن يسطع
( نَوّر دنيانه بانواره )



فجر سابع عشر صار بربيع اوّل
انولد نور الرسول الطاهر الأكمل
من سابـع سمـه الأمـلاك تـتـنـزّل
( تـتـبـرّك بالهادي ونوره )



مُحمّـد اشرق بوجهه اليشع انوار
حبيب الله الرسـول وهازم الكفّار
لولا المصطفه هـذا الخلق ما صار
( لعيونه الخالق سوّانه )



واحنـه بمـولـد المختـار فـرحـانيـن
ننصب محفل لراعي الشرع والدين
ويـن الرايـد ينـول الشفـــاعـة ويـن
( خل يفرح بالهادي ويانه )

خادم سيد الكائنات وحبيب الله مُحمّد صلى الله عليه واله
سيد زيد الفحام
________________________________

https://youtu.be/u42yVJn7F7o
ارجو الاشتراك بالقناة اخوتي الأعزاء ليصلكم كل ما هو جديد في رثاء محمد وآل محمد عليهم السلام
حفظكم الله من كل سوء

https://youtu.be/fVIXA-zQHuM
ارجو الاشتراك بالقناة اخوتي الأعزاء ليصلكم كل ما هو جديد في رثاء محمد وآل محمد عليهم السلام
حفظكم الله من كل سوء

قصيدة في ولادة الإمام المهدي عجل الله فرجه الشريف


گلبي حَبّك مو بديه وماشفت غيرك حبيب
انت روحي واعز منها هيچ احسنّك قريب
آنه مجـروح بغيـــابـك إلّا اشوفنّك وطيب
يمته يالمهدي تجينه
نـنـتـظـر امرك بقينـه
............

جيت اباركلك يمهدي بمولدك يبن الحسن
أرد اگلّك ياحبيبـي گلبي صايـرلـك وطن
يمته اشوفك ياامامي ياكل بعمري الزمن
مولدك فرحة وسعاده
نـفـــرح بهــاي الولاده
...........

ابعث ورود وتهاني لحضرتك يالمنتظر
جيت اقدملك ولائي حبّك بگلبي كبـر
اغله من كل الغوالي يا أمام عله البشر
انـتـظـر سـاعـة ظهورك
يمته شوف بعيني نورك
............

ويـن دلّيني ابمكـــانــك سيدي آنه اعتنيك
لشوفتك ملهوف گلبي كل وكت أسأل عليك
مره وحده وهاي تكفي أرد شوفك ارتجيك
يمته اشوفك يا امامي
كل وكت أرسل سلامي

@zaidzai11

سيد زيد الفحام
________________________

قصيدة مدح في حب الإمام المهدي المنتظر عجل الله فرجه الشريف

يامهدي وينك والصبر ماذيني
مر بيه طيف وخل تشوفك عيني
مشتاگ اشوفك والهجر اذّاني
عطشان حيل وشوفتك ترويني
مجنونك. يالمهدي مو بيدي العشگ
وعيونك. حبيتك وحب من صدگ
ياريتك. تنظرله گلبي من يدگ
بسمك ينور عيوني
شاغلّي فكري وماغبت عن بالي
اسمك حبيبي واغله من كل غالي
انت الهوى ،، وسمك دوه ،، ما اسوه لوما حبك مكفيني
يمهدينه يمهدينه يمهدينه الك روحي
............

مثلك بشر لا ما يمر بروحي
عايش تظل يالمنتظر بجروحي
سهرانه عيني لشوفتك كل ليله
يمته الفرج خضّر مصاب بنوحي
أيامي. ظلمه ورحل عنها الفجر
آلامي. يالمهدي عايشهن عُمُر
بغيابك. تدريني ما أحمل هجُر
هجرك صعب ياغالي
روحي عله حبك سيدي موصّيها
كل يوم جمعه عله الوعد تلگيها
عنك ابد ،، ما ابتعد ،، سهران اظل حد ما تشوفك عيني
يمهدينه يمهدينه يمهدينه الك روحي
................

مو آنه كلشي بهالزمن ينتظرك
ولياوكت عايش وحيد بعمرك
ماظل صبر بيّه الهجر اذّاني
اتمنّه اموت ولااعيش بهجرك
ارويني. عطشان الك صبح ومسه
احييني. رايـد هـــــواك اتـنـفّـسَـه
يهديني. گلبك حنيـــــن وما نسـه
يالمهدي يامولانه
سامع دعائي بكل فجر يوميّه
اشكيلك جروحي وعذابي البيّه
مات الصبر ،، طيفك يمر ،، چا يمته يالمهدي وتجي وتحييني
يمهدينه يمهدينه يمهدينه الك روحي
........

لاموني كالـوا ما يرد محبوبك
وانه ازرع ورود الفرج بدروبك
گلتلهم ابقه عله العهد ماعوفه
مو بيدي هوه الگلب راح لصوبك
حبيته. اسمك يمهدي امن الزغر
حسّيته. هجرك مثل طعم الجمر
يامهدي. ادعي لظهورك كل فجر
ياربي عَجّل يومه
مشتاگ ابوس تراب جدمك بوسه
يالمهدي روحي بحضرتك مغروسه
يابوالوفه ،، والمعرفه ،، يالشوفتك تحيي الفرح بسنيني
يمهدينه يمهدينه يمهدينه الك روحي

سيد زيد الفحام
_________________________

قصيدة في ولادة امير المؤمنين علي عليه السلام


فرحانه كل الدنيا فرحانه
بمولد علي الكرار مولانه
***
سُبحانه مَنْ سوّه الوصي وراده
بالكعبه بيته يصير ميلاده
هذا الأمير وسيّد الساده
حيدر علي معروفه امجاده

فرحتنه من كل دار
مولد علي الكرار
من مهده شع النور
يامحله هالانوار

عيون التحبّه تبقه سهرانه
بمولد علي الكرار مولانه
***

انشق الجدار ودخلت ام حيدر
بيت اللّه شعشع بالوصي وازهر
هاي الكرامه لا متتكرّر
بس لعلي حامي الحمه الاطهر

ساجد قره القرآن
للخالق الرحمان
بعد النبي المختار
حجه عله كل انسان

مبتهجه جنّ وأنس ويّانه
بمولد علي الكرار مولانه
***

ستبشر نبينا بهلّت انواره
حيدر وصيّه واقدس انصاره
بچفوفه شاله ويعرف اسراره
امن الكعبه شاله المصطفه لداره

يامحله هالنورين
طه وأبو السبطين
شرّفهم المعبود
بيهم ختام الدين

انزل علينا الباري احسانه
بمولد علي الكرار مولانه
***

ثالث عشر هالليله نحييها
بيها انولد حيدر علي بيها
ليلة ولاده بفرحه نگضيها
نور الوصي الكرار يضويها

ليلة هنه وافراح
عطر الورد فوّاح
ميلاد ابو الحسنين
كل التعب ينزاح

بس شيعة الكرار ربحانه
بمولد علي الكرار مولانه

سيد زيد الفحام
_________________________________

ولادة الإمام الحسين عليه السلام الثالث من شهر شعبان المبارك


گلبي المرتاح .. عاش الأفراح .. بميلادك صاح
يامحبوبي
يحسين وياك .. هيهات انساك .. ناديت اهواك
يامحبوبي
...........

هبّت نسمه ويامحلاها. نسمة مولد حسّيناها
من وصلت لينه عرفناها منك يحسين
ثالث شعبان متانينه. انوارك وزّعها علينا
يحسين نباركلك جينه يانور العين

فضلك مشهور .. اسمك مذكور .. بحروف النور
يضوي دروبي
يحسين وياك .. هيهات انساك .. ناديت اهواك
يامحبوبي
.............

ميلادك نوّر دنيانه. وگلوب احبابك فرحانه
مبتهجه العالم ويّانه. بهذا الميلاد
اعظم آيه واجمل بُشره. ميلادك ياروح الزهره
يحسين وأكثر من مرّه. حبك يزداد

وجهك يحسين .. ضوّه الكونين .. وبرمشة عين
يجلي كروبي
يحسين وياك .. هيهات انساك .. ناديت اهواك
يامحبوبي
..............

وجهك يسطع يامحلاته. نور الرحمن بوجناته
بمهدك وترتل آياته. تقره القرآن
يحسين وسرّك سر مخفي. بس نورك عالعالم يكفي
نورك نور اللّه ومايطفي. طول الأزمان

ميلادك صار .. نور الأنوار .. حبك غفّار
كل ذنوبي
يحسين وياك .. هيهات انساك .. ناديت اهواك
يامحبوبي
............

فرحانه الزهره وفرحتها تسجد للخالق خلّتها
ليلة ميلادك ليلتها سهرانه وياك
والكرار الحاضر عندك مستبشر ويهزّ ابمهدك
اوصافك منّه ومن جدك خالقنه انطاك

بيومك مولاي .. فرحان هواي .. تسمع شكواي
كل مطلوبي
يحسين وياك .. هيهات انساك .. ناديت اهواك
يامحبوبي
.............

احبابك مولاي الغالي. يحسين انحبك للتالي
ما نعشگ غيرك منبالي. احنا الخدام
طابت ليلتنه باعيادك. ثالث شعبان بميلادك
مولاي وتكرم وفّـادك. يبن الاكرام

نورك وهّاج .. منك محتاج .. مولاي التاج
باوع صوبي
يحسين وياك .. هيهات انساك .. ناديت اهواك
يامحبوبي

سيد زيد الفحام
_____________________________________

قصيدة في ذكرى ولادة الإمام المهدي المنتظر عجل ألله فرجه الشريف


هالليله ليلة مولدك يالغالي
يالمهدي غيرك لا تظن يحلالي
يلمنّي قريب
مولاي الحبيب
يالمهدي غيرك لا تظن يحلالي
**

هالليله ليلة مولدك وعيوني طابلها السهر
من وجهك اليسطع ضوه هالليله خجلان الگمر
شعبان شهرك مبتسم شايل جمالك هالشهر
احله الليالي ليلتك هيّه وفجر خامس عشر

يالمهدي مايسوه العمر من دونك
گلبي بغرامك منتعش وعيونك
لجروحي طبيب
مولاي الحبيب
يالمهدي غيرك لا تظن يحلالي
**

تارسني يالمهدي عشك كل ذره من جسمي الك
محتار اوصفك سيدي وانت الامير بهالفلك
بعد الأئمّة والنبي يالمهدي بس انت الملك
مشتاگ اشوفك سيدي مر بيّه طيف اتوسّلك

ها يالحبيب العايش بانفاسي
يمته الفرج يااغله من كل ناسي
يالامرك عجيب
مولاي الحبيب
يالمهدي غيرك لا تظن يحلالي
**

مولاي ليلة مولدك مختلفه عن كل المضن
سهران بيها ومانمت يالمهدي لعيونك احن
يالمهدي شاعلّك شمع مولاي وعيوني بچن
يا يوم تظهر سيدي بشّرني ياشبل الحسن

ليش انت من دون البشر ماشوفك
مر بيّه ومسح دمعتي بچفوفك
يالعايش غريب
مولاي الحبيب
يالمهدي غيرك لا تظن يحلالي
**

اتنفّسك مثل الهوى لو ما اشمّك اختنگ
يالعايش بگلبي نبض طول العمر بسمك يدگ
عن كل شي ممكن ابتعد هيهات عنك افترگ
آنه العشگتك من زغر احله وأجل من كل عشگ

آنه ودعاء الندبه بيك انسولف
چم ثار الك يالمنتظر چم موقف
خلّيلي نصيب
مولاي الحبيب
يالمهدي غيرك لا تظن يحلالي
**

يالمهدي يا يوم الفرج جاوبني ملّيت الصبر
لو بيّه مولاي السبب سامحني يالغالي اعتذر
مو راح اموت وماشفت طيفك عله عيوني يمر
ارحمني يالگلبك سمح ما احمل غياب وهجر

مدّيت ايدي لأيدك ألزم ايدي
يالمهدي هذا اليوم عيدك عيدي
لحبابك مُجيب
مولاي الحبيب
يالمهدي غيرك لا تظن يحلالي


٧ شعبان المبارك ١٤٤٠هـ
سيد زيد الفحام
____________________________________

متى ترانا ونراك سيدي يبنَ الحُسين ياصاحب الزمان


ودّي وحترامي. للمهدي امامي
.....

الله يا نصف شعبان يا ليلة املنه
بيچ المنتظر مولود وبعيده انشغلنه
رحمة خالق الأكوان مهدي العتره النه
ليلة مولد الموعود نفرحله بحفلنه
ابعثله سلامي. للمهدي امامي
........

هالليله الفرح ياناس عم الدنيا كلها
يا ليلة نصف شعبان يامعظم فضلها
هاي الليله ليلة نور ما تحصل مثلها
ليلة مولد الموعود والخالق كفلها
اشواگي وغرامي. للمهدي امامي
.......

مولد يوسف الزهراء نبعثله التهاني
هوه الواحد الموعود ماكو يشبهه ثاني
بالمهدي وحكم يمناه معقوده الأماني
سيفه الينصر المظلوم ويريح اليعاني
تعبيري وكلامي. للمهدي امامي
........

يشبه جده بالاوصاف مهدينه مُحمّد
غصن المهدي عطره يفوح هاي الليله ورّد
لوما بالأرض موجود ركن الارض ينهد
حيّ المهدي جبرائيل صوته العالي ردد
بجناحي محامي. للمهدي امامي
.......

نسهر سهرت العشاگ للغالي بعمرنه
نهديله الورود اليوم للمولد حضرنه
مهدينه انولد ياناس وتحقق امرنه
هاي الفرحه ما تنقاس بالمولد سهرنه
كل عشگي وهيامي. للمهدي امامي
.......

فرحتنه الچبيره تصير من يظهر علينه
حكم المصطفه المختار يحكم بالمدينه
خدامه ونصير وياه باجر من يجينه
شايل راية العباس حمّاي الظعينه
معروفه الاسامي. للمهدي امامي

٨ شعبان المبارك ١٤٤٠هـ
سيد زيد الفحام
_______________________________________

هوسات في ولادة الإمام المهدي المنتظر عجل ألله فرجه الشريف


يوم ١٥ شعبــــــــــــان مولد قائم العتره
مولد صاحب الثارات كل الشيعه تنتظره
ثار حسين أبو السجاد ثار الطاهرة الزهره
(( فرحت بالمولد ثاراته ))
______

ليلة فرحة ليلة عيد خل تفرح جميع الناس
مهدينه انولد هاليوم راعي الغيره والنوماس
يشبه عمّه بالميدان ماخذ شمرت العباس
(( عباس الثاني يوصفونه ))
_______

من يوم المهد لليوم عنده السيف والرايه
سرّ المرتضى الكرار عنده ويعرف الآيه
انّطه حچايه مهدي الآل يظهر گد لحچايه
(( يظهر شايل سيف ورايه ))
_______

وينه الگال ما يظهر خل يتراجع احسلّه
من يظهر بعد ميفيد توبه ومغفره گلّه
لو يشرد لراضي الصين سيف المهدي يوصلّه
(( يحكمها الدنيا بچفّينه ))

سيد زيد الفحام
___________________________________

قصيدة في ولادة الإمام المهدي المنتظر عجل ألله فرجه الشريف


مجنونك أفخر سمّوني
ادخل گلبي وهاك عيوني
مـنّ صبــاي. حبيتك
عشت وياي. حبيتك
ادخل گلبي وهاك عيوني
.....

مولاي المهدي بلا نورك ظلمه الكون
لاموني بحبك خلّيهم ما يدرون
گالوا اعقل وترك حبك كافي جنون
گلتلهم ورده بلا ماي تعيش شلون
لوما حبك ماتت روحي
بس ايدك تشفيها جروحي
تشفي الداي. حسّيتك
عشت وياي. حبيتك
ادخل گلبي وهاك عيوني
.......

شفتك كهف اليئوي الفقره من الخوف
چفّك مارد چف الجايع والملهوف
ياهيبت طه المختار وبي موصوف
عميان الوادم ما تندل وانت تشوف
چم واحد محتاج انطيته
والتايه عالحق دلّيته
يـامــــولاي. ناديتك
عشت وياي. حبيتك
ادخل گلبي وهاك عيوني
........

اتنفّس حبك يالمهدي وماانساك
مو غايب عايش ويّايه وعشت وياك
انت الغالي وغيرك ادنه ومايعلاك
مولاي اشملني بنظراتك اترجّـــاك
أوصاف المختار اوصافك
هنياله اللاگاك وشافك
اني هــواي. اذّيتك
عشت وياي. حبيتك
ادخل گلبي وهاك عيوني
.......

يالمهدي وليلة ميلادك كلها افراح
ناسي احزاني واوّل مرّه گلبي ارتاح
وجهك أشرق ضوّه الدنيا كالمصباح
مولاي وكل شيعي بعيدك همّه انزاح
ليلة ميلادك محلاها
مسرور وسهران وياها
عن عــداي. ضمّيتك
عشت وياي. حبيتك
ادخل گلبي وهاك عيوني
.........

فرحانه الزهره بميلادك وهل البيت
لاشك بكل محفل هيّه اطّش چكليت
نثرت ورد الجنّة بمهدك من حلّيت
تنتظرك تظهر يالمهدي لسيفك صيت
يا يوم الموعد مهدينه
بشّرنه بطيفك مر بينه
يـاوفّـــــاي. سمّيتك
عشت وياي. حبيتك
ادخل گلبي وهاك عيوني

سيد زيد الفحام
____________________________________

قصيدة في ولادة الإمام الحسن المجتبى عليه السلام


هالليله فرحتنه
بالغالي جمعتنه
بايعناه. حبيناه
________________

بسم الحسن ليلة فرح عشناها
ليلة نصف رمضان يا محلاها
أرض المدينة نوّرت شفناها
نور الحسن لمن بزغ ضوّاها
محلاها ليلتنه
بالغالي جمعتنه
بايعناه. حبيناه
__________________

مثل البدر وجه الحسن يتلاله
نور وعلم رب العرش اوحاله
صوت الفرح هالليله خل يتعاله
نهنّي النبي بهاي الولادة وآله
والفرحة زارتنه
بالغالي جمعتنه
بايعناه. حبيناه
_________________

نبعث تهاني للزچيّة وحيدر
ابميلاد ابنهم بالمهد يتنوّر
آية بجماله ومثله ما يتكرر
كلمن يشوفه بهالحِسِن يتأثّر
معروفه غايتنه
بالغالي جمعتنه
بايعناه. حبيناه
__________________

انبايعله جينه ونفرح بميلاده
ثاني الأئمّه ربنا خصّه وراده
هذا الحسن ماتنوصف امجاده
ننصب حفلنه بمولده عالعاده
محموده جيّتنه
بالغالي جمعتنه
بايعناه. حبيناه
___________________

رغماً على كل ناصبي وكل حاقد
يبقه الحسن بعد الأمير القائد
شيعه ونظلّ انحبه ألله الشاهد
هذا الحسن وصفه الكريم الزاهد
مرفوعه رايتنه
بالغالي جمعتنه
بايعناه. حبيناه
__________________

بايعنه مولانه الحسن للتالي
قائدنه بعد المرتضى والوالي
غالي ويظل هوه الإمام الغالي
عنده اللّه معصوم بمقامه العالي
والبهجة غمرتنه
بالغالي جمعتنه
بايعناه. حبيناه

سيد زيد الفحام
________________________________________