قصيدة في ولادة الإمام الحسن المجتبى عليه السلام


يالحسن حبّيتك. گلبي صاير بيتك
أفـتـخـر وتبـاها مـن زغـر واليتك
.............

بمولدك صدري انشرح يالغالي
آنـه حبّيتـك وظل للتالي
يالحسن ودّيت الك مرسالي
ما اعيش بدونك. اي وحگّ عيونك
كلمه ما انســاها. مـن زغـر واليتك
............

گلبي بسمك يالحسن نبضاته
اسهر ويــــاك السهر محلاته
ليلي من نورك تشـع نجماته
عايش بوجداني. يا امامي الثاني
فرحتي ومعناها. مـن زغـر واليتك
............

طلبتي أسمعها طلبة صايم
خادم تخليني عندك خادم
يالحسن مجنون بيك وهايم
من عشگتك آني. ادري ما تنساني
طه جدك طه. مـن زغـر واليتك
............

حاضر الليله بفرح ميلادك
انت تكرم يالحسن وفّادك
والكرم اجمل صفه بامجادك
أمنياتي بعيدك. ايدي تلزم ايدك
ليلتك محلاها. مـن زغـر واليتك
..........

والنواصب خلهم يسمعوني
انت روحي انت نور عيوني
مستحيله عنك يبعدوني
خلهم يلوموني. خادمك يدروني
قصّتي وفحواها مـن زغـر واليتك

سيد زيد الفحام
_______________________________________

هوسات لمولد الإمام الحسن المجتبى عليه السلام


بفجر خامس عشر من شهر رمضان
انولد نور الحسن وستبشر القرآن
فرحت فاطمة وزدهرت الأكوان
( وستبشر حيدر من شافه )



اجه لبنته النبي لمن سمع بيها
تعنّه لدارها ورايد يهنيها
وستبشر فرح لمن وصل ليها
( من شاهد اوّل اولاده )



شال الحسن بيده المصطفه وناغاه
بأمر الله الحسن طه النبي سماه
تشهّد بالشهاده ابمهده من حاچاه
( بچفوف الهادي يشع نوره )



من وجه الحسن وجه البدر خجلان
تسطع من جبينه غُرّة الإيمان
جمال الشايله ماشاله اي انسان
( ضل صافن يوسف من شافه )



منبع للكرم والجود عنوانه
الليله بمولده الأملاك فرحانه
لعيون الحسن چم عين سهرانه
( يامحله السهرة ابميلاده )



ابميلاد الحسن يامحله لمّتنه
نهنّي الزهره والكرار غايتنه
ابفرحتهم حيينه اليوم فرحتنه
( وورود المولد جبناها )

خادم الإمام الحسن المجتبى عليه السلام
سيد زيد الفحام
________________________________

هوسات للرضا عليه السلام

ليلة فرحة ليلة نور هاي الليله محلاها
مولد ثامن اهل البيت بالافراح عشناها
مولانا الرضا المعصوم بالانوار ضوّاها
( والكون تنوّر بوجوده )
***

واجب نعلن الافراح ونقدم تهانينه
ميلاه الرضا بهاليوم تحقق امانينه
بدفتر خدمت المعصوم تتسجّل اسامينه
( نفرح والمهدي يحيينه )
***

بعد الكاظم عله الناس حُجة الخالق ختاره
بايعنه الرضا وللموت نبقه تباعه ونصاره
بس الباري وهل البيت محّد يعرف اسراره
( ما نترك حبّه ومنهاجه )

سيد زيد الفحام
_____________________________________

قصيده في زواج امير المؤمنين عليه السلام من ام البنين عليها السلام



حلمج الطال انتظاره تحقق بهاي البشاره
ختارج الزوجه الامينه حيدر وصحّ اختياره
..........

فاطمة يا بت حُزام الطاهره الحره الزكيّه
الله خصّج بالكرامة وزوّجج حيدر وليّه
جابج لدار الامامه لأن حبّيتي الزجيّه
صابره ومؤمنه شافج باهه املاكه بعفافج
رادج بعلمه ويقينه حيدر وصحّ اختياره
..........

حيدر الكرار يعلم بالانساب وبالقبائل
رغم هذا وراح ينشد من عقيل بهالمسائل
ختارلي امرأه يكَلّه من بيوت اهل الفضائل
كَلّه ياحامي الحميه اقترن بالكُلأبيه
للوصي صرتي القرينه حيدر وصحّ اختياره
..........

رادج الكرار حيدر فاطمة ومعروف فضلج
غاية الكرار جانت ينجب العباس منج
للحُسين يريد ناصر يربه هالناصر بحضنج
تحقق الراده الصميده صار ابوفاضل عضيده
بكربله حامي الظعينه حيدر وصحّ اختياره
..........

احنا نتباها بزواجج من علي حامي الحميه
راد واحد جبتي اربع منهو مثلج البوفيه
والنّعم عباس وفّه للسبط بالغاضريه
ابنج الوفّه بعهوده والشهد كَطعت زنوده
شايل الرايه بيمينه حيدر وصحّ اختياره
..........

مبارك واثمر زواجج ثلاثه والرابع بدرهم
يا مره المثلج تضحّي اربع أقمار بعمرهم
لخاطر الزهره وابنها انتي رخّصتي نحرهم
تعلّموا منّج وفاهم ضحوا لزينب دماهم
لخاطر حسين وبنينه حيدر وصحّ اختياره
..........

زوجة الكرار حيدر أكبر واعظم كرامه
يبقه يمّ عباس عالي قدرج ليوم القيامه
لأن حبج جان صافي للنبوه وللامامه
جاهج بجاه العقيله صرتي للخالق وسيله
ختارج لروحه ولينه حيدر وصحّ اختياره

سيد زيد الفحام
----------------------------------------------------------

قصيده لعيد الغدير الاغر


بايعنه علي وللموت ويّاه
وبعيد الغدير اليوم جيناه
عله اعناد السقيفه
علي اوّل خليفه
… .

جينه انبايعه وجبناهه الاورود
بعناد اليبغضون
نجددله العهد ما نخلف عهود
امير ومالك الكون
ملايين التعشگه صاروا شهود
اجو كلهم يهنون
علي كلمن يحبه يصير محسود
حبيب ونور العيون

بلّغ يامُحمّد صاح جبريل
علي هوه الامير بدون تعليل
خسر كلمن يعيفه
علي اوّل خليفه
///////////////////////

رفع ايده مُحمّد سيّد الناس
سلّمله الاماره
لبّس بيده حيدر تاج عالراس
تحلاله الصداره
علي گلهم امام وبيّة ينقاس
بلّغهم قراره
مو اني الگلت سمعوني ياناس
من الله ختياره

الله ختار حيدر للخلافه
هي تلوگله ولاگلها شافه
لبو الزهره رديفه
علي اوّل خليفه
///////////////////////

نزلت آية التنصيب بسِمه
من بين الصحابه
علي بعد النبي للناس رحمه
بالحق الله جابه
وارث من ابو الزهراء علمه
اقربهم قرابه
حكم المصطفه المختار حكمه
من علمه وكتابه

اله تاج الاماره يلوگ عالراس
كتملت نعمة الرحمان عالناس
بوصافه الشريفه
علي اوّل خليفه
///////////////////////////

اتقه الناس كلها ونور گلبه
واصل للسماوات
الله الراد حيدر حيل حَبّه
ونطاه الكرامات
نفس قرب النبي لله قربه
وبنفس العلامات
وارث للرسل وعلوم كتبه
عالم بالرسالات

لذلك الله راده يصير عالي
من بعد النبي النختار والي
بچفوفه النظيفه
علي اوّل خليفه
/////////////////////////

احنه حباب حيدر خل يشوفون
فرحتنه وعشگنه
غصباً عالنواصب واليبغضون
بايعنه اليحبنه
بايعنه علي الكرار بجنون
ما همنه اليضدنه
آمنّه بعلي بعد النبي يكون
وبحبّه انسعدنه

احنه بحب علي عشنه وربينه
آمنّه بحكم ربنه ورضينه
گلناها بمضيفه
علي اوّل خليفه

سيد زيد الفحام
____________________________________

في ولادة فاطمه الزهراء عليها السلام

ارسل تحياتي للزهره مولاتي
گلبي انشرح يحله الفرح
للزهره مولاتي
............

من مدّه ياناس الفرح ما مر عليه
مر عله گلبي ونشرح هاي المسيه
وتأمّلت وتفحّصت شنهو القضيه
جاوبني گلبي مولد الزهره الزچيه

ليلة ولادتها. والدنيه ضوّتها
اول عبد انثر ورد
للزهره مولاتي
................

مشكورة يا ام الحسن ذكرچ عباده
بميلادچ آنه ستذوقت طعم السعاده
بسمچ يدگ نبض الگلب يرسل وداده
من صرتي ربچ توّجج تاج السياده

بميلادچ الرحمه. والشيعه ملتمّه
گال الوصف. تاج الشرف
للزهره مولاتي
.................

هالليله هادينه النبي بالزهره مسرور
ينظر وجهها ويبتسم يتلاله بالنور
واجب اشارك فرحته وبالفرحه مأجور
نزلت ملائكت السمه يم فاطمه تزور

والفرحه ياناسي. عايشها بحساسي
نفرح سوه حتى الهوى
للزهره مولاتي
................

ليلة ولادة فاطمه احله الليالي
لسابع سمه ضيها نتشر يزهي ويلالي
جاه الزچيه فاطمه عند الله عالي
صورة وجهها المشرقة تبقه بخيالي

خادمها وتباها. من زغري اهواها
اعظم عمل. خادم اضل
للزهره مولاتي
.................

اعظم هدية للنبي ودّاها ربّه
هاي الهدية فاطمه فرحله گلبه
بارينه يهوه المصطفه وشگد يحبّه
الله بخديجه وفاطمه عوّضله تعبه

من عدها اولاده. تتكاثر الساده
ما ابتعد گلبي اليود
للزهره مولاتي
...............

بهاي الولاده الطاهره اعلن ولائي
للزهره ولآل النبي يبقه انتمائي
خادمهم ليوم الحشر دايم وفائي
جنّة اهل بيت النبي باجر جزائي

روحي بولايتها. مضمونه جنّتها
ما تعتذر فدوه العمر
للزهره مولاتي

سيد زيد الفحام
___________________________

قصيدة في ولادة الإمام محمد الباقر عليه السلام


نهنّي النبي واولاده. بالباقر وميلاده
يامحله لـمّـتـنــه. هالليله فرحتنه
بالباقر وميلاده
🌸🌸🌸🌻🌻🌻🌸🌸🌸

هالليله يامحله الفرح واجب علينه انساهر
ازهــر علينــه ونـتشـر نـور الإمـــام البـاقـر
مثل البدر وجهه اليشع يشبه نبينـه الطاهر
خـالقنـه ابــدع صورتـه سُبحانه ربنه القادر
خامس امام ختاره. وتشعّشت انواره
فرحانه دنيتنه. هالليله فرحتنه
بالباقر وميلاده
🌸🌸🌸🌻🌻🌻🌸🌸🌸

يشبه مُـحـمّـد بالوصف جده ومُحمّد اسمه
نـزلـت تهنّـيـــه بالمـهــد كـل المــلائــك يمّه
وزين العبـاد بفرحته لصدره الشريف يضمّه
وليده ويبوسه بوجنتـه شمّت محبّـة يشمّه
يعرف مقامه وجاها. من حقّه بي يتباها
نورّ عقيدتنه. هالليله فرحتنه
بالباقر وميلاد
🌸🌸🌸🌻🌻🌻🌸🌸🌸

خامس أئـمّـتنــه نولد هالليـله يامـحـــلاها
نبعث تهــانـي بمولده لـمّـه الزچيــه وطاها
ارض المدينه والسّمه بوجهه اليشع ضوّاها
عتـرة مُحـمّـد بالفرح نعـلن فـرحنــه وياها
نطش الورود بعيده. وصك الشفاعه نريده
مرفوعه رايتنه. هالليله فرحتنه
بالباقر وميلاده
🌸🌸🌸🌻🌻🌻🌸🌸🌸

للبــاقـر انـطــش الورد بـاقــة ورد نهديـله
ليلة سـعـــادة وغـانمـه ياشيعه هاي الليله
كلـمـن فـرح يفــرح غــداً والمافرح ياويله
ننسه الحزن ننسه الدمع ليلة فرح هالليله
ارض وسمه فرحانه. بالمولد وسهرانه
نباركله غايتنه. هالليله فرحتنه
بالباقر وميلاده
🌸🌸🌸🌻🌻🌻🌸🌸🌸

نهنّي الإمــام المنتـظـر يفـرح اكيد ويانه
للمحـفـل ويـانه اجه لاشك نساها احزانه
نشعر وجوده بكل حفل متواجد باحسانه
يبـارك عملنـه ويفتخـر بينه ويظل يرعانه
نتـوسّـل ابّـارينـه. يعجل ظهوره علينه
للمهدي دعوتنه. هالليله فرحتنه
بالباقر وميلاده

خادم الإمام محمد الباقر عليه السلام
سيد زيد الفحام
___________________________

في ولادة امير المؤمنين علي عليه السلام

سبحانه مَن سوّاك. ياحيدر
نفس النبي علّاك ياحيدر
بالكعبة ميلادك علي اول كراماتك
***

يانور الانوار مثلك فلا صار
يالكلّك اسرار. ياحامي الجار
من الله محمود بالكعبه مولود
يا اغله موجود اياتك شهود

نگضي العمر ويّاك ياحيدر
ما يخسر الوالاك. ياحيدر
متميّز بكلشي علي ذات النبي ذاتك
بالكعبة ميلادك علي اول كراماتك
***

من وجهك النور. اشرق عله الدِور
بالدنيا منشور. كل شيعي مسرور
ياسيّد الناس. بالهادي تنقاس
حبك بالانفاس. وسمك عله الراس

طول الزمن نهواك. ياحيدر
نستبشر بذكـــراك ياحيدر
يوميه ياحيدر علي نقراها آياتك
بالكعبة ميلادك علي اول كراماتك
***

بيك شكثر چان. هادينه فرحان
شالك بالاحضان. يا اغله انسان
بيك النبي هام. غذّاك الابهام
يم مهدك ينام. ياسيف الاسلام

طه النبي ربّاك. ياحيدر
نور وعلم غذّاك. ياحيدر
يعلم تنصره بسيفك ويدري بّطولاتك
بالكعبة ميلادك علي اول كراماتك
***

بميلادك احنه. نعلن فرحنه
جم مرّه صحنه بحبك ربحنه
بسمك حفلنه. يجمعنه كلنه
شيعه واملنه تقبل عملنه

عالفطره بايعناك. ياحيدر
لا والله ما ننساك. ياحيدر
انت الوحيد البلگلب تاركها بصماتك
بالكعبة ميلادك علي اول كراماتك
***

غصباً عله اعداك. ياحيدر اوياك
شيعه وتبعناك ما لحظه عفناك
حبك قبلناه. غيرك رفضناه
اسمك قريناه. بالدم كتبناه

بالذر عشگ شفناك. ياحيدر
وسط الگلب شلناك. ياحيدر
ياوارث علوم النبي خطواته خطواتك
بالكعبة ميلادك علي اول كراماتك

سيد زيد الفحام
____________________________

صلوات صلوات عله الامير المرتضى
***

يخـــدام يخـــدام هالليله ليلة مولده
نظل دوم نظل دوم انصاره جينه نعاهده
عشكناه عشكناه صوت الولايه انردده

تحيات تحيات رسلوها اله يالرافضه
صلوات صلوات عله الامير المرتضى
***

بالافراح بالافراح صرختنه بالحق تعتلي
يكرار يكرار. ما عدنه غيرك ياعلي
ولهموم ولهموم بسم الصميده تنجلي

والاصوات والاصوات ضد النفوس المغرضه
صلوات صلوات عله الامير المرتضى
***

بدر لاح بدر لاح وستبشرت ارض وسمه
يعشاگ يعشاگ وجه الوصي حامي الحمه
والميلاد والميلاد بالكعبه اول مكرمه

مسرات مسرات شفناها بعيون الفَضَه
صلوات صلوات عله الامير المرتضى
***

والاملاك والاملاك تشارك فرحنه بحيدره
والافلاك والافلاك شافت علي ومستبشره
علي النور علي النور والينه دنيا وآخره

هتافات هتافات حكم السقيفه انعارضه
صلوات صلوات عله الامير المرتضى

سيد زيد الفحام
@zaidzai11
____________________________

قصيدة للسيد السستاني ( ادام الله ظله)

سيد علي السستاني. امرك نطيعه
يالمنهجـك قـرآني. امرك نطيعه
......

خيمتنه ياسيد علي كلّك محنّه
لوما وجودك سيدي ماظل وطنّه
انت الوحيد بهالوطن شايل حملنه
بس انت صادق سيدي بيدك املنه

ماعدنا غيرك ثاني. امرك نطيعه
يالمنهجـك قـرآني. امرك نطيعه
........

كلما يشعلوها الفتن تطفيها انته
وبحكمتك هذا الوطن ياما حفظته
من داعش ونار العدو انت النقذته
لمن نصرته بفتوتك والباقي سكته

امرك امر ربّاني. امرك نطيعه
يالمنهجـك قـرآني. امرك نطيعه
.........

كل جمعه تنطينه الدرس يالخطبتك نور
تنطينه ما تاخذ ابد مولانه مشكور
واجب كلامك ينوخذ للدوله دستور
يمواسي شعبك بالسكن ماتسكن اقصور

يالمن اجِلنه تعاني. امرك نطيعه
يالمنهجـك قـرآني. امرك نطيعه
..............

عد عينك ارجال الحشد بالمحنه وفّوا
شيب وشباب تعاونو بالفتوه فزعوا
هزموها داعش سيدي ولّدك تعنّوا
بجالك يبومحمد رضا هزموها كفّوا

غصباً على السفياني. امرك نطيعه
يالمنهجـك قـرآني. امرك نطيعه
..........

يالأسّست هذا الحشد سور لبلدنه
لهذا الوطن ياسيدي ضحّوا ولدنه
خدام الك وانت الأبو نبقه بعهدنه
والمرجعية بشيمتك ظلّت سندنه

واليهوه غيرك فاني. امرك نطيعه
يالمنهجـك قـرآني. امرك نطيعه

سيد زيد الفحام
_____________________________

في ولادة امير المؤمنين علي عليه السلام

ميلادك احله بشاره حيدر يحيدر
وجهك تشع انواره. حيدر يحيدر
هاي الولاده
فرحه وعباده
وجهك تشع انواره. حيدر يحيدر
.........

هالليله حلوه وتختلف عن الليالي
بالكعبه ياحيدر بزغ بدرك يغالي
غيرك يحمّاي الحمه ماعدنه والي
عكب الرسول المصطفه بس انت عالي

انت الورثت اسرار. حيدر يحيدر
وجهك تشع انواره. حيدر يحيدر
هاي الولاده
فرحه وعباده
وجهك تشع انواره. حيدر يحيدر
.........

هالليله نعتبره الفرح واجب علينه
بهاي الولاده انبايعك بالفرحه جينه
آمنّه بيك بلايه شك كلنه ورضينه
بيك التزمنه ياعلي وبيك اهتدينه

كل شيعي زَيّن داره. حيدر يحيدر
وجهك تشع انواره. حيدر يحيدر
هاي الولاده
فرحه وعباده
وجهك تشع انواره. حيدر يحيدر
.........

من مثلك بهاي البشر نال السياده
انشق الجدار لفاطمه بيوم الولاده
ابّيت الله ميلادك علي هيچ الله راده
بهاي الكرامه ميّزك الله بوداده

يالشخصك الله ختاره. حيدر يحيدر
وجهك تشع انواره. حيدر يحيدر
هاي الولاده
فرحه وعباده
وجهك تشع انواره. حيدر يحيدر
.........

انت ومُحمّد ياعلي نفس الكرامه
طه النبوّه مستلم وانت الامامه
والما يبايعلك علي دربه الندامه
كلمن يبغضك يخسر بيوم القيامه

لا ما تنفعه اعذاره. حيدر يحيدر
وجهك تشع انواره. حيدر يحيدر
هاي الولاده
فرحه وعباده
وجهك تشع انواره. حيدر يحيدر
.........

خدامك احنه وشيعتك يالغالي نهواك
احنه التزمنه بمنهجك كلنه وتبعناك
بميلادك احنه عله العهد هالليله ويّاك
يابالحسن يوم الحشر خلّيِنه بحماك

گبرك نظل زواره حيدر يحيدر
وجهك تشع انواره. حيدر يحيدر
هاي الولاده
فرحه وعباده
وجهك تشع انواره. حيدر يحيدر
...............

نهني الامام المنتظر خير البريه
ويانه حاضر نعتقد هاي المسيه
نقدم تهاني لحضرته نفرح سويه
ندعي الإله يعجّل الطلعه البهيه


نتباها احنه انصاره. حيدر يحيدر
وجهك تشع انواره. حيدر يحيدر
هاي الولاده
فرحه وعباده
وجهك تشع انواره. حيدر يحيدر

سيد زيد الفحام
________________________

شهر شعبان شهر الولادات الطاهره لآل محمد عليهم السلام

هل شعبان خل نفرح سويه
شهر الخير شهر الرافضيه
.........

مثلك يابشر عالناس يحسين
وگلِوب الروافض بيك يحسين
ليلة مولدك مولاي يحسين

( رحمه علينه ونفرح بيها )

ليلة عيد عند الرافضيه
..............

بسم حسين اول نور من هل
ثالث يوم عالاكوان من هل
حُب حسين للعشاگ. من هل

( نفرح هالليله بميلاده )

نطشّ ورود ونهنّي الزچيه
..............

يوم افراح رابع يوم شعبان
للعباس وجهه بنور. شعبان
تجلي جروح بالدلّال. شعبان

( ليلة مولد كافل زينب )

حيّو اليوم سبع الغاضريه
..............

يوم الخامس الأملاك. سُجّاد
ونفرش للحبيب گلوب سجاد
الليله الخامسه يم علي الـ سجاد

( نفرح بالسجاد ويومه )

وارث للعلوم الاحمديه
..............

طه وعترته عله الناس. اكبر
وانه بحب علي الكرار. اكبر
فرحه وخير مولد علي الـ. اكبر

( بالأكبر مجنونه الشيعه )

طبق الاصل وي سيد البريه
.............

بحب العتره والمختار. مهدي
گلبي وروحي للأطهار. مهدي
يوم خمسطعش ميلاد. مهدي

( نتمسّك بالمهدي ونوره.)

ردنه نشوفها الطلعه البهيه

سيد زيد الفحام
_________________________

لمولد حبيب الزهراء عليها السلام
الامام الحسين عليه السلام


الليله الفرح يحلالي
مولد حبيبي الغالي
مولد املنه
ولتم شملنه
مولد حبيبي الغالي
.........

مولد حبيب الزهره احله بشاره
الليله انولد وتشعشعت انواره
حسين الحبيب الماكو مثل اسراره
حيدر فرح والفرحه عمّت داره
وام الحسن فرحانه
يم المهد سهرانه
واصل عملنه
ولتم شملنه
مولد حبيبي الغالي
.........

ستبشر رسول الله وفرح من شافه
شاف بحفيده حسين كل اوصافه
يم مهده ضل المصطفه وماعافه
غَذّه الحسين بأصبعه وألطافه
والزهره تنظر نوره
مستبشره ومسروره
بمهده وكفلنه
ولتم شملنه
مولد حبيبي الغالي
.........

من وجهه شع نور الامامه وازهر
حتى البدر خجلان ظل يتعذّر
وجه الحبيب حسين يسطع اكثر
وسط المهد يمه الزچيه وحيدر
شاله الوصي بچفوفه
حيدر شبيهه يشوفه
منهم سألنه
ولتم شملنه
مولد حبيبي الغالي
.........

بهاي الولاده الطاهره التمينه
نهني الامام المنتظر مهدينه
جبنه الورود ويانه جبنه الزينه
نشعر وجود المهدي منه وبينه
ابمولد حبيبه الطاهر
ويانه لاشك حاضر
يفرح مثلنه
ولتم شملنه
مولد حبيبي الغالي
.........

يبن الزجيه الطاهره ياسيد الناس
فرحتنه بيك بياوصف ماظنها تنقاس
ياسيدى حسين وصرت تاج انت عالراس
من مولدك هب العطر وتشبگه الانفاس
هالليله ما ننساها
بسمك يوارث طه
لجلك حفلنه
ولتم شملنه
مولد حبيبي الغالي

سيد زيد الفحام
____________________________

هوسات لولادة ابا الفضل العباس عليه السلام


عـفـيـة ام البنيـن الجــابــت العبّـاس
غيـره ومـرجـله ونور وّفـه واحساس
عضيد حسين هذا وصاحب النوماس
( بگماطه وينظر لحسينه )


بوجه حسين اول ما فتح عينـه
وحسين ابتسم من شاف چفينه
قـبّـل يسـرتـه وردّ قـبّـل ايمينــه
( سلّمله الراية بچفّينه )


شاله حسين بيده وسلّمه لزينب
صاحت ياهـلا بالكافل ومرحـب
اختك ياگمر ولـجـيّـتـك احسـب
( بعيونه الكافل حيّاها )


عـاده الطفل من يبچي يهدئونه
بس عباس ما گــدروا يسكتـونه
إلّا يشوف سيفه ويغمض عيونه
( ما يسكت إلّا بفقّاره )


تـريــد ام البنين تگمطه ما تگـدر
يـزعـل من تـشـد چـفـوفـه يتأثّـر
تعرفه امّه شيريد وتعرف المصدر
( بالسيف تـنـيّـمـه وبالراية )

سيد زيد الفحام
_______________________________

هب عطر الكفاله وعطّر الانفاس
وعند ام البنين الفرحه ما تنقاس
طلگت بالشجاعه وجابت العباس

(( حيّاها الكافل بچفوفه ))

سيد زيد الفحام

ولادة شبيه المصطفى وحبيب الحسين علي الأكبر عليه السلام

يالشاغل فكري بوصفك
معيّشني بجنّة لطفك
يا محلاك. يالأكبر
ما انساك. يالأكبر
............

ساكن گلبي شمعة دربي وتنفّس عطرك لو فاح
اسمك غالي شاغل بالي. يالوجهك وجه المصباح
يالأكبر يانور عيوني
هايم بيك وماعرفوني
فرحان بليلة ميلادك
من لونك خط بيدك لوني

ياوجه الهادي ونوره
روحي بحبك مسروره
ابقه وياك. يالأكبر
ما انساك يالأكبر
...............

حسنك أوحد مثل الفرقد وجهك يسطع بالميلاد
هيج اتأمّل انت الاجمل من يوسف يالوصفك زاد
يالأكبر حبك بعروگي
مشتاگ وما يبرد شوگي
جيت بميلادك يالغالي
بيك اتبارك يامعشوگي

ياروح حسين وشمسه
تبقه ابالي وما انسه
وجهك ذاك. يالأكبر
ما انساك يالأكبر
...............

گلبي الشافك كل اوصافك اوصاف الهادي المختار
منّ حسينك نظرت عينك تحمل غايات واسرار
فرحان حسين بميلادك
ليوم الطف يالأكبر رادك
يم مهدك سهران الليله
يسولف فرحان بامجادك

وانه الخادم لعيونك
من عشّاگك مجنونك
ما احلاك يالأكبر
ما انساك يالأكبر
................

ليلة عيدك. ايدي بأيدك ما ابعد عنك هيهات
بيك اتهنّه نور الجنّه من وجهك ياطيب ذات
دوّرتك وبگلبي ألگيتك
تباريني بلطفك حسّيتك
شكراً يامولاي الأكبر
اطلب عفوك ماوفّيتك

اهلي بحبك ربّوني
فدوه لأسمك نذروني
ابقه هواك. يالأكبر
ما انساك يالأكبر

سيد زيد الفحام
______________________________