" الصباح في وطني "♡.

ـ بعد ليلة شتوية طويلة تشرق الشمس معلنة فجر يوم جديد.

ـ تسمع صوت المؤذن ينادي " حي علي الصلاة حي علي الفلاح " يستيقظ كثير من الناس لعلهم يدركون عظمة صلاة الصبح.

ـ والبعض الآخر يتقلب في نومه يشد الغطاء عليه ليكمل نومه متكاسلين وبين هذا وذاك تجد الشمس أشرقت في الأحياء.

- الجميع مستيقظ لديهم مشاغل كثيرة يفكرون بها العمل أو الدراسة أو غير ذلك ولكن قبل خروجهم هناك طقوس شاي الصباح الجميلة فالبعض يفضل تناول الشاي باللقيمات والبسكويت وبعضهم يتناول الرغيف الذي حصل عليه بعد معأناة ياخذ قضمة كبيرة وكأنها أعظم الإنجازات ومنهم من يفضل الشاي السادة والأخرون الحليب بعضهم لديهم مزاج خاص ومق معين لتناول الشاي عليه.

ـ بعدها يقوم الناس بالخروج لمهامهم اليومية وحياتهم المعتادة الشوارع تضج بطلبة الأساس والثانوية وبعض العاملين وأطفالاً صغار تأخذهم أمهاتهم وتمسك بإيديهم الصغيرة وبعضهم يسرع نحو المواصلات العامة والأخرون لديهم تراحيل خاصة.

ـ في الأحياء تدب الحياة بالباعة المتجولين بالبكاسي صاحب الخضار ينادي ..

" ابوي زراع انا بياع .. ابوي زراع انا بياع " .

وبائع السمك يهتف إيضاً ..

" سمك سمك سمك الخزان كبير ومليان "
" سمك الجزيرة سمحة وكبيرة سمك " ..

وأصحاب الكارو بعضهم يبيع الماء وأخرون يشترون الخرد فتسمع ..

" خرد خرد خرد " و " صاحب الماء يطرق بصوت عال علي البرميل معلناً وصوله " ..

ـ وبين كل هذه الأصوات تخرج النساء يلفحن تيابهن واحدة تريد خضار وأخري زوجها يحب السمك وشخص أصابه الفلس يقوم ببيع الخرد مقابل جنيهات.

ـ في الجانب الأخر يقف الناس في المحطات ينتظرون التراحيل وبعضهم يترصد للملحة ♡.

ـ والباقي منهم يستغل المواصلات الحافلة تلو الأخري يهتف الكمسنجي شرق شرق وآخر السوق الشعبي وآخر نفر عربي نفر يتسارع الناس لحجز مقعاد لهم تجلس علي الحافلة لتصل لوجهتك التي تريدها في الحافلة الناس وطن عندما تصعد أحدهم يصلح الكرسي لشخص ما لايعرفه وصديقتان يتبادلان الحديث ورجل يكبر في السن وسيدة تحمل سلة هي مصدر رزقها الوحيد.

ـ وشخص مثلي يفضل الجلوس قرب النافذ السائق يحب الإستماع للموسيقي من كبار الفنانين مثلاً كا " مصطفي سيد أحمد " ويدندن الجميع همساً البعض يرجع للزكريات وآخر تكسوه الهموم ولكن تخف المعأناة بضحكة بسبب بعض الركاب وجدالهم مع الكمساري في خلاف صغير يتحول بعدها لنكتة.

ـ الناس في وطني تملائهم الطيبة رغم قساوة الحياة الشباب فيه حالماً بالحرية.

ـ يخوضون المصارع يواجهون الموت بلا رحمة يناضلون لعيش حياة كريمة في أمن وأمان.

ـ كل يوم لديه قصة قد تختتم نهايتها بشكل حزين وأصوات الهتافات تعلو والكثير.


ـ ماقيل القليل ولكن وطني يحمل بداخله وطن آخر ..


ـ فأحبوا أوطانكم تحبكم ♥

#سمرية

يارب ، وأن تنهمر علينا الأيام السعيدة كما نُحب ونتمنى🤎.

ـ أحياناً التجاهل بكون مفيد خصوصاً في المواقف واللحظات اللي مابتكون فيها قادر تاخد قرار صحيح أو تفكر بطريقة كويسة .

ـ يعني لما يكون في مشكلة حاصلة معاك وتحاول تجتهد وتركز عليها تلقائياً حتحس أنها ماشة تتعقد وتكبر .

ـ أجهلا لي فترة بس وحاول فكر فيها برواق صدقني لما ترجع ليها حتقدر تلقاء الحل بسهولة.

ـ لما تكون حاسي بألم ووجع جسدي أو معنوي وتفضل تفكر فيهو حتفضل تتوجع لي فترات طويلة بس لما تتجاهله وماتركز معاهو تلقائياًببداء يتلاشي وشوية شوية حيختفي لما تستغرب.

ـ تجاهلك لي بعض المواقف بخفف عنك كتير أو ممكن تقول عنه وقت مستقطع بسمح ليك تراجع كل حاجة وتديها الزمن الكافي عشان ما تقدر تتخلص منها.

ـ فلما تكون في أي موقف حيخصم من راحتك مهما كان أتجاهل وأكسب نفسك. ♡

#سمرية

ُهذَا المساء تاني نقول ..📌

" الفشل ما نهاية " ..

ـ كلنا في الحياة دي مرينا بمواقف كتيرة شديد كنا فاشلين فيها وخسرناها بس الفشل ما النهاية ليها.

ـ ماتسمح لي فشلك في أي علاقة يكسرك ويسبب ليك حاجز كبير في حياتك ماتحاول تسيبا تخصم منك وتغير نظرتك لي نفسك بإنك الشخص المامناسب وأنو الطرف التاني إتخلي عنك عشان عيب فيك عمرك ما تفكر كدا لاذم تكون واثق أنك بكل ما فيك كنت أنسان صح شديد بس مع الشخص الغلط.

ـ عشان كذا ما تسمح للعلاقة الفاشلة دي تخليك تقفل باب قلبك وتعيشك في خوف من نفس المصير ومالو لو خابت تاني حاول وتالت ورابع لحدي ما تصيب ماتتجاوز مشاعرك في يوم قصاد شخص كان صادق في حبك ما تحاول تخسرو بسب فشل أنت ماكنت سبب فيه لاذم تدي لنفسك فرصة جديد يمكن الطارق عارف أداب الحب كلها.

ـ ولما تفشل كمان في وظيفة معينة ساعتها ما تفكر أنك تتجاوز كل الفرص الممكن تفتح الباب ليك لمجرد أنك ما قدرتا تتأقلم مع الوظيفة السابقة وفشلك فيها لأنك بذلتا كل الجهود المطلوبة منك وقمتا بكل واجباتك ماتحمل نفسك ذنب أنك ماعندك القدرة لاذم تفهم انك بس ما في المكان الصح.

ـ يخوانا الفشل دا رسالة واضحة لينا بتقول لينا انتو ماشين غلط فكر وشوف ليك أتجاه تاني دي ما وجهتك الصح أنت بتليق بمكان تاني أظبط من كدا بكتير.

ـ ما تسمحوا للفشل يكون نهاية لي قصصكم بل بالعكس لاذم يكون البداية الصح لينا من جديد مع الأشخاص والأماكن المناسبة البتستاهلنا بكل معني الكلمة ومقدرة حجم خسارتنا وعارفة تماماً اننا حنكون مكسب في المكان الحنمشيهو والأمان اللي كل شخص بفتش فيه وقادر يحتويهو. ♡

#ومن_الأخر_كدا

" فشلك رسالة دافع لاذم تستغلها صح " .

#سمرية

هذا الصباح ...📌

" الثاني عشر من كانون الثاني " ♡.

ـ البَداية أن هذا اليوم مُختلف من دونِه من الأيام لأنه في كل عام وفي مثل هذا اليوم أكبر عاماً جديداً.

ـ ليست مُجرد أيام تُختَصم من عُمري ولكَنها حياة جديدة تُكتب لي بمختلف التفاصيل والتجارب التي يجب أن أعيشَها.

ـ وأنا أخَوض فيها الصِراعات مع نفسي وأحمل بداخلي الكثيُر من الأمنياتِ التي تَجدد في كل عام رغم أن بعضها لايتحقق ألا أنه لا مانع من تكرار المحاولة.


ـ أظن أنها كانت أعوامٌ وبحكمِ العادة أضافَت الكثير وأخذت الكثير مررتُ فيها بِعثرات تِلو الأخُري وخيباتِ متتالية .

ـ أصبحت قوية أكثَر من مامضي في حياتي و قادرة علي التحمل .


ـ أعلم تماماً أنني لست بصديقة جيدة لأحد وليس علي توقع ذلك أطيل الغياب ، وقد تمر أعوام ولا أسأل جافة التعامل بعض الشي ..وأن قلبي قاسً أحياناً ، ولكن رغم ذلك يبدو حنوناً من الداخل .

ـ كما أنني أصبحت واثقة أكثر وعقلانية ، لقد أكتفيت من مواسم الحزن في حياتي وعلي بدء عامي الجديد وأنا أحتضن السعادة 💚.


ـ ولنفسي في عامها الـ24 ربيعاً عليك أن تستمري مزهرة كالعادة والإبتسامة مشرقة علي محياك وأن لا تذبلي يوماً.

ـ عليك معرفة أن الأشخاص في حياتنا لهم فترات وأنهم كفصول العام بعضهم يتساقط وبعضهم يمطرنا بالحب والآخر يعصف بأحزاننا وبعضهم يجعلنا نحترق.


ـ عليك بالثبات وعدم الإستسلام لخسارتك لمعركة ما فمعارك الحياة لا تنتهي إلا بنهايتنا عليك المقاومة والإستمرار للفوز بها.

ـ حياتك كسفينة في وسط المحيط يقودها غبطان يجب عليه حمل بوصلة ومعرفة الإتجاهات والحفاظ عليها ليصل لبر الأمان وأنت كذلك عليك ف هذه السفينة وضع الخطط التي تناسبك ومعرفة وجهتك الحقيقة حتي لا تصدمي وتثقب سفيتنك فتغرق.


ـ عليك أكتساب الموهبة الحياة باهتة لابد من أضافة بعض الألوان إليها.

ـ يا نفسي حاولي التقدم جاهدي وحاولي الإلتزام لاتجعلي مغريات الحياة تنسيك جحيم الأخرة .

ـ ومهما حققتي من النجاحات لاتجعلي الغرور يتملكك .


ـ الإستقرار المادي مهم لتصبحي قادرة وواثقة علي إتجاذ قرارتك بنفسك .


ـ رحلة الحياة طويلة ولكن ليست لنا فيها سوي أيام معدودات .


ـ أجعلي رسالتك في الحياة نشر الحب والسلام 🌸.


ـ وأن تختتم نهايتها بخاتمة حسنة .



ـ ربي إني لا أعلم خفايا عامي الجديد و لكني أثق بأنك قدرت لي الخير، ربي أستودعتك حياتي فأكتب لي السعادة مع من أحب فـ كل عام وأنا بخير ، اللهم أجعله عام خير وحقق لي ما اتمنى 🤍


ـ اللهُم إني أستودعك نَفسي و عُمري و قلبي فَليسَ هُناك من يحتويني سواك.

ـ يا ربّ أتمم عامي القادم بتحقيق أُمنيتي و ذّأّهِبِ الحزن بعیدا عنی واحفظ لی كل من أحب وكل من أحبني.

ـ اللهم اني استودعك كل السنين التي مضت من عمري بأن تغفرها لي وتعفو عني، وأن تبارك لي في أيامي القادمة 🤍.


" آمين" 🤲

#سمرية

يمتص القرآن الحزن من القلب كالإسفنجة؛ إذا قرأت القرآن حزينا كان كالضماد؛ واذا قرأته سعيدًا ضاعف تلك السعادة .. إنه دواء القلب ، فلا تهجره! ❤️

هذا الصباح ..📌

" صباح الحب لعينيك أولاً " ♡.

ـ الصباح البعدل المزاج وبخليهو صباح خير بالجد كدا هو الرسائل البسيطة المليانة حب دي ..

ـ وكلمة صباح الخير دي قادرة تعدل مزاجك وتخليك رايق شديد هي بالجد كدا كلمة مطمئنة وحتفضل كدا لي نهاية اليوم حتي لو كنا مارين بتفاصيل صعبة وفيها رسالة إيجابية يعني الجاي خير.

ـ ولما تجيك من الشخص المفضل لي قلبك ما حتبقي بس مجرد كلمة بتتقال كإستفتاحية لي بداية اليوم بل بالعكس حتكون شايلة جواها كمية من المشاعر الصادقة والمليانة حب وطبطبة كدا.

ـ وكأنو فيها رسالة بتقول ليك الصباح جمبك سعادة وأني أبداهو بكلمة منك دا كل الخير .

ـ غريب أمرنا كلمة بسيطة قادرة تزرع فينا أحساس جميل شديد وقادرة تصنع من يومنا البائس أجمل ذكرة لاذم تفضل محفورة فينا.

ـ ما تبخلو علي الناس بأي كلمة حلوة حتي لو أنت شايف أنها مجرد كلمة عادية بس العادي عندك ليهو شكل مختلف عند الطرف التاني في ناس بتعدل مزاجها الكلمة حتي لو كانت صباح الخير .

ـ أتعود علي أنك تبداء صباحك بكلمة طيبة منك تطيب بيها خاطر الحوليك الناس دي موجوعة جواها كتير أنت ما حتفهم ألا لما تشوف تأثير الكلمة وهو ظاهر فيهم وإبتسامتهم التلقائية.

ـ بالجد حاجة كافية شديد تكون مصدر سعادة في حياة غيرك ولو بكلمة بس ماتسهونو وقولو أي شي حلو للبتحبو حتي من دون مناسبة لانو الكلام الحلو كل الأوقات مناسبة علشان يتقال فيها .

#ومن_الأخر_كدا

" يا صباحي البشتهي يا سعادتي وبهجتي " 🌻

#سمرية

هذا المساء ..📌

" الحب ما فرض " ♡.

ـ الحب شعور لطيف وخاصة لما يكون متبادل سواء كان بي سبب أو من دون سبب.

ـ شعور ممكن يباغتك في أي لحظة ومن دون مقدمات فجأة بتلقاء نفسك بتميل لي فلان دا وبتحس بمشاعر حلوة تجاهو.

ـ الحب حلو بس الأحلي منو أنو يكون الشخص الصاح البحبك بي كل عاديتك وبشوفك مميز في نظره.

ـ البتقبلك بي كل تصرفاتك ومابحاول يفرض عليك رأي أو حتي أنه يغير فيك حاجة بحبك زي ما أنت بكل نقص فيك وبكل عيوبك وبحببك في نفسك وبشجعك عشان ما تكون واثق منها.

ـ بحترم أبسط الحاجات البتعنيك حتي لو كانت سخيفة مابحاول يقلل من قيمتها قدامك بالعكس بعاملها كمعاملتك ليها حتي لو ماكانت المفضلة عندو بس أنو يشاركك تفاصيلك دا من ضمن أهتمامته حتي لو كانت دارما بتحبها أو الأغنية الفلانية أو أي حاجة حتي لوكانت بسيطة بس بتفرق معاك.

ـ أنك تحب شخص يعني لاذم تتقبله كما هو بي عالمه المختلف وتصرفاته العفوية يعني لو مرة كان حزين علي كديستو الماتت لاذم تحزن معاهو تشاركه كل تفاصيله من غير ما تستخف بيه.

ـ الحب أنك تكون مصدر دعم وتحسسه بأنك الكتف البقدر يتكيء عليه لما تصعب عليه الحياة واليد البتتمسك بيهو لما تفلتو الظروف والخطوة البتمش معاهو لي أبعد المشاوير من دون تردد.

ـ أنك تحب شخص لاذم تكون قادر تتحمل كل مسؤلياته وتخاف عليه زي خوفك علي نفسك وأكتر.

ـ وأنك تخليهو مبسوط في حياته أولوية عندك وماتسمح للحزن يغشاهو أو بالأحري أنه ما يحزن براهو تشاركه في كل المواسم أفراح وأتراح.

ـ أنك تشملو في دعواك وتحافط عليهو في قلبك ولما تشوفو في الغلط تحاول توجهو للصح بكل حب .

ـ الحب ما مجرد مشاعر بتتقدم لي الطرف التاني وخلاص هو مسؤلية أسعاد شخص بهتم بيك وبحبك أكتر من نفسه ومتمني يكون معاك.

ـ قبل ما تحب لاذم تختار صح وتعرف أنك لاذم تكون محضر خير في قلب الطرف التاني ومصدر سعادة ليهو وأمان قبل كل شي.

ـ لاذم تبقي ليهو الحضن البحتويهو لما الدنيا تقفل في وشو كل الأبواب وتبين ليهو أنك حتفضل بيهو ومعاهو علي طول المشوار.

ـ حبو يخوانا الحب شعور لايعلي عليه بس لاذم تتوجو الحب بالحلال وتمسكو أيدين بعض وأنتو مطمئنين وواثقين ومكملين للأخر 🌻.


#ومن_الأخر_كدا

" وما نحن ألا أنصاف نكتمل بالحب " 🌸



#سمرية

أهمَّ درس تعلّمته حتى الآن هُو أن أبنِي حولي جداراً من الخصوصيَة!
وذلك يعني أن أقلّل من جُرعة مشاركة الجميع كل شئ ، أن أحتفِظ ببَعض الإنجازَات الصغيرَة لنفسِي ، وبالأسباب الخفِية لسعادتِي ، وبالأشخاص الذينَ يكونونَ السَّبب في كُلّ ذلك
نحتاجُ أن نغذِي في داخلنا فكرة أن قِيمة الأشياء لن تزداد بالضرورة إذا ما تمت مُشاركتها مع الآخرِين ، وأعنِي بالآخرينَ هُنا الدائرة الأوسع من حلقة الأشخاص المقرّبين في علاقاتِنا
وعلى الرغم من حرص مُصمِّمي مواقع التواصل الإجتماعي على هذه الميزة في تطبيقاتهم ورغم خيارات الإستثناء والحظر المتوفرة إلا أن الخصوصية هي أكثر ما نفتقرُ إليه في هذا العصر
إننا نعرفُ اليوم أن فُلان عزم زوجته في مطعم كذَا وأنَّ فُلانة إنفصلت عن خطيبها ، وأنّ جارنَا قدّم لزوجته حقيبة في ذكرى زواجهُما..إلخ
بتنا نعرف بالفعل أكثر مما نريدُ ومما يلزَم
إخفاء تفاصيل حياتنا ليس تحاشياً للحسد ولكن الأمر بالفعل كما قال أحدهُم :
"الخصُوصية قوة ، فالناس لا يستطيعُون إفسادَ شئٍ لا يعرفُونه"
نسينا أن الخصوصية خيَار وقرار فبِتنا نشكو من تدخُّل الآخرين في شؤوننا رغم أننا -كما يبدو- السبب الرئيسي في ذلك!
#مريم_الشيخ💚

@theorkeed

هذا الصباح ..📌

" أأكذبُ حينَ أحلفُ أنّ قلبي على ما فيهِ من أُممٍ.. وحيدُ؟ " ♡.

ـ هي فترة بتمر عليك ويمكن تكون من الفترات السيئة اللي ممكن تمر بيك وتخليك تحس بي شعور الوحدة اللي مابتقدر تتجاوزها.

ـ بتخليك تفكر بإنك مامهم علي قدر ما أنك مهتم بالناس القريبة ليك ووجودك وعدمه مابيشكل فارق بالنسبة ليهم.

ـ يمكن يكون شعورك صح وأنك فعلاً مامضمن الأولوية وأنو في حاجات تانية مهمة في حياتهم بخلافك أنت .

ـ يخوانا مابالضرورة أنو لما نحس بالوحدة نكون وحيدين فعلياً يمكن يكون حولينا كمية من الناس وكل واحد هو أقرب لينا بس لانو في فجوة حاصلة وبنحس بعدم الأهتمام حتي لو من باب " كيف حالك" يمكن يكون دا شي كافي يسمح للشعور دا يتسلل جوانا ويتملكنا في اللحظة.

ـ بس لاذم تتعود أنك تتعود علي الوحدة فكرة أنو كل الناس حتكون معاك هي ماصعبة بس قد تحصل ظروف وتتخذل وساعتها تخنقك العبرة وتاخدك لي أفكار كتيرة وتفتكر أنك مامهم بس الحاصل عكس. ♡

ـ ماتتعود علي أنو تلاقي كل الناس جارية عليك في كل صغيرة وكبيرة أحياناً ما حيقدرو يكونو معاك لأنو هم كمان عندهم حياة خاصة بيها ومليانة تفاصيل كتيرة.

ـ شعور الوحدة ماصعب لأنها طبيعية بس الأصعب منها أنك تحس بيها وسط كمية من الناس البتعتبرهم أقرب للقلب من غيرهم ورغم أنو ماعارفين عنك سواء أنك " بخير " لمجرد ردك بكدا بس نحن بخير فعلاً برحمة ربنا وبلطفه ولأننا واثقين بأنو الجاي خير حتي ولو كنا مليانين وجع ..

ـ وماتحاول تعاتب أي شخص علي أنه ماكان معاك وخفف عنك أحساس الوحدة المحنة البتجي بالعتاب عمرها ما حتكون حلوة لأنها أداء واجب ومحاولة بائسة عشان تمتص منك شعور الزعل دا ..

ـ أنك وحيد ما بيعني تاخد علي خاطر وتزعل علي كل الحوليك يمكن هم ما بستاهلو ولو كان برضو دا مبرر يخليك تاخد من عافيتك وتصرف تفكيرك بيهم ويومك كلو تكون قافل علي نفسك ومدبرس ..

ـ ولما تحس بالشعور دا لاذم تكون أيجابي أكتر وتحاول تستغل وحدتك صح لأنها مساحة خاصة ممكن تخليك تتعرف علي نفسك أكتر حتكتشف حاجات ماكنت عارف أنها فيك حتصل مرحلة رضا وقناعة حتترتب جواك حاجات كانت جايطة.

ـ وحدتك دي سبيل تصل لي معرفة ذاتك و لي أنك تعمل حاجات تفيدك في حياتك أو تكتشف موهبتك وتطور منها او تقدر تاخد خطوة تجاه حلمك ..

ـ والأجمل من كدا أنها فترة علي قدر ما بتحسسك من بعد الحوليك بس كافية تخليك تقرب من " ربنا" ♡ أكتر وحتلقاء هنا راحتك النفسية والأهم أنك حتستغل الزمن دا في عبادة حتنفعك في الدارين .

ـ الناس محطات وأنت كذلك لاذم تعرف متي ما وصلو هم حينزلو ولاذم تفضل تكمل حتي لو براك ولاذم تفهم أنك جيت الدنيا براك وحتطلع منها براك وأنو الوحدة مانهاية حياة بس بداية بشكل مختلف وأنت ساند نفسك بنفسك ..


#ومن_الأخر_كدا

" مَا دامَ بعدَ المَوتِ قبرٌ مُفردٌ فلِمَ التذمُّرُ لو تَعيشُ وَحيْداُ؟ " 🌻

#سمرية

هذا الصباح.. 📌

" نحنُ جنَازات مُؤجلة " ..

ـ فكرة الموت دي حاجة حتمية و لاريب فيها وقد يباغتك الموت في أي لحظة من حياتك ومن دون مقدمات .
كما في قوله تعالي : - ‏﴿ كُلُّ نَفْسٍ ذَائِقَةُ الْمَوْتِ ۖ ثُمَّ إِلَيْنَا تُرْجَعُونَ ﴾.

ـ بس نحن لاذم نكون مستعدين الموت مابياخد أذن قد تختم حياتك وأنت في معصية أو أنت بتفكر في الوظيفة الفلانية اللي نفسك فيها من زمان وأخيراً قدرتا تصل ليها أو في صلاتك أو في مشوار ماش عليه أو بي مرض عانيت منه الموت ماعندو زمن محدد.

ـ بس في النهاية هو مصيرنا كلنا وحقيقي وجع الفقد صعب لحد لايوصف .

ـ ولما تسمع بأنو فلان مات كدا بتحس بطعنة في قلبك وأحساس الدنيا لافة بيك وماحتقدر تستوعب أنو خلاص دي نهايتو وأنكم صعب تتلاقو تاني.

ـ في لحظتها حتشوف كأنك بتحلم حتكون ما قادر تصدق مهما قالو ليك حتفضل تفتش عنه في الحوليك وتعاين في عيون كل واحد عشان حاسس أنك ممكن تلمحو وهو جاي عليك بنفس الملامح والإبتسامة أو يمكن تحاول تتصل عليه علي أمل أنه يرد عليك ..

ـ حتكون مليان وجع وماقادر تصدق ويمكن تمر الأيام وتحاول تكون طبيعي وتتأقلم بس لما تجي مناسبة بتجمعكم بتتفتح الجروح من جديد حتلقاء نفس المكان بس هم ماف بي طيبتهم ولمتهم معاك ووجودهم حوليك وهم بشاركوك الفرح حتبقي كل المناسبات باهتة شديد..

" المُوت مُر " ☹..

ـ مر شديد وكأس كلنا شاربين منه حنفقد ناس ويمكن حنكون نحن في يوم المفقودين ..

ـ حتبكي بحرقة من جواك وتصرخ بكل صوتك حتكون حاسي بثقل في قلبك بس في خضم الوجع دا لما تلقاء الناس بتحضن فيك كمحاولة بائسة منهم للتخفيف بما أنها ما كافية بس كفلية تخفف وطأة الشعور في اللحظة ديك.

ـ في لحظة الفقد محتاجين لي ناس تربت علينا تهدينا تطمئنا وتذكرنا بأنو الموت حق والحياة باطلة.

ـ برغم كل الألم ألا أنو الموت رحيل من حياة مؤقتة لي حياة أبدية قد تكون مليانة شقاء أونعيم ومصيرك بتحدد بي عملك اللي عملته في حياتك دي وهل رصيدك كان مليان حسنات ؟ ولا بس سيئات ؟ وهل قضيت عمرك نميمة وقطيعة وعدم صلة رحم ولا عكس ذلك ؟ إستفهامات كتيييرة والجواب عليها عندك .
" حاسبوا أنفسكم قبل أن تحاسبوا، وزنوا أعمالكم
قبل أن توزن عليكم، واعلموا أن مَلَك الموت قد تخطَّانا إلى غيرنا، وسيتخطَّى غيرنا إلينا "

ـ أنت موجود هنا عشان تزرع وحتحصد في الأخرة وماتنسا أنو كل صغيرة وكبيرة أنت محاسب عليها وأنه في جنة وفي نار وفي بعث وفي حساب وعذاب وتفاصيل كتيرة .

ـ فخلي كل لحظة في حياتك تكون خاتمة حسنة وأسال ربك حسن الخاتمة وكتر من الدعاء دا .
" اللهمَّ إنَّا نَسألكَ حسنَ الخَاتمة" .

ـ واللهمَّ ارزُقنا قبلَ الموتِ تَوبة وعندَ الموتِ شَهادة وبعدَ الموتِ جنةً ونَعيما!."

‏وتذكر ..📌

‏"في الجنة لن نفترق ولن نخاف البعد ولا الموت ولا الظروف ولا السفر ، لن نغـار ولن ننام ولن نتعب ، في الجنة لا بكاء ولا جروح ولا دموع ولا ألم
#ومن_الاخر_كدا

" إنا لله وأنا إليه راجعون"

#سمرية

هذا الصباح...📌

"تفرقنا المسافات وتجمعنا المحنة" ♡.

ـ في ناس مهما فضلو بعاد عن ناظرك بس هم جواك حيفضلو الأقرب لي قلبك ..

ـ حتشوفهم حوليك في كل تفصيلة وفي كل المواقف اللي مرت في حياتك وهم كانوا معاك حتحسهم حوليك .

ـ حتكون مبسوط وأنت بتتذكرهم واللحظات الجميلة الكانت معاهم .

ـ الغياب دا رغم مرارتو إلا أنو قادر يحلي اللقاءات اللي بتجي من بعديهو وبديها نكهة مميزة كدا وشعور عظيم..

ـ غيبو بس ما تطولو الغيبة شديد لانو كل شخص فينا من حقو ياخد مساحة خاصة من حقو يرتب حياتو وتفاصيلو وياخد رست كدا ويرجع ليك بشعور جديد ..

ـ المحنة بتبني جنة سعادة جوانا بتخلينا قريبين مهما كنا بعاد وحاضرين مهما كانت مدة الغياب .

ـ محظوظ البغيب وبيلقاء شخص فاقدو وبسأل عليه وبسعد بي وجودو وبهديهو الحب في كلمات وبيذكرك بي مكانتك في قلبو وعن مدي أهمية وجودك .


#سمرية

هذا الصباح ...📌

" بخطوات صغيرة تقطع أميال طويلة " ♡.

ـ في طريقك عشان ما تحقق أحلامك عشان ما أنت تصل للحاجات العايزاهاو ونفسك تنجزها .

ـ مالاذم تستجعل وتحاول تاخد خطوات أكبر منك ما تستهون بالتفاصيل الصغيرة مهما كانت شفتا الصغيرة دي ممكن تكافئك بطريقة حتكون ماقادر تتوقعا.

ـ يخوانا الدين دا بسط لينا كل الأمور ولو تبعتها حتلاقي نفسك في مكسب عظيم هو مهد ليك الطريق وأنت عليك تتوكل وتمش.

ـ أتذكر انو رجل دخل الجنة عشان سقي كلب وغيرها كتير من القصص اللي ممكن تاخد منها العبرة.

ـ لاذم تفهم أنو الإنجاز أنك طوالي وبلا مقدمات تورط نفسك وتقع وتقوم عشان تعمل حاجة واو وكبيرة في نظر الناس والمجتمع وبكرة تلاقي نفسك اتورطتا وماقادر تتطلع من المتاهة دي.

ـ يخوانا علوا سقف طموحاتكم للسماء اصلو ماف مشكلة وماف شي صعب مع الأرادة والصبر بس كمان ماكل حاجة بتجي علي طول زي ما عايز ولا في انجاز حيصبح كبير بين يوم وليلة لاذم تخطط لاذم تفكر صح لا تجتهد وتعافر وتقع وتقوم عشان تصل.

ـ السلم درجات والنجاح محطات وعلشان تصل لي اي نهاية انت محتاج كل مرة تمش تجاها خطوة وراء خطوة ما بالضرورة تستعجل من العجلة الندامة .

ـ حاول تضع خطة تكون متناسبة مع كل ظروفك ولاذم تخت خطط بديلة علشان لو ما تظبط معاك الاولي ما تيأس ويكون قدامك في باب تاني مفتوح ليك.

ـ ما تستهون وأبدا بالبسيط سواء كنت عايز تبداء مشروع او تتعلم لغة او اللي كان في بالك هو شنو ما تخاف من نظرة الناس ليك طالما انت ماش صح وتعبان علي نفسك.

ـ يعني ممكن مشروعك يكون تسالي وبخطوات منك تتطور وتتوسع ويكون عندك حاجات أكبر يعني ممكن تتعلم كلمة كلمتين من اي لغة ومع الايام تبقي متقن ليها وبعدين زي ماقالو قليل مستمر ولا كثير منقطع.

ـ يعني أنك كل يوم تنجز ولو حاجة بسيطة احسن من تنجز حاجات كبيرة وبين فترات طويلة كفيلة تنسيك او تفقدك الشغف .

ـ وياريت الناس المحبطة دي تحاولوا تتجاوزوهم ما تسمع من زول يقول ليك حتقعد في شغلتك الصغيرة دي لمن متين في ناس عاشوا عمر وحاليا هم وصلوا مرحلة رضا ونجاح كبير ..

ـ ما تسمع للبكسر مجاديفك اسمع لي نفسك لي قدراتك وإمكانياتك وعاين لي مستقبلك عايز تكون شنو وركز علي كدا واجتهد وصدقني حتصل يا حبيب ♥.

#ومن_الاخر_كدا

" لن تصل القمم مالم تحاول الصعود بخطوات ثابتة ".

#سمرية

" غالباً براودك أحساس غريب شديد فجأة بتزهج وبتقفل معاك من كل النواحي ،بتكون متضايق وماعارف ليك سبب ،بتبكي بس ماعارف السبب بتخليك متايق من نفسك ،وبتفقد لحظتا كل حاجة في نفسك حقيقي ماعارفة تفسير لي الشعور دا بس كونك تبكي حترتاح شوية منو ولو كمان أستغفرت ربنا 💜 شوية شوية ببداء يتلاشي منك وينتهي الشعور المرهق دا اللي ما فاهمو هل هو تراكمات ولا ذنوب متطايرة ما كنت واعي بيها اللهم أياً كان ربنا مايضوقكم ليهو ، فاللهم عفوك ورضاك " ...🌼

#سمرية

هذا الصباح ...📌

" كوني كلّ شيءعدا أن تكوني إمرأةً مهزومة " 🌻.


ـ الحياة ما بالسهولة اللي بنتوقعها نحن وعلي حسب بساطتنا بل صعبة ومحتاجة ثبات ومعافرة عشان ما تقدر تستمر.

ـ وأنتي لاذم تكوني زولة واثقة من نفسها وقوية لاذم تعرفي نفسك كويس وما تسمحي لي اي زول يقلل من قيمتك ..

ـ ما تسمحي لي اي شخص يستقل نقاط ضعفك وخاصة " عاطفتك " ويحاول يخدعك بي كلامه المعسول ماتوريها لي اي زول نقاط ضعفك لاذم تعرفي كيف ما تظهريها وكيف تقدري تبقيها مصدر قوة ليك ♥ .

ـ لاذم تكوني مستقلة وتاني بذكرك بأنك لاذم تكوني قوية من كل الظروف وكل المواقف اللي ممكن تلقي نفسك فيها.

ـ مالاذم تثبتي لي اي شخص انتي منو ولا تهتمي بكلام الناس لانو عمرهم ماحيكونوا بستاهلو يقللو من قيمتك ..

ـ أنتي جوهرة ثمينة لاذم تحافظي علي نفسك علي مشاعرك علي كل حاجة بتتعلق بيك وبس ...

#سمرية

‏أنت الإنتصار الذي كنت تبحث عنه.!
إشكر كل هزيمة شاركت في تشيّيدك.♥️

لذة الإدمــان ( إدمان )

أيوة أنا أدمنت لعادة جديدة و عادة عظيمة ومفيدة جداً .

في قوله ( ﷺ ): " اقرأوا القرآن، فإنه يأتي شفيعاً لأصحابه يوم القيامة ".


الفترة الأخيرة دي الزمت و أخدت وعد مع نفسي ، حددت لنفسي إني يومياً أقرأ جزء من ( القران الڪريم ) بإنتظام بعد صلاة الصبح ، و يومياً قبل أنوم اقرأ ( سورة الملك و المعوزتين ) حتي بعدها بفضل أستغفر الله و بحمده الي إن أنوم و ڪتير بنوم وما بڪون حاسي أو إني نمت متين 💕 .
إنتظمت مدة أڪثر من شهر ( الحمدلله التوفيق من عند ربنا عز وجل ) ودي الفترة الڪنت مؤجز فيها ، لما نزلت الجامعة و جدولي إختلف و الفترة الصباحية بقت قصيرة وأنا ما عايز اخلف بوعدي مهما ڪان 😤🥲.
أول خطوة عملتها إني غيرت جدولي و بقيت أنوم أبدر بساعة و أصحي قبل الصبح بمدة ڪافية✨.
في المدة دي بتسوك و بتوضيء و بصلي رڪعتين وبفضل في ( المصلاية ) و ببدأ أقرا الجزء بتاعي ڪامل ، الفترة الصباحية الجو بڪون هادئ جداً و زهني بڪون صافي و بالي رايق فا بقرأ بتمعن وتدبر لدرجة إني مرات ما بقرأ أڪتر من صفحتين✨ ، بقيف في ڪل آية ما فهمتها و بطلع علي تفسيرها ومعاني المفردات ( مصحفي بحتوي علي التفسير والشرح 😁).
بفضل في ( مصلاياتي ) حتي قبل الإقامة بي 10 دقائق بقوم تاني بتني رڪعاتي حتي بمشي الجامع و هناك برضو بصلي رڪعتين تحية المسجد.
بعد الصلاة بعمل ( الباقيات الصالحات ) و طوالي برجع البيت و بجهز لمشاويري سواء للجامعة أو غيرها.
_
يوم جمعة بڪوي عملت تشغيل عشوائي ( لسورة الڪهف ) في قناة سودانية بالتيليجرام فيها مجموعة من القراء ، اثناء ما بسمع إشتغلت بعض السور بصوت قاريء ما شاء الله تبارك الله .. صوته رهيب و هادئ وتلاوة خاشعة و تدخل الطمأنينة في النفس 💚، فا جاني فضول أعرف إسم القارئ ووقفت ڪل شئ و لما نزلت الستارة إتفاجأت بإسم أول مرة اشوفة ( همام تاج السر ) و ڪانت أول مرة اسمع فيها صوته وبعدها علقت 🙊😂🤍🤍.
فا رفعت الصوت لأعلي مستوي و علمت تڪرار للسورة الڪان بقرا فيها ( سورة يوسف ) ورخيت أضاني عشان إستمتع بحلاوة التلاوة العزبة دي ، أثناء إستماعي دخلت فيني راحه نفسيه ما طبيعية و حسيت بطمأنينة ما عادية و لا شعورياً حسيت بالسعادة وڪانوا ڪل الحمل الشايلة جواي انزاح بالإضافة لترڪيزي المطلق مع قصة سيدنا يوسف علية السلام 🤍🤍.
بعد خصلت شغلتي فتشت سورة آخري لشيخ ( هما تاج السر ) لڪن للاسف ما لقيت سور ڪاملة 💔.
لڪني إحتفظت بالمقاطع القصيرة اللقيتها و بقيت إسمعها بإستمرار في الشارع، المواصلات، أڪون مضايق لانها بطبطب علي قلبي و قبل النوم ڪمان و مرات دون سبب 💙💙 ..


⭕️ الخلاصــــــــــة

الخلاني اكتب اليوميه دي سببين 😂❤️

الأول : شعور الراحة و الطمأنينة و السڪينة الوجدتها بإستماعي ( للقران الڪريم ) بشڪل منتظم ، و إني بدبر في آياتة و معانية و بتعلم من الحِڪم و العبر المذڪورة فية❤️.
الثاني : إني قدرت أخد قرار إيجابي و ڪان لسة أثر محسوس في حياتي اليومية و الروحية وإني وصلت لقناعة إنو الإنسان هو البضع العقبات في طريقة و بصعبها علي نفسة بالمعتقدات الخاطئة و تجارب الأخرين الفاشلة.
و ما تقول انا عصيت و قصرت في حق ربنا سبحانه وتعالي و خجلان اقيف قدامة 🥺💔💔 ، إنت نسيت الايه دي : ( إن الله يحب التوابين ويحب المتطهرين ) ؟ يعني إنت مهما قصرت وارتڪبت من المعاصي ماتتڪبر وتقول ربنا ما بغفر لي لاني ڪررت المعصية دي اڪتر من مرة وظلمت الناس و غيرها ، ربنا بنفسو قال لينا انو نحن مهما عملنا من معاصي و ڪبار بس تبنا توبة خالصة و استغفرناه حيتوب علينا.

و نصيحتي لك ( ‏رجع المصحف في الشنطة ، و أقرا في المواصلات و أوقات الفراغ ، أقرا في الڪلية ، إستراحة العمل ، المستشفيات و اثناء الانتظار .

[ أروا الله من أنفسڪم خيراً . ولا تجعلوه أهون الناظرين إليكم..]

#يومياتي..🌹

- ما أطراك حبيب إلا و قلبي فر ..زي ما بي تفعل ذنبك مغتفر ..!

" النّصّ لا يأتي دفعة واحدة " ♥

ـ الحرف لي حرف كلمة والكلمة لي كلمة جملة والجملة لي جملة كتاب ..


ـ فالكتابة علي ما هي بتتشاف بسيطة بس ليها قواعدها ومناهجا الخاصة اللي بتتعلق بيها ..

ـ الكتابة هي أدب وتعتبر فن من فنون التواصل والتعبير يعني هي اللي قادرة تحكي عن كل التفاصيل الجواك والبتحس بيها من خلال النصوص ..

ـ وغالباً بتختلف طرق الكتابة والهدف منها في ناس بتكتب علشان بتحب الكتابة وفي ناس عشان نفسها توصل رسالة وفي ناس بتحب تفضفض بيها .

ـ فلذلك كل شخص فينا بحب الكتابة لسبب بتعلق بيهو ♥ .

ـ لاذم نفهم أنو الكتابة ماساهلة وما صعبة كمان بس لاذم نراعي لي قواعد اللغة والإملاء وعلامات الترقيم ..

ـ وعلشان تعرف أكتر في كمية من الكتب اللي بتتكلم عن الموضوع ممكن تساعدك تتجنب الأخطاء دي في كتاب اسمه " فن الكتابة الصحيحة " للكاتب محمود سليمان ياقوت ..

ـ لاذم نعرف أننا لما نكتب بصورة صحيحة دا بخلينا أقرب للقارئ فمهما كان النص اللي كتبته جميل حيفقد تأثيره لو ما أتكتب بالصورة المطلوبة ..


ـ نقطة مهمة انو نعرف اللغة العربية دي من أصعب اللغات لانها بتحتوي علي كمية من القواعد الأساسية للكتابة من نحو وإعراب وخلاف ذلك ..

ـ عشان نقدر نتقن اللغة دي لابد يتعلم الطريقة الصحيحة من حيث اختيار الموضوع لانو بمثل الفكرة الأساسية والمحور اللي الكتاب عايز يتكلم عنه.

ـ وتاني الوحدة والتماسك يعني الكاتب لاذم يطرح الفقرات بطريقة تسلسلية ومنطقية بحيث يظهر فيها التناغم والإنسجام بالأفكار.

ـ واختيار الألفاظ الجميلة بخلي وقعها علي قلب القارئ اخف ومابتخليهو يحس بالملل.

ـ وكمان الموضوعية يعني ما يكون فيهو تحيز لعواطف او اي تفاصيل تانية..

ـ التوثيق ودا من الحاجات المهمة اللي لاذم نرجع ليها علشان بساعد في إثراء الكتابة وكمان عشان ما نحفظ حقوق الكاتب ..


ـ يخوانا الكتابة دي ليها كمان خط أحمر وهو مساحة الكاتب دي يعني ما حلو تاخد تعب ومجهود شخص وتنسبو لي نفسك مهما كان وذوقياً الكلام دا ما بليق بيك لو كنت فعلاً بتحب الكتابة ..

ـ ماغلط تحب نص بس الغلط انك تسرقو وتنسبو لي نفسك بلا مراعاة لي حقوق الملكية .

ـ الكتابة حاجة حلوة شديد وما صعب تتعلم تكتب بس لاذم تعرف عنها أكتر ويكون عندك إلمام كافئ بكل الجوانب البتتعلق بيها ..


ـ الكتابة مساحة بتخليك تعبر وتفضفض وتوصلك لي قلب القارئ بسهولة.

ـ الكتابة ماجرد نصوص بل حياة تسرد بأسلوب الكاتب أحياناً وبالحب دائماً ♥



#سمرية

#حب_الكتابہ " ²" 🌻

" كل شيء ممكن، لكن لا شيء ممكن، أليس هذا مأزق الكتابة؟ " ..


ـ الكتابة عندها عدة ٲنواع ..

الكتابة الوظيفية : هي تعبير عن حاجات معينة ممكن نقول بتتعلق بي مهمةاو وظيفة معينة في الحياة الٳجتماعية وبتضمن ..

ـ الرسائل :

وهي نص مكتوب عندو شروط مثلا من مرسل لي مرسل ٳليه وتاريخ والمكان وكل التفاصيل البتتعلق بيها وموضوعها .


ـ البرقيات:
 وهي نص يستعمل في التعاملات التجارية والتعليمية والمؤسسات، تتسم بصيغتها الرسمية بعيدًا عن الأمور الشخصية، تؤدي غرض العمل.

ـ السير الأكاديمية: 
وهي نص بيتكلم عن ترجمة شخصيات أو كتاب او غيره علشان تكشف تاريخهم.


ـ الإعلانات: 
نص بهتم بي الإعلان مثلاً عن ندوة مؤتمر أو حفل بالتاريخ والمكان وكل التفاصيل المتعلقة بيهو .

ـ التقارير: 

عندها كم نوع قد تكون متعلقة بدراسة او عمل او شركة وممكن نقول عنها تلخيص مختصر للحاجات الحصلت في المؤسسة دي.

ـ التلخيص:

اللي بيساعد في أننا نعرف جوانب الموضوع من خلال تلخيصها.

ـ السيرة الذاتية :

اللي هي بتتعلق بي كل البيانات البتخص الشخص علشان ما يقدر يقدم نفسه بالشكل المطلوب .


ـ تدوين الملاحظات :

يعني كتابة اي ملحوظة سواء كانت بتتعلق بي وظيفة او دراسة او خلاف ذلك.

ـ يعني ممكن نقول أنو الكتابة الوظيفية دي بتتعلق بي بالحياة ومتطلباتها وبتساعدنا عشان ما نقدر نصل للحاجة العايزنها ..

ـ وليها دور مهم وبتساعدنا كتير وممكن نستفيد من خلالها ..

- ولسع موضوع الكتابة كتير بس حالياً نكتفي بالجانب دا والباقي ..


يتبع ..


#سمرية