جزء كبير من راحتك النفسية ورضاك عن حياتك بيتحقق بإنك تتقبل فكرة قلة حظك في جانب معين من جوانب حياتك، وتفهم إن ده شئ طبيعي ومنطقي جدًا كمان .. ودي حكمة ربنا في خلقه .. !!

ما من الطبيعي يكون ليك حظ في كل جوانب حياتك سواء شغل، زواج، اولاد، اصحاب، فلوس، صحة.. لازم تتقبل فكرة إن رزقك مش بالتساوي في كل النواحي فطبيعي تفقد ناحية أو اتنين ..
كونك إنسان عايش في اختبار اسمه الدنيا بيتعارض مع فكرة الكمال لينا كبني آدمين..

الرضا بالمقسوم عبادة .. الدنيا عمرها ما حتكون كاملة وحتفضل ناقصة بتكمل برضانا.. فـ ندعي ربنا يرزقنا البركة بالمتاح ويعوضنا خير عن كل نقص💛


#ولاء_صلاح

حيرتي التي لم تنتهي حتى الآن كانت في العلاقات.
أنني دائماً أكون الطرف الذي يستجيب بعد مدة طويلة ، اذكر أول سرٍ أخبرت به صديقتي كان بعد عام من صداقتنا ، بعد أن أدرس طبيعة الشخص ، لا أثق الا بعد عشرات المواقف ، رغم أني أكون فارّة اجنحتي لكل احتواء ، لكل بوحٍ او استشارة ولا افعل ذلك لنفسي أبداً ..
كانت العلاقات تمتد بي دهراً حتى اضع لها مسمّيـاً ..اخاف تقلّب الوجوه بعد أن أفرّغ نصف دواخلي عندهم.
حيرتي ابتدأت منذ التقيتُك ، منذ ضحكت معكَ على أشياء لا تُضحك ، ودسست في جيب حزني فرح حتى قبل أن أخبرك به!
حيرتي ابتدأت منذُ إجابتي على رسالتك " هل أنتِ بخير" ! ويديّ التي خطّت " لا" بكامل الصِدق ، حين حادثتني ووجدتني اشتكي لكَ من موجات الغبار التي تفسِد ساعات جهدي في المنزل ، والعطلة التي تنتهي قبل أن تبدأ فعلياً ، ولكن الذي لم أتوقّعه يوماً !
حين شاركتك بشرخ روحي ، وأعمق جُروحي ، حين نطقَت مخاوِفي وفرّت الى آمنِ ابتسامتك ، وعلمت عنّي ما عجزت عن صياغته حتى لنفسي ، واذكر صمتي في منتصف الحديث وإكمالك إيّاه بـ " لا تخافي ، أكمِلي"❤
واكمالك عنّي ما أثقلني في مواطن كثيرة ، حيرتي الحقيقية معك! أنك أتيت في وقتٍ أكثر ما كنت سأقدمه لكَ أن ابتسِم وانت تعبر من أمامي ، ولكن كان وقتُك القصير ، أقرَب وأطول علاقَة في تاريخ العُمر
فهمت حينها!
ان العلاقة الحقيقية تُقاس بعمق الشُعور ، أن هناك أشخاصاً يأتون بأمان العالَم ، فيصبحون الأقرب في يومٍ أو شهر ! في الوقت الذي ظلَ آخرون يقرعون باب القرب أعواماً ولم ينالوا ولو ضحكة .
ثمّة روح تأتي متأخِرة ، في وقت خاطئ ، وقت مزدحِم وممتلئ بالضجيج ، وسط أشخاص كُثر ، وعلاقات لا تُعَد ، ليبتسموا أمام كل هذا الإزدحام ويفتحوا نوافِذ ثقتك اتجاه قبلتهم ، لتعرف شيئاً واحداً
ان الأفعال وحدها من ترتبُهم في قلبك ، لا المدى ، ولا الأيام ، ولا كثرة الخطاوي برفقتهم ، وحدها الأفعال تتولّى ذلك!

#رغد_عبدالرحمن

كل الدمعِ الذي فاض من عيني قديماً أبدله الله ضحكاتٍ مزهرة 
كُل الأحزانِ التي حملتها على كتّفي تساقطت تِباعاً

كُل" إن مع العسر يسراً" قرأتها بيقين، كافئني اللهُ بذات يقينها يُسراً.
كُل"سيستجيب" أغمضت عيني برجاء منكسرٍ أرددها، أتتني بجبر من الله مُستجابة.

الوعود السماويةُ لا تخيب ، الوعود السماويّة تصدق وتأتينا محمّلة بالبشائر عاجلاً أو بعد حين.

#رغد_عبدالرحمن

العدل الإلهي مُحيط بينا بطريقة مُطمّنة، ومخيفة في ذات اللحظة! 
في الوقت الإنت بتعافر فيه ورا إنسان هو مامنتبه ليك، حيصادفك إنسان حيعافِر عشانك.. وماحتنتبه ليه برضو! 
في الوقت الإنت بتقطع فيه مسافات طويلة في نهاية مجهولة، في البناجي ربنا نصّ الليل عشان تقطع عشانه ولو خطوة وحدة..

الحُب والتعلق مابيدنا، ياريت لو كنا بنقدر نختار إنو البنحبهم يبادلونا نفس الشعور بضغطة زر أو شفرة، لكن ربنا عوض علينا بعقل يورينا نمشي في السكة دي ولا نقيف 
القلب مخلوق مرهق، مابيخضع للمنطق، ولابتغريه الحسابات العقلانية.. عشان كدا جانا عقل نوزن بيه ،شوية من هنا وشوية من هنا.. عشان المركب يمشي ،وماتتوّهك الحياة،وتعلقات القلب الما منطقية

وأخر حاجة وللأبَد 
"شوف الشافَك،وحِب اللّيك"

#رغد_عبدالرحمن

#الفهرس🖇💛:-

" بسم الله حباً والسلام عليكم فرداً فرداً " 🌼.

في البدء " للوصول لمحتويات القناة قم بالضغط علي العنوان الذي تريد " ..

1) سلسلة كتاباتي المتواضعة .

#سمرية

2) للحصول علي الروايات عامة :

#سلسلة_روايات

3) للحصول علي الورد اليومي :

#يلا_نختم

4) للوصول لسلسلة مودة ورحمة لمريم الشيخ اضغط علي 💛:



-الحلقة الأولى :
https://www.tg-me.com/zai_nab23/7026

- الحلقة الثانية :
https://www.tg-me.com/zai_nab23/7033

- الحلقة الثالثة :
https://www.tg-me.com/zai_nab23/7061


- الحلقة الرابعة :
https://www.tg-me.com/zai_nab23/7068


- الحلقة الخامسة :
https://www.tg-me.com/zai_nab23/7160

- الحلقة السادسة :
https://www.tg-me.com/zai_nab23/7350

- الحلقة السابعة :
https://www.tg-me.com/zai_nab23/7728
- الحلقة الثامنة :
https://www.tg-me.com/zai_nab23/8476

- الحلقة التاسعة :
https://www.tg-me.com/zai_nab23/8502

-الحلقة العاشرة :
https://www.tg-me.com/zai_nab23/8506

- الحلقة الحادي عشر:
https://www.tg-me.com/zai_nab23/8607

ـ الحلقة الثانية عشر

https://www.tg-me.com/zai_nab23/8627

ـ الحلقة الثالثة عشر
https://www.tg-me.com/zai_nab23/8655

ـ الحلقة الرابعة عشر

https://www.tg-me.com/zai_nab23/8668

ـ الحلقة الأخيرة ♥

https://www.tg-me.com/zai_nab23/8713


4) للوصول للتطبيقات اضغط علي :

#سلسلة_تطبيقات


ثانياً :

" أنا زينب نِصفُ كـَاتبة تَنبضُ بالِحُب والشَغف والحياة "


رابط البوت للتواصل :


@Samria_bot

رابط البوت للصراحة :

https://www.tg-me.com/b7bot?start=hyqW6

" شاركني لحظاتك وأوجاعك مفضفضاً لغريبة و خذ الحب ودع ما يثقل قلبك وأمض في طريقك " 🌸

الأسِرَّة لم تعد آمنة للإنعزال ،
الأبواب لم تعد تصلح للإختباء خلفها ،
الزوايا ، المساحات بين الأثاثات وخزانات
المطبخ ؛ ما عدن بإتساع مخاوفنا ..

أظننا كَبرنا لِلحد الذي خسرنا فيه جميع
مخابئنا و وجهاتنا للهرب ..

#هناء_معتصم

.

🌸!

" الناس الي بتحتار تدعي بشنو وهي ساجدة .. عشان م تضيع عليك خير ركز في الكلمتين ديل
السيده عائشه بتقول للنبي عليه الصلاة والسلام فيما معناه أن الدعاء كتير (هداه تدعي بالرزق وناس أولاد وناس شغل وناس هدايه و و و إلخ.)
قال (يا عائشه : عليكي بجُمل الدعاء وجوامعه )
قالت يارسول الله وما جُمل الدعاء وجوامعه ؟
قال قولي:
"اللهم إني أسألك من الخير كله عاجله وآجله ما علمت منه وما لم أعلم وأعوذ بك من الشر كله عاجله وآجله ما علمت منه وما لم أعلم ، وأسألك الجنة وما قرب إليها من قول أو عمل ، وأعوذ بك من النار وما قرب منها من قول أو عمل ، وأسألك مما سألك به عبدك ونبيك محمد وأعوذ بك مما يعوذ منه عبدك ونبيك محمد ، وما قضيت لي من قضاء فاجعل عاقبته رشداً."
ذكر فإن الذكرى تنفع المؤمنين ..🌸! "

علمنا الله وإياكم 💛


#هند_ٲزهري

كل الذينَ وضعوا النقطة وأغلقوا الكتاب وأعلنوا النهاية..
يستحقّون تصفيقاً لا مواساة.
العطف والمواساة الحقيقة لأولئك الذين اكتشفوا منذ زمنٍ بعيد أن الطريق لا يصل ومغلق في النهاية..

ولكِن قلبُهم يُصِر على قطعه!

#رغد_عبدالرحمن

سلسلة :
#مودة_ورحمة❤️

الحلقة (1):


لاحظت مؤخرَاً في العِيد دا إنو ما شاء الله الأعراس كانَت كتيرَة لمن الواحِد ما عارف يمشي لمنو ويخلِّي منو! .. بغضّ النظر عن إنو معظم الزيجَات المشيت ليهَا كانوا بنَات صغار وتحت سِن العشرين ، فأنا بالجد نفسِي الناس تكون واعية أكتَر بخصوص موضوع الزواج دا ؛ الزواج مسؤولية أكبر مما نتخيّل
● عشان كدَا جاتني فكرة سلسلة (#مودة_ورحمة)🌼

تحت الهاشتاق دا حـ أجمع ليكم كل المواضِيع والبوستات والكتابات اللاقتني البتتعلَّق بالوعِي حول الموضوع دا..

حـ نبدأ بداية غريبَة شويَّة..
● حنبدأ بمقَال من كتاب #لأ_بطعم_الفلامنكو
للإستشارِي وأستاذ الطب النفسي بجامعة المنيا (مصر) ، #الدكتور_محمد_طه💛

قد يكُون طويل حبتين ، بس أحرص إنك تقراه ، أو تحتفِظ بيهو وتقراه لاحقاً سواء كنتَ مُقبل على الزواج ، أو كنتَ ما بتفكّر فيهو أصلاً.

-حوَّلت المقال باللهجَة السُودانية عشان يكون أسهَل وألطَف.
🌸 ●●●


د. محمد طهَ بيقول :
#ما_تتجوزوش!!!!!!

بناءً على ما سبَق
ومن قلب حُجرة العِلاج النفسي
ومن وسَط جبال الحكايات
ومن على شُطآن الآلام..
داير أقول لِيك..
ما تعرِّس..

- ما تتزوّج لمُجرد إنك خلصت جامعة وجيش وإشتغلتَا ، ويلا آن أوان العرس ، لأنك كده بتعتبِر الزواج مجرد قطعة دومينوز (ضُمَنا) بتكمّل بيها اللعبة ، وحتجي في يوم تزهج وتمل ، وتحِب تغيّر الدُور

- ما تتزوّج لمجرَّد إنو سنَّك كبِر ، ومعظم زمايلك وأصحابك عرّسوا ، الحكاية ما كمالَة عدد ، الزواج علاقة إنسانِية ما ليها أي دعوة بالسِّن

- ما تتزوّج لمُجرد إنك عايز تطفِي وهَج غريزتَك أو تلاقِي مخرَج لشهوتك ، إنتَ كدا بتشترِي -فقَط- وعاء بشرِي أنثوي ترمي فيه بعض سوائِل جسّمك

- ما تتزوّج عشان أبوك وأمك قالوا ليك عرّس ، أو المُجتمع قاليك عرّس ؛ إنت كدا بتتزوّج لحساب أمك وأبوك ، ولحساب المُجتمع .. مُش لحساب نفسَك ، والفرق هِنا كبير جِداً

بالمُناسبَة..
مافي حاجة اسمهَا تتزوّج عشان تكمِّل نُص دينَك ؛ كمالَة دينك (كله) بتجي بعَد الزواج كنتيجَة لحُسن الإختيار وحُسن المعاملَة وطِيب العُشرة ، لكنها أبداً ما مُبرِّر للتسرُّع والإندفا ويلا نعرِّس وبتاع..

- ما تتزوّج وإنت عندك تحفُّظات أو مُلاحظات على اللي حتتزوّجها وتقُول : أنا حـ أغيرها بعد الزواج .. وتبدأ بعد كدا تتأمّر عليها وتضغَط أعصابها ، يا تقبلهَا زي ما هِيَ بكل تفاصِيلها ، يلا بلاش تفصِّل الناس على مقاسَك

- ما تتزوَّج واحدة صغيرة وتقول إنَّك حتربيهَا على إيديك ، الزواج مش تبنِّي ولا تربِية ولا وضع نهاية آمِنة للصياعة واللف والدورَان

- ما تتزوّج وإنت ناوِي تقعِّد مرتَك من الشغُل وتحبسها في البيت ، وتخبيهَا وتداريها عن الحياة ، دا ما بيفرِق أي شئ عن وأد البنَات في الجاهلِية .. ظُلم وجُور ودفن بعده دفن!

- ما تتزوّج وإنت شايف إنو المرأة أقلّ منك وأنقص منّك وأقل حكمة وحُسن تصرُّف منك ، وإنها المفرُوض تركع ليك وتؤدي ليك فروض الولاء ليل نهار ، وإنك لازم تكون بالنسبة ليها نِصف إله ، دا ما بجيب غير التسلُّط والإفتراء وسوء المُعاملة ، كتير جِداً من النساء أحكم وأحسن تصرُّفاً من رجالُم..

- ما تتزوج لمجرّد إنك عايز تجيب عِيَال قبل ما تكبّر ، إنت كدا بتستأجر رحم مُش بتعاشِر بني آدمة.

- ما تتزوّج وفي مخيلتك صورة -شهريار- القاعِد على ريش النِّعام بيتفرَّج على التلفزيون ومرتُو مهرُودة في المطبخ والمواعِين والغسيل والنضافَة والعَيال طول النهار ، ودايرها آخر الليل تتحوّل إلى غانِية مُحترِفة توفّر ليك كل وسائل المُتعة!!

- ما تتزوّج لمجرد إنو فلانة عجبَك جسمها ، وفلانة عجبَك شكلها ، وفلانة تقاسيمها حلوَة وخسارَة تضيع منّك ؛ ما تبقى عامل زي الصيّاد النرجسي الأناني البيصطاد الفريسَة اللي تعجبه ، وبعد ما يمتلكهَا .. يموِّتها ويدوّر على غيرها!

- ما تتزوج وبعدين تحس إنك إتخطفتَ بدري ، وإنك لسه ما عشت شبَابك ، وإنو مرتَك مش كفاية .. فتفتح الإشارة الخضراء لكل المُعجبات وبنات عائلات محترمات وتقول :
"أنا راجِل ومن حقي أعمل الأنا عايزو!"


#وإنتي_كمان!
- ما تتزوّجي لمجرّد إنك عاوزة تلبسي فستان العرِس بغض النظر عن الشخص الواقف جمبِك ، إنتِ كدا بتتزوجي هيكل بشرِي خارجي ، ممكن تتفاجئي باللي جُواه بعد كدا.

- ما تتزوجي لمجرّد إنِّك عايزة تطلعي من بيت أهلِك ، وتحسّي بحريتِك وتشمِي هواء ، إختاري إنتِ ماشة وين ومع منُو أول!

- ما تتزوٌجي لمجرّد إنو معظم صاحباتَك عرّسن وشكلك قدامهم بقى بيش ونظراتهُم ليك بقت عاملة كيف وشنو ما بعرِف!! ، بعد عشرَة سنين نُصهم غالباً حيكُون إتطلّق أو إتزوجوا عليهم

- ما تتزوّجي لمجرّد إنو سنِّك كبِر ، وأهلِك بدوا يقلقوا وقطر الزواج الحيفُوت والمجتمَع الضاغَط ، ماف زول من ديل حينفعِك وإنتِ دمعتِك على خدّك جارية كل ليلة نتيجة لسوء الإختيار!

- ما تتزوّجي وإنتِ متصوّرة إنو راجلك هو المُخلِص والمُنقِذ ومحقق الأحلام! ، أحلامِك إنتِ البتصنعيهَا .. وإنتِ البتجري وراها .. وإنتِ البتحققيها ، هُوَ بس رفيق في الرِّحلة.


- ما تتزوّجي وإنتِ ناوية تتنازَلي عن أي حاجَة أو تضحِّي بأي حاجة أو تدفعي أي تمن ، ما تصدِّقي البقُول ليك الحباة الزوجِية تنازُل وتضحيَة (اللي بترسى على المرا في النّهاية) ، الحياة الزوجية مشاركَة ومسؤولية ، والفرِق بين التنازُل والمشاركة كبِير ، وبين التضحية والمسؤولية أكبَر.

- ما تتزوّجي واحد ناوي يفصِّلِك على مقاسه ، حيطبقِّك ويطفيك ويدفنِك وإنتِ حيّه ، المتقبِّلِك زي ما إنتِ أهلاً وسهلاً ، العاوِز مواصفات تانية يدوّر عليها في واحدة تانية.

_ وفي نفس الوقت ، ما تتزوجي واحد فيهو حاجات ما عاجباكِ وتقولِي حـ أغيره بعد الزواج ، نحنا ما بنتزوّج عشان نغيِّر بعَض أو نعالِج بعَض أو نربِّي بعَض!!


- ما تتزوجِي واحد تفتشي فيه على (أب) ، دا أكبر ظُلم بتظلميه لنفسِك ولزوجِك ، إنتِ كدا حتمّليهو فوق طاقتو وحتطلبِي منو حاجات مش بتاعتو وحتلبسيهو دور ما دورو ، ولما ما يقدّر يلعب الدور دا حتطلّعي عينو وعين اللي خلّفوه!

_ وطبعاً ما تتزوّجي على واحد بيفتش على (أُم) تتبنّاه مش زوجة تعيش معاه ، العايز خدّامة يفتش على خدامة ، العاوز مربِية يفتش على مربية ، والعاوِز شريكة حياة أهلاً وسهلاً.


وبالمناسبَة..
أقل من (شرِيكة حياة) ما ينفَع ، شريكَة في القرارات ، في المسؤوليات ، بأعمال البيت ، بتربية الأطفَال ؛ شراكَة تامّة ، ندِّية مُطلقَة ، تكافؤ ومساواة لأقصَى درجَة.

لكل المتزوجِين ، واللي عايزين يتزوجوا..
الزواج علاقَة إنسانية بين اتنين قرّروا يحيوا (ما بَس يعيشُوا) مع بعَض ، يكبرُوا مع بعض ، يفرحوا مع بعض ، يتألموا مع بعض.

الزّواج مُحتاج وعِي ومحتاج مسؤولية ، ما شِراء وبِيع ونكتشِف بعض بعد ما يتقفِل علينا الباب!
إتزوجُوا وقت ما تحسُّوا إنو دا الوقت المُناسِب بغض النظر عن السِن والعُمر والرقم..
إتزوجوا وقت ما تلاقُوا الشخص المُناسب ، المناااسب .. المناااااااااسب
إتزوجوا وإنتوا ناويين تحترموا بعَض ، وتساعدوا بعَض ، وتسمحوا لبعَض بالحياة .. مُش بالمُوت.

إتزوجُوا وإنتوا قابلين إحتمالات الطلاق عشان تتحرّروا من العبُودية لبعَض ، والذل لبعَض وتحمُّل الإساءة والمهانة خوفاً من الإنفصال أو الوحدة
غير كِدا .. ما تزوجوا.!!!


#مريم_الشيخ ♥
@theorkeed

في مرحلة ما نتحسس فيها قلوبنا بخفة لننفض عنها أتربة العلاقات المرحلية التي مررنا بها دون وعي منا حينما حملتنا رياح المشاعر لتحلق بنا أجنحة الحب عاليآ بين تلك السحب التي تحمل الشوق في جوفها حينها أمطرت علينا وأنبتت أحاسيس جميلة خدعنا رونقها وأصابنا الزهول فيها نسينا واقعنا وما نحن عليه حينما نسجنا أحلامنا فتهالكت كبيت العنكبوت نسينا حين إرتفاعنا أن نكون حذرين من ذلك المرتفع حتي إصتدمت قلوبنا بالأرض فتهشمت وتناثرت القطع وإتخذت كل واحدة منها وجهة والسبيل الوحيد لجمعها هو في يد ذلك الشخص الأبدي الوجود والتي تخلو علاقته معنا من الشوائب الذي تجمعنا به حروف فخمة تتزين بالرضا والقبول عند الله تتجلي في كلمة " حلالي " ليأتي ويحاول أن يلملم شتات تلك القطع ليتوجه بخارطة عينيك ليكتشف وجهات تلك القطع المنعكسة فيهما ويأتي ليضعها بحب ليحفظها ليستودعها عند الله حيث لا تضيع الودائع وحين يبارك الله فيها وتحيطهما السعادة الأبدية والحقيقة الواضحة والوعود الصادقة وحتي ذلك الحين تكون العلاقات هشة وعابرة حتي توثق برابطة " الزواج" ♥ ..
وكما قال رسول الله صلى الله عليه وسلم (لا أري للمتحابان الا الزواج ) ..

#سمراوية

سلسلة:
#مودة_ورحمة❤️

الفصل (2)

{ ومِن آياتَهِ أَن خَلَقَ لَكُم مِن أنفُسِكُم أَزوَاجَاً لِتَسكُنُوا إِلَيها وَجعَل بَينَكُم مَودَّةً ورَحمة إِنٍّ فِي ذَلِكَ لآيَاتٍ لِقَومٍ يَتَفَكَّرُونَ } - سُورة الروم.

-----
قبل ما نبدأ..
من باب التأمُّل بس...
ليي المَودة ، ليي الرَّحمة؟
ليشنُو الصفَتين ديل تحدِيداً..؟!

لأن المودّة أشمَل من الحُب ، مرحلَة من الحُب العادِل ، إن أحببت أكرَمت ، وإن كرِهت لم تَظلُم ، ولأن الرّحمة تشمِل من تعرفهُ ومن لا تعرفهُ ، فكيفَ بِمَن امتزَجت رُوحه معَك وصرتُما قالباً واحِداً ، بالتأكيد سترحم ضعفه أكثر ، وتعطِف عليه أكثَر ، وهذا هو قِمة الحُب❤️

من خلال السّلسلة دِي حنسلِّط الضوء على الزوَاج من طق طق للسّلامُ عليكم ، حنتكلّم بالسهلَ البسيط ، بالواضِح الما فاضِح😄 ، إعتبرُوها رحلَة ، وكأننا بالضّبط متابعِين حياة زول/زولة عايِز يعرِّس وبدأ يفكِّر في الموضُوع دا ، تحت ظِل الشريعَة الإسلامية وبطريقة مبسّطة جداً وواضحة حنتناوَل المحاوِر دي ، وحتتفاجئوا بكمية المعلومَات الكانت فايتَة عليكم حول الموضُوع دا :

● المحاوِر كالآتي :
- السؤال الأزلِي : عايِز تعرِّس ليشنو؟
- رحلَة البحث عن الشّرِيك المُناسِب
- الرؤيَة الشرعيَة
- الخطُوبة
- تجهيزَات الزواج
- العَقِد
- ليلَة الدُّخلَة
- أول سنَة زواج
- مبرُوك المدام حَامِل
- التَّربِيَة
- بعد 73 سنَة زواج

بوستنَا الليلة :
#عايز_تعرس_ليشنو❓

السؤال الما قاعد يسألوا أي واحد مُقبِل على الزواج ، لأنو الإجابة حتكون روتينية جداً ومبتذَلة ومتداولَة..
بس حقيقي الواحد لازم يسأل نفسو السؤال دا ويجيب عليهو بشكل عمِيق حبه..
مولّانا أحمد بَدُر -وهو مأذون وإستشارِي في العلاقات الأُسَرية- قال فِي كتابه "#يوميات_مأذُون" :

"أحياناً كنت بسأل واحد من الزوجِين وقت كتابَة العقد بسؤال مُفاجِئ "إنتَ عايز تتجوّز ليه؟" ، فبيصمُت أو يضحَك ضحكة خفيفة بخجَل كدا ويقول لِي : مش عارِف!!!
فهلّا علمتَ لماذا ستتزوّج؟ ، فالزواج بدُون نِية كتصوُّف بدون عُزلَة وكصلاة بلا خَوف وبلا حُب لا أجر فيها
بعضهُم كان برُد عليَّ وبيقول :
عشان ألقى إجابة لبعض الأسئلة السّخيفة : زَي (إمتى حنفرَح بيك بقى؟)
ومثل هذَا يتزوج ويفشَل ثم يحزن ويحزنهُم.

وبعضهُم يتزوّج مجرد عادة الحيَاة ، زي ما أمه وأبوه وكل البيعرفهُم كدا ، أو علشَان يهرُب من شبَح العنُوسَة "والبُورَة إن صحّ التعبِير" ، ويلحَق بالرَكب في قطار الزواج عشان ما يفوتُو"
مولّانا أحمد بدُر -المأذون- بيواصِل وبيقول :
"لئن يفُوتَك القِطار خيرٌ لكَ من أن يدهسَك فيما بَعد ، أو تركبه غَصباً عنك وتضطرّ للنزُول منه في منتصَف الطريق لأنه حينها سيكونُ الحملُ ثقيلاً والإلتزامَات أثقَل. "

فعلاً يا جماعَة تشبِيه الزواج بإنه قِطار دا أسخف تشبيه مرّ عليّ في حياتِي ، وفرَضاً إنو قِطار .. فـ ماف أي مُبرِّر يخليِك تستعجَل وتركَب فيهو ، لأنو الإستعجَال عاقبتو معروفَة وهي "الندَم" ، بإستعجالَك قد تركَب مع الزُول الغلَط ، ودا بيعني شئ واحِد إنك حتضطرّ للنزول في أقرَب محطّة زي ما ذكَر مولانَا فوقر!!

عشان كِدا يا ريت نآخد موضُوع الزواج دَا بجدية أكبَر ، وبمفهُوم أوسع وأعمق من فكرَة القطار البايخَة دِي.

بيواصِل مولانا وبيقُول :
"علشان كدا لازم تعرفِي إنتِ عايزة شنو من الزواج عشان تبقِي أم صالحة ، وتعرفِي كيف تبقَي زوجة كافيَة تملِك شغاف قلب زوجهَا -جسدياً ونفسِياً- وتحافظ على بيتها ، وعشان إنتَ كمان تعرِف كيف تكُون أب صالِح وزوج مميّز يتحمّل مسؤولية بِيت وأُسرَة.

لازم نيَّه صالحة قبل أي عمل من أعمال الدُنيا ، واللي حتتحوّل بيها العَادة لعِبادة ، ويتحوّل بيهَا الزواج من مُجرّّد شئ روتيني لعمَل عظِيم يرضِي ربِنَا"

● وبالتالِي #النوايَا الأسلَم للزواج هي :

- طاعَة لله ولرسوله ، وامتثالاً لأوامره ، ولأنه سُنَّة الأنبياء
- حِصناً للنفس وطلبَاً للعِفّة من الوقُوع في الحرام.
- بناء بيت صالِح وسَعيد ، يرضِي ربنَا ويرضِي شريكتك في الحيَاة.
- لتحصيل الإعانَة والسَّند على أمور الدِين والدُنيا ، ففي الحديث :
" من رزَقه الله امرأة صالِحةً فقد أعانهُ على شِطر دينه ، فليتقِ الله في الشِطر الآخر"
-الشِّطر =النِّصف.

- طلباً للذُرية الصالِحة التي تعبُد الله وتساهِم في المقصَد الأعظَم من وجُود البَشرية ، وهو عمارَة الأرض والإستخلاف فيها .. وذلك بالتنشِئة القوِيمة والتربيَة الصالحة

وبيختِم مولّانا أحمد بدُر مقاله قائلاً :
"قبل أن تبحَث عن إكتِمَال نِصف دينَك بالزَّواج ، تأكّد أن نِصفه الأول مَوجُود"🌼


● خلاص بعد كدا زُولنا دا/زولتنا دِي حسّ إنو دا الوقت المناسِب لإنو يفكرّ في موضوع الزواج ، وعرف ليي هو عايزَ يتزوّج ، ووجدّد النية في جُواه..

- الخطوَة الجايَة حتكون :
حـ أتزوّج منُو؟
ودا اللي بيدخّلنا على طول في المحوَر التاني :
(رحلة البَحث عن الشرِيك المناسب) ودي النقطة الحـنتناولها في البوست الجاي.


#ملاحظة :
معظَم النقَاط الوردت هنا هِي مذكورة -بتصرُّف- من كتاب يوميات مأذون لأحمد بدر ، وحنصحب معانا الكتاب دا في رحلتنَا إن شاء الله ، جزاه الله عنا كُل خِير.


#مريم_الشيخ ♥
@theorkeed

اللهم صلِّي وسلِّم وبارك على سيدنا محمد عدد ما ذكره الذاكرون وصلي وسلم وبارك على سيدنا محمد عدد ما غفل عن ذكره الغافلون 🌸♥️

بالنِسبة للناسَ البتقول في بيُوت بتكون كلها طاقاتَ سلبية ...
والجو مُعكر وماف ولا شوية إيجابية بتلقي الكل عفريتو قايم ومنترفز وزهجان ماف زول عندو خلق للتاني ☹ أنو ماف بيت طاقتو إيجابية وواحد سلبي ...

أنما في بيوت حفتها الملائكة وذكر فيها أسم الله وعُمرت بالقراءن 💜
يعني بتلقاء في الوقت كلو صوت التلاوات فالنبي في حديث قال رسول الله "صلى الله عليه وآله"
إجعلوا لبيوتكم نصيباً من القرآن ، فإِن البيت إِذا قرىءَ فيه القرآن يستع على أَهله وكثر خيره ، وكان سكانه في زيادة ، وإِذا لم يقرأ فيه القرآن ضُيِّق على أَهله ، وقلَّ خيره ، وكان سكانه في نقصان"♥ يعني فضل عظيم ونعمة كبيرة بتحفكم ...

وكما قال رسول الله "صلى الله عليه وآله"
" نَوّروا بيوتكم بتلاوة القرآن ولا تتخذوها قبوراً كما فعلت الهيود والنصارى ، صَلُّوا في الكنائس والبِيَع ، وعطَّلوا بيوتهم ، فإِن البيت إِذ أَكثر فيه تلاوة القرآن كثر خيره واتسع أَهله ، وأَضاءَ لاَهل السماءِ كما تضىءُ نجوم السماءِ لاَهل الدنيا" شعور حلو شديد تلقاء البيت منور وتعلوه أصوات الطمأنينة دي 🌼

كثرة ذكُر الله في البيوتِ و قراءة القرآن وسورة البقرة خاصة من أسباب البركة والسْكينَة والطمأنينَة، والعكس بالعكس، كما جاء في الحديث عنه صلى الله عليه وسلم: "مثل البيت الذي يذكر الله فيه والبيت الذي لا يذكر الله فيه مثل الحي والميت" رواه مسلم...

...
أما بيوت تاني فحلَّت فيها الشياطين وباتَت فيها و الناس الفيها هجرو القراءن ودي الملائكة ما بتدخلها وبكون في نُفور وكُره مافيها بركَة وقال أبو هريرة رضي الله عنه: "إن البيت ليتسع على أهله، وتحضره الملائكة، وتهجره الشياطين، ويكثر خيره : أن يقرأ فيه القرآن. وإن البيت ليضيق على أهله، وتهجره الملائكة، وتحضره الشياطين، ويقل خيره : ألا يقرأ فيه القرآن"..
يعني أي حاجة ما في محلها راجعها شوف نفسَك مقصر في شنو خلي منزلكَ عامِر بذكر الله عشان تحِس بي سعادة وأنت بالقرب من ربنا وتطمئن كما في قوله تعالى: " أَلَا بِذِكْرِ اللَّهِ تَطْمَئِنُّ الْقُلُوبُ "♥
وربنا يعينا علي الطاعات وتلاوة القرآن ...
ورجاء حاولو بِقدر الإمكان ما تَخلو المصاحف تُهجر كما قال تعالي " وَقَالَ الرَّسُولُ يَا رَبِّ إِنَّ قَوْمِي اتَّخَذُوا هَذَا الْقُرْآنَ مَهْجُورًا}

أنت بتحب ربنا صح عشَان كدا لاذم تتقرب ليهو لاذم تَخلي القرآن جزء وأولوية في حياتك لاذم تستفتح يومك ولو بي آية ماتنسي أنو ليهو فضل عظيم قال تعالي: " إِنَّ هَذَا الْقُرْآنَ يِهْدِي لِلَّتِي هِيَ أَقْوَمُ وَيُبَشِّرُ الْمُؤْمِنِينَ الَّذِينَ يَعْمَلُونَ الصَّالِحَاتِ أَنَّ لَهُمْ أَجْرًا كَبِيرًا " أتخيل الهداية دي والرحمة الحتلقاها ...
يعني وأنت في عز ضيِقك لو قريت أية بس حتحسَ بي راحَة كدا ما عادية حتنسي اي شي كان زاعجك حيطلع بيك من الضلالة حينَور عليك طريقك قال سبحانه: " كِتَابٌ أَنزَلْنَاهُ إِلَيْكَ لِتُخْرِجَ النَّاسَ مِنَ الظُّلُمَاتِ إِلَى النُّورِ بِإِذْنِ رَبِّهِمْ إِلَى صِرَاطِ الْعَزِيزِ الْحَمِيدِ"♥

ماتنسي أنو الأصل البنرجع ليه، وينَبوع بتتفجر منو عُيون الإيمان وبرد اليقين في دواخلك ..
هو لذة لعيون المتبدرين ، وملاذ لقلوب المنكسرين،♥
دا الجبر الحقيقي البتلقاهو قدامك
وياسلام عليك لو بقيت بتتلوه وبترتل في القراة دي شي عظيم وممكن يرفعك لأعلي المراتب كما جاء في حديث عبد اللَّه بن عمرو -رضي الله عنه- قال: قال رسول اللَّه -ﷺ-: " يُقَالُ لِصَاحِبِ الْقُرْآنِ: اقْرَأْ، وَارْتَقِ، وَرَتِّلْ كَمَا كُنْتَ تُرَتِّلُ فِي الدُّنْيَا؛ فَإِنَّ مَنْزِلَكَ عِنْدَ آخِرِ آيَةٍ تَقْرَؤُهَا" 😍
شفتو العظمة دي لا والأحلي من كدا كمية الأجر والحسنات البتزيد ونحنا بقراهو فعن ابن مسعود -رضي الله عنه- أن رسول الله -ﷺ- قال: " ومن قرأ حرفًا من كتاب الله فله به حسنة، والحسنة بعشر أمثالها، لا أقول: ألف لام ميم حرف، ولكن ألف حرف، ولام حرف، وميم حرف" اتخيل بس الحرف الواحد يكون فيهو كم حسنة لا وبتتضاعف كمان ياخ نحنا في أعظم النعم المفروض نتمسك بيها وربنا يجعلنا من المتدبرين والحافظين لكتابه عز وجل♥

فيلا أنا وأنت كلنا خلونا نرسل ولو " أية " ونملا البوست دا بي طاقة بركة وخير ...
نخلي حب القرآن يتفجر والحسنات تتضاعف وماتنسو تشاركو البوست عشان تتضاعف أكتر ونشوف منو الحيقدر يملا صحيفتو اليوم بالحسنات وكل ما يكتر شيرك بتضاعف خيرك ...

#حتي_لا_يهجر_القرآن♥

#سمراوية

ذي ما ٲنت في حياتك اليومية ما بتقدر تتخلي عن " الطقة " كمان حاول تخلي القرآن دا جزء من يومك ..

ماتخلي حظّك من القرآن كل يوم
ففيهِ البركة والتوفيق ياخ وكمية من الٲجر ♥

حتي لو ما كنت ممّن : "يتلونه حقَّ تلاوته "😍

فعلى الأقل خليك جزء من : " فاقرءوا ما تيسّر منه "🙂

ولو ما قدرتا تكون َ لا دا لا داك ع الٲقل خليك من : "فاستمعوا له وأنصتوا🌸

وخليك متزكر ٲنهم طريقين يا ٲما تكون من : " فاذكرونيّ أذكركم " من الذاكرين لله وربنا بيذكرهم بين الملا۽ وبيسهل عليهم كل ٲمورهم 🙌..
ٲو من الذين : " نسوا آلله فنسيهم " وٲكيد ماف زول نفسو يكون منسي فٳتمسك بالقرآن دا ..



#حتي_لا_يهجر_القرآن💜


#سمراوية