نهاية الصَبر جبُر وكلمة الحمُدلله البنقولها طوالي ونحنا في رضي عن حالنا عند ربنا كتيرة وليها مقابل عظيم ..💜

" فالحمد لله" ، كلمةٌ من أحسن الكلمات التي تُعمر بها الجَنان، وينطق بها اللسان، وتسمعها الأذنان، وتخطُّها للحقِّ البَنان🌸

و"الحمد لله" من أطيب ما تعطرت بلفظه الأفواه، واستراحت بها النفوس، وكثرت به الأجور، وارتفعت به المنزلة عند الله رب العالمين 🙌🌸

و"الحمد لله" عبارة بتحمل جواها كمية من بالشكر للنعم ، اللي ربنا ٲكرمنا بيها ...

و"الحمد لله" بتعبر عن صبر النفوس وعلي قدر رضاها بالٲقدار خيرها ٲو شرها وعلي يقين، بأنو ربنا سبحانه و تعالى عليم حكيم، مابينزل على عبده المؤمن إلا ما وافق حكمته وعلمه ورحمته، وكان رحيم علينا💚

إن" الحمد الله" كلمة بتختصر كل معاني الشكر والثناء والتعظيم والصبر ...
وعلي قدر ما هي جميلة لمن تطلع من قلب صابر ولسان ذاكر وعبدآ لله شاكر وما ٲجملها وهي حقيقة قلبية مامجرد كلمة تتقال باللسان ..🎈


و" الحمد لله" هي أول الكلام ونهايته ، وأول الخلق وخاتمته، ربنا بقول في الٲية : " الْحَمْدُ لِلَّهِ الَّذِي خَلَقَ السَّمَاوَاتِ وَالْأَرْضَ وَجَعَلَ الظُّلُمَاتِ وَالنُّورَ ثُمَّ الَّذِينَ كَفَرُوا بِرَبِّهِمْ يَعْدِلُونَ " ..💜

وبرضو في قوله : " وَقُضِيَ بَيْنَهُمْ بِالْحَقِّ وَقِيلَ الْحَمْدُ لِلَّهِ رَبِّ الْعَالَمِينَ " وأول سورة في ترتيب المصحف اللي هي الفاتحة أفتتحت بالحمد ..💚


فلاذم نحمد ربنا علي جميع الأحوال ، في الفرح والحزن ، أو الألم فنحنا بنحمد ؛ لأنو كل الحصل مقدر ومكتوب من ربنا ...
لانو دا فيها خير لينا كمان فعن عائشة رضي الله عنها قالت: كان رسول الله صلى الله عليه وسلم إذا رأى ما يحب قال: " الحمد لله الذي بنعمته تتم الصالحات، وإذا رأى ما يكره قال: الحمد لله على كل حال" ودا من حسن الظن بالله تعالى، وأنه ربنا ما بجيب مكروه الأ لي خير بيعلمه وعايزو لينا فرب الخير لا يأتي الأ بالخير ..😌


و" الحمد لله" من الأعمال الصالحة البفضل أجرها وبتكون منجية لينا من عذاب النار الرسول عليه الصلاة والسلام قال : "خذوا جُنتكم من النار قولوا: سبحان الله، والحمد لله، ولا إله إلا الله، والله أكبر؛ فإنهن يأتين يوم القيامة مقدِّمات، ومعقِّبات، ومجنِّبات وهن الباقيات الصالحات" 💜


و" الحمد لله " سبب عشان ننال رضي ربنا لمن بنقولا في كل😁 تفاصيل حياتنا أكل شراب وغيرو فذي ما قال الرسول عليه الصلاة والسلام: " إن الله ليرضى عن العبد أن يأكل الأكلة فيحمده عليها أو يشرب الشربة فيحمده عليها" ياخ اتخيل انو ربنا يكون راضي عنك هل في شي اعظم من كدااااااا هل في فرضا الله غاية تدرك يخوانا😭💙
وما كدا بس لاالحمدلله دي كل ما تكتر منها بتنفعك في حياتك وفي ٲخرتك بالجد كدا كما قال رسول الله صلى الله عليه وسلم: "أفضل عباد الله تعالى يوم القيامة الحمَّادون" يا سلام نكون من ٲفضل العباد بعدين ونكون قريبيم لي ربنا.. 🥺

و" الحمد لله" مع الإيمان سبب لي دخول الجنة ، كما قال رسول الله صلى الله عليه وسلم: " لقيت إبراهيم ليلة أسري بي فقال :يا محمد أقرئ أمتك مني السلام، وأخبرهم أن الجنة طيبة التربة، عذبة الماء، وأنها قيعان، وأن غراسها سبحان الله، والحمد لله، ولا إله إلا الله، والله أكبر " 😍واتخيل ونحنا بعدين في الجنة بتكون ٲخر دعواتنا وشكر لي رب العالمين وبتكون كانو جزء مننا قال تعالى: "دَعْوَاهُمْ فِيهَا سُبْحَانَكَ اللَّهُمَّ وَتَحِيَّتُهُمْ فِيهَا سَلامٌ وَآخِرُ دَعْوَاهُمْ أَنِ الْحَمْدُ لِلَّهِ رَبِّ الْعَالَمِينَ " ...🙌🌼
برضو قال رسول الله صلى الله عليه وسلم: " إن أهل الجنة ... يلهمون التسبيح والتحميد كما يُلهمون النفس" سبحان الله علي قدر ما هي كلمة بسيطة علي قدر ما انو في وراها كمية من الٲجر والبركة والخير 🌝

وفيها كمية من الرضا والصبر لانو نحنا بنقولا علي طول واتخيل نحنا بناخد عليها اجر قدر شنو وحتي من غير ما نعرف.. 🙁

فعليكم الله حافظو عليها وٲنت منفسن زهجان متضايق وٲمورك جايطة قول " الحمدلله" 🙂

مبسوط وطاير ع الٲخر وحياتك ماشة فلة برضو قول " الحمدلله" وخليها صادقة وطالعة من جواك ياخ 🖤💭


غايتو البوست دا كلو مابوفي حق الكلمة دي فاللهم 😌ماتتردد ولا لحظة خليها علي طول وسط كلامك ونستك اي تفصيل في حياتك ...

وماتنسوا ذكرو ٲحبابكم وضمئنوهم بيها اااااي ياخ دي ذي الدوا۽ بالنسبة لينا ودقيقة ماش وين كدا اجدع كم حمد هناااا عشان تتقل بيها صحيفتك يا اخونا وبارك الله فيك والحمدلله دائمآ وٲبدا والحمدلله رب العالمين والحمد لله ٳلا ٲن يبلغ الحمد منتهاه 💛


#لله_الحمد_لنا_الٲجر❣



#سمراوية

سلسلة:

#مودة_ورحمة❤️

الفصل (3)



● في البُوست دا حنتكّلم عن أهمَّ مِحوَر واللي بتتبنِي عليه قرارات كتيرة في حياتنَا ، وهو رحلَة إختيار الشريك المُناسب ، رحلَة البحث عن النُص التانِي ، تؤام الرُوح..!


سميتهَا رحلَة لأنها بالجد رِحلة ، الواحد من يفهَم معنى الحب ويبدأ يحسّ بيه بتبدأ الرحلة دي ، بيقُودك فيها ضميرَك وأخلاقك ومبادئك في الحيَاة..

الحُب ما عِيب ولا جريمَة ، بل بيتحوَّل لكل دا لمن ننداح ونوجِّه الشعور النقِي دا لسكّة ما ياها، في مقُولة مشهورة لسلمَان العودة بيقُول فيها :

(لا يُمكن القُول بأنَّ الحُب حرامٌ أو حلال ، لأنهُ أمر فِطرِي يقَع على الإنسان بغير إختيارَه ، ولكنَّ التحرِيم يقع في التصرُّف الذي يُبنَى على الإحساس بِه).


والحافِظ الحنفِي -رحِمه الله- في كتابه [الواضِح المبين في ذِكر من استشهدَ من المُحبِين] بيقُول :

"وقَد أجمعَ العُلماء أنَّ الحب ليسَ بمُستنكَر في التنزِيل ، ولا بمحظُورٍ في الشَّرع. "

وبالتالِي :
_ الحُب في حد ذاتهُ شعُور فطري وسلِيم ، بس المشكلَّة وين؟
زي ما بقول اليوتيوبَر معاذ عُثمان😂 (الأزِمة مكانا وين؟ وين؟ ويين؟) ..
_المشكلَّة في إنو حتوجِّه حُبك دا كيف! ، حتمشيهُو بما يرضِي ربنَا ولا حتمشيهُو بما تهوى نفسَك!!؟

على الأغلب إنت بتحِب زول لمن تلقَى فيهو صِفات كتيرَة كنت بتتمنَّاها وبتفتِش ليها في شريِك حياتك.

كل زُول عندو مقاييِس ومعايير بتختلِف عن التانِي -ودا حق مشرُوع ليك بلا شَك- بس ما تكون/تكوني أوفر شدِيد عشان الكمَال لله يااخوانَا تمام؟!

● المهُم حسبمَا ورَد في كتاب مذكرات مأذون لأحمد بدر -بس حوّلتها ليكم بلهجتنَا- ، فالمقاييِس المتعارَف عليها للإختيار كالتالِي :-

• مقياس قَلبِي🌸 :
يعنِي يكون -على الأقل- بيناتكُم تعاطُف وتجاذُب نفسي متبادَل ، وتناسُب في الميول والطِباع وتقبُّل للعيوب.


• مقاييس عامَة🌸 :
زي وجود -على الأقل- إتفاق على القيَم الأخلاقية الأساسية المتعارَف عليها بين الناس -ديناً وعُرفاً- ، وعلى الأقل وجود إتفاق على الأهداف المشتركة بيناتكُم


• مقاييس خارجية في الإختيار🌸 :
- الناحية الجسدية زي :
الطول ، الوزِن ، الشكِل...إلخ


- التناسُب العلمِي زي🌸 :
مستوى الدراسة ، الثقافة والإطّلاع..إلخ


- المستوى الإجتماعِي والإمكانيات الإقتصادية 🌸:
البيئة الإجتماعية المحيطة العاش فيها ، ومدى قدرتهُ على تكوين البيت والنفقَة.

قرارَك النهائي تجاه الزول/الزولة الإنت بتفتشّ عنو بيجي نتيجَة المحصّلة النهائية للمعايير والمقاييِس الذكرناها دِي.


● دي مجموعَة لطيفة ظريفَة من النصائِح المتفرِّقة لخَّصتها ليكم من كتاب المأذون شخصياً مولانا أحمد بدُر ، يحبَّذ إننا نآخُدها في الحُسبان في رحلَة البحث عن الشَّريك -ولو كان الشرِيك في بالَك وما محتاج بَحث برضُو أقراها😂- المهُم :

• إختيار الشرِيك بداية لمرحلة طويلة من الإكتشاف المُستمِر لشخصيَة الآخر ، الإختيار نُقطة على خط الحياة الزوجِية والإختيار دا توفِيق من ربنَا ، ومن أعظم ما يتفضَّل به الله على عبده إنو يرزقو زوجة صالحَة ، في حدِيث النبِي ﷺ: (الدُّنيا متاع ، وخير متاع الدُنيا الزوجة الصَّالحة) ؛ حنرجَع لنقطة الزوجة الصالحة دي تانِي..

• إنتَ الحتتزوَّج ، فإياك تركن لإختيار زُول من غير البحث والتدقِيق عنو ، إستشير وأي حاجة بس ما تسمَح لزُول يتدخَّل في إختياراتَك.

• خير ما نبدأ بيه هو وصيَّة النبَي ﷺ في حديثو :
(تُنكَح المرأة لأربَع : لمالِها ، ولحسَبِها ، ولجمَالِها ولدِينها ؛ فاظفَر بذات الدِّين ترِبَت يداك) .

الدين لازم يكُون أول مواصفاتك ، صاحب الدِّين لو أحبَّها أكرمها ، ولو كرِهها لم يظلُمها ، وما قصدِي هنا الدين المظهَر أو اللحية الطويلَة والنِّقاب -مع أهميتهم طبعاً- ما تنخدعوا بالمظاهِر فكم من صاحِب لِحية والدين برئ منه ، وكم مِن ملتزمة ظاهرياً وقلبها قلب بغِي ؛ وإنما أقصُد الدين المُعاملة ، من يعاملِك بالشرع ويتقي الله فيكِ ويختو بينِك وبينو في كل صغيرة وكبيرَة ، إختاروا أصحاب الدين الليهُم مرجِع في حياتهم وبخافوا ربنَا وعندهُم بقايا تقوى ، إختاروا الناس البتخاف ربنَا يسألهم عن وجَع قلوبكُم.

- وعلى ذِكر المظاهر إحذر من إختيارات مواقِع التواصُل الإجتماعي ، لأنها ما المكان المُناسب عشان تعرِف الزول على حقيقتو ، ومهمَا وضّح ليك من ميزات فدا الجانِب الإختار هوَ يوريك ليهو

• ما ترتبِط -ترتبط هنا دي بمعنى تتزوج يخوانا ما الإرتباط بتاع الجامعات دا- إلا بمَن يجتمِع عليه عقلك وقلبَك ، فلا تقبل بمن يأباه عقلَك ولا يتحرَّك له قلبك ، وإنما سدِّد وقارِب ثم استخِر واستشِر..

ماف حاجة اسمها عانِس ما تخلوا المجتمَع يوهمكُم بالكلمة دِي ، في حاجة اسمها لسّه ما قابلت الإنسان المُناسِب ، اللي ينفع أكمِّل معاه حياتِي ويكون قدوة لأولادي ، لمن ألاقيه حنتزوَّج ولو عمرنَا 50 سنة❤️.

• زي ما قلنا الكمال لله ، لما تيجي تختار ما تعذِّب نفسك في البحث عن زول كامِل ، الكمال إندفن يوم دفنوا النبي ﷺ ، فكلنا مليانين عيوب ، وكل واحد منكُم بيكمِّل الحته الناقصة في التانِي ، فلازم تحكِّم عقلك وما تنجرّ مع تيار العاطِفة ، وبلاش تبُص بعين قلبَك دايماً..
" لأن مراية الحُب عمياء "
و " عين المُحِب عن كل عيبٍ راضية. "

إنت بس إختار أكتر زول عيوبو ينفع تمشِي مع عيوبك "البتقدَّر تتحملها".
والأهم أعرف نفسك عشان تكون متوازِن في شروطَك ، خليك واقعِي في الصفات البتخُتها لأنك حتختار إنسان ما ملاك زيو وزيك -واقعِية الصفات بتجنِّبك الإصطدام لو إتعمقت في التفاصِيل- ، فشوف إنت محتاج شنُو من الزواج ونفسَك يتحقق من خلالو ياتو أهداف وياتو طموحَات ، وبناءً على ذلك إختار اللي بيقدر يحقق الحاجات دِي ليك أو يحققها معَاك.

• إياك تعتقِد إنك حتلقَى الشريك الصالِح بالصُدفة ولا بسبب شهادتَك ووظيفتَك ، حتلقاه بصلَاح قلبَك في جواك ، على قدر عفافَك حتلقى زول عفيف يشبهَك ودا وعد ربِنا (الطيِّباتُ للطيِّبينَ والطيِّبونَ للطَيِّبات....) سورة النُور ؛ صح بعض الزيجَات الزوجين بكونوا مختلفِين عن بعَض أخلاقياً ، بس دا نادِراً ولمن يحصَل بكون لحكمَة قضاها ربنا -رفع درجَات أو تكفير سيئَات-
فأعرفوا بس طول ما إنتوا ماشين شمَال فما حتلاقوا في طريقكُم غير ناس شمال والعكس..
الشِمال دا إسلوب حياة ما صِفَة!


• في صفَات ما ينفع تكون موجُودة ، ولو وجِدَت لازم تآخد خطوة لوراء وتفكِّر حبتين في إنَّك حتتقبلهَا وتتحملها ولالا ، وإلا حينتهِي بيك المطاف لزواج تعِيس ، أبرز الصِفات دي -مذكورة في الكتاب بإسهاب- :

عدم التديُّن ، البُخل ، الخِيانة ، الجُبن ، اللامُبالاة ، اللي ما بيعرِف يحب ، الغير مُسامِح ، الما بيعترِف بغلطه ، الحلّاف بالطلاق ، الكذّاب ، الظنَّان ، المغرور ، الديكتاتور ، الديُوث "الذي لا يغَار على أهله- ، الأناني ، العاق بوالديه.


● بالنسبة لنُقطة الزوجة الصالِحة القلنا حنرجَع ليها ؛ فلازم نعرف إنو الصلاح ما مظهَر بس وإنما معاملَة وإسلوب حياة
- فالزوجة الصالحَة هي البتحفظ مالَك وعرضَك وغيابَك وحضُورَك ، البتعرِف ربنَا ، والعارفة واجباتها نحوَك ، البتكون مطمِّن على نفسك بين إيديها ، معاك في مُنتهى الجمال ومع الغريب عمو جمال😂 ، البتحترِم أهلَك وترحم ضعفَك وتدبِّر بيتَك ، وتبقى سندك وإيدك لو إحتجت لإيد ، وحُضنك لو الدنيا طردَتك ، صابِرَة إذا افتقرَت ، حامِدة إذا أُعطِيَت ، الساتِرة لعيبك ، من تأمنها على قلبَك ونفسَك. ❤️

● أما الزَّوج الصالِح :
هو اللي فاهِم (ما أكرمهُنَّ إلا كريَم وما أهانهُنَّ إلا لئِيم) ، هو اللي فاهِم (واستوصُوا بالنِّساء خيراً) ، هو اللي فاهِم يعني إيه إن النِّبي ﷺ شبَّه النساء بالقوارِير ..
تحسّي معاه بالأمان والسكينَة حتى في عزّ مشَاكله ، هو الكرِيم في فلوسه معاكِ وأخلاقه وإحترامو ليكِ وحبُه وإحتوائه ، ما ملاك ليهو غلطاتو اللي حتضايقِك في أوقات كتير جداً بس حتتجاوزيها بما يرضيكِ ، هو الحيصلحِك بلطفه ورحمته عليكِ مش بعقابه ، هو الفاهِم إن ليك عقل يوزِن بلَد بحالهَا ولازِم يقدِّره ، وهو الفاهِم إن ليك عاطفَة بتغلِب على عقلِك في أوقات كتير ، عاقل ، حسُن الخُلق ، يواظِب على صلاته ويأكل من الحلال
من الآخِر :
هو راجِل وعندو عَقل وشعُور ، واخِد الرسول قُدوة في تعاملاتو قبل شَكله،
وليكُن أولى شروطِك ألا يترُك فرضاً ولا يخالِط ولا يخُون ولا يَكذب وكل ما دون ذلك هيّن..❤️

• وكنصيحَة آخيرة -نقلتها زَي ما هي من كتاب يوميات مأذون ، أقروها بالمصرِي أحلى🙊- :

"الإرتبَاط مش للشخص اللي بيبهرَك بشكله ، كلامه ، والهيصَه اللي حوالِيه ، الجواز لـ اللي يضحي بكلّ حاجة في سبيل راحتَك وأمانك ، علشان كدا قبل ما تحِب حاسِب وفكِّر .. فكِّر تاني وتالِت أحب مِين؟ ، ومين ينفَع أتسنِد علِيه! ، مُشوار الحيَاة طوِيل وما ينفعش تربطو بشَخص لمجرَّد إنو مشهور أو وسِيم أو بيقُول كلام حِلو ، أخد اللي بيتمسّك بيك في كلِ الحالات ، سواءً كُنت رايِق ولا حزِين ، غني ولا فقِير ، في الصَّحة أو في المرَض ، لو الدنيا كلها سابت هو ميسِيبش ، الجّمَال بروح لكِن الأصل باقِي"

● خلاص #زولنا دا/#زولتنا دِي ، كل واحِد فيهم عرِف الصِّفات العايِزها في شريكُو شنو ، ومبدئياً كدا #الزول بدأ يفكِّر في بِت معيَّنة.
#والزولة -ياها البت البفكِّر هو فيها😹- لقَت إنو فيهو معظم الصِفات الكانت بتتمنَّاها

السؤال هو :
س- كيف يتأكِّدوا إنو الصِّفات الشافُوها/الحسُّوها/السِمعِوا بيها في الشرِيك دا .. حقيقية وما مغشُوشَة؟؟؟

الجواب يكمُن فِي الخطوَتين الجايات ديل ، واللي هِمَ :
- الرؤية الشرعية.
- الخِطبَة.


#نتلاقى_في_البوست_الجاي.

#مريم_الشيخ♥

@theorkeed

ذَكَرتْكَ الرُّوحُ حُبَّاً وَعَليْكَ القَلبُ

صَلَّى ﷺ .💜✨

سلسلة:

#مودة_ورحمة❤️

(الفصل 4)


قبل ما تبدو تقرأ صراحة البوست طويل بس ما ح تملوا منو خالص ، وملان كبكبة وجهجهة ، دايرين يشوفُوا بعَض يااخوانا😂😂😂🙊♥️


#الرؤية_الشرعية♥️


شوية الكلمة دِي ما مُتداولَة في بلدنَا ، لكن شائعة أكتر في دُول الخليِج وبعض الدُول العربية ؛ أما في هنا في بلدنا مُمكن نسميهَا #التَّعارُف ، اللي هُو لقاء بتِم فيهو تعارُف بين الطرفِين لأول مرّة -دا لو ما بيعرفُوا بعض مُسبقاً- ، المُهم بيمشِي الزول لبيت ناس الزُولة وبقعُد معاها .. يشوفُوا بعَض ويتعرَّفوا على بعَض شكلاً وموضُوعاً ، وبعدها لو حصَل قبُول بننتقِل للخطوة التانِية اللي هيَ الخطوبَة ، ولو لا .. فما حصلت قِسمَة ويا داَر ما دخلِك شَر

● الأحادِيث والأدلَّة على #أصل_الرؤية_الشرعيَة_في_الشَرع كتيرة ومنَّها أن المُغيرة بن شعبة قال : خطبتُ امرأةً فقال لي رسول الله : (نظرتَ إليها؟) ، فقُلت : لا ، قال : (فانظُر فإنه أحرَى أن يؤدمَ بينكما) رواه مسلم والترمزي والنسائي وابن ماجة والدارمي
فدي رُخصة من النبِي ﷺ للدايِر يخطُب أو يتزوَّج أنو ينظُر ليها وتنظُر ليهو ولا حرجَ عليهما في ذلِك
وهذا ما قرَّره الفقهاء وصرّحوا به ، قال ابن قُدامَة في كتابِه : "المقنِع" :
"ويجوزُ لمن أراد خِطبة امرأة النظَر إلى وجهها من غير خلوةٍ بها"
● عشان ما نطوِّل البوست ، فبخصوص حدُود النظر إلى المخطُوبة (يعني البيجوز ليك تشوفو منها شنو💛) ، وهل يجُوز النظر إليها بغير إذنهَا (يعني مثلاً لو ناوي تخطبها بس ما داير تحرج نفسَك وتمشي بيتهم .. ودا بيجوز في حالات بتلقاها في الرابط دا زي مثلاً ممكن ترسل مرة توصفها ليك أو تتدسّى في مكان وتشوفها وهكذا (الدليل في الرابط) ، وهل يجوز الخلوة بها؟ ؛ دا كلو أنصحكُم تقروا الفتوى دي ، رابط سريع وساهِل:

https://islamqa.info/amp/ar/answers/2572


●طيب بخصوص الرؤية،، حنتناول 3 نقاط متفرعة :-

💛#النقطة_الأولى 📝:
( أعمل شنُو يوم الرؤيَة الشرعيَّة؟؟ )


🌼 أولاً : ما توقِّف إستخارَة من أول ما تعرِف ميعَاد للرؤية لحد اليُوم اللي يأذن فيهو ربنَا باللقاء ، وكرّر الإستخارة وهيئ نفسَك ، وأعرف إنو الخيرة فيما يختاره الله ، ولو ما حصَل نصِيب فربما خيرهَا في غيرهَا

🌼 تانياً : بالنسبَة للشبَاب يُفضَّل إنك تقابل أبوها -أو ولِي أمرهَا- أولاً قبل ما تشوفها ، في مكان بعيد عن البِيت عشان يبقى عندَك تصوُّر بسيط عن البيت الإنتَ داخلُو ، وكمان برضُو لو عايز توريهو بعض الحاجَات الممكِن تتحرِج تقولها قِدام الزولة

🌼 تالتاً : خليك هادئ وما تتوتّر ؛ ما تتصنَّع وخليك على طبيعتَك وسجيتك ، فمن أرادك كما أنت مرحَب بيه وإلا فماف داعِي لإتمام الأمر

🌼 رابِعاً : راعِي التناسُق في لبِسَك ، وأحسِن مظهرَك لأنو حيفرِق معاك (الإنطباع الأول ياااخوانا هو البيدُوم)
وأما بالنسبَة للبِت فراعِي العادات والدِين في لبسِك وما تتكشّفي أو تعصي ربنا عشان الموضُوع يتِم ، فما عند الله لا يُنَال إلا بطاعتهِ

🌼 خامساً : ما فيها حاجة لو شلتَ معاك هديَة بسيطة ظريفَة كدا ، تكون في متناوَل يدّك ولا تتكلّف
-#نكتة :
يا السمحة كان جاب ليكم شوكلاتة ما تأكليها إلا بعد يفوت ، بتخلي المخ يبفرز مادة الدوبامين ، أثبتت العلماء إنو الفأرة لمن تتحقن بالمادة دي بوجود فار بتحبه وبتختارو ولو كان وسط 100 فار ، خليك شاطرة وأكليهو الشوكلاتة هو😂😂😂😂❤

🌼 سادساً : (ودي أنا شايفاها أهمَّ نقطة غايتو لأنها بتجيب المشاكل)😂
من الخطأ حضور ناس كتير يوم الرؤية سواء أقارِب أو أصحاب .. دا بيحرِج الشاب وبيقلّل من فُرصته في التحاوُر معاها
بإختصار : هيي ما تكلِّموا الأقارِب بالموضوع حتّى يتِم ، عشان تتجنَّبوا الحرَج لو ما حصَل توافُق ، وتتجنَّبوا حنك مالو خلاها سريع كدي عيبها شنُو؟ ، ومالو عينُو ما بتتملِي و.....إلخ ، بإختصار لو الموضوع ما تم يكون لا من شاف ولا من درِي
الفهم وصل!

🌼 سابعاً : (دي يقراها أبو الزولة يلا😂)
على ولي أمرها أنو يسقط الحواجز النفسية ويتكلَّم مع زولنا دا ويمهِّد ليهو الطريق ، المهم يعني يفتح معاه مواضيع كدا ويحسسه بالأمان
وعلى الأم والأخت والصاحبة تهيئة البت لإستقبَال مرضوع زي دا ، ويطمنوها كدا ويخففوا من توترهَا


💛 #النقطة_التانية📝 :
(أثناء الرؤية الشرعيَة)

#نصائح_مهمة_حتفرق_معاك!!
شوفي يا زُولة..
خليكِ واثقة من نفسِك ومُتماسكَة ومتوازنَة ومُحافظة على حيائِك
كوني قوية في ضَعف ، ولينَة في حزم ، أدخُلِي بهدُوء وألقِي التحيّة وأقعدي في مكان مُناسِب يسمَح ليك بإنك تشوفيهو ويشوفِك بوضُوح

🌼 إياك تخُتِي مكياج
خليكِ على طبيعتِك .. هو من حقو يشوفِك على طبيعتِك وعشَان توفري على نفسِك حنَك كانت سمحة في الرؤية وبعد عرسنَا بقت حاجة تانية خالص
إختاري فُستان بَسيط وشِيك وألبسي معاه طرحة ساترَة وحتكونِي زي الفُل (يجوز له رُؤية الوجه والكَفين)
يفضّل إنو ما تسلمِي عليهو بإيدِك عشان هو لسه غريب عنّك -ونحن داي

رين نرضِي ربنا ولا إيه-

🌼 وإنتَ يا مان..
قبل ما تعاين ليها أحسِن النية ، وخليها بنيَة الخِطبة والزواج عشان تِثاب على النظرة دِي -ما تلف شمال وتتلذذ بالنظرَة دي لأنو أتيحَت ليك الفرصة- يجوز إنك تتأمل محاسنها من غير تلذذ

🌼 إياكُم والنظرة السَّريعة..
عاينُوا لبعَض كويّس ، دا من المواقِف الـ لو خجِلتو فيها حتدفعُوا التمن غالِي
عاينُوا لبعَض ياااخوانا ماف زُول حيقول إنو دي جَراءة وقِلَة حياء ، بالعكس ناس كتير عملوا فيها خجلانين ولاحقاً لاحظوا تفاصِيل كتيرة في الشرِيك ما كانوا منتبهين ليها -لأنهم ما عاينو كويّس- وإضطروا يبلعوها في حنانهم..

💛 #النُقطة_التالتة الآخيرة والأهم📝:
(• شنو الأسئلة المفرُوض أسئلها في يوم الرؤية الشرعية؟)

🌼 أسأل عن أهدَاف الحياة ، عن الطمُوحات ، وعن مفهُوم الزواج عنده ، عن الصِّفات البيحبهَا في الشرِيك ، عن علاقتُو بوالديه..إلخ أفتحوا مواضِيع زي دي والكلام بجيب الكلام😂
- وإنتِ يا السمحة مهم جداً تسأليهو عن الحاجات الأساسية بالنسبة ليكِ واللي ما حتتنازلِي عن وجودها في شرِيك حياتِك ، وإنت برضُو ، لأنو الحاجة دي هي الحتأثر في قراركم

🌼كـ نصيحِة ليكُم الاتنين :
تجاربك الماضِية مسألَة شخصية ، فاحتفِظ بيها لنفسَك وما تكلِّم بيها زول ، ما مطالَب بالتبرير أو الإعتذَار عنهَّا
يعني ما تسألها كان زول في حياتِك قبل كدا؟ وإنتِ برضُو .. عشان ما تتضطروا تكذبوا على بعَض أو تتكلموا عن حاجات تبتوا عنها بينكم وبين ربنَا..
وما تبدوا حياتكُم ولسه في قلوبكم زول تانِي وتقولوا حينسينا وبتَاع ، أتخلصُوا من الماضِي أول ، بإختصار أبدوا صفحة جديدة

🌼 خليك ذكِي وأفتح معاها مواضِيع للحوار ، هي أصلاً متوترة فما تعديها كلهَا : إنتِ متوترة لشنو!😂
و لو ما محضِّر أسئلة ما مُهِم ، أسألها عن هواياتها ، يومها بتقضيهُو كيف! ، مهاراتهَا في المطبَخ...إلخ حتلاقي الكلام بجُر بعضو وحتعرف كل العايز تعرفو

🌼 حياؤك مُهِم يا بتنَا ، بس بدون مبالغَة لدرجة ما تتكلمِي معاه وتعديها يس ونو .. لمن يسألك ما تجاوبي بكلمة واحدة دا ما سؤال أكمل ولا إمتحان ، أسأليهو برضو بس براحة على هيئة نقَاش ما شغل تحقيقات وبتاع😂 ، دا حيكون شرِيكك في الحياة لازم تعرفيهو كويّس

🌼 لو ما بصلِّي/أو بِتصلِّي شوف السبب شنُو براحة كدا ، ممكن يكُون جواه نضِيف بس محتاج زقَه ، ولو مافي فايدَة ما تقبل بيهو

🌼 وإنتَ يا مان..
ما تبقى طول الوقِت مركِّز عليها كتير ، أديها فُرصة تعاين ليك برضُو ياخ ، لأنو في بنات قضوا وقت الرؤية كلو بدون ما يشوفوا شكل العريس من الخجَل ، البنات دِيل مسكينَات .. راعوهِنًّ شوية ياااخوانَا😂♥️

🌼 لو ما قِدرتوا تقرروا من أول مرّة ، ممكن تحدّدوا مرة تانيَة عشان تقدروا تحددوا رايكم كويّس بعد الإستخارَة طبعاً

●🌼 #نصيحة_آخيرة_مهمة :
ما تسمحِي لأي زول يجبرِك تتزوجِي شخص إنتِ ما عايزاه لمجرّد إنو غني ولا دا ود أهلِك وبتاع .. لأنو في الشريعَة يُحرَّم على ولِي المرأة أن يَجبرهَا على الزَّواج بمن لا ترغَب به ولا ترضَاه لقولِه ﷺ : ( لا تُنكَح البِكرُ ولا السيِّب حتى تُستأذَن) -رواه البخارِي ومسلم-
أها قصرّنا معَاك😂♥️
يلاااا البوست طال ، نتلاقَى في البوست الجاي ، ونلاقِي زولنا وزولتنا دِيل في الخطوبة.
----

ملاحظة :-
جميع النقاط أعلاه منقُولة بتصرُّف من كتاب #يوميات_مأذون لأحمد بدر مع بعض الإضافات💛.


#نتلاقى_في_البوست_الجاي.

#مريم_الشيخ♥

@theorkeed

سورة الكوثر | الشيخ نورين محمد صديق

- حاول كُل فترة رتب حياتك ، سيرها علي نسق مُعين ، علي نهج إنت مُؤمن وفعلاً عايز حياتك تمش عليو ، ما توقف نفسك علي حاجه ، لا على إنسان ولا حتى أحلام وطموحات عاملة ليك هاجس .. ابدأ كل يوم زي كانو يوم جديد ، ابدأهو بي أحلام أكبر ، طموحات جديدة وناس فعلاً تستحق تكون معاك ، خلي كُل شئ سلبي وراك ، هموم ، خُذلان ، إحباط أياً كان ما تتمسك بالتراكُمات السلبيه في حياتك أمضي بحياتك لبر الأمان وما تسمح للهواجس والعقبات بأنها تمنع ذاتك من السُّمو ...💙


#ولاء_صلاح

الحاجة الوحيدة المستمرة واللي ممكن في اي لحظة تتحصل عليها هي " ٳصلاح_النفس" وترمم الفساد العملتو في نفسك بي تصرفاتك..

وٲنك تراجع نفسك وتحاول تصلح منها وتخليها تعمل الحاجات الصاح مهما كان صعب ...

ٲنك تتخذ قرارات صاح في الوقت الصاح وماتفكر تتراجع ٲو تندم 💜


ٲنك ترجع لي ربنا في كل الظروف البتمر بيك وحتلاقي ربنا بطبطب عليك رغم السؤ اللي فيك وقريب ليك شديد 🌸🥺

#سمرية

لاذم في علاقاتنا نعرف مكانتنا كويس في حياة الطرف التاني هل نحن ضمن الأولوية عشان نتعامل معاهو بالمثل أو دون ذلك ..

هل نحن في قاموس الناس المفضلين عندو واللي ما بردنا خايبين ولا بفكر يسفهنا ..

ولا بس نحنا مجرد ناس جمعتنا الظروف بي بعض وتعاملو معانا عادي وعلاقتنا عادية ونحنا عاديين بالنسبة ليهو وماعندنا إي مكانة🙁 ..


لاذم نحنا نعرف مكانتنا هييي شنو بالأول وبعدين نتعامل ع الإساس دا عشان ما نكون خاتين الزول دا في مكانة ونحنا عندو بعيدين كل البعد عنهاوبعدين نسبب لي روحنا الألم ونزعل علي تصرفاتو معانا🐼💔 ..
عشان كدا لاذم يكون عندك مبداء معين في تعاملك مع الناس وعارف مكانتك كويس هي شنو ..

في مبدأ العلاقات ، قالَ الشافعي :
زِنْ من وزنَك بما وزنَك ، وما وزنَك به فَزنهُ ، من جاءَ إليّك فَـ رُح إليّه ، ومن جَفاك فصُد عنهُ ❤😌..

بس كل اللي عليك أنك تاخذ المبداء وتمش بيهو في حياتك عشان تقدر تحميها من اي تصرف او رد فعل يمكن يسبب ليك الأذي فأنت في غني عن الحاجات دي ولاذم تهتم بي نفسك ..🌸


#سمرية

أنت عارف أنك لمن تطبطب ع غيرك ولمن تقضي حوائج غيرك لمن تكون سند ودعم لي زول بالجد محتاج ليك وتطمئنو ربنا يديك طمأنينة أكتر وحتلقي أنت برضو اللي يطبطب عليك في وقت حوجتك..🐥 🎈


عشان كدا أتعلم تساعد غيرك وتكون وش خير عليهم حتي لو بالكلمة الطيبة أو أقلاها إبتسامة وما بتكلفك كتير ..


#سمرية

..
اللهُم صالحاً يخشى أن يئِن قلبي يوماً بسببِه، فيتّقيكَ فيني وإذا دعا قال : اللهُم وهِي معِي .💜

أجمل ما يمكن أن يصل إليه المرء بعد معارك طاحنة وطول مُعاناة، أن يؤمن من داخله أنَّ الله بيده كل شيء، لا يملك البشر لك شيئًا، ولا يستطيعون لك شيئًا، سوى أن ينفذوا إرادة الله، الله وحده هو القادر، وهو الرازق، وبيدِه الأمر، لو شاء الله لقضى لك حاجتك، دون سبب منك، وهو الذي بيدِه ملكوت كل شيء، لكن مشيئته قضت ذلك، وهو الخير لك، وأنت الإنسان المحدود؛ محدود العلم ومحدود البصيرة ومحدود القدرة، لا تعلم ولا ترى أين الخير لك.. ولا نجاة لك وأنت العبد الضعيف إلا أن تعتصم بالله، وتسلم بما يريده لك.

فاعرف لمن تلجأ، ومن ترجو، وبمن تعتصم، وانفض يدك مما سواه، وكن عزيزًا به، وواجه الحياة بعزّة، فإنَّ الأمور تجري بمقادير الله ✨.

"لن تصبح شخصاً عظيماً ذا مكانةٍ وأنت غارقٌ في وَحل العلاقات التافهة وسلسلة النفاقات الاجتماعية والمجاملات؛ حتى ولو ملكْتَ الموهبة، بل كل مواهب العالم مجتمعة!
فظيعةٌ قدرتهم على امتصاص طاقاتك ووقتك في سبيل إحالتك لنسخة بائسة شبيهة بهم.
فاهرب بعقلك ولَملِم شتات طاقاتك قبل إبادتها إلى الأبد"💙

سلسلة:
#مودة_ورحمة❤️

الفصل( ٥)

-البوست طويل نوعاً ما بس حيغنيكُم عن البَحث في الكتُب والمُجلدات والتفاسِير والمَواقِع ، بإختصار دا الزِيت فيما يتعلّق بالخطوبة.


زولنَا وزولتنَا بعد ما شافوا بعَض مبدئياً كدا حصَل بيناتُم توافُق وقبُول ، زولنَا إتشجَّع وفكر يخطبهَا طوالي..

#الخطوبة أو (الخِطبة) :
هي أول خطوة جادّة ، فترة بجهِّزوا فيها المخطوبِين نفسهُم -نفسياً ومادِياً- للزواج ، بيعرفُوا فيها بعَض أكتر وبيختبرُوا صِفات بعض ، عشَان العِشرة بتبيِّن فممكن جداً فترة الخطوبَة تأكد أو تنفِي العرفناه قبلهَا ، المُهم نركّز في إشارات ربنَا لينا في الفترة دِي ، ودا بيتطلّب إنو فترة الخطوبة دي تكون كافية مولانا #المأذون_أحمد_بدر بيقول ليكم :

(مش لازِم تقل عن سنة على الأقل) ، يعني مستحِيل الواحد يكضّب لمدة سنة كاملة مهما كان ربنا حيكشف الحقيقة.

الخطوبة لا تزيد عن كونها تأكيد وتثبيِت ، ولا يترتَب عليها أي حق للخاطِب إلا حجز المخطُوبة بحيث يحظر على غير الخاطِب التقدُّم لها ، يعنِي خطيبِك ما ليهو صلاحيات من نوع : ما تلبسِي كدا ، وما تمشي المكان الفلاني ، وما وما....إلخ بتاتاً.

●في بلدنَا الخطوبة يمشِي مع أهلو بيت الزُولة ويتبادلُوا الدِّبل وبتاع ، وبعدها هاك يا مكالمات نص اللّيل ، وهاك يا غراميات ما يشيلِك الدرِّب ، وبعد يتزوجوا تتقلب لنقاشات ومشاكِل!!!

طيّب الصحيح في الشّرع كيف نتصرّف ، ونخلّي الفترَة دي جميلَة وفي نفس الوقت ترضِي ربنَا؟؟؟

● أول حاجة :-
بالنِّسبة #لدِبلة_الخطوبة فهي عادَة لا أصل لها في الدّين ، إبتدعها الفراعنَة ثم ظهرَت عند الإغريق ، منتشرة أكتر في المجتمعات الغربِية ، بيلبسوها في البُنصر اليسرى لأنو بيعتقدوا إنو عرق القلب يمر في هذا الأصبع ويقرّبهم أكتر وحيحبُوا بعض أكتر..إلخ ، فلو كان اللابِسها لا يعتقِد فيها مثل هذا الإعتقاد -لا يتطيّر ولا يتشاءم بنزعِها- فالذي يظهر هنا هو جوَاز لبسها مع الكراهة لأن إنتشارها بين المسلمين أخرجها عن دائرة التشبُّه المحرَم ، ولكن لا يجُوز للخاطِب أن يلبِسها لمخطوبتهُ لأنه أجنبِي ولا يحلّ له لمسهَا أو مصافحتهَا.

وينصَح مولّانا المأذون بعدم لبس هذه الدِبلة والإستغناء عنها بلبس #الخاتِم..💍
بالنسبة للخاتِم أو (#الشَّبكة) فلها أصل في الدِّين ويجرِي عليها ما ذُكرَ سابقاً (ما يلبِّسها ليها)
والشّبكة هي هديّة للمخطوبة، بهدف التقرِّب وإظهار الحُب (لو أعطيت لها كهدية لا يجُوز إستردادها إذا لم يتم الزّواج ، أما لو كانت بنيّة أنها جُزء من المَهر فيستردّها -الآراء الفقهية واسعة في الموضُوع دا فهناك من أجاز إستردادها ولو كانت هديّة زي -ابن تيمية. )

أما الدّليل على الشّبكة أو الخاتم فالبُخاري روى بمفهُوم الحديث إنو في امرأة جات للرسُول وطلبت يتزوّجها ، ولكن الرسُول لم يكن له بها حاجَة فقام رجُل من أصحابه فقال : أي رسول الله إن لم تكُن لك بها حاجة فزوجنيها ؛ فقال : (هل عِندَك من شئ؟) ؛ قال لا والله يا رسول الله.
قال : (إذهَب إلى أهلك فانظُر هل تجد شيئاً ) ، فذهب ثم رجع فقال : لا والله يا رسول الله ما وجدت شيئاً ؛ قال : (إنظُر ولو خاتماً من حديد...)
ومن هِنا نقدر نستنتج #جواز_خاتم_الخطُوبة💍
على أن لا يكون من الذهب للرجُل ، أما المرأة فيجوز لها ذهباً كان أم فضّة أم غيره.
بإختصار في الشريعة يفضّل الخاتِم أو (الشبَكة) على الدِبلة

● بما إنو فترة الخطوبة بيتناقشُوا فيها الأهل كمان على تكاليف الزواج والمَهر والحاجات دي ، فالدِّين نهى عن المُغالاة في المَهر "أيسرهُنّ مهراً أكثرهُنّ بركة. "

بدون ما يبدو وكأنو البت رخيصَة في نظَر أهل العريس ، يعني ما يكونوا أوڤر في طلباتهُم ولا يبخسوها ويِرضُوا بالقليل وإنما يوزانوا بين الإتنين على حسب إستطاعة وإمكانيَة زولنا الخطيب.

#كوجهة_نظر_شخصية🌼:
بكون أحسن لو الواحِد جهَّز حالو من بدرِي وبنَى -بيتو- أول بعداك يفكّر في العرِس-الإستعجال علي شنُو عليك الله!! ، بيتُو دي ما أوضة واحدة يااخوانا💔 .. قصدي يبنِي عديل مطبخ وحوش وكلو ، حكاية تسَكِّنها مع أهلِك دي أو تعرِّس عشان تجيِب خدامية لأمك دا تفكيّر سطحي شديد والله ، الزواج بداية حياتكُم إنتوا الإتنين ، ما حلقَة وَصل ولا إمتداد لطموحات أهلكُم ، غير إنو طلاقات كتير بتحصَل بسبب المشاكِل مع الأهل (الحماوات).

فشنُو خلي أولادَك -الحيجوا- يعيشوا ويتربُوا في بيئة صِحية ومُرِيحة وبعيدة عن المشاحنَات والمشاكل
دا ما معناه إنها ما حتكون مرتاحة مع أهلك لو هي موافقَة تعيش معاهم ، أو تعيش في أوضة واحدة فـ Ok، بس ما تجي تتشكى وتتزعَل بعدين.

#نصائح_مهمة_جداً🌼:

●💛 يوم الخطوبَة ، وطوال الفترَة اللي بعديها حافظِي على لبسك وحجابِك ، الخطوبة وعد بالزواج ما زواج يعني خطيبك لسه غريب عنِّك ، ولا يحق له إلا ما حدّده الشَّرع.

وإنتَ يا مان!!
حافظ على مظهرَك دايماً بالله
وإتصرّفوا على طبيعتكم وخليكم صادقين مع بعَض ، الكضِب في الفترة دي بتدفعوا تمنوا لاحقاً.

●💛يفضَّل إنو الخطوبة تكون عائلية جداً ، حاجة خاصّة يعني ، مافي داعي تعزموا الواطة كُلها ، ويا ريت تكون في البِيت ، حق الصالة والمعازِيم دا وفروهو وجهزوا بيهُو بيتكُم أحسَن وبلاش صَرف.

●💛 فترة الخطوبة ما بس للتعارُف والإستعداد ، الفترة دِي بيكون فيها إتفاقيات مهمة وملزمة للطرفِين ، لازم نآخد حذرنا عشان ما نندّم بعدين ، يعني الشئ اللي بترضى بيهو فترة الخطُوبة وتتفقُوا عليهو صعب تعترِض عليهو بعد الزواج أو تطالِب بتغييره طالما الطرف التاني كان صرِيح معاك ولم يخدعك أو يخفي عنك الأمر ، يعني وافقتي تعيشي معاه في بيت أهلو ما تنقِي بعد العرِس يفرز ليك عيشتِك😒 ، وافقتِي تتزوجي مغترِب ما تعترضي على بُعدو عنِّك وعدم تواجدو معظم الوقت ، قالت ليك عندها مُشكِلة في الإنجاب ووافقت ما تجي تضغط عليها لاحقاً وقيس على كدا ؛ وإنت يا مان ما توّعد بحاجة ما بتقدر عليها (المؤمنُون عندَ شروطهم).!

●💛 زي ما قُلنا في بوست سابِق ، ماضيك حاجة تخصّك براك ، ما ضروري تحكي لخطيبك/خطيبتك عنُو ، ولا بيجوز ليهو يطالِب بإنّك توريهو مغامراتك وقصص حبّك الزمان ، مالَم يتدخّل في الموضوع دا حنك الشّرف وبتاع ، لأنو في الحالة دي من حقُو يعرِف عشان ما يجيبوك البيت تاني يوم.

●💛 جاء في الحدِيث : (لا خلوة إلا بمحرم) ؛ وبالتالي يجوز للخاطب إنو يزور مخطوبتُو عشان يتفاهَموا ويتناقشوا وكدا ، ولكن لابد من من وجُود محرَم ، وبرضو لو ماشين شارع النِيل ولا أمواج ولا طالعين أي مطعَم هي تسوق معاها محرم (لا يخلونّ رجُل بإمرأة إلا ومعها ذو محرم. )

●💛 لا يجُوز تبادُل كلمات الغزَل والحب ولا الكلام الذِي يكون بين الرجُل وزوجته ، ولا اللّمسات ولا النظرات المتلذذة....إلخ ، ما تكوني سهلة المنَال يا بِتنا ، دا عادي ممكِن يخليك ويشوف غيرِك.

بعدين البيعملوه المخطوبين في بلدنا دا حدث ولا حرج😂💔المهم أعرف( أن ما تأخذه الآن بغير حقه تُحرم من لذتهُ بعد الحلال.)

(من تعجّل بشئ قبل أوانه....تموها براكم😂).
فالكلام بين المخطوبين كلام جاد بتخططوا فيهو لحياتكم قدام وبتكتشفوا بعض أكتر ، الخطوبة لا بتحلّ حرام ولا بتقرِّب بعيد، ولا بتزيل الحدود ، وإنما هي للتروّي والإختبار والإستشارة والمدارسة والمُكاشفة عشان يقرروا هل ينفع يكملّوا مع بعض ، ولا ما ينفَع!

●💛 فترة الخطوبة ولو إنها فترة التجمُّل والكضب ، وكل واحد عايِز يبهِر التاني وعايز يبرز أجمل ما فيه ، إلا إنو فيها كتير من الحقائق والرسائل الربانية البتظهر غصباً عن شريكك وتخلّيك تعرف إنت ماشي صح ولا دا ما الشخص المُناسب ، بإختصار من الرؤية لو ما حسيتي إنك عايزة تكمّلي وإنو جذبِك وجاب آخرِك وإنك عايزة تخوضي التجربة فيبقى أوعى تكمّلي😂♥️.

●💛 ما ينفَع تتغاضى عن بعض التصرُّفات المتكررة من الشريك ، عنيدة ، بخيل ، ما معتزّ بيك ولا بوجودِك ، ما مهتَم....إلخ ؛ ماف حاجة اسمها حيتغيّر بعد الزواج ، لاااا حبايبي الحلوين من هسّاااااا تختوا الخطوط الحمراء ، وتفكرّوا كويس حتتعايشُوا مع الصِفات دي ولا لا!؟

●💛 الحُب براه ما كِفاية..
الحب لوحده ما بيفتَح بيوت ، ولا بيأكِّل عيال ، ولا بيبنِي أسرَة.
لازم نخت قلبنا بجمبة حبّة ونراعي للمستوى الأكاديمي ، الإجتماعي ، المادي ، الأخلاقِي.... (المُناسب)
التفاهُم ، الإحترام ، الصداقة ، الجدعنَة ، الأصل الطيب هم البيفتحُوا بيوت بجانِب مشاعر الحُب طبعاً

●💛 خليكم واضحِين ، أي مشكلة أي حاجة بتخصّ مستقبلكُم إتناقشوا وإتفاهموا فيها كويس ، أحكي ليها عن ظروفك ، عاملها برِفق ولين .. سامِح وأنصَح ، إعترف بأخطائك عادي والله ما فيها حاجة ، خليك مَرِح ، البنات بحبّوا خفة الدّم والله😂♥️

وإنتِ يا السمحة ما تعانديه كتير .. الرجال بطبعهُم بحبوا التملُّك وإنو رأيهم يكون الأول والآخير .. بادليهو رأيك بطريقتِك الخاصّة ، خليك ذكيّة يمه😙💛
إتشاركُوا الفرح والتفكير وشجعّوا بعَض.


●💛 الراجِل ما علاء الدِين ، لو مفتكرة حيرفعك السّما فإنتِ غلطانة ، ما تتمنّي وتتوقعي كتيِر ، لأنو هو روحو بتكون طلعَت عشان يبنِي بيتِكم وبتكون روحو طالعة فعلاً في تجهيزَات العرس والعفَش والـ...إلخ😁
لو متخيلة بعد الزواج حيقوم يصلّي بيكي قيام الليل ويسبّح على أصابعيك دا بكون زهجان بعد الدوام وتعبان وداير ينوم ، ولا متخيّل بعد تجي من الشغُل حتلقاها لابسة ليك المحزّق والملزق.. دي بتكون روحها طالعة من شغل البيت والعيال.

فمعليش يا جماعة أكلوا إسنيكرز😂 ، خليكُم واقعيين ، وحنك منشورات الفيس الأوڤر دي بالله بلاها
ما ترفعوا سقف توقعاتكم شديد ، أرضُوا ببعض زي ما إنتوا ، عيشوا بإمكانيات بعَض ، كملوا بَعض ، ما تتطلبي منه الما معاه ولا يطلُب منك الما بتقدّري عليهو ، تقبلّوا العيوب والمميزات وإتعايشوا بيها ، وإلا لن نتقابل أبداً
شوية رحمة علي بعَض يا جماعة ، كفاية الحاصل في البلد😂💔
● خليك حازمة وعند حدُودك ، وما تقارنُوا نفسكم بغيركُم ، ما تتأثروا بآ

راء غيركم ، ما تتكلّموا بسوء عن علاقاتكم السابقة ، لو عايِز/عايزة تختبرو في حاجة ما تخليهُو يحسّ إنو موضع إختبار ، ماف زول بيرضى يكون تحت المجهَر ، قلِّلوا الإتصالات -الخلِط- وكثِّفوا فيها الحب والأمان بطريقَة لائقة ومقبولة

- (ملاحظة : معظم النقاط التي ورد ذكرها ، منقولة بتصرُّف من كتاب #يوميات_مأذون لأحمد بدر)
- البوست طويل مش🙆‍♀💔 ، والله ساعة ونُص بكتب فيهو ، بس يلا ما ضروري تقروه في يوم واحد ، المهم ما تنسوني من دعوااتكُم ، وأعزموني للعرس😂💛.


#نتلاقى_في_البوست_الجاي

#مريم_الشيخ♥


@theorkeed

ثم إياك أن تستجدي من أحدهم ودًّا باردًا، وعطفًا زائدًا، وشعورًا زائلًا، وسؤالًا عنك باهت!
فالله أكرم من أن يردك خالي الوفاض وأنت تدعوه صادقًا أن يهبك الصحبة الطيبة التي لا أنانية ولا طمع ولا تخلي فيها..

اللهم صحبة تُسعد ولا تُتعس 💙