📅 12 ліпеня 2023 года Еўрапейскі парламент прагаласаваў за закон аб аднаўленні прыроды (Nature Restoration Law). Але ёсць нюансы.

Лабісты ад рыбалоўнай і сельскай гаспадаркі, а таксама кансерватыўных і правых партый разгарнулі супраць законапраекта цэлую кампанію дэзінфармацыі. Але Еўрапарламент падтрымаў закон. Праўда, перамога далася дарагой цаной: давялося ісці на кампрамісы.

Некаторыя артыкулы былі проста выключаны з закону.

➖ Выдалены артыкул пра аднаўленне сельскагаспадарчых угоддзяў, які ўключаў аднаўленне тарфянікаў. Між тым, менавіта інтэнсіўная сельская гаспадарка - асноўны фактар страты біяразнастайнасці ў ЕС.

➖ Выдалены артыкул пра гарантыі фундаментальнага права на доступ да правасуддзя. Гэта паспрыяе новым парушэнням Орхускай канвенцыі і няроўнымі ўмовамі для краін ЕС.

➖ Закон пачне дзейнічаць не адразу, а толькі пасля таго, як правядуць ацэнку харчовай бяспекі ЕС. Хаця дзеянні па аднаўленні дзікай прыроды патрэбныя ўжо цяпер, неадкладна.

🙋 Важна, што грамадскасць масава падтрымала закон. Было сабрана больш за мільён подпісаў і паведамленняў, былі заклікі ад 6 тысяч вучоных і болей чым сотні бізнес-кампаній.

Закон аб аднаўленні прыроды прызваны вырашыць праблему катастрафічнай страты дзікай прыроды ў ЕС. Сярод мэтаў закону - вярнуць дзікай прыродзе 20% сушы і мора ў ЕС да 2030 года, а ўсе дэградаваныя экасістэмы да 2050 года.

Наступны крок – прыняцце закона на трохбаковых перамовах паміж Еўракамісіяй, Еўрапарламентам і Саветам ЕС. На гэтым этапе ёсць шанец, што закон будзе прыняты ў лепшым выглядзе.

📷 На фота Белавежскі нацыянальны парк, Польшча. Аўтар – Frank Vassen, Flickr.

Нацыянальны парк «Прыпяцкі» – гэта амаль 90 000 га прыроды Палесся: велічная Прыпяць, балоты, паплавы, поймавыя дубровы, шматлікія старыцы і азёры. 💙

💧 Падчас разводдзя Прыпяць разліваецца да 10 км навокал. 

Гэтая тэрыторыя мае статус Рамсарскага ўгоддзя, ключавой батанічнай тэрыторыі і тэрыторыі, важнай для птушак, пад назвай “Прыпяцкія балоты”. 

🐦 У нацпарку адзначана 269 відаў птушак, з якіх 193 віды на гнездаванні. Сапраўднае царства птушак!
Гэтая тэрыторыя мае міжнароднае значэнне для пералётных птушак і для захавання відаў, якія знаходзяцца пад пагрозай знікнення: вялікі арлец (большой подорлик), ці амаль наблізіліся да яе: дубальт (дупель) і вялiкi грыцук (большой веретенник).

Таксама яна мае рэгіянальнае значэнне для захавання такіх відаў як чорны бусел, арол-вужаед (змееяд), шэры журавель, малая крычка, пугач (филин), шэрая кугакаўка (серая неясыть), ляляк (козодой), сярэдні дзяцел.

🙌 Таму вельмі важна захаваць такія ўнікальныя абшары дзікай прыроды. 💚

📷 Фота: вялікі грыцук, аўтар – Cezary Korkosz

#міграцыяптушак #EastAtlanticFlyway #EAF #flyways

Паглядзі, як забаўна чысцяцца барсучкі! А малое барсучаня хоча гуляцца і смешна бегае вакол сваіх бацькоў. 😄🥰

Барсук – вельмі ахайны звер. Ён не толькі падтрымлівае чысціню і парадак у сваім жыллі, але і адводзіць вельмі шмат часу на вычэсванне і ўмыванне.

Даўжэй за ўсё барсукі чысцяцца, як толькі выходзяць з нары. 🙂

#дзікіфакт: Улетку кожны вячэрні сеанс вычэсвання і чысткі ў барсукоў можа цягнуцца нават 40 хвілін!

Барсучкі дапамагаюць адзін аднаму з вычэсваннем, бо не ўсюды могуць дастаць сваімі лапкамі і мордачкамі.

🦡 Акурат гэтым зараз заняты наш барсук Ясь, завадатар у “Дзікім клубе”. Ты яшчэ не там? Далучайся, у клубе цікава! 🤗
https://birdingbelarus.by/dikiyklub/

🎥 Крыніца і відэа: Адам Збырыт, Белавежскі нацыянальны парк, Польшча.

Ведаеш, якая самая цікавая знаходка ў сёлетніх экспедыцыях “Дзікай прыроды”? Наш спецыяліст Юры Янкевіч знайшоў месца гнездавання пугача (филина). 🤩

Знайсці яго гнездо вельмі складана. Можна ведаць, што пугач недзе тут ёсць, бо крычыць увесну, але каб перадаць яго гнездавы ўчастак пад ахову, трэба ведаць дакладна, дзе ён.

🦉 Пугач – самая вялікая сава Беларусі. Любіць вялікія і густыя старыя лясы з ветраваламі. Распаўсюджаны больш-менш раўнамерна толькі на Палессі. Тут яго Юры і знайшоў – на тэрыторыі, важнай для птушак, “Дзівін – Вялікі Лес” у Кобрынскім раёне.

🌿 Гэтая тэрыторыя была вылучана ў свой час для такіх “чырванакніжных” птушак, як шэры журавель, вялікі грыцук і вяртлявая чаротаўка, якой пагражае глабальнае знікненне. Плошча гэтай тэрыторыі – амаль 20,5 тысячы га, але толькі маленькая цэнтральная частка знаходзіцца пад аховай і мае статус біялагічнага заказніка мясцовага значэння.

🤲 Юрый Янкевіч знайшоў тут 51 месца з рэдкімі відамі і біятопамі для перадачы пад ахову. Магчыма, атрымаецца пашырыць межы заказніка і павысіць яго статус да рэспубліканскага.

❓ Хочаш дапамагчы захаваць дзікую прыроду Беларусі? Далучайся да “Дзікага клуба”: https://birdingbelarus.by/dikiyklub/

Увесь наш прыбытак ідзе на прыродаахоўную дзейнасць. 💚
А цябе ў клубе сёлета яшчэ чакае шмат цікавага! Be wild! 🐾

📷 Фота Юрыя Янкевіча (Маларыцкі раён).

#ДзікіяЭкспедыцыі

🐦 30 чэрвеня было апублікавана даследаванне, якое паказвае, што папуляцыі 38% відаў з 546 відаў птушак у Еўропе вызываюць асцярогу.

☝️ А колькасць відаў, якім пагражае глабальнае знікненне, вырасла ўтрая: з 24 у 1994 г. да 74 у 2023 г. Гэта азначае, што ступень пагроз узрасла. Тупік і звычайная туркаўка ў апошнія гады атрымалі глабальна пагражальны статус.

Стан яшчэ 44 відаў цяпер вызывае асцярогу. Сярод іх кулікі, драпежныя і вераб’іныя птушкі. 🦅

🤲 І наадварот, 62 віды, якія мелі пагражальны статус, цяпер з яго выключаны. Сярод іх некаторыя віды чапляў і драпежных птушак.

Але не гледзячы на значныя поспехі, у Еўропе робіцца недастаткова для таго, каб спыніць скарачэнне колькасці многіх відаў птушак. Арнітолагі заклікаюць да тэрміновых дзеянняў.

📷 На фота – звычайная туркаўка (обыкновенная горлица), Валожынскі раён. Аўтар Павел Сацута.

🎉 У Швейцарыі праз 400 год загнездаваў зніклы від птушак.

Паўночны лысы ібіс знаходзіцца пад крытычнай пагрозай знікнення (CR). У свеце жыве ўсяго каля 200 птушак.

🪺 Ібісы зрабілі гняздо… на падаконніку будынка Harley-Davidson недалёка ад Цюрыха. У пары вылупіліся два птушаняці. 🐣

Яшчэ ў 17 ст. паўночныя лысыя ібісы гняздзіліся амаль ва ўсіх краінах вакол Міжземнага мора ад Паўночнай Афрыкі да Альпаў. Але 400 гадоў таму ў Еўропе яны вымерлі. Па дадзеных BirdLife International птушкі яшчэ гняздуюць у Сірыі і Емене, але найвялікшая папуляцыя знаходзіцца ў Марока.

У Еўропе дзейнічаюць два праекты па рэінтрадукцыі ібіса: у Іспаніі ды Германіі з Аўстрыяй. Галоўнай пагрозай для вернутых у прыроду ібісаў зараз з’яўляюцца італьянскія паляўнічыя, потым – лініі электраперадач.

🙏 Маем надзею, што і ў Беларусі некалі зможам назіраць гняздуючых дропа (дрофу) і паляніка (авдотку), а сіваграк (сизоворонка) і сокал-падарожнік (сапсан) стануць звычайнымі.

👀 На гняздзе Цюрыхскі заапарк усталяваў камеру. За сямейным жыццём ібісаў можна назіраць анлайн па спасылцы
https://player.livespotting.com/?alias=11cwt32d&ch=18hsdogg&fbclid=IwAR1HWeODrocQ5HaurwQ9WHh-NGW5HqleVcGCjS8MackMZwmI35m1-3ld36A

📷 Фота з сайта euro.dayfr.

❓ Што рабіць, каб захаваць цудоўных кулікоў?

🔹 аднаўляць асушаныя водна-балотныя ўгоддзі;

🔹 у негнездавы перыяд нарыхтоўваць сена і пасвіць кароў на паплавах, высякаць зараснікі хмызняку, каб гэтыя тэрыторыі не зарасталі і на іх маглі гнездавацца птушкі;

🔹 выдзяляць зоны супакою для птушак, дзе паляўнічыя не будуць іх турбаваць;

🔹 рэгуляваць колькасць відаў-драпежнікаў;

🔹 не выпускаць на вольны выгул катоў і сабакаў каля калоній кулікоў, вылоўліваць бадзяжных – яны таксама з’ядаюць кладкі і птушанят;

🔹 ствараць адмысловыя экасцежкі, каб турысты не турбавалі птушак;

🔹 тлумачыць мясцовым людзям і ўстановам, што “чырванакніжных” птушак нельга не толькі забіваць, але і забаронена весці пэўную дзейнасць на іх гнездавых участках;

🔹 займацца экалагічнай асветай. 

🤲 З апошнімі пунктамі можаш дапамагчы і ты. Раскажы сваім сябрам і знаёмым, чаму небяспечна паліць траву, турбаваць птушак у гнездавы перыяд, выпускаць на самавыгул катоў і сабак.

📷 Фота: вялікі грыцук (большой веретенник). Аўтар – Таццяна Алешка, @ptushkafota.

#міграцыяптушак #EastAtlanticFlyway #EAF #flyways

Усе на экафестываль! 🤗

📆 12 жніўня (у суботу) у заказніку “Спораўскі” пройдзе экафестываль “Спораўскія сенакосы”.

Фестываль прызваны прыцягнуць увагу да праблемы зарастання асаковых балотаў хмызнякамі.

🌿💧 Адкрытыя асаковыя балоты – гэта важныя месцы гнездавання для многіх відаў птушак. Напрыклад, для вяртлявай чаротаўкі (вертлявой камышовки) – самай рэдкай пеўчай птушкі кантынентальнай Еўропы (VU).

✍️ Рэгістрацыя на чэмпіянат па ручной касьбе адкрыта па 6 жніўня. Удзельнікам конкурсу прапануецца зрабіць свой унёсак у захаванне экасістэмы, а менавіта пакасіць траву ўручную на хуткасць.

Падчас фестывалю адкрыта экатрапа і працуе станцыя кальцавання птушак.

📍 Месца правядзення: вёска Высокае, Бярозаўскі раён. Пачатак а 10:00. Уваход вольны.

Па ўсім пытанням звяртайцеся па нумары +375292733907.

📷 На фота Іны Субоцінай – вяртлявая чаротаўка (заказнік "Сэрвач", Віцебская вобласць).

Сёння – Сусветны дзень аховы прыроды. 🌍🌱🐦

Дзікая прырода патрэбная чалавецтву для выжывання. Але яна каштоўная і сама па сабе, незалежна ад чалавека, і патрабуе павагі.

Выкажы свой клопат пра яе:

🌱 Пасадзі мясцовыя віды раслін на сваім участку ці ў двары: так ты створыш спрыяльны асяродак для птушак.

🧤 Калі адпачываеш на прыродзе, прыбяры смецце не толькі за сабой, але і тое, якое пакінулі іншыя.

🐈 Не выпускай свайго коціка на самавыгул. Так ты уратуеш жыццё мноству птушак і дробных звяроў.

🏡 Зрабі дамок для птушак сваімі рукамі (цісні на хэштэг #птушыныядомікі). Домікі для птушак можна павесіць і пасля сезону гнездавання. Пакладзі ўнутр жмут чыстага сена (не саломы) ці жменю драўнянай стружкі – дробныя звяркі могуць выбраць яго для спячкі, а птушкі для начлегу.

🦡 Далучайся да "Дзікага клуба" https://birdingbelarus.by/dikiyklub/
Увесь прыбытак ад клуба ідзе на захаванне дзікай прыроды Беларусі.

🤳 Дапамажы іншым натхніцца дзікай прыродай – публікуй свае фота прыгожых мясцін, раслін, звяроў і птушак у каментарах!

📷 На фота чорны дрозд. Аўтар my_sweety_birds.