ሞሪንሆ የመጀመሪያ ጨዋታቸውን በድል አጠናቀዋል !

የቱርኩ ክለብ ፌነርባቼ በፖርቹጋላዊው አሰልጣኝ ጆዜ ሞሪንሆ እየተመራ የመጀመሪያ የነጥብ ጨዋታውን ማሸነፍ ችሏል።

የአውሮፓ ሻምፒየንስ ሊግ ቅድመ ማጣሪያ ጥሎ ማለፍ ሁለተኛ ዙር የመጀመሪያ ጨዋታውን ከስዊዘርላንዱ ሉጋኖ ክለብ ጋር ያደረገው ፌነርባቼ 4ለ3 በሆነ ውጤት አሸንፈዋል።

በጨዋታው የቀድሞ የሮማ ታሪካዊ ተጨዋች ኤዲን ዤኮ ለፌነርባቼ ሶስት ግቦችን በማስቆጠር ሀትሪክ መስራት ችሏል።

የሁለቱ ክለቦች የመልስ ጨዋታ ቀጣይ ሳምንት ማክሰኞ በፌነርባቼ ሜዳ የሚደረግ ሲሆን በድምር ውጤት አሸናፊው በቀጣይ ዙር ከሊል ጋር ይገናኛል።

@tikvahethsport     @kidusyoftahe

የኦሎምፒክ እግርኳስ ጨዋታዎች ዛሬ ይጀምራሉ !

የ2024 ፓሪስ ኦሎምፒክ ውድድር የፊታችን አርብ በይፋዊ ስነ ስርዓት ከመጀመሩ አስቀድሞ በዛሬው ዕለት የኦሎምፒክ እግርኳስ ውድድር ጅማሮውን ያደርጋል።

በኦሎምፒክ እግርኳስ ውድድር በወንዶች አስራ ስድስት እንዲሁም በሴቶች አስራ ሁለት ብሔራዊ ቡድኖች በምድብ ተከፋፍለው ጨዋታቸውን ያደርጋሉ።

በዛሬው ዕለት ሁሉም የወንዶች ብሔራዊ ቡድኖች ጨዋታቸውን ማድረግ ሲጀምሩ የሴቶች ውድድር ነገ የሚጀምር ይሆናል።

የወንድ ብሔራዊ ቡድኖች ከሶስት ተጨዋቾች ውጪ ያሉ ተጨዋቾቻቸው ከ 23ዓመት በታች መሆን ሲጠበቅባቸው በሴቶቹ የእድሜ ገደብ እንደሌለው ተገልጿል።

ብራዚላዊቷ ታሪካዊ የፊት መስመር ተጨዋች ማርታ በኦሎምፒክ ሀገሯን በአምበልነት ከመራች በኋላ በይፋ ጫማዋን ትሰቅላለች።

ማርታ በአምስት የኦሎምፒክ ውድድሮች ላይ ግብ በማስቆጠር የመጀመሪያዋ እግርኳስ ተጨዋች ስትሆን በመድረኩ የወርቅ ሜዳልያ ለማሳካት የመጨረሻ ሙከራዋን ታደርጋለች።

አፍሪካ በዘንድሮው የኦሎምፒክ ውድድር በወንዶች በጊኒ ፣ ሞሮኮ ፣ ግብፅ እና ማሊ እንዲሁም በሴቶች በዛምቢያ እና ናይጄሪያ ብሔራዊ ቡድኖች ትወከላለች።

*የዛሬ መርሐ ግብሮች ከላይ በምስሉ ላይ ተያይዘዋል።

@tikvahethsport     @kidusyoftahe

ንግድ ባንክ የምድብ ተጋጣሚዎቹን አውቋል !

ኢትዮጵያን በካፍ የሴቶች ሻምፒየንስ ሊግ የሴካፋ ሀገራት ማጣሪያ ውድድር የሚወክለው የኢትዮጵያ ንግድ ባንክ ሴቶች ቡድን የማጣርያ የምድብ ተጋጣሚዎቹን አውቋል።

በዚህም መሰረት የኢትዮጵያ ንግድ ባንክ በምድብ አንድ ከኬንያ ፖሊስ ቡሌት ፣ ዬ ጆይንት ስታርስ ( ደቡብ ሱዳን ) ፣ ዋርየርስ ክዊንስ ( ዛንዚባር ) እና ራዮን ስፖርት ( ሩዋንዳ ) ጋር ተደልድሏል።

የዘንድሮው የሴካፋ ሴቶች ሻምፒየንስ ሊግ ውድድር በሀገራችን ኢትዮጵያ አዘጋጅነት አዲስ አበባ ላይ እንደሚደረግ ይታወቃል።

የውድድሩ አሸናፊ ክለብ ምስራቅ አፍሪካን በመወከል በቀጣዩ የካፍ ሻምፒየንስ ሊግ ውድድር የሚሳተፍ ይሆናል።

ውድድሩ ከነሐሴ 11/2016 ዓ.ም እስከ ነሐሴ 29/2016 ዓ. ም በአዲስ አበባ እና አበበ ቢቂላ ስታዲየሞች ይካሄዳል።

@tikvahethsport     @kidusyoftahe

ናቾ ፈርናንዴዝ ሪያል ማድሪድን ተሰናብቷል !

ከሀያ ሶስት አመታት በኃላ ከሪያል ማድሪድ ጋር የተለያየው ስፔናዊው የተከላካይ ስፍራ ተጨዋች ናቾ ፈርናንዴዝ በሎስ ብላንኮዎቹ ይፋዊ ሽኝት ተደርጎለታል።

በይፋዊ ሽኝቱ ላይ ንግግር ያደረገው ናቾ የሪያል ማድሪድን ሀላፊዎች ፣ አሰልጣኞች ፣ የቡድን አጋሮቹን እና የክለቡን ሰራተኞች ማመስገን እንደሚፈልግ ገልጿል።

" እኔን ከሪያል ማድሪድ አካዳሚ ተነስቶ ሁሉንም ነገር ለማሸነፍ ሁሉንም ነገሩን የሰጠ ተጨዋች አድርጋችሁ እንድታስታውሱኝ እፈልጋለሁ " ሲል ናቾ በእምባ ታጅቦ ተናግሯል።

በሽኝቱ ላይ የተገኙት የክለቡ ፕሬዝዳንት ፍሎሬንቲኖ ፔሬዝ በበኩላቸው " ዛሬ ለሪያል ማድሪድ አሳዛኝ ቀን ነው " ሲሉ የገለፁ ሲሆን " ምክንያቱም ሁሉንም ነገሩን የሰጠን ተጨዋች ከእኛ ጋር ተለያይቷል " ብለዋል።

ናቾ ፈርናንዴዝ በሪያል ማድሪድ በቆየባቸው ስኬታማ ሀያ ሶስት አመታት ሀያ ስድስት ዋንጫዎችን ማሳካት ችሏል።

የተከላካይ መስመር ተጨዋቹ ናቾ ከሳምንታት በፊት ከሪያል ማድሪድ በመልቀቅ የሳውዲ አረቢያውን ክለብ አል ቃዲሲያ በሁለት አመት ኮንትራት በይፋ መቀላቀሉ ይታወሳል።

@tikvahethsport     @kidusyoftahe