لسان حال سيدي ومولاي الامام المهدي المنتظر مع والده الامام العسكري صلوات الله عليهما

بويه تدري .. آنه عايش بس جرح
هاذه عمري .. ابكل مغربيه انذبح
يل حسن گوم        شوف الهموم
__

يل حنين       بس أنين
عمري گّضّيته مصيبه ابسد مصيبه
ارد اجيك       اشكي ليك
بويه روحي ابهل خلگ امست غريبه

أنه اليبچي صباح او ليل  أنه الدمعاته تهمل دم
أنا المن دفنتك لليوم  عايش وحدي اتألم

من عفتني .. ما نامت ساعه ابرغد
مرمرتني .. دنيتي او گلبي انمرد
حيلي مهدوم        شوف الهموم
__

لالي دار        لا قرار
عايش الغربه او سلوتي بس مدامع

وين اروح         بس جروح
روحي خلصت من حزنها والمواجع

علي مرن هموم اثگال غربه . او غيبه عن ربعي
انا المحد يون وياه گاعد وحّدي او انعي

ابچي وحدي .. لا گرابه او لا وطن
كلها ضدي .. صرت دنيا امن المحن
گلبي مالوم               شوف الهموم
__

ليك اجيت          واعتنيت
هل مسيه واعله گبرك اشكي همي

امن التّراب         فكلي باب
بويه ارد اگعدلي ساعه وانت يمي

اسولفلك عله الشوغات واراويك الجفن الاحمر
مصاب اتلطعش معصوم ضلت بالگلب تسعر

چم رزيه ...  بويه بعيوني شفت
امن الزچيه .. لحد ما انت طحت
انعه كل يوم         شوف الهموم
__

چم عذاب         چم مصاب
شلن احوالي او همت بين البراري
اعله القبور       بس ادور
او دمعي كل ساعه ابكتر يابويه جاري

نوب اگصد عليك او نوب للطف امشي واتعثر
آنه او أمي الزهراء نتگابل عله المنحر

جمعه جمعه .. اهناك موعدنه نجي
يَمه ننعه .. لحد ما نشبع بچي
ابسود الهدوم         شوف الهموم
__

او للكفيل        بل عويل
انروح يمه كلمن ابونّه او نحيبه

عمنه ضاع        ابلا وداع
راح والحره اصبحت عگبه غريبه

دمع الي جراه يعگوب طول اسنين هجرانه
منه ازيد بچت زينب من راووها ذرعانه

يا ألمها .. يوم فارگها الگمر
يا هظمها .. والله يكسر للظهر
ضلت اتحوم           شوف الهموم
__

هل سنين          ابهل حنين
مره ابچي امصابك او مره اعله زينب

ما غفيت      او لا هديت
بويه من عاشور گلبي او راسي شيب

الشايف ابو مسموم  واحسين انسحگ صدره
هم يرتاح؟  هم اينام؟  هم ايفارگ العبره ؟

مالي راحه ..  ولا تهنيت ابعذب
بس مناحه .. عله الخدر المنسلب
اهنا يمسموم        شوف الهموم
__

ابو فاطمة الطائي

امنيه اتدور ابخاطري
خـادم اظل للعسكري
ــــــــــــــــــــــــــــــــ
مــــزروعه بيه الامنــــيه.. من الولاده و الزغـر
اخدم ذراري المصطفى.. آنه وهلي طول العمر
وادعوك ربي ابكل فرض.. ريت ايتحقق هالأمر
ابغير الخدامه هالبشر.. اعمارها تصير ابـخُــسر

صبيت دمعــة ناظري
خـادم اظل للعسكري
ــــــــــــــــــــــــــــــــ
احـظر مجــــــالس للعزه.. ابسامره عندي امنيه
ابصحن الامام العسكري.. يختلف طعم التعزيه
من تذرف اعيوني الدمع.. هالنفس تصبح راضيه
هاي المجالس للمرض.. صارت دواء وشافيـــــه

مرضاتك بهاي اشتري
خـادم اظل للعسكري
ــــــــــــــــــــــــــــــــ
يــــــاربي هذه نعمتك.. اعلينه تفيض ابهل رزق
ادعوك اظل وتوسلك.. اتثبتلي اجدامي ابصدق
لحسين كون ومجلسه.. ايهيم الگلب كون ويرق
كون اول الناس اعتني.. وبدمعة اعيوني التحق

خليني ربحان و ثري
خـادم اظل للعسكري
ــــــــــــــــــــــــــــــــ
اهل المواكب والخدم.. وگفو على طول الدرب
من كربله الارض الغري.. السامره راحت تنصب
متحزّمين ابحب علي.. ويسهل عليهم كل صعب
ينـــادون للزاير هلا.. يالبــــــيـــــــك ينسر الگلب

وانته العليم بجوهري
خـادم اظل للعسكري
ــــــــــــــــــــــــــــــــ
امنيتي يارب رب السمه.. ورب الملائك والبشر
هلبت يمر راعي الامر.. وبشوفته ايكحل النظر
هالحسره ظلت بالگلب.. خدمة امامي المنتظر
بغيابه ماراحه شفت.. والدنيا بس ضيم وقــهر

حبه يدور بضـــامري
خـادم اظل للعسكري
ــــــــــــــــــــــــــــــــ
حيدر بشار الدراجي

‏مقطع صوتي من حيدر بشار الدراجي

(للامام العسكري)

عظم الله...اجرنا واجركم
يامهدي
ــــــــــــــــــــــــــــــــــــــــ
يابو العزه ويابو الجرح.. يبن الحسن نادينه
بمصاب ابوك العسكري.. مـاجـور يـامـهدينه
جـبـت العمر كله تون...يــاگلبك الله ايـعينه
وانـخـــفف اعليك الحمل...للتعزيه اتــعنينه

عظم الله...اجرنا واجركم
يامهدي
ــــــــــــــــــــــــــــــــــــــــ
صبرك جبل يبن الحسن.. فــاق الزمن واتعده
بس أبمصيبة والـــــــدك.. مـــاي الصبر واتبده
تنظـــــــر ابوك بلا ذنب.. بالسم تصوب چبده
عمره وشبابه ياوسف ٠٠ كله انسلب من عنده

عظم الله...اجرنا واجركم
يامهدي
ــــــــــــــــــــــــــــــــــــــــ
عالي ابخــلودك والعِدهَ.. هيهات لن اتـــلوحك
الله اليصبرك سيدي.. وتطيب ريت اجروحك
تشتاگ چنت الوالدك.. وتنــعاه نبرة نــوحـــك
لمن سمعت امصيبته.. چا شنهي صار بروحك

عظم الله...اجرنا واجركم
يامهدي
ــــــــــــــــــــــــــــــــــــــــ
الله اليهون امصيبتك.. ابفگد الحسن هاليله 
مثلك منو بهذا الحزن.. ناح وتهــــــدم حيله
لمن حظرت اجـنازته.. صليت لوتـبــــچـــيله
بالغربه خلُصت العمر.. ولا واحـد التـــشكيله

عظم الله...اجرنا واجركم
يامهدي
ــــــــــــــــــــــــــــــــــــــــ
كل المصايب هونت.. ومصيبتك بحسينك
يالدمعك اتغير دمه.. وراسم طفوف ابعينك
تنعى الغريب ابكل وكت.. ومايهده ساعه اونينك
والمغربيه من تجي.. مولانا الله ايعينك

عظم الله...اجرنا واجركم
يامهدي
ــــــــــــــــــــــــــــــــــــــــ
مابين مسموم وقتل.. اهلك گضو يالحجه
ونيران گلبك سيدي.. طول العمر متوهجه
والطلعتك يبن الحسن.. نتوسل ونترجه
يبن الذراري الطيبه.. مهرك يساعه اتسرجه

عظم الله...اجرنا واجركم
يامهدي
ــــــــــــــــــــــــــــــــــــــــ
حيدر بشار الدراجي

‏مقطع صوتي من حيدر بشار الدراجي

‏مقطع صوتي من حيدر بشار الدراجي

#طور الجفيري


يجرح يا مهدي ونينك
مولاي ربي يعينك
جمرة نشوف بعينك
نادب ابوك ومنكسر•

جينا نواسي نحِيبك
بطور المصيبة انعِينك
غالي يا مهدي ادخيلك
نادب ابوك ومنكسر•

نبكي لمصابك ننفجع
نتمنى نمسح هالدمع
حالك يّبَكي بهالوضع
نادب ابوك ومنكسر•

#اسمعوا الجواب من مولانا المهدي ع:

گلبي جريح ومنكسر
حالي يِتيم من الصغر
دمعي اعلى خدي منهمر
الخاطر حزين ومنفطر•

عايش حزين اميتم
ليلي ونهاري امألم
كل ساعه عندي مأتم
حامل علومي ومنتظر•


🖊خادمة ابي الفضل
🖊خادمة الزهراء

راح ابو المهــدي هاليـوم
هذا الأيمــــام المظلــــوم
◄◄◄◄◄
عابــد فقيــه العسكـــــــري .. من الله عقلــــه جــوهــــــري
ما ضـــده بس البربـــــري .. ديــن الله بسمــــه مرســــــوم
◄◄◄◄◄
ديــن الجلالــــه وضّحـــــه .. بأفكــــاره للأمــــه وحـــــــــه
خطواتـــه كلهـــه ناجحـــه .. آيــه يضل بينـــه اتحــــــــــوم
◄◄◄◄◄
اسلاحــه مو سيــف ورمـح .. ابـﭼلماتــه كل باغـــي انذبـــح
اسمــه عله الكـون انسـرح .. وجهه السمـه وعينـه اغيـــوم
◄◄◄◄◄
مو طائفــي ابن النبــــــــــــي .. خــل يستمــع كل ناصبــــــــي
حـﮔــي انتميلــه ابمذهبـــــــي .. بـــــــــــي افتخـــر ابقــى دوم
◄◄◄◄◄
غـــذانـــــه ببحــــــور الفكـــر .. ومنـــه تعلمنـــــــه الصبــــــــر
واليَّ رفض نهجــــه خســـــر .. انختـــمـــت حياتـــه مسمـــــوم
◄◄◄◄◄
عُمـــره انتهـــى وابــلا ذنـــــب .. جــده علـــــي هــذا الســـــبب
ترتيبـــــه من الله انــــــرتـــــب .. الحــــادي عشـــر هالمعصوم
◄◄◄◄◄
لخادم اهل البيت : كرار الحسينات
7/5/2016/ السبت / كربلاء المقدسة

أجينــه نـــزورك أجينــــــــــه
ﮔصـــدنـــه احنــه اعله بابـــك نواسيـــك أبمصابــــك
يالعسكري .. يالعسكري

شيعتـك كلحنـــه يمك صافيــــه النيـــــــه ﮔصـــدنــــــه
لازم انـــزورك حلفنــــه خل يجي وينــــــه اليضدنـــــه
أحلى من كلشي وكلاشي المنيـــــــــــه والله عدنــــــــه
ولو نمــــوت ابحبــــك أحنــــه يعني من هسه انولدنــه
حزينــــــه الروافض حزينــــــــــــــه
فــده كلنــــــه الترابــــــــك نواسيـــك أبمصابــــك

جرحــك أشـﮔـــد ماضي صايــر لاﭼــن أخضر بينه لسـه
يالحســــن أحبابــــك أحنـــــــه والجــــرح لازم نحســــه
كل زمــــن نبقـــى نِكبـــــره والشَعائــــر أحلى ونســـــــه
جرحــــك انعــــــاد ابزمنـــــه بالروافض يجـري نفســـــه
أبتلينــــــــه ابعـــــدونـــــــه أبتلينــــــــه
يضل بينـه عذابــك نواسيـــك أبمصابــــك

تبقــى سامره ابضريحـــك وي أبوك الهــادي حلــــــوه
والله لو ما أنتـــوا بيهــــــه ﭼــــــان سامــــره متســـوه
اشـﮔــد نضحي ونبقى ننطـــي يالحســن كلحنــه فــــدوه
هدّدوك وصرنه حوَّلك هــــدّه وحّـــــده عـــدنه نخـــــوه
سعينــــــه أبخـــــدمتـــــك سعينــــــه
زلم جــت وشبابـــــــــك نواسيـــك أبمصابــــك

يالحســــن ندري ابمصابــــك حاضر المهدي ابجمعنـــــه
وابضريحــك ندعـــو ربنـــه ايعجل أبطلعـــت أملنــــــــــه
ونشكي للمهــــدي حـﭼينــــــه أحفظنـــــه كل وطنـــــــــه
شيعتـــك رغم المــآسي عـــــن دربكــــــم لا مزلنــــــــــه
حـﭼــينــــه ابـﮔلبنــــــــــــه حـﭼينــــــه
صعــب جــداً غيابـــك __ نواسيـــك أبمصابــــك

لخادم أهل البيت: كرار الحسينات
كربلاء المقدسة

#في_الخدمة_المقدسة
#شهادة_الامام_العسكري
#نعي

المهدي يِودّع والده.. والمدمع يهلّه
بعدك على الدنيا العفا.. يا والدي يقلّه
خلف النعش قام ووقف.. كبّر تره وصلّى
وبقبره بيده يوسّده.. ويذرف دموع العين

ينثر عليه بكفته.. يا حسرتي التربان
يذكر مصايب غربته.. ويتذكر العطشان
يبقى ثلاثةْ بْلا غسل.. ويلي وبَلا أكفان
يْنادي بُو صالح يِنتحب.. آهٍ يَجدي حسين

#زينب

نعي للأمام العسكري عليه السلام

مشدوه باله مشدوه باله
الليله المنتظر مشدوه باله
والحزن حاله والحزن حاله
يفارگ ابوه والحزن حاله
انگطعت اماله انگطعت اماله
بعد العسكري انگطعت اماله
محد بقاله محد بقاله
مسموم ابوه محد بقاله
بل الهم سؤاله بل الهم سؤاله
ليش الدهر بل الهم سؤاله
الون حلاله الون حلاله
مفارگ عزيزه الون حلاله
دمعه بچاله دمعه بچاله
يودعه بألم دمعه بچاله
ويتعناله ويتعناله
وينه اليواسيه ويتعناله
....................................
خادمكم مالك السعيدي

في أستشهاد الإمام حسن العسكري عليه السلام ...

أنا المهدي حبيبك بويه انا نجلك
يابويه العسكري البالبيت داخلك

لفه لهفان لك رجواك
ظناك المنتظر وياك
🏴🏴

ابعقيد الخادم اوليدك لأخداشك
لفه الداعيه يدخلك لأنعاشك
من السرداب يابويه الى افراشك
أناظر من أثر سمهم لأرعاشك

سألته خادمك ياوالدي عنّي
وجيت الحالتك مسرع مع ونّي

أجيت ابدمعتي الملگاك
ظناك المنتظر وياك
🏴🏴

فداك اوليدك الحاظر لك اِمامي
أعوفك بالمرض ماتسمح اقدامي
أجيب الماي لك ياوالدي ضامي
هزيل وترتعش ياويلي گدامي

تضرب بالأناء المعدن اسنانك
وأيدك ترتعد و يابس السانك

أنا بجوارك المفداك
ظناك المنتظر وياك
🏴🏴

بجوف اليل خافيني من الجاير
عليك اتعودت كل يوم الي زاير
تجي السرداب لي بويه كنت ساير
وعليّه عينك الحلوه تظل داير

غبت أيام عنّي مدري شالصاير
وأخذني اعليك خوفي يالولي حاير

أجيت اطمّن وأرعاك
ظناك المنتظر وياك
🏴🏴

من سجن السجن جابوك في معزل
عن اصحابك وناسك حتى ماتوصل
أرادو اببركة الأسباع في محفل
جنابك ينتهي وهذا الها مايحصل

تواصلها مع نوابك الشيعه
خطر عن لاتضايع بعدنا ضيعه

شيعتنا اشكثر تهواك
ظناك المنتظر وياك
🏴🏴

بني العباس كم آذوك في عمرك
وكم ياوالدي هذا الحقد ضرّك
أراد المعتز ابأمره غدر نحرك
وبعده المهتدي ابوعده فتك أمرك

الين المعتمد بسم تلف كبدك
وتلف كبدي مع وهدني مع هدّك

معادي الله الذي عاداك
ظناك المنتظر وياك
🏴🏴

ثلاث ايام منعو يشرب الضامي
ابوالأحرار جدي حسين برحامي
الضما فتت دليله والفلا حامي
وسهمه حرملا بالقوس لن رامي


لذيذ الماي بويه اشرب لاحشائك
بني اميه بني العباس بجزائك

وعلي السجاد انا ابرأياك
ظناك المنتظر ويّاك

✍️
علي الأحسائي
ربيع اول ١٤٤٦هـ

ضجت بهليوم سامرائنه
نوحي عالمسموم يازهرائنه
مات الحسن يافاطمه..واويلاه
والمهدي ناصب مآتمه..واويلاه
نوحي عالمسموم يازهرائنه
....
يالزهره الله ابهالمصيبه ايعظم اجرج
كل يوم لوعه  وفاجعه ايراويج دهرج
هذا الخبر يمكن كسر ثاني يكسرج
شدي الرحال ابهالمسيه وعجلي بامرج

روحي للعسكري وسوي اقرايه
اليوم طاحت من كببكم رايه
ناحت عليه ارض وسمه ..واويلاه
والمهدي ناصب مآتمه..واويلاه
نوحي عالمسموم يازهرائنه
....
اليوم ثامن يوم اله ينازع من السم
ونار الجبد تسعر مثل نار المخيم
نرجس غريبه ابفكده والمهدي تيتم
مات ابومحمد والشمل هيهات يلتم

لمن العسكري اينام ابكبره
تبدي يافاطمه الغيبه الصغره
والدنيه تصبح مضلمه..واويلاه
والمهدي ناصب مآتمه..واويلاه
نوحي عالمسموم يازهرائنه
....
زمرة بني العباس ماحفظت حرمته
يوميه تدخل داره وتخوف أسرته
نص بالسجن كضه العمر نص بغربته
والمعتمد خطط اله ونفذ غدرته

لحد ماسوه اليريده وناله
كومي شوفي اوليدج بياحاله
غدرته الايد الآثمه..واويلاه
والمهدي ناصب مآتمه..واويلاه
نوحي عالمسموم يازهرائنه
....
الكوكب الحادي عشر اعلن غيابه
وغسلو جسمه وشيعو نعشه بمهابه
مومثل جسم  احسين ضل اعله الترابه
ابحر الشمس والحافر ايجر بثيابه

آنه ادري السيد ايقدرونه
احسين ليش ابحافر ايرفسونه
خلو اضلوعه امهشمه..واويلاه
والمهدي ناصب مآتمه..واويلاه
نوحي عالمسموم يازهرائنه
...
بثامن ربيع انهدم ركن أمن الامامه
واصبحت سرَ من رأى مثل القيامه
الغيبة المهدي المنتظر لاحت علامه
والشيعه من بعده ولاشافو سلامه

هذا حال اولادج اتعرفينه
يمته ياخذ ثارهم مهدينه
سم وذبح سبي وضمه..واويلاه
والمهدي ناصب مآتمه..واويلاه
نوحي عالمسموم يازهرائنه
...
اللهم عجل لوليك الفرج
محمد الجماسي

يا صاحب الزمان يامولاي

الگلب نار اشتعل
خلص دمع المُقل
يثار الله العجل       ابوك اتسمم
______

ننادي والگلب نار   
يثار الله او وعيده
ترد مغتاض يايوم  
تصيح الثار اريده
ثار الچبده مسموم 
بل اچفوف العنيده

ترد الها
تزلزلها
تخلي الدنيا ترتج

تروط الگاع تحتك
تصيح ادخيل بختك

يبن طاها
تولاها
يمينك الله علاها

اخذ حگك مُربّع
على كلشي تربع

يسر الله او بهائه
جلاله او كبربائه
الوجود الك ندائه       يقائد اعظم
________

العجل مولاي مولاي
تعال ابعينك انظر
تعال او شوف الهموم
علينه اغيوم تمطر
مصايب تشده البال
او للدلال تفطر

يوالينه
تره اغدينه
صگر مكسور جنحه

دوانه بيدك انت
يوجه الله او كشخته

منو النه
يخلصنه
يبلسمنه يواهسنه
الهجر طول يغالي
انولينه ابلايه والي

نواظرنه تِـصب
دمعها امن الگلب
تعال امن الغرب        ابعباتك نلتم
______

الك چم ثار مولاي
يتاني الطلعه ويعد
جمعه جمعه عل باب
چم معصوم يگعد
يقره الندبه بدموع
ينشدك يمته وترد

امانيها
تشافيها
جروح البيها تدي

چم معصوم ينطر
ترد الكسره تجبر

يهيبتنا
يشيمتنه
تعال او شوف لچمتنه

يمته ابجيش تزحف
او بيدك سيف مرهف

يعدل كل عوج
يفرح هل مهج
يحل عيد الفرج            او يصير البلسم
______

من الكعبه يايوم
خبر عاجل يصلنه
او نشاهد عج الخيول
او نصيح اهنا فرجنه
تلفي لارض الاعراگ
ايتلگونك اهلنه

خواطرها
نواظرها
تصب ادموع فرحه

زحف عل روس نِقدم
على شخصك نسلّم

نذل الها
نقبلها
چفك ننحني الها

نقدم لك مناحر
يكحلة هل نواظر

تمر بينه
تودينه
لارض سامره تحدينه

تزور العسكري ابهم
تصيح اهنا تسمم

على گبره تون
عزه اتقيم ابحزن
تون . تبچي . تحن        عليه تتألم
______

نطوي اصفاح الاعتاب
او نار الهجر تطفه
انتسامر ليلنه اوياك
او جروح البينه تشفه
نسولفلك على الراح
اشفنه ايام كلفه

على العبره
على الحسره
عن الطف والمها

نگلك بينه غصه
او عله شط عدنه قصه

تچوينه
تأذينه
هجر عباس لسكينه

المشه الصوب النهر
او كسر منها الظهر
اشبعت ون او قهر        عگب الموزم
______

او تگوم او تاخذ الثار
كل احگوگ هاشم
تبدي ابحرگة الباب
او كسر اضلوع فاطم
المات ابسم . واذا سيف
عدوه اتجيبه نادم

تحاكمها
تصلبها
علوج اهل السقيفه

واحد واحد اترد
لجل احسابه يگعد

خليفتها
اميتها
بني العباس جَمعتها

للاحساب اتحظر
او لهم تصبح سقر
خلودن او  مقر             قرارك محكم
______

ابو فاطمة الطائي

فزاعيه

في استشها د الامام العسكري عليه السلام


دار الهاشمي ونت
شال العسكري الليله
——-
شال العسكري عنها
عالي هلمسا ونها
هدها اغيابه واحزنها
بالسم مردوا ادليله
——-
توه ابزهوة اسنينه
غمّض يا وسف عينه
نرجس تنعى واحزينه
ودمع الفرگه اتسيله
——-
انعازي ابفگده مهدينه
بمصابه تهل عينه
شايل والله ايعينه
ونعشه بيده ايشيله
——-
منهو ساعده وعانه
وطفى جمرة احزانه
وحده و دنيا خوانه
اتهدِّم والله ابحيله
——-
شاله وكفنه اوليده
وهال اترابه إبْإيده
ايظل اخلافه اوحِيْده
ايغيب وغيبته اطويله


تمت____
بقــ✒️ــلم بنت الشمري

خلي كل دمنه يتجارة      المُهم تبقه الزيارة
كلها شيعتكم فداء      زلــم ربت كربلاء
*
نوصل ألكم لو يكَطعون النحور
هدموها وكل عقلهم ما نزور
الثار لسه بدمنه يالهادي يفور
هالجرم ما يسكت عليه الغيور
الأمس هيچ لسانة طالع      عن اخيته ما يدافع
عالوطن ذولة بلاء       زلم ربت كربلاء
***
تبقى سامرة بضمير العاشكَين
مطمئن هذا اليحبكم عن يقين
مثل عابس بيكم أحنه مجننين
هالعشكَ بي تحچي يالهادي السنين
من الجرف طبينه بيها       وين چا ذاك حچيها
مرجلة وغيره وأباء       زلم ربت كربلاء
*** 
يا سلام الله على ذاك الضريح
يا هلة بزواري كل ساعه يصيح
أنته حتى الهوى يمك يستريح
ما يصح يبن النبي الا الصحيح
دوم يزهي الهادي كَبرة      يعتقد كعبة الينظرة
تغار من عدها السماء       زلم ربت كربلاء
*** 
آنه من اشتاكَلك روحي تهيم
يا أمير يمدلك چفوفة اليتيم
شكَد فقير آني ألك وانته الكريم
العافكم بالدنيا هذا شكَد غشيم
باچر بيوم القيامة       ينحشر كلمن وامامة
وننصب هناك العزاء       زلم ربت كربلاء
***  
العسكري ما ننسة يوم امصيبته
آل أمية شلون هدمو كَبته
أله رغم خشومها تظل رايته
الدنيا ملهوفة تظل لحضرته
الما تشده انوار كَبرك       ما يميز هذا عطرك
أنت يبن الأنبياء       زلم ربت كربلاء
*** 
سيدي يالعسكري جار الزمن
شوف هاي الدنيا مليانة فتن
چم علامة المهدي من عنده بقن
شوكت يظهر حجة الله ابن الحسن
لشوكت يالمهدي غايب     كلها دنيانة مصايب
فمتى يأتي اللقاء       زلم ربت كربلاء
*** 
حيدر حسين الكرعاوي

أبو ذيات في شهادة الإمام العسكري عليه السلام  .
ـــــــــــــــــــــــــــــــــــــــــــــــــــــــــــــــ


تِحِضرَك فاطِمة الزهرة  لَوَنهَه
تُوِن  وِجــبَال   تِتفَطّر   لَوَنهَه
تِــشاهِد  حَالَك   ٱتغَيّر   لَوَنهَه
يِگطّع  چَبدِتَك  سِمّ  المِنيّة

ـــــــــــــــــــــــــــــــــــــــــــــــــــــــــــــــ

شتِريدِ الدنيا مِن عِندك وَشِلهَه
سِمهَه ٱحشَاك  گطّعهَه   وَشَلهَه
وخَلّص حَتّى مِن عَيني وَشِلهَه
وبُقَت بَس بالدّمه ٱعيوني جِرِيّة

ـــــــــــــــــــــــــــــــــــــــــــــــــــــــــــــــ

إلَك ما أبخَل بحَــسرَة    وَجِرهَا
مُصابَك جَمرَةِ ضلوعي   وَجَرهَا
عَليك الدمعة مَذروفة    وَجِرهَا
ٱنكتَب  باللّوح  يَم  رَبّ البَرِيّة

ـــــــــــــــــــــــــــــــــــــــــــــــــــــــــــــــ

**

هوسات في شهادة الإمام العسكري عليه السلام.
ـــــــــــــــــــــــــــــــــــــــــــــــــــــــــــــــ

وَسفة ٱبن النجابة والشرف ظلموه
ما  رَاعَــوا  گرابة  جَدّه  وحِـشموه
سَليل  الدّين  أهـــل  الجور  سَمّوه

مصدوع  الدِين  وأركانَه

ـــــــــــــــــــــــــــــــــــــــــــــــــــــــــــــــ

وعلى امصابه الملائك تِهمِل العَبرَة
وَبو  صـــالِح  دِلِيله  يِلهَب  بجَمرة
ضَـــــجّت  بالألم  والدمعة  سَامَرّا

ولِبسَت  ثوب  اسود  حَزنانة

ـــــــــــــــــــــــــــــــــــــــــــــــــــــــــــــــ

إبن  حَيدر علي باب  العِلِم  مظلوم
ودَارَه  مظلمة  وبالوَنّة  هذا  اليوم
طايِح  يا  وسافة  والچبِد  مسموم

وظَل  خالِي  وموحِش  دِيوانَه  .

ـــــــــــــــــــــــــــــــــــــــــــــــــــــــــــــــ

بقلم الأستاذ  / ستار عذاب الحچامي

مصابك   حنه يالعسكري اضلوعي
على بابك   وگفت وتهمل ادموعي
اواسي المنتظر جاي     وعليك أرد أنحب اهواي
*
السامره عتنيت ودمعتي بخدي
زرت گبرك وظل بيه الحزن يحدي
يريت ابدال جبدك گطعو جبدي
ادري عليك ناصب فاتحه المهدي

اشوفه   حزين ومنهدم حيله
اشوفه    حاير وحده هالليله 
اصد له وتجري عيناي     وعليك ارد انحب اهواي
*****
من ابعيد اجيتك جيت الفاگد
اواسي المنتظر بمصيبتك رايد
بصحنك جني شفته وينتحب گاعد
خذت حيلي يصيح امصيبة الوالد

حسرته    جبيره وتطحن بروحه
    دمعته    وثگيله امبينه اجروحه  
أمامي وعايش وياي     وعليك أرد أنحب اهواي
*
بمصابك يالحسن تدري انكسر ظهره
ويوميه يموت المهدي الف مره
يون صبح ومسى ومهموم كل عمره
ودم يبچي المصاب المنگطع نحره

مصيبه   انذبح عطشان ابو اليمه
نحيبه    ثگيل وياعظم همه
شگد يعتب عله الماي      وعليك ارد انحب اهواي
**
من شفته انحنيت وزادت احزاني
شگد متعوب امامي او وضعه بچاني
ومن ابعيد اشوفنه تلكاني
هله بالزاير البمصابه واساني

يگلي    اريد اهواي تدعولي
يگلي    دعاء الندبه اقرولي
غريب ونعرف بهاي    وعليك أرد أنحب اهواي
***
يون وعليك اشوف ادموعه سجابه
الله يعينه هالكد يبجي لحبابه
تره المهدي كلف يالعسكري اصوابه
التفت لي وصاح آه يحسين ومصابه


امامي   سنين ودمعته تجري
امامي    شوكت يرتاح ما ادري
أنحب كتله بهداي     وعليك أرد أنحب اهواي
**
بحظرتك ندعي الله ايفرج علينه
الهي عجل النه بفرج مهدينه
طالت غيبته وطال الهظم بينه
كل جمعه نتاني اظهوره تدرينه

بحضوره     يظل بينه الامل يكبر
بظهور         اشفي صدر ابو الاكبر
غربه بدونه دنياي     وعليك ارد انحب اهواي
*
تمت
ميثم العمري