( نزله ليلة مسلم ع ) الشاعر ذوالفقار جلعاوي

شايلها الكوفه اعله جفوفه
................
طبلها والله اليستر صاحو من طب
وبطرف أعيونه أمخوزرهم لمضهضب
ملك الموت بسيفه وجفه صار الرب
والكوفه أدور عالكوفه
........................
الكوفه مزعلته المسلم وتخيل
ياهو اليحمك كالو يحمك من يزعل
أتهدل وبجف العباس من أتمرجل
والواكف يوكع من خوفه
.........................
واحد لثاني يكله اشرد مدري شطر
ريح الصرصر لو مسلم دمدم صرصر
غير اجدامه إيعيننه اعله الشرده الفر
بالكاع اجدامه مجتوفه
............................
شيخ وغثو وكباله الوادم تردس
طك عرك الساده وصكصك سن اليفرس
جا عايز فزعه او وكفت طوعه تهوس
يذبح وتكبر وتطوفه
.....................
بارز لمعلم عالطك من الركبه
والسيف المالاحه بطك جفه إيكلبه
لو يكطع منحر لو يشلعله كلبه
أمحورب صولاته معروفه
.....................
يكلبها الكوفه اعله الكوفه من دمدم
ابشر صاح اعله الطف يحسين ابن العم
مسلم والكضه لو سلم لو أسلم
عباس وهد من تشوفه
....................
....................

( شور حميده ومسلم ع ) الشاعر ذوالفقار جلعاوي

      آخر خطوة عمر            كالو تمر         شيب وصبر
     واني العمري ابتده        بشيبة كبر         من الزغر

             أدور بين الرسوم ملامح للطفوله
       ويفزز صفنتي الشيب وبجي الليل اعله طوله
              
           وترانيمي        بدمعتي وخنكت الصوت
           وترانيمي           تعال ارجعلي لا موت
           وترانيمي          يمسلم فاتك الفوت

               يلأمغرب عن عيوني رحت وين
                تفل عني شراكة بويه روحين
            خذت حضنك و أثر بي من شبكتين
                 أمد إيدي وخليه أترد الإيدين
.................
    فوك اوراق الشجر        بحبر المطر        اكتب أحن
     ورسلهن بالهوه           ونصعد سوه     حضن بحضن

          يراسم دربي الوان يماي وروحي خضره
          عفتني صحره بجفاك ولا بعروكي كطره

           يل بروحي       فصولي الأربعه أدور
           يل بروحي       علك ما فله منذور
          يل بروحي       عفت هيكلها مهجور

              غصن يابس صعد بيه الحزن نار
           وعصف كلشي وخذ طولي الهجر حار
              اليوج تانه الدخانه الغالي يندار
                يماي الله تعال ألحك عالأكتار
....................
     يل هاجرت الوطن      وانه بضعن       كلمن درب
     نمشي بآخر خلك       ولهفة عشك     تجوي الكلب

            بضعنه كل طفل جان ابو يمه ويشبكه
           وحميده أدير العيون يمسلم والله حركه

          وعله خدودي     جوتني دمعتي هواي
          وعله خدودي     ضكتهن بويه بشفاي
          وعله خدودي     شلت بوساتك وياي

            طرف ردني المسح بدموعي خلصان
              عجب جفك ولا يخلص كبل جان
              يتاركني مثل صوره اعله حيطان
               بملامح وجهي تخنك بويه تربان
................
     بنص الدرب وعبر      يكسر ظهر        طارش هظم
      من الناكه طحت      مسلم صحت      ليش اليتم

             أشوفن كل الأوجوه أجت تركض عليه
             شبكني عمي الحسين ويقبلهن أديه

           وبجه أكبالي        ومسحلي بجفه عالراس
           وبجه اكبالي        وشبكني عمي عباس
           وبجه أكبالي        وبده يجرحني الأحساس

                    وعليه إيخيمن كل العبايات
                وبديت اقره الوجوه البيها صفنات
                وحضن زينب حجالي الكله رجفات
                  البكه براسج حميده مسلمج مات
..................
..................

قصيدة في شهادة مسلم بن عقيل ع  ،  لسان حال حميدة  …
ـــــــــــــــــــــــــــــــــــــــــــــــــــــــــــــــــــــــ


يالغايب إنتَ حاضر    يا بويه بالروح
ــــــــــــــــــــــــــــــــــــــــــــــــــــــــــــــــــــ

من روحتك هاي
سَلّـــــتني دنياي
وردة ويبس جذرها ومشتاگة للماي

يا بويـــه يالعـود
أدري إنتَ متعود
أيامي ويه وجهك ما ترجع ٱردود

يا من عفت حميدة    لفراگك ٱتـنوح
يالغايب إنتَ حاضر  يا بويــه بالروح
ـــــــــــــــــــــــــــــــــــــــــــــــــــــــــــــــــــــــ

طفلة وعفتني
يــاليتّـمِــــتني
شَيّب يبويه راسي من فارگتني

غصني آنه ذبلان
ودلّالــــي نــيران
من غيبتك يبويه ظل دمعي نهران

طـــفلة ٱبتعد أبوها    ما حسبته ٱيروح
يالغايب إنتَ حاضر    يا بويـه بالـــروح
ــــــــــــــــــــــــــــــــــــــــــــــــــــــــــــــــــــــ

راودني طيـفي
چن إنتَ ضيفي
عن حالي أشتكيلك وبچي ٱعلكيفي

أنـظر دمـومك
غطّت رسومك
وبظلمة المصايب غارت نجومك

من كل كتر أشوفك    يالغالي مجروح
يالغايب إنتَ حاضر   يا بويـه بالــروح
ـــــــــــــــــــــــــــــــــــــــــــــــــــــــــــــــــ

يا جرح أداويه
يا جرح أخلّيـه
فرض البچي ٱعلى حجرك يا بويه أصلّيه

وآثــار الحـبال
مطبوعة بالبال
يالجثتك رموها من قصر الٱنذال

بحساسي أدري واگع    بالكوفة مذبوح
يالغايب إنتَ حــاضر    يا بـويه بالروح
ـــــــــــــــــــــــــــــــــــــــــــــــــــــــــــــــــــ

وين إنتَ ما وين
واساني الحسين
بيده ٱعلى راسي يمسح والدمعة بالعين

بهاللحظة يا ناس
مؤلـم هالٱحساس
طفلة ٱعلى أبوها مسلم أبيض غده الراس

محد عرف شعوري    بس دمعي مسفوح
يالغايب إنتَ حاضر    يـا بويــه بـــالروح
ـــــــــــــــــــــــــــــــــــــــــــــــــــــــــــــــــــــ

بقلم الأستاذ /  ستار عذاب الحچامي

ليلة مسلم ابن عقيل
اول شهيد من القصر يرمونه
ضل بمكانه وماكو الي يشيعونه
كل اضلوعه متهشمه
مثل حسين ابن عمه
/////////////////////
منا بدايات الحزن من مسلم لحد النحر
ومنا بدايات العطش من الخيم حد الگمر
ومنا بدايات الكسر والگسره جانت بلضهر
التمو عليه من كل كتر وحجارهم مثل المطر
  بحر الضهر ويدكدكون البيبان
  ‏بلكوفه خلوله اذن بالحيطان
  مسلم عاشها الجمه
مثل حسين ابن عمه
/////////////////////////
بالكوفه كلها تحزمت صلو وراه يمكن الف
صله وكضه من التفت ماضل ولاوحد عرف
خانوه وضل بوحده والغيره كامت تختلف
بس طوعه هيه اتلگته وكام بختها ينحلف
البيت الك والنه الخله وتفضل
انت كنز  بس انت ماتتحص
الرايد دين شيفهمه
مثل حسين ابن عمه
////////////////////////
حزنت ملاكة السمه لمن طلع خيط الصبح
سلم عله حسين وبچه وبدمعه يحجيله الشرح
الكوفه خانت كل وعد وماغزر وياها الملح
سود الوجوهه اتلثمت  وعيونهم شمرت رمح
اشباه الرجال وبيهم ولارجال
وجروح مسلم جانن هواي اثگال
منگع ثوبه  من دمه
مثل حسين ابن عمه
////////////////////
‏مرسالك الاعظم وصل لمن قروه محد فهم
  يحسين اتحضر بعد جايلك و مثل السهم
  النار شافاهه شكثر يمكن يحركون الخيم
‏شاهك دمع لاموهوه من العطش هم ماسلم
  دم عله راسه وراسك مخضب راح
‏ جم سهم يحمل گلبك وياه ارماح
‏طاح وكتلته الصدمه
‏مثل حسين ابن عمه
////////////////
وكفو سره جن مسطره والناس يمه اسطرت
‏متانين طيحت مسلمك التمو عليه وتشمتت
‏شمروه من فوك القصر وضلوعه كلها اتهشمت
‏ لاغيره عدهم لارحم من طاح  كلها  اتكترت
‏اتصور بمسلم هيجي حاله صاير
‏يحسين بس انت اليسحكك حافر
  ضامي وماشرب همه
  مثل حسين ابن عمه
  ‏/////////////////////
محمد الهاشمي

لمولاي مسلم بن عقيل ع

شيل سيفك ياسبع هزهه الارض
واگلب الميدان بيهم وانتفض
بحيله نازل جابهم طول ابعرض
وحده  ع العدوان ضل يفرض فرض


نزل سبع الكوفه .. وتشل خطفة سيفه
بالمعارك هيبه .. ابچفه ياخذ حيفه
سطره من ايمينه ..القاده جرهه بكيفه
___
هب عجيد الگوم حار ابغيره طب
ناوي بأرض الكوفه يشمرهه الرگب
هوه واحد لچن طب شايل غضب
المسلم المهيوب منهو الي گرب


هلا بزود حسينك .. يالتوافي عهودك
من گمر بني هاشم ... يبو طاهر زودك
لو تسل ابسيفك ... تراجفو بوجودك 
____
ماكو واحد شهم لاگاه بالقتال
زلزل الميدان باشباه الرجال 
هذا يافارس تقدم للنزال
الكوفه رجفت غير مسلم بيهه صال


الشاف طولك خايف ... ويرجف من ايمينك 
راعب الخياله .. وتسطر ابچفينك
القاده ترجف گامت... منهه نضرة عينك
__
هذا يومك ها يخلاس الزلم
وانته من عباس ماخذلك عزم
هلهلت طوعه وتنادي ياشهم
عمك الكرار حيدر والنعم 


انت عمك حيدر ... رفع راس الساده
مخوف العياله ... وذالهم بعناده
انت بزرة هاشم .. لاوي چف القاده
____

حسين الفاطمي

نزال لمولاي مسلم بن عقيل عليه السلام


جدح غيض ابعينه وتسرفن للحرب
هلا براعي الغيره الدخل بيهم رعب
ابو طاهر واحد ولاغيره بشر
ابو طاهر مغضب دخيله من يطب


شد عمامته وطبهم .. دخيله
وسط الكوفه شمرهم  .. دخيله
خيال الحرب مغضب اجاهم
من چفوفه شيهدهم .. دخيله
////////////////////////////////////
ياخيال البيده ويافراس الشدد
اهو واحد لكن فلا همه عدد
ابن ذاك الفدائي الاسد وكت الحرب
علي عمه وابوه الولد من هالاسد 


مسلم  صعب تفسيره .. دخيله
هوه ولاتضن غيره .. دخيله
مسلم  واحد وراعب زلمهم
الهاشم ورث هالغيره  .. دخيله
/////////////////////////////////
عليهم ناوي ونزل يفرض فرض
تفت شمرة سيفه وغدت كلهه ركض
يسبع الكوفه وتتعب يمنتك
بعزم سيفه يحارب سحلهم بالأرض


مسلم طبهم بسيفه .. دخيله
العدو يتراوه اله بطيفه .. دخيله
مسلم ياسلام الله اعله اسمك
بيهم يذبح بكيفه .. دخيله
/////////////////////////////////
هلا براعي الزود وهلا براعي الستر
ياصمصام الغيره الردع بيده الكفر
هلا بزود حسين وابن عمه الكفو
ابو طاهر هيبه وكلف وكت العسر

عالي الشان طب ليها .. دخيله
القاده ينتچي اعليها .. دخيله
كلهم بالقصر دخلهم انذار
الكوفه بسيفه داحيها ... دخيله
///////////////////////////////////
حسين الفاطمي

كلفه حسينه ... ودمعته بعينه
دخيل ابو طاهر .. دخيل چفينه  


مسلم نزل   .. دخيله
جاب الأجل .. دخيله
هيبه الفحل  .. دخيله


سمه بأسم الله وحمل بجفوفه
سيفه والعدوان كلها تشوفه
دخلو انذار ورعبهه الكوفه

هذا مسلم والحرب تعويده

هيبة علي .. يمسلم
_
بالفعل يصنع .. بالشدد يفزع
مسلم الهيبة .. طكته ما ترجع


رد الزلم    ..  دخيله
مسلم شهم  .. دخيله
غيره وعزم .. دخيله


مسلم الصاح  وعدل ميدانهه
طاحت الخيل وسحل فرسانهه
ابوطاهر  والشدد عنوانهه

طب رعبهه الكوفه صارت بأيده

هيبة علي .. يمسلم
____
بالشدد گدهه .. والزلم ردهه
هذا زود حسين .. والحرب شدهه

رداهه رد  ... دخيله
وانطه العهد ... دخيله 
زلمة شدد ... دخيله


هذا مسلم گدهه بأوقات الشدد 
ابو طاهر وانطه لحسينه وعد
الكوفه لو خانت اردهه بسيفي رد

روسهم بالكوفه صارت عيده

هيبة علي .. يمسلم
_
زوده من حيدر .. حيد المعتبر
ابكل جمعهم ذاك .. الوحده ظل يفتر


طش الدمه ... دخيله
حامي الحمه  ... دخيله
حيد ازلمه ...  دخيله

وحده لاگه الجيش مسلم بالنزال
طبهه واشتدت ميادين القتال
والمنايه تريد قادات ورجال

رادهه وسوح المنايه تريده

هيبة علي .. يمسلم
_
حسين الفاطمي

(( سـفـيـر الـمـرجـلـه ))



مسلم الحق ... يا سـفــيــر الـمـرجــلــه
مسلم الحق ... زلـــزل القـصـر وهــلـــه
مسلم الحق ... بـالـركـض خـلـي الـزلـم
مسلم الحق ... خـلـها تـوصـل كــربـلــه

رجـال = شهم مسلم شهم
خـيال = شهم مسلم شهم
زلـزال = فـعـال = قـتـال= شهم مسلم شهم

أســد مسلم زئــر كـفـو الكـل يـهـابـونــه
جـمـر مسلم شعل غضب غيض البعيونه
حـصـد مسلم رگب أرض فاضت بدماها
غـضـب مسلم جدح بـرز فنهم يـدنـونـه

مسلم دخيلك ... مسلم دخيلك
                   "" "" "" "" "" "" "" "" "" "" "" "" ""
مسلم الحق ... هـيـبـه يـجـنـاح النـسـر
مسلم الحق ... رجـفـت حــتــه القـصـر
مسلم الحق ... مـن نـضـرتـك بـالحـرب
مسلم الحق ... سـوي بـالـضـدك عـسـر

راهب = شهم مسلم شهم
غـالب = شهم مسلم شهم
راعب = سالب = حاجب = شهم مسلم شهم

شــبـه مسلم علي ضـهـر حـارت الـوآدم
فـحـل مسلم يهز أرض من يكض صارم
طـلـع مسلم شمس چوه الواگـف أگبالـه
رجــز مسلم بــعــد بـــرز ألــبــرز نـــآدم

مسلم دخيلك ... مسلم دخيلك
                   "" "" "" "" "" "" "" "" "" "" "" "" ""
مسلم الحق ... چـفـك مـخـورس زلــم
مسلم الحق ... عـالـي مـالاحـك نــجـم
مسلم الحق ... الشافك يصيبه العجب
مسلم الحق ... حـيـلـه مـنـك مـنـهـدم

بـاخـع = شهم مسلم شهم
لاســع = شهم مسلم شهم
ساطع = رافـع = نـافـع = شهم مسلم شهم

يـهـد مسلم حـصـد رگـب رأسـه يجادح
يــزم مسلم أسـد هـجـم بـالـزلـم ذابــح
سـطـع مسلم بدر عمه الشاهد أرسومـه
گـطـع مسلم درب بــقــه ألشـهـم نـايـح

مسلم دخيلك ... مسلم دخيلك
                   "" "" "" "" "" "" "" "" "" "" "" "" ""
مسلم الحق ... وجهك يفـوق الشمس
مسلم الحق ... ينسمع حچيـك همس
مسلم الحق ... من يگض جدمك زلم
مسلم الحق ... بالبطن يـرفس رفـس

كاسـر = شهم مسلم شهم
عابــر = شهم مسلم شهم
عـالـم = دايـم = فـاهـم = شهم مسلم شهم

ذبح مسلم عجب كـتـب صـاگـر الحومـه
خطف مسلم جَمَع بـصــر فاحت أعلومـه
شهد مسلم بـطـل نـعـم حـتـه عـدوانـــه
دخل مسلم ركض نزع الفارس اهدومـه

مسلم دخيلك ... مسلم دخيلك
                   "" "" "" "" "" "" "" "" "" "" "" "" ""
عبد زينب
محمد مسلم الأسدي

https://youtu.be/8SMuSAZ6v2U?si=__6h0QFbXusCY2vz

سلام الله عليك يا مولاي يا مسلم بن عقيل 🙏

نزله.   مسلم ابن عقيل

قصه الاهيه... بسمك وقف هيه... هاي السفاره


كلها راحت وانت خالد..... گبتك اعظم دليل
والعطش صار بحضرتك....ماي يتوزع سبيل
ياسفير حسين انت......من صنعت المسحيل
جوه رجلك كل قصرهم...صار مكسور وذليل
واليوصل الكوفه.  بعيني يجي يشوفه
.قصر الاماره .........    هاي السفاره
**
صرت باالكوفه انت معلم...شامخ بكل العصور
وچي امان الله بحضرتك......بيها ترتاح الطيور
والهوى يمر اعله صحنك.....خاطر يخلي عطور
براحه نفسيه عجيبه..............يشعر الرايد يزور
عطر الامامه أنت.....كل المجد نلته...
..بزود وجداره ......هاي السفاره
**
ألف عام عليك وأكثر....وانت قرآن الخلود
بحر.ياالكلك معاجز...  شما خذو منك تزود
مرتبط هذا وجودك.......سيدي بكل الوجود
من اخر الدنيا تجيلك.........كلها زوار اوفود
قائد وابن قائده....رف بيرغ الساده...
فوگ المناره......هاي السفاره
**
العنده شده ويعتنيلك......يمك يفل الشداد
ماكو مؤمن عنده حاجه...ومااخذ منك مراد
دار كل واحد يضدك...... راحت وصارت رماد
كل مجاهد راعي مبدأ......انت علمته الجهاد
كلمن نوه الثوره.....عندك اخذ دوره...
وحدد مساره......هاي السفاره
**
الشمس مايخفي ضواهه...شما كبر حجم الغيوم
الباطل اشما طال حبله...فترى يبقى وما يدوم
وكل خفافيش.السياسه ... تطيح ماتگدر تحوم
وانت الك هاي المناير.......تسجد عليها النجوم
كل نجمه تهواهه....وتصلي فوگاهه..
وتقره الزياره.......هاي السفاره

سعد العبودي

نزلة / مسلم بن عقيل عليه السلام. 2024

مسلم هذا وهاي اخباره
٠٠٠٠٠٠٠٠٠٠٠
حي مسلم لو ردت تشوفه
أطّـهّــر ودخل للكوفه
بعينك راح تصد معروفه
من گبته اتشاهد انواره
٠٠٠٠٠٠٠٠٠٠٠
ما مات الضحّه بدم راسه
عايش يبقه بفكره وناسه
ومسلم ثبّت بالدم ساسه
شتكول البحسين اختاره
٠٠٠٠٠٠٠٠٠٠٠٠٠
عن مسلم رايد برهاني؟
لا تسأل وجه السفياني
أسأل طوعه وأسأل هاني
يحجولك عن دينه وثاره
٠٠٠٠٠٠٠٠٠٠٠
ما طخ لبن زياد وحكمه
من اجل الاسلام واسمه
مسلم ضحّه بنحره ودمه
وذل جيش الكوفه ابّتّاره
٠٠٠٠٠٠٠٠٠٠
ما عاف حسين ولا باعه
باخطر موقف مسلم طاعه
هز عرش الظالم وتباعه
فرسان بمسلم محتاره
٠٠٠٠٠٠٠٠٠٠٠٠
ذَكّر خصمه بفارس خيبر
ظل يحصد برگاب العسكر
يم مسلم يكرب من يگدر
يكطع راسه ويهدم داره
٠٠٠٠٠٠٠٠٠٠٠٠٠
ما يوكع لوما يغدرونه
مسلم مچتوف يهابونه
من قصر الظالم يرمونه
ما مات تخلّد بفكاره

سيد زيد الفحام
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

فايزي/ مسلم بن عقيل عليه السلام 2024

يا والدي ليمته انتظر عذّبني فرگاك
لا ميته حتى انسه الألم لا اكدر انساك
بويه يا مسلم.              بويه يا مسلم
٠٠٠٠٠٠٠٠٠٠٠
مسلم يبويه تيتّمت لو بعدك بخير
بنتك حميده اتعذّبت ما عندي تفسير
ما ادري بيك بيا بلد ما ادري شيصير
بس ادري يا مسلم ابد ما ترحم اعداك
٠٠٠٠٠٠٠٠٠٠٠٠٠٠
ظليت اتاني عله الدرب صبح ومسيه
مسلم يبويه وكل خبر ما رد عليه
طفله وذبح گلبي الألم ما تدري بيه
اكعد ونام عله الدمع يابويه بجفاك
٠٠٠٠٠٠٠٠٠٠٠٠٠٠٠
بنتك حميده بياوضع مهدومة الحيل
أسأل عليك بكل وكت والمدمع يسيل
سهرانه عيني بغيبتك ما نامت الليل
دلّيني وين بيا بلد اتعنّه ولگاك
٠٠٠٠٠٠٠٠٠٠٠٠٠٠٠٠
كالولي للكوفه رحت بويه وتعنّيت
حيلي انهدم ياوالدي باللوعه حسّيت
يعني انغدرت بلا أهل بالكوفه ظليت
گوم آل اميه غدرتك متعطشه لدماك
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
هذا الخفت منه حصل ياوالدي وصار
بالكوفه غدروك العده وصلتنه الاخبار
وحدك يمسلم بالحرب قاتلت الاشرار
اول شهيد استشهدت والباري علّاك
٠٠٠٠٠٠٠٠٠٠٠٠٠٠٠٠٠٠٠
مسلم يبوبه ما طحت بالكوفه غدروك
مچتوف من سطح القصر للگاع ذبوك
واليفجع ويدمي الگلب بحبال جرّوك
ظليت أون وجري الدمع يابويه ونعاك

سيد زيد الفحام
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

رئيسية/ مسلم بن عقيل عليه السلام 2024

لا اخشى سيفُكَ فالتعَلَمْ يبنَ زيادْ
فأنا مسلم لذوي الكُفرِ لا انقادْ
لحُسينٍ روحي وديني
جبروتكَ لا يُثنيني
فأنا مسلم لذوي الكُفرِ لا انقاد
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
أنه الهز عرشك بسيفه ورعب اسمه
سفير حسين آنه وآنه ابن عمه
مسلم آنه زلمه ومن ظهر زلمه
ابد ما خاف منك احجي بالهِمّه

لا اخضعُ لكَ يبنٓ زيادٍ لا اخشاك
فأنا من عُشّـاقُ حُسينٍ اتحدّاك
إن تَقتُلني يُحييني
جبروتكَ لا يُثنيني
فأنا مسلم لذوي الكُفرِ لا انقاد
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
لا جيشك يهمني ولا كُبر قصرك
اقدم دم وريدي ولا اطيع امرك
يهودي وناصبي بافعالك وفكرك
عشت بالذلّه يبن زياد كل عمرك

إن تَقتُلني فأنا الفائزْ والمنصورْ
تفنى يبنَ زيادٍ وانا ابقى نورْ
فرِضى ربِّ يكفيني
جبروتكَ لا يُثنيني
فأنا مسلم لذوي الكُفرِ لا انقاد
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
اميرك طاغي فاجر كافر ومرتد
واميري حسين ابن المصطفى الامجد
اليطيع حسين لاشك اسمه يتخلّد
أنه مسلم سفيره وبالولايه اشهد

لا اغدُرُ رَيحانَةُ طه لا واللهْ
عهدُ حُسينٌ عهدُ مُحمّد روحي فداهْ
بحُسينٍ زادَ يقيني
جبروتكَ لا يُثنيني
فأنا مسلم لذوي الكُفرِ لا انقاد
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
يگلّه شهالشموخ البيك ما خايف
مثل وگفة اسد بين الزلم واگف
أنه ابن زياد اخيّرك بالك تخالف
تبايع لو تموت بموقفك عارف

لا يبنَ زيادٍ ليَزيدٍ لن اختار
الموتُ ولا ذُلُّ النفسِ وثوبُ العار
مكتوبٌ ذا بجبيني
جبروتكَ لا يُثنيني
فأنا مسلم لذوي الكُفرِ لا انقاد
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
اضحّي بروحي وبدمي لبوالسجاد
ولا أخضع وعيش بذلّه يبن زياد
حيـاة بلا ابـوالأكبــر فلا تنـراد
اموت بسيف بس عايش بالاستشهاد

لنْ تَمحوَ ذِكِري يا ظالمْ سعيُكَ ضالْ
سَيُخلُدُني الموقفُ هذا للأجيالْ
مَن مثِلُكَ لا يُغويني
جبروتكَ لا يُثنيني
فأنا مسلم لذوي الكُفرِ لا انقاد
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
اذا تقتلني مو مرّه الف مرّه
من حسين ابد هيهات اتبرّه
كل قطره بدمائي تعشكه كل ذرّه
ابن عمي وامامي حسين ابوالعتره

ستموتُ واحيى بدمائي حينَ تَسيلْ
فأنا رَبيبُ عليٌّ عمي وبنُ عقيلْ
اصبرْ واللهُ مُعيني
جبروتكَ لا يُثنيني
فأنا مسلم لذوي الكُفرِ لا انقاد

سيد زيد الفحام
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

مقدمة/ مسلم بن عقيل عليه السلام 2024

من عفتني./  عذّبتني/ بويه يا مسلم زغيره وشيّبتني
٠٠٠٠٠٠٠٠٠٠٠٠٠٠٠٠٠٠
يابويه بجروح الگلب.     ظليت اتاني عله الدرب
موتدري عالطفله التحن.   فكد الابو كلش صعب
أسـأل عليك بدمعتي.        گالولي بديار الغرب
يا مسلم وحيلي انهدم.     ودمع الحزن من دم يصب

بانتظارك / ظلمه دارك/ يمته ترجع عالهجر ما عوّدتني
٠٠٠٠٠٠٠٠٠٠٠٠٠٠٠٠٠
ذبلن عيوني امن السهر.      وماردلي من عندك خبر
لشوكت احسب وننتظر       يابويه مو طال السفر
ذبلت حميده امن الحزن.    مو كافي موتني القهر
ذابن جفوني امن البچي.     ومابيّن لشخصك اثر

حن علية/ ردّ الية / بويه ما تدري بغيابك موّتني
٠٠٠٠٠٠٠٠٠٠٠٠٠٠٠٠٠٠٠٠٠
حنّيت بويه لشوفتك.     مو كافي طالت غيبتك
خنگتني ايام الهجر.       يابويه ارحم طفلتك
مسلم يبويه تأخرت.     والكوفه بس لا غدرتك
يلچمني گلبي امن الألم.  حسّيت بويه بوحدتك

ماكو راحه / بس مناحه / حايره ومهمومه ياريتك شفتني
٠٠٠٠٠٠٠٠٠٠٠٠٠٠٠٠٠٠٠٠٠٠
وي عمي سرت بقافله.    يابويه رحنه لكربله
لن طارش بنص الدرب.   امن الكوفه جاي براحله
وحسين عمي ستوقفه.    يابويه عنك يسئَلَه
عاينت نزلن عالوجه.      دموع المصيبه الهامله

شفته يبچي / ودمعه يحچي / عمي يابويه وعرفتك يتّمتني
٠٠٠٠٠٠٠٠٠٠٠٠٠٠٠٠٠٠٠٠٠٠٠
ناداني عمي وليه رحت.       يابويه وبحجره اگعدت
يمسح على راسي وبچه.     يعني انت مقتول اعرفت
سالت دمعتي عله الوجه.     يابويه يا مسلم صحت
آنه بمكانة والــدج.             من گلي عمي اتصبّرت

بس حنيني / شد ونيني / بويه يا مسلم تمنّيتك خذتني
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
گالولي من أعلى القصر.      ذبّوك اصحاب الغدر
وفيت بويه وما خنت      لحسين ضحّيت العمر
لمن وصل لينه الخبر.    ناح وبچه عليك شكثر
يا والدي واسمك خلد.   وعند الله مضمون الأجر

سهّرتني / وفجعتني / للحزن والدمعه بعدك سلّمتني

سيد زيد الفحام
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠