تدري بيها روحي عندك
ونتظر....يابويه  وعدك

واحسيناه......واحسيناه
*
طيفي فسر روحتك كلبي انچوه
ياحلم عاش... ابخيالي المحتوه
جرحي مايرهم دوه ضاع الضوه
انت بنفاسي وعلي  يسري الهوه

لو تجاوب...دمعه ردك
ونتظر ..يابويه وعدك
****
انه  متعوده عله صدرك بي اشم
گعدتك  چانت  تمرني ابكل حلم
حسرة   الفاگد  ابوها  اشكد تهم 
مثل ...حيلك  بويه وياك  أنهدم

والدمه ايسيل عله خدك
ونتظر......يابويه وعدك
****
كون  اهزن  رايتك  وشبع عشك
والله يحسين .. بغيابك  احترك
شايف  المشتاك گلبه  شگد يدك
بداري  مگطوع الهوه بأه اختنك

والهجر ياخذني بعدك
ونتظر...يابويه وعدك
****
عمري.....مر بلا طعم عشت دمع
ينذبح ليش الضوه بطول الشمع
خايفه ...يحسين گلبي  ينصدع
باچر ...الخيل عله ظهرك تنطبع

بويه لوتشرحلي قصدك
ونتظر.....يابويه وعدك
****
اشبگ  ابطيفك وحس جاي الگلب
ياحلم باقي عله شوفك هم صعب 
بيا  وگت  يحسين  لو  داري تطب
احذف  ايامي  العشتهه بس غرب

اشگد اتاني بهذا عهدك
ونتظر....يابويه وعدك
*
راحت  ايامك  وشوفك بس جرح
انه ميته ومن تجي يعيش الصبح
وجهك  ينگط  محنه  اشگد سمح
انذبح.. واسنيني خلصت عالرمح

بطيحتك منهو اليسندك
ونتظر.....يابويه وعدك
*
#تمت....بعون الله تعالى
#خادمكم....يوسف الفتلاوي

#العليله ....

اوياكم اخذوني - لا تخلوني - والله يابويه عليكم يعمن اعيوني
                            ****
بويـــــه اطلبنك طلب بس لاتردني
اوياكم اسرج خيلكم يابويه اخذني
خبــــر رحلتكــم يبو الاكبر جرحني
شرد اجــاوب گلبي لوعنكم نشدني

بويه بغيابك - تجرح احبابك - طاقه مابيه الفگدكم لاتعذبوني
                          *
والله ما اصبــر على افراگ العقيله
بويــه هـذا اوداعكـــم مابيـه حيله
اشلون وحدي اتعوفني وانه عليله
صعبــه عالخــل لمـن ايودع خليله

ليش ألنودهم - دوم نفگدهم - بويه بطل من سفركم لاتجرحوني
                         *
بويـــــــه اترجـــاك خل عبدالله يمي
بيه اسلي ارويحتي وبيه اجلي همي
لون يرحل يحترگ بغيـــــــــابه دمي
مـــن كثر مابسمه ألهـج ناسيه اسمي

هل طفل غالي - ومهده ضل خالي - اوياه اگضي ايام عمري فدوه عوفوني
                        **
مـن طلع يابــويه مــن يمــــي ضعنكم
بويــه ضلت شــابحه اعيوني ابدربكم
بحرگه گمت اركض وشم بتراب اثركم
اشلون بيــه لو علّي طــــول سفــركم

ابقه مشتاگه - اليوم الملاگه - گلبي مايحمل مصايب يهلي ارحموني
                        **
بويـه راح اشتاق لسكينه اورقيه
افاراگهن لا موسهل يصعب عليه
چنت انام واگعد اوياهن ســـويه
وهسه عافنـــي ومشن للغاظريه

تجري دمعاتي - الفگد اخياتي - اهواي عذبني بـُعدهن ونتو تدروني
                      ***
        الخادم
كامل السعيدي

الشاعر كامل السعيدي بصوت حسين عدنان الكوبعي

السلام على فاطمة العليله

عافوني بغربتي     يمهدي ودمعتي 
ودموعك ودموعي     دم تجري لعمتي 
•••••••••••••
من طلع ضعن الهواشم    والدمع مني يصب 
خلصن ادموعي ولگيته   ينزف ويبجي الگلب 
ياالعايش اويانه بكل زمن     ادري 
    إلك وحدك ياقائم     اشتكي امري 
لان مثلي اعله زينب     دمعتك تجري 
يمهدي 
دمعاتي امجرحه    عالنوگ الرايحه 
وابابي    لحبابي    منتظره بلوعتي 
•••••••••••••
فترة إلعافوني وانه     جنت احس ابدمعتك 
تدري لسه الدار وحشه   وانت طالت غيبتك 
داري بلا زلم    بس انه اون فيها 
يمهدي      بكربله اندفنت اهاليها
ادور آثارهم    أگعد اشم بيها 
يمهدي 
يا لعايش بالفله    وديني لكربله 
بچفوفك    ودموعك    انصبها إلخيمتي 
•••••••••••••
عللهزل مچتوفه زينب     راحت ابين الزلم 
تنضرب والروس تهتز     والمناحر تنلچم 
تعاين عالجثث    متوسده بغربه 
  تعاين عالحسين      اهدومه متسلبه 
بعد ذاك السهم     شايل ثلث گلبه  
    گلبه يمهدي
يا المن دم دمعتك    تجريها لعمتك 
واسيني    بجيني    اشكيلك هضمتي 
•••••••••••••
آه يا المهدي ورقيه     بالخيام إلتحترگ
إلگال مامچويه كلها    راح أگولن موصدگ
تركض عالجمر    والشمس ظهريه 
تضربها السياط    وهيه مچويه 
نادتهم بعد السوط    مابيه  
  رقيه يمهدي 
وعباس إعله النهر    وحسين ابلا نحر 
من وني     ومن ونك     مجلسنا إلعيلتي 
•••••••••••••
من اجى الناعي وسمعته     ايست من كل امل 
   الا انت ويمتى جيتك     دمعتي تنادي العجل 
عجل مابقى بالروح    كل ونه 
وابيت الزچيه      يصير مجلسنه
صبح العاشر    اعله حسين نتعنه
يمهدي
بكل من نمر     لزهره ننتظر 
وبونتك    وبونتي     وبونة جدتي 
•••••••••••••
انتظر جيتك يمهدي    اشعندي غير الانتظار
لهجتي وتسبيحي تدري   من دعاء الندبه صار 
اصليلك قضاء الحاجه    كل ليله 
متى الغايب يربي     يصير تعجيله 
عبد الله اريدن     ماي اوديله 
يمهدي 
وبالشام اهناك اخت    بحسرتها اني متت
وإلعمتي     وإلإختي    يالوعة حسرتي 
•••••••••••••

الخادم 
كريم التميمي

تمنيت المنيه گبل الوداع
..................................... ََ........
أريد  اشبع  وداع  وشوف  منهم
واحط راسي اعله صدر الفركتهم
أريد  أغفى  العمر  كله بحضنهم
السفينة أشلون تمشي بلاية الشراع
.................................. َ.............
السارو  بالضعن  وابعدوا عني
وأنه  غير   المصايب  ما  لفني
بعدهم صار  والله  النوح  فني
على البيبان أعاين كل عمر ضاع
.........................................
اعاين   عالدرب  مشدوهة   البال
ودمع العين فوك أخدودي همال
بنيران  الهجر  مني   الحمل  مال
مثل شمعة أحترك واتجوه عالكاع
...........................................
شاغت روحي ويلي من الفراك
أحن  ليليه ليكم  يهلي وأشتاك
من  عندي  العمر  ليليه  ينباك
أمن أكلب بالصور  ياخوتي كلساع
..............................................
أعاين   عالدرب  وادموعي   بالعين
لا طارش      يمرني        ولا نساوين
أصيح بصوت بويه الحكني يحسين
عليلتكم      بقت     من غير    فزاع
...............................................
خادم خدمة الحسين
الشاعر
محمد الموالي

وراكم    يا هلــي ثابت يقيني   
وراكم    أنتضر موتي يجيني
يا هلي
....................................................
بقيت ودمعتي بخدي هلي وبيا جرح تبدي
العليــله
ألمن أحسب أيامـــي هجركم ذابح أحلامي
القليـــله
مشيتوا ولا خبر منكم أسولف أسأل أصوركم
وسيــــله
بعدكم بيمن أتصبر ونيــــران الهجر تسعر
يـــــويله
وراكم     ثوبت دمعات عينـي
وراكم     أنتضر موتي يجيني
ياهلي
.........................................................
كعدت أبابي محتاره واليفارك هلـــــــه ناره
تفضحه
بين الشوك والفركه واليتاني ضوه الملكــــه
تذبحـــه
الفاكد سلوته دمعه ويريد اليكعد أيسمعـــــــه
ويفرحـه
مشيتوا اوحدي عفتوني بعدكم خابت أضنوني
يجرحــه
وراكم    يا هلي فايض حنيني
وراكم    أنتضر موتـي يجيني
ياهلي
.........................................................
تمنيت الوكت يرجـــــع وضعنكم كبل لايطلع
وأعوفه
أجي يـــــــم والدي بلهفه وأبوسه وأكعد بصفه
وأشوفه
واحشم عمي أبــو فاضل ويترس مدمعي الهامل
جفوفــه
وأكله بوالدي أتوسل وحلفـــــــــــه بزينب ويقبل
وأطوفه
وراكم     شلي بيامي وسنيني
وراكم     أنتضر موتي يجيني
يا هلي
.........................................................
أمن أذكـــــــر ذيجه لمتنه كعدنه أهنانه سولفنه
يويلي
رقيه وياها جنت ألعب وأركض لأمي من أتعب
يحيلي
وعبدالله أجــــــــــي عنده وأسهر وأغفه يم مهده
يليلـي
أفــــــك عيني بضوه عيني أبوبه وهيبتي حسيني
دليلي
وراكم     صفه نوحي اوونيني
وراكم      أنتضر موتي يجيني
ياهلي
.........................................................
صوركم عاشت أبالي يهلي وموتي يحلالي
وأريده
أدور أثــــــر ممشاكم ودمعي جرح فركاكم
نشيــده
أكلب بالصور وأدري شوفتكــــم حلم عمري
بعيـــده
ما بيكم أثـــــــر رجعه دمعه وطاحت الدمعه
شيعيده
وراكم     عن يساري وعن يميني            
وراكم     أنتضر موتـــــي يجيني
ياهلي
.........................................................
خادم خدمة الحسين
الشاعر
محمد الموالي

الليلة الثالثة. العليلة
…… ....


أنه نسمه بهواكم هواكم
هلي وگلبي هُواكم هُواكم

  بالغرب عفتوني. ليش ماخذتوني
            
               گلبي هُواكم

………………………………………… ……… .
1
هلي يهل الرحم والرحمه رحموني
عليلتكم غريبه بغربه عفتوني
سبب هالعله من يوم الجفيتوني
اليگلي شلونچ أبچي ويعرف شلوني

خطف لوني بُعدكم بُعدكم
ومتت يهلي بَعدكم بَعدكم

لون عاشر لوني.   ليش ماخذتوني

        گلبي هواكم
……………… …………………………………
2
إكبار جروحي وآني ياهلي بزغري
شلّي بعمري وآني فارگت عمري
ما أدري شسولف والله ما أدري
وأحس إمتوني طاحت وإنگطع نحري

   وگف گلبي ومشيتوا مشيتوا
    وأصيح وما إجيتوا إجيتوا

بهيمه فارگتوني.  ليش ماوخذتوني
            
           گلبي هُواكم
…………………………………………………… ..
3
سُبات الليل كله وآني ما أغفه
يتامه عيوني وعيون الدهر صلفه
أنه إسمي العليله جروحي ماتشفه
الغياب أكلف عليه العله مو كلفه

     أموت أهون عليه عليه
       ولا فرگة رقيه رقيه

ساهرات إجفوني.   ليش ماخذتوني
          
           گلبي هُواكم
………………………………………………… ...
4
بَعدكم  قررت  ها يا  أهل  بيتي
الهوه بس اليجي إمنالطف يجي بريتي
ولو  ميته  أنه  بفراگ  عافيتي
بلكي  الله  و تلحگون  إعله  تاليتي

        أعيش آني بذكركم ذكركم
       وأموتن من هجركم هجركم

إتموت كل إظنوني.  ليش ما خذتوني

             گلبي هُواكم
………………………………………………… ..
5
أنه إبنيتكم المتروسه حنيه
وتعرفون بحنان وشوگ البنيه
بعدني إزغيره حيل إفراگ ما بيه
وبيه إهواي شوگ وعمري أنه شويه

      العمر خلّص وراكم وراكم
      وظلام إبلا ضواكم ضواكم

ماتشوف عيوني. ليش ما خذتوني
            
             گلبي هُواكم
…………………………………………………

هلي يهل المحنه    وحشه أديار أهلنه
صوركم والهجر نارين من تسعر
........................................................
يالماشين بالله أوياكم أخذوني
أبنيتكم عليله لا تعيفونـــــــي
يهلي يخوتي هلبت تسمعوني
وياكم ردت أمشي تخلونــــي
ولوعفتوني وحدي     ياهو اليبقــى عندي
بعدكم يالمشيتوا بيمن أتصبر
....................................................
من حمل ضعنكم ياهلـــــــــي وأسره
رحت أركض لابويه وبسته من نحره
كلتله أعليك أمشــــــي فاطمة الزهره
أخذني وما خذانـــــي وطاحت العبره
وحشمت الكمر عود      كلتله عمي موجد
وشفته نزل دمعه وعالنهر أشر
.........................................................
مشيتوا وماي عيني بلل أثيابي
ليل أنهار أتاني وكاعده أبابــي
أسألمن عليكم يهلي يحبابـــــي
أعتب وأدري لا ماينفع أعتابـي
لا طارش خبركم    ولا مرسال منكـــم
بقيت أحسب ليالي وكاعده أتحسر
......................................................
وحشه البيت وانه الوحشه تاذيني
ومن كثر البجي وشل دمـع عيني
طمنوني عليكم يلــــــــــي ناسيني
عبدالله كعد نايم يناغينـــــــــــــــي
مشتاكه الضحكته      أبوسه من ركبته
وأهز مهده وأنومه بحضني وأتبختر
......................................................
شفت أم سلمه ركضتلـــي محتاره
تكلــي حسين يمه أنكشفت أسراره
القاروره دمه أنترست وهي الشاره
يعني أنكطع راسه وضاعت أخباره
طحت كلي عليها     وأشرتلي بديها
وشفت دم النحر يجري وعلي يفتر
............................................
خادم خدمة الحسين
الشاعر
محمد الموالي

(( واحش أيامي ))
ذكرى العليله فاطمة بنت الإمام الحسين عليهما السلام الثاني محرّم الحرام

يل واحش أيامي … زرني لو بأحلامي
و من يرحم أشجاني … يَمْسافر خَلاّني
          ❃❃❃❃❃❃❃❃❃❃❃❃
هضمني هالحزن بَعْدَك يَبو الأكبَر
و طُفىٰ سراج الفَرَح وسفه و أمَل أدْبَر
و كشف وجهه الدهر لَيَّه وجه أغْبَر
القهر فَتْني و كسر بِيَّه الأسىٰ اِتْجَبَّر
………………..
يا روحي و غاليها … هالدنيا ما بيها
يل فَگْدَك آذاني … يَمْسافر خَلاّني
       ❃❃❃❃❃❃❃❃❃❃❃❃
أصد دارَك و أوِن بيها يُبَه وينَك
تعال و عاين أحوالي عگب عينَك
ألوذ بكل ركن و ادعي عسىٰ سنينَك
تطول و ترجع اتْضُمْني يُبَه يمينَك
………………..
و طيفَك ما فارگني … بكل لَحْظَه توحَشْني
يل حضنَك أوطاني … يَمْسافر خَلاّني
          ❃❃❃❃❃❃❃❃❃❃❃❃
يَراحِل ما دَريت اشلون أعيش الهَمْ
كثِر دَمْعي عمىٰ عيوني العمر أدْهَمْ
أذوگ الغُرْبَه بأوْطاني الكدر أسْهَمْ
ولا شي يبري هالعِلَّه ولا يرْهَمْ
………………..
صب دَمْعي نادالَك … يا بويَه وِشْ حالَك
چا يمتىٰ و تلْگاني … يَمْسافر خَلاّني
          ❃❃❃❃❃❃❃❃❃❃❃❃
السِمَه چم مَرَّه أنْظرها و أصد بيها
طيور اِمْهاجِرَه و أهْتِف و أناديها
يَطاير ها شِفِتْ أهلي اِبْفَيافيها
اِشْخَبَر عندك عن أحْبابي اِشْجَرىٰ اِعْليها
………………..
كل رايح أو غادي … أسْألهُم بِفّادي
و چم طاير بَچّاني … يَمْسافر خَلاّني
          ❃❃❃❃❃❃❃❃❃❃❃❃
بحِلِم چم مَرَّه أتْمَنّىٰ أشوفَنَّك
و تسولِفْ لي يَبويَه بِلْجَرىٰ و عَنَّك
و أسولِفْ لك و عن خوتي أنِشْدَنَّك
يُمر  ليلي ولا اِتْجيني اِشْيَعَوْگَنَّك
………………..
و كل نَجْمَه تسامرني … بالحسره تناظرني
و بدر يحِنْ واساني … يَمْسافر خَلاّني
          ❃❃❃❃❃❃❃❃❃❃❃❃
يَنِسْمَة روحي و اتْنَفَّسْ هوا رِيْتَك
خَنَگْني الشوگ يُبَه إلْحَگْني أنا بِنَيْتَك
حَنيني ما وُگَف ساعَه رِدِت جَيْتَك
و لظىٰ الوَلْهان حَرَگ جوفي و أنا اُوْصِيْتَك
………………..
و مالومه بِمْصابي … يل ماخِذْ أحْبابي
و چا منهو يرعاني … يَمْسافر خَلاّني
          ❃❃❃❃❃❃❃❃❃❃❃❃
أخاف اِعْليك يبو اِسْكينَه من السَفْرَه
تروح وما ترد و جروحي مِنْتَظْرَه
رِحِتْ و اِتْبَگَّتْ اِبْصَدري وسف جَمْرَه
اِشْيطَفّيها لِغِيابَك بويه مِسْتَعْرَه
………………..
في طيبه أرْجاكم … و الزهره تنعاكم
و مِتْحَيّر وجداني … يَمْسافر خَلاّني
         ❃❃❃❃❃❃❃❃❃❃❃❃
الشاعر : أبو شهيد الأحسائي
الثلاثاء ١٤٤٥/١١/١٢هـ
════════════
*لا يجوز و محاسب شرعاً حذف او تغيير التوقيع*

قصيدة لمولاتنا العليلة "عليها السلام"

الـــــفرگة بعيون  العليلة بينت
گبل لا يرحل ابوها شـگد بچت

تگله وياك  أرد اروح
لاتــزيدهـا الــجروح

اوياك أخذني امن البچي اعيوني عمت
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
شلون وحدي ابقى بديار  الأهل
بيش اسلي الروح لو ضاع الأمل
الـــم فرگاكم لحــد عظمي وصل

رحلوا أو راحت الروح
لاتــزيدهـا الــجروح

اوياك أخذني امن البچي اعيوني عمت

✍🏻زينب الواسطي
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
خذني بوية وياك وسمع مطلبي
وابدموعي اتــوسل الزمت العبـي
بالضعن سار وتهدم كوكبي

ابدارهم خلوني انوح
لاتــزيدهـا الــجروح

اوياك أخذني امن البچي اعيوني عمت

ام وليــ✍️ـد الموسوي
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
گلبي وياكم  يسافر مستعد
يا زماني ابدونكم حيلي يهد
صدگ خاف الراح ليه ما يرد

دمعتي بعيني تفوح
لاتــزيدهـا الــجروح

اوياك أخذني امن البچي اعيوني عمت

✍🏻زينب الواسطي
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
دمعتي تلالي  واحس دمعت يتم
گلبي بليل الموادع ضل يهم
فراگنه بطف النوايب ينختم

المن بهمي ابوح
لا تزيدها الجروح

اوياك اخذني من البچي عيوني عمت

ام وليــ✍️ـد الموسوي
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
وين اروحن المن اشكي اوجاعي
گلبي بدكته كــــسرها  اضلاعي
انشد ضعنكم وانه احس بضياعي

بيرغ احزاني يلوح
لاتزيدها الجروح

اوياك اخذني امن البچي اعيوني عمت

ام عـــ✍🏻ـــــلي البابلي
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
رف علمـــــــــكم رفته تاذيني
لاتگلي فاطمــــــــــــــه ودعيني
فدوه ردو طفه النور بعيني

لوعتي تهدم صروح
لاتزيدها الجروح

اوياك اخذني امن البجي عيوني عمت

ام عـــــــ✍🏻ـــــلي البابلي
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
تمت بعون الله وتوفيقه بأقلام الخادمات
✍🏻أم علي البابلي
✍🏻ام وليد الموسوي
✍🏻زينب الواسطي

لانجيز حذف الاسماء نسألكم الدعاء

لطمية للعليلة عليها السلام (خايب يگلبي)


خايب يگلبي     خايب يگلبي
شالو هلك للموت     خايب يگلبي
ماشوف دربي     ماشوف دربي
بالدار اون ضليت     ماشوف دربي


ياگلبي ودي اعتاب     واعتب عليهم
انحب واهم ضليت     كل همي بيهم
شو حته ماكو اطروش     تاخذني ليهم
اذكر سمرهم ذاك     واذكر حچيهم
ردهم يربي     ردهم يربي
ادعي بصلاة الليل     ردهم يربي


ادعي بصلاة الليل     ياربي ردهم
بس الجسد ضليت      والروح عدهم
حتى المباني اتصيح      وين النودهم
فارگت طعم النوم     عيني امن اهدهم
للباب تربي      للباب تربي
ليل ونهار العين     للباب تربي


ليل ونهار العين     مشبوحه عالباب
دم تبچي موش ادموع     بفراگ الاحباب
ومثل الجمر هاليوم     بضلوعي لهاب
ضل عالنزول ايحوم      كلساع الغراب
ايصيح اشربي     ايصيح اشربي
ضيم ومرض واهموم     ايصيح اشربي


ايصيح اجهري بصوت     ونه اعله ونه
جايب خبر موزين     من اهلي اضنه
ضيم ومرض وافراگ     حيلي اهدمنه
مشتاگه اريد اليوم     لم المحنه
ياعمه طبي     ياعمه طبي
عن السموم اتگول     ياعمه طبي



بلكت تجيني ام عون      واتنوع الهه
كلساع اشوف الموت     يامن يگلهه
اشلون المريضه بدار     ينسوها اهلهه
بس انه يهالناس     ذبو حملهه
يادنيه صبي     يادنيه صبي
غم وحزن واتراب     يادنيه صبي



لشاعرة اهل البيت
ام هجران العمارچية
غير مبري الذمه من يمسح اسم الشاعره او ينسب الرثاء لشخص اخر

للعليله بنت الحسين ع
~~~لطميه
يالماشي بعجل بويه بخواتي
منهو وياي لو تكرب   مماتي

عليله وتدري ظليت
وخالي منكم البيت

ريت اوياك اكضيها حياتي
▪️▪️▪️▪️
يالماشي وعفتني حيلي مهدود
هداني المرض وافراكم زود
بعد بيه الوكت ماضنه ايعود

بس ظلت صوركم
وريحة من عطركم

شوفتكم ردت كل امنياتي

✍️ام حسين الفريداويه
♾️♾️♾️♾️♾️♾️♾️♾️
ظلت بس صوركم تلجم الروح
ليل انهار اون  مابطل.  النوح
كون وي النحبهم روحنه اتروح

ولا نبقى.   وحدنه
ودمعتنه اعله خدنه

ردت وياكم اختم ذكرياتي

✍🏻ام زهراء الزيداويه البصراويه
➿➿➿➿➿➿➿➿
امنيتي جنت تاخذني وياك
ونسه علتي  وفرش امصلاك
يبعد روح بويه روحي تنعاك
وسفه رحت مني
وغيابك كتلني

دمعي عليك انه بالل عباتي

ام✍🏻 زين العابدين لمحمداويه
➿➿➿➿➿➿➿➿

ماكلتو اضل اشلون بيه
ودهري والوكت جاير عليه
خيعونه الرفك لبن الزجيه
عيوني خلافه يجرن
عليله وحدي اضلن


ام ✍🏻علي السماوي
➿➿➿➿➿➿➿➿
عفتوني مريضه وتهمل العين
كون وياك اروحن بويه يحسين
لفراكك يبويه الگلب نصين
عفتني وحدي بالدار
ماكو منكم اخبار

اريد اليحضر بساعة  وفاتي

ام ✍🏻مصطفئ ناصريه
➿➿➿➿➿➿➿➿

غيابك مرمراني وعذب الحال
ليله انتحب والدمع همال
دمعي جلمطر عليك لو سال

ودربك صاير ابعيد
ردتك ليلة العيد

يبويه بيك انه نجاتي

   ام ✍🏻حيدر العباديه عماره
➿➿➿➿➿➿➿➿➿
بطياف الي راحو صارت الروح.

تهدي كل الم وسكن الجروح.

دمعي عالمشو صاير مثل موح.
عميت انا بعدكم.
يحباب شيردكم.
هدحيلي المرض غير صفاتي.

ام✍🏻 فاطمة الزهراء
➿➿➿➿➿➿➿➿

تمت بعون الله بقلام شاعرات رابطة سيد الشهداء عليه السلام غير مبري الذمه اليحذف الاسماء او تلاعب بيهه

مقدمه للعليلة ١٤٤٧ هـــــــــــ

ابعثلك سلام •••• وي طير الحمام
بويه يحسين ••••• بويه يحسين 
«» •»«•»«•»«•»«•»«•»«•»«•»«


بويه دزيت الحمامة وگلبي مشتاگ
والرساله بيها دمـعـة وتحمل اشواگ
من مشيت الدنيا خنگه والنفس ضاگ
روحـي عـذبها الـبعـد عـذبـها الفراگ

يا سيد الانام •••• ابعثلك سلام
بويه يحسين ••••  بويه يحسين
٭«•»«•»«•»«•»«•»«•»«•»«•»«•»«•»٭

عيني مشبوح لدربكم انطر جواب
اسأل الراح واجه ما شفت الاحباب
خبر منكم ما أجاني وعيني عالباب
بويه كل ساعة يفززني الهوى الهاب

يا ابن الكرام•••• ابعثلك سلام
بويه يحسين ••••  بويه يحسين
٭«•»«•»«•»«•»«•»«•»«•»«•»«•»«•»٭
بابا حتى الطير ظل يبجي عله حالي
شـحـت اخـبـارك عـلـيه رد سؤالي
يملي عطرك بيتي بس هوه البقالي
بـعـد عـيـنك ماشـفت عـزي ودلالي

والدنيا ظلام •••• ابعثلك سلام
بويه يحسين ••••  بويه يحسين

٭«•»«•»«•»«•»«•»«•»«•»«•»«•»«•»٭
ساعة ساعة الليل احسبه وانا اتاني
انـتـظـر رد الـرسـالة بـكـل امـانـي
وبدلـيلـي سـهـم هـجـر صـوبـانـي
والـزمــــن ويـاي قـاسـي عـذبانـي 

محرومه المنام •••• ابعثلك سلام
بويه يحسين ••••  بويه يحسين
٭«•»«•»«•»«•»«•»«•»«•»«•»«•»«•»٭

ايسـت منـك يـبوية وماكو رجعه
عيـوني عذبـها السهر وياها دمعه
لا خـبر مـنكم اجاني فـرد گـطعه 
عـددت وام البـنيـن بـشجن تنعه

هذا اخر كلام •••• ابعثلك سلام
بويه يحسين ••••  بويه يحسين


الخادم غازي الساعدي

#محرم_١٤٤٦
#الليلة_الثانية
#طور_الجفيري
#وداع_قبر_السيدة_الزهراء ع



إدعيلي يمه ابسفرتي
ربي يِهوّن غُربتي
يصبرها زينب من تِشوف
حَزّ اللعين برقبتي

رايح طريقي لا رجوع
وقلبي ابوادِعك بس يلوع
مو بيدي مطرود وشريد
مثلِك يهشمولي الضلوع

لو أقدر لتُربِك أزيح
ويَمك أنامن واستريح
ما فارق لحضنِك ابد
حضريني يُمّه بسريع

#وكأني بصوتٍ من داخل الروضه المباركه

راح أحضر وبيدي الشمع
عفية اعلى قلبَك والضُلع
وقربانك الأعظم بعد
طفل الصغير المنصرع


🖊خادمة ابي الفضل

🔶 #محرم_1446هـ
🔸 #لسان_حال_ام_البنين_ع
🔸 #نعي

لفــى الليــل يمــه  وانتـو  غيّـاب
تفت روح القلب فركــة الاحبــاب
أبد ما هوّدِّت  عينـي على البــاب

┈┉┅━❀◕ـ◕❀◕ـ◕❀━┅┉┈

آنــه  امكم  يبعـد  امكم  يشبّــان
صرت مثل السجينة ابّين قضبان
صُبَح بيتي  بعدكم بيت الاحـزان

┈┉┅━❀◕ـ◕❀◕ـ◕❀━┅┉┈

لـــوَن هــذا السفــر لَيّــه  يردكــم
مــا ظــل  القلب  ينـدب بُعــدكـم
لكنّــي  احس دهـــري  حصدكــم

┈┉┅━❀◕ـ◕❀◕ـ◕❀━┅┉┈

حصدكم هذا دهــري وخـان بيــه
فزعتــوا فــزعــة وحــدة للمنيــة
وابدمكــم سقيتــــوا الغاضريــــة

┈┉┅━❀◕ـ◕❀◕ـ◕❀━┅┉┈

📝 #الشاعرة_زينب_الخفاجي
🌿 #اللهم_صل_على_محمد_وآله

القصيدة من ديوان 📚قربان الطف الجزء الاول
قصيدة لسان حال ام البنين بعد سفر أولادها إلى كربلاء(والله مره)
❥━──➸➽❥❂❥━──➸➽❥❂
والله مره ... فركة احباب النودهم
والله مره ...  راحو ولينه شيردهم
      والله مره     والله مره
❥━──➸➽❥❂❥━──➸➽❥❂
سافروا لأرض المنيه وكلبي مهموم
نحل جسمي وعيني تبجي محاربه النوم
عالضعون التمشي ظلت روحي تحوم
وين يكضي الليل كلمن حيله مهدوم
البيت ظل وحشه علي ... من بعدهم منهو الي
      والله مره     والله مره
❥━──➸➽❥❂❥━──➸➽❥❂
ظلمه صارت دنيتي وبيتي عليه
ودعيت اولادي اوداع المنيه
ما اظن يردون اليه وهاي هيه
من سره بيهم الحادي ماله جيه
آ ييمه شيبت ... من الفراك تعذبت
      والله مره     والله مره
❥━──➸➽❥❂❥━──➸➽❥❂
عيوني تهمل من اصدن وانظر الباب
بصوت اصيحن ما ترجعولي يالاحباب
آه يا حسكم ييمه امن النزل غاب
عالدرب اكعد واناطر ماكو اجواب
وياي بتكم هل تون ... واذبلت من الحزن
      والله مره     والله مره
❥━──➸➽❥❂❥━──➸➽❥❂
ينهظم كلبي من اباوع للعليله
حنت لعبد الله واشتاكت تشيله
تنادي يالوالي اونتها ثكيله
تنحب بآهات والمدمع تسيله
طول عليها البعد ... زغيره ما تحمل فكد
      والله مره     والله مره
❥━──➸➽❥❂❥━──➸➽❥❂
آه منك يا زماني شكثر ناديت
واحرمت طفله من أهلها وشمعة طفيت
جروح خمسة من فكدهم بيه خليت
رجع اولادي يدهري ثكله ظليت
بحسره والهم والألم ... حزني واصل للعظم
      والله مره     والله مره
❥━──➸➽❥❂❥━──➸➽❥❂
*بقلم ✍🏻خادمة اهل البيت ع*
*الشاعرة العلوية مريم النور نسألكم الدعاء الفاتحه الى روح اختي ولأمواتكم غير مبري الذمه اليحذف الاسم أو يأخذ الكلمات وينسبها له:🍃*