مسلم نزل بيها  وبسيفه يفنيها
***
هاشمي ونازل غضب
صدره نيران التهب
العكسر گباله نرعب
بسيفه راواها العجب
بسم الله باديها   وبسيفه يفنيها
***
طوعه بأسمه هلهت
والحميه اتشرعبت
راية الحق اعتلت
گوم گدامه بجت
يسمع بواجيها  وبسيفه يفنيها
***
جنه حيدر لو يهد
لايثني ولا يرد
بالحرب جاب المجد
نازل ويرعد رعد
ذيب ويطب ليها  وبسيفه يفنيها
***
ياغضنفر بالزعل
علي چنه  ورتجل
ياهلا طبها الفحل
امن السمه موت ونزل
جمره ويجويها  وبسيفه يفنيها
***
راس بالراس انردم
بغير جفه مارهم
سيفه بالوادم لهم
الكوفه صارت جن عدم
للموت يحديها  وبسيفه يفنيها
***

علي محسن الفرطوسي

#مسلم_بن_عقيل
▪️فزاعيه▪️


ونت الليله حميده      راح ابوها

راح  مسلم ياحميده
والقلب بعده اشهيده
طفله والغالي تريده
وابمصابه عذبوها
(ممروده الروح اعله افراگه)
———-
مات بديار الغريبه
وغاب عنها فرد غيبه
موتته  والله صعيبه
اشلون لوعه لوعوها
(واغريّب منهو اليبراله)
———
راح منها للمنيه
ويلي ماذايق اميه
جثّت الغالي رميه
من على القصر اشمروها
(من عالي القصر ايذبونه)
———
بالعطش جبده افطروها
ويلي واعظامه اكسروها
بنته عنه خبروها
امگيده الجثه اسحلوها
(بحبال الغالي يجرونه)
———-
ابلاغسل ظل ابغربته
جهزه منهو لدفنته
خبّروا بمْصابه بنته
راح مايرجع عليها
(شايل للموت وشيعوده)
———
#بنت_الشمري
٢٠٢٤

#مسلم_بن_عقيل

▪️بديار الغرب▪️



عازيها حميده الليله عازيها
بديار الغرب منذبح واليها
__
عارنها المسيه وعلّن الونه
وابلطمه قلبها الليله واسنّه
يا دمع الحزن وياها سيلنه
تنعاه بألم والدمعه تجريها
———
كانت ياوسف تتْنَطّر الجيه
ولدروب الحوادي عيونَها اربيه
ماتدري بابوها جثه مرميه
لديار الغرب ياهو إليوديها
———
عازنها المسيه واجرن العبره
والدها مهجته ويلي متفطره
فارگها الولي وعنها طفى بدره
وهالليله  تعليها بواجيها
——

ميت ياوسف والمهجه عطشانه
والجثه ياويلي ابدمها رويانه
اوحيّد ياحميده  وسط عدوانه
وني عالولي والونه علّيها
———
وني ياحميده جثْتَه لوْعوها
ومن فوگ القصر  ياويلي  ذبوها
بالكوفه وطرقها ابحبل جروها
بديار الغرب شايل يا غاليها
———
#بنت_الشمري
٢٢٤

#مسلم_بن_عقيل
هوسات
طور سحگته الخياله



بديار الغرب مسلم يذبحونه
ومن عالي القصر ردوا يذبونه
موجثه بعد المن يجرونه
اصدور عدوانه   
اصدور عدوانه
اصدور عدوانه
موته ماشفاها

ميت بالضما يابويه يالغالي
ممروده مهجتي اعليك يالوالي
يابوي ابمصابك منشده بالي

روحي نحلانه
روحي نحلانه
روحي نحلانه      يابويه لمصابك 

اغريّب  وحيد ولا لگى احبابه
ايصد المن بعد وايدگ اله بابه
گلبه امن الضما والروح منصابه


ضيف ياطوعه 
ضيف يا طوعه
ضيف يا طوعه    عندج هلمسيه
———-
#بنت_الشمري
٢٠٢٤

( حميده ع ) الشاعر ذوالفقار جلعاوي

             يا عمي ليش الدمعه تجري اعله خدك
               بركن الخيمه تتسند تتعثر وحدك
  يا عمي حسين                       يا عمي حسين
..........
         اشوفك منخطف لونك وحسك انته مو انته
        تديره الوجهك وتنحب فركت جفوفك بسكته
       تخوصرت وهدل متنك زغيره وكلبي مووته
       تغص بحجايتك تنشغ لسانك من يبس شفته

              ماجن حسين اكبالي بشوفت حميده
              رايد يشبكني وترجف من يرفع ايده
  يا عمي حسين                            يا عمي حسين
..........
            بكعدتك عالارض كوه علامة منكسر ظهره
      بتسمت بوجهي بس فضحت سوالف عينك النظره
           تجرني واكعد بحضنك ونفس ما تكدر تجره
         بجيت و أنته شابكني ومسحته الراسي جم مره

                جانت من دكت كلبه تهتز الخيمه
              ساكت بس شبكت حضنه أتكلي يتيمه
  يا عمي حسين                       يا عمي حسين
..........
          درت للكوفه بس وجهك وهمست بونه مخفيه
            شلتها جفوفك تسلم حَذِر وعيونك اعليه
          تجر لعمامه من راسك وصحت كسرو ضلع بيه
          عرفتك ودعت مسلم طحت من حضنك شويه
         
              طفله ومن اوكع جفك شربني أحضانه
              باجر من توكع يا جف يروي العطشانه
       يا عمي حسين                       يا عمي حسين
..........
             رقيه وعاتكه وسكنه ينادلك أجن بابه
            وصحتلك بابه وتكلي يبعد البابه وحبابه
      اليطيح بنص غرب وحده التفت وعيونه مرتابه
          وكع من القصر مسلم الفزعله يسلب ثيابه

            عيونك جانت تحجيلي بمسلم واحواله
            كل دمعه اتكلي بصدره ترفسه الخياله
  يا عمي حسين                       يا عمي حسين
..........
          أخذني عمي للكوفه ونجيبه المسلم ويانه
         عمت عيني الخيول أتجر بدروب الكوفه جثمانه
            بعباتي نكعد أنلمه ونغطي متونه بردانه
         ودمعتي ودمعتك بيها نروي أشفافه عطشانه

             شلون إيدفنونه المسلم والجسم موذر
             لمو من سحك الحافر لو ظل أمطشر
      يا عمي حسين                       يا عمي حسين
..........
..........

( مسلم عليه السلام ) الشاعر ذوالفقار جلعاوي

     تتراجف كاع الكوفه          من جدمه اعليها أتحرك
    عباس الطب لو مسلم          سن بسن اعليهم صك
                    وعرك الساده أمحلي أعناده
..................
      طب للكوفه وجانت هوسه وفل ألثامه وبان الراي
       صارت سنطه تذب الأبره وتسمع منها الرنه هواي
        يشرد زلمه ويوكع زلمه إيعثر زلمه الرايح جاي
        راد يكضهم بين أبهامه وبين الخنصر سالو ماي

    دار عيونه وهز إيده            للطف صاح اعله ابن العم
     هاي الوادم لو ميته                لو مخلوقين أبلا دم
                    وعرك الساده أمحلي أعناده
..................
      يبسو خشبه وكفهم مسلم وين الجانت روس كبار
     بخزرة عينه الحمره أحتركو هيه الجمره جفوف النار
        راسه إيدخن غيرة هاشم سيد وعله الحك أندار
       ماخذ من عباس التجوي وطبع الحار إيورث حار

    ساكت والكوفه أشكدها        وسمعو فعله بكل صفحه
     شارب يوكع يم شارب           لا والله أزلام او وكحه
                    وعرك الساده أمحلي أعناده
..................
       عباس ابن العم المسلم عمه أتخيل داحي الباب
       اكباله المسلم لا تستغرب من تنزع فرسان ثياب
     صرفن حد زنوده السمره ويطبك شاب براس الشاب
         خالقهم من تراب الله ومسلم ذبهم صم تراب

    ظل يعزل وين الشايب            ذوله يحاسبهم خزره
   ويحسب جم متره بجدمه         للشاب الراد إيشمره
                      وعرك الساده أمحلي أعناده
..................
    هندس غاب أمكحل جفنه ولعيونه حواجب اقواس
    وكمرة ليل العيد بوجها وطبكت رمشه مشابك ياس
     هيبة شاب ويمشي بثكله وما دنك للخطوه الراس
    وجن عباس بوكت الفزعه وشيفضها وغثو عباس

     الله اليستر من مسلم          غندب طك عركَه وغندب
     الما متربي ومتأدب               غصباً عالجابه أتأدب
                    وعرك الساده أمحلي أعناده
..................
      كَلهم طلعو عكال البيكم وين الصاير شيخ فلان
      ماظل شيخ عكاله براسه وسووهن شيلة نسوان
         سوّد وجه الكوفه بهوسه وخلا مغبر بالتربان
      يا عباس ابن العم مسلم وجها ابيض بين العربان

    بكلب الكوفه من يدبج             شيخ وسيفه مهواله
      ذب رباط اعله الوادم            و ألآآآه يصيح خياله
                     وعرك الساده أمحلي أعناده
..................
     صكر البيده وطر بصحره أيدور وين الصيد الزين
    الجان هناكه تراجف يصفن جيت اهنانه شلون منين
      راكض واكف طايح يسأل هذا الموت الأحمر وين
     من الخوف الميت حلف مسلم كافي بروح حسين

    لهنا كلوله وكافي             جابو طاري حسين وكف
  من الصدمه الما ميت            كاطع نسله وما خلف
                    وعرك الساده أمحلي أعناده
..................
..................

( نزله ليلة مسلم ع ) الشاعر ذوالفقار جلعاوي

شايلها الكوفه اعله جفوفه
................
طبلها والله اليستر صاحو من طب
وبطرف أعيونه أمخوزرهم لمضهضب
ملك الموت بسيفه وجفه صار الرب
والكوفه أدور عالكوفه
........................
الكوفه مزعلته المسلم وتخيل
ياهو اليحمك كالو يحمك من يزعل
أتهدل وبجف العباس من أتمرجل
والواكف يوكع من خوفه
.........................
واحد لثاني يكله اشرد مدري شطر
ريح الصرصر لو مسلم دمدم صرصر
غير اجدامه إيعيننه اعله الشرده الفر
بالكاع اجدامه مجتوفه
............................
شيخ وغثو وكباله الوادم تردس
طك عرك الساده وصكصك سن اليفرس
جا عايز فزعه او وكفت طوعه تهوس
يذبح وتكبر وتطوفه
.....................
بارز لمعلم عالطك من الركبه
والسيف المالاحه بطك جفه إيكلبه
لو يكطع منحر لو يشلعله كلبه
أمحورب صولاته معروفه
.....................
يكلبها الكوفه اعله الكوفه من دمدم
ابشر صاح اعله الطف يحسين ابن العم
مسلم والكضه لو سلم لو أسلم
عباس وهد من تشوفه
....................
....................

( شور حميده ومسلم ع ) الشاعر ذوالفقار جلعاوي

      آخر خطوة عمر            كالو تمر         شيب وصبر
     واني العمري ابتده        بشيبة كبر         من الزغر

             أدور بين الرسوم ملامح للطفوله
       ويفزز صفنتي الشيب وبجي الليل اعله طوله
              
           وترانيمي        بدمعتي وخنكت الصوت
           وترانيمي           تعال ارجعلي لا موت
           وترانيمي          يمسلم فاتك الفوت

               يلأمغرب عن عيوني رحت وين
                تفل عني شراكة بويه روحين
            خذت حضنك و أثر بي من شبكتين
                 أمد إيدي وخليه أترد الإيدين
.................
    فوك اوراق الشجر        بحبر المطر        اكتب أحن
     ورسلهن بالهوه           ونصعد سوه     حضن بحضن

          يراسم دربي الوان يماي وروحي خضره
          عفتني صحره بجفاك ولا بعروكي كطره

           يل بروحي       فصولي الأربعه أدور
           يل بروحي       علك ما فله منذور
          يل بروحي       عفت هيكلها مهجور

              غصن يابس صعد بيه الحزن نار
           وعصف كلشي وخذ طولي الهجر حار
              اليوج تانه الدخانه الغالي يندار
                يماي الله تعال ألحك عالأكتار
....................
     يل هاجرت الوطن      وانه بضعن       كلمن درب
     نمشي بآخر خلك       ولهفة عشك     تجوي الكلب

            بضعنه كل طفل جان ابو يمه ويشبكه
           وحميده أدير العيون يمسلم والله حركه

          وعله خدودي     جوتني دمعتي هواي
          وعله خدودي     ضكتهن بويه بشفاي
          وعله خدودي     شلت بوساتك وياي

            طرف ردني المسح بدموعي خلصان
              عجب جفك ولا يخلص كبل جان
              يتاركني مثل صوره اعله حيطان
               بملامح وجهي تخنك بويه تربان
................
     بنص الدرب وعبر      يكسر ظهر        طارش هظم
      من الناكه طحت      مسلم صحت      ليش اليتم

             أشوفن كل الأوجوه أجت تركض عليه
             شبكني عمي الحسين ويقبلهن أديه

           وبجه أكبالي        ومسحلي بجفه عالراس
           وبجه اكبالي        وشبكني عمي عباس
           وبجه أكبالي        وبده يجرحني الأحساس

                    وعليه إيخيمن كل العبايات
                وبديت اقره الوجوه البيها صفنات
                وحضن زينب حجالي الكله رجفات
                  البكه براسج حميده مسلمج مات
..................
..................

قصيدة في شهادة مسلم بن عقيل ع  ،  لسان حال حميدة  …
ـــــــــــــــــــــــــــــــــــــــــــــــــــــــــــــــــــــــ


يالغايب إنتَ حاضر    يا بويه بالروح
ــــــــــــــــــــــــــــــــــــــــــــــــــــــــــــــــــــ

من روحتك هاي
سَلّـــــتني دنياي
وردة ويبس جذرها ومشتاگة للماي

يا بويـــه يالعـود
أدري إنتَ متعود
أيامي ويه وجهك ما ترجع ٱردود

يا من عفت حميدة    لفراگك ٱتـنوح
يالغايب إنتَ حاضر  يا بويــه بالروح
ـــــــــــــــــــــــــــــــــــــــــــــــــــــــــــــــــــــــ

طفلة وعفتني
يــاليتّـمِــــتني
شَيّب يبويه راسي من فارگتني

غصني آنه ذبلان
ودلّالــــي نــيران
من غيبتك يبويه ظل دمعي نهران

طـــفلة ٱبتعد أبوها    ما حسبته ٱيروح
يالغايب إنتَ حاضر    يا بويـه بالـــروح
ــــــــــــــــــــــــــــــــــــــــــــــــــــــــــــــــــــــ

راودني طيـفي
چن إنتَ ضيفي
عن حالي أشتكيلك وبچي ٱعلكيفي

أنـظر دمـومك
غطّت رسومك
وبظلمة المصايب غارت نجومك

من كل كتر أشوفك    يالغالي مجروح
يالغايب إنتَ حاضر   يا بويـه بالــروح
ـــــــــــــــــــــــــــــــــــــــــــــــــــــــــــــــــ

يا جرح أداويه
يا جرح أخلّيـه
فرض البچي ٱعلى حجرك يا بويه أصلّيه

وآثــار الحـبال
مطبوعة بالبال
يالجثتك رموها من قصر الٱنذال

بحساسي أدري واگع    بالكوفة مذبوح
يالغايب إنتَ حــاضر    يا بـويه بالروح
ـــــــــــــــــــــــــــــــــــــــــــــــــــــــــــــــــــ

وين إنتَ ما وين
واساني الحسين
بيده ٱعلى راسي يمسح والدمعة بالعين

بهاللحظة يا ناس
مؤلـم هالٱحساس
طفلة ٱعلى أبوها مسلم أبيض غده الراس

محد عرف شعوري    بس دمعي مسفوح
يالغايب إنتَ حاضر    يـا بويــه بـــالروح
ـــــــــــــــــــــــــــــــــــــــــــــــــــــــــــــــــــــ

بقلم الأستاذ /  ستار عذاب الحچامي

ليلة مسلم ابن عقيل
اول شهيد من القصر يرمونه
ضل بمكانه وماكو الي يشيعونه
كل اضلوعه متهشمه
مثل حسين ابن عمه
/////////////////////
منا بدايات الحزن من مسلم لحد النحر
ومنا بدايات العطش من الخيم حد الگمر
ومنا بدايات الكسر والگسره جانت بلضهر
التمو عليه من كل كتر وحجارهم مثل المطر
  بحر الضهر ويدكدكون البيبان
  ‏بلكوفه خلوله اذن بالحيطان
  مسلم عاشها الجمه
مثل حسين ابن عمه
/////////////////////////
بالكوفه كلها تحزمت صلو وراه يمكن الف
صله وكضه من التفت ماضل ولاوحد عرف
خانوه وضل بوحده والغيره كامت تختلف
بس طوعه هيه اتلگته وكام بختها ينحلف
البيت الك والنه الخله وتفضل
انت كنز  بس انت ماتتحص
الرايد دين شيفهمه
مثل حسين ابن عمه
////////////////////////
حزنت ملاكة السمه لمن طلع خيط الصبح
سلم عله حسين وبچه وبدمعه يحجيله الشرح
الكوفه خانت كل وعد وماغزر وياها الملح
سود الوجوهه اتلثمت  وعيونهم شمرت رمح
اشباه الرجال وبيهم ولارجال
وجروح مسلم جانن هواي اثگال
منگع ثوبه  من دمه
مثل حسين ابن عمه
////////////////////
‏مرسالك الاعظم وصل لمن قروه محد فهم
  يحسين اتحضر بعد جايلك و مثل السهم
  النار شافاهه شكثر يمكن يحركون الخيم
‏شاهك دمع لاموهوه من العطش هم ماسلم
  دم عله راسه وراسك مخضب راح
‏ جم سهم يحمل گلبك وياه ارماح
‏طاح وكتلته الصدمه
‏مثل حسين ابن عمه
////////////////
وكفو سره جن مسطره والناس يمه اسطرت
‏متانين طيحت مسلمك التمو عليه وتشمتت
‏شمروه من فوك القصر وضلوعه كلها اتهشمت
‏ لاغيره عدهم لارحم من طاح  كلها  اتكترت
‏اتصور بمسلم هيجي حاله صاير
‏يحسين بس انت اليسحكك حافر
  ضامي وماشرب همه
  مثل حسين ابن عمه
  ‏/////////////////////
محمد الهاشمي

لمولاي مسلم بن عقيل ع

شيل سيفك ياسبع هزهه الارض
واگلب الميدان بيهم وانتفض
بحيله نازل جابهم طول ابعرض
وحده  ع العدوان ضل يفرض فرض


نزل سبع الكوفه .. وتشل خطفة سيفه
بالمعارك هيبه .. ابچفه ياخذ حيفه
سطره من ايمينه ..القاده جرهه بكيفه
___
هب عجيد الگوم حار ابغيره طب
ناوي بأرض الكوفه يشمرهه الرگب
هوه واحد لچن طب شايل غضب
المسلم المهيوب منهو الي گرب


هلا بزود حسينك .. يالتوافي عهودك
من گمر بني هاشم ... يبو طاهر زودك
لو تسل ابسيفك ... تراجفو بوجودك 
____
ماكو واحد شهم لاگاه بالقتال
زلزل الميدان باشباه الرجال 
هذا يافارس تقدم للنزال
الكوفه رجفت غير مسلم بيهه صال


الشاف طولك خايف ... ويرجف من ايمينك 
راعب الخياله .. وتسطر ابچفينك
القاده ترجف گامت... منهه نضرة عينك
__
هذا يومك ها يخلاس الزلم
وانته من عباس ماخذلك عزم
هلهلت طوعه وتنادي ياشهم
عمك الكرار حيدر والنعم 


انت عمك حيدر ... رفع راس الساده
مخوف العياله ... وذالهم بعناده
انت بزرة هاشم .. لاوي چف القاده
____

حسين الفاطمي

نزال لمولاي مسلم بن عقيل عليه السلام


جدح غيض ابعينه وتسرفن للحرب
هلا براعي الغيره الدخل بيهم رعب
ابو طاهر واحد ولاغيره بشر
ابو طاهر مغضب دخيله من يطب


شد عمامته وطبهم .. دخيله
وسط الكوفه شمرهم  .. دخيله
خيال الحرب مغضب اجاهم
من چفوفه شيهدهم .. دخيله
////////////////////////////////////
ياخيال البيده ويافراس الشدد
اهو واحد لكن فلا همه عدد
ابن ذاك الفدائي الاسد وكت الحرب
علي عمه وابوه الولد من هالاسد 


مسلم  صعب تفسيره .. دخيله
هوه ولاتضن غيره .. دخيله
مسلم  واحد وراعب زلمهم
الهاشم ورث هالغيره  .. دخيله
/////////////////////////////////
عليهم ناوي ونزل يفرض فرض
تفت شمرة سيفه وغدت كلهه ركض
يسبع الكوفه وتتعب يمنتك
بعزم سيفه يحارب سحلهم بالأرض


مسلم طبهم بسيفه .. دخيله
العدو يتراوه اله بطيفه .. دخيله
مسلم ياسلام الله اعله اسمك
بيهم يذبح بكيفه .. دخيله
/////////////////////////////////
هلا براعي الزود وهلا براعي الستر
ياصمصام الغيره الردع بيده الكفر
هلا بزود حسين وابن عمه الكفو
ابو طاهر هيبه وكلف وكت العسر

عالي الشان طب ليها .. دخيله
القاده ينتچي اعليها .. دخيله
كلهم بالقصر دخلهم انذار
الكوفه بسيفه داحيها ... دخيله
///////////////////////////////////
حسين الفاطمي

كلفه حسينه ... ودمعته بعينه
دخيل ابو طاهر .. دخيل چفينه  


مسلم نزل   .. دخيله
جاب الأجل .. دخيله
هيبه الفحل  .. دخيله


سمه بأسم الله وحمل بجفوفه
سيفه والعدوان كلها تشوفه
دخلو انذار ورعبهه الكوفه

هذا مسلم والحرب تعويده

هيبة علي .. يمسلم
_
بالفعل يصنع .. بالشدد يفزع
مسلم الهيبة .. طكته ما ترجع


رد الزلم    ..  دخيله
مسلم شهم  .. دخيله
غيره وعزم .. دخيله


مسلم الصاح  وعدل ميدانهه
طاحت الخيل وسحل فرسانهه
ابوطاهر  والشدد عنوانهه

طب رعبهه الكوفه صارت بأيده

هيبة علي .. يمسلم
____
بالشدد گدهه .. والزلم ردهه
هذا زود حسين .. والحرب شدهه

رداهه رد  ... دخيله
وانطه العهد ... دخيله 
زلمة شدد ... دخيله


هذا مسلم گدهه بأوقات الشدد 
ابو طاهر وانطه لحسينه وعد
الكوفه لو خانت اردهه بسيفي رد

روسهم بالكوفه صارت عيده

هيبة علي .. يمسلم
_
زوده من حيدر .. حيد المعتبر
ابكل جمعهم ذاك .. الوحده ظل يفتر


طش الدمه ... دخيله
حامي الحمه  ... دخيله
حيد ازلمه ...  دخيله

وحده لاگه الجيش مسلم بالنزال
طبهه واشتدت ميادين القتال
والمنايه تريد قادات ورجال

رادهه وسوح المنايه تريده

هيبة علي .. يمسلم
_
حسين الفاطمي

(( سـفـيـر الـمـرجـلـه ))



مسلم الحق ... يا سـفــيــر الـمـرجــلــه
مسلم الحق ... زلـــزل القـصـر وهــلـــه
مسلم الحق ... بـالـركـض خـلـي الـزلـم
مسلم الحق ... خـلـها تـوصـل كــربـلــه

رجـال = شهم مسلم شهم
خـيال = شهم مسلم شهم
زلـزال = فـعـال = قـتـال= شهم مسلم شهم

أســد مسلم زئــر كـفـو الكـل يـهـابـونــه
جـمـر مسلم شعل غضب غيض البعيونه
حـصـد مسلم رگب أرض فاضت بدماها
غـضـب مسلم جدح بـرز فنهم يـدنـونـه

مسلم دخيلك ... مسلم دخيلك
                   "" "" "" "" "" "" "" "" "" "" "" "" ""
مسلم الحق ... هـيـبـه يـجـنـاح النـسـر
مسلم الحق ... رجـفـت حــتــه القـصـر
مسلم الحق ... مـن نـضـرتـك بـالحـرب
مسلم الحق ... سـوي بـالـضـدك عـسـر

راهب = شهم مسلم شهم
غـالب = شهم مسلم شهم
راعب = سالب = حاجب = شهم مسلم شهم

شــبـه مسلم علي ضـهـر حـارت الـوآدم
فـحـل مسلم يهز أرض من يكض صارم
طـلـع مسلم شمس چوه الواگـف أگبالـه
رجــز مسلم بــعــد بـــرز ألــبــرز نـــآدم

مسلم دخيلك ... مسلم دخيلك
                   "" "" "" "" "" "" "" "" "" "" "" "" ""
مسلم الحق ... چـفـك مـخـورس زلــم
مسلم الحق ... عـالـي مـالاحـك نــجـم
مسلم الحق ... الشافك يصيبه العجب
مسلم الحق ... حـيـلـه مـنـك مـنـهـدم

بـاخـع = شهم مسلم شهم
لاســع = شهم مسلم شهم
ساطع = رافـع = نـافـع = شهم مسلم شهم

يـهـد مسلم حـصـد رگـب رأسـه يجادح
يــزم مسلم أسـد هـجـم بـالـزلـم ذابــح
سـطـع مسلم بدر عمه الشاهد أرسومـه
گـطـع مسلم درب بــقــه ألشـهـم نـايـح

مسلم دخيلك ... مسلم دخيلك
                   "" "" "" "" "" "" "" "" "" "" "" "" ""
مسلم الحق ... وجهك يفـوق الشمس
مسلم الحق ... ينسمع حچيـك همس
مسلم الحق ... من يگض جدمك زلم
مسلم الحق ... بالبطن يـرفس رفـس

كاسـر = شهم مسلم شهم
عابــر = شهم مسلم شهم
عـالـم = دايـم = فـاهـم = شهم مسلم شهم

ذبح مسلم عجب كـتـب صـاگـر الحومـه
خطف مسلم جَمَع بـصــر فاحت أعلومـه
شهد مسلم بـطـل نـعـم حـتـه عـدوانـــه
دخل مسلم ركض نزع الفارس اهدومـه

مسلم دخيلك ... مسلم دخيلك
                   "" "" "" "" "" "" "" "" "" "" "" "" ""
عبد زينب
محمد مسلم الأسدي

https://youtu.be/8SMuSAZ6v2U?si=__6h0QFbXusCY2vz

سلام الله عليك يا مولاي يا مسلم بن عقيل 🙏

نزله.   مسلم ابن عقيل

قصه الاهيه... بسمك وقف هيه... هاي السفاره


كلها راحت وانت خالد..... گبتك اعظم دليل
والعطش صار بحضرتك....ماي يتوزع سبيل
ياسفير حسين انت......من صنعت المسحيل
جوه رجلك كل قصرهم...صار مكسور وذليل
واليوصل الكوفه.  بعيني يجي يشوفه
.قصر الاماره .........    هاي السفاره
**
صرت باالكوفه انت معلم...شامخ بكل العصور
وچي امان الله بحضرتك......بيها ترتاح الطيور
والهوى يمر اعله صحنك.....خاطر يخلي عطور
براحه نفسيه عجيبه..............يشعر الرايد يزور
عطر الامامه أنت.....كل المجد نلته...
..بزود وجداره ......هاي السفاره
**
ألف عام عليك وأكثر....وانت قرآن الخلود
بحر.ياالكلك معاجز...  شما خذو منك تزود
مرتبط هذا وجودك.......سيدي بكل الوجود
من اخر الدنيا تجيلك.........كلها زوار اوفود
قائد وابن قائده....رف بيرغ الساده...
فوگ المناره......هاي السفاره
**
العنده شده ويعتنيلك......يمك يفل الشداد
ماكو مؤمن عنده حاجه...ومااخذ منك مراد
دار كل واحد يضدك...... راحت وصارت رماد
كل مجاهد راعي مبدأ......انت علمته الجهاد
كلمن نوه الثوره.....عندك اخذ دوره...
وحدد مساره......هاي السفاره
**
الشمس مايخفي ضواهه...شما كبر حجم الغيوم
الباطل اشما طال حبله...فترى يبقى وما يدوم
وكل خفافيش.السياسه ... تطيح ماتگدر تحوم
وانت الك هاي المناير.......تسجد عليها النجوم
كل نجمه تهواهه....وتصلي فوگاهه..
وتقره الزياره.......هاي السفاره

سعد العبودي

نزلة / مسلم بن عقيل عليه السلام. 2024

مسلم هذا وهاي اخباره
٠٠٠٠٠٠٠٠٠٠٠
حي مسلم لو ردت تشوفه
أطّـهّــر ودخل للكوفه
بعينك راح تصد معروفه
من گبته اتشاهد انواره
٠٠٠٠٠٠٠٠٠٠٠
ما مات الضحّه بدم راسه
عايش يبقه بفكره وناسه
ومسلم ثبّت بالدم ساسه
شتكول البحسين اختاره
٠٠٠٠٠٠٠٠٠٠٠٠٠
عن مسلم رايد برهاني؟
لا تسأل وجه السفياني
أسأل طوعه وأسأل هاني
يحجولك عن دينه وثاره
٠٠٠٠٠٠٠٠٠٠٠
ما طخ لبن زياد وحكمه
من اجل الاسلام واسمه
مسلم ضحّه بنحره ودمه
وذل جيش الكوفه ابّتّاره
٠٠٠٠٠٠٠٠٠٠
ما عاف حسين ولا باعه
باخطر موقف مسلم طاعه
هز عرش الظالم وتباعه
فرسان بمسلم محتاره
٠٠٠٠٠٠٠٠٠٠٠٠
ذَكّر خصمه بفارس خيبر
ظل يحصد برگاب العسكر
يم مسلم يكرب من يگدر
يكطع راسه ويهدم داره
٠٠٠٠٠٠٠٠٠٠٠٠٠
ما يوكع لوما يغدرونه
مسلم مچتوف يهابونه
من قصر الظالم يرمونه
ما مات تخلّد بفكاره

سيد زيد الفحام
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠