شسوي بالعيديّة وانتوا العيد والعيديّة.

لا إخوان اشاقه صدگ أريد عيدية. 🥲

صدگ لو گالوا قابل عيديات گبل مثل عيديات هسّة. ؛)

حتّىٰ محد گالي أنتِ عيدي لو عيدي ما يكمل إلا بوجودچ، إيش هاذ خاطري مهروس فد مرة.

مشاعركم غالية لا ترخصوها.

أريد احچي بس ما بيه حيل أكتب ولا أرتب. 🫠

من عطلت الأنستا والفيس وأني عندي فائض بالوقت.

صدگ داهية هالأنستا.

شنو هاي أحب ترتيب بابا وملاحظاته. 😞🫶🏻

خلي أبدي احچي.

اليوم من إحنا بالسيارة راح يصير نظرنا لجانب واحد منها وما ننتبه للباقي، نشوف الّي بس عيونا تصير عليه، عرفت بوقتها إن الإنسان تحيطه أربع جوانب مثل السيارة، لو بقىٰ مخلي نظرة علىٰ جانب واحد راح ينسىٰ الـ٣ البقية وراح يحكم علىٰ المنظر والّي يشوفه بس من الجانب الّي مركز بيه، ومثل هالشي وي الّي يصادفنا بحياتنا من ناس، ومشاكل، وتعامل، وحچي وشغل وتفكير، لو بقينا حاصرين كلشي بجانب واحد ويمكن يكون خطأ، راح مو بس نظلم نفسنا ولا بس ممكن تجي علينا نتائج عكسية صعبة وإنما راح نبخس الجوانب الثانية الّي ما فكرنا نفكر بيها ونستفيد منهن بشكل عام.

يعني بدل ما أگعد أحلل المشكلة بس من جانب الّي غاثني لو يخليني أضوچ وأعصب أكثر، أفكر بيها من جانب لُخ يساعدني ويوصلني لحل.

مثلًا مثلًا عندك أمتحان وتعبت بيه وقريت وما جاوبت، راح تشوفه من جانب چا وين النتيجة غير اني سويت الّي عليه وتعبت غير المفروض أجاوب وأشوف ثمرته؟
لو شايفة من بقية الجوانب شنو راح تحصل من نتيجة؟
جانب يگلك ممكن اكو خلل بسعيك أي أنت قريت وبذلت جهد بس يمكن تعب مو بالطريقة الصح،
وجانب يگلك أنت سعيت بس تذكر النتيجة علىٰ الله محفوظة وما تضيع،
وجانب يبينلك شلون تصبر ومو كلشي نتعب بيه مرات نحصله،
وجانب يعلمك إنو المهم قريت واستفاديت وبعد يومين من يصير هالشي عملي راح تطلع نتيجته وأحسن من الدرجة.

وهالشي جربته وفادني وقلل عندي جلد الذات لأن جنت أركز بس علىٰ أنتِ قريتي بس ما جاوبتي يعني لشوكت هيچ تستمر هالحالة!، من شفت الجوانب البقية وفكرت بيها حسيت لا اني عندي تقصير بكذا شي وعندي خلل بفلان شي وهكذا.

لو مثلًا شغل معين، خطوبة ما كملت، فكرة ما تحققت والأمثال هواي، كلهن يوصلنك لنقطة وحدة، ترا أكو جوانب هواي ولا تبخس الصارلك بجانب مو بصالحك وما يفيدك ويزيد الطين بِلَّة.

لأن شوفوا إختيارات رب العالمين النه دائمًا مناسبة، وتريد تعلمنا وتوصلنا وتفتح عينه علىٰ شي يفيدنا وبيه صالح النه، خو لو الّي نريده بصالحنا تتوقعون رب العالمين يحرمنا منه؟.

فَ هيَّ المسألة تتلخص بشغلتين:
ـ شلون تشوف الّي يواجهك وبأي نظرة تتعامل وياه.
ـ وشلون تتقبل الّي صارلك وتخليه بصالحك.

هاي شغلة.

الشي الثاني أكو كم شغلة اليوم صادفني وحسيت أي لازم الواحد يوعىٰ علىٰ نفسه ويطور منها للأحسن الّي بيه رضا وطاعة رب العالمين لأن لشوكت يسرح ويمرح وناسي نفسه؟ يعني الكلّ يگدر يعيش ترا ويستمتع بحياته بس بحدود الدائرة أو الخريطة الّي رسمها النه رب العالمين وخلاها باللي يناسبنا.

هم شفتوا بيوم أكو شي نافع ويفيدنا حيل ورب العالمين محرمة عنه؟ لا أكيد!
معناها الّي محرمة علينا شنو؟ ضار، إذا ضار ليش متمسكين بيه وكاتلين نفسنا عليه؟
يعني رب العالمين خايف عليك ومخليك نظام بيه خيرك وصلاحك تجي أنت تضربه عرض الحائط وتسوي كلشي محرم عليك وتضر نفسك؟
﴿وَمَا ظَلَمَهُمُ اللَّهُ وَلَٰكِنْ كَانُوا أَنْفُسَهُمْ يَظْلِمُونَ﴾.

الشي الثالث،
الأطفال مسؤولية مو بس أكل ولبس وطلعة وألعاب، فَ رجاءً قبل ما تفكرون إنو تجيبون طفل للدنيا خليكم علىٰ قدر من الوعي والمسؤولية تجاه تربيته وتنشأته، مالك علاقة بالحچي ولا تخليه يدفعك إنو تجيب طفل وأنت ما مستعد ولا عندك أساس للتربية الصحيحة الخالية من العقد النفسية، فَ لخاطر أطفالكم خليكم أب وأم بمعنىٰ الكلمة حتّىٰ يكونون مُمتنين الكم العمر كله.