إذا چانت الخسارة بيها مكسب راحتكم ونفسيتكم فَ فدوة إلها، وإذا بيها مكسب صحتكم ووقتكم وروحكم ترجع تورد فَ الله وياها بخيرها وشرها خارج حياتكم.

العمر مرة فَ لا تخلي يُهدر بالأمور الّي تسمم حياتك والّي تعيشك بوباء، مثل ما تهتم بصحة جسمك وتريدله المفيد، اهتم بحياتك ولا تخلي المُضر والّي بيه أذية يوصلها.

الّي يخليك بدفاع مستمر،
الّي يسترخص زعلك،
الّي يتجاهلك ويطفيك،
الّي ما يفيد وياهم صُلح ولا تغيير،
الّي يردوك بوقت مصلحتهم.

هذولي عبارة عن ناس وتصرفات سامة وأنت ما مجبور تتعامل وياهم وتخليهم بحياتك، تعلم تنسحب وتقطع العلاقة إذا أذيتها أكثر من راحتها.

الّي يحاول يخفف عنك،
الّي يبقىٰ موجود يمك،
الّي يشد علىٰ إيدك وما يخليها فارغة،
الّي يحاول علمودك،
الّي يطلع الحلو الّي بداخلك،
الّي يشوفك الجانب الثاني الّي يگدر يساعدك،
والّي يگلك "راح نعدي هالفترة سوا".

هذا الفرق بينهم، بين الّي يدخل حياتك علمود يكمل وياك "سوا" وبين الّي يريد يكمل عليك "بمصلحة سامة".

فَ أي.

أكو قول للإمام مُحمّد البَاقر وهم وارد مثله من الإمام جَعفر الصَّادِق (عليهم السّلام) :
"صَلاحُ حالِ التَّعايُشِ والتَّعاشُرِ مُلأُ مِكيالٍ ثُلثاهُ فِطْنَةٌ وثُلثَهُ تَغافُلٌ."

هالقول جدًّا مُناسِب لبناء أساس جيد للعلاقات، بمعنىٰ إنو ديمومة العلاقات بأختلافها سواء كانت علاقة صداقة، إختيار، زواج، عائلية، أو دراسة وعمل .. علمود الشخص يحافظ علىٰ العلاقة وسلامتها ويگدر يتعامل وياها باعتدال يحتاج إنو ينظر للعلاقة من خلال هالقول ويطبقه بأرض الواقع، وإذا نبقىٰ من أول زلة ومن أول مشكلة نتخلص منها معناها ما راح نشوف أي ترابط بين أي إثنين، فَ الطبيعي هوَّ "ثُلثاه فطنة وثُلثه تغافل" وهم لا إفراط ولا تفريط، لا أركز كلّ التركيز وبالدقّة الّي تخليني أنفر ولا اتجاهل بطريقة مو صحيحة، ويبقىٰ الاعتدال حلو، وحمل أخاك علىٰ سبعين محمل وحسن الظن بيه أمر لا بُدّ منه علمود سير هالعلاقات.
ويبقىٰ الجانب الثاني الّي هوَّ سام فَ أكيد يكون مؤذي وأنهاك للصحة النفسيّة وإذا ما بيه نيّة التحسين والتغيير فَ حله اقتلاعه من جذوره بعد ما تخلص فُرصه.

الشخص الّي يمشي بحياته وهوَّ يجبر بخواطر الّي حواليه وما گدر بيوم يكسر بخاطر أحد، ولا عرف يرجع الكلام المؤذي الّي انگاله، ولا صار مثلهم وتعامل بالمثل بضررهم، ما أعرف شنو أفسر هالتصرف بس أكيد هوَّ يعرف كمية الأذية من هالكلمات وما يحب غيره يحس بيها، الكلمة مثل الطلقة من تطلع بعد أبد ما ترجع، فَ يا أما تخلي هالطلقة تقتل موضع الحزن الّي بيه وتساعده أو تخليها تقتله بكسر خاطره، وكسر الخاطر مو هين أبد مو هين عند رب العالمين.

يا ربّ أجمع بينا وبين كلّ لهفة نمنا وإحنا نتمتم بيها علىٰ أمل حصولها، نوّلنا استجابة لدعواتنا الّي گلبنا ما انفكّ يدعي بيها، أنعَم علينا بالحمد بعد بلوغ الّي ابتِغيناه .. آمين.

‏"والحُبّ في صورته الحقيقيّة .. هوَّ ألّا تزيدك معرفة مواطن ضعف من تحبّ إلّا رغبة في ستر ضعفه، ولا يمنحك كشف خوفه إلّا سعيًا لدرءِ خوفه، وأن يكون يسرّ قلبك باب سكينته، وصبر روحك مُتّكأ حمقه، وإيمانك به آخر مسارات سعيه وأوّل موئِله".

ـ هالأقتباس بگلبي علىٰ گد ما واقعي بحقيقته!.♥️

شُكرًا للي يفصح عن مشاعره تجاهي، للي ما يضم الكلمة الحلوة عني ويطلق عِنانها حتّىٰ تتربّع بگلبي، للي يعرف شلون يوصل حُبّه بإهتمامه وحنيته، شُكرًا للي يذكرني بدعائه وزيارته، هالشي أعتبره الشكل الثاني من أشكال الحضن للرّوح بالنسبة إلي. ♥️

ما شايفة هيچ ترا!،
واحد يحچي بحقه وما يقبلون عليه ويگلوله ترا أنت عجيب وشنو المشكلة!
والله ما غيركم عجيب أمرهم وتحيرون الواحد شلون يصرف ويحچي وياكم بعد. 😃

بفترة مو بعيدة تقريب الـ ٣ سنوات چنت علىٰ عتاب مستمر، مثل ما نسميه عتاب حبايب، واحد منهم مكسور خاطره من الثاني، عتابه بقىٰ دفين بگلبه ما يعرف بيه غير رب العالمين، عتاب الّي ليش راح، وشمعنىٰ هوَّ وليش هسّة وليش هيچ سوا وصار، عتاب الّي يا ربّ شنو السر والحكمة من كلّ هذا، بس بعدين لا يا تُقىٰ هالشي مو ملكچ، ولا أنتِ صاحبة الشأن بيه، الّي وهبه رب العزة والّي أخذه رب العزة فَ خلص هالأمر ملك لرب العالمين وبكيفه يصرف بيه مو مال أعتب بـ ليش علىٰ أمره، بس أعرف رب العالمين من ينطي وياخذ أكو وراهن عوض عن الّي يترتب بسببهن، أكو جبر خاطر من بعد هالفقد، وأكو رضا مكتوبلي من بعد هالكسر، وأكو تهوين من بعد كلّ ذكرىٰ تعصر گلبي، فَ أي الحمدلله الّي بقرب رب العالمين ما ينخاف عليه وعلىٰ حاله.

رب العالمين وياك بكل حالاتك مو بس بوقت فرحك وراحتك ولحظاتك السعيدة، وإنما حتّىٰ بوقت حزنك ووجعك، فَ صعبة من نمر بشدة وظرف عَسر نگول محد يحس بينا لو محد ويانا، چا الله وين من كلّ هذا! بس إحنا ما مخلين رب العالمين بالمكان الصحيح بداخلنا، وهالشي مؤسف ومؤذي أكثر من الّي نمر بيه.

لُطفًا إذا ممكن قراءة سورة المزَّمل بنيّة شفاء ماما.

عيد سعيد وكلّ عام وانتوا بخير وطمأنينة وراحة بال وصحة وسلامة نفسية وجسدية، وعساكم من عواده يا ربّ.

يا ربّ آمين لكلّ دعاء وأمنية وطموح گلبكم يسعىٰ بيه، يا ربّ الدفو الّي يخليكم بسكينة ما يفارقكم.

الله يخليكم إلي وما أنحرم منكم، ويخليني الكم وما يحرمكم مني. 🌚

يا ربّ الّي طالب ينجح، والناجح يتخرج، والّي يتخرج يتعين وكلّ واحد يروح للمكان الّي يلگه نفسه يبدع بيه، ويا ربّ الّي مستعد للمسؤولية يزوج والّي يزوج ومُؤهل للتربية الله يرزقه الذرية الصالحة، ويا ربّ تكونون عائلة مُمهدة تثلج قلب صاحب الزمان، يا ربّ تكونون خير النّاس الّي يسلكون طريق أهل البيت (عليهم السّلام) والله يجعلنا خوش ناس آدميين رب العالمين راضي عنهم ..آمين. ♥️

وبس والله خو ما نسيت شي؟😆
ودمتم سالمين تحت عناية الله والآل. 💚🫂

حبابين لا تعبسون ولا تسووها سودة مظلمة، هنّ كم يوم خلي نعيشهن بفرحة، عدنا هواي أيّام نگدر نضوچ ونحزن بيهن بس هالليالي تختلف خلي نعيشهن تعظيم لشعائر الله، أركن المشاكل والأمور الّي مضوجتك علىٰ جنب والتفت لفرحة العيد وعيشها بروحك، متفقين؟.🤝

تدرون الصفنات تجيب نتيجة،
هاي آخر يومين مرتين صفنت واكتشفت بيهن شغلتين، بس كون امشي بيهن مو بس أجن علىٰ بالي. 🥲