شور : ( عـلـي بـويـه )


عـلـي بـويـه ..... عـلـي بـويـه

بالمدامع
والمواجع
آنه زينب ياعلي

بيه صايح
وين رايح
لاتغمض يل ولي

حاجيني ...
الهظـم يآذيـني
يبويه وعمري بي تدري
مايحمل يتّم

وجروحك ...
تـحـز بـروحـك
واغمّض روحي وبجروحي
اتمناه حلم

عـلـي بـويـه ..... عـلـي بـويـه
__1______

لاتسافر
بويه باجر
مايضل عندي صبر

ابقى المن
موتي أهون
بعد شيفيد العمر

ياغـالي ...
تشوف احوالي
الدمع خلاني بأحزاني
وحيلي ابلا وطن

قمصانك ...
خيم جيرانك
شمس ضحكاتك خطواتك
رد يا ابا الحسن

عـلـي بـويـه ..... عـلـي بـويـه
__2______

المثلك انته
يموت سكته؟
هاي ماصارت تره

الظلمه تچوي
وگلبي يحوي
كل حزنها المگبره

وعيونك ...
دمعتي بلونك
كَسُر بعيوني وكل لوني
احمر من دمه

احلامي ...
گضت گدامـي
بداية كسري من زغري
بروحة فاطمه

عـلـي بـويـه ..... عـلـي بـويـه
__3______

شلون تبعد
وچفك ايرد
شمس الله بكل وگت

بروحي جمره
وانته ادره
بويه مااصدك متت

ياروحـي ...
وسبب كل نوحي
عليك دموعي وموضوعي
وكل شيب الزغر

يانبضي ...
اويعلّة فرضي
يتيمه بدونك وعيونك
ويضيع العمر

عـلـي بـويـه ..... عـلـي بـويـه
__4______

كلشي خنگه
وروحي ورگه
ونار وگتي تستعر

بيه كسره
وبيه حسره
وبيه آلام العصر

بثيابك ...
أشم بغيابك
واناديك ارجع بالمدمع
وبآه الهجر

نظراتي ...
بهظم آهاتي
اموتن شمعه ابلا رجعه
يانبض العمر

عـلـي بـويـه ..... عـلـي بـويـه
__5______

بويه صعبه
الدنيا غربه
وروحي ماتهوه الغرب

الديره ظلمه
وكلشي هظمه
بدونك العيشه صعب

امنيتي ...
اشوف ابيتي
علي ابلا طبره ولا حسره
ولا دم هامّـته

وايتامه ...
تگض أبهامه
ويشيل حسينه بچفينه
وترجع ضحكته

عـلـي بـويـه ..... عـلـي بـويـه
__6______


#رزقهم_سلام_الله_عليهم
#احمد_رزاق_الاعرجي

ابو اتراب




مطـبور راســه حـيـدره وبروحه الامصاب
گاعـد ابو اتـراب ويـسولـف ويـه الاتـراب
باجر اخيّك يوگع اعليك
يتراب بوليـدي أوصّـيك
بالحسين

عـلـي مـامهـتم لـطـبـرة راسـه
گض الاتراب ابـأخـيـر انـفاسه
يسولف ودم هـامِته بشـيبـاتـه
يگله لا تلچم اوليدي احساسه

بــكــربـلـه بــاجـر يوگـع وحـيــد
ومايـضـل عنـده بالطـف عـضيـد
بـــرداً لـجــرحـه كـونــك تــكـون
ولاتــطـــب ريــتــه هــذا الأريــد

يـامـا شـلـت كـل عـمري اسـمـك اسـمع بهـاي
مـن يـوگـع حـســين بـجـراحـه أوگـف فـياي
آنه علي وگاعد احاجيك
يتراب بوليـدي أوصّـيك
بالحسين
_____1_______

عيـونه مليانه بدمع وبحسره
ابد مامـهتم الـجـرح الطـبـره
همّه چـان الاكـثر اعلـه عياله
وينظر اعله حسين مدري النحره

امن الدمه أتخضب شيبه الحنين
شوغه بأنـفـاسـه ودم عـالـجبـيـن
يـلـتــفـت گــــوّه ويـــرفـع إِدِيـــه
حـتـى يـتـلــمّـس نـحر الحُـسـين

وحسـين محـني من الهـظم ودمـوعـه قـرآن
وحـيدر بجـرحه اينـاشـده يوليـدي عطـشان
حاجيني يبني شبيك مابيك
يـتــراب بــولـيـدي أوصّـيك
بالحسين
_____2_______

الزينب ايدير النظر بالكامل
يگلها زينب والِدِچ هالراحل
ايعينچ الله بكربله يا زينب
المقتل أگبالچ يصير الكامل

بـاچر الـوحـدچ بِـيـن الـسِـهـام
كلشي يسـتـشهد حتـى السلام
بهـيـمة يتـطــشر صـدر العـزيز
ومـايضـل عنـدچ والي وخـيام

يحـچي ودِمـه الـهـامه وصـل حـدر الترايب
بــأنــفـاسه نــاره شــاعِـلــه لأم الـمــصــايب
ويصيح ياجرحي اشيداويك
يـتـراب بـولــيـدي أوصّــيـك
بالحسين
_____3_______

ايسولف ونزفه يطيح بعينه
يگله باچـر من تطيح سكينه
لا تـروح وتـلـچم الها عـينها
لـَـوَن تـآذيـهـا تــره تـآذيـنــه

وكل طـفل يركـض مايــستراح
لـو عـِثـر يمـّـك عـوف الـجـراح
لا تـجــي عـلـيـها لـمّـن يـطِـيـح
فــاگـد اعـزازه مـن تـعـبه طـاح

اِعـمي الـرِكـض وبـچـفـه سوطـه يـدوّر متون
واعمي الرفـع چـفـه بـصـلافـه يـدوّر ام عـون
سافلها خلِّ يلوح عـاليك
يتراب بوليـدي أوصّـيك
بالحسين
____4____

باچر ابـ حـر الظـهيره ال بالـطـف
أجـمـع ابـروده ونـعـومـة وإتـرف
لو رقـية تــشـوفــهـا زحـمـة تـرا
اتچوي رجليها وأبوها المصحف

امن الركـض تـتـعب بنـت الحبــيب
تدوّر الـغـالـي اتــشــوفــه ســلــيـب
وحـافـر بــصـدره اتـشـوفـه كـسـير
يـنــغـمـي عـلـيهـا الموقـف رهـيـب

بـعـيـن الـعِـده أُصـبــح رُمـح وأدفـنهـم أحـيـاء
أقـسـم عـلــيـك بــشـيـبِـتي وفـاطـمـة الزهـراء
عالحگ أسولفلك وادلّيك
يتـراب بوليـدي أوصّـيك
بالحسين
____5____

ألـيـتـامه يـمّـه كـلـهـا تـشاهد
وگام ينظر متن واحـد واحـد
مـثل هـالايتـام باچـر تنـهـضم
وباچر السوط بـمتـنهــم گاعد

تـــركـض بـهـيـمـه جـروح الـزغار
وتـنـظـر الـخـيـمـه أتـوگّـعـهـا نـار
كـل طـفـل حـافـي ابـلايـه معـين
وعـالـنـهـر تــــنـظـر طــايـح نـهـار

كونـك تگـض كـل الـهـوه وتـوكـف يـالاتراب
وتعمي نظر كلمن نظـر نظـره اعله الـحجاب
اليآذي خدرنه كون يآذيك
يـتـراب بـوليـدي أوصّـيك
بالحسين
____6____


#رزقهم_سلام_الله_عليهم
#احمد_رزاق_الاعرجي

موشح


آمـنـو الـفـتـيـةُ اصــحـاب الــرقـيــم
ابعلي بـسـمِ الله الـرحـمـنِ الـرحـيـم

فـتــيــةٌ قــد آمــنـو بــربِّ الـســمــاء
رفـعـو ايـديـهـم وحـاوطـهـم ضــيـاء
ياعـلـي صاحـو أظـن وسـط الـدعــاء
وْحصن صار الهُم علي ابـ سر العليـم

عـلـي سـر الله الــعـظـيم ابـلا جـدال
بـقـدرة الله حيـدره امـسـير الـجـبـال
امسـيّر الحـومـة اعله كـيـفه بالـقـتال
وبـالحـرب سـيفـه يسمـونه الجـحـيم

قصص عن المرتضى هوايه احتويت
راكِــع ويــتـصدق ابـمـحـبس لـگـيـت
ومـن اتـى الـلـه بـقـلـبٍ مـن قــريــت
علي الـگيـته حيـدره الـقلـب السـلـيم

عـلـي حـاضـر نـوح وكـت الــطـوفـان
عـلـي حـاضـر يونـس ومـنـطـي أمـان
عـلـي يـا مـحـلـى عـلـي وگــت الأذان
يـــاصـراط الـلــه عـلـي الـمـسـتـقــيم

عـلـي أحـنـيّـن يـمّـه تـنـزاحِ الْـهُـمـوم
مـاي ينـطي لو دره عـطـشى الـغـيوم
الـمـفـتـرض مـن يـنذكـر اسمـه نگـوم
وبعده نِـتــلـو صـدق الـلـه الــعـظـيـم

والــد الـحـسـنــيــن ســيـد الــبُـلـغــاء
هـــــذا واقــع حــــال لا مـــو إدّعــــاء
عـلـي لـو ما عـلـي چـا مـاكـو انــبـيـاء
وچــــان آدم عــاش بـالـجـنّـه عـقـيـم


#رزقهم_سلام_الله_عليهم
#احمد_رزاق_الاعرجي

( الكسر والطبره )



نـزل لـحـسـين الـوحـي يـرويـلـه
الكسر والـطـبـره التـقـو هـالليـلـه
شـوگـهم عـالـفـطـره
علـي ولاگـه الـزهـره

نزل جبرائيل يبچي
جايب أخبار السمه
طاح يم حسين چنه
ماي من فوگ ارتمه
گله ياجبريل سولف
عن علي حامي الحمه
گله عفته برحمته الله
والتقـه وي فاطمه

والـحـديـث انــدار مـابـينـاتـهـم
الـ اهـوايه السولفـن نـظـراتـهـم
وآنـه شـفـت بـعَـبـرَه
علـي ولاگـه الـزهـره
____1____

من علي شاف الزچيه
گلها شخبار الظلع
بشّريني شلونه وضعج
ماكو احزان ودمع؟
هاي جنّه وبابها انتي
وباب ماكو من جذع
گلبي هسه اطمأن كلش
ماكو باب ويندفع


علي گلها عـيوني ألـج مشـتاگـه
الحـمـدُ للّـه عـلـى هـيـج مـلاگـه
جنـّه صارت خضـره
علـي ولاگـه الـزهـره
____2____

فاطمه شافت الطبره
وسألته عن الألم
وتنظر بعينه ويگلها
مو مهم" أنتي الأهم "
وين محسن ارد احظنه
بهيده أشبع منه شم
وخل يگلي بابا حيدر
حيل مشتاگلها هم

وفجأه لن محسن أجه شمحلاتـه
يـمـشــي والــعـبـاس تـارس ذاتـه
هناكه وجـه الگـمـره
علـي ولاگـه الـزهـره
____3____

يگول جبرائيل انظر
حيدره جرحه اختفـه
من تلاگه بالزچيه
وأبن عمه المصطفى
حلوه من گعدو سويه
والملائك طايفه
الزهره ماهادل متنها
والظلع كسره شفه

فاطـمه بشـوفت علـي فـرحـانـه
تــگـلـه يـاريــت الـوِلِــد ويـــانـه
والـحـچـي بـالنـظـره
علـي ولاگـه الـزهـره
____4____

يگله ياجبريل سولف
بعد خبرني اشجره
جاوبه وكلاله موقف
ماجنت متصوره
واحسيناه كلها صاحت
چنه يوم الآخره
هناك مجلس سوت امك
والـلي يقره حيدره

اسم الله يبني حسين من الحافر
كل مـصـايـبـنه الچبـيـره الـعاشـر
وصاح هيْـنه الطبره
علـي ولاگـه الـزهـره
____5____

يگله اسمع يبچي حيدر
من سمع من النبي
تحترك باجر الخيمه
والتضل بس العبي
والمصيبه الكبرى توگف
عله التل الزينبي
وتنظر العباس طايح
زينب وتمشي سبي

وتنـظر حـسـين ورمـل بـجروحـه
والف مره حـسـين طـلعـت روحه
والــمــدامـع حــمـره
علـي ولاگـه الـزهـره
____6____


#رزقهم_سلام_الله_عليهم
#احمد_رزاق_الاعرجي

قصيدة لأربعين مولاي امير المؤمنين علي عليه السلام لسان حال مولاتي السيدة زينب عليها السلام

اموت اموت ... اشما يـطر وجه الفجر
اموت اموت ... بعدك اجروحي اشكثر
يوم اربعينك ياعلي لزينب عذاب
حيلي رماد وضايع بوجه التـراب

غريبه بداري ظليت
نوايح بـعدك البـيت
وأجـانـه أربـعـيـنـك
مـچانك خالي بعـده
ومـنو غـيـرك يسـده
وادور بـويـه ويـنـك

أنـه زيــنـب يــبـو زيـنـب
ضعت گطره بـنـهر يـجـري
وأخذني الشيب من زغري
واديـه اتــلاگـت بـظـهـري
يــبـويـه الـمـوت اشـوالـي
ولافـــرگــاك يـــاذخــري

سكوت سكوت ... يـنزل بـخـدي الدمع
سكوت سكوت ... جرحي لا ما ينسمع
جرح الهجر يابويه عيّشني مصاب
حيلي رماد وضــايع بوجه التـراب

____1____

الحسن شفته بجروحه
گــاعـــد ويـــه روحـــه
وأدموعـه اعـلـه خــده
لـِـزم ثــوبــك يــشــمّـه
الـهـجـر بـعـدك يـألــمـه
مـنـهو الـبـاقـي عــنـده

وشفت يمه ابو الـيـمـه
يلم روحه وگعد ينحب
واشـوفن دمعـته تلهـب
يبويه وشـبقـى بزينـب
اشوف حسـين گدامـي
مثلي من الزغر شيـّيب

اشوف اشوف ... كلشـي بـيه ينكسر
اشوف اشوف ... بالصبر ماضل صبر
عن حالتي لو أنسأل هذا الجواب
حيلي رماد وضايـع بوجه التراب

____2____

گـعـدنه وسولـفيـنه
ودمعنه فوگ ادينه
وتوضينه ابدمعــنه
اجينه لگـبرك انـوح
يبونه ومابقت روح
يـالـتدري بوضـعنـه

وصـلـنا لگبـرك ابهـمنـه
وعلينه أنرسمت العبـره
بـالـدمـعـات والـحـسـره
نـسأل طــابـت الـطـبـره
ونسألك بويه عـن أمنـه
شلـون احـوالها الـزهـره

جروح جروح ... بويه طابت لو بعد؟
جروح جروح ... الــعـذيـبـي للـفُـگد
فوگانه يابويه الحزن صاير سِحاب
حيلي رماد وضايـع بوجـه التـراب

____3____

يبـويه الـلـيل جـمـره
بصدري وبيه حسـره
نحيبي ووني بأسمك
أسـولـف ويـه اخوتـي
اعله گبرك ريته موتي
شحلات الموت يمـك

يـبويـه الـهـم تـِـرس بــالـي
وعـلــيـه بـانــت الـكــســره
واخوتـي دمـوعـهـم حـمـره
وطحت ماي بحظن صحره
ضعـت يابـويـه بـجـروحـي
مــن الـــكـســره لــلـطـبـره

ظلام ظلام ... باربعيـنك يـاضـوه
ظلام ظلام ... وانذبح حتى الهوه
والماي بيدي وگمت اشوفنّه سراب
حيلي رماد وضـايـع بوجـه التـراب

____4____

كفيلي گمت اشوفـه
يدگ صدره بچفوفه
وگتله بهيــده عباس
بـاجـر بــالـفـجـيـعـه
تنتــظــرك شـريــعـه
وتگطع چفك الـناس

ونظر عيني وشفـت عينـه
چن يسألني وانـتـي شلـون
چا وحسين يختي أم عون
وگتله اتطـيح منـي مـتـون
وحسينـك تدوسـه الخـيـل
ومن عندك تضـيـع اعـيـون

طفوف طفوف ... گـتله باجـر انسـبي
طفوف طفوف ... والتضل بس العبي
كلشي يِطيح ابكربـله الا الحـجاب
حيلي رماد وضايـع بوجه الـتراب

_____5_______



#رِزْقهُم_سَلامُ_اللّه_عليْهِم
#احمد_رزاق_الاعرجي

السلام عليكم خدمة الحسين (عليه السلام)
بعد التوكل على الله العلي العظيم
سوف يتم إعادة نشر منهاج محرم الحرام للسنة الماضية
1444 هـ
ومن ثم يتم نشر ما رزقنا الله لمنهاج محرم الحرام ١٤٤٥ هـ قريباً ان شاء الله
دعواتكم لنا بالتوفيق والقبول
واسأل الله لكم أفضل وأوفر التوفيق والقبول بحق النبي الأكرم وآله الطيبين الطاهرين (صلوات الله وسلامه عليهم)
وأن يبلغنا هذا الأجر العظيم

اللهم وفقني لما تحب وترضى من القول والعمل والنية والهدى انك على كل شيء قدير

لبيك يا حسين

#رزقهم_سلام_الله_عليهم
#احمد_رزاق_الاعرجي

منهاج محرم الحرام ١٤٤٤ هـ
قصيدة ولائيه

بـدايـة كـل مـحـرم أمـي الـگـاهـا
تطيح امن البواچي وأوگـع وياها
بدمعتها الحـنينه
بنـعاويها الحزينه
تطيح امن البواچي وأوگع وياهـا

كل محرم مـن يهـل اهلاله
أنظر أمي حالـها مـن حـاله
دموعـها للسحگـته الخـيّاله
وأنســبت للـشام كـل عـياله
أسمع أمي تگول محد شاله
طيّحو بس ماتطيح افعـاله

مـن واحـد محـرم أمـي لـلعـاشر
دمعـها عالـوجه يـنزل مثل حافر
اعله فطرتها رُبينه
بنعاويـها الحـزيـنه
تطيح امن البواچي وأوگع وياها
____1____

منـها أمـي الــدمـع يـنـزل جـمــرة
وعيـنـهـا مـن الــبـواچـي حــمــرة
تگول لـيش حسـين گطـعو نحـرة
وليش عشرة خيول داست صدره
بــالــونـــيـن تــصــيـح آه بـعــبـرة
ايسـاعـد الـله گلـب أمـه الـزهـــرة

تلبــس أسـود أمـي والـــدمـع يـجري
تِگــول اتمـــنه آنـي الـينـگطع نـحري
الگلب شاب بونينه
بـنـعاويـها الحزينـه
تطيح امن البواچـي وأوگــع ويـاهـا
____2____

كل مُصاب أمي قوية اتكـابر
لچن توگع من يجيها العاشـر
مثل طفلة تبچي تكسر خاطر
تعوف عالمنه بحزنـها اتسـافر
تنعى أسمعـها وتگـول الـحافر
شنهو خلّه بالـحـسين الطاهـر

من كــثر الدمـع شيـلتـها تـتـنــگـع
على حسين ومصابه أحمر المدمع
العمر كله وسنينه
بنعاويها الحزينـه
تطيح امن البواچي وأوگع وياهـا
____3____

فوگ كل حايط تعلك صـورة
للحُــسيـن وأنظـر أيـشع نوره
وتگعد أمي أگـبالـها مكـسورة
وبسوالفها الـعــظيـمة اتـزورة
تگلي يمّه بدمعة بيها احرورة
آنه مـخـلوقـة لجـل عاشـوره

تگلّي الخدمة يبني عاشت أبدمي
وآنــي خـادم وطـالـع عــلـى أمـي
أنه وروحي مشينه
بنعـاويـها الحـزينـه
تطيح امن البواچـي وأوگع وياهـا
____4____

أمي وصتنـي بوصـية وبيـها
الخـدمـة للجـنة گبـل تـاليـهـا
تسولف امي وانظر آني عليها
خدمة حـسـين بنحـر اشريـها
الدمعه يبني تحله يـم غاليـها
وبالمـجالـس دمْـعِـتـك بديـها

كل خدمة مذلة اشما تديـر العـين
بس عزة وكرامة خدمتك لحسين
العمر يحله بأنينه
بنعاويها الحزيـنه
تطيح امن البواچي وأوگع وياهـا
____5____

#رزقهم_سلام_اللله_عليهم
#احمد_رزاق_الاعرجي

منهاج محرم الحرام ١٤٤٤ هـ
قصيدة ولائية

عـمري شـهـر ... وگماطي رايه
ودموعـي دم ... لجـل السـبايه
هـاي الـخـدمـه ... اعـظـم نـعـمـه ... ليوم المحـشـر
عـابـس عـمــره ... لــو رد فــتــره ... چـــان اتــوزّر

چانت امي بيـوم العـاشـر لـمـن ابـچـي وآنـه ازغـير
اسمع اُكبـر يبـنـي بعـمـرك وحـضّـر راسـك للتـطبـيـر
اتگلّي ازْغير ولمن تبچي لجل حـسـين تـصـير چـبير
رادود اعـله المــنبـر يـبنـي وخـادم لـلزهـراء اتـصـير

يبني العمر ... يـحله بچلمتين
عمرك نــذر ... للزهره وحسين
بـالـمـسـتـقـبـل ... هـيـّه الاجـمــل ... دم بــالـمنـحر
عـابـس عـمــره ... لــو رد فــتــره ... چـــان اتــوزّر
____1____

امي اتوصيني بهالـخـدمـه ودمـعاتـك خلّيـها اهواي
يوميه حسيـن اذكر اسمه شما روحك تعطش للـماي
من زغري وحسّـيت الخـدمـه الـشـريان الأبـهر وياي
ربي أرزقـني الحرگه ودمعه لحسين وارزقني الراي

مـن انـتــحـب ... كون بألم كون
حتى انحسب ... من اليخدمون
شــايـل حسـره ... تـچـوي الجمره ... ويمـكن اكـثر
عـابـس عـمــره ... لــو رد فــتــره ... چـــان اتــوزّر
____2____

الما خلّه حسين بنص گلبه چا شيـخـلّـي يـا هـالـناس؟
خـاطـر ما نعـطــش مـن بعده قـدّم للـشـاطـي العباس
بالطف داس بصـدره الحافر هو الـمثـله هـم يـنداس؟
هنـياله الصـار ابـهـالـخدمه سـلـطـان اليـصـبح كـناس

وكـت العزا ... اتهـل المـدامع
مثل الطفل ... عن أمه ضايع
كـون اتـواضــع ... مـا اتـــــنــازع ... مـــا اتــكــبّـــر
عـابـس عـمــره ... لــو رد فــتــره ... چـــان اتــوزّر
____3____

شمحلاها احـضر باللطـميه ويْهـل دمعي ابـلايـه انگاب
واحساسي ايگلي ابكل مجلس تحضر فضه عنـد الباب
والزهره اوياها اتسجلنه بدفتـرها المــتروس اصحـاب
احنه ابلا مجلس والزهـره اتـراب ويمـشي فوگ اتراب

كلشي وهـم ... بس الْخِدامه
تصبح جسر ... يـوم القيـامه
الـعـالـم هـيـمـه ... وهيـه الـخـيمه ... هـاك اتـصـوّر
عـابـس عـمــره ... لــو رد فــتــره ... چـــان اتــوزّر
____4____

بـاجـر مـن ايــمـوت الخـادم يـلگـه أعـماله بـهيئة نـور
مضمومه الحرگه وحسراته وكل دمعاته اعله المنحور
ساعه الدنيا ونرحل عنـها ونآخـذ بـس چلـمة مـأجـور
شمحلاها امن الزهره اتگلك سعيك يـالخـادم مـشكور

تحضر الك ... ذيچ المــسيه
اتگلك أنه ... الزهره الزچيه
ويـصبـح كـبرك ... جـنّـه ابعـطرك ... عطـر الـعـنـبر
عـابـس عـمــره ... لــو رد فــتــره ... چـــان اتــوزّر
____5____

بـاجـر بـالـمحـشـر نتـفاخـر والـعـباس اويـانـه انـشوف
شايل جـربه وعينه اتخبُّل مامـجـروح وعـنده چـفوف
ولحسين انروح بواهسنه واعليه سبع اشـواط انطوف
يـتلــگانـه ونــركـض صـوبه يركض ملـهوف الـملـهوف

ونگعد سوه ... ونشـوفه بالعـين
وأنْشم عطر ... مولانه الاحسين
يــارب هــايـــه ... كــل الـــغــايـه ... وانتـه التـگدر
عـابـس عـمــره ... لــو رد فــتــره ... چـــان اتــوزّر
____6____


#رزقهم_سلام_الله_عليهم
#احمد_رزاق_الاعرجي

منهاج محرم الحرام ١٤٤٤ هـ
لمولاي صاحب الزمان " عجّل الله فرجهُ الشريف "

ياحبل الوِصـال __ يابـحـر الـكـمال
مرسال الدموع __ يـالغايـب تـعـال

دمعي يوميه الك يالمهدي يجري
يادلـيل التائِهـين وحامـي ظـهري
شيّبت رايد أشوفك ليت شِـعْـري
يـروحـي يـروحـي يـروحـي

يالشايـل جـِروح هـواي يالـمـتـعـوب
يالعـندك صـبر أيـوب

شما أذنب أجيك _ ما تسحب أديك
يانور الـخـشـوع _ علّـمـنـي عـلـيـك
____1____

طــبــرة الـكـرار وجـروح الـيـتـامـه
براسك وحيلك يطيح اويه العِمامه
يمتى تظهر والعمر تكشـف ظـلامـه
يغالي يغالي يغالي

مـن دونـك ظــلام الـدنـيـا يـامــولاي
يا حرزي يراعي الراي

من دونك أضيع _ أجعلني مُطيـع
بكل شدة رجاي _ مـولاي وشـفيع
____2____

أنته گلبك بي جروح الطـف يغالي
وآنه گلبي ذنوب وابـ لـون الليـالي
ناسي حزنك آنـي ذاك ال لا أُبـالي
هظيمة هظيمة هظيمة

ما أدعـي بگلـب خـاشـع الك لـحـظـة
ياگلبي وسبب نبضة

أبعـث أعـتـذار __ يـاوجـه النـــهار
جايك يالحنين __ متروس انكسار
____3____

ليش يوميه بذنوب الگلبك أجرح
بأمتحان الصـبر انتـه اتريد افـلح
وآني ارسب وانته تتمنّالي أنجح
اويلاه اويلاه اويلاه

ألچـم جـرحـك وعـيـنك علـيه تـطّـوف
أذا ما أشوفك أعمي الشوف

رازقني الحياة __ ياكهف النجاة
وين بيا مكـان __ يـوميـة تـبات
____4____

وين هاي الديرة ساكن انته بـيها
كون طيفك أوصله ايدلْني عليها
واوصل والگاك بيها مـن تـجيـها
يگلبي يگلبي يگلبي

وأگـض چـفك وأگـلـك سـيـدي التـوبـه
وابد ما أذنب النوبه

يم بابك أجيت __ يالـمهدي ارتجيت
تغفرلي الذنوب __ وابأسـمك دعـيت
____5____

#رزقهم_سلام_الله_عليهم
#احمد_رزاق_الاعرجي

منهاج محرم الحرام ١٤٤٤ هـ
لمولاتي فاطمة العليلة " عليها السلام "


رايـــــح ... وراح اترك أبنيتي وگلبي عدها
وخوفي ... لا تـتــبــع أثـرنــا ومـن يــردهـا
وحيلي هالبدا ينـحل
بعد شوية راح ارحل
رايح


ما ظل للسفر لحضـات ... وأجمع بيدي الابنيات
بس اترك عليله
أصـيح آنه باسامـيـهـن ... وهــيّه تنـظـر علـيـهن
بالدمعة الثگيله

أصـعدهن بـناتي بالـضـعـن بيـدي
وأشـوفنـها تجي وتبـوّس بـأيـدي
تگلـي بـهـالـسفـر تـكـبر مـوالـيدي
ازغيره ولو رحت تطلع تجاعيدي

طفله ... منهـا الدمعـة تنـزل حمــرة ياناس
گالت ... اخذني عليك امشّي الغالي عباس
أشـگلْهـا والدمع وشّل
بعد شوية راح ارحل
رايح
____1____

وردة وحـيـلهـا ذبــلان ... غصنها أمـشرّع وتعبان
واتـنـاديـنــي بـابـا
أضم دمع الحزن عـنها ... تگلّـي بـروحتـك مـنـها
اتضل داري خرابه

الهُظَم روحي تشم بثيابي أشوفنها
طـحت اعلـيها بالدمـعـات اشــمّنـها
وگت ماضل وأسافـر بـس أعوفـنها
خوفي اتموت لــو آنـه رحـت مـنها

حـسـره ... أجت تركض عليها وتبچـي العيون
صاحت ... اليضــل ابــلا أبــو يـتـنفـس شلون
وفوگ العلّه تـتـعلعل
بعد شوية راح ارحل
رايح
____2____

أجت ليه وحِمل چـفها ... ثـوب ودمـعـة تذرفـهـا
گـالـتلــي هـديـة
ســوّيـتـه الــك تــدري ... يا عـگـلـي وبعد عـمري
خيّـطـته ابأِديــه

بِست چفـها وأخـذتـه والدمـع سـچّـاب
مــاتـدري الــهـدم مـن حـصّـة الـسـلّاب
وبالطف صدري بالحافر تدوسه ارهاب
ومـايبـقـالـي واحـد لا أخـو وأصـحـاب

صـعـبه ... كـلـهـا اتـطـيـح بــاجـر عـالـوطـيـّـة
بـغـربـه ... طيـحـتـنـة وتــلـمّـنـه الـغـاضــريـة
مصايب گلبي يتخيل
بعد شويـة راح ارحل
رايح
____3____

أوادعـها بألـم نـشـرح ... وتوادعـني بألـم يذبـح
وأمسح دمعة العين
الحـزن بيـها يأذّيـني ... الـدمع بعيوني غاشيني
شيّب گلبي مـرتيـن

بـوْداع العلـيـله ابنيـتي هـالـمْـرّه
وعند أم البنين أوداعها اشـكـبره
دمعـها عالـجبل لو ينـزل اتفـسره
حِملت أوداعهم جمرة بأثر جمره

جـمره ... شـايـل گـلـبـي بـــوداع الـحـبـايـب
حسره ... بـعــيـونـي چـبــيـرة وگـلبي ذايـب
قـرآن الـــحـزن رتّـل
بعد شوية راح ارحل
رايح
____4____

مِشه ضعن الحزن وأنظر ... وراي أتلفّـت وأشعـر
العليلة لاحِگتـنه
خُفت لا تلحگ اضعـوني ... أسمـع بويـه تانـونـي
حگها أمفارِگتنه

وگــفـت وأنـظـر امـن بعـيـد سـالفـتـي
وأشـــوفـنـهـا تـأّشـر بــيـدهـا أبنـيـتــي
رفعت أيدي وصحت ها يابعد صحتي
تـصـيـح ألْمن أضـلّن وأنـت طـايـفـتـي

حيلي ... راح ويـــــاك لــــمّــن وادعـــتــنـــي
بـويـه ... للــهــم ضـالّــه چـــا مــا خــذتــنــي
من گتلي بألـم مقتـل
بعد شوية راح ارحل
رايح
____5____

ماتدري الـطـفوف آلام ... مـن الخـيمـة حـد الـشام
واليآذيني أكثر
خيمْـنه تحـترگ بالـنار ... وحـرم زينب تلم وازغار
ليضيعون بالبر

بـالطـف كلـشـي تـتـغـيّر تـعـابـيـره
ويسحگ فوگها الحافر أهـل غيـره
بـاجــر حـيـرة الـنـسـوان يـاحـيـرة
صعبه اعليهن أيشوفنّي بحَـْصيرة

وراسـي ... فــوگ الـرمــح والــوادم تــنــظـره
مـنْــشـد ... بثـوب أبنيتـي خاف أتـطيـح وذره
والأصعب هذاك التّل
بعد شوية راح ارحل
رايح
____6____

#رزقهم_سلام_الله_عليهم
#احمد_رزاق_الاعرجي

منهاج محرم الحرام ١٤٤٤ هـ
لمولاتي فاطمة العليلة " عليها السلام "
[ ها يا ابو علي ]

رايح يالـهوه ... ومآخذ كل هلي
خليلي نفس ... هـا يـا ابـو علي
اگبالك اكسر الخاطر
ضعنك باجر يسـافـر
ها يا ابو علي

بويـة باجـر لـو تـروحـون ... ثوبي يثگل فوگ الأمتون
شلون أشوفن من بعدكـم ... وانت ضعنك مآخذ عيون

اعـــــثــر بـــالآه .. يـانـور الـله
تــلــفـي الويـلاه .. بالهجر
خلافك حسرات .. يابوية تبات
فـوگ الـدمــعات .. وانكسر

حيلي ودمْعتي ... يگضن لو رحت
وحدي لو أضل ... احسبني مــتت
هجرك للگلب كاسر
ضعنك باجر يسافر
ها يا ابو علي
____1____

بــويــة احـلـفـك بـالزچــية ... عـاد خــلِّــيلــي رقــيــة
سلوة تــبقـى ويـاي بـعــدك ... وحتى من نبچي سوية

خـلّـيـهـا ويــاي .. ياروح الـماي
تـسـند مـگـفـاي .. يـالأبــو
متروسه جروح .. ياروح الروح
ويــــاك يـــروح .. كل دفو

يابـويـة العـمـر ... من دونك عدم
مايبـقـالي اخـو ... ولايبقالي عـم
او لا غالي يضل باجر
ضعنـك باجـر يسـافـر
ها يا ابو علي
____2____

أُمـنـيـة مــن أمــنـيـاتـــي ... أتعوف وحــدة مـن خواتي
يمي لـو عـبـد الله عـوفـه ... بــي أشـــمّـن ذكــريـــاتــي

بحضاني ينـام .. يـاتــاج الهـام
أتـــقــلِـّـل آلام .. ضـلّـِـتـه
كل حيلي رماد .. يابو السجاد
والــهـم يــزداد .. بروحِته

اتمـنى الطفــل ... ايضل يمي وِنـس
لو رحتو وعلي ... أبقـى ابلا شـمس
گلبي ولهـفِـته حايـر
ضعنك باجر يـسافـر
ها يا ابو علي
____3____

لو رحـت چـا ابقـى الـمن ... عـيوني مـن فرگـاك يعمن
الفرگة حـيل تريـد مـنـي ... المـوت بعـدك بويـة أهون

لفطرس داويت .. ياراعي البيت
أتداويني ريـت .. يالـدوه
ظـلـمــة بلـيـاك .. بـوية اتـرجـاك
تـآخـذني وياك .. يالضوه

بعدك هالعمـر ... يخلص من وگـت
اتنفس جـمـر ... لـو لـحـظـة غبـت
دمعي بغيبـتك حافر
ضعنك باجـر يـسافـر
ها يا ابو علي
____4____

دمعـي يـرسـمـلـي دربـكـم ... بـي مخـاطـر بـوية الـكـم
لاتـــعــوفــونــي وحــيـدة ... لـيـش مو آنــه أحــبــكــم

مـاتبـقـى انفـاس .. ياتاج الراس
اي والـــعـــبــاس .. اختنگ
كل لحظة افراگ .. تزرع أشواگ
وگلبي المـشـتاگ .. يحترگ

أنـظـر كـل أخـت ... هودجها اكتمل
وآنه ابـهـالـوضـع ... ماضـل لي أمل
يشرح مدمع الـناظر
ضعنك باجر يسـافر
ها يا ابو علي
____5____

اجّـِلوهـا الروحــه هــايــه ... بـيــهـا أشـم ريحـة منـايـه
بويـة أبـوسـنــهـا أديـكـم ... آنــه وعــيـونــي خــطـايـه

أشـتـم دُخــان .. وانظر نيران
فوگ الحيطان .. تنـرسم
وارماح هـواي .. فوگاهـا الماي
يابويـة وهـاي .. مو حلم

چــنــهــا كــربـلــه ... ترسـم محنِتي
وفوگ الـتل أصـد ... زينـب عـمِّتـي
جرحي ليلة العـاشـر
ضعنك باجر يـسافـر
ها يا ابو علي
____6____

#رزقهم_سلام_الله_عليهم
#احمد_رزاق_الاعرجي

منهاج محرم الحرام ١٤٤٤ هـ
لمولاتي فاطمة العليلة "عليها السلام "
[ رايحين ]

رايــحـــيــن ومــاخــذونــي
عـالــهــــجـر مــاعـــوِّدونــي
شلون اتنـفّس بعـدهـم
راحو اعـزازِ اشـيردهم
رايحين رايحين

راحو وعـافـونـي وحـدي لـلـدمع
چا بـقو لو جرحي صـوته ينسمع
نـار فـرگـاهـم وكـل حـيـلي شمع
ويـــن الـلــه ويـردون ... وترجع روحي ليّه
بعدهم تعمى الأعيون ... وأموت المغـربيـه

دارنــه مــثــل الــخــرايــب
مـن بعـد عـيـن الـحـبـايــب
رُمح بعيوني فـگـدهـم
راحو اعـزاز اشـيردهم
رايحين رايحين
____1____

أنتظر عالباب ودموعي أتهـلي
هلبت أيرد الضعن جايب هلي
حيل مشتاگه لأخـيّاتي وعـلي
بـيـه جــروح الــفـراگ ... والـعـلّـه الـچـبـيره
گــلبي هـواي مـشـتاگ ... ودمـوعـي أسـيره

سكتـه كلشـي وبـيـه صـايح
واعله بابـي الـشـوف طـايح
عازة هايه وهـالرِدتهـم
راحو اعـزاز اشـيردهم
رايحين رايحين
____2____

انتظرهم ساعه ساعه عالجـمر
شما اگومن على وجهي انهطر
شـلون يتـجـبّر الگـلـبه مـنكسر
عـالــبـاب ازرع الـعــيـن ... هلبت أهلي يلفون
ويرجع والدي الاحسين ... يمسح دمع العيون

ورايــــة الــعــبّــاس عــمّـــي
اتـرفــرف ويــنــزاح هــمّـــي
ويرجع ايخضـّر وردهم
راحـو اعـزاز اشـيردهم
رايحين رايحين
____3____

بـالـدرب يـومـية أگـعـد للـصـبح
والثـواني صـايـره بـروحي رمح
والحزن شيّد وسط گلبي صـرح
زغيره وحيلي تعبان ... وثِگل ثوبي اعله متني
أنه الماعندي جـيران ... لأرض الــطـف تـزتـنـي

والـبــعـض بــيــهــم شِـمـاتـه
الـمـثـلـي چـا شّـلـه بحـيـاتـه
أهلي ذابحـنـي بُعدهُم
راحو اعـزاز اشـيردهم
رايحين رايحين
____4____

من تجي النسوان يمّـي أخـتنگ
يـجـن ويـسألـن وگلبـي يحتـرگ
چي عليلة ماخذوچ أهلچ صدگ؟
شحچي وكلهـن كبار ... واعرفهـن شِـمـاتـه
أسمع والحـچـي نـار ... ودمـعـي شايـفـاتـه

مـــن بــعــد أهــلـي مــصــيـبــه
عــايـــشــه بــــداري وغــريـبــه
الفارِگوني روحي عدهم
راحو اعـزاز اشــيـردهم
رايحين رايحين
____5____

بـاقيـه الوحـده وأنـازع بـالألـم
والگلب نبضاته أسرع من سهم
هسه گعدو أهلي ها نصبو خيم
هـيّـه الــراحـة يانـاس ... لـلـعــدهـا أبـوهـا
وراحة تصير الأنفـاس ... لـو يمْـها أخـوهـا

وآنـه وحـدي أبـلايـه والـي
ودعــتــهــم غــالـي غــالـي
وهمّه يدروني أحـبـهم
راحو اعـزاز اشـيردهم
رايحين رايحين
____6____


#رزقهم_سلام_الله_عليهم
#احمد_رزاق_الاعرجي

منهاج محرم الحرام ١٤٤٤ هـ
لمولاتي فاطمة العليلة " عليها السلام "
[ موشّح ]


الفـارِگـت مـثـل الحـسيـن شلـونـهـا
مـو دمـوع اتـطيـح مـنهـا عـيـونـهـا

گـاعـده بـالــــبــاب يـومـيـه الـعـصـر
ضـعـن ابوهـا حسـين يـرجع تنـتـظر
تگـول بعد الضـعـن مايـسوه الـعـمــر
والدمـع مـسـتــوطن اعله جـفـونـهـا
____1____

حـيـلــهـــا مـاي وتـبـدّه اعله الـتـرب
وبـالـدمـع تـعـثـر ونـبـضات الـگـلــب
بفرگة الغـالي الْهـوه اتـشـمّه صـعـب
الثوب صـار اثـگـيـل فـوگ مـتونـهـا
____2____

بنت الاحسين العـلـيـلــه بـهـالوضـع
كل جـرح بيـهـا أبـتـدى ويّـه الـدمـع
طفله هـيّه والعـمـر خيـط ابــشــمـع
والــهـجــر نــاره تِـشـبْ بـظـنـونــهـا
____3____

امـگـابـلـه الـقـاروره والـمـدمـع دمِـه
خايفه اعله الضعن مـن حـرّ وضِـمـه
وفجـأه صاحـت فاطـمة يـافـاطـمـة
وشــافـت الـقـــاروره احــمـر لونـهـا
____4____

گـعـدت ونــاحـت بــدمــعـة وابـألـم
وگـام يــتـراوالـــهـا حـــرگ الـخـيـم
وشافت الاطـفال تـركـض والــچِـدم
حافية بصحره وْعِـدا ايشــتـمــونهـا
____5____

شافت حـسـين اعله طـوله منهـُطـر
والحوافـر تـرض لحـســيـن الـصـدر
وراسه فـوگ الرمـح يهتـف بالنـصـر
وچثتـه فــوگ الـگاع ويـطشرونـهـا
____6____

شافـت انـواع المــصـايـب والـقـهـر
شافـت الــعــبـاس طـايـح عـالـنـهـر
ماتـت وچـان الــســبب مـن الـقـهـر
وكون بالـطـف فاطمـة ايـدفنـونـها
____7____



#رزقهم_سلام_الله_عليهم
#احمد_رزاق_الاعرجي

منهاج محرم الحرام ١٤٤٤ هـ
لمولاتي السيدة أم البنين " عليها السلام "
[ المرأة الكلابية ]

أم عــبّاس هــالأم الـعـظيـمـة
ربّت أربعـة خيمة اعله خيمة
قـرآن الوفة هيّة
هالـمرأة الكلابيّة
عظيمة

عشر معشار قصتها وصلنّه وشفنه بيها اسـرار
بـعـد أم الـحسـن صـارت زوجـة حـيدر الكـرار
خـدّامــة أقـبلـونـي اتـگـول لّوِلِد حامـي الجـار
دخـلــت خـــادمـة الـهـم مـو زوجــة أبـو للـدار

لأولاد الــزچــية صـارت عـيون
تضل سهرانه الهم من ينـامـون
اشكثر متروسه حنّيّة
هــالـمــرأة الـكـلابيّـة
عظيمة
____1____

بالـتاريــخ مــن نـقره ضـعن حـسـين مـن حــمّـل
ماهـمّهـا الوِلِد يرحـون هـمـهـا حسـين بالمُـجـمـل
لـحـسـين الـنـظـر دارت وبدت مثـل الـورد تـذبل
طاح الحيل من سمعت بـاجـر كـل ضـوه يـرحـل

گعدت وي وِلدهـا ودمـعـة بالعيـن
وصيتها الحُسين وأخت الأحسين
طينتها حُسـينـيّة
هالـمرأة الكلابيـّة
عظيمة
____2____

خـذت أولادهـا يـمــهـا بـوگـت الـفـرگـة لـمّـتـهـم
عله حسين وعلى ضعنـه هـواي هـواي وصّـتهـم
حـــل وگــت الشـدد تـدري وهـيـّه هـاي عـازتهـم
شبـگـتـهـم لحد ما خالطـت دمـعـتـهـا دمـعتــهـم

أول أُمـــرأه اتــقــدم ضــنـاهـا
لحسين واكيد الله اصـطـفاهـا
نهر الحب سواجيّه
هالـمرأة الـكـلابـيّـة
عظيمة
____3____

الهـوادج كلهـا توجعـها منّ أتـصـد عليـها اتـنـوح
بـاجـر لـو أجه بـاجـر تـضـل ام الـوفـه ابـلا روح
مـحد يفـهم المـجـروح بـس المـخـتـنگ بـجروح
تكول حسين من دونه يبقى كل حِـمِـل مـطروح

لو طر الفجـر مايبـقـى كـل حـيـل
الليل بسرعه يركض يشبه الخيل
الوداع أيأذّي طاريّه
هـالـمرأة الـكـلابـيـّة
عظيمة
____4____

أجه وگت الفجر والروح ذابت منها چـن شـمعة
التنطي للهوه نسـمات بيـها اختـنـگت الــوسـعة
حگها امفارِگيها اعزاز دمـعـة تــطيـح عالـدمعـة
تودّعهـم لچـن صـعـبة شلـون حسـينـها اتـودعة

يـگـلها يمـّــه واتگـلّـه اشـحـلاهـا
اليـمّه بـصوتـك الـحب محتواها
چنها آية قُدسيّة
هالـمرأة الكلابيّة
عظيمة
____5____

راحـو والـدرب نـظــرات زرعــت والـدمـع يـوگـع
أول أُمرأه نــقـره عــيــون اعــلــه الــدرب تــزرع
تـتــمـنـى يــرد حـســين سـالـم بـالـضـعـن يرجـع
فراگ حسين وأهل حسين سيف وبالگلب يگـطع

آخر نظره چانت مـنها يـانـاس
عالراية التِرِف بچفـوف عباس
عمرها كلّه حُرّيّة
هالـمرأة الكلابيّة
عظيمة
____6____

#رزقهم_سلام_الله_عليهم
#احمد_رزاق_الاعرجي

منهاج محرم الحرام ١٤٤٤ هـ
لمولاتي السيدة أم البنين " عليها السلام "

گــمـت مـن گــد الـســهـر أتـخـيّـل
زينب انـظـرهـا غريبـه اعله الـتـل
وبـخـيالـي سـافـرت
العاشر بعيني شفت

من سـهـر ليلــي وحنــيـني سـافـر بـروحـي الـخـيال
وأدخَــلِـت عالـم أحـزانـي وشـفـت دم فـوگ الـرمـال
وگـمــت أتــبــع هــالــدمـه ... بـي عـطـر مـن فـاطـمـة
خـاف ابـن حامـي الحـمـه ... صابه جرح
اسم الله كون امن الخطر ... وكـون هـالــدم لـلـكـمـر
وكـون الاحـسـيـن الـنــهـر ... ما مـنـذبح

روحي توجعني ودمـع بعـيونـي
والــدمـه شـفـتـه وتـغـيّـر لـونـي
أمشي واعثر وألتفت
العاشر بعـيني شفـت
____1____

زيـنـب اعلـه الـتـل غـريـبـة وبـيـهـــا تـل الأنــتـــظــار
وكـل نـظـرهـا اعـلـه الـشـريـعـه جبل يرفـض انكـسـار
وردة مـــنـتــظـره الـنـده ... شـامـِـخــه ابـيـن الــعِـده
مــا مْــبـــيـنـــه فـــاگِــده ... أخوه وأهل
حـيـلــهـا أتـلـمّــه ابــألـــم ... نـهــر مــآذيــهـا وخــيـم
تــنـــتـظـر راعـي الـعـلــم ... عـدها امل

وشــفـت كـل اخـيامـهـا محـروگـه
وبالدُخـان الـسـمـه چـن مخنـوگـه
أوصل الزينـب ردت
العاشر بعينـي شفت
____2____

آنـه أم عـبـاس حـيـلـي طــاح مـن شــفـت الـدُخــان
شـفـت خـيـمـات الـعــقـيلـه تـحـتـرگ من كـل مـكـان
شفـت ســلّابــه اعـتِــنــو ... خـيـمة خـيـمـة فـرهـدو
والـــــرقــيـّـه ســـــلِّــبـــو ... قـرط الأذن
وشـفـت زيـنـب والـقـهــر ... عـيـنهـا الـصـوب النـهـر
وبــــالـدمـع گـــام أتْـعـثـر ... عثرة حزن

رحت صوب المشرعه بدمعاتي
وشفت عون وجعـفر اوليـداتي
وين ابو فاضل صحت
العـاشـر بعيـني شـفت
____3____

شـفـت عـبـد الله اعـلـه طـولـه جـروحه تنزف ذكريات
وانخـمش گـلبـي وتگـطّـع خـوفـي لا ابو سكـينـه مات
اســـمـع اونــيــن الأبــن ... الصـوت مـن شاطي الحزن
وخطوِتي صارت سجن ... وخوفي كُبر
مـن وصـلـت المـشـرعه ... شـــفــت چــثّــة امــوزّعــه
والــچـفـوف امگــطــعه ... يـم الـــنـهـر

گتله سهله جـروحـك وچـفيـنك
يـبـني يـالعـباس ويـن حسـينك
ومن سكوتـه اتمرمرت
الـعاشـر بعـيني شفـت
____4____

بالـدرب أمشـي وهـوا الله حـســين عـطـره ليه جـاب
شـفـته بـعيـونـي حبـيـبـي جـروحـه غاطـيها الـتـراب
والـمـــثـلـث بــالــصـدر ... ويـلـي شـفــتــه مـنـكـسـر
امشـي واعـثر وانهـطر ... فـوگ الارض
شـفـت راسـه مـنگـطـع ... ومـنــگــطـع مـــنّـه صـبــع
وصدرة ماضل بي ظلع ... حـافر يرض

يـاحــوافـر كـافــي لتسـحـگــينـه
تعـب حيـله حـسين متـشوفـيـنه
كون يم طوله مـتت
العاشر بعيني شـفت
____5____

گـمــت أدوّر خـنـصـر ايــده وبـالــحـوافـر شـفـتـه راح
ودوّرت راس الأحــسـين وشـفـت مـآخــذتــه الـرِمـاح
وجــســمـه مــتــوذر وِذر ... وفـوگ كـــل هـذا الـقـهـر
راسـه مـهـشــوم بـحـجـر ... والله صعب
عــاري ضــل وسـط الفله ... اثــيــاب مـــاضــلت ألــه
ســـلّـبــوهــا بــكــربـــلــه ... ودام غـرب

صاح واحد مـات اسلــبو عيـلِتـه
واعله رمحه لأخته زينب نـظرِته
وبنـظـرتـه اتحيـرت
العاشر بعيني شفت
____6____

#رزقهم_سلام_الله_عليهم
#احمد_رزاق_الاعرجي

منهاج محرم الحرام ١٤٤٤ هـ
لمولاي مسلم بن عقيل " عليه السلام "

اول رسـالـه ونـحر
حملن صفات الكمر
يـاهـيـبــتـه ... يـانــظـرتـه ... محله چفوفـه
مسلم ضوه ... مـثل الهوه ... طـب للـكوفـه
كمر


چـنّه نـبـي لمّـن دخـل عالكـوفـه چـان المُـرسـل
شـايــل مـصـاحـف للـخُـلــد بيـها الهـوه يتـغـزّل
بسم " الحُسين ابن علي " بذيچ المصاحف رتّل
گـد العـدالـة بـيـمـنـتـه ينـعـدل ظـهـر الـمـنـجـل

يـشـبه عـلي بالـحـرب
مسلم صعب عالصعب
تحمل عشگ ... أهل الـصـدگ ... كـل احـروفــه
مـسلم ضـوه ... مـثـل الـهـوه ... طـب للـكـوفـه
كمر
____1____

بالكوفه من طبها هتف ياناس أسـمـعـو شويـه
ضعـن الـهـواشم بالـدرب للـكوفـه قـادم ضـيّـه
يأهل الرسايل هل أجـه وصاحـو هـلا بهالجـيه
شـاف الحچي مابي فعـل وگـلوبـهـم مـعـْمـيـه

شاف الحچي بي دغش
والـچـذب بـيـهـم فُـرش
بــيـهـم عِلَم ... چذبه النعم ... كلشي يـشـوفه
مسلم ضوه ... مـثـل الهـوه ... طــب للـكوفـه
كمر
____2____

من صلّه بالوادم جمـع بأول فريـضه اكــتملت
دار النــظـر شـاف الزلـم اعـدادهـم شـو قـلّـت
وشاف البـقيّة ابـلا وجـه والـذلّـة بـيهم حلّـت
صلّو چـذب أهـل الچـذب وگلـوبـهم مـاصلّـت

كمّل صـلاته وگعـد
وحده بُقه ابلا عدد
بعينه الدمع ... نـار وشـمـع ... وجهه ايطوفـه
مسلم ضوه ... مـثل الـهوه ... طــب للــكوفـه
كمر
____3____

بين الأزقه الـوحّده يمـشي وضـمة بي يـكـثر
المتعوب لمّـن ينصـدم حگّه بـخـطـوْتـه يـعـثر
ومسلم ابكل خطوة مِشه خضّرت مـاي ومـنبر
وشما كُبر جرح الگلـب مســلم يـضل هـو اكـبر

يـزرع وِفه ابكل زمن
كل فـكـره يم الضعن
ماي الأرض ... طول وعرض ... هـو جـروفـه
مسلم ضوه ... مـثـل الــهـوه ... طب للكوفـه
كمر
____4____

بالكوفة من گد العطش مسلم يگـض بـظلـوعه
يـحـسـين ارجـع لاتـجي تـرسـم بخـدّه دمـوعه
راد استراحه من التعب والعطش بي موسـوعه
والماي أجه بطاسـة هـلا بچـف الحـنينة طوعه

الكوفة الصدگ جوهره
وأنـشـافـت ابــهـالْـمـره
يمـها الشِفى ... وحتى الوفه ... بي مـوصوفـه
مسلم ضـوه ... مـثـل الــهـوه ... طـب للـكوفـه
كمر
____5____

طــوعـه وما ادراك مـا طـوعـه الصـدگ كوفـيّـة
اتگلّه أشم بـيك وعـلـي ريـحـة عـلي بـهـالجـيّـه
لا مــو غـريـب انـت رزق مـن الـلـه جـاي عـلـيّـه
سوالفها فطرة وبالحـچي تـمـطـر وِفـه وحنّــيّـه

تفدي النحر والأهم
مسلم سـفـير الألـم
لمسـلم مـدد ... هــيـّـه وابــد ... لا مــتـعـوفـــه
مسلم ضـوه ... مـثـل الـهـوه ... طـب للـكوفــه
كمر
____6____

#رزقهم_سلام_الله_عليهم
#احمد_رزاق_الاعرجي

منهاج محرم الحرام ١٤٤٤ هـ
لمولاتي حميدة بنت مسلم " عليهُما السلام "
[ حميدة والألم ]


قصيده بيها دم
حـمـيده والألـم
مثـل نـار وخيم ... وآ ويــلاه

أول قـصيده تنـتـظر شـاعـرهــا يـرجـع لـيـها
متبعثره حروف الجسد واسـتوطن الدم بيها

كل حرف ينزف جراحات العمر
ازغيره لاچن شيّـبت من الهـجر
اتـريـد والـدهـا يـجيـها تـنـتـظر

دمـعـها عالجـفن
رسم ديرة حـزن
تموت شما تـحن
دمعه وآه
وآ ويــلاه
____1____

من فـارگت مـسلم بقـت للدمـعـه والـمصـيـبه
فكرتها چانت بـس يـرد وتشوف طوله الهيـبه

والألـم بـعـيونها مـثـل الـدمـع
وحيلها اتبده مثل دمع الـشمع
والـجـرح بـالروح لا ماينـسمع

غـريـبه والــهـجـر
مـصـيبه بـالـعـمـر
الصبر شال الصبر
مـاتـلگـاه
وآ ويــلاه
____2____

بيها الألم مـن كـربلـه شـافـت مـصـايب كـثره
واكبر مصيبه شاهدت لحسين سحگو صـدره

شافت الخيل وحوافرها عليه
تعثر شما رادت لصوبه تجيـْه
وشافت العباس مگطوعه اديه

والأصعب شاهِدت
خـيـمـهــم وجِّـرت
هـظـيمـه اتـعـثرت
يـــا الـلـه
وآ ويــلاه
____3____

بـالـهـيـمه تـركـض والخـيم شـافتـها سلّـبوهـا
ركـضت لـزينـب بـس وسـف بأرماح عـثّروهـا

السوط صلفه عيونه طاحت عالمتن
آنـه طـفـلة مــسـلـم تـصـيـح و تـون
ألـتـفـتـو عـليـها شـكـثــر گــالـو وإن

شِـمـاتـه والـقـهـر
يشمروهـا بحجـر
الْظهر منها انكسر
حيل اوّتاه
وآ ويـــلاه
____4____

چـابو حبـل چـابو هـزل حـان الـسبي مــسيره
وزينـب لصـوب المـشرعـه مـنها النـظـر تديـره

مِـشـت قافـلةِ السبي بدرب الجرح
وابو فاضل والحسين اعلـه الرمـح
كلشي ظلمه وفوگ الأرماح الصبح

والاجساد عالتـرب
والاطفال تنـضرب
شمر حادي صـعب
رمحه وياه
وآ ويــــلاه
____5____

فكره وتطب سوگ السـرد وشاعرهـا عالوطـيه
وشـمـا يشـمـروهـا بحـجـر ما تـنـحِنـي الـثريـه

النهـر يصعد من يشمرونه بحجر
والعطش مايـگـدر ايعطّـش نـهـر
زينب أجروفه على طـول السـفر

على النوگ الضوه
بـالـحـسين ارتـوه
العمر شهگـة هـوه
كل مـعناه
وآ ويــلاه
____6____

#رزقهم_سلام_الله_عليهم
#احمد_رزاق_الاعرجي

في خرابة الشام بين حميده ورقيه عليهما السلام
[ ياحميدة الليل اجانه ]

ياحـميدة الليـل اجـانـه
وعالترب طايح ضوانـه
اتيـتّـمـينه وچـتـفـونـه بـالـحبـل
ذكـريـاتـي وذكـريـاتـچ عـالـهـزل
يــاحـمـيـده

آنــــه رقــــيـــه والألـــــم
بروحي مثل حرگ الخيم
اجروح بيه تكبـر
اثنيـاتـنـه شـفـنه الـذبـح
والشمـس خلـوهـا برمـح
دمعي ينزل احمر

أزْغــار وشــفــنــه الـماصـار
خــيـــل ودم خـيـمــة ونــار
والــسـوط عـلــيـنــــه انـدار
حيلي اتـطـشّـر

خـيمـتي ذيـچ احرِگوها
وروحي بالطف طلّعوها
والـمـواقـف ذيـچ لا مـاتـنـحـمـل
ذكـريـاتـي وذكـريـاتـچ عـالـهـزل
يــاحـمـيـده
__1______

ثنـيـناتـنـه نـفـس الـجـرح
جرح السطح جرح الرمح
الحيل طايح دمعه
مسـلم ابوچ امـن القـصـر
شمروه على حجار شكثر
وطاح نار ابشمعه

طــــــايـــح لاچــــن : شــــــلّال
مــــال الــــكــــون ومــــا مـــال
ثــــــابـــــت لــــعـــيـــــون الآل
مـسـلـــم فـزْعـه

دمعچ احمر ياحميده
والــدچ حـزّو وريـده
والـشِـمـاتـه بطيـحِـتـه دگو طبل
ذكـريـاتـي وذكـريـاتـچ عـالـهـزل
يــاحـمـيـده
__2______

بالكوفه مسـلـم من وگـع
محد عله جـروحـه فـزع
اتراب فوگاه والدم
وآنــه ابـــوي بـكـربــلــه
عـــاري بـقـه مـحـد الــه
وخيل فوگاه تلـتم

والــــــعـــبـــاس ابــلا : عــيــن
وابـــلا حـــيــــل وچــــفــــيــن
صــعـبـه ايــعــايـن لــحــسـيـن
وضــعـه أتــأزّم

عـالــنهـر جــوده تــبـدّه
ودمه يجري فوگ خـدّه
وصدره ديـوان الحوافر والـنبـل
ذكـريـاتـي وذكـريـاتـچ عـالـهـزل
يــاحـمـيـده
__3______

بدرب السبي شفنه العجب
شفنه الحِرگ خيمه وسِلب
اويانه يمشي صعبه
وذاك الــعـلـيـل وحــالِـتــه
بدموعه خـضّـب لـحـيِـتـه
والحـديـد امْـتعـبـه

والْــــنــــســــوان اورضــــــعـــان
آيــــــــــات امــــــن : الاحـــــزان
اوگـــــلـــب الــبــــاقـــر دخُّـــــان
نــار ابــگــلـبـه

والمـصايب يـاهـظـيـمـه
حـالِـتـچ مـثلـي يـتيـمـه
صـعــبـه لـو عـالأبو مره نـنسـأل
ذكـريـاتـي وذكـريـاتـچ عـالـهـزل
يــاحـمـيـده
__4______

كلشي انتهى وكلشي انطفه
ويمـنه الحـزن شـال اولِـفـه
وكلشي بينه حدّب
عـبـد الـلــه مـذبـوح الـنـحـر
فــوگ الـرمـح شـيـيـب قـهـر
ازغـير لكن شيّيب

أگـــمــاطــه وكــــاروكـــه أزغــار
بــــــس كـــــبـــرن يـــم الـــــنــار
بــالــــطــف صـــار الــمـــا صــــار
الـشاهد : زيـنب

حسين خنصر منّه ضايـع
والبقن بس تسـع اصـابـع
والحـوافـر فـوگ صـدره ماتِـمِـل
ذكـريـاتـي وذكـريـاتـچ عـالـهـزل
يــاحـمـيـده
__5______

بــهــاي الخـرابـه الـمشــكـلـه
كـلـسـا يـجــيـنــه حــــرمـلـه
وسوط بيده وخنجر
شما نبچي سوط اعله الظهر
چـم ظـلـع جــوانّـــه كِــســر
بــالـدمـع نِـتــعـثّــر

ابــــــــلا والـــــي ولا حـــــمـّــاي
الـــشـــامــت شـفـتــه بــعـيـنـاي
عــالــــگـاع أيـــــبـــدّي الـــمــاي
وعــالـمـاي أشّـر

گـال اشـربـن يالسـبايه
وآيـه محـنيه اعله آيـه
وين چان وعمنه ابو فاضل عدل
ذكـريـاتـي وذكــريـاتـچ عـالـهـزل
يــاحـمـيـده
__6______

#رزقهم_سلام_الله_عليهم
#احمد_رزاق_الاعرجي