جلوة للقاسم ابن الحسن عليهم السلام 

.....
.....


طفن شموع ابن الحسن

المن يرمله تهلهلن

.....
.....

المن عجنتي حنّته

متحني من دم رگبته

طفّي الشمع ياعمّته

ثوب العرس اصبح چفن 

.....
.....

اصبح چفن ثوب العرس

وانذبحن احلام الامس

فوگ الثره ابحر الشمس

رسومه اويلي  اتبدلن

.....
.....

مادامت الفرحة الي

اتمنيت ازف امدللي

بالله ومحمد وعلي

ياوسفه غدار الزمن

.....
.....

گعدت تعاتب بالولد

ماگتلي اروح او ماارد

بيش اخلف امچانك بعد

بهاذ الوعد ماچنت اظن

.....
.....

ماحسّبت يامنيتي

دهري يفرهد فرحتي

شي ماردت من دنيتي

افرح ردت وانسه المحن

.....
.....


طول اويه ابنهه تمددت

تفت الصخر من عددت

شگد عاتبته وناشدت

امالي يبني اتفرهدن

.....
.....

ردتك الشيبي وكبرتي

يمه وعفتني بغربتي

ماالها حوبه شيبتي

ضلوعي يجسام انحنن

.....
.....

يوليدي يالردتك ذخر

تلم كبرتي تالي العمر

وتجازي تعبي بالكبر

وامالي يبني تفرهدن

.....
.....


أم محمد الحجاج/ العبادي


من الارشيف


https://www.tg-me.com/ommohamadalaebaadey

للقاسم بن الحسن عليهم السلام

.....
.....


عريس زفيتك للگبور  /      يبني
بالياس والحنه والبخور /   يبني

حسبالي ازفك ليلة الجمعه
واعلگ بليلة زفتك شمعه
يبني    يبني
.....
.....

متصوره صحبانك يزفونك
وبليلة الحنه يحنونك
مصباح عرسك يبني يهنونك
حنه وعرس ما شافن عيونك

وين العرس جسام يايمه
حنيت اديّ ياناس من دمه

رايح ييمه ما الك رجعه
حسبالي ازفك ليلة الجمعه
يبني   يبني
.....
.....

منتظره ليلة عرسك بلهفه
لافرحه يوليدي ولازفه
ماتنفع الياحيف والوسفه
شمعة زفافك بالدمع تطفه

احلم بعرسك يمه ليليه
وصوره بخيالي لطول البنيّه

طوله الحلو سيوف العده تگطعه
حسبالي ازفك ليلة الجمعه
يبني    يبني
.....
.....

جسام يبني خابت امالي
بس الصور يمحسر گبالي
حسره يبعد امك بدلالي
يايمه سالم ترد حسبالي

مذبوح للخيمه يجيبونك
وبفيض دم راسك يخضبونك

الموت سلهم عينك الوسعه
حسبالي ازفك ليلة الجمعه
يبني   يبني
.....
.....

حسره بدليلي عليك يوليدي
يمه ازفك للگبر بيدي
ياروحي زيدي بونّتچ زيدي
هيهات اگلّچ بسچ وهيدي

ضاع التعب رمله يمهظومه
عرس الولد للگبر بدمومه

بدال الهلاهل الطم  وانعه
حسبالي ازفك ليلة الجمعه
يبني   يبني
.....
.....

اگعد  واسولف اٰنه واصورره
عطشانه لبني ارد اشم عطره
حته بمنامي روحي ادّوره
عاشرت حزنك يلولد عِشره

ياناس حگي لاتلوموني
خلوني انوح اعله ابني خلوني

وكت العصاري من تمر ربعه
حسبالي ازفك ليلة الجمعه
يبني   يبني
.....
.....

بعدك زغير اعله الگبر يبني
ماحسبت بالدهر يغلبني
سهم المنيه ريته صوبني
ماگلت امي بدين تطلبني

جازي التعب تلحگ عله الروحه
روح امك بفرگاك مذبوحه

مافارِگت عين امك الدمعه
حسبالي ازفك ليلة الجمعه
يبني يبني
.....
......

ام محمد الحجاج/العبادي

من الارشيف

https://www.tg-me.com/ommohamadalaebaadey

ليلة القاسم بن الحسن عليهم السلام  .....

              


بدموعي ياجاسم عجنت الحنّه
وامن الله ادعي بالعرس تتهنّه

.....
.....

بدموع عيني حنتك معجونه

جسام خلي ربيعته يحنونه

يارمله فرحي الليله يامحزونه

بت عمه  تصبح باچر الكم چنّه

.....
.....

فرحي بضناچ وگعدي حني چفوفه

وبالعنبر وبالياس عطري زلوفه

عريس جاسم عين رمله تشوفه

يزفون ابنهه گبالها تتمنه

.....
.....

يايمه عذريني العرس مو يومه

اجلته رخصيني اريد الحومه

عمي وحيد بكربله الميشومه

والخيل گامت للسبط تدنّه

.....
.....

رخصيني يمه رايح انصر عمي

هلهوله يم جسام گوّي عزمي

ساعه وارد مخضبيني بدمي

إن شاء الله  يمه العرس بالجنّه

.....
.....


محزم طلع من خيمته  البعد امه

مستعجل يريد الأذن من عمه

زعلان جاسم راح فاير دمه

رمله تنادي والعرس يمچنّه

.....
.....

الحومه طب مثل البدر يتلاله

لاجيش همّه ولا كثر خيّاله

الله واكبر گطّعوها اوصاله

سيوف ورماح العده توالنّه

.....
.....

مخلوف بالله التعب راح وليدچ

يارمله من دم الولد حني ايدچ

خاب الأمل ضيعتي فرحة عيدچ

جسام گومن للگبر زفنّه

.....
.....


أم محمد الحجاج/ العبادي

٩ / ٦  / ٢٠٢١

من الارشيف


http://www.tg-me.com/ommohamadalaebaadey

نعي  للقاسم عليه السلام

بحر طويل

لسان حال  امه رمله سلام الله عليها


وين العرس ياجسام  ..رايح للحرب يبني
خل اهلك يزفونك  ..  يغالي كونك اتحبني
اخاف تروح من ايدي  .. وابدمّك تخضّبني 
فداك امك يروح امك  .. ياسلوتي وضي عيني

.....
.....

علگت الشمع بالصيوان  .. يبني واعجنت حنه
تعوف العرس يالوالي  ..  ومنك اگطع الظنه
امك تنتظر هاليوم  .. خلها اليوم تتهنّه 
مستعجل يبعد الروح  .. يبني لا تخليني

.....
.....

برز للحومه يتبختر  .. مثل البدر  جاسمها
واهيّه بقت تدعيله  ..  واصواني الشمع يمها
لن ام الخدر نادت   ..  سكنه راح ابن عمها 
يرمله راحت الفرحه .. واجت زينب تعازيني

.....
.....

جابوه للخيم مذبوح  .. واجروحه يسيلن دم
اجت ام الولد وتصيح  .. يمه حان المحتّم
طفي الشمع ياعمته  ..  عرس ابن الحسن ماتم 
ابدال الحنّه ياجسام  .. من دمك تحنيني

.....
.....

جلست عند ولدها مذهولة   كأني بها


يبدر التام يوليدي  .. شنهو الغيّر رسومك
هاي الحنّه ياجسام  .. ليش اخضابك دمومك
ييمه استعجلت للموت  .. ردت يومي گبل يومك 
ام والهه حگ اعليك  .. انت اللي تواريني

.....
.....



وحنّه    

الك جمره بدليل امك  .. وحنّه
يالدمك صبغ شيبي   .. وحنّه
يومك نحّل عظامي  .. وحنّه
ضلوع امك يمن رحت امن اديّه




أم محمد الحجاج  / العبادي


https://www.tg-me.com/ommohamadalaebaadey

ابو ذيه استشهاد القاسم ابن الحسن المجتبی عليهما السلام

🏴🏴


          


گلبي نجرح ياجاسم  .. وحنيت

ضلوعي .. ونحت لمصابك  .. وحنيت

يمه مشّطت زلفك  .. وحنيت

مو حنّه ..  بدماك چفوف اديه

.....
.....


           


بقت بالروح الك ونّه  .. وحَنَّه

يبني ليش لازفه  .. وحنّه

فگدك خييب امالي  .. وحَنّه

ظهر امك يروحي التسري بيّه

.....
.....


أم محمد الحجاج/ العبادي


http://www.tg-me.com/ommohamadalaebaadey

يمه ذكريني .. من تمر زفة شباب
من العرس محروم .. حنّتي دم المصاب

نعي

لسان حال مولاتي الرباب عليها السلام  .....


ضل خالي المهد والليل هل جاي

دللول الولد يبني دللول
 
ياسباح گلبي ونظر عيناي

شلك يا حبيبي بنومة الچول

در صدري يروحي امن اشربت ماي

تعال انّام يايمه فرد طول

امك يعبدالله متيّهه الراي

راسك لو گمر بالرمح مشيول

گبلك ماسدت يمه مثل هاي

يوليدي اعله شربت ماي مچتول

يا سباح گلبي ولبّة احشاي 

امك من تلولي الليله شتگول

من تعبي التعبته اعليك ورباي

صدگ يوليدي منه كلشي ماانول


.....
.....

أم محمد الحجاج

عظم الله اجورنا واجوركم

لطمية لمولاي عبدالله الرضيع عليه السلام    لسان حال  الام



خاف عبدالله يفز والهيمه ظلمه

اخذيني يازينب   ابات الليله يمه

اهز لوليدي الرمح
خله نايم لصبح
والهيمه ظلمه

.....
.....

اتعودت ليليه اعوّذ لبني لونام

لا يفز عبدالله مرعوب امن الاحلام

امن العصر ماشفته والله وگلبي محتام

ارد اگله ..   گلبي  شوگ شگد الك ضام 

صدري در عبدالله يمه ياحبيبي
تعل شوف شلون حنيتي ولهيبي

يبني يالوجهك سمح
خله نايم للصبح
والهيمه ظلمه

.....
.....

ترف عبدالله ولايحمل هوى الحار

سهم نحره اچبير مايرهم للزغار

كون اشوف بذاك وجهه اصّار ماصار

ريت كل سنين عمري لعمره تندار

وينك او وين الذبح يالبعدك ازغير
راسك زغيرون يبني ورمحك اچبير

يذبح بنحرك ذبح
خله نايم لصبح 
والهيمه ظلمه
.....
.....


اسم الله يبني آنه امك ياحبيبي

ارد اشبگك خافن يعورك لهيبي

ماتفز يبني الك هل در حليبي

بدم وريدك يالولد حنيته شيبي

المهد خالي وانه اهزن بالمهد
بلكي لو هزيته اشم عطر الولد

بعد عطرك مايصح
خله نايم لصبح
والهيمه ظلمه
.....
.....

انزل الحضني الوليلك دللول

ليش ياسباح گلبي نايم بچول

من تفز الليله ياعبدالله شتگول

جيت اودعك يمه وادري بُعدك يطول

ذابله خدودك يغالي من الشمس
يانظر عيناي عطشان من امس 

ريت وياك انذبح
خله نايم لصبح
والهيمه ظلمه

.....
.....


يمه عبدالله عليك انطر دليلي

جيت للحومه ابات اوياك ليلي

بكثر مااركض واطيحن خلص حيلي

انتظر  يوليدي حسبالي  تجيلي

مايخلوني ابات الليله يمّك
حته احط گلبي اعله گلبك حيل اضمّك

باچر اعله امك تشح
خله نايم لصبح
والهيمه ظلمه

.....
.....

ام محمد الحجاج /
العبادي


من الارشيف

http://www.tg-me.com/ommohamadalaebaadey

لمولاي عبدالله الرضيع عليه السلام 


ليش يبني بعد مالوليلك

لاتناغيلي ولااناغيلك

وين وجهك عيني خل تصابحه

حضني خالي يبني من البارحه

ليش  يبني   حضني خالي

.....
.....
چنت يوميه الصبح بس افتح العين  ..

اشم خده ورگبته الچنهن رياحين  ..

اليوم عن امك يروح امك  رحت وين  ..

ازغير بعدك وينك او  وين الميادين  ..

يادلالك من نحط خد اعله خد

ياحلاتك وانته نايم بالمهد 

وجهك احله من الگمر واملامحه

حضني خالي يبني من البارحه

ليش يبني   حضني خالي

.....
.....

اطلبتك امن الله وعطيّه انطاني ربي  ..

ياسعد روحي  احط ابني اعله گلبي  ..

ياكبر بختي من  اشوف وليدي گربي  ..

من يناغيلي نسيت أيام تعبي ..

تارس عيوني فرح يالغالي

يمه واحلامي اكبَرَت وامالي

افيش يوليدي من اشم اروايحه

حضني خالي يبني من البارحه

ليش يبني     حضني خالي

.....
.....

يمه مامتعودة ساعة تغيب عني ..

لو بمهدك غافي لو تغفه اعله حضني  ..

تسوه عندي الدنيه لو ناغيت لبني  ..

البارحة مافززك يايمه ونّي ..

گابلت رمحك يبعد امك واهز

تصوريتك من دللولي تفز

الاخذ راسك بيش خدك جارحه 

حضني خالي يبني من البارحه

ليش يبني    حضني خالي

.....
.....

هوى الحار امغيرك اوماچنّك  انته ..

شصاير بوجهك يغالي  ماعرفته  ..

  على خدودك جامد الدم  النزفته  ..

امن الرمح چم طيحه طاح الراس   شفته  ..

والشفايف يابسة من الهوى

يالچنت بالليل احله من الضوى

بس دلالي چان وجهك لايحه

حضني خالي يبني من البارحه

ليش يبني    حضني خالي 

.....
.....

  البارحه بالهيمة يبني مگابلة الراس   ..

هلبت اترد من الو لي بيك الانفاس     ..

كون  ماكو الليله يمك يبني حراس  ..

   حته انزله امن الرمح لو نامت الناس  ..

ردت ساعة بحضني احطك يا حبيبي

من اشمن ريحتك يبرد لهيبي

عبد يبني اليوم عنك رايحه

حضني خالي يبني من البارحه

ليش يبني    حضني خالي

.....
.....

أم محمد الحجاج/ العبادي


من الارشيف




https://www.tg-me.com/ommohamadalaebaadey

لمولاي عبدالله الرضيع عليه السلام 


             نعي


غافي لو واعي عبد فوگ الرمح

بوسطت الهيمه تشع مثل الصبح

مايلوگ اعله البدر يبني الذبح 

ياترف . ياحلو . يالوجهك سمح 


.....
.....

ياگمر بس غايب بغيم الدمه

لاچن منور يعبدالله السمه

السهم من صابك اظن يبني عمه

ريت سهمك نحري صابه وخذّمه

.....
.....


تعال نام بحضني نوم العافيه

وال  دللول الحنينه الدافيه

بعيد عن امك وعينك غافيه

وآنه تالي الليل ادوّر حافيه

.....
.....

يابدر بالهيمه ومضوي السمه

نورك يشع من وره غيم الدمه

اشم خدك يالله انام معلّمه

تعال يبني حتى ماي مولّمه 

.....
.....

فراش ناعم بالمهد حطيته

گماطك البي دم عبد غطيته

الماي مااشربه ثواب انطيته

الدرب بدموعي التصب خطيته 

....
....


أم محمد الحجاج/ العبادي


https://www.tg-me.com/ommohamadalaebaadey

للوداع



گومن وادعني يالعزيزات
گومن وادعني يالعزيزات

.....
.....

گلهن يابناتي
يالعزيزات
گومن ياخواتي
يالعزيزات
الليله اخر حياتي
يالعزيزات
بس الليله خويه
وياچن نبات

.....
.....

گعدن ودّعنّي
شبعن شوف مني
جاي تفارگني
تظلن من بعد عيني
غريبات
گومن وادعني
يالعزيزات 

.....
.....

باچر يالحبايب
بالعاشر مصايب
اتظلن غرايب
ليله الجايه كلچن
سبيات
گومن وادعني
يالعزيزات 

.....
.....

ينذبحون اهلچن
مسبيات كلچن
ياطيحت حملچن
باچر يابنات امي
سليبات
گومن وادعني
يالعزيزات 

.....
......

باچر ماكو راحه
من اول صباحه
بس ضيم ومناحه
مايبگه عدل ويغسل
المات
گومن وادعني
يالعزيزات

.....
.....


أم محمد الحجاج  / العبادي


https://www.tg-me.com/ommohamadalaebaadey