ابو ذيه
لسان حال مولاتي فاطمة العليلة عليها السلام
بعد سفر اهلها الی كربلاء

كاني بها ..

بويه يابو علي يابويه


العراق المغربيه اتّجه شطره
ماادري ببوي شصار شطره
انشطر گلبي ولا يرّاف شطره
ومثل طير انذِبِح كل مغربيه


😭😭

مَر لوعات بالدلّال مر آح
مروره تجي اگضي الليل مُر راح
يهل وادم ابوي حسين مرّاح
وشالة عافيه ماخلّه بيّه

😭😭


ام محمد الحجاج

مولاتي العليلة عليها السلام
وفراگ اهلها

ابو ذيه

بجفاكم هلي لو غابت شَمسنه
لو تدرون من الهم شِمِسنه
عن اليوم اخبرنكم ؟ شمسنه ؟
بچيت عيون ماظل شوف اليّه

😭😭


يروحي احزان ويه جروح شِبچي
لاظل دمع . لاظل حيل . شَبچي
بعظامي جمر حسيت شب چي
لگيت هدوم من اختي رقيّة

😭😭



ام محمد الحجاج

مولاتي ام البنين عليها السلآم   بعد سفر الإمام الحسين عليه السلام  ..... كأني بها قالت 



وراهم

الضعينة  بليل شدّوها  .. وراهم
مشو وعيوني تتفكر  .. وراهم
يروحي مگدّر اعليّه  .. وراهم

اظل للنوح والون والاذية

.....
.....


ولاحان

زماني وياي ماانصف  .. ولاحان
اسهامه بشوم رامنّي .. ولاحان
عسى الطف لا اجه يومه .. ولاحان
اودع حسين واخته بهل مسيّه

.....
.....



حسباتي كلن حيلي  .. ولاچن
بعد بالدار مااظلن .. ولاچن 
بليله الشمل طش مني .. ولاچن
عشت سنين وياهم هِنيّه

.....
.....


ترابي

عيني للدرب ظلت   .. ترابي

خمس جروح خلّفتو .. ترابي

عسن ميته وهلت بيدك   .. ترابي

الموت اهوّن ولا هاي المسيّه

.....
.....


أم محمد الحجاج/ العبادي


٢٠٢٠



https://www.tg-me.com/ommohamadalaebaadey

هوسات لشجاعة مسلم ابن عقيل عليه السلام




مثل عمه علي مصييت ابو طاهر
سجل يوم بالتاريخ ماصاير
بالكوفه وحيد وما اله ناصر

ذب درعه / وحيّر عدوانه


🏴🏴

شاله الغيض ذب درعه والعمامه
البيهم خوش زلمه شرد جدّامه
مثل فقار حيدر عمه صمصامه

وتهلهل طوعه / لضرباته

🏴🏴


عزمه گوه من هييس الهلهوله
مسلم بالخمسميه لعب جوله
حفيره بالدرب عدوانه حفروله

غداره / يلكوفه اطباعچ

🏴🏴

ابو طاهر ايعرف الكوفه غداره
بالاول غدرو بعمه الحمه جاره
طبعهم بس مكيده مالهم چاره

خطار / ودمه يهدرونه


🏴🏴

ام محمد الحجاج

٤ // محرم
١١ // ٧ /ۧ/ ٢٠٢٤

https://www.tg-me.com/ommohamadalaebaadey

نعي لمولاي مسلم ابن عقيل عليه السلام


ابو طاهر مگيدينه
حسافه للقصر جابوه

ماكو انصار بس عدوان
محد نغر من طبّوه

حقد تگطر ضمايرهم
چن ثار الهم يطلبوه

امس اثمنطعش مكتوب
ولبن عمّه عهد كتبوه

واجاهم بامر ابوالسجاد
وبسيوف الغدر صوبوه

اسير وينهدر دمه
استجار وابد ماجاروه

من عالي القصر ياناس
ابو طاهر وسف ذبّوه

بگيوده ودماه تسيل
بالشارع سحل سحلوه

هاشم مادروا بالصار
وفزعوا للجسد شالوه

ومربّع خذوه الثار
وقصر الطاغية گلبوه


🏴🏴



مجاريد

وين الاهل وين العشيره
الكوفه ابد مابيهه غيره
او لا بيهم اليهتز ضميره
ياهضمتك مسلم چبيره
المن بعد وجهك تديره
جروحك عمت عيني چثيره



الغربه مرّه تريد خوان
وانت غريب وبين عدوان
ياحيف يلبيك الوكت خان


😭😭


ام محمد الحجاج

https://www.tg-me.com/ommohamadalaebaadey

اسشهاد مسلم عليه السلام

نعي لسان حال  طوعة  عليها السلام



ياحيف مسلم يبو الغيره

مالك عمام ولاعشيره

وجهك ييمه المن تديره

.....
.....

ماقصّرت ياحيد بالكون

يمه عمامك كون يدرون

وحدك بگيت ادّير العيون

.....
.....

ياهو اليصل لهله وعمامه

وياخذ مكاتيبه وسلامه

لحگو لبنكم يانشامه

.....
.....

مسلم يهل مسلم تلحگوه

عدوانه بالكوفة توالوه

ماله عشيره وغدر غدروه

.....
.....

يالما تباتون اعله ذله

بالليل سرجو الخيل يهله

المسلم تعالو فكّو حَبله

.....
.....

مچتوف للطاغي خذوه

من اعلهالقصر للگاع ذبوه

بالسوگ جسمه بحبل سحلوه

.....
.....

أم محمد الحجاج/ العبادي



https://www.tg-me.com/ommohamadalaebaadey

نعي للانصار عليهم السلام

🏴

حين بقي الإمام الحسين عليه السلام وحيدا لاناصر له وقف بين الاجساد الطاهره ونادى اصحابه الاوفياء بصوت لو سمعته الجبال تدكدكت ..


وگف بين الأجساد ايده اعله خاصرته
ناده بصوت لصحابه لمناصرته
زلم والخيل صاحبكم محاصرته
اول تالي احشم والربع سكته

ابن عوسجه . ياحر . ياوهب نومه
حبيب ويازهير اسباعها الحومه
بعد محد يشگ من يفزع هدومه
عابس . جون . عليه الگوم ملمومه

الغفاريان وين او  وين شوذبهه
نافع وين وسهامه لمصوبهه
برير البار وال صحبته مجربهه
نايم مانهض للحومه يگلبهه


حيف ويا وسف يسباع مامن صوت
مايلحگ الصايح وفات الفوت
ماينفع عتب يهل الوفه ويالموت
بنيت الكم بگلبي للاحزان بيوت


الدهر وياي متعاند .. وعابس
زهير وجون ياشوذب .. وعابس
ادري انداي كل منكم وعاه بس
عليه شبيدكم وآنه اشبديه

.. .. ..
.. .. ..

أم محمد الحجاج


https://www.tg-me.com/ommohamadalaebaadey

السَّلامُ عَلى أَصْحابِ الحُسَيْن الَّذِينَ بَذَلُوا مُهَجَهُمْ دُونَ الحُسَيْنِ (عَلَيهِ السَّلامُ).

عظم الله لنا ولكم الأجر.

ليلة العباس عليه السلام


فزاعية
🏴🏴

رد حسين
محني الظهر لخيامه

رد حسين
محني الظهر لخيامه

🏴🏴


لم  عون رد محني الظهر
من ايدنه راح الگمر
خليت اخوي اعله النهر
ظهري عله اعضيدي انكسر

اليفگ اخو
ياناس يرخه حزامه

رد حسين
محني الظهر لخيامه

🏴🏴

رد  يمسح بدمعاته
سمعت ام عون آهآته
شافنه يبچي بناته
گلبه انچوه بحسراته

وبممشاه
گوّه يجر اجدامه

رد حسين
محني  الظهر لخيامه

🏴🏴

عباس راح امن ايدي
ظهر انكسر لعضيدي
خلاني وسفه اوحَيدي
يم عون بالون زيدي

راعي الجود
مفضوخه منّه الهامه

رد حسين
محني الظهر لخيامه

🏴🏴

بعامود صابو راسه
حيلي انهدم من ساسه
شظلّه الفگد عباسه
عزمي نكسر نوماسه

ياعباس
ضاعو لخوك ايتامه

رد حسين
محني الظهر لخيامه

🏴🏴

عينيني يامهضومه
مااگدر اعله الگومه
عباس يكلف يومه
خليته تجري دمومه

ها يم عون
راح الخدر وايامه

رد حسين
محني الظهر لخيامه

🏴🏴

طيّح عمود الخيمه
فگد العضيد اهضيمه
مروتك يراعي الشيمه
محد يرد الجيمه

جيش اعداي
فازع عَلَيّ بعلامه

رد حسين
محني الظهر لخيامه

🏴🏴

يهوسون اجوني گبالي
متشمّتين بحالي
يا  سد  اخوك العالي
تيتمت هسه عيالي


انت التاج
ماريد بعد اعمامه

رد حسين
محني الظهر لخيامه

🏴🏴

تمت بحمد الله تعالی

٣ // ذو القعدة
الموافق
١٢ // ٥ // ٢٠٢٤


ام محمد الحجاج



https://www.tg-me.com/ommohamadalaebaadey

ليلة العباس عليه السلام

فزاعية

🏴🏴


شد اعله الكحيله
والعلم شاله  ٢

🏴🏴


شد اعله المهر والغيض بعيونه
صوت امن المخيّم صاح ياعونه
اتشييم بالگمر زينب المحزونه

غدت من صال
تترادم الخياله

شد اعله الكحيله
والعلم شاله


🏴🏴

صال اعله العساچر بيرغه بيده
طش الروس سيفه وترست البيده
فدوه للخدر عمري ولا اريده

الجربه بيمنته
والسيف بشماله

شد اعله الكحيله
والعلم شاله

🏴🏴

كسر جيش العده امن اتوسط الحومه
من ضهضب وفار الغيض بدمومه
هاذ ابن الصميده امصيّته علومه

ابن ام البنين
الزعل يحلاله

شد اعله الكحيله
والعلم شاله

🏴🏴

طب ليهه وخبطها وشرب صافيهه
والخوّه لزوم اعليه يوافيهه
جمرت العطش مارضه يطفّيهه

واخوه حسين ضامي
وضاميه عياله

شد اعله الكحيله
والعلم شاله

🏴🏴

يانفسي لخوي وگرّة عيوني
ذوبي امن العطش واستحملي وهوني
حد الموت كوني اعلعهد كوني

اشرب ماي حاشه
وتصرخ اطفاله

شد اعله الكحيله
والعلم شاله

🏴🏴

چمنوله ويساره انبرت ويمينه
والچاده السهم من صووبه بعينه
ناده العذر منك خويه ابو سكينه

ابو اليمه اجاه
والعين همّاله

شد اعله الكحيله
والعلم شاله

🏴🏴

انكسر ظهري يخويه بطيحتك گلّه
وگلت حيلتي وحيلي خلص كلّه
ينور العين دربي ابيش اندله

فك عينك لخوك
وعاين لحاله

شد اعله الكحيله
والعلم شاله

🏴🏴


تمت بحمد الله تعالی

١ // ذو القعدة

الموافق
١٠ // ٥ // ٢٠٢٤



✍ ام محمد الحجاج


https://www.tg-me.com/ommohamadalaebaadey

ابو ذيه ونعي للعباس عليه السلام
كاني بمولاتي العقيلة زينب عليها السلام


ابو ذيه


غيّم غيض اخو خيته  ورايه  ( راي )
يستأذن ابو اليمه  وراه يه ( اشوفه اجه للحسين يترخص منه )
بيمينه السيف والجربه  ورايه
عنده زماط يأدب آل اميّه


اكبر راس بالقاده يجيبه
ونهر العلگمي بكبره يجي به
الا من ناصرن لابد يجيبه
ارخصت عمري الك يابو رقيّه



مشه وصوب المخيّم صاد عينه
عيال حسين گلبه صادعينه
جاب الماي لاچن صاد  عينه
سهم  وانگطعن چفوفه سويه


ال مصاب الگمر مايوصل  ولا امصاب
اله بگلبي جرح ينزف  واله مصاب
فگده هد ابو اليمه والم  صاب
گلب حسين حين الطاح اخيّه

🏴🏴

نعي مجاريد

يعباس يامن طيبه ذاته
ياشهم يلحلوه صفاته
نوماس ومشيّم خواته
ضحّی لجل خدري بحياته
مايوم صيت الفخر فاته
اسمه عله الساني شحلاته
كل المحنّه بفي عباته
نامت بنص گلبي غلاته
غم الدهر ومعثّراته
واسهام بينه ونايباته
امن الماي ما بلل لهاته
عله حسين لن ضامي وبناته
يردن الماي مدللاته
سكنه ورقيه نادباته


😭😭


نعي مجاريد

كاني بمولاتي العقيلة عليها السلام
تنعی كفيلها  😭😭


خويه  ياخويه

بيا طور انعي عليك يازين
تستاهل اعمي عيوني لثنين
لوما تشوفك شلّي بالعين
ياعباس ماينسد الك دين
ابچي بواچي سنين وسنين
ماوفّي حگ گطعت الچفين
او لاطيحت الرايه ول ايمين
ياحيف ياحامي الصواوين
يانار گلب اختك چوانين
شمسرع خذاك امن اختك البين


😭😭


ام محمد الحجاج


https://www.tg-me.com/ommohamadalaebaadey