ثلاث دكات للعباس

يم البنين الاربعه اجفوفي كطيعه
طايح ييمه و منجتل يم الشريعه

يمه دريتي بحالتي بطف كربله الصار
لحسين اخويه و نصرته ضد هاذي لشرار
دون الحسين و من أجل متمسه لاخطار 
ورايد اروّي العايله و اختي الوديعه

يا يمه من آنه رحت ضد الكتايب
بوكت القتال بكل عزم ضدهم احارب
رايد اخويه ينتصر وبهالمطالب
ضحيت اله عمري ولجل حالة رضيعه

لحسين اضحيله العمر انطي حياتي
وافخر وكت حين الاجت ساعة مماتي
ما قصرت يمه ابد وبمقدراتي
كل قدره عندي قدمت و بهالفجيعه

عباس آنه بالحرب ميردني واحد
ضد الاعادي ضربتي ما يبقه حاقد
لحسين اخوي وكل فكر للدوم خالد
فكره يملّي دنيتي هاي الوسيعه

حيف العده جاني بحقد بيه النذاله
لمن يقاتل بس غدر وبكل قتاله
يضربني يمه بالعمد لا مو عداله
لنه فلا يكدر الي وكلها تذيعه

كلها تذبع و هالخبر لا ما يجوني
بس بالغدر يمه قهر من يضربوني
كطعوا چفوفي و نصبت طفوا عيوني
هالتضحيه لجل الاخو كلش رفيعه

عمري نطيته و بهدف نصر الديانه
لحسين اخويه و ثورته ضد الخيانه
لاصلاح رايد ينتشر و بكل امانه
هاي العده شبيها اذه لا مو منيعه



مهيمن يوسف الموسوي
٨ محرم ١٤٤٦هـ
٢٠٢٤/٧/١٥م يوم الاثنين ١:٥٢ص

أنا أتشارك 'يا ام البنين الأربعة' معك

موشح يوم العاشر
مهيمن يوسف الموسوي

زينب تنادي على وليانها
من سبوها ابكربله عدوانها
............
يوم عاشر زينب تنادي الحُسين
صوت يقرح كل گلب صوتٌ حزين
يا حُسين ابن النبي و الطاهرين
زينب اليوم و كثيره احزانها
............
زينب أختك حايره وشنهو اگول
كل عدوّك للخيم هوَّ ينول
كل كتر بيها وسف صاير يجول
يحرگ اخيمنه اشتعل نيرانها
............
كل خيمك يا ولي ملتهبه نار
سلّبوها اتدمرت منّ الشرار
عيلتك من الخيم صار الفرار
كل خيمنه تحترگ واركانها
............
هاجم اعلينه العِده من كل كتر
حوّط اخيمنه وسف وبكل متر
يا ولي چَنّه بده عدنه اليسر
زينب وظلت بلا خوانها
............
تدري يحسين العِده ضدنه هجم
بس حرم إحنه يخويه يالشهم
والعليل اويانه حامي للحرم
ما گدر واعله العِده وفرسانها
............
هاجمه اعلينه الخيول إبكل حقد
لا مكان انلوذ بي إحنه نجد
لا خيم عدنه و ولي إلنه سند
و الخيول وبالخيم ميدانها
............
هجموا اعلينه وحصل عدنه رعب
طبوا اعله اخيامك الناس الغرب
عيلتك متلوعه عدها الگلب
والحزن عدها صُبح عنوانها
............
حايره ابهاي الطفوف العايله
لا مُناصر باقي هو ابكربله
للخِدر هو يظل حامي إله
من أذه كل العِده وشجعانها
............
ترضه يحسين وعيالك تنولي
زينب و ظلّت يخويه ابلا ولي
من رحت يحسين محد ظل إلي
مثلي ماكو بالخلق وأكوانها
............
زينب و سكنه و رقيه و النساء
حايره و منفجعه هي ابكربلاء
صابها قهر و أذه من العداء
لا حماها عدها لا شبانها
............
ريت حاضر يا ابن حامي الحمه
تنظر الصار و جره امن الظالمه
من غدر هاي البشر متألمه
حاقده اعلينه تره و سلطانها
............
لو چِنت حي يا حُسين إلنه تعال
أحمي زينب و النسه و كل العيال
ولو چنت ميت سبب هذا القتال
كل أمرنه الخالق إنس و جانها
............


مهيمن يوسف الموسوي

موشح يوم العاشر
مهيمن يوسف الموسوي


بالطفوف المصطفى صار بقهر
يوم عاشر من محرم من حضر


حاضر بروحه النبي الهادي الأمين
ساعة الي منذبح سبطه الحسين
شافه مدمي عالثرى و هماله عين
مقتله بكلب النبي يسعر جمر
.....
جسمه مضروب بسهام و بالرمح
منطعن الف و تسع مية جرح
دمه عالتربان صاير بس يسح
من اثر هاي الجروح الي كثر
.....
هامله الدمعه على سبطه الشهيد
من يشوفه منذبح من الوريد
آل اميه الخاينه و تنصر يزيد
عافته حسين الولي ومنها الغدر
.....
نوب رايح عالشريعه بونته
شاف عباس الكفيل و گربته
زاد حزنه المصطفى و كل دمعته
من يشوفه منذبح قرب النهر
......
والنبي شاهد ابو فاضل قتيل
عينه مضروب ابسهم والدم يسيل
ظل ينوح بعبرته واعلى الكفيل
يا عجيبه بحالته گلبه صبر
........
نوب روحه رايحه بلوعه و تنوح
شاف الأكبر عالترب كله جروح
منقتل من العده بسرعه يروح
شاب موته صبح باول عمر
.........
شاهده بونه شجيه امن الكلب
و المدامع من دمه صارت تصب
شاهد الظلام وبهاي الحرب
شنهو عملت و الجره لابن الطهر
.......
والبني هاشم توجه بالطفوف
بس جثث ظلت على الغبره يشوف
للولي ضحت نفسها و ما تعوف
يبقى وحده بكربله بين الخطر
.......
شاهد حسين الولي تسحكه الخيول
بالخيول الاعوجيه من تنول
صدره مرضوض و تكسر لو تجول
لا ضلع منه سلم لا منكسر
.......
شاهد المختار هجمت عالخيم
بس نسه بيها ولا عدها زلم
واشعلت نيران ذولي بلا رحم
كل خيم سبط النبي بس تستعر
......
شاف زينب و النسه ويه العده
بس يتامه اطفال بين الحاقده
لا ولي و كافل بقى ماتوا فده
من اجل دين النبي سيد البشر
.......
شاف زينب صاعده فوك الهزل
فوك هي محزنه ابدمع اليهل
بالحبال امجتفه بنت الاصل
يلي والدها علي فارس بدر


مهيمن يوسف الموسوي

موشح للامام الحسين "سلام الله عليه"

كل ملائكة السمه و اكوانها
للحسين و مقتله احزانها
*١*
ظجت و كل الخلق ارض و سمه
للولي بن النبي و بن فاطمه
اضحت الاكوان كلها مظلمه
والخلايق كلها انس و جانها
*٢*
مقتل حسين الولي و كل عيلته
لا بشر قبله وبعد من شبهته
وبمصابه و مقتله الكل ونته
بهالرزيه بالكلب نيرانها
*٣*
ذبحة حسين السبط والله عجيب
ينقتل من العده و جسمه سليب
من بقه بوادي الطفوف اصبح غريب
بكربله العتره بكثر عدوانها
*٤*
هالمصيبه واحزنت جنّ و إنس
كل موالي والمحب بيها يحس
تنذكر عدنه لحد گطع النفس
مستحيله كربله نسيانها
*٥*
هالارض ويه السمه السبعه بكاء
بيها صاير مأتم و نوح و عزاء
من درت موت الولي تبچي بشجاء
والعزه لجله جثيره الوانها
*٦*
كلمن و عدنه عزه لجل الحسين
عادته الاشرار كلها الظالمين
هذا يوم اصعب تره عالمؤمنين
ظل تردد للحسين السانها
*٧*
كل خلق بأرض و سمه وشما كثر
للحسين بعبرته يبچي بقهر
هالمصيبه و مقتله اصعب أمر
لا يوصفها وصف تبيانها
*٨*
وبمصابه و مقتله امن الظالمه
كل سمه لجله امطرت نفس الدمه
تلعن الي قتلته و اللائمه
والرسل بيها الحزن واديانها
*٩*
هالمصاب الما يشبه بالدهر
للحسين المنذبح لجل النصر
هالمصيبه باقيه و بس تنذكر
شيعه تذكرها تره بايمانها
*١٠*
بيوم عاشر منقتل سبط الرسول
ناحت الفكده الديانه و الأصول
للولي المنقتل ابن البتول
تذكره الشيعه بقهر و اشجانها



مهيمن يوسف الموسوي
١١ محرم ١٤٤٥هـ
٢٠٢٣/٧/٣٠م يوم الاحد ١:٤٤ص

موشح العاشر من محرم

اليوم زينب حايره و حزنانه
يخوتي واعداكم الاذانه
.....
خويه يحسين و كفيلي يالكمر
من بعدكم يخوتي و ذاك الفخر
حركوا اخيامي الاعادي اهل الكفر
سلّبونه اهل الخيانه اعدانه
.....
هجمت الخيل و اجت ضد الخيم
نار شبت بالمخيم و بظلم
شارده منها شلون كل هاي الحرم
بالاذيه و اليسر خلانه
.......
يا حسين اليوم تدري بحالتي
من بعدكم هامله كل دمعتي
زينب بيا حاله آنه بغربتي
يخوتي عفتوني يا وليانه
.......
زينب المن تلتفت و ليا وضع
لفركتك يحسين عيني اتهل دمع
و تنسبي اطفال والنسوه بفزع
ولا كفيل بهالضعينه اويانه
.......
حايره يحسين يا خويه الشهيد
يسرونه اعداك كلنه و شيريد
بس فواطم و العليل الظل وحيد
اليوم خويه و بألم سوانه
.......
آه يحسين لمصابك يا إمام
زينب الحره انسبت من اللئام
بيمن نلوذ و يحركون الخيام
امن العده وجّ الخيم نيرانه
.......
شلون بيّه و الضعن وبلا كفيل
بس علي السجاد تدري بالعليل
يخوتي كل واحد و بيكم جتيل
عالوطيّه بالحرب ميدانه
.......
لا كفيلي بغربتي يحدي الضعن
ضعني يحديه الشمر حيف الزمن
من بعدكم يخوتي نسوه انسبن
عاشر امحرم حزن من جانه
.......
زينب و تدرون بيه بهالألم
بين عدواني شكثر دمعي انسجم
عالحسين و عالسبي بين الزلم
و الاذه و شكد الم وارانه
.......
زينب بيا حال من بعد الاهل
بالغرب يسبوني والدمعه تهل
وخوتي ظليتو وبلايه غسل
بالطفوف بكربله بتربانه



مهيمن يوسف الموسوي
١١ محرم ١٤٤٦
٢٠٢٤/٧/١٨م يوم الخميس ٤:٥٥م

شوط كربلائي للسبي
مهيمن يوسف الموسوي

يعباس الكمر تدري زينب من رحت عنها
شحالي بالسبي بعدك مصايب حيل اذنها

شحچيلك يخويه شلون على حالي بعد فكدك
زينب تنسبي عالنوك واعوفك عالترب وحدك
غيابك يصعب اعليه يأذيني بكثر بُعدك
غدر بيه الدهر و الناس
يخويه يالگمر عباس
سبيّه اوي العده الارجاس
ورزاية كربله بكثره يخويه بس يألمنها


جنت مهيوبه وياكم يبو الغيره يكافلني
لجن لمن متت بالطف كلشي مختلف مني
تقبلها بسبي زينب لعادي حيف ينظرني
لاجن باليسر هيهات
يذلّوني يبو الوكفات
رغم بيه كثر حسرات
وبطول الدرب زينب على كل الجره ونها


اشاهد روس ويايه موجوده على لرماح
ودمهن عالارض ينزف يعباس بكثر من ساح
شحالي من اشاهدهن شايلهن عده سفاح
اباوع راسك اكبالي
صعب يا خويه يا غالي
وبهذا الوضع حالي
راسك بالدمه تخضّب مصايب زينب اذّنها


ياخويه الكمر تدري لمن بعّدت و الصار
آنه ام الخدر اصبح يسبيني العده الاشرار
ولا جنهم يعرفوني ابويه حيدره الكرار
وخويه المنذبح لحسين
يكافل كلنه معروفين
نسه يا حيف مسبيين
ويشاهدنه العده الخاين رزايه والاذه جنها


شحامي يا گمر هاشم يخويه كل نسه واطفال
يأذوني و يقهروني كل هاي العده الانذال
وعلى حالك يبو فاضل دمعي اعلى الوجن همّال
بديه جم حبل صاير
يأذّيني العده الجاير
وعلى العيله العقل حاير
مسبيه العقليه شلون اذه هالجيش لوعنها


تمنيتك يخويه اليوم عدل يا كافي يمّي
فلا احد يصل ليّه ولا يبقه بگلب همّي
لاكن خويه و شبيدي جتيل أعلى الارض مدمي
بعدك موتك يبو الغيره
العقيله صارت بحيره
سبيه اوي العده اجبيره
وأنه جدي النبي الهادي سلاله طاهره منها


سبونه بكربله و شفنه رحنه كلنه للكوفه
وعدوّك يا گمر هاشم يريت انته تره تشوفه
يأذّونه و يعادونه بسّ احقاد معروفه
كلبي بهالوضع تدري
شحمل يا قهر بأمري
يعباس و نفذ صبري
العيله والنسه بشوگ للوليان كل حنها

شحجيلك يكافلني گلبي شاهد المأسات
يسرونه الف وسفه لاكن ما اذل هيهات
وروحي محزنه ليكم بيها يالگمر حسرات
تقبلها بلا كافل
صعب يا سيدي حاصل
يحدي هالضعن قاتل
كلها عيلتك بعدك مصايب حيل شافنها

يا كافل چنت تدري كفيلي يالگمر بحماك
وبخدري اظل يمكم يا خويه تره وياك
لاكن من متت بالطف يحديها الضعينه اعداك
بعد كل الخدر وشلون
امشي اوي العده الملعون
على زينب ابد ميهون بلايا وبس تعنّها

يا شبل الوصي حيدر وضعي باليسر صعبه
من أرض الطفوف هواي سبينه يا عسر دربه
كلها آل اميه أحقاد ضد المصطفى و ربّه
شنهو هالنسه و اطفال
سبي راحت مع الانذال
وصفينه باصعب الاحوال
كثر من الاذيه هواي الف يا حيف جربنها



مهيمن يوسف الموسوي

للسبي


احضر يبويه و شوف حال الفواطم
حزن و ألم و الخوف بعد الهواشم
درب اليسر ماذينه بين العده تدرينه
حال الفواطم حال الفواطم

*١*
زينب تناديك بألم انظر يبويه الحالي
لا اخوه يمي الي بقو بس القهر يبقالي
كلّ اخوتي ماتو چتل ما باقي عندي والي
بهاي المصيبه الفاجعه مردت تره دلالي

زينب غريبه تصير بين الاعادي
بالعايله و تحير بإسمك تنادي
شنهو الذي مر بينه بين العده تدرينه
حال الفواطم حال الفواطم
*٢*
حاضر يبويه بكل عسر شوف الجره ويانه
ترضه الفواطم تنسبي رحنه بضعينه اعدانه
نصعد على نوگ الهزل حيف العده خلانه
بين الغرب وسفه الخدر باصعب وضع سوانه

تالي الزمن و شلون أصبح سبيه
بويه اليسر ميهون بين آل اميه
شنهو اليمرّ اعلينه بين العده تدرينه
حال الفواطم حال الفواطم
*٣*
بويه اخبرك بالوضع فوك الهزل يسبونه
واحنه حرم ال النبي يا وسفه من يسرونه
تقبلها زينب تنسبي بين العده ايخلونه
واعله نياك امهزله يا بويه و يركبونه

من كربله يسبون با بويه حيدر
و ام الخدر يدرون كل العده الشر
كلهم وسف سابينه بين العده تدرينه
حال الفواطم حال الفواطم
*٤*
لا كافل اليحدي الضعن عفته اخويه مرمي
يم النهر جسمه وكع من الاعادي مدمي
واعله المصيبه يا علي حزني بدليلي و همي
باخر حياتي انسبي صعبه ومعزّة امي

احضر يحيدر كون درب اليساره
بيه العده الملعون ما بي غياره
وسفه تره امخلّينه بين العده تدرينه
حال الفواطم حال الفواطم
*٥*
بعد الولي يا حيدره شحال العقيله تدري
بين النسه و درب اليسر يا بويه حاير فكري
من آل اميه شكد اذه يغدر زماني و دهري
ام الخدر متيسره مسبيه بآخر عمري

واللي قهرني هواي فكد الميامين
لا عندي كافل وياي لا يمي لحسين
ماكو اخو اليحمينه بين العده تدرينه
حال الفواطم حال الفواطم
*٦*
حال الفواطم يا علي بحيره صفت متحيره
لفكد الغوالي و الاهل كل واحد انحز نحره
لو عالعده اليسبي النسه بين المدن متيسره
لو عالخدر من انسلب ضده العده وبنظره

نسوه بلا كفّال شنهو البدينه
حزن و دمع همال بويه انولينه
حيف العده يعادينه بين العده تدرينه
حال الفواطم حال الفواطم
*٧*
بويه علي وشما كلت درب اليسر ألمنه
اطفال كلها و النسه من العده يهضمنه
واحنه بنات المصطفى و يدري الزجيه امنه
و يذبح اخوتي بكربله منهم وسف يحرمنه

بعد الكمر عباس بس الاذيه
يحدي الضعنيه ارجاس من آل اميه
وسفه باذه امجازينه بين العده تدرينه
حال الفواطم حال الفواطم



مهيمن يوسف الموسوي
١٢ محرم ١٤٤٦هـ
٢٠٢٤/٧/١٩م يوم الجمعة ٤:٥٦م

للسبي ، مهيمن يوسف الموسوي

يبويه كون موجود تحضرنه
تشوف شلون هاليوم تنظرنه
بلا وليان قهر و احزان
يبويه كون موجود تحضرنه

*١*
يبويه لو الي تحضر تشوف الصار باحوالي
مصايب كربله سوّت حزين هواي دلالي
بعد ولياني من غابوا بقهر يا حيدره حالي
گضو وبكربله بالطف ضحايه راح كل غالي

ولا عالبال يرحون من يمي
ودمع همال وزداد كل همي
على الخوان قهر و احزان
يبويه كون موجود تحضرنه
*٢*
بحمه خواني يا حيدر جنت يا بويه وياهم
يحاموني ويراعوني لچن هاليوم بجفاهم
فلا باقي كل واحد فلا كل حالي بحماهم
جثث ظلت على الغبره سليبه نازفه ادماهم

واهلّ العين لحسين و الكافل
صرت لا وين وياي هالحاصل
سبي العدوان قهر و احزان
يبويه كون موجود تحضرنه

*٣*
يبويه لو تشاهدني على حالي و شنو الصاير
العقيله بيا وكت صارت سبيه اوي العده الجائر
على نوك الهزل اصعد عدوي باليسر ناظر
وانه الما جان ينظرني وعلى حالي الکلب صابر

وحزن بالروح موجود ويايه
دمع مسفوح مذروف وهوايه
بوضع خذلان قهر و احزان
يبويه كون موجود تحضرنه

*٤*
يحيدر كربله منها مصايب شاهدت عيناي
واشدهن من يجتفوني سبيه لا اخو وياي
وانه ام الخدر زينب صعب هاي القضيه هاي
فلا لحسين مو يمي ولا يمي بقه الوفاي

بلا كفال عباس كافلني
صعب هالحال ما راح كل حزني
بكثر لأكوان قهر و احزان
يبويه كون موجود تحضرنه

*٥*
احامي بهالوضع المن سبايه هالنسه واطفال
سُكينه لو رقيه احمي العده منهن بأذيّه نال
سبايه وكلهن اتجتفن بديهن ترتبط لحبال
وعلى حسين الولي دمعي بكثر يا حيدره من سال

تأذّي الكوم وياي يا حيدر
بگلب مهموم واحزان بس تكثر
انس و الجان قهر و احزان
يبويه كون موجود تحضرنه

*٦*
يحيدر يا علي بويه دليلي بي قهر و جروح
العقيله باليسر راحت يأذّي هالأمر بالروح
وعلى اهلي و مصيبتهم دمع عيني بقهر مسفوح
واشدهن يقهر ايلوّع كفيلي و الولي المذبوح

فلا عباس وحسين يحميني
وسط هالناس نظرات تأذيني
الاعادي خان قهر و احزان
يبويه كون موجود تحضرنه


*٧*
بنات المصطفى و آله يبويه شافت الآلام
تعادينه و تأذينه علينه تعتني الظلام
بحقد وشكد كره منهم اشد واصعب تره الايام
بظلم اخسه البشر منه تعادينه وسف حكّام

العِده معروف باحقاد ويانه
يريت تشوف لانذال من جانه
ابد ما هان قهر و احزان
يبويه كون موجود تحضرنه


مهيمن يوسف الموسوي

نزلة للسبي مهيمن يوسف الموسوي


يكرار بويه شفنه باليسر
يكرار من عدونه بس ضرر


*١*
بويه يا حيدر اكلك والجره باحوالي
من رحل عني اخوتي ما بقه كل غالي
بس همومي و دمعتي يا حيدره يصفالي
لا كفيل العندي يمّي بالضعن يبقالي
على انياك رايحه ودمعي كثر
يكرار من عدونه بس ضرر

*٢*
تدري يا حيدر اخوتي من رحو من يمّي
سيدي حزني عليهم بالگلب كل همّي
والقهر بالروح عندي ساري حتى بدمّي
من يشتمونك يبويه و للزجيّه امّي
تمنيت بويه يا ريت اتحضر
يكرار من عدونه بس ضرر

*٣*
آه يا بويه شگلك من رحت مسبيه
شاهدت بس المصايب والرزايا اعليه
والقهر روحي و دليلي حيدره بس بيّه
كربله بيها يحيدر بس مصاعب هيّه
يمولاي والگلب عندي صبر
يكرار من عدونه بس ضرر
*٤*
وأدخلت للكوفه بويه واذكرت لمّتنه
بيها نسكن و بحنانك يا علي من جّنه
ما يراني وبوكتها يا علي كل احنه
والزمن بيه غدرني كل عده ينظرنه
الف حيف هالنسه بعينه نظر
يكرار من عدونه بس ضرر
*٥*
عالنيّاك الهزّل آنه وأدخلت للكوفه
شاهدت بيها الشماته امن العده معروفه
آل اميه وبحقدها يا علي موصوفه
والغدر منها نعرفه والاذيه نشوفه
ولاشرار يا علي بينه غدر
يكرار من عدونه بس ضرر

*٦*
وبطريق الشام شفنه والاذيه زدنه
كلها يا بويه علينه بالخيانه و ضدنه
والدي حيدر عِلمهم والديانه عدنه
والنبي المختار تدري هو يصبح جدنه
فلا تهاب والحقد من استمر
يكرار من عدونه بس ضرر


*٧*
زينب بهاي المصايب يا إمامي شدّه
والعده بدرب اليساره يظهر بكل حقده
لوّعانه وبس اذيّه شاهدينه عنده
بالحبل متجتفه ادينه يا وسف متقيده
يأذون يا علي ام الخدر
يكرار من عدونه بس ضرر


مهيمن يوسف الموسوي

للسبي
مهيمن يوسف الموسوي


بدرب السبي حرنه        فوك الهزل صرنه
يا حيدر بويه تدرينه     تعرف شنهو الصار اعلينه
فوك الهزل صرنه
.....
زينب يبويه صايره بين الزلم ممشاها
محد بقه يحدي الضعن كافلها ما وياها
بس العليل الي بقه  هو الي صفه بحماها
معقوله زينب يا علي  هيجي العده جازاها

بنت النبي المختار   مسبيه بين أشرار
منه لوعات و تلفينه  تعرف شنهو الصار اعلينه
فوك الهزل صرنه
.....
متعلمه وي اخوتي  كلهم الي يحموني
وآنه اخت راعي اللوه كل العده ايعرفوني
بنوك الهزل آنه اصعدت يا حيدره غصبوني
وحسين اخويه المنذبح وبذبحته فجعوني

زينب غريبه ليش    ‏وسط العده و الجيش
يا بويه كلهم تاذينه.     تعرف شنهو الصار اعلينه
فوك الهزل صرنه
.....
يا بالحسن زينب صفت بين الاعادي وسفه
و آنه اخت سبط النبي كل الخلق و تعرفه
واخت الكمر يل بالحرب حيف انكطع كل جفه
عجبه اصيرن باليسر بحبال بس متجتفه

و ام الخدر صارت      بهاي النسه حارت
لا كافل باقي ايحامينه     تعرف شنهو الصار اعلينه
فوك الهزل صرنه
.....
مشونه بويه بالمدن كلها علينا تنظر
آنه العقيله و اصبحت بين الغرب اتيسر
بين آل اميه ماشيه حالي حزين و يقهر
لاجن على هذا الأمر كلبي عجب و اتصبر
من السبي و قهره   بكلبي بقت حسره
دنيانه وشسوّت بينه   تعرف شنهو الصار اعلينه
فوك الهزل صرنه
.....
آنه الجنت ويّه هلي كلها اخوتي ويّاي
وهسه يبويه بهالزمن امشي أنه بين اعداي
كافل الي جان الگمر  من كل خطوره حمّاي
وبموتته و كل غيبته صعبه تره كل دنياي
حالي بعد عباس     حادي الضعن لارجاس
كلهم صارت بس تاذينه      تعرف شنهو الصار اعلينه
فوك الهزل صرنه
.....
وحسين اخويه الي نذبح هو إليه والي
من مات زينب حايره صاير صعب كل حالي
احمي النسه من العده بحزني و قهر دلالي
همي و مصابي بالگلب من الاذه اليجرالي

فوك الحزن عندي    كلها البشر ضدي
لوعه و حسره بس ظلينه  تعرف شنهو الصار اعلينه
فوك الهزل صرنه
.....
مهيوبه آنه و افتخر من امشي وي اخواني
ليش الوكت هيجي فعل مسبيه وي عدواني
و أعله فكد كل اخوتي مستعره كل أحزاني
من عالثرى ماتو ذبح هذا الحدث أذاني

بدرب اليسر وضعي    بونه همل دمعي
واعله كل غيبة والينه     تعرف شنهو الصار اعلينه
فوك الهزل صرنه



مهيمن يوسف الموسوي

حال الامام علي السجاد عليه السلام
في دفن الأجساد الطاهرة


شحال العليل و بالدفن من يدفن حسين
جسمه توذر شاهده لجله يهل عين
...........
لحسين و بيوم الدفن ابنه حضر ليه
طوي الأرض لجله صفت حتى يواريه
زين العباد بيا وضع قهر و حزن بيه
شاف الحُسين اعله الثره بين المطاعين
...........
شاف الجسد واعله الگفه يا وسفه مرمي
وسيوف كثره الطعنته من يمها مدمي
بالحر بقه وبلا دفن وشلون محمي
اشلاه شافه و السبب من المعادين
...........
الف و تسع مية جرح من جسمه صابوه
وسهام ظلت عالجسد يا وسفه ضربوه
اليقهر أشد جسمه بقه عالكاع خلوه
جسم الحُسين و منطعن والجرح جرحين
...........
بساعة دفن ابن النبي ومتكطع اوصال
جسمه توذر منتشر والها الولي شال
يجمعهن يريد الدفن وباصعب الحال
خله دمعته هامله للناصر الدين
...........
الله يعينه بهالامر يصبر دليله
وشلون يقوه بدفنته ما راح حيله
بس الحزن هم قهر يصبح خليله
لمصابه لحسين الولي ظل يبجي بونين
...........
گلبه شحمل و ليا وضع مولاي صابر
جسم الحسين بكربله عالكاع ظاهر
وبدفنته لمّ الجسد بأثر الحوافر
لم الجسد حيف العده كثره موذرين
...........
زين العباد بدمعته هماله لعيون
يدفن ابوه بحفرته مذبوح وشلون
لا راس عنده الي بقه حاله فلا يهون
يم العده الضد الولي بالشر منادين



مهيمن يوسف الموسوي
١٥ محرم ١٤٤٦هـ
٢٠٢٤/٧/٢٢م ٢:١٥ص