للسبي
مهيمن يوسف الموسوي


للكوفه رحنه اليوم يا حيدر
ناس التعادينه متشمته بينه
يا حيدر
...........
بويه اخبرك بالوضع يسرونه
للكوفه من فوك الهزل جابونه
وكلها الشماته امن العده اينظرونه
واحنه حرم آل النبي ايعرفونه

گلبي بقهر و هموم يا حيدر
شنهو الجره اعلينه متشمته بينه
يا حيدر
...........
زينب يبويه و يا وكت آنه انشاف
ياللي جنت وياك بويه ما خاف
و ام الخدر اسمي بنت ناس اشراف
ينظر عدوّي الما بقه عنده اعراف

وبنظرته مسموم يا حيدر
نظر العده ماذينه متشمته بينه
يا حيدر
...........
بنت النبي جدي الرسول المختار
وامي الزجيه الطاهره وام اطهار
وشلون ادخل مجلس البي لاشرار
حيف الزمن خلاني و بهالاقدار

عندي الألم معلوم يا حيدر
لا كافل الحامينه متشمته بينه
يا حيدر
...........
آه الدهر بويه شعمل و بحالي
بضعن العده ما عندي بويه والي
كلهم جثث خابت جميع آمالي
لفكد الاحبه بس قهر يصفالي

گلبي شكثر مالوم يا حيدر
اخسه البشر سابينه متشمته بينه
يا حيدر
...........
تدري يبويه و البشر بالكوفه
بوكتك يحيدر بالعدل موصوفه
و هسه بحقد لال النبي معروفه
وبس الاذه من الاعادي نشوفه

بيها العدل مظلوم يا حيدر
تدري شنو مسوينه متشمته بينه
يا حيدر
............
ضَدنه بحقد بالشر إبن مرجانه
جينه بيسر كل الحرم خلانه
وينظر علينه أمن البشر باعدانه
لاجن فلا بذل ما كدر سوانه

حاطتنا كل الگوم يا حيدر
بحقد العده امجازينه متشمته بينه
يا حيدر
............
عباس لو يمي و اخويه المذبوح
ما جان للكوفه النسه كلها اتروح
ما ننسبي و مني الدمع ما مسفوح
لاجن نضد هذا القدر ما مسموح

لا ما يفيد اللوم يا حيدر
النه الاذه امخلينه متشمته بينه
يا حيدر
............


٨:٥٥م
مهيمن يوسف الموسوي
١٥ محرم ١٤٤٦هـ
٢٠٢٤/٧/٢٢م يوم الاثنين ٨:٥٥م

موشح للسبي


يا علي بنتك سباها اعداها
لا كفيل ولا ولي خلاها
......
بويه و شحالي دريت بهاليسر
بين هاي اعداي وتضدني شكثر
حايره بهاي النسه بنص الخطر
لا خيم لا عدها والي اوياها

شلون اصبر عالوضع حامي الدخيل
هالفواطم تنسبي ويه العليل
والعده يشتم علينه مو قليل
تقبل الحره العده سباها

ليا وضع زينب تدير اعيونها
عالهزل كل النسه يخلونها
مجتفه ايدي باذه يخلونها
آل اميه للنسه شجازاها

من مثل زينب شبيه بحالتي
فاكده الوليان مجتوله اخوتي
والدهر منه المصيبه و محنتي
بس اذيه و الحقد راواها

كون موجود و تشوف بيا وضع
ليا مصيبه ويا اخو اتهل الدمع
بهالرزيه يا علي گلبي انفجع
والاعادي الزينب و اذّاها

گوم يا كرار انهض يا إمام
هالحرم تصفه وسط هاي اللئام
واحنه جدنه المصطفى خير الأنام
شلون وبهاي العده مسراها

لا شرف عنده الاعادي ولا قيم
من سبه لاطفال كلها و الحرم
والعليل امن المرض جسمه انسقم
والنسه باصعب اذه يدناها

روحي المن يا إمامي صابره
لاخوتي الظلت جثث متجزره
لو سبينه اوي الاعادي الكافره
آل اميه ومثله من سواها

للأهل تشتاك كلمن بالضعن
والنسه بگلب المناحه من تون
هالمصايب يا علي ما ينّسن
بكل وكت طول الدرب ذكراها

بنتك الحره بوضع حزن و ألم
ذاكره لحسين والراعي العلم
دمعتي بطول السبي بحسره سجم
وبقهر من الگلب مسراها





مهيمن يوسف الموسوي
١٦ محرم ١٤٤٦هـ
٢٠٢٤/٧/٢٣م يوم الثلاثاء ٦:٤٤م

الامام علي السجاد عليه السلام يصف دفن الامام الحسين عليه السلام ، لعمته السيدة زينب عليها السلام



من ادفن المذبوح يا زينب
بگلبي حزن و جروح واتعذّب
جسمه موذره اعداه ومقطعينه اشلاه
يا زينب
.....
زينب اخبرچ بالدفن شنهو تشوفه اعيوني
كل آل اميه الجائره بحسين من أذّوني
لمّن وصلت الكربله اذرف دمع خلوني
روحي تعذبت للابو يا عمه و شعذبوني

مرمي ابويه شلون عالغبره
واهمل دمع لعيون وبحسره
سبط النبي أذّاه ومقطعينه اشلاه
يا زينب
.....
لحسين امام ومفترض كلها تطيعه لازم
مو تقتله هاي البشر ضده الاعادي الظالم
الف و تسع ميّة جرح جسمه ابد مو سالم
وكلهم يعرفونه سبط اخر نبي بالعالم

جسمه نطعن بسيوف متوذًر
جاني العمه ولا شوف هالمنظر
بطف كربله خلاه ومقطعينه اشلاه
يا زينب
.....
بحالة دفنته والدي حيره يزينب وضعه
وشلون ادفنه بالكبر حيف الاعادي مكطعه
روحي لابويه تنقهر يا زينب و متروعه
بحسرة گلب للمنذبح مني تسيل الدمعه


فوك الجرح مجروح يا ويلي
حاله يعذب الروح كل حيلي
مثله فلا اشباه ومقطعينه اشلاه
يا زينب
.....
كل ميت بحالة دفن جسمه سليم و موجود
اله ابويه منجتل مذبوح راسه مفكود
جسمه توذر و نسحك شاف الاذه لا محدود
وسيوف و رماح انطعن چم طعنه لا ما معدود

وسحكت عليه الخيل وبصدره
دم الحُسين ايسيل من نحره
حيف العده سوّاه ومقطعينه اشلاه
يا زينب
.....
بلحده ابويه حيرتي جسمه ادفنا بيا حال
لا راس عنده بالجسد منه العده راسه شال
لا جسمه سالم ودفنه متكطع اوصال اوصال
بنبال و سيوف و رمح من الاعادي الچتّال

حيره يعمّه بيه متألّم
بگلبي لابويه ليه بس الهم
شلون البشر جازاه ومقطعينه اشلاه
يا زينب
.....
شحجي يزينب بالدفن لمّن اوسده بلحده
بالدين لازم عالترب راسه اسنده بخده
وراسه ابويه منذبح لا راس باقي عنده
جسمه يصير بيا وضع شنهو البقه الي سنده

موقف ألم و احزان بس يقهر
شفت الاذه و خذلان شفت الشر
واعله الابو كل آه ومقطعينه اشلاه
يا زينب
.....
بدمعي ادفنه و حسرتي لحسين ابويه المعصوم
من آل اميه الظالمه منهم ذبيح و مظلوم
حتى بمماته يختلف عن الخلائق و الگوم
مذبوح و بدفنه قهر منّه تسيل ادموم

جِنّ و إنس بالكون منقهره
مصابه الوَلي ميهون شيصبره
وسفه و ألف ويلاه ومقطعينه اشلاه
يا زينب
.....


مهيمن يوسف الموسوي
٢٠ محرم ١٤٤٦هـ
٢٠٢٤/٧/٢٧م يوم السبت ٧:٠١م

شوط كربلائي للعباس في السبي


نادت زينب الحره وينه الكافل اضعوني
اخلافك يا گمر هاشم أميه شلون يسبوني
...........
يجافل خدري يا نشمي بعدك خويه و شبيه
تدري بين عدوانك زينب حيف مسبيه
وعلى انياك الهزل نركب و حسرتي بالگلب بيه
بت اشرف نسه بالكون
و ابويه حيدره و شلون
سبيه اوي العده المعلون
بلا كفال ولا والي بقو وياي يحموني
...........
بسبع الكنطره شحالي شوصفه شلون يا عباس
معقوله الخدر مسبي وي اخسه البشر لارجاس
وينظرني البشر كلها شماته اوياي هاي الناس
اخت عباس جبناها
اديها جتّفيناها
فلا كافل بقه اوياها
و هموم و قهر عندي العده يا حيف خلوني
...........
بين الناس يا خويه امشي بلا ولي وياي
بس يمي العليل الي شنهو البيده يا وفاي
شمر يحدي الضعن وسفه صعبه يا جفيلي هاي
لاجن زينب شتعمل
يخويه ما بقالي حل
مهيوبه ابد مو ذل
أنه اخت الكمر وافخر يخويه ما يذلّوني
...........
يبو فاضل اخبرنك زينب بالسبي شبيها
اديه اتجفت وسفه العده الخاين يسوّيها
يخلي زينب الحره شكثر واللّٰه ماذيها
مسبيه و قهر عندي
وحك المصطفى جدي
ودمع يهمل على خدي
المصيبة كربله الكبره عدوك حيل ياذوني
...........
فرق بين اليسر و العز مثل فرق السمه و الگاع
الخدر وياك يا خويه عالي تدري لا ما ضاع
اسمي ام الخدر زينب معروف الاسم ونذعاع
لاجن من رحت اسمي
متيسره وكثر همي
حزني جن حزن امي
صعب درب اليسر يقهر حسافه اعداك قهروني
...........
تدري بزينب شسوّت و بدرب السبي شعملت
صح مجتوفه كل يدي العده يذلها فلا خلّت
تصبر عاليسر و الهم وبحسرة گلب عملت
فلا من العده يذلني
ولو فوك الهزل خلني
يخويه بهيبتي لني
حتى اعداي حيرته رغم بالنوك يسروني
...........
يعباس الاخو الزينب حسرة بالکلب و الروح
عفتكم عالثرى جثة و يأذينه شكثر و جروح
لاجن و الاشد عندي و دمعي اعله الوجن مسفوح
من رحنه نسه و اطفال
وي اخسه بشر انذال
صفيت شلون و بيا حال
كلها اعدانه يا وسفه يبو فاضل ينظروني
...........
على الأطفال منقهره سبوها بهالعمر و اعوام
زغيرة شلون تتحمل هالكد بس اذه و آلام
رقيه و سكنه تدريهن شافن لوعه من ظلام
لفراك الابو و فركاك
الكم يا اخو تشتاك
اذوهن حسافه اعداك
المصايب حيرت زينب يخويه هواي حيروني
...........
الضعن بيه الشمر يحدي حسافه هالعده حداي
عكبك يا گمر هاشم من كل آميه اوياي
وعفتني ميسره اختك يالكافل سديد الراي
الوضع تدري يبو فاضل
قدرنه امن الصمد جاعل
كلشي امن العده فاعل
وعدو آل النبي ضدنه وكلهم من يعرفوني
...........
زينب صابره و تحزن على مصاب الأهل و الصار
الفواطم تنسبي و تفتر من ارض الارض اشرار
واصبر عالعده يشتم ولو النه يجيب اخطار
جبل واعله الصبر زينب
ولو لجل الاهل تنحب
بشموخ المرتضى ترغب
ولو جار الدهر ضدي و اذيه هواي راوّني


مهيمن يوسف الموسوي
٢٢ محرم ١٤٤٦هـ
٢٠٢٤/٧/٢٩م يوم الاثنين ٢:٠٨ص

موشح بحق الامام السجاد "عليه السلام"
مهيمن يوسف الموسوي

اظلمت هاي الأرض واكوانها
للولي السجاد كلّ احزانها

*١*
اليوم ارض المصطفى الهادي الأمين
كل موالي بيها مقهور و حزين
لمقتل السجاد زين العابدين
ولمصابه ونّت ابأشجانها

*٢*
غاب من دين النبي رابع عمد
جان للدين الامام أحسن سند
رابع انوار الائمه منفگد
والديانه اهتزت بأركانها

*٣*
اليوم كل علم ومعارف و الحكم
غابت وعن البشر عن الامم
من رحل عنه الولي بسم و ظلم
راح من كل شيعته و وليانها



*٤*
مظلمه اليوم المدينه بموتته
غاب عنها وما يرد ولسيرته
شيعة الكرار كلها فكدته
ظلّت تنوح وتون كل شانها

*٥*
آه واعلى هالمصيبه الفاجعه
كل موالي اليوم هلّت مدمعه
من اجت ليها الرزيه و سامعه
والمدينه محزنه بميدانها

*٦*
غاب زين عباد واحسن كل بشر
والملائك من درت بيها القهر
ملتحق بحسين من مات بغدر
محزنه لجله لانس وي جانها

*٧*
مات مسموم بحقد من العده
بفعلته وجرمه تره شكد حاقده
ضدّت العتره وفلا مو سانده
بالخيانه وشكثر الوانها


*٨*
هالمصاب اليوم لجله كل محب
يذكره بحسره و دمع عينه يصب
هالمصييه و الجرح بيها الگلب
هالرزيه بالگلب نيرانها

*٩*
كل موالي و كل محب جنّ و إنس
بهالرزيه يشعر بروحه و يحس
ذاكرينه نستمر گطع النفس
لو كثر شيعة علي عدوانها

*١٠*
نذكر السجاد كلنه بهالعمر
ذكره خالد و المصيبه بالدهر
بصوت عالي لو حجينه نفتخر
تلهج الشيعه يظل تبيانها



مهيمن يوسف الموسوي

بحق الامام علي السجاد "عليه السلام"
مهيمن يوسف الموسوي

يبو حمزه الثمالي دريت الصار حالي
هذا البچي والنوح لجل الولي المذبوح
دريت الصار حالي
*١*
حگك عليه بحيرتك هالكد بچي هواي
حين الذي وبجيتك كايل يمولاي
ليش المناحه هالكثر قهر و حزن جاي
حسين الابو مات بغدر لا ما شرب ماي
اشد واصعب مصيبه الگلب زايد نحيبه
حزني يظل بالروح لجل الولي المذبوح
دريت الصار حالي
*٢*
هم مر عليك وهم شفت مثل النظرته
رغم الحزن وشكد قهر آنه صبرته
من والدي بسيف الشمر صارت نحرته
وكثره تحوطه وحاقده كلها غدرته
تغدره هالكتايب شحمل گلبي مصايب
دمعي بقهر مسفوح لجل الولي المذبوح
دريت الصار حالي


*٣*
ظل والدي و بكربله بين آل اميه
كلها تضده و عادته و شاف الاذيه
همّه يعرفونه السبط ابن الزجيه
تالي يذبْحونه بحقد بالغاضريه
على الحك من ينادي اجت كثره الاعادي
حزنه ابد ميروح لجل الولي المذبوح
دريت الصار حالي


*٤*
ابن النبي و المرتضى كلهم يعرفوه
ليش نقتل فوك الثرى وسفه يغدروه
مات بضمه ورغم التعب كثره يعادوه
حتى بمماته و مقتله صاروا يأذّوه
نفس موته قليله بمصابه لا مثيله
فوگ الأرض مطروح لجل الولي المذبوح
دريت الصار حالي




*٥*
شصبر على هذا الحدث دمعي بكثر سال
و وضعي على سبط النبي متغير الحال
لمن اشوفن بالشمر وبسيفه جتّال
والوالدي نحز النحر وبكل حقد نال
خيول الاعوجيه على ضلوعه هيّه
داست علي و تروح لجل الولي المذبوح
دريت الصار حالي


*٦*
شفت الخيول اعلى الضلع واعليها داست
دم و عظم صارن سوه وبقوه اثرت
يا ويلي حين الي اجت بحسين سوّت
طحنت ضلوعه يا وسف كل عيني نظرت
على الغبره رميّه صعب والله عليّه
جسمه نمله بجروح لجل الولي المذبوح
دريت الصار حالي




*٧*
حرگ الخيام وشاهدت حال السبايه
لاما شبيه امن البشر كل البرايه
كل النسه بيها الرعب معروفه هايه
لاكن فلا باقي الگمر يمهن حمايه
عليل وما اساعد بقليل آنه اساند
بكيدي فلا مسموح لجل الولي المذبوح
دريت الصار حالي



مهيمن يوسف الموسوي

نزلة ميمر بحق الامام السجاد "عليه السلام"
مهيمن يوسف الموسوي

خلّص حياته حزنان دمعه بكثر مسراها

*١*
شيحمل مصايب و المحن و الاشجان
تشهد على احزانه تظل انس و جان
يذكر مصاب المنذبح والوليان
بعد الامام المظلوم بروحه المصيبه اوياها

*٢*
گلبه ابو الباقر فلا مثله صار
شاف الرزايا و الاذه و الأخطار
بعينه يشاهد منذبح ابن اطهار
ذبحة ابوه اعلى الكاع بروحه و گلب حملاها

*٣*
الله يعينه بهالحدث من شافاه
فوك الثرى حسين الإمام و يلگاه
شمر النذل وسفه بغدر من ذبحاه
هاي المصييه السجاد بطول العمر ذكراها
*٤*
شاف الحسين اعلى الثرع متوذر
بوضعه عجب عنده الگلب من يصبر
وجثته تظل فوك الترايب بالحر
وبلا غسل لا دفان لجثته تره سوّاها

*٥*
رابع أمام أعلى البشر و الاكوان
الله يعينه من يشاهد نيران
بحرگ الخيم وبكل حقد من عدوان
لهاي النسه و الأطفال باصعب وضع يلگاها

*٦*
ام الخدر زينب يشاهدها شلون
لا كافل الظل لا اخوها اليحمون
والله صعب هذا الوضع لا ميهون
وبيا مصيبه السجاد بهذا الوضع حلّاها
*٧*
بكيد و سلاسل منسبي بهذا الحال
وهو عليل امن المرض دمعه سال
شبيده على هاي النسه و الاطفال
كلها تضدّه وما موجود ناصر اله يفداها
*٨*
بضعن العده وكل النسه للكوفه
شاف الاعادي بهالحدث و يشوفه
بيه الشماته و الغدر موصوفه
ذكرو علي بهذا الحال يامن لجلهم جاها

*٩*
وبكل قهر ظل ابو الأكبر حيل
من الخيانه امن الخلايق يا ويل
وكلهم درو عالحك تره لا ميميل
ولد الرسول المختار تالي فلا بحماها

*١٠*
لاخر حياته مضطهد من إعداه
قدم لجل دين النبي و السوّاه
لجل المبادئ والعمر من يفداه
ينصر شريعه والدين باحسن وضع خلّاها


مهيمن يوسف الموسوي

بحق الامام السجاد عليه السلام
الشاعر مهيمن يوسف الموسوي



ليش المعصوم ميّت مسموم
مات السجاد و متسمم من أرذل گوم


*١*
إمام اعلى البشر كلها علي السجاد
متميز عليهم بأفضل العُبّاد
بحياته بس ظلم و الجور هو ساد
نفس جده النبي و حيدر رجع و نعاد
مر بلوعات وكلبه بحسرات
كلها اتضده و حيف تأذه. منهم مظلوم






*٢*
ابن سيد البشر طه النبي المختار
وجده المرتضى حيدر علي الكرار
وبْن حسين يالمات بغدر لاشرار
معروف بصفاته وارث الاطهار

كل علمه هواي بدينه وفاي
قدم عمره و رايد نصره بأمر القيوم

*٣*
كتاب الله الجلاله من نزل عدهم
جبريل الملك هو هبط يمهم
هذولي اللي فلا أحد يماثلهم
عليل الطف ابو الباقر تره منهم

رابعهم صار من الاطهار
علمه و فكره يشبه جده علمه للدوم


*٤*
يعادونه علي السجاد يا وسفه
إمام اعلى المَلا كلها تره اتعرفه
ظلم و الجور و الباطل صبح ظرفه
عمره الي كضه ما نكدر انوصفه
حيف اتجازيه منّ اتعاديه
منهم متألّم كل گلبه صاير مهموم

*٥*
بحقد و بكل غدر سوّه العده الجائر
يكيده بغدرته و كره لابو الباقر
يسمونه و يقتلونه اببغض ظاهر
فضله و كل مقامه عالخلق ناكر

ميت مغدور من أهل الجور
جسمه اتلوع بالسم صاير ميت مالوم



*٦*
من مات الولي السجاد متسمم
المدينه بس حزن بيها و قهر خيم
الموالي بفكده أصبح هو متألًم
بحسره و مدمعه الهامل نصب مأتم

كلبه مجروح حزنه بالروح
بمصابه تبجي بكل حسره ويهلّ ادموم







مهيمن يوسف الموسوي
٤ صفر الخير ١٤٤٤هـ
٢٠٢٢/٩/١م يوم الخميس ١:١٠ص

بحق الامام علي السجاد "عليه السلام"
الشاعر مهيمن يوسف الموسوي


علي السجاد وصلتله المنيه
يچتلونه العده بسم آل اميه
عمره حزن و آلام من كربله و الشام
يجتلونه العده بسم آل اميه

*١*
خلّص حياته بالمصايب و هموم
لحسين ابوه المنذبح من الكوم
من آل اميه وبحياته مظلوم
وكلهم يعرفونه إمام و معصوم

روحه صابره والله عجيبه
وبعينه يشاهد كل مصيبه
ضده العده الظلام من كربله و الشام
يجتلونه العده بسم آل اميه

*٢*
بعينه يشوف اشجم مصيبه و احزان
وصعبه الابو ايشوفه انذبح عالتربان
حزنه بوكت جته المنيه كثران
وقهره شبه ارض و سمه و الاكوان

على فكره تظل حزن المصايب
من مات الابو اتضده الكتايب
من جور كل حكام من كربله و الشام
يجتلونه العده بسم آل اميه
*٣*
شحال العليل و من اجه ليه الموت
يذكر مصيبة كربله فعل و صوت
و سبي النسه واعله العده من اتفوت
حقد الوليد بكل اذيته منعوت

بأمر منه تسمم يا هظيمه
و رزيته بالگلب عدنه أليمه
شايف قهر لأيّام من كربله و الشام
يجتلونه العده بسم آل اميه
*٤*
من يحتظر دمعه لابوه و مسفوح
من هاجمه ضده الاعادي و مجروح
يذكر مصايب كربله و المذبوح
وحسين ظل فوك الوطيه مطروح

تأذه امن الغدر و شكد خيانه
اميه حاقده و بلا أمانه
لا ريب لا اوهام من كربله و الشام
يجتلونه العده بسم آل اميه
*٥*
امصاب العليل و مقتله ألمنه
لجله الموالي ظل ينوح ابونه
ذكره يظل ما يبتعد من يمنه
وشلون شايف جم حزن عذبنه

امامي و ثابته عدنه قضيته
يألمنه مماته و كل رزيته
حزنه و مناحه دام من كربله و الشام
يجتلونه العده بسم آل اميه
*٦*
شحاله ابو الباقر لَمَن يسبونه
بالجامعه امگيد وسف ياذونه
من آل اميه بالأذه يكيدونه
وجده النبي كلهم تره يعرفونه

تأذه أمن العده ذوله النواصب
سنينه و انتهت بيها العجايب
چنه الحزن أعوام من كربله و الشام
يجتلونه العده بسم آل اميه
*٧*
رابع إمام اعله الخلايق كلها
دمع الموالي بهالمصيبه هلها
بهاي الرزيه الفاجعه من خلها
يذكر امامه و بالدمع جاعلها

تأذّينه شكثر وبهالمصيبه
لمصابه المحب عالي نحيبه
ضده شكثر اقوام من كربله و الشام
يجتلونه العده بسم آل اميه





مهيمن يوسف الموسوي
٢٣ محرم ١٤٤٦هـ
٢٠٢٤/٧/٣٠م يوم الثلاثاء ١١:١٩م