فلم باربي Barbie
يحجي عن دمية تعيش بعالم باربي لاند وهي دمية تمثل كلشي مثالي ومتألق وجميل
فجأة هاي الدمية تبدي تفقد تألقها ف تنجبر تجي للعالم الحقيقي حتى تعرف شنو السبب وتصلحه حتى ترجع باربي المتألقة
المهم الفلم صراحة اخذ ضجة كلشش كبيرة بس هو كـ الوان واغاني وهيج اوك
بس ابد مابي فكرة ونوعاً ما اكدر اوصفه ممل
استمتعت بالالوان وبالاغاني بس بعدين بديت احس بملل
ف الي يدوّر فلم بلا فكرة مجرد الوان واغاني وشي خفيف يكدر يشوف هذا الفلم 💗💖

فلم رعب كوري اسمه
Ghost mansion
يحجي عن شاب مختص بكتابة قصص الرعب ف يروح يزور فندق غريب صارت بي احداث غريبة ويبدي يسال المالك عن هاي الاحداث علمود يكتب عنها وبسبب هالاحداث يصير مهووس اكثر انو يعرف السبب
فلم رعب يحجي اكثر من قصة وهيج
رعبه متوسط الى قوي
للي يحبون رعب خفيف موقوي 😂
هذا الفلم يناسبكم 🖤

فلم مستوحى من قصة حقيقية اسمه
In the heart of the sea
يحجي عن اشخاص مهمتهم يجيبون زيت الحوت من البحر علمود يصنعون منه نار واضوية مثل النفط
ف يروحون مجموعة اشخاص للبحر وتستغرق رحلتهم اشهر علمود يجمعون اكبر كمية ممكنة من الزيت وهناك يواجهون شي يگلب رحلتهم كلها
الفلم يعتبر من افلام الكفاح من اجل البقاء على قيد الحياة
بس هنا المغامرة كلها بالبحر
كلشش حلوو الفلم وممتع ويششد
متحسسون بالوقت اصلا
للي يدورون هيج نوع من الافلام خصوصا الافلام الي بها قيمة وقووية
هذا الفلم الكم 🖤

فلم من افلام الكفاح من اجل البقاء على قيد الحياة اسمه
Cast Away
يحجي عن شخص يشتغل بشركة توصيل ف يكون مسؤول عن توصيل بضاعة جوياً لمكان ثاني وهناك يصير عطل وتحترك الطيارة وتغرك وهنا يبدي دوره شلون يحاول يبقى على قيد الحياة لحد وصول المساعدات
فلم كلشش حلووو وممتع
الي يحبون هيج نوع من الافلام هذا تحففة حتستمتعون كلشش 🖤