عَن الأمام الصادق عليهِ السَّلام
اذا هلَّ هِلال محَرم نشرت الملائكة قَميص الحُسين عليهِ السَّلام وهوَ مُخضب بِالدّماء فَنراهُ نحن ومَن أحبنا "نراهُ بالبصيرة لا بِالبصر"

يا ترى عَدنا البصيرة اللّي نشوف بيها قَميص الحُسين؟

لا يومَّ كَيومك يا أبا عَبد الله 💔.

- الرساله ؛ هلو مريم اشلونج.

- الرساله ؛ هوه مااعرف غبت فتره عن التلي ورجعت بس اكو تغير بالقناه مو صح

- الرساله ؛ شنو السبب ومنين بده التغير يعني اقصد المحتوى والنشر وهيج

هلا بيـﭻ داده
صح والسبب ماادري بَس اكيد وبلا شك هذي عَناية خَاصة ولطف ورحمه لا مُتناهية مِن الله
مااعرّف شِنو الصار بَس بفَترة كُلشي ﭼـان حواليه يگلي أرجعي واتقربي لله
جديات مااعرّف شِنو صار
ما لگيت روحي الا واني متعطشة بالقُرب لله
ما ﭼـنت احِبّ الكُتب ولگيت نفسي أقرا اي شي يجي كدامي يقربني لله أقراه
حَتّى الشعِر اللي ﭼـنت مخلصة ايّامي أسمعه بطلت اسمعه واضيع وقتي
حَتّى أصدقائي قللت تواجدي بينهُم لان عرّفت بأنو حرامات وقتي يضيع
فيديوهات الشيخ علي المياحي اللي ﭼـانت صفعة
وبعدها الفجر بأحد فجريات رمضَان طلعتلي قصيدة ليالي الجروح ما لگيت عَيوني غَير تنزل شفت مِثل اللّي ﭼـان ضايع ولگه أمه تمنيت بذيـﭻ الليلة ما يغلبني النعاس حَتّى اكدر اعوض كُلشي فاتني واني بعيدة عَن الله والحُسين
بعَدين اخوية هم رجع لله بَس رجوعه قَبلي ﭼـنت اشوفه ومرّة كام يصلي الوتر وباوع عليه گال الأمام الصادق ايگول ليسَ مِن شيعتنا مَن لم يصلي صلاة الليل
بوكتها سكتت وبلعت ريك وصفنت وحسّيت برعشة بجسمي ومِثل اللي انصعق
فتحت تلفوني واني اريد اي شي يخلي ضميري يسكت
رحت شفت بحث لعلي المياحي عَن التوبة
بعَد ما كملتها وعرّفت شِنو لازم اسوي وشلون أتصرف كمت وبليلة ظلمة وتوكلت عَلى الله وفرشت سجادتي وكعَدت اسولف وي محبوبي وبديت بالتوبة
بعَدها قريت كتاب 3 دقائق بالقبر
ماادري بَس هالكتاب غير حالتي 180 درجة
مو نفسها مريم قبل قرأتها لهالكتاب
زاد خشوعي اكثِر وصرت رقيبة عَلى نفسي بِكُل شي اسوي ودائمًا مااسئل نفسي قَبل لا اسوي اي شغَلة
بعدها بديت البداية الحقيقية
بديت احارب نفسي الأمارة بالسوء
بديت اهذب نفسي وأروضها بِمناجاة الأمام السجاد
بديت اقرا قرآن اكثِر
بديت انظم وقتي واحاول اجعل كُل وقتي لله ولاهل البيت
لأن شفت وعرفت حقيقة وحدة بأنو هالدنيا زائلة ورايحة وبأنو عَدنا آله رحيم وحنون وقريب اقرب من الوريد
شفت بأنو كُل النعم والرزق اللي عدنا مايريد مُقابله غَير عَبادته وهوَ ما محتاجنه لكن حَتّى العبادة اللي هوَ منطينياها لأجلنه ولأجل نعيش العيشة اللي تليق بينه بالجنة
عرفت بأنو الدنيا هيّ ممر حَتّى يعبرنا للنعيم
وعرفت بأنو هالدنيا مو دار بقاء وهيّ منتهية شكو احنة لازكين بيها
عرفت بأنو الموت هوَ أحلى ونعمة ﭼـبيرة إلنه لكن احنة محجوب علينه ومافهمناه بالضَبط مِثل الطفل اللي يبجي من يطلع من بطن أمه لان يريد يبقى بذاك الرحم الضيق مايدري بأنو الدنيا هيّ احلى وأوسع مِن الرحم
عرفت بأنو مكاننا وحياتنا مو هنا
وما هذه الحياة الدنيا الا دار بلاء وأبتلاء
والأخرة هيّ الدنيا الحقيقية
من قريت عَن دار الأخرة شفت شگد احنة مخدوعين بالقليل ومتغافلين عَن الكثير
كُلما تعمقت بهالبحر شفت ألطاف الله ونعمه وارزاقه وحسيت بقربه وشفته اهلًا بالعَبادة وشفته أولى بگلبي وبعقلي مِن اي احد
حسّيت لأول مرّة عَين گلبي انفتحت وشافت الخَير
انقهرت واتندمت للـ20 سنة اللي فاتت وداحاول بِكُل ماعندي بأنو اعوض لان فعلًا احنة ظالمين لأنفسنا وغافلين
واني هسّه جاي أعد الزاد لأخرتي
لان اريد اقابل الله بوجهي الأبيض
اني مو كد عتابه ولا كد اتحمل عذابه
ولا كد انو اروحله واني خالية ايديّ
مو كد زعله وحزنه مِني
لا كد انو اطيع الشيطان واجعله ند إله
مو كد بأنو ادخل لكبري واني مامسويتلي اعمال تضيءلي گبري
مو كد ناره ولا كد عذابه وبُعده
اني شفت نعمه وألطافه ورزقه ورحمته بالدنيا
واعرّف هذا جزء صغير من رحمته ورزقه ولُطفه لذلك اني طامعة بالكثير
وبالنهاية الأنسان ما إله سلطة عَلى گلبه ولا يعرّف ليش يحبّ
لذلك اني حَبّيت الله وماادري ليش وشِنو السبب ♥️

الحسين قتيل العبرة..

الذَنوب تقسي الگلب
وتجمد الدموع بِعَينك
واحنة بِشهر الحُسين ونحتاج لكم هائل مِن الدموع تُذرف للأمام الحُسين عليهِ السَّلام وخَاصة بِهذي العَشرة لذلك حَاول وجاهِد بأنو ماتذنب ولو ذنب صغيّر واذكروا الله ههوايّ وانتَ تمشي وانتَ كاعِد وانت واكف وانتَ متمدد وانتَ تشتغل وانتَ رايح لشغَلك وانتِ تنظفين وتطبخين
مسبحتك بأيدك وأبدي سبح، هلل، كبر، صلي، حوقل، استغفر، أحمِّد الله، أشكر الله لتنشغل عَن ذكر الله وأبتعِد عَن الكلام الزايد والفَارغ والما إله داعي وأتكلم بَس بالأشياء اللي ضروري تتكلم بيها
خَلي يومك بَس لله والبُكاء عَلى الحُسين
لتباوع عَلى اي شي ما يخص الحُسين
لتسمع اي شي غَير عَن الحُسين
أبتعد عن البرامج و الأفلام والمُسلسلات والمقاطع الصغيرة بالبرامج حَتّى النـَّاس المايذكرونك بالحُسين هالفترة بطل متابعتهُم وصداقتهُم
خَلي يومك بَس الله والحُسين
بَس هال10 ايّام وبعدها أرجع لطبيعتك اذا تكدر

أخوان أنتوا اتگولون عَادي واذا باوعت عَلى مُسلسل او فَيلم او برنامج عَادي مابيه شي حَرام
لكن ماتعرفون اللقطة القصيرة والساعة والساعتين اللي تكعد بيها تباوعلك مُسلسل شگد تأثر معنويًا وهالشي جربته
كُلشي يأثر
يعني حَتّى الأكل مِن تأكل شي وهوَ بيه اشكال شرعي بسيط لكن انتَ ماتدري ولا تعرّف بهالشي هوَ انتَ ماعَليك حَرام ولا عَليك أشكال شرعي لكن هذا يأثر عَليك معنويًا
نفسك وروحك تتلوث وتنضر وتترتب آثار عَلى هالشي

وحَتّى اذا أتگول اني أذنبت سهوًا ولكن رجعت أستغفرت وتندمت وطلبت مِن الله التوبة
مُمكِن الله يغفرلك لأن غَفور
ذنبك يُمحى لكِن آثار الذنب ما تُمحى
معنويًا انتَ تنضر
لذلك أنتبهوا وراقبوا أنفسكُم هذي الايّام

- الرساله ؛ مرايم والله انه من تابعتج وصرت مثلج وابتعدت عن كلشي يغضب الله وصاحب الزمان
بس الغيبة ما بطلتها بس قللت ما احجي هواي
والله يجبروني احجي عليهم ومرات مو انه احچي يحچون يمي ف هنا الذنب يصير مضاعف شسوي

الحَمد لله يا رَبّ يثبتـﭻ يا داده ويقربـﭻ لله أكثر وتوصلين لرضاه
حَاولي من أحد يحجي ياما تغيرين المَوضوع
ياما تكومين
والشخص والجمعات اللي تعرّفين حَتصير بيها غَيبة لتكعدين بيها
أبتعدي شكد ماتكدرين
اللي يگلـﭻ مُعقدة واللي يگلـﭻ ها صايرة مُتدينة عوفيهُم لتسمعيلهُم ولتخلين يأثرون عليـﭻ
لان الله كُلشي مُمكِن يغفر الا الغَيبة لان هذي حقوق النـَّاس والله عادل وحسابه شديد ودقيق جدًا بِحقوق النـَّاس
لذلك دائمًا حاولي تبتعدين شگد ماتكدرين

بِالبرزخ مِن تجين تباوعين لصحيفة اعمالـﭻ وتشوفين بيها كم عمل زَين يبيض وجهـﭻ لكِن شوية كُل هالأعمال تُمحى وتروح
زَين ليش؟
لأن اخذتي غَيبة فُلان
وهذولي اعمالـﭻ كُلهُم راحوا إله
مُستعدين لهالشي احنة؟ 💔

كثري من الصلاة عَلى الرسول لأنها تتُهدم الذنوب عَسى ولعل تسقط وياهن ذنوب الغيبة اللي ناخذها كُل يوم واحنةة ماندري

وهذي هم بِكُل فريضة گوليها

وحاولي وجاهدي وحاربي نفسـﭻ الأمارة بالسوء

- الرساله ؛ مرايم ما جاي اگعد لصلاة الفجر فد اضوج من ما اگعد
المنبه ما اسمعة انوب