ማኅበረ ቅዱሳን በተለያዩ 7 ቋንቋዎች የተዘጋጁ 261 መዝሙራትን ብጹዓን ሊቃነ ጳጳሳት ጥሪ የተደረገላቸው እንግዶችና ምእመናን በተገኙበት የካቲት 24/2016 ዓ.ም አስመረቀ።

የተመረቁት መዝሙራት አጠቃላይ 261 ሲሆኑ በዝርዝርም በኮንሶኛ 51፣ በአሊኛ 51፣ በሲዳምኛ 22፣ በደራሺኛ 52፣ በጋሞኛ 45፣ በአማርኛ 21 እና በእንግሊዘኛ 19 መዝሙራት ናቸው፡፡

መዝሙራቱ በብጹዕ አቡነ ቀውስጦስ የሰላሌ ሀገረ ስብከት ሊቀ ጳጳስ እና በብጹዕ አቡነ ኤልያስ የጋሞ ጎፋ ሀገረ ስብከት ሊቀ ጳጳስ ቡራኬ የተመረቁ ሲሆን ሊቃነ ጳጳሳቱ  አገልግሎቱ ብዙ ሥራ ስለሚጠይቅ ተጠናክሮ እንዲቀጥልም አባታዊ መልእክት አስተላልፈዋል፡፡

የማኅበረ ቅዱሳን ሰብሳቢ ቀሲስ ዶ/ር ሙሉጌታ ሥዩምም ማኅበረ ቅዱሳን በተለያዩ ቋንቋዎች የመዝሙር አገልግሎትን ከዚህ በፊትም መሥራቱንና ተደራሽ ማድረጉን በመግለጽ ወደፊትም ምእመናን በሚሰሟቸው ቋንቋዎች የቤተክርስቲያንን ድምፅ የበለጠ ለማዳረስ አገልግሎቱ የበለጠ ትኩረት ተሰጥቶት እንደሚጠናከር ገልጸዋል፡፡

በመርሐ ግብሩ ላይ ስለ ኦርቶዶክሳዊ መዝሙር ሥርዓትና ድንበር በሊቀ ሊቃውንት ሥሙር አላምረው ትምህርተ ወንጌል የተሰጠ ሲሆን፣ ስለ ቋንቋ መዝሙራት አገልግሎት አስፈላጊነትና ሚና ደግሞ በመምህር ሕሊና በለጠ ዳሰሳና ገለጻ ቀርቧል በተለያዩ ቋንቋዎችም በማኅበሩ ዘማርያን መዝሙራት ቀርበዋል፡፡

በመጨረሻም በተለያዩ ቋንቋዎች የሚፈጸም የመዝሙራት አገልግሎት በቀላሉ ስብከተ ወንጌልንና ዕቅበተ እምነትን ለማስፋትና ለማጠናከር ሚናው ከፍተኛ በመሆኑና ወጭውም ከባድ በመሆኑ ወደፊት በማኅበረ ቅዱሳን ለሚፈጸሙት አጠቃላይ 52 በላይ የተለያዩ ቋንቋዎች መዝሙራት ዝግጅት ፕሮጀክት ምእመናን ተገቢውን ድጋፍ  እንዲያደርጉ በማኅበረ ቅዱሳን መዝሙርና ኪነጥበባት አገልግሎት ማስተባበሪያ ጥሪ ተላልፏል፡፡