منك يبتدي الموسم الكله فياي
ومنك يعثر التاريخ بالدنيا
ويخضر دمك بكل نهر فوك الماي
من الرازقي الذابل على شفافك عرفنه نغازل الدنيا
ونحب ونموت اذا مات الضوه بدخان
من يا شمس فاض اسمك وبلل مستحة النهران؟
من يا عطش بديت الضمه وفزت مساماتك
نبع، يروي العطش ويزود للورده الوره الخيمه
يا ترتيلة العشاك اليرسمون طيف الماي
صلتلك سواجي الكون
من كل ساجية تاريخ غركان بعطش شفتك
من كل فضه الك لونين
غبشة من العشك وي دورة عيونك تطك ع الكاع
الك من التَرف قرآن غازل كل حرير الله
الك موقف يحَني بيوت ديرتنه
موقف يشتل حروف العشك شامة على ايامي
طاح الماي من جفك وما فهموك
وخيالك روه الدنيا وتگسر ع النهر ضامي
مافهموا الياس الما رويته انته غريب بلايه عطره يموت
امسحك من قصايدهم من ارد اقراك
اسجدلك واغنيلك واكلك كل اليحبوك مو مثلي
يقرونك غضب وسيوف..
وانه اقراك طيرة تباوس النجمة وتطوف الكاع
انه اقراك فَي بارد يغازل ورگة النعاع
گمر ولوحدي ع الشرفه اباوعلك
احب تحله على عيوني
احب لمعة ضواك تبان بدموعي وأباهل بالنده ويخجل
وارسمك فوك جرفين العطش روجات
الم سهامهم منك ويضحكلي ربيعك ماي
والمح كل حمام الدنيا فوك جفوفك يصلن
وفراشات بعباتك نايمة مأمنه
وماي من الورد شلال بزلوفك
اشطب كل حوافرهم واكتبك عشك ع المحراب
اتصوف واعزفلك جمالك والخيم تسجد
واجي من بين سيف وسيف حاضن شوك اليعطشوك
اوصلك وتضحكلي سماواتك
اتبده على فيايك
واكلك كل سلام الله غفه برموش اليحبوك

حسين جبار

تدني السيف يم نحرك...
ترسم موتتك قبلة وتصلي بكيف ذباحك

حسين جبار

من تعطش لأغانيك
بيا رجفة وتر منهن تودع الصوت؟

حسين جبار

خيالك سرح من خوفك بلا خياله...

حسين جبار

حبيبي، وموتي ما جاسك؟
ما جابتلك نجومي حزن من ضي البروحي؟
ما فاض بكذلتك لون من غربة اصابيعي؟
ما غنيت لايامي؟
حبيبي وهم خذاك الشوك طيف لصحوة احلامي؟
حبيبي اليوم اريد ابچيك حدما تعطش عيوني
واجيك من الدمع ضامي..
اليوم شما خذاني الليل لايامك افزز كل سكر بيه
شما غنه الخمر بالراس اخط اسمك
اليوم شما تغازل غربة شموعي
ضواهن ترجف يرسمك
واشبگك والخفك يكبر...
واضم نحرك من شفافي واكلك لا تعطلني
لا تبچي وتصحيني، اريد اسكر
اريد جفوفك الحلوه تضيع بكذلتي نهران
واتبلل واغازلها لحدما تضحك وتنغر

حسين جبار

يا حبيبة وهَدة ايدج من قميصي،
ظل نجم يلمض وداع على النعش...

حسين جبار

واضم نحرك من شفافي واكلك لا تعطلني...
لا تبچي وتصحيني، اريد اسكر

حسين جبار

جنت من تتعب تسير فوك دجلة خيال بارد
يدفه بيك الماي وتسولفله تعبك
جنت تكعد ع الجرف ودموعك تكبر النجمة...
لحد ما تنزل تشربك
جنت من تجزي عله دجلة
باقي نهران الولاية تموت جي ماتقره گلبك
هسه دجلة استاحشتك...!!!
صارت ابرد من خيالك!
موت يمها ولا تخليها تعرفك
موت بيها ولا تكلها انت الجنت تشبك جرفها
لا تكلها انت التغار بحزن روحك لون جف غيرك غرفها
لا تكلها، خاف ينشاف الغضب رجفة بكصبها
ويلتون جرفينها وينشف الطين
وتبقه مستاحش لوحدك غاد منها
ولك يل عينك محط لكل فراشة
حتى شامات التحبها استاحشنك!
ذبلن عيونك الجان الرازقي يطگ ضحك يمهن
ماتت الضحكة البروحك
موت، لا تنتظر دجلة تغني حزنك...
موت، لا تنتظر شامات الحبيبـة...
غمض عيونك ونَشف ماي دجلة وموت ذابل
هاي الك جرفين وانته بلا نوارس
ولك يا ثالث جرف موت بغربتك
ولك يا دمع القصايد...
موت وي الروج كطرة ولا اتاني الروج اليفزز صفنتك

حسين جبار

Check out حسين جبار || Hussein Jabbar on #SoundCloud
https://on.soundcloud.com/JatBK

حنينه البيارغ بالوداع الحار
عسى بآخر غواش العين جدحة من الضوه نشوفك
وزفيناك للمهره بخفك رايات
هواهن نَشف الماي العلى زلوفك

حسين جبار

امسحك من قصايدهم من ارد اقراك..
اسجدلك واغنيلك،
وأكلك كل اليحبوك مو مثلي
يقرونك غضب وسيوف
واني أقراك طيرة تباوس النجمة وتطوف الكاع
اني اقراك في بارد يغازل ورگة النعناع

حسين جبار

خيال النخل بالظلمة
يرسم ع الورد كل خوف بالبستان...

حسين جبار

آنه دنيت الشموس بصف كذلتك
من شفتهم ما قرو لمعة شكارك...

برجفة آخر نبضة بيه انشاف گلبي
سيف بكرابة ارتعش...

حسين جبار