اصحه واشطب كل ضياع بروحك وحِل الكصيبة
اصحه وارسم نقشة الطوك على حلمك...
دني كلبك للنجوم وغازل النجمه التلوحك
عاشك وكل گلب بالديره يحبك،
لجن ما تعرف تحب بكيف روحك...

حسين جبار

كل محراب ما باجي لصلاتك ما اصليله،
صلاتك شامة المحراب...

حسين جبار

وأفرش الكذله عله صَدري وترتوي ولاية ضلوعي...

حسين جبار

وبعد ذاك التعب والدم
لكيتك نايم بجفي!!!!
ندهتك، كتلك سنيني كضن بدوارتك ياخوف
ضحكت مغمض عيونك...
رمش تمثالك بعيني وعبدتك خوف
بچيت مغمض عيونك...
وشفت ناسك مشت عكس الدرب حفاي
ضنهم أنت رب الخوف

حسين جبار

حمامة تفرفح بحضني من احضنك وانت مو يمي
حمامة من المسافة البينك وبيني
تبوس الشمس وتسافر تدور عن اسامينه
يرف جناحها بلا راي
تطوف على البساتين وتبات بكل غصن ليلة
لحد ما توصلك وتموت!
من تركد على سوارك،
تنفض ريشها وتبجي وغريبة على التواريخ القديمة تموت....
ترجف بين اصابيعك
تبجيك وتبجيها
وتكلك يا كسر جنحي،
الشمس ودتني الك صوغة نذرها الضي
يذوب الفي على جناحي والمه وارسم عيونك يتالي الفي


حسين جبار

جنت من تتعب تسير فوك دجلة خيال بارد
يدفه بيك الماي وتسولفله تعبك
جنت تكعد ع الجرف ودموعك تگبر النجمة...
لحد ما تنزل تشربك

حسين جبار

امس نَدت عين التحبها على شوفك
واجت تخفك من تقاليد النزف والثار طيره
حطت بجفك غريبة...
وعن بياض اسمك حچتلك
امس كسروا طوك الحبيبة وبچتلك

حسين جبار

اخزر كل نده يسير على الورگة بدمع عيني...
ألمن بالضوه الباهت بطرف الباب،
وألون لوحة سنيني

حسين جبار

تعب البگلبي يسرّجه الموت نافورة خَدر...!

حسين جبار

تضحك
محد يشوفك شمس تخطف غفل ع الكاس...

حسين جبار

شما بچيت تهيم نجمه بجرف صدري
وتلمض وتغرك بدمي ...

حسين جبار

خوفي من كل الشبابيج
التسدها الريح سنطه بلايه صوت
خوفي لا أعثر واعيش
وينچفي الكافور بيدي وما اموت!

حسين جبار

أجي من بين سيف وسيف
حاضن شوگ اليعطشوك...

حسين جبار

لوحدي بلا قبلة اغني،
وخط الدموع النشف يشطب بوجهي!

حسين جبار

مالحگت ازعلنك وأرد ارضيك
ولا لحگت ألم ذكراك حتى ارثيك
حچايات التعب للآخ، بيها اسمك
يالترابك  أصابع خوف
ترسملي تجاعيدي على خيالي ودمه ترسمك
وبده يكبر فراغ الناس بسنيني
وذكرتك ضويه  بولاية شمسها مزاعله النفنوف
وابات بضلمة خيالي
واشوفك شيب يلمض خوف
يتگسر دمه بخفكة شراييني من اذكرنك!
يسورة موت وارجف من ارتلها
انه ما عاثر بنعشك شلون ارثيك؟
واكول ارثيك
وانت الما مأذن باذني بيش ارثيك!؟
بيش ارثيك
يا شاعر كتب حزني كبل لا يلمح خيالي
يمسودات تعبي الخايف اقراها
بيا ذكرى الم الحزن وابجيلك؟
يـ اول ميت بروحي
قصايد للتعب ضميت يم راسك تناغيلك


حسين جبار