خطاب السيدة زينب لامير المؤمنين (عليه السلام )عند لحظات استشهاده  (وزن عگيلي )

ارحم گلبي ودمعة عيني 
يابويه ادخيلك حاچيني
ارحم گلبي ودمعة عيني
★★★★★
يم وجهك هلن دمعاتي وي ناري ونارك چوّني
زادن لچماتك يلغالي   ناديتك كونك تسمعني
ناوي الفرگه تعذب روحي علفرگه اتريد اتعودني
جرح الزهره بعده اگبالي بويه دخيلك   لاتجرحني

لاتجرحني    بويه ادخيلك   
من بعد امي  چنت اشكيلك
وتزيل همومي من احچيلك
ياجنه ابنار مخليني    
يابويه ادخيلك حاچيني
★★★★★
تدري بكسر ضلوع الزهره  ساعه المرت اصعب ساعه
بفراگك رايد تفجعني  يانور الموسهل اوداعه
ايمرد گلبي تدري غيابك  وللهم روحي برهن الطاعه
لاتفجع زينب يلغالي  يابوالغيره الحلوه اطباعه

من محنة روحي المهمومه
وجروح گليبي الملچومه
الدنيا الصارت مثل الحومه
من بلوة البلوة اتوديني       
يابويه ادخيلك حاچيني
★★★★★
مفجوع العالم بغيابك  وافلاك الكون المفتره
بگد العالم روحك بويه  شوالم راسك وي الطبره       
يلگبل الدنيا ومابيها  والله فراگك نار وحسره
بنيران الروح  بلاشوفك  ما احمل نار المتوجره

مكسورة خاطر متكدره 
رايد ترحل بعد الزهره
بويه بعينك اخر نظره   
بيانار اتريد اطفيني    
يابويه ادخيلك حاچيني
★★★★★
بجالك ماهميت بدنيا  ولاكثرة همي واحزاني
ريحة جدي وامي الزهره  ياراحة گلبي اوجداني
ينعاك الدين واركانه   فراگك هدم بويه اركاني
شلون الموت ايمر بدربك  وتروح بدربه وتنساني

يافرحة گلبي المطويه
بعدك يلكلك حنيه
هاي الدنيا   اسوت بيه
تفرح من يوم اتبچيني   
يابويه ادخيلك حاچيني
★★★★★
علدار ايتامك ملتمه  لاتكسرها گلوب احبابك
كلها اظن مارايح عنهم  ساجد وتصلي بمحرابك
ماظنوا موت اليدنالك  يبعد  مايوصل يم بابك
يلي مناطر هاي الساعه  تفوز بيوم اتشوف اصوابك

شظمت هاي الدنيا بدربي
بعد احبابي وسلوة  كلبي
اسويت بهلدنيا شذنبي
باچر يابلوه اتراويني.
يابويه ادخيلك حاچيني

الشاعر حسن لعيبي الحريشاوي

لاستشهاد أمير المؤمنين علي بن ابي طالب عليه السلام

ألف بعد الألف  لورايد دليل
علي خير الناس حَمَّاي الدخيل
كل تعاليم السمه   تگول حَمَّاي الحمه
علي خير الناس حماي الدخيل
★★★★★
قَدَّمُوا مَا أخَّرَه رب الكرم
كل ضعيف الراي ماعنده قِيَمْ
الينهب أموال اليتامه ابلارحم
والأحق بالامر من حقه انحرم
ومادروها الموزمه   تگول حَمَّاي الحمه
علي خير الناس حماي الدخيل
★★★★★
عن مناقب حيدر الهادي ذكر
گال لواقلام يندار الشجر
ولوحبرللخط صفه ماي البحر
عِجَزْ لَوْ كتَّابْها  جن وبشر
كل فضيله ومكرمه  تگول حَمَّاي الحمه
علي خير الناس حماي الدخيل
★★★★★
استغنى عن الكل عظيم المنزله
لچن هاي الناس محتاجه إله
كل علم بالكون حيدر أوله
ماعجز عن كل جواب ومسئله
وياما چانت فاطمه  تگول حَمَّاي الحمه
علي خير الناس حماي الدخيل
★★★★★
يامذل اهل الكفر  طول الوكت
يلي عنوان البطوله انت صرت
مثل ماراد النبي الهادي ردت
عنه مالحظه غبت وتأخرت
كل بطوله وملحمه   تگول حَمَّاي الحمه
علي خير الناس حماي الدخيل
★★★★★
يااسد مقدام مكي وأبطحي
اطحنت ايام الجهل طحن الرحي
ليث وأمجادك أزل ماتنمحي
وجوه صلفه غدرتك ماتستحي
والمصادر حاكمه  تگول حَمَّاي الحمه
علي خير الناس حماي الدخيل

الشاعر حسن لعيبي الحريشاوي

*بشان الامام علي*
*عليه السلام*

🚩🚩🚩

*جبريل نادى واعلياه*
*جبريل نادى واعلياه*
_
دين الاله اتهدم اليوم
لملاك ضجت بحر العلوم
علي انضرب السيف مسموم
*سابح ابدمه الدعي خلاه*
__
ناحت عليه كل السموات
من غمض اعيونه علي مات
اشلون گبره ضمه وبات
*وسط اللحد الگلب ناداه*
_
بليلة قدر مفقود ابوحسين
الدار وحشه تبچيله العين
حتى اليتامه زادت اونين
*راح الكفيل الصعب فرگاه*
__
والله هظيمه داحي الباب
غاب الگمر ابوسط التراب
جن وانس تنعه هالمصاب
*ظلمه الدنيا بعد عيناه*
__
عالم العلوي ويا الجنان
علنو حداد لصاحب الشان
والانبياء لجله بالاحزان
*والفلك يصرخ واعلياه*



*عاشقة الولايه*
*نسالكم الدعاء*

بهذا الطور

https://youtu.be/5WWZlKyFI6k?feature=shared

لاستشهاد أمير المؤمنين علي عليه السلام (وزن تجليبه )

ماتُبطَل  نيراني التسعر 
من عظم مصابك ياحيدر
★★★★★
ألف آه بدليلي تفور لمصابك
بگد نوح العباده ونوح محرابك
بگد حزن اليتامه الوگفت ابابك
بگد وحشه الدار التبچي بغيابك

بگلبي جروح الماتتفسر
من عظم مصابك ياحيدر
★★★★★
لِلَّوعات بيده الحزن  وَدَّاني
ومكسور الگلب مهموم خلاني
جرح چتال واحد يلچم الثاني
مصابك مايفارگ يوم وجداني

گلبي من اللَّوعات اتفطر
من عظم مصابك ياحيدر
★★★★★
لوينحب دليلي وناح وأَتعَذَّب
فلا مثل الحسن وحسين من ينحب
ومثل نيران من عيني الدمع لوصب
گطره مايعادل من دمع زينب

لون الدنيا بعيني أتَغَيَّر
من عظم مصابك ياحيدر
★★★★★
مثل هذا المصاب بيوم مامرها
تنوح ام البنين ويهل ناظرها
سندها وراح ضل مكسور خاطرها
على فراگك حزينه من يصبرها

وهذا الكون ابكبره  اتحَيَّر
من عظم مصابك ياحيدر
★★★★★
ايام الشمل ماترد شيردها
زينب هلمدامع تحفر ابخدها
لمن رحل عن العين والدها
رِحْلَت أمها معناها ورحل جدها

بالدار اتگوم وتتعَثَّر
من عظم مصابك ياحيدر

الشاعر حسن لعيبي الحريشاوي

لاستشهاد أمير المؤمنين
علي عليه السلام

مومثل كل السنين.  اه ياعام اربعين
طاح حماي الحميه  ابطبرة الشر الخفيه
           اه ياعام اربعين
★★★★★
هذا ياراس انطبر    اليوم سالت يادمه
جناح جبريل انكسر   تمايلت بيه السمه
اتزلزلت أرض البريه  الدنياصارت مظلمه
ضجت املاك المعالي حايره ومتزاحمه

الكون بالظلمه انمله   الدين طاح باكمله  
              اه ياعام اربعين
★★★★★
يازمن گول شجرالك   أتهدم اركان الهدى
تنهي خير الدنيا رايد   وخيرها توه بده
وصرت ياعام المصايب  سيف وي سيف العده
وعاش مظلوم المماته.  ياعلي من مولده

خذت ماتدري شخذيت.  عام ياظالم اجيت
                 اه ياعام اربعين
★★★★★
ريت تقويمك الهجري  انشلت منه وما اجيت
انطيتنه انواع الماسي وكل شي من عدنه خذيت
السمه وافلاك تبچي    يلي مانحت وبجيت
زهره الدين وجماله  يلخذت منه ومشيت

اجروح وي مر الزمن    انكتبن وماينمحن
               اه ياعام  اربعين
★★★★★
شلون ياعام النوايب   من صرت وتكونت
بشهر رمضان فجعتنه   بهلخيانه اتعجلت
طاح تاج الدين سيفك.   مهجة الحق صوبت
ماگلت ظلت يتامه    لاگلت  وتعذرت

النوره نور من العرش  انشال ياحيف بنعش
                   اه ياعام اربعين

*
ليش  ياعام المنايا    امحظر اسيوف الخطر
مارحمت الكله رحمه   بليلة التاسع عشر
تعمدت تاخذ ولينه.     اه يابعد السفر
بالدمه تخضب جبينه.  براسه ابوحسين انطبر

النذر للخير روحه.        طعنة الغادر تلوحه
                   اه ياعام اربعين

الشاعر حسن لعيبي الحريشاوي

بمناسبة استشهاد أمير المؤمنين
علي عليه السلام  ( گعده)

هاي روحك ياعلي  اكبر من الموت
شلون ملك الموت اجاها ؟
هاي ياروح     الخذاها  ؟
بيها اسرار الامامه   وللشرف صوت
هاي روحك ياعلي  اكبر من الموت
★★★★★
الباري روحك ياولينه  شكثر حط اسرار بيها
حامل انفاس النبوه  بفيض روحك مشتريها
لكل نبي انته الخلاصه  ماكو غيرك يحتويها
يلماشبيه ايتم اله
فوگ الموازين اعتله
لمن وصل هلمنزله    ماوصل مخلوق ليها

وين مادار ومشه الحق داير وياه
الموت يتخطه وراها
هاي ياروح الخذاها
بيها اسرار الامامه   وللشرف صوت
هاي روحك ياعلي  اكبر من الموت
★★★★★
احتارت الايام تكتب مختصرها يطول عدها
طالت الحسبه عليها   احتارت بياچلمه ردها
لايحدك وصف ذاكر    عاجز أوصافك يعدها
وإلي كتب عنك حرف
عاجز يگول و يعترف
يامن تظل فوگ الوصف  اوصاف فوگ الوصف حدها

روحك شگد من جرح للغير تنساه
أشمعنه موتك مانساها  ؟
هاي ياروح الخذاها  ؟
بيها اسرار الامامه   وللشرف صوت
هاي روحك ياعلي  اكبر من الموت
★★★★★
ضيعاك المايثمنك   وعطل الدين وحدوده
المايميز الحجر والدر   يتبع ابليس وجنوده
الخاض وي اهل الضلاله  وماعرف معنى وجوده
يابوالحسن وصفك صعب
آلاف ومقصره الكتب
امحير العدو گبل المحب   ماوصل معناك زوده

وينه من يعرف علي ويبحر بمعناه ؟
روحك الموت اعتناها
هاي ياروح الخذاها  ؟
بيها اسرار الامامه   وللشرف صوت
هاي روحك ياعلي  اكبر من الموت
★★★★★
علي برهان وعباده  وعالم السنه الشريفه
ومهبط الحق وجماله  وقوة الناس الضعيفه
الانطه للايتام عمره  القاسم الفقره ابرغيفه
رمز الشهامه والعدل
كلشي بوجوده يكتمل
صابر يظل گلبك يظل   من ظلم  يوم السقيفه

الموت يخجل من علي يوم التدناه
يدري من مر ودناها
هاي ياروح الخذاها
بيها اسرار الامامه   وللشرف صوت
هاي روحك ياعلي  اكبر من الموت
★★★★★
شنهي يابوالحسن روحك.  يجهل المخلوق سرها
خصك الله شگد مزايا. رحل محتار اليمرها
بكل شديده الحق يتبعك ماعبرت إلا وعبرها
ذاتك يقران الفجر
مصدر رسالات وفكر
ياحيف  طبرات الغدر   هامتك كافر. طبرها

الهدى اركانه اتهدمت من طاح ويلاه
لفه الموت وماجزاها. هاي ياروح الخذاها
بيها اسرار الامامه.  وللشرف صوت
هاي روحك ياعلي اكبر من الموت

الشاعرحسن لعيبي الحريشاوي

اشرب الماء وعجل. لاستشهاد أمير المؤمنين علي عليه السلام (وزن هجري)

أشرب الماء وعجل.  يا أمير المؤمنين
گبل لاسيف الضلاله.  بالدمه يخضب الجبين
★★★★★
أشرب الماء وعجل.  گبل ساعات المصاب
يادليل الحاير أنته.     وعلم آيات الكتاب
مايطيب العيش بعدك.   لايلذ زاد وشراب
أحبابك اليوم بمناحه  بين حسرات أوونين
اشرب الماء وعجل   ياأمير المؤمنين
★★★★★
أشرب الماء وعجل.  يانصير الكل ضعيف
يامنار العلم كله.  ونور الاسلام. الحنيف
گبل لاسيف المرادي. يطبر الراس الشريف
والنهار يصير مظلم.  والوكت بعدك  حزين
أشرب الماء وعجل. يا أمير المؤمنين
★★★★★
أشرب الماء وعجل.  ياوصي الهادي الصبور
تدري آخر فجر هذا.    عندك. وآخر سحور
ارتوي من الماي لنها .  النايبه يمك تدور
واخر اصيامك يحيدر.  تشرب الماي المعين
أشرب الماء وعجل.  ياامير المؤمنين
★★★★★
أشرب الماء وعجل.  ياصراط البيه  نجوز
انته ياعون اليتامه  بدولتك مامرها عوز
هاي ليله البيها طه واعدك. حتما تفوز
وبَشَرَّك تدخل الجنة  وناده  جبريل الامين
اشرب الماء وعجل.  ياأمير المؤمنين
★★★★★
أشرب الماء وعجل. ياعلي حل القضاء
انتهز فرصه ولگاها اليوم اشقى الاشقياء
انهدمت اركان الهدايه. انفجعت املاك السماء
الكون لجلك صار مظلم   ياامام المتقين
اشرب الماء وعجل.   ياامير المؤمنين

الشاعر حسن لعيبي الحريشاوي

قصيدة ( گعده ) لاستشهاد أمير
المؤمنين علي عليه السلام

علهام صارت طبرتك  ياروح الاسلام
اليوم ياحامي الحميه
ساعة افراگ ومنيه
علهام صارت  طبرتك ياروح الإسلام
★★★★★
منظر الدنيا تغير   وليلها خيم ظلامه
وخسرت أحبابك وجودك  المن توجه الملامه
طبرتك للفوز خطوه. الهادي گال أكبر علامه
گال النبي من جبهتك
الدم يخضب لحيتك
والفوز آخر رحلتك.    جنه محسومه وكرامه

چفك يحماي الحمه.  . هدم الاصنام
صعبه مرت هلمسيه
ساعة افراگ ومنيه
علهام صارت طبرتك ياروح. الإسلام
★★★★★
سيرتك رغماً عليهم. فخر ياحامي الحميه
گالوا الرابع ونسبوا     للاعادي الأفضلية
فضلوه بيش وعليمن  اشقدم الهاي الرعية
وبالحرب انته الزلزله
وعندك علم كل مسئلة
وبسمك حديث المنزله.  وفضلك رب البريه

وي الدهر اسمك جره   ابشريان الايام
أجن ليك شلون جيه
ساعة افراگ ومنيه
علهام صارت طبرتك ياروح الإسلام
★★★★★
صواب زينب لوتنظره  صوابها يشبه اصوابك
صفت بغيابك عليله.  شلون تتحمل غيابك
عافك الموت وگصدها. اتمنته من وصل بابك
ايساعدها الله ام الحزن
ياساعه مرت. ماتون
وبهذا ماچانت تظن.   ابطيحتك تفجع أحبابك

من ياجرح تغفه وتهيد الليل وتنام
درت من بعد الزچيه
ساعة افراگ ومنيه
علهام صارت طبرتك ياروح الإسلام
★★★★★
لاحت ارماح الموادع. لفت صوب المحب خطره
شچت اكلوب ومحاجر والحسن جمرته ابصدره
يودع المختار چنه.      حسين. ويودع الزهره
تزيد المواجع فرگتك
وچانت ضواهم شوفتك
علدين صعبه طبرتك.      المامثلها أبد طبره

عام الفجيعة والحزن  ياشر الأعوام
ويوم وصيت بوصية
ساعة افراگ ومنيه
علهام صارت طبرتك ياروح الإسلام
★★★★★
بفگدك العروة الوثقى. انفل يبو الحمله ركنها
وگفت الدنيا حزينه.     چن وگف بيها زمنها
اختلت الگاع باهلها.    وزلزل الدنيا  حزنها
هام القيم كلها انشطر
براسه علي يوم انطبر
ماكمل ايام الشهر   كل عين من غمض جفنها

وشلون ياخير على هاي الناس مادام
تعوفها دارك خليه
ساعة افراگ ومنيه
علهام صارت طبرتك ياروح الإسلام

الشاعر حسن لعيبي الحريشاوي

لاستشهاد أمير المؤمنين علي عليه السلام       موشح

اليوم  ياشيعه وداع المرتضى
                  بسيف المرادي آسف نحبه كضه
★★★★★
ياهو بالاسلام مثلك وثبته       
يادليل احتاج. أكثر وثبته
دگ اساس الدين انته وثبته   
ليش شخصك بالغدر منهم حظه
★★★★★
يامصيبه علينه صارت نازله 
جمر خلتها المدامع.  نازله. 
ياعلي المايوم واحد نازله    
من الظهر صابته الناس المبغضه
★★★★★
وحده حيدر بعد طاها  منصفه    
الحاكم بحكم المصالح  منصفه
ياهو شايل مثل حيدر من صفه   
تشهد بفضله المعالي. والفضه
★★★★★
ها   مته يصفون وياه هامته  
الما أبد  فديوم   تضعف.  هامته
بالغدر مطبوره صارت هامته  
ماشفت مطبور ينطي. موعظه
★★★★★
احبابه جمرات المدامع هلته     
تراب گبر الوصي لمن هلته
طبروا القران  طبروا هل اتى  
بوجه الابيض راح للباري ومضه
★★★★★
للنبي بكل راي  حيدر عادله. 
ومثل روح النبي روحه.  عادله
مايهم من حاربه ومن. عادله
ومايهم من رضا عليه ومارضا

الشاعر حسن لعيبي الحريشاوي

لا لا يموت. لاستشهاد أمير المؤمنين علي عليه السلام على طور ملا محمد الجنامي ( لاتروح )

لا لايموت.  گلوب الاحبه أميتمه
لا لايموت.  يلي خذت حامي الحمه

★★★★★
روح ترفه بكل وكت. والحنان انفاسها
اتفيض علوادم رحم. دوم هذا إحساسها
مدوا اچفوف الغدر.   يوم گطعوا. ياسها
الصحبه مو يمهم أبد.  ذوله لا. موناسها

گلب الحنان   شنهي الذنب تالي انكسر
گلب الحنان. وطبع الوفه ليش. انغدر
صروح المعالي امهدمه.  لا. لا يموت

★★★★★
الطيب وگلبه سهل   اشعجب صعبه أيامه
المهل ياموت المهل. . خل يكمل اصيامه
كلها محتاجه إله.     تشم عبير. انسامه
اليوم مختنگه اجت. بهظم تبچي ايتامه

ايتامك تصيح      لامو وكتها. يلطحت
ايتامك تصيح.    المن وجهنه. يلرحت
والدنيا صارت مظلمه. لا لايموت

★★★★★
هذا حال ام الحزن.    ماتزول آلامها
بعد نور المرتضى. صفت سود ايامها
الحارب افعال الشرك. والمهدم اصنامها
والمنايا ابلارحم.    ماتفوته اسهامها

زينب تنوح.  وداع الأبو كلش صعب
زينب تنوح.  وماتنطفي نار الگلب
راس الأبو. ينزف دمه. لا لا يموت

★★★★★
بأهل الاحسان ابغدر. الدنيا هذا احسانها
لملمت غيض وحقد.  وحزمت. شيطانها
هامة الحق تنطبر.   همها. چان وشانها
تنوح زينب. علجره. وماتزول. احزانها

تهمل العين. تنادي صدگ بويه رحت
تهمل العين.  واعزاز ماخله الوكت
اتمهل. عليك ابفاطمه.  لا لايموت

★★★★★
آه   يادار الاهل.     وحشه. هاي اعتابها
ودوم مفجوعه تضل.   من تروح احبابها
اشحال الحسين وحسن. شگد بچوا يم بابها
الفرگه ابد ماتنحمل.  وحيل مره أسبابها

گلب الحسين.    نيرانه حيل اتوجرن
گلب الحسين.  اتگطَّع مثل گلب الحسن
اعليهم بچت ارض وسمه. لا. لا يموت

الشاعر حسن لعيبي الحريشاوي

لاستشهاد أمير المؤمنين على طور علي راح  للملا محمد بوجباره

علي انصاب. ينادي أحسين يازينب علي انصاب
علي انصاب  بسيف النايبه اتصوب علي انصاب
على اللچمات يغفه.  انصاب الگمر وسفه
            علي انصاب

★★★★★
ينادي حسين يازينب ينادي
ببونه الموت صار اليوم حادي
عطر امنه وحنان النبي الهادي
انطبر رأسه بفعل سيف المرادي
علي انصاب. شعظم هذا الجراله  وهذا المصاب
علي انصاب اله ينوح الزمان . وتبچي الاصحاب
حنين وروحه ترفة.   انصاب الگمر وسفه
             علي انصاب

★★★★★
تعالي وشاركيني ابهلمصيبه
ونواسي الحسن ودموعه ونحيبه
من جرح الابو ايس طبيبه
يزينب دنيا ماترحم عجيبه
علي انصاب يجرح المايهود. جرح ماطاب
علي انصاب نار الدمع من العين  سچاب
بعد يانار تطفه.    انصاب الگمر وسفه
             علي انصاب

★★★★★

ينادي حسين يازينب ونيني
ايزيد بلوعتي وي دمع عيني
يموتني على الغايب حنيني
على جمر المصايب عاونيني
علي انصاب  رحل حامي الحميه وداحي الباب
علي انصاب  گلبي من الفجيعة والهظم. ذاب
يحالي شلون اوصفه.  انصاب الگمر وسفه
                  علي انصاب

★★★★★
صارت شوفته علينه بعيده
الماكمل اصيامه وشاف عيده
اجه يوم الفراگ المانريده
غمض جفنه ابونه وبردت أيده
علي انصاب  يزينب هذا ابد ماچان الحساب
علي انصاب وسفه يصير تالي تحت التراب
يدنيا شلون صلفه.   انصاب الگمر وسفه
                  علي انصاب

★★★★★★
يزينب يختي ماچان على بالي
تروح ابساع واتمر الليالي
ونفارگ بالعجل اغله الغوالي
الله ينظر الحالچ. وحالي
علي انصاب انفجع گلب اليتامه وگلب الأحباب
علي انصاب  شذنبه إلي يصلي بوسط.  محراب
چن محد يعرفه.  انصاب الگمر وسفه
               علي انصاب

الشاعر حسن لعيبي الحريشاوي

نعي لاستشهاد أمير المؤمنين علي عليه السلام

يادار وين المرتضى غاب
ضلت ابشوغه اتنادي الايتام
ومزدحمه ضلت تبچي بالباب
راح الحنين اليجلي الالام
چم گلب طاح من ألقهر ذاب
ياعين تغفه اخلافه وتنام
عام الحزن منه الگلب شاب
واصعب خبر مر على الإسلام
سيف العداله بسيف ينصاب
جروحه خطيره شلون تلتام
ماحصل چاره الجرح الصواب
حامي الحمه ماكمل اصيام
اكبر فجيعه فراگ ابوتراب
وهليوم مامثله بالايام

الشاعر حسن لعيبي الحريشاوي

في امير المؤمنين  علي عليه السلام      ( ملمع )

((ياوراء العقل  يافوق الكلام
     ياامام الكل    يانعم الامام
يارحيما بالفقير     ايها القلب الكبير  
ياامام الكل يانعم الإمام))

★★★★★
ياهو منهم  وفَّه وياك ابعهد
بنعمه رايد حالهم اهل الحسد
ظنوا الحق بالرجال وبالعدد
الشهد لجلك بلطمع ضدك شهد

(( انكروا فضلك عن جهل عقيم
     خان حظ القوم شر مستديم
شرهم شر قصير   ايها القلب الكبير  
ياامام الكل.   يانعم الإمام ))

★★★★★

من عرف سرك امامي وسيرتك
دارت اعليك بأهلها ديرتك
أموجره لاجل اليتامه غيرتك
اللوعة المظلوم تخنگ عبرتك

((اثروا عن نصرة الحق اجتنابا
    غير لؤم لا ترى منهم جوابا
سعيهم سعي خطير      ايها القلب الكبير  
ياامام الكل     يانعم الإمام ))

★★★★★

الولايه حصني من ربك جواب
والدخل حصني سلم من العذاب
الماتمسك بيها حتماً ظنه خاب
حب علي ينفع اذا صار  الحساب

((انت ياخازن اسرار النبوه
قد حفظت الدين عن علم وقوه
وتحملت الكثير   ايها القلب الكبير
ياامام الكل.    يانعم الإمام ))

★★★★★
انصاغ نورك من ضوه الهادي انسج
يابلاغه تسلب اعقول ومهج
مصدر الانوار ياخير الحجج
ب اخر انوارك نتانيه الفرج

((يافيوض الرب  للناس جميعا
    طائعا لله لم      يلقى مطيعا
زاده قرص شعير ايها القلب الكبير
ياامام الكل     يانعم الإمام ))

★★★★★
مشت درب العدم ناس العادتك
حوبه من الله لگوها وشارتك
وين حالتهم فرق عن حالتك
مابعازة ناس.  كلها ابعازتك

((ياامام الكل  معصوم الخطى
  خلفك الماشي الى الخير مشى
انك البدر المنير  ايها القلب الكبير
ياامام الكل    يانعم الإمام  ))

الشاعر حسن لعيبي الحريشاوي

بصوت.   مسلم المطيري

نعي عن لسان العقيلة زينب عليها السلام تخاطب ابيها امير المؤمنين علي عليه السلام

زينب بويه ما ترضه   يمرها
ظيم    وتهجر الراحه عمرها
وكتي بروحتك روحي كسرها
كسر ماينجبر حد المنيه

★★★★★★
ترضه ياذخر داري وعمدها
ويعطرامي الچنت اگعد ابسدها
گبل روحك ردت روحي لحدها
يمن فركاك موهيّنه  عليه

★★★★★★
يريت النوح يابويه يگعدك
ودمع الماهجر عيني يردك
حسبالي گلت غافي وندهك
صدگ بويه متت يابوالحميه

★★★★★★
تختّل ظالم ابسيفه تعنه
طبر راس الوفه الكلّه محنه
فزت  انته يبو الحسنين واحنه
خسرناك وصفت دارك خليه

★★★★★★
لنبي داود باسمك كل صعب هان
ليّنت الحديد  الموسهل  چان
شعجب سيف المرادي عليك مالان
صدگ روحتك بويه ابغير جيه

الشاعر حسن لعيبي الحريشاوي

نعي    عن لسان العقيله  زينب
تخاطب ابيها امير المؤمنين عليه السلام

بياحال زينب تغفه وتنام
صاحت صدگ ياراعي الايتام
صدگ مطبور يابويه على الهام
يطيبة خاطري وراحات الايام
يرجواي الرحت يافرح مادام
عجيد الگوم بويه انهض يضرغام
عليه الدنيا بعدك شدة  احزام
يمن كملّت دين الله والاسلام
رحت ماكملّت ياحيف إلاصيام

الشاعر حسن لعيبي الحريشاوي

قصيدة بحق الامام علي عليه السلام عن الامام الحسين عليه السلام (جديد رمضان ٢٠٢٤)

فگد الابو مصيبة    زاد الگلب نحيبة
دم الدموع ابفرگتك يغالي
حسين انة يمك لوتشاهد حالي
=======================
بوية حاچيني  يانضر عيني   اصفر تبدل بوية اشوفون لونك
بعدك شعندي. يابعد چبدي. ظلمة الحياة اعلية احس
بدونك
ما الك جية.  عينك اعلية.  شلون اصبر وعيني تصد لعيونك
يالدافي حضنك. ياذيني ونك. كل ساعة انشدك يا عزيزي شلونك
حاچيني اخير حچاية   دلالي تايه راية
بعدك انوح واسهر الليالي
حسين انة يمك لو تشاهد حالي
==========================
ساعة احضننك. ساعة اشمنك.  اتمنى وي موتك تغمض عيني
دمعتي لعودي.. حفرت خدودي.. لكل ذكرى منك ما ابطل ونيني
اولادك احنة.  يا بوية صحنة.  صار البچي ما بين اخوتي وبيني
خيمتنا طاحت. وايامة راحت.  بعدة اليتم جاني ومظلمة سنيني
فگدة بدليلي حسرة    تجرحني منة الذكرة
حزن ودمع من فرگتك بقالي
حسين انة يمك لو تشاهد حالي
===================
كبرت جروحي ..ما تهدة روحي..الماعندة والد حگة يلزم ظهرة
كل مغربية.. تگبل علية.. غرگانة عيني من مسيل العبرة
انضر مكانك..واذكر حنانك.. وسط الگلب يالغالي تسعر جمرة
عيني اعله بابك.. واشتم ثيابك..گلب الفگد غالي بعد شيصبرة
تكتلني ريح اهدومة    ما انسى ابوي ويومة
صب الدمع بعد الابو حلالي
حسين انة يمك لو تشاهد حالي
=======================
بيدية شلتك.. بوية ودفتنك.. الله اليعينة الشال ابوه بأيدة
متروسة حيرة..اللحظة الاخيرة..ما امشي عنة ابقى گلبي يريدة
بگلبي صبتني.. يالفارگتني.. حيل ارد اونن ما اون بهيدة
طيفك يجيني.. يكثر حنيني.. صبح ومسة گلبي الحزن ترديدة
ضلمة الحياة بدونك   فارگني نور عيونك
حتى الحجر بعد الابو بچالي
حسين انة يمك لو تشاهد حالي
====================
اسالكم الدعاء رائد

بصوت. مسلم المطيري

استعجل بساع

كلمات الشاعر
رعد الچريخي

((ياموتي گلي أشمنتِظر))


أستعجل ابساع     يـاموتي گـلـي اشمنتِظـر
أستعجل ابساع     تـدرينـي مـاريـد الـعـمـر

       روحـي عـذبـهـه الـزمــن
       وشـتـاگـت الجـنـة عـدن

استعجل ابساع         استعجل ابساع

                                    *---------------*---------------*

عـذاب  سـراب   صـارت احــلامي تـره
حـنـيـن انـيـن    مـثلـي حـمـلـة يـامـره
اشوف واعوف  اهـلي كـلـهـه أمـجـزّره
غـريب  سليب  احسيني گطعوا مـنحره

أحسبلك احساب    ولّحظه احسنهه بشهر
أحسبلك احساب    أتنطـر ومحني الظهـر

استعجل ابساع         استعجل ابساع

                                    *---------------*---------------*

ظـلام  خـيـام    ذكــره ضـلـت كــربـلــه
جـروح انـوح    الـدمـعـة بالـخـد هـامله
اعـيـد  اريـد    ابـموتي تـنـهي الـمسـألـه
تـعـال خـيـال  عـمـري مـالـحـظـه حـلـه

أتئخرت حيل   والروحي اقريت الحمد
اتئخرت حيل   ليامي ولـجـيـتـك اعـد

استعجل ابساع       استعجل ابساع

                                    *---------------*---------------*

چـبـير زغـيـر    عـيني شـافـت ذبـّحـتـه
شگول خيول   الـغـالي عَـشـره الداستـه
كـفيـل تـسيل   ادمـوم عـينـه وهـامـتـه
جميـع رضيـع   ابـالـي ضـلـت صـورتــه

ارحمني ياموت    ما احمل افراگ وغرب
ارحمني ياموت    الـفـارگ احبابه صعب

استعجل ابساع         استعجل ابساع

                                    *---------------*---------------*

وراي  حـمـاي   عـفـتـه وآنــه أمـسـلـبـه
ألوع  دمـوع   الخامس اصحاب الـعـبـه
خـذاه  دمـاه   والـحـجـر صـك حـاجـبه
رمـاح جـراح    احـسيـن گـلـبـي عـذبـه

ابموته يرتاح    العايش بحسره ودمع
ابموته يرتاح    التشبه اسنينه الشمع

استعجل ابساع      استعجل ابساع

                                    *---------------*---------------*

يـعـود  يـزود   حـزنـي لـو لـيـلـي بــده
أهيـم  وأقيـم   نـوحي للــضـل وحـدّه
نعيت  بچيت   سـاعـت الـحـادي حـده
ذبيح اصيح   اشبيدي وانـه امـگـيـده

شتفيد الدموع     للشايـل بـگلـبه جرح
شتفيد الدموع    ابليلي يجرن للصبح

استعجل ابساع         استعجل ابساع

                                    *---------------*---------------*

شـعـور  يـدور    خــلــه دمـعـاتـي دمـه
احـوم  واگـوم   انـعــه سلـوت فـاطـمـه
يــدار   مــرار    ليش اشـوفـچ مـظلـمه
ابــوي  اخـوي   چانـو انـجـوم الـسـمـه

بالغربه حسيت      ياموتي والدنيه عدم
بالغربه حسيت     ابساعت العفت الخيم

استعجل ابساع       استعجل ابساع

                                    *---------------*---------------*

✍خادم زينب ((ع))
الشاعر رعد الجريخي

وين ماروح… الگه خيمة وبيها نار
وين ماروح… الگه صرخات الزغار
سهم ذابحله طفل ..
طفكم ايوگف العقل
وين ماروح .. وين ماروح
__
كون اروحن والگه ضحكة بيها منثورة الهله
وصوت قران ابخيمهم مو رنين السنسله
ليش اشوفن ركض زينب عله طولچ كربله
وليش اشوفن طفل يبچي وسهم لازم حرملة

والله مليت… حتى بالتمثيل اشوف
والله مليت… گمر بس عوزة چفوف
ليش مو نفس الشكل .. طفكم ايوگف العقل
وين ماروح .. وين ماروح
=============
حسين يا حار الله انته تاهت الدنيه برد
موش بالصحرة المتربة كون مگعادك ورد
ليش روحك والمحنه بالحوافر تنمرد
ليش خيل ونار گامت عالمخيم تستعد

هدت الخيل… مردن اضلوع الچبير
هدت الخيل… و مو قوي ركض الزغير
برجله وبأيدة الحبل .. طفكم ايوگف العقل
وين ماروح .. وين ماروح
============
والله مليت اسمع الطف شايخ عليه الشمر
ووين ما تركض ازغارك تلگه عاگول وجمر
حسين سالفتك چبيرة كاسرة دموعي كسر
غاد من درب الحوافر كون باعدلك متر

بصدرك شلون .. سنبك الحافر ينام
بصدرك شلون .. كسرة ضلوع وسهام
ماشفت موقف سهل .. طفكم ايوگف العقل
وين ماروح .. وين ماروح
=============
كون اشوف الخيمة عدله وبالبيارغ تنحرس
وبالخضار حسين اشوفه موش حارگته الشمس
وكون كل حچيي الفواطم بالهدووووء وبالهمس
وتطفة خيمة سكنه حتى يشتعل شمع العرس

يقرة الحسين .. وهو يضحك مو حزين
يقرة الحسين .. الفاتحة لأم البنين
كون زفة ومو چتل .. طفكم ايوگف العقل
وين ماروح .. وين ماروح
==============
وجوه موش وجوه اهلكم والحده الناگه اجنبي
شنهي نسوان الدلال ايطرن ادروب السبي
وينكم ياعرفة الله ماكو واحد طالبي
وگفوها بسوگ غربه وتستحي وجوه العبي

الكوفة والشام .. ما تعوفك تستراح
الكوفة والشام .. بالحجر ترمي الرماح
وبالضعن واحد رجل .. طفكم ايوگف العقل
وين ماروح .. وين ماروح
=================
سالفتكم كلها هايه والمصايب والسلب
علمودي وما استاهل عطش ساعه امن العذب
حسين ضحالي بعزيزة وعاف خيماته تشب
و انه يوميه اعله طيشي احرگ اخيّمة بذنب

انتم اكبار .. وانه ذرة وحدر طين
انتم كبار .. شجابني الكبر الحسين
دنگت ما ينحمل .. طفكم ايوگف العقل
وين ماروح .. وين ماروح
===============
#علي #هادي #الخزعلي

*بشان الامام علي عليه السلام*

       🚩🚩🚩🚩

*ياعلي جرحك بالگلب مايطيب*

*انصيح بالحسرات راح الحبيب*

*ابحدر التراب*
       *وجه الابو غاب*

*انصيح بالحسرات راح الحبيب*
____

هاي المصيبه مامثلها جرت

الارض ناحت والسمه مطرت

افراگه تبچي والملك احضرت

تـنعه ولـيها وللـدمع فجرت

*علنت الحداد*
           *لبست السواد*
*ياعلي جرحك بالگلب مايطيب*
__

شاب الرمش والعين ابهالمصاب

الفجر اظلام  من رحل بوتراب

والفكر هايم بس ينادي بعتاب

ركن الديانه يصيح بُعدك عذب

*ياوسفه مفقود*
            *نايم  باللحود*
*ياعلي جرحك بالگلب مايطيب*
__

العمد من يطيح يابى الحسن

بالهظم نبگى ويا كاس المحن

ليله عظيمه انوح ليها بشجن

بعدك يتامه وجار  بينه الزمن

*ظلمه هالوجود*
               *ياراعي الزود*
*ياعلي جرحك بالگلب مايطيب*
___

ياموت بالله عليك ليش القمر

نوره طفيته وحنه صرنه بقهر

نيران تسعر بالحشى كالجمر

ياوسف بعدك الحياه بلا ثمر

*اتزلزل الكون*
         *بالترب مدفون*           
*ياعلي جرحك بالگلب مايطيب*


*عاشقة الولايه*
            *نسالكم الدعاء*


https://www.tg-me.com/khdmat