عن بيعة الغدير  (گعديه ) على وزن احنه غير حسين ماعدنه وسيله   للمرحوم حمزه الصغير

هذا ابوالحسنين مانقبل ابغيره
نصْبَّه الرحمن  للهادي  وزيره
(قال هل تدرون من بعدي وليا )
(انه الكرار  ذو المجد  عليا      )
نصْبَّه الرحمن للهادي وزيره

★★★★★
وگف بربع طرق طه  گبل ميَّكمل مسيره
نزلت آيات الصريحه  تحدد الدين ومصيره
ناده رب الكون  بَلَّغ   لاتظل خايف بحيره
بلغهم بامري الجلي
بعدك علي هوه الولي
هوه الولي بعدك علي  الماكو بالعالم نظيره
هذا أمر الباري واسبابه اللطيفه
نصبه الرحمن من بعدك خليفه
(انه العادل والبر التقيا    )
(صادق الاقوال والفعل نقيا)
نصبه الرحمن للهادي وزيره
★★★★★★
گال جبريل لمحمد  لاتهد الناس عزمك
يصونك من اهل الظلاله  الباري من عدهم يعصمك
حتى لوفظلته گالوا   اتحييزيت لابن عمك
ميهمك المايعتقد
وعن منهج الحق يبتعد
وبلهجته نبرة حقد     يامحمد لا يهمك
لايهمك معترض زاد اعتراضه
وبالكلام القاسي لوشدد ألفاظه
(لاتخف يوما عنيدا اوشقيا  )
(صار امر الله  حتماً وجليا )
نصبه الرحمن للهادي وزيره
★★★★★★
بلغ الامة بقراري   گاله الباري وَتَقَصَّد
خلي هذا الجمع يسمع خلي هذا الجمع يشهد
العلي هيه الولايه  من بعد غيبة محمد
بهذا الامر بلغ البشر
بكل ديره ينطش الخبر
ماتنفع أعماله الْغِدَرْ   واعمال من خان وتمرد
وين مثل المرتضى علم وشجاعه
ومثله للرحمن گضه العمر طاعه
(كيف بالغادر للحق دعيا  )
(مثلما الكرار يمتاز وفيا.  )
نصبه الرحمن للهادي وزيره
★★★★★
ثمنطعش   يوم الولايه  هوه دوم العيد الاكبر
مَيَّز الله باختياره      دون هاي البشر  حيدر
حظنه دافي لليتامه  وعلى الكافر نار تسعر
العهد علوادم وجب
علعجم كلها والعرب
واجب على الناس انكتب  المامشه بهلدرب يخسر
درب حيدر درب ايمان وسلامه
للخلافه أهل هو وللامامه
(هاشميا طاهر الأصل زكيا  )
(اختاره الرحمن للهادي وصيا )
نصبه الرحمن للهادي وزيره
★★★★★
راجع وشوف المصادر   راح تلگاها الاجابه
البيعه ضاعت بالسقيفه  هاي اعمال الصحابه
اقره بالالفين حجه  الحلي يذكرها بكتابه
كلها تدل وتستدل
مايصبح الباطل عدل
غير العدل ماينقبل  ولاتنجح الباطل احزابه
فشلت الأحزاب من يوم السقيفه
الموخليفة نصبوا غصبن خليفه
(انه حقد مدى الدهر خفيا )
(حين وجه الدين امسى علويا )
نصبه الرحمن للهادي وزيره

الشاعر حسن لعيبي الحريشاوي

(گعديه ) لبيعة الغدير
(على طور مفروض علناس حبك ياعلي)

مشدود بالروح حبك ياعلي 
يهواك هذا الكلب يهواك   مالحظه ينساك
★★★★★
ياعلي اختارك الباري والله منصف باختياره
وصَوَّرَك  من نور طه  شمس متفارگ نهاره
وقسَّمٌ الدنيا علمودك ربح سواها  وخساره
شخصك علي يوم الفصل
ميزانه.  يحكم بالعدل
وقسَّمٌها الله  بهلشكل  سوه جنته ،، وسوه ناره

عنوان الاسلام حبك ياعلي
بالدنيا گلبي واخره هناك  مالحظه ينساك
★★★★★
ياعلي احتاجتك كلها وانته مالك حاجه  بأحد
علمك الباهر سماوي لان علمك من محمد
بيك وصه الباري طه  وعلولاية بيها أكد
بلغ الناس بهلخبر
بعدك علي سيد البشر
هليوم لاخوف وحذر  وانته يا(طه) مسدد

گلهم التنصيب من رب السما
وارفعها چف الوصي بيمناك   مالحظه ينساك
★★★★★
ياعلي چم ايه نزلت  بالفضل أسمك تصَدَّر
اية التطهير تروي  من الرجس طاهر مطهر
واية التبليغ تعلن   بعد طه انته  يحيدر
وسفه الأمور أتغيرت
انضربت مصالح ونتهت
زمرة خبيثه اتحركت  اتقابل الأحسان بالشر

نادم وخسران كلمن حاربك
الحق الله داره ويمشي وياك   مالحظه ينساك
★★★★★
  ياعلي مركز هدايه   وجاذبية انوار فكرك
كعبة عقول الحيارى بلانهاية افاق   سحرك
غير بس الله ورسوله أبد محد عرف سرك
معدن مواريث الأدب
تشهدلك بهذا العرب
لادنيا لاجاه وعجب  يلي كلشي مايغرك

يامالك الروح شخصك ياعلي
دين الله بيك اكتمل بحماك  مالحظه ينساك
★★★★★
احتجوا أصحاب السقيفه بلهجة الشر الرهيبه
نصبه گالوا علينه   هذا ابن عمه وقريبه
أطباع وتبَيَّن شكلها. هلطبايع موعحيبه
گالوا محمد كرَّمَه
گالوا علينه قدمه
مانصبه رب السمه. گلوب كلها جفه وريبه

اولاية الكرار من قبل الأزل
عَيَّنَك  الله قبل الافلاك   مالحظه ينساك

الشاعر حسن لعيبي الحريشاوي

بمناسبة بيعة الغدير

بهلبيعه  متلَونَّه السمه هليوم ورديَّه
اليوم اجدد بيعتي بفرحه  ولائيه
مستحق من رب  السمه رتبه سماويه
يَلعيَّنَك  رب السمه ابدولته القدسيَّه
من قيَّماك وقدمك   ياصادق النيَّه
يابوهجوم الخيبري وصولات بدريه
ياعطرمن طيبه ومسچ وانفاس مكيه
يلي وفيت الخالقك  وعشگت طاريَّه
اشگد نفوس اتغيرت علطمع مطويه
روحك ابد متغيرت   نفس النهج هيه
ياطبع طه وطيبته  وعلمه ومحاچيه 
الاسلام باسمك مرتفع واعداك محنيه
والباري انزل علنبي.    آيات  كونيه
يامصطفى وصل الامر وَضَّح معانيه
بلغ علي هو الوصي والحسبه مگضيه
عيد الاسلام وفرحته البيعه الغديريه

الشاعر حسن لعيبي الحريشاوي

بيعة الغدير 

هلت انواره علينه       هلت انوار الغدير
المرتضى بعدي خليفه  اعلن الهادي البشير
★★★★★
صوت من جبريل اكد  بهذا بلغ يامحمد
غير حيدر ماكو احد   علبشر يصبح امير
★★★★★
لكل موالي عيد الاكبر  من السمه واجب تقرر
وصي للمختار حيدر  غيره حيدر مايصير
★★★★★
بهلخلايق منهو غيره   من نبع طه  وعبيره
نصبه الهادي وزيره         حيدر ال (طه)  وزير
★★★★★
المصطفى من البدايه  اختاره عن فكر ودرايه
لحيدر تلوگ  الولايه       قرر الباري القدير
★★★★★
ماكو من بين البريه        غير حماي الحميه
للنبي يصبح وصيه         بهلامر هوه جدير
★★★★★
فرحة الگاع وسماها   من رفع چفينه طه
صار عيد وبيه تباهه   هوه عيد الله الچبير
★★★★★
للامامه هوه مصدر   المايسير بنهجه يخسر
المايوالي بيوم حيدر   حظه نيران وسعير

الشاعر حسن لعيبي الحريشاوي

الشاعر حسن لعيبي الحريشاوي:
في بيعة الغدير

ظميرك يلي نايم  انهض وصحه
صحيح القول مايحتاجله صحه
مريض انته عليل وفاقد ال صحه
(الباري منصب حيدر  ليش تعاند  رب الكون )

الشاعر حسن لعيبي الحريشاوي

هوسات غديرية

كمل دين الاله وتمت النعمه
بتنصيب الامير الخير والرحمه
بعد النبي حيدر وصي على الامه

(من الله  اتبلغ  تنصيبه )
★★★★★
بيوم ثمنطعش  من شهر ذو الحجه
حسم كل الامور النبي وكل ضجه
بحق  حيدر كلام  أواضح اللهجه

(واليكم حيدر من بعدي )

الشاعر حسن لعيبي الحريشاوي

لبيعة الغدير

نيران احزاني طفت   مالي شغل باحزاني
ابماي الغدير  وفرحته   اليوم أنطفت نيراني
يوم النبي لم الخلگ    آيات ربه ايتاني
گلهم اجاني من السمه هذا الخبر  رباني
ياطه بلغ أمتك لتخاف أبد   وتعاني
كلمن چنت مولاه علي مولاه  بيه وصاني
بعدك علي هو الوصي  وماغير حيدر ثاني

(أمنصب من الباري    غيرك حيدر مامقبول )

الشاعر حسن لعيبي الحريشاوي

عيد الغدير //52
____
صلو على المختار والنذيري
في بيعة المولى علي اميري
____
1
قد جعل الله علي مولا
وشرف الولا عدلاً وفعلا
فهوا بها يفوق كل قولا
اعلنها الرسول في الغديري
____
صلو على المختار والنذيري
في بيعة المولى علي اميري
____
2
ثامن عشر اتم ربي النعمه
هذا علي والي كل الامه
نفس النبي الطاهر والرحمه
اعلنها الرسول في الغديري
____
صلو على المختار والنذيري
في بيعة المولى علي اميري
____
3
ليس لها بالكفإ غير حيدر
انعم به سيّدنا والاجدر
لذلك تم اصطفاء الاقدر
اعلنها الرسول في الغديري
____
صلو على المختار والنذيري
في بيعة المولى علي اميري
____
4
ناداهمُ يوم الغدير احمد
انعم به وقالها محمد
عليُّ مولاكم وربي يشهد
اعلنها الرسول في الغديري
____
صلو على المختار والنذيري
في بيعة المولى علي اميري
____
5
الله ارتضاك ياعلي وليا
انت امام الكون ذا جليا
ياربنا كن ناصراً عليا
اعلنها الرسول في الغديري
____
صلو على المختار والنذيري
في بيعة المولى علي اميري
____
6
صار عليٌ للنبي وزيرا
ابا الحسن صار لنا اميرا
فهو الى الدين غدى نصيرا
اعلنها الرسول في الغديري
____
صلو على المختار والنذيري
في بيعة المولى علي اميري
____
7
الله صاغ حيدر إمامي
واختاره واليْ على الانامي
وهادياً للدين والسلامي
اعلنها الرسول في الغديري
____
صلو على المختار والنذيري
في بيعة المولى علي اميري
____
8
ياربنا جئنا نجدد العهد
ذقنا حلاوة الولا من المهد
إنا ولا زلنا معاهم للابد
اعلنها الرسول في الغديري
____
صلو على المختار والنذيري
في بيعة المولى علي اميري
____
تمت بحمد الله وتوفيقه
الاثنين//27/05/2024
18ذوالقعده 1445هجر
الحاج / / مكي العريبي
نسألكم الدعاء

*🌹هوسات غديرية*🌹

حچاهه ويه الخلگ هالسالفه
المختار
بس حيدر علي من بعدي آنه اختار
ضل صافن الثاني و بهالأمر محتار

هااا
و يچذب حيدر واليته

🌹🌹🌹🌹🌹

مانقبل احد غيره بس حيدر علي انطيعه
لو ينطونه كل الكون ابوالحسنين منبيعه
حيدر انتصب هاليوم الف مبروك ياشيعه

هااا
يلـ عامي عيون العياله

🌹🌹🌹🌹🌹

نصب روحه شيخ بزور اليتبره بالشده
يتراجفن كل اعضاء الي يوگف ابسده
المكبرينه بعض ناس عركة شقه ماعده

هااا
و يدرب ابليس ابأفعاله

🌹🌹🌹🌹🌹

اولاية حيدر علي الكرار متعطره بالخوه
و المايقبل علي شيخه هاذ ابد مايسوه
بيوم طگ ولأله احد و ماعنده ابد تچوه

هااا
محتار يضل ابتاليته

🌹🌹🌹🌹🌹

نلبس اثياب الجديده و نشارك بالمسير
بس علي هوه اميري نهتف بيوم الغدير
نطبخ نهوس نصفگ انخلي العالم يحير

هااا
نار بعينه ، المايفرح للكرار

🌹🌹🌹🌹🌹

خادم الامام علي (ع) :
محمد الحايي

ماعندي غيرك سيدي اولايذ ابكترك.
اتمنه نحري الينذبح مو ذاك نحرك.
كلما اريد انسه النحر.
الزم قلم وشبع قهر.
________
يحسين اخبرك بلحزن ماخله كلشي.
حته الدمع لمن وكع طيحلي رمشي.
حجي البشر خلاني اهم وي ضلي امشي.
يادمعتي مثل المطر بغيابه رشي.
وعمي العيون امن النضر.
الزم قلم وشبع قهر.
_________
حته البواجي امن الحزن ماهداتني.
بركان صاير ولجمر شلته اعله متني.
ماضل بشر يسمع حجي وشكيله وني.
حته الكلب مرات احس يتبره مني.
كل هذه جا طعت الطهر.
الزم قلم وشبع قهر.
________
اتمنه ماي ابكبتك يحسين اصيرن.
ونزل عله اشفافك ورويهن وطيحن.
وغسل جروحك ونحر بلكت يفزن.
وشبك اشفافك سيدي وبصفهه انامن.
ورويك انته اويه الكمر.
الزم قلم وشبع قهر.
________
حته القلم يكتب الم كلما يذكرك.
يتمنه يمشي الكربله او يغفه اعله صدرك.
ابراسه احس شايل حجي ومدوخه امرك.
من ايدي يفلت جنه احس رايد يزورك.
حته القلب كلبه انكسر.
الزم قلم وشبع قهر.
_______
حاجوني ناسي ابلا خجل ولعين بالعين.
كالولي المن هل لطم جنكم مجانين.
كتلهم افرح لو اجن من اجل الحسين.
كتلهم اشكد مانضل تاليهه ميتين
بس الخدم وهل الخدم بدنيه عدلين.
بس الخدامه التستمر.
الزم قلم وشبع قهر.
________
اتمنه اعيش ابعالمك وترد الايام.
وشكف ابكلبي او منحري ذنيج الاسهام.
ووكف مثل وكفت جبل جدام الخيام.
ونصب عزه ابنص كربله وبتربت الشام
وبكلبي افرش خيمتك وحويهه الايتام.
وحضن رقيه اعله الصدر.
الزم قلم وشبع قهر.
_________
الشاعر السيد عمار العوادي.
ومن الله التوفيق.

ابوذيات غديريه

عله الكونين يا حيدر   ...     علي انت           
او گدام الخلگ حبك ....           علنته
الغدير .او كلشي يشهدلك .. علي انت
أمير ابأمر خلاق البريه ........

مو بل گاع بل قمه ...       محله
علي او غيره لهل دنيه .. محله   ما حله
حبل الوصل وي حيدر .... محله
واجدد بيعتي صبح او مسيه ...

الك هامات كل الخلگ ...     نصن
يمن بولايتك آيات  ......      نصن
علي الليله جسمت الگلب .. نصين
نص بلحفل نص جالك هديه ...

الشكر لـ لله گلبي ....     انتمى لك
علي او للكون كله ...     انت مالِك
ألي حيدر يلايم  .....    انت ما لك
غير النار والهم والأذيه ....

مقامك ياعلي يصعب ... وصوله
منو مثلك اله جوله .....  وصوله
گلت للوصّفك رابع ......... وصوله :
الله اختاره أول مو بديه .....

ابو فاطمة الطائي

لبیک یاحسین ع
عيد الغدير وكلها فرحانه
والمهدي حاضر نوره ويانه

صوت العشگ يصدح خل كل محب يفرح
عيد الغدير وكلها فرحانه
===========================
يامحلى هاذي الليله جمعتنا
املاك السمه من العرش هنتنا

الليله امير اتنصب الوالي
ماتنوصف ياخلگ بهجتنا

كلنا نحب المصطفى وآله
نمشي بدربهم هاي غايتنا

كلمن يحبه افلح خل كل محب يفرح
عيد الغدير وكلها فرحانه
===========================
هذا الأمام الواجب ابامره
كل الخليقه اتقدسه وتقدره

حروف اسمه فوگ العرش مكتوبه
بس النبي والخالق ايفسره

لو نحچي عنه وعن كراماته
مايكفي شاعر لو كتب عمره

بيه العلم يرجح خل كل محب يفرح
عيد الغدير وكلها فرحانه
===========================
خلي اليلوم ايلوم مانهتم
شيعه وبحب المرتضى نلتم

غايتنا حبه وماكو ابد غيره
بعطر الولايه احلى عطر نشتم

والما تركهم لحضه كل عمره
يوم القيامه بالوصي يسلم

يوم الحشر يربح خل كل محب يفرح
عيد الغدير وكلها فرحانه
===========================
الليله فرحنا انرفعه ونذيعه
مبروك هاذه العيد ياشيعه

عيد الولايه شعت انواره
جن وأنس تعلن اله البيعه

سيد على الكل كلها سيدها
قول الرسول وهذا تشريعه

رب العرش وضح خل كل محب يفرح
عيد الغدير وكلها فرحانه
===========================
الاكوان كلها انسرت بعيده
واهل الشرك عن جنته ابعيده

هذا الامير الاول واخر
والهادي وضح من رفع ايده

دين الله بيه وبسيفه ظل قائم
للجنه يدخل كلمن ايريده

هيچ الكتاب افصح خل كل محب يفرح
عيد الغدير وكلها فرحانه
===========================
خاد اهل البيت سيد حسين آل ابوصلوات

هلا بعيد الغدير
علي تنصّب أمير
***
هلا بأجمل خبر
عن الخالق صدر
إجا لسيد البشر
علي بعدك يصير
***
الوحي لطاها نزل
تره الدين إكتمل
بعلي خير العمل
وقره الآيه البشير
***
بكتاب الله المبين
رضه الأسلام دين
وأمير المؤمنين
يظل بعدك وزير
***
فرض لازم تگول
وتخبّر يا رسول
عن آسباب النزول
وأعصمك لا تحير
***
بعد حج الوداع
دعاهم لجتماع
حِچَه وكُلهم سَماع
أمر كلّش خطير
***
صعد فوگ الرِّحال
نطق أجمل مَقال
لعلي گلّه تعال
ورفع كف الأمير
***
دعاله وشال يمناه
نبي ومسموعه دعواه
اليحب حيدر أوّالاه
حضه بخيرن كثير
***
أعادي من يعاديه
وأبد مالي شغل بيه
يحير بنفسه أخليّه
ويطب نار السعير
***
علي مدها يمينه
وإجُوه إمبايعينه
ولي إتنصّب عَلينه
وَصي بأمره نسير
***
علي ويبقى علي
بأمر ربيّ العلي
وعلى الأمّه ولي
أوّل أو أخير
***
خادمكم
ابو يحيى السويطي

شيعيّه شيعيّه ... فرحتنه شيعيّه
تبقى عقيدتنه ... بيعه الغديريه
ـــــــــــــ
وقّعنه للكرار .. بالدم بصمنه
وبعالم الانوار ...شيعيّه اسمنه
من تنعد الارقام ... اوّل رقمنه
أسأل اوراح تشوف ... شينادي دمنه
دمنه الذي يفتر
يهتف بأسم حيدر
تبقى عقيدتنه ... بيعه الغديريه
(الما والاه اسأل عن أصله)
ـــــــــــــ
حب وكرامه انكَول ماعدنه مانع
لو وذّر احنه انصير نبقى نبايع
والحيدر الكرار كل شيعي طايع
بصوت الضمير انصيح شيعه ونشايع
للوالي بيعتنه
اوّل أئمتنه
تبقى عقيدتنه ... بيعه الغديريه
(غيرك لا الاول انت)
ـــــــــــــ
عيد الله وأكبر عيد عيد الولايه
ومن عنده ندري اسرار نهج الهداية
حيدر علي قرآن ما كَلنه آيه
هو البدايه يكون هو النهايه
طه ولي يريده
لمّن رفع ايده
تبقى عقيدتنه ... بيعه الغديريه
(كَبال الناس وبي يتباهه)
ـــــــــــــ
بذي الحجه بعض الناس ابيت العلي اتطوف
وطفنه ابعلي الكرار وبكَلب ملهوف
امبّايعين انصيح ونشيل الجفوف
بيت الكرم والجود ميرد الضيوف
بالحضره لمتنه
نجددهه بيعتنه
تبقى عقيدتنه ... بيعه الغديريه
(نطوف اعليه وتحله البيعه)
ـــــــــــــ
سجّلنه يا جبريل وأنطي العلامه
وخليهه بشرى تصير يوم القيامه
احنه الذي منعوف تاج الامامه
وكل محب راح يكون مخلص كلامه
بس حيدر القائد
وغيره حرف زائد
تبقى عقيدتنه ... بيعه الغديريه
(من الاصلاب انبايع حيدر)
ـــــــــــــ
الشاعر محمد حسن ضيغم

الى مولاي امير المؤمنين
عليه السلام

علي بكلهن علي امن اول التكوين
العرش لو ماعلي منحط جداره
علي بآية نبأ والكوثر وياسين
علي لطه الوصي وأول وزاره
علي ياهو اليعرفه بيوم ميلاده
وهو قبل الخلق سر اقتداره
علي بيوم الغدير ونزل وحي الله
لطه وكله بلغ سمو عتباره
واذا ما بلغت ماكو كمال الدين
لأن ماكو نبي تم اختياره
علي منه السلاله وعصمة اهل البيت
وروح النبي الزهره وخازن اسراره
وطه نبي الرحمه وخاتم الاديان
وبس حيدر وصيه بگونه يتباره
منو المثله ابجفه وقلع ذاك الباب
ومعبر للجند سواه بتذكاره
ومن المثله ورداله شمس بالكون
لجل تم الصلاه ولا فرض داره
من المثله بحروبه وشايعتله علوم
من يثگل وزرها وغدت طشاره
من المثله وفگدها ايتامه نص اليل
ولجل خبزتها بيده يشعل بناره

خادم اهل البيت
ابو فرات الحمداني

‏مقطع صوتي من صوت الحسين

مولد الامير علي ع
.
.
.

ردد الــسـاني .. عـلي قـرآنـي

علي علي يابالحسن علي قراني

---------------

علي بــاء البــسمله الحـاظر ذكـرها
علي جنه وعالارض فاحت عطرها
علي بـيـك الــدنـيه ماكـفه شـعرها
علي ذكـرك حـسنــه واخـذ اجــرها

ابذكرك انــه اتعبدت
الهذا والله اتسيدت
وبالحديـث اتأيدت
والنبي انطاني .. علي قرآني
علي علي يابالحسن علي قراني

---------------
علي بالفـرقان وبـفــاطر لـگيــتـك
علي رتلـتك بـوجـداني وقــريـتك
علي هــذا الكون بعــته وشتريتك
علي والله انسه حياتي لو نسيتك
شلون انسه حيدره
وانتــه دنيه واخره
حبــي محــد فسره
ما الك ثاني .. علي قرآني
علي علي يابالحسن علي قراني

---------------

علي سورة ال عمران اوي مـريم
علي بس بيك العـكل والله تهـيم
علي يالوجهك صحو مايـوم غيم
علي واعـلنها بعـلي انـــي متـــيم
واليــگلي رافضي
ابعلي انه مرتضي
الامر هذا يقـتضي
اعلن ايماني .. علي قرآني
علي علي يابالحسن علي قراني

---------------

علي فاطر علي ياسـين ومحمد
علي بمـحـبتك ايمـانـي تجــسد
علي بالــدلال ماغـيـــرك تـخــلد
علي واحد علي خالد علي اوحد
انته حبي الاولي
انته حبـي الازلي
انته ياحيدر علي
وهذا عنواني .. علي قرآني
علي علي يابالحسن علي قراني

---------------

علي بالفتح وعـلي بسـورة الكوثر
علي ديـني ومذهـبي انتـه يحيدر
علي واسمي عـلوي وبالاسم افخر
علي وي اسـمك اصـيـح الله اكـبر
الارض تشهد والسمه
حــبي وقعــته ابدمه
علي ياحــامي الحمه
وبيه متفاني .. علي قرآني
علي علي يابالحسن علي قراني

---------------

علي سورة هل اتى اتوضح خصاله
علي الله ايعـرفـــه سـبحانـه تعــلى
علي عـلـــمه مـن لـدن رب الجــلاله
علي والـهذا الـســبب اهـوى وصاله
مايهــمـون الحــچو
الرضو والي مارضو
اعليه ادري اتحـملو
امن اعلنت اني .. علي قرآني
علي علي يابالحسن علي قراني

---------------

علي مو سوره علي مصحف غرامي
علي ايــاتــه يــمَـثلــــهــن هــيامــي
علي بيك اعتـرف بـس انتـه امـامي
علي والله الـشوفـتك دلالـي ظـامي
انه شيـــعي منـهـــجي
بحب علي والله التجي
الخــوف يمــي مايجـي
عندي برهاني .. علي قرآني
علي علي يابالحسن علي قراني
---------------
خادم اهل البيت حيدر تركي الكربلائي