يمتى تظهر حالي يقهر

أعمى تتعثر خطاي حاير و فاكد ضواي
يمتى تظهر يمتى تظهر
______________

سيدي حتى مدامعنه انتهت
طالت الغيبة و لا ورقه اوصلت
يا گمرنه الشوفتك شمس انحنت
هيچي أشوفك سيدي شكبره البخت

و بصلاتي أمنياتي

ما لي غيرك يا هواي حاير و فاكد ضواي
يمتى تظهر يمتى تظهر
________

انتظر حال اليتامه بلايه والي
بدمع عيني و حيرتي و عالم خيالي
انخاك ترجع ما يجرحك هذا حالي
و اعلگ العشره شمع لجلك يغالي

عليك الحسين تستقر وين

ضامي انه و أنته ماي حاير و فاكد ضواي
يمتى تظهر يمتى تظهر
_________

يابو صالح يمتى تخلص غيبتك
شكثر ناشدت الخلگ عن مدتك
بالكسر اقسم عليك و عمتك
ارجع و خليني اشاهد شامتك ( الشامه )

تلظم اجروح اترك النوح

هيچي اشوف المهدي جاي حاير و فاكد ضواي
يمتى تظهر يمتى تظهر
__________

من كثر ما حيره بيه اتوهدنت
ما عفت مسجد بالنجف ما دورت
و ابترابه عليك ياما ناشدت
فدوه گلي مره جدمه شاهدت

بالمساجد و المراقد

الشوك ما خلالي راي. حاير و فاكد ضواي
يمتى تظهر يمتى تظهر
__________

گالوا الغربه گبل غربة وطن
بس غربتي تختلف عن المضن
ماهي غربة ناس و احباب و زمن
غربتي ما شايفك يبن الحسن


گلبي مشتاگ. أنهي الفراگ

ناشفة ارياگي و شفاي حاير و فاكد ضواي
أنته وين
___________

صار چم جمعه احضرلك ورد
تنتهي و ما جيت ارجعلك اعد
جامع السهله تعب من النشد
طال مرسال الهجر وانه انمرد

خلصي لحظات يا علامات

امنية بدلالي هاي حاير و فاكد ضواي
يمتى تظهر يمتى تظهر





كلمات / حسين أحمد الأمين

السلام عليكم ورحمه الله وبركاته
سنبدأ ببركة أبا عبد الله الحسين عليه السلام
قصائد محرم 1442 هجري
نسأل الله التوفيق و السداد وأن يرفع عن شيعة أمير المؤمنين الأمراض و الأوبئة ببركة أهل البيت عليهم السلام

استهلالية شهر محرم 1
_ - _ - _

مصابك نبي و عايش بغار خيامك
يل عالترب فرشت الخيل اعظامك
نايم وسط حر الشمس و ساكن دليلي
___
الحالتك تبچي السمه صار غيم من الدمه
وانته متوسد الترب طعنه و عذاب
نايم بطول الأرض مفرط و ما تعترض
فرشوا بجسمك مثل فرش التراب
حتى من لمك علي وصله وصله يالولي
و بحصيره جمعك أعظم مصاب
شلون حامل هالوضع موذر شلون الدمع
نايم أنته و كون لأجلك باضطراب

ضاع الفكر من شفت جسم بلا رأس
يالمنچتل و محروگ من نار الشمس
بألف و تسعمية جرح ساكن دليلي
_______
اتغيرت ارسوم الوجه و للخيم من تتجه
تسمع أختك تندبك و أنته چتيل
شيخ تلهب غيرتك و الحميه اخذتك
تجمع بحيلك تريد و ماكو حيل
رغم كل هذا الحصل گمت و موذر وصل
من شفتها عالخيم هجمت الخيل
گطعوا الراس و گمت بموقفك هذا همت
غيرتك فزعت من ادماك التسيل

خالد صرت كل زمن شمسك تسطع
لا ما متت مو شمر نحرك يگطع
يل عالرمح راسك بقى ساكن دليلي
____
طحت لكن عالسمه وانته ابن حامي الحمه
ما أظن الگاع تحمل وگعتك
حرت بيك و ما حرت لمن گالولي طحت
شلون توگع و أنته كون بصايتك
أجزم أنه بهل الأمر طحت بس واكف عمر
يلي طبع اجبال ماخذ هيبتك
ما متت لمن متت طول الزمان اتخلدت
و الشمس مصدر ضواها گبتك

يابو علي الباري اجتباك و إيدك
و ابموتتك لا ما متت مو موعدك
تبقى على طول الدهر ساكن دليلي
___
شفافك الصارن خشب وجهك بلون الذهب
ضامي لكن دمك امرويله كون
اتوذرت بس جمعت الدين بالدم احفظت
أنته مصفر و نطيت الدنيه لون
چم أخو شفته وگع چم إبن نحره انگطع
اتكابر بدمعك يملاچ العيون
نشفت ارياگ القلم من تخيلت الألم
فتشت بالطف جروحك ما تهون

شذكر إنه بكل جرح روحك تنچتل
يمهن متت بس ترد لخيامك عدل
وبجروحي بعدك ما متت ساكن دليلي
_
يا بشر ما مثلك بشر انطى للعالم عبر
بيك متجمعة المدامع و الألم
چنت وحدك بالحرب و اترست دلالي حب
يا حقيقة بلا خيال و لا وهم
عشت بيه بلايه حد بكثر طعنات الجسد
بكثر حيرة زينب بحرگ الخيم
عيشتني بلا سبب لأجلي متحمل تعب
سيوف و ارماح و تحملت الألم

گلبك ردت و سلمته اليه بلا ثمن
راس برمح و عيالك لأجلي انسبن
يالمنذبح و المنسلب ساكن دليلي




كلمات / حسين أحمد الأمين

استهلالية شهر محرم الحرام 2
_ - _ - _
مجنون. عقلي بمحبتك
مجنون. رايد نظرتك
حلمي أحقق هالاماني. بمجلسك أمك تراني
_
نطيت بروحك همت بجروحك
كثر ما نوحك عشت بمصابك
دماك التجري اطبعتها بصدري
يحبي و ذخري وكفت ابابك
يمحبوب . هالذنوب . تطيح ابمجلسك
بهل الالطاف . شنو شاف . تجنن عابسك

ماريد. منك أجر
ماريد. بس هالامر
ابقه انوح بكل زماني. بمجلسك أمك تراني
__
العمر و سنينه عزه مسوينه
شكثر ما بينه ننوح الطفك
دمعتي التجري دماك التسري
لطمتي بصدري لدماك و نزفك
اعله كل آه . اويلاه . نصيح الطيحتك
عله أيتام . و الاسهام . تلوذ بخيمتك

أيتام. تسحك جمر
أيتام. رضها المهر
هذا موقف بي تعاني. بمجلسك أمك تراني
_
تهت بدروبك بنهار اغروبك
سترني ثوبك و صرتلك خادم
تضيع أفكاري وارد بعذاري
عزائك داري اظلن هايم
الك دوم . يمظلوم . اصيرلك عبد
الك ثار . مثل نار . ابد ما تنخمد

هالثار. يشفي العلل
هالثار. ندعي العجل
بسيف ابنك ماله ثاني. بمجلسك أمك تراني
__
يثار المهدي يدمعة خدي
انه ما عندي فقط بس حبك
بحياتي و عمري بمصايب دهري
جنابك ذكري رجائي بتربك
من اصد ليك . اناديك . تسهل حاجتي
يبن هاشم . بفاطم . تردلي طلبتي

اطباع عدكم كرم
اطباع. بيكم قسم
بهل المجالس عالي شاني. بمجلسك أمك تراني
____
شفت هالمنظر ملائك تحظر
الزجية و حيدر تهل ادمعهم
بطرف كل مأتم يظل يجري الدم
اعله صدر اتهشم لطم بضعتهم
يجي صوت . مثل موت . حضر طه النبي
يلطمون . يونون . على حرگ العبي

يا حيف. بت حيدره
يا حيف. و اميسره
تنادي ما واحد اجاني بمجلسك أمك تراني




كلمات / حسين أحمد الأمين

استهلالية شهر محرم الحرام 3
_ - _ - _

اجري دموعك .. والطم اعله الصدر ..
هالعمر .. بالعزه سجل ختامه
خلي المجالس .. چن صلاة واجبة
لكربله .. و الشرط تترك علامه

ويه الحمد اقره قصيده
ابديها من گطعة وريده

اجري دموعك اجري دموعك
_
اگصد مجالس للطهر گاضي ترى هذا العمر
سنينه
اذخر لجل باجر دمع ما ينفع و يقبل عذر
علينه
بس اليواصل مجلسه يرضى عليه حيدر علي
ونبينه

يهل عينك تصب .. باجر درب .. جنه أمامك
يمن تنحب حزن .. تضرب جفن .. ترضي إمامك
أبد لا تنشغل .. بالك تزل .. دربه سلامك

خلي اعله بالك موقفه .. بالحشر .. يفتخر
من يشوفك لجله حاضر
ما ينفعك غير الدمع .. و التعب .. و السبب
ما يعوفك حاشه باجر

يرضى عليك وهم تريده
ابديها من گطعة وريده
_
واصل يخادم عالعهد ظل الهج بإسم التحب
زمانك
لا تحتمي بفي الغصن خلي العرش يصبح حصن
امانك
هاي المجالس منزله واهبها ربك و أرتقي
بمكانك

تعال المأتمه .. بي فاطمة .. و حيدر يحضره
همومك تنجلي .. واكف علي .. راسه يطبره
بدموعك انهظم .. خلي اللطم .. صدرك يفسره

لا تنسى حافر يسحك .. بريته .. مهجته
نايم بشمس الظهيره
خلي اعله بالك من تناثر .. وذر .. و الأثر
تالي ينلم ابحصيره

أذكر بعد طيحة عضيده
ابديها من گطعة وريده
___
هالمجلس شكد بي عبر خطوه يقرب المنتظر
دمعنه
ابچي و بعد أضرب صدر ربنه لشعائرهم تره
خلقنه
راسك اطبره و لا تظن عقل اليحارب يفهمه
حزنه

و لا تهتم بعد .. عندك سند .. من الزجية
يمن تسحك جمر .. واسي الطهر ..وأخته السبيه
دموعك نازله .. للعايله .. البل الغاضريه

لا تنسى سهم إلي ذبح .. مهجته .. عبرته
طايحة و رگبه گطيعة
عيش و تصور هالامر .. يجرحك .. يذبحك
بيمنته ذبحوا رضيعه

ناشغ فتح لحسين أيده
ابديها من گطعة وريده
____
هاي الشعائر واجبه منصوبه من گبل البشر
رساله
من ادم لحد آخر نبي أقره المصايب كربله
فعاله
واحد ضربها جبهته واحد ذرفها دمعته
دلاله

يخادم افتهم .. عندك علم .. عن اليخدمه
نبي يتبع نبي .. لابن النبي .. مصابه يعظمه
أبد لا لا تشك .. لا تفترك .. من الله نعمه

بهاي المجالس عظم .. و انتظم .. و اللطم
خله يكسرها عظامك
بلكت تواسي صدره من .. ينسحك .. ينطبك
حافر اعله اظلوع أمامك

ما نوفي لوعاته الشديده
ابديها من گطعة وريده

عندك مثل عن هالامر حمزه بخدمته شكد عله
مقامه
حمزه الزغير بالأمس صار الچبير و هم حصل
مرامه
من هالتراث أنته اعتبر همه أصل هذا الأمر
قيامه

يخادم مدرسه .. وي مجلسه .. محلا عشرته
بيمه ذكريني يون .. صوت الحزن .. أسمع عبرته
مشه بهذا النهج .. صارت وهج .. بينه حسرته

خادم حسين و هالصفه .. رفعته .. بخدمته
گضه كل عمره و حياته
سير بدربهم أنتبه .. لا تزل .. و الفضل
ميت و خالد مماته

للحشر عالي يظل نشيده
ابديها من گطعة وريده
_
أذكر بعد ملا وطن صوته الحزين بكل زمن
تردد
لا تنسى ديون الشعر عبود غفلة و الشرع
تخلد
عبد الأمير شكد خلد كاظم تراه بكل سنه
تجدد

بعد أذكر خدم .. وأحد علم .. يمشي بطريقة
بعد باسم تره .. من منبره .. يلمع بريقة
خدم تتبع خدم .. بس الأهم .. توصل حقيقة

لمصيبته دفعوا عمرهم .. رهن .. و الثمن
خالدين بهل القضية
أفهمها زين و لا تشح .. الدمع .. وانفجع
باجر اتوفي الزجية

بهاي الخدامة و العقيدة
ابديها من گطعة وريده




كلمات / حسين أحمد الأمين

استهلالية شهر محرم الحرام 4
_ - _ - _
عيشني الألم افجعلي دلالي
رايد كل حياتي اجروحك ابالي

خليني انكسر ... و بروحي جمر ... ابچيلك عمر
حسين
__
رايد شوغة من جروحك تبقى بگلبي وماتخمد
كل ما ذكرك تلچمني كون بنار و ما تبرد
اتخليني بطفك هايم ماأنسى جروحك لحظه
مهما أبعد عن دربك ترجعني و البس أسود

بهاي المجالس خلني ولهان
ابجي و انوح ابيت الأحزان
بلكت اواسي شوغة اعيال
بلكت اموتن و إنه عطشان

بلكت صورة اجروحك تجي بعيني
و اهيم بلا شعور و تاخذ اسنيني

رايد انفجع .. عايش بس دمع .. و الطم عالضلع
حسين
___
اتركني حاير بالطف ضيعني بذيچ الهيمه
عطشان وأركض حد ما تحرگني نار الخيمه
لوخيل لداست صدرك بلكي من أعثر تسحكني
يحسين إنه بلا جرحك عايش بس ابلا قيمه

يالعيشتني بموتتك هاي
عطشان و أنته المهجتي ماي
مگطوع راسك خاطر انعيش
يرخصلك اشما ننطي مولاي

اجروحك اريدن تاكل بروحي
حد ما موتتي تصبح كثر نوحي

متوسد الترب .. تنطيني گلب .. يالتارسني حب
حسين
___
خليني بنص الخيمه ساعة ما سحگوا صدرك
أنظر لوعات اعيالك من شافوا خالي مهرك
من بتراب اموسدينك وزينب صدتلك تنظر
صاحت ياخويه أدركني من عمري على عمرك

افتحلي گلبي و أنظر شصار
عالغبره باقي و أنته محتار
يحسين ماريد الگلب هاگ
رايد مماتي بحيرة النار

خليني بعزائك محترگ گلبي
چني وي اليتامه هم رحت مسبي

عيشني الهظم .. ساعت اللطم .. بدمعي مااظم
حسين
__
عيشني بحيرة بالك بطيحة عباس اتسمعه
يناديك بصوته الخافت روحك تركض و الدمعه
شفت المصرع گدامك و أنته تناشغ بالامك
اتمنيت الموت ابصفه وحيلك مات من اتودعه

رديت لختك بس بلا روح
اهنانه أريد اتشيط الجروح
لمن رجعت بدون عباس
طحت شكثر عالكاع و تنوح

شايب منكسر ظهرك بلا حيله
طايحلك أخو يا دمعه تبچيله

من طاح الگمر ... مگسور الظهر ... ضيعت الأثر
حسين
_______
ركبني النوگ الهزل بلكت تذبحني آلامك
أصرخ وي زينب بالهم واتلوع مثل ايتامك
انوحن بالخرابه اهناك من بنتك تموت اعليك
من اسمع حچي الشمات يشبه رضات اعظامك

طفله و تموت اگبالي عالراس
هنا يبو اليمه أخذ الأنفاس
وإلي تذبحك هاي مولاي
زينب غريبه و تنظر الناس

ساعد ربي گلبك و شحمل لوعة
أختك تنظرلها بحيرة مفجوعه

ريحانة نبي ... وي الاجنبي ... بغربة تنسبي
حسين




كلمات / حسين أحمد الأمين

استهلالية شهر محرم الحرام 5
_ - _ - _
عاهدناك بالدم احنه عاهدنه
أبد متموت يحسين بضمايرنه
_______

اجه شهر الحزن بالحسرة و الآهات
و كل شيعي لمصابك يهمل العبرات
عاهدناك نلطم نبقى بالعزيات
لو بالموكب انكتبت منيتنه
_____

طلسم طفك امحير عقول الناس
بكثر دمعاتك الطاحن على العباس
يا مالك دليلي و كلشي بيه احساس
غيرك يا ابو اليمه فلا عدنه
______

ما نترك عزائك لو يجينه الموت
مهما حاولوا ما ينصه هذا الصوت
بقين و بالعهد باچر جنان انفوت
صحنه بيك صحنه و بيك آمنه
_______

لو نترك محرم شائت الأقدار
ننصبلك عزيه و مأتم بكل دار
ما نترك مصابك بالحزن و الثار
باجر تخلص و ترجع مجالسنه
________

باجر تخلص و تنهض الك خدام
و ترد المجالس أكثر من العام
نمشي المرقدك و نبدل الأعلام
و ترجع بالدموع اترد ماتمنه
__________

يل الضحيت لله بكلشي متبالي
اشما قدمنه الك يحسين من غالي
ما نوفيك لو نلطملك اليالي
عبيدك احنه نبقى و أنته آمرنه
_________

يل الواحد فلا مثلك بشر ينعد
على طول الزمن نحرك يظل ممتد
خدام الحضرتك يا حسين أشهد
شمحلاها لو يحسين تقبلنه
_______

تربينه بمجالسكم على الخدمه
و أبد ما نترك امصابك يبو اليمه
نسير بدربك و ما نهمل النعمه
يحسين بخدمتك شان رافعنه
_____

نعاهد ما نزل عن الدرب المره
إذا زلينه لا ترضى أمك الزهره
كل خادم يقدم منحره و عمره
لحد ما بالحشر چفك يساعدنه




كلمات / حسين أحمد الأمين

استهلالية شهر محرم الحرام 6
_ - _ - _

يا حسين طول بعمر المدامع و البچي
يا حسين خلني كل يوميه للمجلس اجي
_

يا حسين شعندي إنه و ما اجيك
الخير كله من فضل خيرات اديك
عيني تعمى لون ما ابچي عليك
هيه بس الدمعه التواسيني بيك

يا حسين خلني يم بابك أظل و ما احير
يا حسين اليذل يم بابك ايصيرن چبير
_

بالمجالس يگضي عمري إنه أريد
كون ما أتركها حد گطع الوريد
مني خذ يابو علي كلشي التريد
بس لحظه عنكم لا تخليني بعيد

يا حسين دوم خليني بمصابك ما ازل
يا حسين أنته والد وانه عندك چن طفل
____

رايد وياك العمر كله يروح
ابلطم والزنجيل والصوت الينوح
رايد من الطف تعيشني جروح
بلكت أعله امصابك اتعودلي روح

يا حسين عايش بالآمك إنه أرد اصير
يا حسين اموذر ومسحوگ وانلم بحصير
___

اتركني يمك خاطر إنه ما اضيع
بحرگة ابچي صاحب النحر القطيع
أقسم اعليك بنحر طفل الرضيع
رايدك يوم الحشر ليه شفيع

يا حسين مالي غيرك يا بعد ناسي وهلي
يا حسين اليبچي يمك كل همومه تنجلي
_____

أقسم اعليك برقية بنيتك
لا تدير الوجه عني مروتك
إنه تكفيني فقط بس نظرتك
و أبد لا تحرمني من ازيارتك

يا حسين يا هوه الله الماله بالدنيا مثيل
يا حسين رايد الدمعه بمجالسكم تسيل
_____

أنته يا اصفه هوه اتنفسك
شنو إلي شافه و تجنن عابسك
إنه ما شفتك لچن اتحسسك
جننتني بحبك و حب مجلسك

يا حسين شما لطمت اعله الصدر وشما بچيت
يا حسين رضه من الحافر إنه ما وفيت




كلمات / حسين أحمد الأمين

فاطمة العليلة سلام الله عليها 1
_ - _ - _

ما ارد اموت بعلتي وكثر الونين
خليني اموتن بالسبي بويه حسين

امشي واطيح بسمك اصيح
بويه حسين

- - - - - - - - - - - - - - - - - - - - -

بوية خليني أعلى بالك من تسافر
ارد اروح وياك لا تكسرلي خاطر
وي رقيه أمشي واطيحن يوم عاشر
واصبغ امتوني من ادموم المناحر

أركض بين الخيم اسحگ جمر
ويه زينب حايره بدرب اليسر

ومتني جريح بسمك اصيح
بويه حسين

- - - - - - - - - - - - - - - - - - - - -

صح عليلة وروحي ذبلانه ابألمها
بس تهاجر روحي تطلع من جسمها
بوية خذني وياك كل علتي اضمها
افرش امصلايتك و ارجع ألمها

بمشيتك تترك عليلة للالم
خلني اموتن وسط دخان الخيم

ودمعي يسيح بسمك اصيح
بويه حسين

- - - - - - - - - - - - - - - - - - -

لا تخليني بدمعتي و الهجر
بعد عينك ما يظل ليه عمر
موتي يكرب والكلب وسطه جمر
ابقى وانه بلهفتي يمتى تمر

حفرت اعلى الخد تجاعيد الدموع
بعتبة الباب انتظر و اعلك شموع

بموتي استريح بسمك اصيح
بويه حسين

- - - - - - - - - - - - - - - - - - - - -

عكب ما تمشي احفر البنتك لحد
خلني من هسه المنيتي إستعد
مو قليلة حسرة الفاكد ورد
ياهو بعدك ينظر اعليه و يصد

الهجر بعدك ياكل بعمري سنين
حالي عگبك يصفى للون و الونين

حال الذبيح بسمك اصيح
بويه حسين

- - - - - - - - - - - - - - - - - - - - -

من وصلت الكربله اتراوت جروح
جن شفت راس الرمح شايله روح
جن يتامه بلايه واليها تنوح
هذا ابويه حسين دم نحره يلوح

تالي ابن حذلم ينادي بالدمع
حسينكم يا اهل يثرب منصرع

جسمه طريح بسمك اصيح
بويه حسين





كلمات / حسين أحمد الأمين

فاطمة العليلة سلام الله عليها 2
_ - _ - _

گعدت بالليل وي نجم سهيل
مهدومة حيل بمدمع همال

يم أبوها گاعدة
مو طفلة جنها والده
منتظره يلفيها النده بمدمع همال
____

طفله ازغيره وجانت حلوه .. بس البلوه
حاطتها
بليل وسدر عنها الوالد .. ما ظل واحد
بمحنتها

محد إلها باقي عليله اتركوها
ياهو يواسي العليل و أهلها چفوها
لا أخ إلها لا عم و لا ظل أبوها
مشوا و بچلمة اوداع أحبكم لگوها

ديرة خلان چانت قرآن
صارت أحزان و بلايه أحباب

حايره اعليمن تصد
و الوجه مثل الورد
اتذبله چلمة بعد يشرح يا حال
____

گعدت يمهم مثل الشمعه .. بهيده الدمعه
من أطيح گعدت واتانيهم بلكت .. واحد هلبت
ليها يصيح

تدعي وياهم اليوم تحضر هدمها
بلگت ثغر الحسين ينادي بسمها
وحيده ما تريدن تظل ابألمها
عليله و من يروحون تموت بحلمها

منتظره تروح متروسه اجروح
متهيد الروح فرگاهم بين

ظلت اتروح و تجي
من العيون الحجي
كثر ما بيها بجي عالخد شلال
_

ظلت تبچي اتعنى إلها .. حسين و گلها
لا تبچين
اعزيزه اعليه دمعة عينچ .. كافي ونينچ
فدوه حسين

زينب جتي الها تصبر الحبيبه
رجعتنه يعمه تراهي قريبه
تگلها من السفر هاذ أشاهد مصيبه
خافن من ترجعون قتيل و سليبه

ظلت بآلام و دمعة أيتام
من الاحلام شافت لوعات

ظلت ابحيره ورعب
و الجرح نايم بالگلب
غربه و بديرة غرب ما يصفه البال
__

بخدها الدمعه تنزل ترفه .. بس يا وسفه
عافوها
مثل الميته صارت بتهم .. من شافتهم
تركوها

أصبح مظلم البيت وحيده و عليله
الموت إلها أظن حان شفتها ثچيله
تحرك ظلت الباب و لا من وسيله
بلكت هالهوه الهاب يذكر دليله

بعتبات الدار سوت تذكار
بليل و بنهار أتاني الغياب

ادز سلام اويه الهوه
مخصوص لهلي بنينوى
گله بنتك بالضوه تنحب و ليال
_____

كل هم الدنيا اعليها التم .. اعليها غيم
برسومه
بالباب اتسولف منحتها .. وابدمعتها
المهظومه

ظلت تنشد الراح و اليعود عليهم
لمن تدخل الدار يمر كل حچيهم
شابت بيها الأنفاس سوالفها بيهم
كل يوميه بالطيف للطفوف تجيهم

مرت بمصاب عذبها عذاب
من الغياب عاشت بآلام

اللحظة مرت چن سنه
أبد ما شافت هنه
و الحزن بيها بنه ديره من اجبال




كلمات / حسين أحمد الأمين

فاطمة العليلة سلام الله عليها 3
_ - _ - _

سافر عني الظعن بي كل ريحة هلي
بيدي محضره الچفن من ما صاحوا الي

ميته بالمدامع يا دهر المواجع
من ما صاحوا الي
_

مشوا عني بليلة ظلمه و خطوه الماشي ثچيله
صوت من گلبي أسمعه استعدي يالعليلة
درت وجهي وكل اخوتي عني تمشي بلايه حيله
صحت بويه اركب اني سكت و المدمع يسيله

بدموعه أسمع حچه تصبري يبنيتي
من لاحظته بچه چن گربت موتتي

چنه ما هو راجع يا دهر المواجع
من ما صاحوا الي
___

هم ترد من مشه صحته ابعيد چان و ما سمعني
خطوه من يمشي احسن چنها تطلع روحي مني
فارگوني بلايه رجعه والدي بغربه تركني
يا دهر صرت الوحيد شيبت من زغر سني

أهلي لمن مشوا نام بگلبي الألم
ها رجعوا ها اجوا عشت بحيره و وهم

كلشي بيه ضايع يا دهر المواجع
من ما صاحوا الي
____

الچنت اغفى فوك صدره هسه أنام اعله الترايب
من اگعد اشتم بهدومه آه يا عطر الحبايب
غيم الحزن اعله روحي و ليلي يلفي بالمصايب
يخلص ويه السهر عمري جن شمع بالنار ذايب

ما فارگني السهر من فارگني الهوه
عشت بظلمة قهر يوم الهاجر ضوه

و لا شفت الهواجع يا دهر المواجع
من ما صاحوا الي
____

كثر ما ذابحني شوگي نايمه و تهل عبرتي
أحلم بطيفي يجيني و بيده يمسحها دمعتي
و اگعد بحظنه و أعاتب بعينه يرويها لهفتي
و ينظر الوجهي و يناشد من الحزن بويه ذبلتي

بحلمي يحضر ردت و احچي مصاب الغرب
من يوم إلي رحت عشت انه بلا گلب

احچي و هوه سامع يا دهر المواجع
من ما صاحوا الي
____

أنتظر ليليه هسه بلكي نجمه ترد خبرهم
بحال أبويه و حال اخوتي والله موتني هجرهم
شكثر مشتاگه أشوفه رايده بس نظره منهم
يا دهر محد فگدني عجبه چا موش انه بتهم

محد مشتاگ إلي الچنت انه امدلله
لا عمي و لا علي رجعوا من كربله

بس لا بالمصارع يا دهر المواجع
من ما صاحوا الي
__

إنه أحس گلبي لچمني چنه ما يرجع إليه
من مشيته اعرفت انه انذبح بارض الغاضريه
بس بقيت ابدربه اناطر بلكي عطره يمر عليه
من اجاني دم اشمه و ريحة الدم المنية

ها يا ريح الخبر ميت بعده عدل
أسمع چلمة نحر مذبوح و منچتل

و مسبيه الودايع يا دهر المواجع
من ما صاحوا الي




كلمات / حسين أحمد الأمين

أم البنين سلام الله عليها 1
_ - _ - _

بالطف أبو اليمه كون ... يا يمه يفخر بيكم
_. _. _

الموعد گرب و أرض الطفوف اتناطر
شدوا حزمكم و استعدوا الباجر
ماريد أبو اليمه وحيد و حاير

صيروا ستر جيش حسين ... أربعة و امسميكم
_

صيروا درع يم الخيم و الخدر
حتى الهوه يم الخدر لا يفتر
ماريد واحد عالخيم يتجسر

الزينبكم افدوا الارواح ... حيدر علي اموصيكم
____

اعله الخيم خلوها ترف الرايه
و يصبح اسمكم بالطف الوفايه
هذا الوعد مني و افهموا حجايه

إلي يرد دون حسين .. يحرم حليبي اعليكم
____

يم الحسين اتصغروا و اتكبرون
بلايه إذن يا يمه لا لا تحجون
هاذي وصيتي الكم يعبدالله و عون

حگ الربه توفي اليوم ... و بأمرته خليكم
_
كون بقتالك يبني جعفر ترعد
و يابه الفضل أنته الذخر يوم الجد
طفيها عين اعله الخدر من اتصد

عيدوا علي بگطع الروس ... بسيفه علي مربيكم
_
فروا الكواكب لو أمر يمه حسين
كونوا عبيدا ترفعوا اليوم الدين
لو يحجي يمكم لا ترفعون العين

صيروا جبل للحگ سيف ... واتمسكوا بواليكم
__

ماريدن إسهام العطش تاخذ حيل
واحدكم الحد الخيم يصبح سيل
ما أرضه إلا ادماكم اعليها تسيل

لا ما تقصرون بروح ... من العطش ياذيكم
___
رايتكم اعله المشرعه ركزوها
يم الحسين اترفرف و علوها
حارس العين اعله الخدر خلوها

دون الخدر طيحوا العين ... يا يمه أفخر بيكم





كلمات / حسين أحمد الأمين

أم البنين سلام الله عليها 2
_ - _ - _

انه امكم و ارتجيكم. سلمت رايه بديكم
بيها عنوان الوفاء. خلدوها بكربلاء
_

يابو فاضل سلمت بيدك امانات
رايه حسين و حجاب الفاطميات
رايتك ترفعها لعنان السماوات
و زينبك تبقى اميره اعله الاميرات

كون ترجع يابو فاضل. ما يشوفوها العواذل
اروع آيات الولاء. خلدوها بكربلاء
_

يبني جعفر عيد صولات الأسود
كون بالطف يمه اريدنك خلود
عن ابن خير النسه بروحك تذود
احزام اريدك للحسين اتظل صمود

زلزل الحومه بحسامك. دوم اريدن عالي هامك
كون حيدر بالاباء. خلدوها بكربلاء
____

عون اريدنك تخلي بالطفوف
نايحه بكل دار بالكوفه اشوف
احصد أرواح و بعد ازرعها خوف
خلي دمهم يصبغ الواح السيوف

لا تردلي بلا دماهم. حمره اشوفنها سماهم
خلي دمهم للسماء. خلدوها بكربلاء
____

أنته يا عبدالله اريدنك تصير
بالطفوف بلا شبيه ولا نظير
خلي من سيفك عدوك يستجير
كلمن يشوفك علي چنك يحير

حسين بين العين اريده. كلها فدوه إلا وريده
سالم يعود البهاء خلدوها بكربلاء
____'

هالله هالله يا بنيني هاي أهم
مو مهم دمكم أهم منه العلم
صيروا ساتر لا يشوفون الخيم
للخدر فدوه يصوبوكم سهم

هالله هالله يا نشامه. زينب اتظل بسلامه
أنجبتكم للفداء. خلدوها بكربلاء
__

من اجه بشر إبن حذلم للمدينة
عظم الله الأجر كلي بونينه
راحوا الأولاد كلهم يا حزينه
كلي و حسين بسيوف امكطعينه

صحت و بونه فجيعة. عظم الله اجر الوديعة
خطو النصر بدماء. خلدوها بكربلاء




كلمات / حسين أحمد الأمين

أم البنين سلام الله عليها 3
_ - _ - _

ام أربعة انطت ولد وفايه
أولهم إلي سلمتله الرايه
من هذا الإحساس. تتعلم الناس
انطت ولد وفايه
____

أربع كواكب سلمت و تكول خاف امقصره
لحسين لو عندي الف كلهم فداء النحره
بلكي يصيرولي حرز و ترضى عليه الزهره
مو مهم مات شچم ولد المهم اوفي العشره

تسولف ولكن مستحاها هوايه
بس لا يقصرون الولد من هايه
تتراجف أنفاس. تتعلم الناس
انطت ولد وفايه
_

ماكو مثلها اعله الأرض. بالوفه ما إلها أحد
مرة أبو تصبح خادمه الولده گلبها يمتد
تفديه شبان أربعه. و منها الجفن ما يرتد
عدها بصيره و عالمه. بالطف تعرفه استشهد

دوم تلهج بالطفوف و بالبين
تكللهم انتو قدمتكم لحسين
واحدها نبراس. تتعلم الناس
انطت ولد وفايه
_

كالت يولدي من مشوا. اتذبحوا دون حسين
ماريدن اتردون إلي. ياخذكم وياه البين
كون اربعتكم عالنهر. طيحتكم اتعلي الدين
عباس منك رايده. عزب سهم وسط العين

انطي جفوف و بعد انطي عينك
كل ذني سهله ولا يطيح حسينك
صوب بعد رأس. تتعلم الناس
انطت ولد وفايه
_

تشهد عليها أم الحسن. قدمتهم و محتاره
ظلت تناشد عن ولد. واحد تريد اخباره
ما همها كل الاربعه. بالگلب شبت ناره
تلهج يربي حسين إلي. سالم يعود الداره

هذا الوفه ماله شبه لا والله
حتى ما صاحت عليهم ويلاه
شده و عظم باس. تتعلم الناس
انطت ولد وفايه
____

اتلگاها هاليوم السبط. واكف يرحب بيها
يا هلا بأمي الغاليه. بأم الوفه يسميها
مشتاگة جانتله اشكثر. والخاطر يأذيها
يمسح دمعها بيمنته. و الزهره گصدت ليها

مشكوره يم الأربعة و تسلمين
و حيدر اجه يبارك تعبها لحسين
گاصدها عباس. تتعلم الناس
انطت ولد وفايه




كلمات / حسين أحمد الأمين

أم البنين سلام الله عليها 4
_ - _ - _

من رد الظعن و الحره شافت أم البنين
اجتمعن بالبواچي والسوالف عالميامين
يمه ولدي طاحوا عالترايب دون الحسين
__

گعدت تلطم العين و تنشد عن الحسين
زينب ييمه الگلب بيه لاهب
هلت زينب ادموع ييمه گلبي مفجوع
انه بعيني شفته انذبح فوك الترايب

صاحت صاحت آه يحسين يبني
صاحت صاحت ابد ما يهده حزني
صاحت صاحت يريت الموت أخذني

كل ليلي و نهاري چنت أتاني الوجهك انشوف
تالي عالتراب ابلابه راسك برض الطفوف
يمه هم تألم من وريده حزته اسيوف
____

أخبرني اعله ولدي وفو يا يمه عهدي
عبدالله ضحه إله بگطعة وتينه
أذكرها چلمته من راح و شبگته
ارفعي ييمه راسچ عالي بينه

وفه وفه أخبريني بعهوده
وفه وفه قدمهن زنوده
وفه وفه ضحاله بوجوده

أخبرني بنزاله من رفع سيفه يحارب
راضي حسين عنه لو بقه بابني يعاتب
لو ما راضي عنه الگبره اكصدله و أحاسب
____

انشدچ بعد عن عون نطاهن فدوه العيون
وفه بالحرب لو بخل لحسين دمه
و اسألچ حال جعفر طب للحومه يزئر
عالتراب تگطع وذر يا يمه جسمه

فزعلچ فزعلچ لمن بسمه ندبتي
فزعلچ فزعلچ وفه ارباي و سهرتي
فزعلچ فزعلچ احچيلي يبنتي

وگف عالخيمه حارس و أنه گتله فدوه لختك
گتله دون أخيك تفدي روحك إنه ردتك
ما ريدك تردلي تنطي اريد بدم رگبتك
__

بعد واحد صفاته گمر يضوي شحلاته
راعي الكفالة يزينب خبرينه
انچتل من دون الحسين قدم روحه والعين
لخيه تگطعت يساره و يمينه

للحسين للحسين وفه بگطعة رگبته
للحسين للحسين قدم كل مهجته
للحسين للحسين إنه بزغره نذرته

خبريني اعله حربه من هجم و مراكض الناس
يشطر بالعساكر چن علي بضرباته عالراس
ييمه طمني گلبي و كولي وفه أبني عباس
___

من رحتي سبيه نهض من عالوطيه
بس لا بقه اعله النهر و أنتي مشيتي
گتله بيوم الوداع الزينب توكف اشراع
تحامي الظعينه و تعلي يمه صيتي

الكفاله الكفاله بدماك وروحك اتصون
الكفاله الكفاله اهم يمه من العيون
الكفاله الكفاله عنها لا تقصرون

ها يابو الحميه تالي ظعنك يصفه بالشام
بخرابه امگعديهم كل مشيهم بين الازلام
مو هذا الوعد ما گتلي تغفه عيني و تنام




كلمات / حسين أحمد الأمين

مسلم بن عقيل عليه السلام 1
_ - _ - _

يا ريح وي جنح الحمام وصل لبو اليمه السلام

هاي الأمانه لحضرة الغالي
____

وصل سلامي من البعد وقره بدمع مرسالي
كله يكولن مستحي مسلم يردلك خالي
بالمغرب انصاري شكثر بالليل امشي الحالي
الواكف بظهري تره هو الصبح جتالي

حاير وانه بديرة غرب اتخطى من درب لدرب
ماعندي واحد ينشد شحالي
هاي الامانه لحضرة الغالي
____

بالكوفه امشي والتفت عطشان انه بيا حال
عافوني كلها الوحدي والسبب يحسين المال
ضليت وحدي بلا زلم بس طوعه صارت رجال
حشمت نادت ياعلي والياعلي تهد اجبال

الحومه جن يوم الفصل لمن صحت يابو الفضل
جن الكمر ظل ايتراوالي
هاي الامانه لحضرة الغالي
____

من گيدوني من القصر حاچيت هالريح بهاي
يابو علي ارد انشدك يم بنتي لا تبچي هواي
طفله حميده وتنجرح دمعته اشد من بلواي
والطفل لو راح الابو يتيه بعد حتى الراي

ماريدن اسمعها تنوح زغيرة واخاف من الجروح
تكسر كلبها وهذا جتالي
هاي الامانه لحضرة الغالي
______

الغربه تركت بالكلب لبنيتي اقسى مصاب
من تنشدك عني بدمع امسح دمعها السجاب
طفلة تظل وتنتظر هلبت يرد ليه جواب
گللها تاركلچ اثر ذاك القصر صار اتراب

گلها القصر منه وگع جواه بقه و هو ارتفع
طاح القصر بس هو ظل عالي
هاي الامانه لحضرة الغالي
_

لو ردت تمشي للحرب لزينب حميده انطيها
ماريد واحد بالسبي يلوعها و يبچيها
ما عدها لا ام لا اخت يشگف السوط اعليها
غالية و روحي تلچم لو واحد يأذيها

خاف الدمع منها يسيل خل يمسح بخدها العليل
يلچم دمعها لو بقى يلالي
هاي الامانه لحضرة الغالي




كلمات
حسين أحمد الأمين

مسلم بن عقيل عليه السلام 2
_ - _ - _

قصر الاماره شاهد الخلودك
ما ينمحي طول الزمن وجودك
____
وفيت عهدك للنبي و امامك
بالحومه شاهد للفخر حسامك
ما دنگت للسيف عالي هامك
هسه اليزورك ينحني امامك

قدمت روحك صادق بوعودك
ما ينمحي طول الزمن وجودك
_

يا مرجع العشاگ و الغياره
فوگ القصر أسست للزياره
واگف تصلي و أسمعت بشاره
باچر يمسلم مو قصر مناره

يامن فديت بدمك العهودك
ما ينمحي طول الزمن وجودك
____

ما ينسي التاريخ يابو طاهر
صولة يمينك بالحرب مفاخر
لهذا الزمن صوتك بقى يجاهر
أول فدائي للسبط و ناصر

باقي ولائك معتلي صمودك
ما ينمحي طول الزمن وجودك
__

أنته الهشام الوصلت رساله
چلمة الحق اتعيش لا محاله
دافعت عن حسين و ابساله
ذكرك خلد طول الزمن دلاله

يوم الحشر بالجنه هم ورودك
ما ينمحي طول الزمن وجودك
____

يالحامي دين الله في ثورتك
اجيال گاعد ترتوي بعبرتك
الكوفه چانت مكه من نظرتك
و أنته محمد وحدك بغربتك

لا ناصر العندك يحامي جودك
ما ينمحي طول الزمن وجودك
____

تربات حيدر بالحرب قتالك
منشطر راسه يرجع الدنالك
تشبه علي يا مسلم بفعالك
مالك مثيل بفكرك و جمالك

محد گدر يعبرهن الحدودك
ما ينمحي طول الزمن وجودك
____

يابو حميده يبقى الك دمعنه
لا ما يمل الگلب من حزنه
نمشي اعله دربك ما يزل چدمنه
اشفع يمسلم بالقيامه النه

بحسين نقسم اشفع الوفودك
ما ينمحي طول الزمن وجودك




كلمات / حسين أحمد الأمين

مسلم بن عقيل عليه السلام 3
_ - _ - _

مسلم بكوفة علي ظل يعتلي
و سيفه بيمينه
من بده وكت الحرب بث الرعب
من حدها عينه

خلد أعظم ملحمه عمه حيدر علمه
_

من لاح مصباح الفجر والهاشمي جر سيفه
سلطان صار اعله الحرب يگطع الروس بكيفه
يشطر فقط طول وعرض توقعوا علي رد طيفه
خله الرگب يتشامرن بالحومه ماخذ حيفه

خله الدمه بحر النجف هد و هتف
چنه الغضنفر
بجيشهم ما ظل عدد طلبوا مدد
عالكوفه سيطر

گلف يوم الموزمه عمه حيدر علمه
___

شافوا قتاله بالحرب من يرتجز بالعسكر
واحد سأل واحد نشد ميت عدل چا حيدر
قائدهم انطاهم أمر خل يشرد الما يگدر
نازل الموت ابيمنته وهو الملاك المؤمر

ساكت و سيفه خطب گص الرگب
ماكو شفاعه
أبو طاهر چن اسد بيهم رعد
أصل الشجاعه

الشرد من ايده ازلمه عمه حيدر علمه
_

احتار مسلم بالعدد خايف يخلصون الناس
لو خلصوا بسيفه ذبح يزعل عليه العباس
ظل واگف و يبتر زلم خله الجيوش إبلا راس
لو مو وصية بو الفضل ما خله بيهم أنفاس

بس ذكر هذا الأمر من الگمر
گلاله هونك
خلي چم فارس إلي و أنه و علي
گرهن عيونك

خله بيهم مرحمه عمه حيدر علمه
__

مچتوف لكن بالغدر گدروا ترى ايطيحونه
چا سيفه راح الكربله لحسين يحمي اظعونه
من نظروا بسوح الحرب چن حيدر يشوفونه
لو ما غدرهم چا اظن عالنهر هم يلگونه

وگف يمهم و انتفض ليهم رفض
ينطيهم أيده
حسين من جاه الخبر بيه أفتخر
والد حميده

ابتشر وجه بمسلمه عمه حيدر علمه
____

طايح صحيح من القصر بس هسه صار اعلى هواي
واسه الحسين بمقتله عطشان ما شارب ماي
هسه ملائكة العشگ اتزوره و تگله مولاي
من عالقصر زار السبط و اتسمى منها الوفاي

مسلم بطول الدهر باقي گمر
و للعزه هامه
هم سفير القل هوه و هم الدوه
چان بحسامه

مسلم و ما اعظمه عمه حيدر علمه




كلمات / حسين أحمد الأمين

أنصار الحسين عليه السلام 1
_ - _ - _

ليلهم يخلص دعاء كلها تهتف كربلاء
ننتظر سوح اللقاء يابو الأكبر
____

عطرك أسرنه بحنانه بالعشك سارت خطانه
و صاح بينه
نريد نوفي وياك عشره كل محب سولفها نحره
يا ولينه
بشوگ و بلهفة مشاعر نهتف بكسرة خواطر
حن علينه
بالگلب نيران تسعر ما تهيد إلا انتوذر
عاهدينه

احنه انصارك نريد بين اديك الموت عيد
انفاخر بگطع الوريد يابو الأكبر
__

أول اصوات اللهيب من إبن ظاهر حبيب
ينادي يحسين
رايد افنيلك عمر حتى لو خذني الكبر
انصر الدين
بعمري كله اتحزمت بالمنيه إنه همت
يا ضوه العين
منتظر طرة الفجر حتى أصعد عالمهر
و افدي الوتين

شمحله المنيه بحضرتك روحي فداء النظرتك
اتباهى إنه بخدمتك يابو الأكبر
_

ثاني صوت بمرتجه صاح بي بن عوسجه
ننطي الاروح
لحيتي تنزف دمه وعد لمك فاطمه
وأنه مرتاح
فاطمه وعدت هلي يعني رايح للعلي
و راسي برماح
يمن افديلك عمر خلني بالطف انطبر
و الحلم لاح

يم الحسن صار الحلم
تخضبت لحيتي و المهم
انگطعت رگبتي من السهم يابو الأكبر
___

صوت ثالث من زهير جاوبه بدمه برير
الموت يحله
لوف مره انجتل و أرد يحسيني عدل
ما نمله
إنه تربايت محن بكل حروبي إلي مضن
سيفي عله
باجر إنه الابتدي ارتجي يا سيدي
إنه اوله

خلي أنزل ابسوح الحرب
سافلها عليها من اطب
بلون الدمه اتصير الترب يابو الأكبر
__

الهوه ضاگ بريته نزع درعه و لامته
صاح مفتون
لجل الخدر نفدي المهج و الطفوف انعجها عج
نگلب الكون
لو فرضنه نتركك نرجع المن ننشدك
و المن انكون
باجر يثور الغرام و احنه بينه هالهيام
جن الجنون

صوت ذايب بالحنين عابسك جن يا حسين
يصيح فدواتك وتين يابو الأكبر




كلمات / حسين أحمد الأمين