أنصار الحسين عليه السلام 2
_ - _ - _

باچر تصير الحومه تذكار
_

بالحومه باچر يعتلي الصوت
ويه الحسين شمحله هالموت
الواگع نزفه الجنته يفوت
بالعشگ نمضي الچدم سار
___

باچر تشوف اطفوف من دم
بكل بيت ليهم تلگه مأتم
يعتلي الصوت من المخيم
عباس يصرخ عفيه الانصار
____

واحدنه باچر بالحرب صال
من الدم تشوف الغبره شلال
يبقى ذكرنه الكل الاجيال
وفايه نبقى البيت الابرار
__

باچر يلوح السيف برگاب
الطايح نزفه زفة احباب
فنه اليلوح الخيمه بعتاب
يرجع و رأسه بسيفنه طار
____

بثار الزچيه باجر انعود
نهجم عليهم هجمة افهود
نگطع رگبهم نملي بالجود
باچر بدينه ناخذه الثار
_

باچر نخلي الحچي للسيف
حز الرگاب ايصير عالكيف
إلا نمرهم چن علي بطيف
بالحرب تنظر كلها كرار
__

جر اليساره انجرها الارواح
يابو علي و هذا الفجر لاح
للخيمه يوصل صوت الانياح
إلا نخلي الجيش محتار
____

ياهو اليصل حد العقيله
يجني على روحه و يويله
إلا نشوفه انجوم ليله
أشهد علينه احنه الأحرار




كلمات / حسين أحمد الأمين

أنصار الحسين عليه السلام 3
_ - _ - _

انصارك احنه يرخص دمنه بالغاضريه
لا ما نرتد باچر تشهد يبن الزچيه

كل واحد من عدنه صاح لجلك نفديها الارواح
بالغاضريه
____

شاهد يظل الصوت باچر أسود انفوت
بالحومه نزئر
ما بينه لا و الله اليخذل لمن تنخاه
علمنه حيدر
لجلك لاجل هالدين ننطيله ماي العين
انقدمله منحر
ما عدنه فارس خاف واحدنه هيبة قاف
جبل من عسكر

انوقع بالدم لا ما نهتم لأمر المنيه
واحد واحد بعينك شاهد فوگ الوطيه

بشوگ انباوع للمصباح لجلك نفديها الارواح
بالغاضريه
_

باچر نثبت راي يم الخيم و الماي
ننطي اشاره
بس خل نهز السيف توگع رگاب بكيف
احنه الغياره
اتعلمنه من الحيد هاي الحرب چن عيد
و النه بشاره
بالحومه كلنه اجبال ما بينه واحد مال
نوگف مناره

منه أطلب باچر نرعب جيش اليجينه
من الخوفه أهل الكوفه تسمع ونينه

الطف يجري بالدم راح لجلك نفديها الارواح
بالغاضريه
__

انصارك و منهاب و الطف تشوفه ارگاب
لمن نحارب
من تهجم الفرسان الدم شبه بركان
فوگ الترايب
بالحومه نصرخ صوت يرعب ملاك الموت
انشوفه العجايب
اتحتم أمر الجنون ننزل نهز الكون
و احنه الغوالب

الرايد يدنه يوصل حدنه يكتب عذابه
بينه اكفاية انعلي الرايه احنه الصحابة

يكفيكم هذا الإيضاح لجلك نفديها الارواح
بالغاضريه
____

صح احنه بس سبعين و همه عدد جيشين
بس ماكو فارس
نهجم بلايه ادروع نفدي الزچيه اضلوع
صاح انه عابس
جاوب زهير ايگول باجر سيوف اتصول
اتاسس مدارس
مو مره لا يحسين لو انچتل ألفين
ارجع انافس

لو اتوذر و التم و أنذر لا ما اعوفك
يشهد حيدر انته الكوثر بعيوني أشوفك

باجر يم حيدر ارتاح لجلك نفديها الارواح
بالغاضريه
____

اتوسط حبيب و صاح هذا فجركم لاح
وفوا عهدكم
يا جابر و يا جون رايدكم اتصولون
قدموا مهجكم
يا مسلم إنه انخاك الزهره تريد ادماك
و هاذي حربكم
هايه حرب عشاگ و الموته منهو اشتاگ
بالطف وعدكم

ها يا زاهر سيفك عامر بالطف قيامه
الرايد ثوره من دم نحره يترك علامه

رايدكم بالطف أشباح لجلك نفديها الارواح
بالغاضريه




كلمات / حسين أحمد الأمين

العباس بن علي عليهما السلام 1
_ - _ - _

روج النهر شاف الگمر
لاح
بجيت اللوه مايه انچوه
طاح
دمعته تنزل نعش من ابو فاضل عطش
_

شاف جيش ومن نظر لچفوفه
الگوم كلها شردت من الخوفه
سبع تالاف العدو مچتوفه
ما بقى ماي النهر بجروفه

بحد النظر ضل بس اثر
جيش
شاف العدد يطلب مدد
بيش
بالطفوف الدم فرش من ابو فاضل عطش
__

من برز للمعركه بجبينه عصبه
بيها يتنومس تضيف لثگله رهبه
چنها لحسين العصابه بيها عجبه
من يهاجم تهتف بإسمه و تندبه

تندب إله للعايله
ماي
ظل يعتلي هيبة علي
جاي
خالها بگصته نقش من أبو فاضل عطش
____

شاد بيها هالعباره من يحارب
زينب اتظل الاميره بيها كاتب
لمن طاف اعله النهر دلاله ذايب
نزل و موجر عطش للماي طالب

سد الهوه ذل و طوه
كون
عنده العذب وسط الگلب
عون
شاهد اعليه العرش من أبو فاضل عطش
____

شال رايه و بالعدو يحصد حصد
من نظرته الفارس ايظل يرتعد
العلگمي صار الجثثهم چن لحد
و الرگب تتراشگ و ما ظل فرد

دم كربله بي مرجله
غيض
خله الدمه الحد السمه
فيض
الموت و الكون اندهش من أبو فاضل عطش
_

صار دمهم و النهر يجرن سوه
و أبو فاضل مبتسم بيده اللوه
من زفيره الماي بالجربه انچوه
يروي دمهم كل اراضي نينوى

رد معتلي غيرة علي
عين
بس الأثر ماي النهر
وين
ضامه الليل اهدعش من أبو فاضل عطش




كلمات / حسين أحمد الأمين

#ابا_الفضل_العباس_ع ( عگيلي )
_ - _ - _

موت أحمر بالطف راواهم
__

شال السيف و شد الثامه
خله الدم يجري من الهامه
ضلت بس روس الگدامه
بس راس ابسيفه خلاهم
____
بالطف سوه عجبه بسيفه
بالدم ناوي ياخذ حيفه
من حيدر راواهم طيفه
من داء الشرده داواهم
____
صاح بصوته و رج الحومه
ياهو الرايد يگرب يومه
بحيدر ذكرهم و علومه
من يخزر تدمع عيناهم
____
بيده الرايه و يحصد بيهم
كاتب بيها إلا امحيهم
تجدح عينه غيض اعليهم
مثل اتراب الطف ساواهم
_
خله الحومه بحر من الدم
كلمن يوصل حده يندم
حسين بصوته خويه تسلم
باد الگوم و كل ذكراهم
____
بداهم چن ماي الجربه
الحرب بكيفه و هاذي حربه
رفعوا رايه و كتبوا ندبه
ادخيلك يالعباس الواهم
____
بالطف سجل أروع موقف
خله الماي بجرفه يرجف
من صرباته الحومه تخسف
للمذبح سيفه وداهم




حسين الأمين

العباس بن علي عليهما السلام 3
_ - _ - _

صوت عباس .. جابته الريح .. يم اخيه
ظل الحسين .. يمشي و يطيح .. يم اخيه

بركضته صوب النهر مدري چم مره عثر
____

وگف يم الخيم محتار اخوه استبطه بالجيه
عجت بالطفوف الخيل و منعت يوصله ضيه
لزم گلبه و يعاين صار ما شاهد ابد خيه
نشد عباس انه حسين ارجع عوف الميه

فكره محتار .. و گلبه ملهوف .. شحال أخيه
لحظه لن شاف .. طيحة اجفوف .. شحال اخيه

من نظر طاح الگمر مدري چم مره عثر
____

سمع أدركني خويه حسين ركض ومفرع الهامه
زينب واكفه و تشوف اخوها امطيح العمامه
خطوه يصيح بيها حسين خطوه تعثر جدامه
وصل يم النهر و يشوف روحه اتموت گدامه

بكسرة حسين .. فرحت الگوم .. راح اخيه
صاح عباس .. و طاح مهدوم .. راح اخيه

شاهد الچف انبتر مدري چم مره عثر
_

گعد يمه و بدوا يحچون و العسكر يشوفونه
التفت عباس صوب حسين وينظر بس عله عيونه
يشوف ويبتسم عباس وجه حسين وبهونه
لأن طول العمر وياه ما رافعهن اجفونه

عمر عباس .. ويه الحسين .. صوب اخيه
عمره ما يوم .. رافع العين .. صوب اخيه

يمسح الدم و نظر مدري چم مره عثر
__

رفع راسه أخوه حسين والدم يمسحه بيده
يحضنه و ينظر العينه آخر لحظه لعضيده
هذاك الچان روح حسين اخوه اليجري بوريده
وگع ويشوفه ظل ممدود روحه اتموت بالهيده

هيبة اجبال .. واگع شلون .. احتار اخيه
ضيع حسين .. نور العيون .. احتار اخيه

مو گلب ظهره انكسر مدري چم مره عثر
_

احتار حسين من شاهد بده وكت الوداع وياه
عباس اليظل الكون نايم عالترب خلاه
توجع چلمة المهظوم و اليذبح دمع عيناه
بيا چلمه يودع حسين اخوه الما بعد يلگاه

ميت حسين .. و رد للخيام .. من اخيه
وشل ادموع .. و ماخذ آلام .. من اخيه

منترس راجع قهر مدري چم مره عثر
_

رجع وتشاهده زينب هذا حسين موش حسين
شايب منهدم حيله يوديه الهوه صوبين
صاحت راجع بوحدك چا عباس عفته وين
طاح و كلها يا خيتي راح الچان اليه معين

كافلچ راح حضروا النوگ طاح اخيه
ولحظه بالنار جدم محروگ طاح اخيه

النار ما تترك مفر مدري چم مره عثر





كلمات / حسين أحمد الأمين

ايام السبي
_ - _ - _

كفيلي رايتك طاحت شفت
كفيلي ما تكول اوياي اخت
_

لا تروح شلون أظل إبلا كفيل
حامي خدري بمشيتك خيمه تميل
بلايه چلمه من الاخو گلبي عليل
صعبه مشية چدمي يرادلها حيل

يويلي انظر المهرك يجي
يويلي دونك المن ارتجي
____

والله حيره حيرتي لمن مشيت
بطيحتك يا خويه بالسوط انوليت
بمتني كلما انظرب بيك انتخيت
هيچي تتركني ابد ما حسبيت

ثجيله ممشى حرمه باليسر
ثجيله من تطيح إبلا ستر
____

بعد عينك خويه أمشي بالسبي
من السياط اتمزگت حتى العبي
والله وسفه يحدي زينب اجنبي
عالهزيله ركبوا اعيال النبي

هظيمه الچنت انه المخدره
هظيمه هسه صرت اميسره
__

خويه بعدك ما شفت بس الجرح
على التل و شفت راسك منذبح
و راس أخويه حسين مشيول برمح
عكس ويانه الزمن ما ظن يصح

مصيبه من يتيمه نادتك
مصيبه و بدمعها حاچتك
____

اخلاف وجهك چتفونه باليسر
أمشي و أعثر و انه چنت أم الخدر
بس الاصعب يابو فاضل بالأمر
يأشرون اعليه شمات من أمر

رزيه و الدرب ممشا صعب
رزيه بالمجالس صرت اطب
____

ميت و اختك بقت بس للتعب
صار كل طولي جرح و اشرح سبب
شفت راس حسين و بطشت الذهب
بخيزرانه النذل بشفافه ضرب

ولتني الشام ما بيها رحم
ولتني گلبي من عدها انهظم




كلمات / حسين أحمد الأمين

القاسم بن الحسن عليهما السلام 1
_ - _ - _

لا تروح ما اريد أنظر وريدك
لا تروح رايده حنه اعلى ايدك

خايفه ترجعلي بالدم و ابدال العرس مأتم
____

يبني ساعة شوفتك جنت أنتظر
الأم ترى بدون الأبن ما تنذكر
بعد ابوك الحسن صرت انته الذخر
مالي غيرك يا تعب كل العمر

يا فرحتي و دمعتي بيوم الاجيت
يا فرحتي تمشي عني جن نويت

يمه من تروح تسلم؟ و ابدال العرس مأتم
_

ارد اسولفلك يجاسم اعله البداية
جنت اشوفك بالمهد روحي و هوايه
من كمت تمشي صرت كمرة سماية
هسه يبني تريد اتركك للمناية

وبمشيتك ونتي اتهد السمه
وبمشيتك لا تحيرن بالضمه

تعبي ماريده ايتهدم و ابدال العرس مأتم
___

لمن وصلت شمعتك حد الشباب
فرحتي اتعدت كواكب و السحاب
حلمي اشوفن زفتك بيض الثياب
مو اشاهد طولك اتوسد تراب

مو جروح رايده حنه و شمع
مو جروح مو سبايا ولا دمع

يمه لاتگتلني بالهم و ابدال العرس مأتم
___

مودع الله بروحتك يبني يحيد
رغم چنت اتمنى اشوفلي حفيد
لچن هذا الدين يطلب چن وريد
روح وارفع راسي بسمك يا شهيد

بالسلامه زفتك يبني تنطرك
بالسلامه كل عمامك هم تحضرك

بالحسن يبني تجسم و ابدال العرس مأتم
_

هذا يوم البي توفي كل عهودك
من تموتن تشتعل شمعة خلودك
اقتل بگد ما تهل دمع بسجودك
صورلهم حيدرة بكامل وجودك

الصميده رايده يبني تعيده
الصميده كون يصرخ تسلم ايده

و ابعلي يبني تحزم وابدال العرس مأتم




كلمات / حسين أحمد الأمين

القاسم بن الحسن عليهما السلام 2
_ - _ - _

رمله تعاين عالولد يا فتشة العين
صارت ييمه زفتك بين الصواوين
____

آ يالولد...تارسني حب _ نبض الگلب...بسمك لهجته
لعمرك ردت...زفة عرس _ مو بالنفس...تضوي شمعته

يالنورك ايضاهي الگمر يا ايه بس ابلا سور
تربات گلبي و السهر يا ذخر السنين

صارت ييمه زفتك بين الصواوين
_

وي كل صبح .. چنت انتظر _ كل العمر .. انظر شبابك
ماچنت اظن..يفرغ حظن _ تصبح حزن..بالطف عذابك

كل تعبي يصبح عالترب نايم ينبضات الگلب
منين و اجتني هالحرب يا جاسم منين

صارت ييمه زفتك بين الصواوين
_

أول حلم .. طولك اصد _ مثل الورد .. انفاسك تفوح
تعب الصبى .. نور الحسن _ هذا الزمن .. رايدها الجروح

تاليها بالدم حنتك و عمك دموعه بزفتك
مو بالهلاهل عمتك بحسرات الونين

صارت ييمه زفتك بين الصواوين
___

حنه وعرس...چانن حلم _ صارن سهم...صوبلي گلبي
لون البياض..احمر صفى _ بچفك غفى..وعيوني تربي

يوليدي نايم من وگت دونك ألف عام اكبرت
روحي و ضنايه قدمت وسط الميادين

صار ييمه زفتك بين الصواوين
_

اترف ولد .. گدما ترف _ صوت النزف .. يجري سمعته
يالمچتل .. حظني فرغ _ چفني نشغ .. ما باقي دمعه

يالغافي بحظان الرمح أنشاف بغيابك جرح
جاسم ينسمات الصبح مگطوع الوتين

صارت ييمه زفتك بين الصواوين
__

ميت وصد .. بلكت ترد _ كثر النشد .. يا ييمه اريدك
يمك متت .. گلبي عرج _ ماتت مهج .. ابحزة وريدك

كل جسمي عگبك يرتعش يالترب صارتلك نعش
تفداك رمله من العطش و اسوالف البين

صارت ييمه زفتك بين الصواوين
____

رمله غدت .. مثل الشمع _ ذابت دمع .. لمن عفتها
بلايه احد .. راح الضنه _ ضاع الهنه .. الفرگه عشتها

بعدك مثل خيمه احترگ يالعاهدت ما نفترگ
گلبي بعد ما ظن يدگ فارگله غالين

صارت ييمه زفتك بين الصواوين




كلمات / حسين أحمد الأمين

القاسم بن الحسن عليهما السلام 3
_ - _ - _

اشعلوله الشموع الليله حنته
يزفه حسين و تهلهله عمته

گمر يعمي النواظر يضوي الحومه باچر
_______

انه امه إلي چنت منتظره عرسه
ازفنه حلم و أنتظر شمسه
عمامة والده بعرسه البسه
و اشوفن كل بنينه و يعلى حسه
حلم چان اعله بالي و صار هسه
استحاله من بعد ما انطه نفسه

اروحن بالحلم لارض المدينه
اهني المجتبى و ادري يجينه

الحسن ندريه حاضر يضوي الحومه باچر
_______

قبل ليموت وصه الوالد اعليه
گال القاسم بعرسه احنيه
اجي لارض الطفوف بدمه الاگيه
احظننه و اشربنه و اداويه
افاخر بيه دوم و راسي اعليه
و يجي وياي جده و يفتخر بيه

يگله شلون طعم الموت يبني
يجاوب انچتل أخرى يلني

لذيذ و طعمه ساحر يضوي الحومه باچر
_______

اجه مغتاض يمي و لبس درعه
حرت ما بين ازفه لو أودعه
يحارب من نزل صوته نسمعه
آنه إبن الحسن وراث البضعه
يناظر عمه حربه و ذرف دمعه
يگول بهل الحرب تطفالي شمعه

سمع أدركني صرخاته يعمي
احتار احسين أشوفه بدربه معمي

ركضله بدمعه حاير يضوي الحومه باچر
____

طبع ماخذ من ادلال المضايف
يفورن من دخل للحومه واگف
كلمن شافه چن الحسن شايف
يرد لصحابه يتراكض و خايف
يشبه جده حيدر بالسوالف
و يشبه القاسم بوگت الگلايف

بگطع شسع النعل ذل العساكر
سبع تالاف واحد باقي حاير

نزل شدها يكابر يضوي الحومه باچر
_

جاسم بالحرب بين عناده
ما يقتل شرط بس إلا قاده
خلالهم چثث كلمن تماده
نص الجيش بيمينه اباده
رجع يوم الجمل بالطف اعاده
مثل ضربات أبوه بسيفه اجاده

وصل للمشرعه و خيم عليهم
ظنوه الگمر لبسوا عيبهم

مثل عمه يفاخر يضوي الحومه باچر




كلمات / حسين أحمد الأمين

علي بن الحسين عليهما السلام 1
_ - _ - _

ادعو إلهي بعلي ارجعه سالماً علي

ذا قلبي قد هاج حنين ارجو بغربة الحسين
ارجعه سالماً علي
____

إنه ليلى يا إلهي و لعلي مشتاكه
من مشى كلبي يكلي ما بعد نتلاكه

ارفعت ايدي بالدعه يامن الصوتي تسمعه
ماريد كلبي تفجعه ودمعتي لفراكه

ذا قلب اما ينفجع كادت بروحي ترتفع
ارجع علي قبل المنين ارجو بغربة الحسين
ارجعه سالماً علي
__

ماعندي غيره وانته تدري الولد عكازه
هاج گلبي بكل حنينه لشوفته معتازه

لحظات عني من رحل كل لحظة يگربلي الأجل
ياربي ادعوك العجل كلبي حن لعزازه

يامن إليه المقصد ارجع إلي محمد
يا ملاذ الحائرين ادعو بغربة الحسين
ارجعه سالماً علي
__

خايفة اعلى وحيد گلبي لا يطيح مدمه
قبل لا يمشي لچمني و آلماني بچلمه

گلي رايح و السلام التقي بخير الأنام
گتله لتكمل الكلام فدوه الك يايمه

رحل و الصوت اعتلى ها أنا يا كربلا
ابن عليا و الامين ارجو بغربة الحسين
ارجعه سالماً علي
_

ظليت منتظره رجعته غفيت وانه ادعيله
ما احس إلا بدموعه بللاها الشيله

فزيت شابگني الولد گتله علي گلبي انمرد
معقولة ما تشتاگ ابد تفداك امك ليله

ذا ولدي قد عاد حي شكرا يمالك كل شي
أعدته مثل اللجين ارجو بغربة الحسين
ارجعه سالماً علي
____

بحظنه راسي وانه احچي والهوه يتلوه
يمه من تمشي دليلي بفرگتك يتچوه

خايفه وحيلي منهدم ماريد بيك انه الچم
يصبح نظر وجهك حلم والرسوم الحلوه

مالي سواك مهجتي يا فرحتي و سلوتي
ياغيث عمري والسنين ارجو بغربة الحسين
ارجعه سالماً علي




كلمات / حسين أحمد الأمين

علي بن الحسين الأكبر عليهما السلام 2
_ - _ - _

طلع شاهر سيفه احتاروا بتوصيفه
هذا علي لو حيدره


من نزل لارض المعاره و لابس الهم لامته
چن محمد نازل ابخلقه اوقاره و هيبته
ناس صاحت هذا احمد رجع لمن شافته
ناس گالت هذا حيدر من ضربته وخزرته

خله بيهم حيره يذبح اعلى الخيره
روس الكوم صارن سره
__

ايقاتل و من عينهم انهر مدامع جاريه
وصلت الحد المدينه اصوات ليهم ناعيه
ناس فرت بس رؤوس وناس شردت حافيه
خيم اعليهم يرتل سيفي نارا حاميه

الدم وصل للكوفه ناس ماتت خوفه
خله الجيش بنص مكبره
____

اتاكدوا حيدر اجاهم من على مهره صعد
اوجوهم صفره يشاهد چن اجه يوم الوعد
واحد بلا راس صاير واحد بلايه جسد
الثاني حط ايده اعلى گلبه النفس من عنده شرد

بجدحه من عيونه الجيش يوكع لونه
بسيفه اليوم رد خيبره
____

صار دم الجيش كله والنهر يجرن سوه
الوصل حد السيف راسه من على كيفه التوه
من حرارة دمه كلمن يگرب الحده انجوه
صاح ابو فاضل يالاكبر اروي بالدم نينوى

ابن اخويه و النعم خلها تتراجف زلم
بالطف عيد الگنطره
____

رجع يوم الطف الاكبر بيهم لغزوه بدر
فرد ضد سبعين ألف والواحد تشوفه شكثر
جيش كامل ضل يدور من علي وين الستر
ماكو مهرب سيفه يحصد باليهاجم و اليفر

مثل حيدر بالوعد اسد شيخلف اسد
بالطف هتف يا قسوره




كلمات / حسين أحمد الأمين

علي بن الحسين الأكبر عليهما السلام 3
_ - _ - _

موت يفتر بخيامي
موت ياخذ احلامي
موت يفجع أيامي علي
_

بخيامي حط طير الحزن يحوم اعله تربات الحظن
رايدله اقدمله الابن يروح
استأذن واجه صوب الولد گله الحرب لهل الشدد
اهنانه صفيت ابلا سند انوح

لحظه لن ينده حسين و يطلب وليده
و انه منتظره و احسن موتي بالهيده

راح و أنظر لعيونه
راح خاف ايحسدونه
راح البنفاسه غرامي علي
___

لحظات لن رد للخيم بوجهه ملامح للألم
اعرفت بي من احتزم يموت
ظليت و ابحيرة طفل ام و أبنها ينچتل
گدامي مر طيف النبل يفوت

لبس لامة حربه و انه أنظر و أدعي
نگلة اچدامه بعدها او وشلت دمعي

صاح يا يمه ادعيلي
صاح و انه انهد حيلي
صاح و اتخيل دامي علي
_

من شفته طب سوح الحرب وانه الزمت بيدي الگلب
كل دمعه بعيوني تصب تصيح
ارجع يبعد امك الي رايده عيوني تمتلي
بنظرات وجهك يا علي تطيح

كثر شوگي انغمى اعليه و ضاگت انفاس
صحيت لن اوليدي بيده يحضن براسي

صوت منه يناديني
صوت گلبه يواسيني
صوت ذوب آلامي علي
___

گتله ييمه امروتك ما اريد اشوفن رگبتك
تجري دمه و مخضبتك تريب
معتازتك وكت الكبر بيدك توسدني الگبر
يوليدي ذاخرتك عمر حبيب

كلشي لا أشوفك صريع و منحرك دامي
أقسم بداعة شبابك حقق أحلامي

طيف يمه يراودني
طيف اوداعك شيبني
طيف عشت ابأوهامي علي
_

لحظه و ينادي والده هد يا علي صوب العده
مو ابن گلبي فاگده وراه
من صلب قالع خيبره اعله الموت لزمهم سره
احتاروا محمد حيدره عداه

من محمد شبه خلقه و يشبه إحساسه
و من علي ضربات سيفه حرگة انفاسه

غيظ خزرات عيونه
غيظ خاف ايغدرونه
غيظ من هد ضرغامي علي




كلمات / حسين أحمد الأمين

علي بن الحسين الأكبر عليهما السلام 4
_ - _ - _

من طلع لابس لامته تشبه محمد هيبته
و ليله بدمعها نادته رايح وين
_

يا علي گلبي انمرد ظلمه ليلي ابلا ولد
وحيده و بغربة بلد هاذه حالي

دون عينك ماكو نجمه اتلالي
بعد وجهك يا گمر يحلالي

روح لكن انطرك ترجعلي مو دم منحرك
يبني المنيتي اذخرك رايح وين
_

مودع الله من تروح افديك كون من الجروح
بعدك و لا تبقالي روح يا هواها

يل بالترافه ما يشبهك ثاني
بعد طولك هالعيون اتعاني

هدي بخطاك اتوسلك أشبع نظر و اتأملك
بتعبي ييمه أسألك رايح وين
_

يالمشيتك چنها ماي بعدك الدمعه ضواي
بخطوتك يخلص هواي تگرب منيتي

بروحتك كون الله ياخذ روحي
لو مشيت شلون يبرد نوحي

اليمه بعد ما تلفظ بچفاك ما يبقى النبض
اثگيله مشيتك عالارض رايح وين
____

فدوه اروحلك علي يا دنيتي و روحي و هلي
لتخلي نوحي يعتلي ابرحيلك

خوفي من الموت ياخذ گلبي
للترب يصبح رباي و تعبي

يا تعب كل العمر يا بسمة اشفاف الزغر
للمنيه انته الذخر رايح وين
____

يا ضوه عيون الفجر من صعدت اعله المهر
خذت وياك العمر يا حلاته

بعدك شلون انهض بكل حيلي
كون بفراگك اموت ادعيلي

من تمشي لعيوني تصد چنك تگولن ما ترد
يالمبتعد مات الورد رايح وين




كلمات / حسين أحمد الأمين

عبدالله الرضيع عليه السلام 1
_ - _ - _

ماتت دلول المهد والجفن غافي
ما اكعدك ياعلي نوم العوافي

وليدي نايم عالرمح يضوي لو غاب الصبح
____

جنت انتظر طول العمر
منتظرة اشوف سنينك
آ يالولد هذا المهد
فارغ يظل چا وينك

ماعندي غيرك ياضوه عمري وتعب سنيني
يافتشة عيوني علي تتركني من تجيني

چنت منتظره الولد يوگفلي خيمه
ماچنت اظنك ياعلي تمر بيه غيمه

كون لا طاب الجرح يضوي لو غاب الصبح
____

بطول المسير انه احير
ست اشهر يگتلونك
بعدك رضيع اترف صريع
بالترب طايح لونك

شفت الكبر من انحفر وگطعوا نحر ضنايه
فوك الرمح راسه غفه مو طفل جنه ايه

بهيده مشيكم لا يفز من هذا نومه
الله لا ينطي الشمس غيرت رسومه

ريت وياك انذبح يضوي لو غاب الصبح
___

عمرك شمع عمري دمع
و النبله چانت فرگه
ما جنت اظن يبرد حظن
و اشتاگ يمه الملگه

چفي يهزن بالمهد و اتذكرك يغالي
بنومي و گعدتي يالولد ما ترحل اعله بالي

يالعمرك بعمر الشمع لا تمشي عني
ذاخرتك لشيب الگبر موتك فجعني

ما يلچمك يبني الشرح يضوي لو غاب الصبح
_

چبير الجرح خشن الرمح
يلچمني من ايجرحك
شدوا حبل بجرح النبل
خافن تكع من رمحك

نبتوا راسك بالرمح وانه انظر شبديه
شفتك تون من الألم وانه انغمى عليه

چنت تبجي بالحظن وانده يغالي
هسه تبچي عالرمح والحظن خالي

يا وكت گلبك يشح يضوي لو غاب الصبح
___

كلبي انمرد سمعت الولد
تجري دمعته بكيفه
بحالي شجره من منحره
ما ينكطع نزيفه

للراس واصل هالرمح وانه بدمع اناظر
من شفت عبدلله بچه بكلبي ترض حوافر

ذابلات من العطش ذيچ المعاني
عبدالله ما تگعد بعد موتك سباني

موتي بعدك يتضح يضوي لو غاب الصبح




كلمات / حسين أحمد الأمين

ليلة الوادع 1
_ - _ - _

يلا يزينب يختي ودعيني
من يا كتر باچر تشبگيني

بالطف تشوفيني جرح والراس مشيول برمح
يلا يزينب يختي ودعيني
_

اگعدي يختي خل نتوادع بدمعه
باچر عالصدر بس خيل متربعه
خل انسولف شمحلاها هالجمعه
زينب حتى طفلي باچر انودعه

خلينه نحچي يختي خلينه
باچر على الغبره تشوفينه

يصعب يزينب كل شرح والراس مشيول برمح
يلا يزينب يختي ودعيني
_

خليني اسولف يختي و اتسمعين
ماريد بدمعتچ للعدو اتبينين
و هونچ لو ركضتي خايف تعثرين
و عالتل يختي باچر ذبحتي تشوفين

هونچ يخيتي بالدمع هونچ
خايف عالتل تنعمي عيونچ

من الگفه يختي انذبح والراس مشيول برمح
يلا يزينب يختي ودعيني
_

باچر لو ركضتي من الحرگ بالبر
خوفي لا تلمحچ نظرة العسكر
استعدي يختي باچر عينچ التسهر
من تتكفلين ايتام و الخدر

بالچ يزينب بالدرب بالچ
باچر عساكر و أنتي الحالچ

ياذني متنچ منجرح والراس مشيول برمح
يلا يزينب يختي ودعيني
___

احچايه أرد اگلچ يا بعد عمري
لتصدين عينچ من يرض صدري
و لتصيحين بسمي من يحز نحري
و لتمسحين دمي لو يظل يجري

باچر يزينب من تشوفيني
من الخيل يختي ما تعرفيني

والدم على الغبره يسح والراس مشيول برمح
يلا يزينب يختي ودعيني
_

عينچ عالزغار من الحرگ و النوگ
صبريهم يزينب لو دخلتوا السوگ
تلچمني اليتامه و الچدم محروك
يأذي ارقيه خايف يختي من الشوك

لو نظر شامت يجرح ايتامي
و انه اعله رمحي و الوجه دامي

خوفچ إذا طر الصبح والراس مشيول برمح
يلا يزينب يختي ودعيني




كلمات / حسين أحمد الأمين

ليلة الوادع 2
_ - _ - _

نامن بهيده و رغد هاذي آخر ليله وياچن لوه
ما يظل الچن احد باچر اعله الترب نومتچن سوه
يا بناتي ..... يا بناتي
_

حسين آخر ليله و يودع بناته
وحده حبت يمنته وحده عباته
يگلهن آخر ليل وياچن اباته
باچر امسافر على ارماح الشماتة

يگلهن بهاي الحرب لا تنوحن باچر الهيمه خيم
انهظم من الضرب لا تصيحن وين شيال العلم
يا بناتي ..... يا بناتي
_

بويه لو باچر بقيتن بالغرب
ادري بيها النومه صعبه عالترب
من تشوفن رمح شايله گلب
لا تبيننها المدامع من تصب

بويه احرسن عالخدر لوذن بزينب إذا شد الرسن
لا تنوحن باليسر لو تلچمني المدامع لو جرن
يا بناتي ..... يا بناتي
____

خل اسولف يا بناتي شيجري باچر
لمن يطيح الگمر يكسر خواطر
بويه روحن لعد عمچن من يسافر
وشلن ادموع و بعد اعمن نواظر

من يطيح اعله النهر يعني يابويه استعدن للسفر
ومن ارد شيبي كثر لاتطيحن يابناتي من القهر
يا بناتي ..... يا بناتي
____

من يطيح الأكبر الشده چبيره
أمشي و أعثر من اگصده كلي حيره
موذر و طايح المنه بحصيره
لا تلومني اعله دمعي شعندي غيره

چم كسره باچر انكسر والأشد من تمشن بظعن الغرب
الهزيله و الجمر يألمن أكثر حتى من سهم الگلب
يا بناتي ..... يا بناتي
_

لو مشيتن يا بناتي بظلمة الليل
عالهزيله و انسلب من عدچن الحيل
من تطيحن يا بناتي الهزل اتميل
خايف الشامت يشوف الدمعه التسيل

لا تصدن عالرمح خاف العبايه تلچم اجروح المتن
لو نزل دم الجرح اتألم بگد ما شفت بالطف حزن
يا بناتي ..... يا بناتي




كلمات / حسين أحمد الأمين

#ليله_الوداع 3
_ - _ - _

يا ضي عيوني وحدي اتخلوني
من تمشي عني بعدك يسبوني
____________

خويه ماريد انظرك فوگ التراب
و لا اريدن خيمتي توج چنها باب
بلكي موتي يلفي خويه و لا غياب
دمعي المن يجري باچر اليا مصاب

وحدي إبلا حيله إنه اويه العيله
ما عندي والي بعدك يسبوني
____________

صعبه خويه من يمر باچر نهار
انظرك طايح وانه بالخيمه نار
بعيني أنظر تنچوي اچفوف الزغار
و عالهزيله الخدر يركب خويه صار

موتي بخطواتك واسمع وناتك
من يذبح راسك بعدك يسبوني
______________

الهظم ويه الجرح باچر من يمر
اوادعكم يا خويه ياخذلي عمر
مثل سطرة امي باجر السطر
اليذبحك بالضعن يحدي الشمر

بممشانه انشوفك الدمعه اطوفك
من رمحك تنظر بعدك يسبوني
____________

چم جرح باچر يشوفنه العيون
أنته لون العافيه و ما خذلي لون
بس تطيح من المهر ليه يجون
خويه من اسياطهم زركه المتون

يامن تبرالي عايفني الحالي
باچر بالهيمه بعدك يسبوني
______________

صعبه خويه أم الخدر من تنسبي
عالهزيله ايركبن ابنات النبي
شگد رزيه يحدي بينه اجنبي
حمره من دم المتن لون العبي

يصعب هالمنظر نسوانك بالبر
تمشي بلا حامي بعدك يسبوني
___________

عگب عينك بالمجالس هم نفوت
وانه جاري الما سمع من عندي صوت
وسط سوگ و بالحجر ترمي البيوت
يعني اخيتك شوف جم مره تموت

من كثر آلامي صارت احلامي
ميته اعله الهزل بعدك يسبوني





كلمات / حسين أحمد الأمين

#أيام_السبي
السيده زينب تخاطب اخيها الحسين عليه السلام
بعد إنتهاء معركة الطف
_ - _ - _ - _ - _

ليل وحشه وماكو وجهك
لا عطر منك اجاني لا خيال
ياهو اليه بغربه وحدي
اخلاف عينك چتفوني بالحبال

ضيعت كلشي من گلت أمشي
_____________

شحلاة ارسوم وجهك چانت اطوف
بدليلي و الحزن عن گلبي مكشوف
هسه اعله الشفايف طبرة اسيوف
اشوفنها و عساها عيوني متشوف

شلون ظلت روح عندي
من شفت دم بوجنتك و التراب
طايحه منك عمامه
خويه اول مره اشوفك لسه شاب

ضيعت كلشي من گلت أمشي
___________

چنت وياك چن شجره و غصنها
تفي اعليه و انه بسد حضنها
رحت و بروحتك خيم حزنها
ميته وياك يا خويه لونها

عفيه ظلت مهجه عندي
من گلت راح امشي خويه و الوداع
عگب ما ضيعت صوتك
انشده يا خويه حالي و گلبي ضاع

ضيعت كلشي من گلت أمشي
____________

اسهرت ليل الهظم بدمعه اناطر
يتامه خايفه و ابلايه ناصر
لحظه و لن تمر شفت الحوافر
وذر جسمك يخويه اعليها صاير

هنا ردت خويه المنيه
و لا اشوفن خيل تسحك بالعظام
ما دريت اشلون حالي
نباوع و يجري دمعنه ابلا كلام

ضيعت كلشي من گلت أمشي
____________

صدك ليل و بعد ما تگصدلنه
وحيده أبقيت و ابلايه زلمنه
اناطر بلكي اشوفن رف علمنه
اشوفه و لكن الشاله شتمنه

شايل بچفه علمنه
و بالسهام امزگينه و النساء
فرحت العباس اجاها
تالي حارس عالظعينه و الخباء

ضيعت كلشي من گلت أمشي
___________

شفت حارس يمرنه بعتمة الليل
يگول انه الحرس من عگب الكفيل
يخويه اهنا طحت و اتهدم الحيل
شبچت أيدي اعله راسي ودمعتي اتسيل

درت وجهي عالشريعه
ها يخو زينب أناشد يالگمر
وسفه شامت يحرسلنه
و لازم بأيده علمنه وبفخر

ضيعت كلشي من گلت أمشي
_____________

درت هالعين و الهزل ورايه
ظعنه مسافر ابلايه نهايه
ركبت اعله الهزيله ابلا حمايه
ينشدوني يزينب ماكو رايه

مودع الله بدربي انه
اي يبو اليمه حبيبي و السلام
مروا اعله القتله بينه
الأكبر و جاسم ملوهم بالسهام

ضيعت كلشي من گلت أمشي
___________

مشينه و من وصلنه الديرة الشام
نظرات الغرب ترمينه بسهام
أهلها احجار يرمونه عالايتام
بخرايبهم يخويه اطفالك اتنام

صعبه بت ذاك الغضنفر
تدخل بمجلس دعيه ترد جواب
تالي گعدونه بخرابه
لا ستر بيها الحرمنه ابلايه باب

ضيعت كلشي من گلت أمشي




كلمات / حسين أحمد الأمين

أيام السبي
_ - _ - _ - _ - _

وازينباه وازينباه
____

موادعك چن حل موعده حان وبعد حان السبي
يا خويه ذكره بهامتي شديته بالدم معصبي
راح أمشي ولرايه ستر تدريها محترگه العبي
مو وحدي يابو الفضل وياي اهل بيت النبي
_______

وحيده بقيت بلا اهل ياخويه كل جسمي ارتعد
شامت يسولف مقتلك واحد على جسمك صعد
ليل و ندورلنه ستر و برايتك تدري الضمد
هذا الأشد يابو الفضل حارسنه چتالك بعد
___

ألتفت يمنه ميسره ماكو عرف كلهم غرب
توجهت صوب المشرعه والدمع عالشيله يصب
ناديتك الحگ يا كمر نايم و مرتاح الگلب
خيتك وحيده بلا حرس ما تنهض اعليها صعب
__

من كل كتر هجموا يخي ما ظل بعد النه مفر
بالهيمه اطفالي أصبحت وانته صفيت بلا أثر
حرگوها بالنار الخيم كلها اركضت صوب النهر
نيران و اسياط و حبل الحگ علينه ياكمر
___

صفگات اديهم چن رمح يطعن يخويه ارويحتي
ضحكتهم اتحز منحري ينزل دمه وي دمعتي
من الألم من الهظم شيبت تراهي حسرتي
من گطعوا الراس اعرفت اويه الغربه تبدي رحلتي
__

نايمه اعله ارماد الخيم حالتي تكسر خاطرك
ما تنظر الحالي صدگ ثاري الدماء بناظرك
ما تنهض الخيتك ترد اعيون الزلم تتجاسرك
حافيه أمشي عالجمر بآهاتي خويه استنصرك




كلمات / حسين أحمد الأمين

أيام السبي
_ - _ - _ - _ - _

السيده زينب تخاطب اخيها العباس عليهما السلام أثناء رحلة السبي
_ - _ - _ - _

يابو فاضل زينب بدرب السبي
يابو فاضل يحدي بيها الاجنبي

بين الصبر بين الجزع شاهدت چم راس انرفع
____

انه زينب يابو فاضل اشتگيلك حالتي
بطيحتك من ظهر جودك اعليه وگعت خيمتي
سهم عينك من تصوب راوه دمعي الشامتي
گطع چفك جرح راسك ريته جارح هامتي

برمح راسك وصل عطرك يعتذر
برمح راسك بعده هم يحمي الخدر

يالراسك ابغيره نگع شاهدت چم راس انرفع
____

من مشينه شفت جسمك اموذر بصف النهر
انه وحدي و يحدي بيه الگطعك خويه وذر
شوفني و شصار حالي اتغيرت كثر القهر
انه من اصواب عينك عمت عيني من النظر

متني ازرك الچانت بهيبة علي
متني ازرك بالشتايم تنولي

انذاع أسمي بالشام وسمع شاهدت چم راس انرفع
___

درب وحشه وانته ماكو فقط راسك منجرح
ابدمعة ايتامي يخويه انه كل لحظه انذبح
شوف هاي الحاله يمك أتخيل شينفع شرح
ارقيه من يضرب متنها تروح تركض للرمح

تنشد حسين بويه بعدك باليسر
تنشد حسين بسوطه لوعني الشمر

گدامك بخدي صفع شاهدت چم راس انرفع
__

هذا حالي يابو فاضل من بعد ذاگ الدلال
بغربه أمشي دون حامي التفت يمنه وشمال
بعد ظلك هسه خويه واكفه بين الرجال
تالي محروسه ابوها تنچتف وسفه بحبال

هذا حالي تندبك مني الدموع
هذا حالي اسياطهم كسرت ضلوع

ولا أخو يم اخته فزع شاهدت چم راس انرفع
____

آخر احچايه اگلك واستمع هذا الهظم
نمشي بالصحره وعدوك ابد ما خله عظم
هاي مو كل المأآسي زينبك شبعت لطم
وگفت بديون اميه بت علي اتحاچي الزلم

ميته بالشام خطوه خطوه انذبح
ميته بالشام ولا عسن طر الصبح

لو تدري چم واحد وكع شاهدت چم راس انرفع




كلمات / حسين أحمد الأمين