#صاحب_الأمر_ع
____

يمتى تظهر عمري كوثر
أرد اطشنه بطريقك

أعمى تتعثر خطاي حاير و فاكد ضواي
أنته وين
____

سيدي حتى مدامعنه انتهت
طالت الغيبة و لا ورقه اوصلت
يا گمرنه الشوفتك شمس انحنت
هيچي أشوفك سيدي شكبره البخت

و بصلاتي أمنياتي
كون أشوفك و ارتجيك

ما لي غيرك يا هواي حاير و فاكد ضواي
أنته وين
_

انتظر حال اليتامه بلايه والي
بدمع عيني و حيرتي و عالم خيالي
انخاك ترجع ما يجرحك هذا حالي
و اعلگ العشره شمع لجلك يغالي

عليك الحسين. گرها للعين
ه‍چي الاگي إبن الحسن

ضامي انه و أنته ماي حاير و فاكد ضواي
أنته وين
___

يابو صالح يمتى تخلص غيبتك
ناذر اسنيني فداء الحضرتك
عليك زينب يابو صالح عمتك
عجل النه خل نشاهد شامتك

تلظم اجروح نترك النوح
و المحبتك نلتمس

هيچي اشوف المهدي جاي حاير و فاكد ضواي
أنته وين
__

بين گبر حسين و الوالي اندبك
بلكي أشوفك و أدري كل ذنبي يحجبك
و من كثر ما الهج بكلمة أحبك
عمري عايش أنتظر دوم اعله دربك

يا گمرنه ما تمرنه
و خلي تعمه عيوني بيك

الشوك ما خلالي راي حاير و فاكد ضواي
أنته وين
___

أنتظر طيفك يمر ليه ثواني
نظره منك استلذ بيها و أتاني
شوگ روحي كلها من عنده تعاني
بان شيبي من كثر نوحي و حناني

گلبي مشتاگ أنهي الفراگ
الفي يا عين الحياة

ناشفة ارياگي و شفاي حاير و فاكد ضواي
أنته وين
___.

أمشي كل جمعة اطشن أمنيات
بجامع السهله انتظر تبدي حياتي
دمعتي لجلك تظل دوم بصلاتي
أدعي تلفيني گبل ساعة مماتي

خلصي لحظات يا علامات
كافي مو طال الهجر

ربي وفقني اعله هاي حاير و فاكد ضواي
أنته وين





كلمات / حسين أحمد الأمين

#استشهاد_علي_الهادي_ع
____

أسألك يالحسن من شيعت والدك
حملته بوحدك لو من اجه ساعدك

هم ضليت محتار جريح ابكل الاكتار
_

إنه السجاد اجيتك دمعي جاري
اخفف حزنك و عظم الباري
حملته انته بنعش و الجدم ساري
ما مرضوض رضه و جسمه عاري

تشيعه مهيب و شالته شيعته
إنه وحدي بقيت وأجمع بجثته

رأسه اعله الرمح دار. جريح ابكل الاكتار
__

علي الهادي تودعه بكل مهابه
دفنته و بيدك تهيل بترابه
مو دافن ابو بدمه و خضابه
نايم و الشمس صارت سحابه

لملمته بحصيره موذر اعله الترب
صوت النحر ابني وسده اعله الگلب

دفنته و الترب حار جريح ابكل الاكتار
___

بمصايب كربله استذكر الهم
إنه الشايف أبويه بكل كتر دم
يبني بحالتي بس ربنه اعلم
إنه شاهدت خيل بصدره هشم

چن الخيل تسحك ريتي و مهجتي
شفت الكطع راسه چن يحز رگبتي

الخيل بطيحته غار جريح ابكل الاكتار
___

جنازة والدك حضرتها شيعة
تون و بالدمع تبچي الوسيعه
وسفه ويا هظم ذيچ الفجيعة
بلا نايح صفه بس الوديعة

حضرت فاطمه تنحب و تجري الدمع
تلطم عالوجن مره اعله كسر الضلع

وحيد ابعز الانهار جريح ابكل الاكتار
___

من مات الابو ما طلعتلكم مره
عزيزه مدللة بت الابو مخدره
بين الزلم صارت تمشي بت حيدره
من ديره لديره زينب اميسره

يتامه تكفلت تمشي بطريق اليسر
طبت بالمجالس تالي أم الخدر

بزينب هالزمن دار جريح ابكل الاكتار





حسين الأمين

#الليالي_الزينبيه
__

ماتت بلوعة جروح أيامها
وتنتظر يلفيها من أحلامها

الكمر يوصل يم گبرها تمنته اهنا ينتظرها
أحلامها
____

يله يا هاشم خدركم چفنوها
هاذي بت حيدر علي ما تعرفوها
من تنزلوها اللحد لا تلچموها
من السبي ازرك متنها من اضربوها

انتظروا بلكت هم يجي كفالها
خل يشاهد بعده أخته شحالها

انتظروا خل يوصل كمرها تمنته اهنا ينتظرها
أحلامها
____

تعاين اعليهم بعد صحوة منيه
بلكي واحد جاها من الغاضرية
بس نحر معقولة يلفي ابن الزچيه
وي الكمر يتعنى ليها ابهل الرزية

حلم عدها و تنتظر يلفوها
من الطفوف إخوانها يحضروها

اعله الدرب شابح نظرها تمنته اهنا ينتظرها
أحلامها
______

ها يعباس اشبعد ما توصل إلها
ماتت و منتظره يلفيها الكفلها
تدري الأحزان شكثر غيرت شكلها
امخدرتكم ما تجي ليها اتحملها

جنازة ظلت تنتظرها جفوفك
ماتت و ظلت تون بحروفك

ما تجي خلص صبرها تمنته اهنا ينتظرها
أحلامها
______

هالحلم چانت حقيقة هم تريده
يوصل العباس و يوسدها بيده
يقره يمها الفاتحة و يحضر عضيده
حتى لو يوصل فقط بس ابوريده

تالي نزلوها الكبر مهظومه
لأن مشتاگه تشوف ارسومه

ما حضر حامي خدرها تمنته اهنا ينتظرها
أحلامها
_

ها يهاشم ريضوا بلكت يجيها
بلكي من أرض النجف يوصل عليها
لا تهيلون الترب رفعت اديها
چنه واكف حيدر و سلم عليها

وصل والدها و بقت توميله
وسفه ماتت قبل لا تشكيله

بكربله لوعة عمرها تمنته اهنا ينتظرها
أحلامها
___

ماتت و نسمع ونين من الكبر
چنها فاطم وصلت لأم الخدر
تسولف لأمها مرارات اليسر
من مشت بين الغرب أصعب أمر

تسولفلها عن جميع آلامها
من گصد شامت يلوع ايتامها

الدمه يجري من ظهرها تمنته اهنا ينتظرها
أحلامها





كلمات / حسين أحمد الأمين

#الليالي_الزينبيه
____

وصلت منيتها
وتريد ابو فاضل يجي و يغمض العيون
والدمعه سلوتها
لا من اخو ليها حظر لا من ابن عون
_____

من غيبته عليله والمدمع التسيله
عالخد نزل نار
مرت سنه ثچيله كل ساعه تشتكيله
موحش صفه الدار

تگله يخويه من سنه ما شافتك عين
والله مشتاگه بكثر اشواگي لحسين
زينب گبل تفرق الف عن زينب الحين

اريدك ارتجيتك ... تجيني

تمسح دمع عيني
وتواري جسمي برايتك عن لا يشوفون
و الدمعه سلوتها
لا من اخو ليها حظر لا من ابن عون
____

منتظره و ابأملها يمها يجي الكفلها
و الهيبته تشوف
و تشاهده بنظرها واكف حضر كمرها
جاي من الطفوف

بالحلم رايدته يجي و يحضرها جناز
المات و مفارك عزيزه يريد الاعزاز
و زينب بهاي المسيه لعينه تعتاز

الحبيبة .. غريبه ..... وحدها

بالحسرة دعوتها
يارب دخيلك عالكبر خلهم ينوحون
و الدمعه سلوتها
لا من اخو ليها حظر لا من ابن عون
______

تنادي بقت كفيلي ردتك يخي تجيلي
اداويلي الجروح
ساعة و تجي المنية موتي گرب عليه
و منتظرتك روح

اگصدلي و أقره الفاتحة بگبري انتظرتك
بس هالمسية عازتك يا خويه ردتك
ما تجي يابو الوفه موش إنه أختك

دمعتي .. لهفتي ..... ونيني

وحشه صفه گبري
و إنه أسيرة حالي منتظره اليگصدون
و الدمعه سلوتها
لا من اخو ليها حظر لا من ابن عون
______

يا عظم هل المصيبة حرمه و غدت غريبه
وحدها بالشام
لا من أخو اجاها كافلها هم چفاها
اعليها الحزن دام

وحدّها و بغربة صفت من بعد الإخوان
صارت نبي الدمعه و بعد لوعتها قران
ما يمها بس ارقيه تالي أم الأحزان

هظيمة ... يتيمه ..... العزيزه

ملچومه نادتها
يا عمه عمچ ما حظر ويه اليحظرون
و الدمعه سلوتها
لا من اخو ليها حظر لا من ابن عون
_____

يا وادم اليفارك للدمعه يبقى عاشك
و يحن للاحباب
ما ينسى كل حچيهم ضحكتهم و بچيهم
من الهظم ذاب

العاف غالي بالترب كل عمره مجروح
يترك أصحابه بعد و يصاحب النوح
شلون حال الشاف أخيه اگباله مذبوح

يحاسب ... يعاتب ..... ترابه

و إلي مشوا عنه
خل يدعي بلكت من وكت تلفيه المنون
و الدمعه سلوتها
لا من اخو ليها حظر لا من ابن عون






كلمات / حسين أحمد الأمين

#الليالي_الزينبيه
____

بوحشة الليل و اخيته تناطر جيته
ها يعباس تجيني بدمعها نادته
بلكي توصل ليه
قبل شهگ الريه
و لا اسبل ايديه بدمعها نادته
_______

ساعت اخيره .. و أخذتها حيره
هالليله تريد تشوف ابو فاضل يجيها
اشتاگت حنانه .. تذكرت زمانه
من جان الهوه يخجل يفوتونه عليها
راحت سنينه .. ظلت حزينه
اتذكرت مواقف مرت و حاضر وليها

رجعت لأيام ... حيدر موجود
گله بيمناك ... زينب و الجود

گله بالعين احطها و إخوتي شاهده
ما أقصر يبويه بيمنه عاهده
أخذ مني حجايه
قسم و بكل إيه
زينبك بحماية بيمنه عاهده
______

راحت ليالي و راحت غوالي
من راحلها أخو فگد الحسن كلش هظمها
چان إلها والد كافلها شاهد
تركت هالرزيه بالگلب لوعات ألمها
ضلت وي أملها حسين وي الكفلها
رادت بس تعيش بضلهم و هذا حلمها

تغيرت أزمان و الحال اندار
من بعد حسين تسحگ عالنار

بالطف الموت تمنت و لكن ما حصل
شافت حسين عالگاع و موذر وصل
گصدت اعله الحومه
حاچته مهظومه
خويه كافي نومه و لكن ما حصل
_____

أذكر هالمصيبة مرت عالغريبه
من ظلت وحيده بس يتامه وياها تنشد
بين العواذل نادت يابو فاضل
راحت للنهر حشمت يخويه انهض اگعد
اخذوهن سبايا و لديرة رزايا
و بوسط الغرب كل لحظة حيره ألمن اتصد

بالعين أدير لا أخ كفال
تمشي ما بين حرمه و جتال

گصدت الشام سبيه ألم يتبع جرح
دارت العين و تشوف أخو رأس برمح
چانوا اليحمونها
من الضوه يغشونها
هسه طايح لونها ألم يتبع جرح
_______

رجعت وحيده لا أخ لا عضيده
بعد الطف فقط هالمره الاحتاجت كمرها
رادت يجيها يحضر وليها
أبو فاضل تريد تشوفه و تودع عمرها
يغمض جفنها من ايده چفنها
بلكي بأيد أخوها هالحلم تنزل كبرها

بس ابلا أيد كافلها شلون
يحمل تابوت و يغسل امتون

سبلت الايد بآمال چبيره رايحه
ليها دفان عباس و يقره الفاتحة
احتاجته و ما جاها
و لا عرف مثواها
غورگت عيناها و يقره الفاتحة
__

نزلوها لحدها حاضر منهو عدها
يتلوا بالحمد چن هذا صوت حسين اجاها
بدمعتها فرحت لكنها حزنت
مشتاگه تشوفه من گصد يمها و بچاها
سمعت صوت أبوها و كافلها اجوها
و لن صوت الزچيه و الحسن يمها نعاها

حضروا يمها بدمعات العين
حيدر فاطم ويه الحسنين

وصل خجلان عباس من حيدر علي
يعتذرله أسيره مشت بنت الولي
گله لا تحچيها
انذرت دمك ليها
زينبك تدريها مشت بنت الولي






كلمات / حسين أحمد الأمين

اسمى آيات التهاني والتبريكات
لمقام مولانا صاحب العصر والزمان عج
وللشيعة علي ابن ابي طالب عليه السلام في كل بقاع الارض
بولادة القرأن الناطق ولي الخالق الجبل الشاهق
امير المؤمنين علي عليه افضل الصلاة والسلام

#حسين_الأمين

#انتظار_المِنتظر
____

ظلمه و ماكو شي واضح گلب بالمعصيه سارح
ندعوا المن يبو صالح بعيده الناس
_________

اسود لونها الدنيا ما واضح بعد أي شيّ
الأمس يدعي الظهورك چان صار اليوم أساس الغيّ
ما ميت عمر بن سعد. ايناطر لسه حكم الريّ
يذبح مستعد حسين و عبدالله يحرمه الميّ


تعال و شوفنه بلياك يالغايب تره انسيناك
ما بينه الصدگ يهواك خلة ساس
_________

نلچمك و انته ما عايز صرت من الجروح اخيال
بس واقعنه مثل اقصور مبنيه اعله گاع ارمال
وجه ماكو نشوفك بيه لأن عدنه الوجوه اشگال
ما نلگه اليدور اعليك مثل ادوارت الرحال


يا أول بشر محجوب بلكي يوصل المكتوب
خلص كل العمر بغروب دمع و إحساس
___

يا آخر وصي مرسول يا جامع علوم الرب
هاي الناس مثل الغيم يمطر مي إذا يغضب
شگد بينه شمر موجود بس ما بينه المخضب
واسينه چذب زينب ما واحد اجه امنگب


نشوفك تبچي ما نهتم. محد بينه ينزف دم
و انته الصدرك امخذم يل النبراس
______

حرنه نحچي لو نسكت تيهنه طريقك وين
عبدنه افلان موش اصنام تبعناهم تركنه الدين
حبيب العدنه شيبناه و احنه الدمعه فرحانين
و صفگنه اليزيد هواي چي بالخيل رض حسين


عفنه حيدر و امره صرنه نكره الفقره
شما تندب الك شجره نصير الفاس
______

شحچيلك چثيره اهموم منتظريك ناطرنه
نسينه ١٤ معصوم بس سيفك يذكرنه
عشنه اوياك ما عشنه متنه اعليك ما متنه
وينه ميثم التمار يجي الندبه يحفظنه


عشنه بواهس اجروحك نفرح من كثر نوحك
ما نسوه عتب روحك يبو النوماس





كلمات / حسين أحمد الأمين
٢٦ / ٢ / ٢٠٢١

#الليالي_الزينبيه
____

كون أشوفك و أغمض العين
والله مشتاگتلك حسين

خويه إذا ما تلفي ليه اگصد إنه الغاضرية
و أغمض العين
_____

حنيني ونيني
يا خويه ردتك بس تجي
زينب اخيتك ترتجي
توصل إلي يابو علي
مشتاگه ألك گلبي انمرد
يا حيرتي موتي گصد

جرحني زماني وحيده أتاني
غريبه و سبيه و الفراگ ولاني

منچتل و بحسرة الماي
انشد عليك الراح و الجاي

حايره منتظره جيه اگصد انه الغاضرية
و أغمض العين
_

مصابك غيابك
تارك ألم وسط الگلب
ياهو اليوسدني الترب
ثچيله عليله
جيه فقط منك ردت
لو بس نحر إنه متت

اجيلك تجيني ذبحني حنيني
تنشف دمعتي و توسد جبيني

الميت يريد العزيزين
وسفه نعشي ايريد چفين

امتانيه و سبلت اديه اگصد انه الغاضرية
و أغمض العين
____

أتاني اعاني
ياخذني و يردني الدمع
امحلفتك بكسر الضلع
تجيني سنيني
خلصت و اجه وكت الهجر
هسه بحياتي احتضر

فقط هالمسيه تمرن عليه
يبو اليمه اختك اجتها المنيه

راح اموت و گلبي ملهوف
حسره عيني عيونك اتشوف

فدوه مر لحظه عليه اگصد انه الغاضرية
و أغمض العين
____

انتظرتك مشفتك
ما أرضى ما أقبل شرح
ما تحتمل روحي جرح
همومي رسومي
متغيره من هظم اليسر
منتظره تحفرلي الگبر

تنزلني بيدك و يجي هم عضيدك
بلا چف يجيني و تجي إبلا وريدك

صابره بآلآم الجروح انتظر لو تطلع الروح

واگفه أتاني المنية اگصد انه الغاضرية
و أغمض العين
___

بعدكم ألمكم
يلچمني وي جر النفس
عتّم على روحي اليأس
امنياتي بمماتي
حسيني يجي للمگبره
يوسدني بيده بالثرى

الحمد هم قرالي بدموعه اجالي
احظنه بلهفتي و يرده الدلالي

هالحلم يتحقق شلون
و حسين گبلي جسمه مدفون

چني وحدي بهل الرزيه اگصد انه الغاضرية
و أغمض العين






كلمات / حسين أحمد الأمين

#الليالي_الموسويه
____

من السجن شعت مناره ترتجي أملاك الزياره
جنة الله الكاظمية
__

من سجن موسى تعلى و صار فرقد تالي
مثل جده الدنيه طالگ صاح صوته العالي
باب جان الربه فاتح من السجن بليالي
صار جنه بالشموخ و ذهب گبته يلالي

ما طلب منصب اماره تالي من الله البشارة
جنه الله الكاظمية
__

عاش غربه و مات غربه أمسى كل عمره غريب
الكاظم بوحده ايتألم شابه حسين الخضيب
سجنه چان ابلا ضويه لا شمس تشرق تغيب
لا إبن يمه يشاهد لا عرف لا من حبيب

مات و بغربه عجيبه اجنازته ضلت غريبه
جنة الله الكاظمية
_

اتشيع بغربه يشيعه أربعه حملوا وطن
يشبه حسين بوفاته ثلث ليالي إلا اندفن
وشكثر قاسه بحياته و شكثر شاهد محن
لمن چتفوه بسلاسل شاف عماته انسبن

أتذكر بهاي الرزية من مشت زينب سبيه
جنة الله الكاظمية
__

موسى إبن بيت الرسالة الما يصح ألهم نظير
من لفت ساعة منيته ماله صاحب لا نصير
عاش كل هاي السنين و أسس بصبره مسير
بالحياة جان الأسير و بالممات أصبح أمير

هذا وعد الله تحقق و شعاعاً أصبح الحق
جنة الله الكاظمية
____

صار للشيعة مزاره من الفتن حرز الامان
و بأرض بغداد ربنه خله قطعه من الجنان
ما گصد محتاج واحد إلا يرجع و اليدان
انترسن بخيرات موسى هو للفاگد حنان

ما يرد حاشى اليطلبه عدنه يتسمه بو طلبه
جنة الله الكاظمية
_

يلي رايد حاجه منه موسى فاتحلك اديه
دمعة عيونك يردها ضحكه ما تصعب عليه
أقسم بضلع الزچية يلي رايح تعتنيه
حاشى خايب ما يردك كاظمك ماله شبيه

أفتح أيديك بدعائك حاجتك تكضى برجائك
جنة الله الكاظمية





كلمات / حسين أحمد الأمين

#الليالي_الموسويه
----------------------------

ذكرتك. يجدي و هاجت آلامي
ذكرتك. وحيد بموتتك ضامي
بچيتك و أنته باحزانك
غريب و ماتت إخوانك
يجدي
_____

جدي حسين. جاني البين
مو مثلك و لكن يشبه شويه
بلايه معين. هماتين
وحدي و المنيه حامت اعليه

يمظلوم يمظلوم

ذكرتك من على الماي لازم ظهرك اتنوح
من شاهدت عباس جسمه مخذم اجروح

بمنيتي. اذكرت رضة عظامك
بمنيتي. شفت حرگة خيامك
بقيت بلايه وليانك.
غريب و ماتت إخوانك
يجدي
_______

مثلك حال. وحدي انشال
ما عندي أخو لا إبن يلفيني
لا خي عون و المسجون
تبقى اعله الحبايب تنتظر عيني

يمظلوم. يمظلوم

هانت هالمصيبة لمن شاهدت الطفوف
تتلفت بعينك ما من ناصر تشوف

هظيمة على الماي و متت ضامي
هظيمة ما مترضرضة اعظامي
الحوافر أخذت الوانك
غريب و ماتت إخوانك
يجدي
_________

ثلاث ليال بالاغلال
بقيت بلا دفن هان الأمر عندي
ما منداس عندي راس
بالتابوت لا مو بالحصيرة اتوسد بلحدي

يمظلوم يمظلوم

لا محزوز راسي لا بسهام مرمي
لا راسي على ارماح لا بالسيف مدمي

عالتراب ما خلوني عاري
عالتراب ثلاثة بالظهاري
طفل مات اعله ذرعانك
غريب و ماتت إخوانك
يجدي
_____

بسلاسل أيد مثل ايزيد
گيدوني مثل ما چتفوا اعيالك
عالتابوت اسمع صوت
ناعي مو شماته و ضحك چتالك

يمظلوم ... يمظلوم

ما يوفيلك ابچاي لا حسرات صدري
يلي راسه برماح و سبايه اعياله تسري

دموعي. طاحت و انسمع صوتي
دموعي. لمصابك مو لجل موتي
بحقد سلبوها قمصانك
غريب و ماتت إخوانك
يجدي





كلمات / حسين أحمد الأمين

#الليالي_الموسويه
------------------------

من تشيعونه من توسدونه
حسيناه
يصرخ بذاته نسمع آهاته
حسيناه
____

موسى إبن جعفر قتيل الليلة مسموم
بعد ما سارت ابدمه هاي السموم
موسى مظلوم و ينادي آه يمظلوم
حتى من حلت منيته شاهد ادموم

حتى و بلحده ما نسه جده
حسيناه
عاف لوعاته نسمع آهاته
حسيناه
__

خلص عمره اجروح غربه بين السجون
مثل حال حسين حاله قبل المنون
ما يشاهد كل بنينه تسد الجفون
يمتلك بس الحنين و دمع العيون

سجنه محرابه غابت أحبابه
حسيناه
بخده دمعاته نسمع آهاته
حسيناه
_______

مثل حال حسين حاله بلا دفن ظال
اتلث ليالي اعله الجسر هم شابه الحال
لكن حسين الظهيرة ظل عله الرمال
و مو سبيه راحت أخته بين الرجال

ما نظر بنته لا سمع أخته
حسيناه
الحال عماته. نسمع آهاته
حسيناه
______

شاف من امصاب جده أعظم امصاب
شاف جده بس نحر متوسد التراب
شاف عماته سبايه أبين الاجناب
شاف ألف و تسعميه جرح و صواب

ساكن ابعينه. منظر حسينه
حسيناه
ضحك شماته نسمع آهاته
حسيناه
___

بالسلاسل هم تذكر حال الأيتام
شاهد اسكينه و رقيه ويه ظلام
و المصيبه هاذي خلت عينه متنام
جسد جده عالوطيه امفرط اعظام

گطعت گلبه. و الدمع صبه
حسيناه
اعليها وناته نسمع آهاته
حسيناه





كلمات / حسين أحمد الأمين

#الليالي_الموسويه ( موشح )
_______

ساعد الله الكاظم الشايل محن
من ثگلها الجامعه اچفوفه هون
عاش جرح العاشر و صدره انسحن

السجن يشبه كربله باحزانه
__

موسى من سجنه تخلد ايه
الجامعه صارت ضريح و رايه
ما طلب دنيا و لا كل غايه

من السجن خله أسس بنيانه
____

عاش غربه و هو للضايع وطن
يشبه حسين بدفنته و المحن
بالسلاسل شاف عماته انسبن

مات و الگيد اليلف ذرعانه
_

گبر چنه السجن ذاك اشكد عجيب
ما يعرف الشمس بي تشرق تغيب
لا ابن يمه و لا حاضر حبيب

وحده امرافچ فقط سجانه
_____

صدگ لو گالوا على الكاظم وحيد
ظلم هارون اعله موسى ما يهيد
گيده بالجامعه الچانت حديد

و ابن شاهك چان من عدوانه
____

چان صح عدهم يسمونه أسير
وينه هارون و يجي يشوف المصير
موسى هسه بكل وكت صاير أمير

اسد بغداد النشد عنوانه
_

صار للشيعه حرز من الفتن
و مرقده هو ملاذ بكل زمن
الوحيد الچان و بغربة وطن

شوف زواره التجي ولهانه

__

الوصل گبته لا يظن يرجع حزين
اليمدها الايد يترسها الادين
الكاظم اعله إلي يحبه شگد حنين

ما كسر خاطر احد غلمانه
___

بكل وكت موسى ترى فاتح اديه
يلي عندك حاجه كاظمنه اعتنيه
دمعتك ضحكة يردها الترتجيه

١٨ فاتحهن البيبانه




كلمات / حسين أحمد الأمين
٨ / ٣ / ٢٠٢١

اسمى آيات التهاني والتبريكات إلى مقام مولانا بقية الله في أرضه الحجة بن الحسن المهدي المنتظر أرواحنا لتراب مقدمه الفداء و لجميع شيعة أمير المؤمنين عليه السلام
بمناسبة ولادة الأنوار الزاهرة و الشموس الساطعه و الكواكب الزاهره الأنفس الطاهره و الأنجم المنيره و البراهين الواضحه حجج الله في ارضه و اوليائه البرره
سيد الشهداء الحسين بن علي _ ع
سيد الوفاء العباس بن علي _ ع
سيد العابدين علي بن الحسين _ ع

#حسين_أحمد_الأمين

#صاحب_الأمر_ع
___

گاعد بيا مرقد اتنوح اليا رزيه الصوت مبحوح
سولفنه وضعك ما تگطعه دمعك
____

ما أبدي الكلام اوياك خلي دمعتي تبدي
شلونك هالسؤال يكون على المجهول يالمهدي
لكن فشله الك ينگال و اميه بعمتك تحدي
يا راحه اليشوف حسين بالطف دمه متبدي

نعتذر نجرحلك إحساس بالرمح ملچوم الك راس

حگه هذا جزعك ما تگطعه دمعك
__

شيخ الكون و ابن شيوخ غريب تعيش ما تنگال
ما ينفع ترى الديوان إذا منشوف وسطه اعگال
وانته ابن اليهابه الموت وبالكلفات اديه اثگال
ما تنهض يراعي الحگ تدري حسينك بيا حال

الياهي نگدر يسكت انگول عالسبي لو رض الخيول
شنهو اليمنعك ما تگطعه دمعك
__

يا خير اليمر اعليك و امسلبين كل الخير
يا شوغه التسير اعليك وتفتح للدمع چم بير
يالشايل جرح تفصال و امّگدر الك تگدير
چبير الطف ترى للشاف بس نحر الرضيع ازغير

الكل مصيبه امحضر ادموع من رقيه القرط منزوع
شگد تون نسمعك ما تگطعه دمعك
__

السهم و الخيل و النيران عشتهن وانته بين اخيام
وشفت چم من طفل مسحوگ وعينك عالمصيبه اتنام
شگلك بت علي عالنوگ و عمامك روسهم گدام
طبوا و الهلا بحجار و شتم ترحاب أهل الشام

هم سمعت اباب ساعات انترست اعيون العبايات
يا خبر يفجعك ما تگطعه دمعك
____

يملاچ السواجي گوم حسينك منذبح عطشان
ما يتحشم الفزعه السبوله بالحرب نسوان
ما يرتاح كل ليله اليعيش ابواهس الدفان
عجيبه ابيا ضلع باقي و ابو الاكبر صبح ميدان

ليله ليله روحك تموت بالمجالس زينب اتفوت
هم كسرته ضلعك ما تگطعه دمعك





كلمات / حسين أحمد الأمين

بمناسبة حلول شهر رمضان 🌙 المبارك لسنه 2021 أتمنى لكم رمضان كريم يعم بالخير والبركة والسلام ويشفي كل مريض و يعين كل ذي كربة ويفرجها على أمة محمد صلى الله عليه و آله
اللهم إنا نسألك زيادة في الدين وبركة في العمر وصحة في الجسد وسعة في الرزق وتوبة قبل الموت وشهادة عند الموت و مغفرة بعد الموت وعفواً عند الحساب وأماناً من العذاب ونصيباً من الجنة وإرزقنا النظر إلى وجهك الكريم
رمضان كريم كل عام وانتم إلى أهل البيت عليهم السلام أقرب و أنقى .. تقبل الله منا ومنكم صالح الأعمال والنيات 💚

#اهل_المجالس

يالناشدت عني و تريد اخباري
ايدليك بيه دمع عيني الجاري

يالتيهت عنواني بكل تعزيه تلگاني
_______

يلّي رايد العنوان اسمع مني هالكلمه
تلگاني بظلام الليل تضوي دمعتي النجمه
لا تسألني وين اتعيش بيتي مجلس و خدمه
صحباني الدمع و الآه و اللجمات و اللطمه

اويايه دمعتي تنتقل بالعزيات
امسافر على اجناح الجرح و الحسرات

شوف الدمع حلاني بكل تعزيه تلگاني
___

ليليله اعله باب الشوگ كاتب مستهل و انعه
مجلس ناصب ابگلبي كل لحظه يون ضلعه
ياما حارگ ابروحي بس ما أشبه الشمعه
ما اطفه اويه هب الريح لا اذبل من الدمعه

لو چنت منغث السبب مو بيه
كل يوم افك ريگي الصبح لطميه

بحسين افك الساني بكل تعزيه تلگاني
__

ميهمني تذم عذال بكفاي الحچي متروس
مهو البيده گمر ضاوي شلون ايبدله ابفانوس
خليني اعله باب حسين الداخل مجلسه محروس
ترى الشجره التحب حسين فشله اتخاف من الفوس

خليني يمه و بالمجالس شادود
لطام صاير شاعر و هم رادود

امگدي اعله بابه اني بكل تعزيه تلگاني
______

لتحاول تغير أفكار ما تگدر عليه ابهاي
ترى ظهري اسنده عباس من طاح اعله شاطي الماي
كل يوم الحرب تنعاد و يرجع منتصر مولاي
كافي بسك اتعادي حسين امسيطر اعله الراي

شگد حاربوني قبلك و روح أسأل
كلمن على المجلس تگرب ينذل

من هيبته انطاني بكل تعزيه تلگاني
________

عن هاي القضيه أبعد منك ما ردت مأجور
تدريني من ادگ صدري حيدر يعتني مطبور
قبل لا يبتدي المجلس توصل مرأة من النور
بآخر زاويه تگعد تبچي و بضلع مكسور

يوصلني فارس بس بلايه چفين
من گتله ياهو گلي شادود حسين

الطم بلا ذرعاني بكل تعزيه تلگاني
_____

كلما انحني ابابه يرد يرفع إلي الهامه
كلش زايده اعليه لو يحسبني خدامه
شمقدمله حتى اقنع ريت احترگ بخيامه
لو كون اكسر بصدري فدوه الكسرت اعظامه

نجري دمعنه و نلطم و هم نطبر
لا ما يساوي شوغه من الخنصر

لمصيبته أحزاني بكل تعزيه تلگاني





كلمات / حسين أحمد الأمين
١٣ / ٣ / ٢٠٢١

نرفع أسمى آيات التهاني والتبريكات إلى مقام مولانا بقية الله في ارضه عجل الله فرجه الشريف
بولادة معز المؤمنين كريم آل محمد صلوات الله عليهم الإمام الحسن بن علي المجتبى عليهما السلام
جعلنا الله و إياكم من السائرين و المتمسكين بنهجه و رزقنا الله زيارته و شفاعته في الدنيا والآخرة


#حسين_احمد_الامين

#ليالي_اميرالمؤمنين
_

يابا الحسن شنهي النيه للفجر لو للطبره
هاي الصلاة مگضيه و البگه براس الفقره
______

مثل الاوز حال اليحب يا علي تاني اشويه
صح نشبع من ايدك خبز و تترسنه بالحنيه
بس وين اكو مثلك ملك ايلم اليتيم بفيه

يا واحد بلا ثاني اله يالتارس الدنيا هله
يابو اليتم بعدك شله اليتيم

هونك علي بالمشيه خطواتك الگلبي اتعصره
هاي الصلاة مگضيه و البگه براس الفقره
__________

بابك تفتحه و ينطبك و انفل حزامك يمه
لا تشد يا حيدر بعد هذا الفجر بي هظمه
الموت يا حيدر تره هم يغدرك مو زلمه

يا جوهر أسرار العراش يالواجهك يصبح نعش
السيف گاصد مرتعش اجاك

من الگفه شويه شويه خايف الموت ابامره
هاي الصلاة مگضيه و البگه براس الفقره
________

يا صبح للماله صبح هالشمس أخذت لونك
من رجعت الچفك علي اشتاگت تره لعيونك
انجمعت اطفالك هالفجر لا تمشي يتوسلونك

كلمن اجه و شايل گلب ابدالك يموت وينضرب
ابلا علي عيشتهم صعب يالامير

حيدر هوه الكل ريه صاحوا فداء العمره
هاي الصلاة مگضيه و البگه براس الفقره
_______________

خطوه والمسجد يقترب تطلع الروح بهيده
يا علي لا تدخل صحت واركضنه نلزم ايده
باوع علينه برأفته وشوفتنه چانت عيده

واحدنه صاح ابلا امل أم وابو انته واهل
لو تمشي النه من يظل بالدمع

ارجع يبو الحنيه انحلفك ابحب الزهره
هاي الصلاة مگضيه و البگه براس الفقره
____________

ردينه نمشي ابلا علي كلمن يكف دمعاته
لن صوت جبريل انسمع و يزلزلن اهاته
تهدمت أركان الهدى طبروا علي صرخاته

أحمر صفه خيط الفجر والدنه راسه منطبر
لو بيدي انطيه العمر سبيل

كلمة قسم محچيه قد فزت والله يقره
هاي الصلاة مگضيه و البگه براس الفقره





كلمات / حسين أحمد الأمين

#أمير_المؤمنين_عليه_السلام
___________

لحظة يا موت. اتركه و روح
هذا املنه. هذا املنه
من علي لا تاخذ الروح
هذا املنه. هذا املنه
_________

لحظة يا موت أرد أنشدك
أتأخر شويه اعله وعدك
وي اليتامه شنهي عندك ..ليش ياموت
هذا ابونه الوجه جنه
بكلشي احلفك عيفه النه
بس علي تدري املنه .. ليش يا موت

أخذ كلشي و عوف حيدر سالم ابداره
هذا شجرتنه الچبيرة يلمنه بكتاره
و روحي محتاره

سالم أتريد هاي الأيتام
هذا املنه. هذا املنه
و الفجر لاح. حقق أحلام
هذا املنه. هذا املنه
________

أتركه يا موت صله
وي ايتامه ايتسله
خله نترجاك خله ليش يا موت
هذا أبو كل اليتامه
شكد حنين بكل كلامه
خله يرجع بالسلامه. ليش يا موت

جان من يشوف واحد دمعته بعينه
يفرش اجناحت صدره و تحضنه ايمينه
عيف والينه

منه الأنفاس بيها تسبيح
هذا املنه هذا املنه
هيبة اجبال حيدره ايطيح
هذا املنه هذا املنه
________

ما تجرحك دمعة الهم
عيف حيدر النه يسلم
نرجع بأحضانه نلتم. ليش يا موت
ماكو بالدنيا شبيها
الكعبة جابت بس عليها
لأجله ايتامه بچيها. ليش يا موت

عوفه سالم وأخذ منه كلشي التريده
أتركه مصباح واحد انحبه من أيده
بداعة اوليده

بعد چم يوم. يطلع العيد
هذا املنه. هذا املنه
بجاله يا موت. نفرح انريد
هذا املنه. هذا املنه
_______

نريد منك هالبشارة
سالم يعود الدياره
فدوه لا تلجم زغاره. ليش يا موت
شوفته يا موت نعمه
كل صبح بعيونه بسمه
والله اليلوعنه يتمه. ليش يا موت

جانت الأيتام تفرح من يشوفونه
ياخذ الحزن العليهم و ينطي من لونه
بنظرة عيونه

هسه يا موت. حاير الراي
هذا املنه. هذا املنه
لشوفته انريد. شوفة الماي
هذا املنه. هذا املنه
_____

بالدعه يم بابه نرجي
و الدمع ويانه يبجي
نسمعه يسكت و يحجي. ليش ياموت
الما ترك فد يوم غزوه
و لا رجع من حربه خطوه
يكعد و من يمشي كوه. ليش ياموت

گلفه خواض المنايا يوكع ابشده
الخاف كل العرب منه واحد يسنده
و الدمه اتهده

المدد ابطال. وسفه يا موت
هذا املنه. هذا املنه
نشاهده الحين. يلمه تابوت
هذا املنه. هذا املنه




كلمات / حسين أحمد الأمين