#ليالي_اميرالمؤمنين
__

بويه ثگيل افراگ وجهك يهد حيلي
بويه عگب عيناك تسهر عيني ليلي

ارجع يا علي خيمه اعله ناسك
راسي فدوه بويه الجرح راسك
حيدر حيدر
_______

بنتك بلوعه اجيت بالدمع يمك بچيت
و ادري گلبك ابد ما يكسرلي خاطر
ريحة أمي اشتمها بيك من تجي واركض عليك
و تگعد اتلمنه بچفوفك و المشاعر

ابد ما حاسبه احساب ترحل من حياتي
يابو الحسن وياك يلفيني مماتي

موتي انشدك ويه ابويه أخذ روحي
موتي ابقه انتظرك الآخر جروحي

يالماكو احد شايل احساسك
راسي فدوه بويه الجرح راسك
حيدر حيدر
________

گوم خل نشتم هواك و يترس الدنيه ضواك
يالخذيت بطبرتك من عندي لوني
و ابتسم خل نستراح لا تزيدلنه الجراح
ولدك ايتانوك تنهض يسألوني

طبرتك صعبه يا حيد اخذت مني عمري
ما متوقعه الموت يدنالك يذخري

نورك ضاوي ادروبنه و كل الخواطر
نورك من ايغيب يعميها النواظر

الحسن بدموعه من ايديك باسك
راسي فدوه بويه الجرح راسك
حيدر حيدر
_________

الفرحه بعدك مستحيل يا ابو مالك مثيل
يا دفو ليه و بعد عزي و حناني
فرگتك ليه عذاب ميته بس فوگ التراب
امنيه بحضنك ارد اغفه ثواني

رد الخاطر حسين الدمع تارسله خده
هوايه بيك مهظوم گاعد يبچي وحده

سالم يتمنى ترد ينظر ضحكتك
سالم و يتعنى بدموعه ايحب جبهتك

خلي نرتوي من فيض كاسك
راسي فدوه بويه الجرح راسك
حيدر حيدر
_________

ايتامه من بعدك نصير منهو يبقى للفقير
ما ترد كلمن يجي و مدالك ايده
شوفهم هسه اعتنوك بالدوه ركضوا اجوك
گصدوا الدارك علي صاحوا نريده

انهض شوف الايتام ملچومه اعله حالك
ما متعوده اهواي يچافيهم دلالك

شوفه يتيم اباب بيتك گاعد اينوح
شوفه اخذوا روحي مني ولا علي ايروح

هظمهم بالگلب ادريبه جاسك
راسي فدوه بويه الجرح راسك
حيدر حيدر




كلمات / حسين أحمد الأمين

#ليالي_اميرالمؤمنين
_______

اتيتم القران بالفجر من حان
طايح ركن للدين من طاح ابو الحسنين
_

علي دين الله لوما هوه ما يكمل
و لا تختم رساله كل نبي مرسل
علي هو الكتاب الناطق المُنزل
برحيله الصامت اياته دمعهن هل

الفاتحه و الناس منطبر بالراس
واحد الثقلين من طاح ابو الحسنين
_____

تعب فكري بعلي و ما حاچي بس اسمه
شسولف عن رجل بس النبي ايفهمه
علوم الدنيا كلها ما حوت علمه
شكو مرسل اجه شد بعلي عزمه

كل نبي مرسول بشدته شيگول
يتنخى اسد صفين من طاح ابو الحسنين
____

علي ما مثله واحد بالحرب ينعد
بدر و الخندق و خيبر و احد تشهد
منو بيهن نصر طه النبي الأحمد
لون مو حيدره دين الله ما يعبد

قاتل الابطال بالحرب خيال
يمحطم الجبتين من طاح ابو الحسنين
______

علي لسه العرب من صولته تحذر
ورگته توگع الحيدر علي ادبر
ابو اتراب اللقب هذا العقل حير
اذاً حتماً ابو كل البشر حيدر

راهب الفرسان أوحد الشجعان
يالحارب ابسيفين من طاح ابو الحسنين
__

أسأل كل حرب منهو ابو الحمله
الواجه حيدر الخوفه ورث نسله
المعارك من يطبها المرتضى تحله
علي رب الشجاعه بحربه تتجله

اشما تجي اعداد بچف علي تنباد
من عنده ماكو اثنين من طاح ابو الحسنين





كلمات / حسين أحمد الأمين

🖤 كل عام و انتم خدام الحسين بالف خير اسأل الله العلي العضيم ان يرزقنا وإياكم الدمع والجزع وان يثبتنا على طريق سيد الشهداء وان يوفقم في خدمه سيد الشهداء عليه السلام و يجعل كل ايامكم معطره ببركه سيد شباب اهل الجنه عليه السلام 🖤🖤


حسين أحمد الأمين

#يوم_البقيع_العالمي
_

شوكت اعلگ الك شمعه يم گبرك أهل دمعه
بعيني ضاگت الوسعه يبو محمد يبو محمد
_

چم يوم باقي أنتظر لزيارتك يابو الكرم
و اليا وگت گبرك يظل ما عنده گبه و لا علم

مشتاگ الترابك ارد اشمّه
يمن حتى بمماته باقي ظلمه
شنو ذنب الحسن گبره يهدمه
لان حيدر ابوه و الزهره امّه

يبغضونك ابن حيدر عداوه سابقه من الذر
لأن بصنامهم كسر يبو محمد يبو محمد
_

بس ارد اشاهد گبتك و ادفع حياتي إلها ثمن
معقوله بالغربه تصير و انته لحبابك وطن

يا نور السمه يمضوي النجوم
بضريحك يمتى چا زوارك اتحوم
تجيك انصارك و تتعنى كل يوم
و يرد فرحان گلبه الجاي مهموم

نجيك و ننصب الموكب و نفتح ايدنه و نطلب
نشوفك واكف اتعزب يبو محمد يبو محمد
_

چم سالفه يمك يبو محمد اريد احچي بدمع
چا يمتى انظر گبتك و اعلگلك العشره شمع

شوكت عالعتبه اسجد تدري ولهان
و شباچك احضنه حضن عميان
مو كافي دمع مولاي و احزان
أريد أسمع علي يمك بالاذان

المناره امذهبه و حضره ورايه بگبتك خضره
ويانه تجي الزهره يبو محمد يبو محمد
___

هالحلم يمتى انشاهده يتحقق و نمشي الك
و انعلي گبتك عالنجم و ايطوف بيها كل ملك

و نسويلك زياره ابيوم عاشور
على اوليدك القاسم نشعل ابخور
و سابع من صفر مو راس مطبور
على چبدك نحزها هاي النحور

نسوّي يمك المقتل ونلعن الثاني والأول
نشيعك بالصحن نرحل يبو محمد يبو محمد
_

يا هظيمه لسه گبرك بس ترب و شچم حجر
ماكو لا ناعي يگصدك لا محب يمك حضر

تريد الليله دعوه هاي الانصار
تدعو بالفرج الصاحب الثار
يجي يبني المراقد و احنه زوار
و نحرگها النواصب المنعت ابنار

دعائك عجل المهدي نجيك الگبرك انجدي
و تنطي حاجتي بيدّي يبو محمد يبو محمد




كلمات / حسين أحمد الأمين

#يوم_البقيع_العالمي
________________________

اكتبها باچر بالذهب يا علي فوگ القبب
تنبني أربع مناير للبقيع اتعنى زاير
_______

مو بعيد الأمر هذا باچر ايحين الوعد
و اعتنيكم للمدينه و أوفي وياكم عهد
باچر الرايه بيمني و للحسن گلبي گصد
يم گبر جدي بحنيني اگعد و صوتي نشد

اقره يمك بالدمع و اعلگ بصحنك شمع
ما يظل كل شيعي حاير للبقيع اتعنى زاير
_______

يا علي بالذهب باچر عالقبب چفي كتب
وعالنواصب سيفي يحكم و اجزي من چان السبب
باچر الزاير يشاهد امطرزه الحضره ذهب
و بعد ما نسمع لتشرك لليطوف و للنحب

ما يظل كل ناصبي يحكم بگاع النبي
و الصحن بالهيبه زاهر للبقيع اتعنى زاير
_______

تعتني افواج المواكب قافله اتمد قافله
و صوت ابو الباقر ينادي يا هله و مية هله
و حضره وحده ما تكفي سهله هاي المسأله
اربعه باچر أسوي الوحده تشبه كربله

و المجالس بالصحن ينبني أكبر وطن
اربع اجداد المفاخر للبقيع اتعنى زاير
______

المهدي انه يا مصابي عالقبور المظلمه
أنظر و تذبح حسرتي ونزلت ادموعي دمه
منتظر موعد ظهوري و أبني گبة اعله السمه
و ابني من دمعات عيني گبر أمي فاطمه

اكتب بدمعي الجرن هذا گبر ام الحسن
و النبي ويايه حاضر للبقيع اتعنى زاير
___

أربعينية أسوي بالدموع و بالحنين
مثل ما لحسين نمشي نمشي صوب أم البنين
الها ابني اربع مناير لأن عدنه إلها دين
مثل ما ضحت ولدها و كل عمرها للحسين

ما اجازيها بشكر وفت لجدي عمر
يا حليب العدها طاهر للبقيع اتعنى زاير





كلمات / حسين أحمد الأمين

#انتظار
_________________

خلصت مواعيد السفر و محبوبي لسه ما ظهر
وين أنته چا وين منتظرك سنين
________

خلصت مواعيد السفر ما بقت بس چم جمعه
يالواعدتني برجعتك خلصت أيامي دمعه

ضليت اون مثل الفگد كل اهله
بسامره يوميه انتظر و السهله
غيبتك تركت بالگلب جم عله
يم بابكم ليليه عيني اموشله

يوميه يم باب انتظر. فات الأوان اعله العمر
لا يعتني البين منتظرك سنين
________

يالتارس بروحي عشگ ارحم بهجرك حالي
ما نايم الليل برغد امساهر بگلبي و بالي

عايش لچن گضيت عمري بغربه
الفاگد حبيبه شلون يصبر گلبه
گاعد و اناجيك بدعاء الندبه
اين الذي في روحي ساكن حبه

في مكه ام وادي طوى ام طوس ام في نينوى
نشد المجانين منتظرك سنين
_________

مو هوه لاكن مستقر بيه و صرت أنفاسي
مالكني و انته ابلا أهل يا اعز من كل ناسي

لو يمر يوم و انسى ذكرك لحظه
كون المنيه اتعجل بهل النبضه
ماريد غيرك و اليحب ما يرضه
لو خيل عشره اعله الصدر و اترضه

عايش الك طول الزمن. يا اترف و أجمل وطن
يا مهجة الدين منتظرك سنين
_______

طال الهجر بيه شكثر افراگك جرح ما ينراف
يالعايش ابروحي هوه اتنفسه و ما ينشاف

لجلك مضن كل السنين برجوه
گلبي عِشگ غيرك ابد ما يهوه
لو يضمه بس منك يرد يترّوه
لوما يحبك گلبي گلي اشيسوه

بديني يم بابك نده حادي العمر بيه حده

ما عندي عمرين منتظرك سنين
___________

شمقدم انه الحضرتك خاطر أكلك عجل
ما عندي بس حب الصدگ يا أشرف و أجمل خل

بلكت يكفي هالفعل للغايه
ادريبه ذنبي امعذباك هوايه
اعدل طريقي امروتك مولايه
عطشان جيتك و ارتوي بحچايه

بس رايد احچايه هلا و شكبره هذا التقبله
ابعسكر الدين منتظرك سنين



كلمات / حسين أحمد الأمين
١١ / ١٠ / ٢٠٢٠

#استشهاد_الصادق ( تجليبه )
___

سلامي للبقيع الجعفر الصادق
نور الله الذي بي وصه كل سابق
مثل جده علي قران هم ناطق

العلوم الدنيا جعفر أصبح العنوان
واويلاه يابو الكاظم
____

سلامي للبقيع التربته الخضره
الما نشفت لهسه دمعة الزهره
تون للصادق و مخنوكه بالعبره

تنحب و الدمع فوك الوجن نيران
____

سلامي للبقيع الكبته الطاحت
و عطر آل النبي من تربته فاحت
من هظم المصيبه احجارته صاحت

يا راعي الأمر عجل يبن عدنان
_____

سلامي للبقيع و ناري مشتعله
شوكت يم كبره اكعد و احجي بالعله
و انظر يمه أبو صالح وكف صله

و رايات الثأر ترفع على الطغيان
____

سلامي للبقيع انروح زواره
و ننصبها المواكب و احنه بجواره
و نسمع بالصحن صيحات البشاره

كمل كبر الزجيه و إنتهى البنيان







كلمات / حسين أحمد الأمين

#استشهاد_الصادق
________

جم خيمه رسمت حركة الدار
جم طفل شفته ايشاكف النار

أكبر جرح من عمتك و اتصورتها بونتك
______

شنهو شفت من حركوا الدار
ليش الدمع صبيته محتار
شنهوه شفته بعينك و ليش
حيلك انهد ابشبة النار

ليش صبيت عالخد الدمع
ليش مرسوم بعيونك ضلع
ليش وجهك اشوفه منصفع

شفتك وكفت اتعاتب الباب
ضلع امي لسه اتكله ما طاب

اسمع حجي عاطفتك و اتصورتها بونتك
__________

منهظم كلبك سيدي هواي
اتاذيت لمن جابوا الماي
ما تقبل ايطفوها للنار
جنك ذكرت الخيمه مولاي

نار جابتلك من الطف صور
نار و جمرات من ذاك القهر
نار بعماتك امخليه أثر

هم انجوت طفله بذاك الرماد
و لا رأس مرفوع اعله مياد

ما فاركت ذاكرتك و اتصورتها بونتك
___________

كربله ازغيره اتشوف و تنوح
و اعله السبيه طلعت الروح
مثل الشمع لزينبكم اتذوب
من الحرك جفها هواي مجروح

ادموع شرحت تفاصيل الألم
ادموع وشلت عينك عالخيم
ادموع راوت الك كل الهظم

شفت اعله دارك ركضت الناس
و حسين صدره اركاض ينداس

شوف الفرق ناشدتك و اتصورتها بونتك
__________

حركوها دارك صح على أطفال
بس ما جتفوا أيديهم بالاحبال
فزعوا انصارك موش عدوان
و ما ركضت اختك بين الارجال

خيل ما اجت يمك بالفزع
خيل و لا راس منك منكطع
خيل و لا قرط طفله منزع

زينب شفتها ابدون الحسين
لمن مشت مجتوفه الايدين

ما جتفوها ابنيتك و اتصورتها بونتك
________

كل هذا و انته سالم الرأس
و ماكو اعله صدرك خيلهم داس
و لا شفت أخو مكطوع الزنود
و لا تضرب اختك هجموا الناس

ناس حضرت الهزل للسبي
ناس اتسب بعيالات النبي
ناس بالسوط تضرب عالعبي

الله يعينك شفت المصاب
أمك و عمتك رسمت الباب

الحد ما متت حاركتك و اتصورتها بونتك






كلمات / حسين أحمد الأمين

عظم الله اجورنا و اجوركم بذكرى إستشهاد عميد مذهبنا صادق العتره الطاهره الإمام جعفر بن محمد الصادق عليه السلام
جعلنا الله و إياكم من الاخذين بثأره و المشيدين لضريحه مع صاحب الأمر روحي و أرواح العالمين له الفداء


#حسين_أحمد_الأمين

#محرم_الحرام
السلام عليكم ورحمه الله وبركاته
سنبدأ ببركة أبا عبد الله الحسين عليه السلام
قصائد محرم 1443 هجريا
نسأل الله التوفيق و السداد وأن يرفع عن شيعة أمير المؤمنين الوباء و البلاء ببركة أهل البيت عليهم السلام


#حسين_أحمد_الأمين

استهلالية شهر محرم الحرام 1
_ - _ - _
عاهدناك بالدم احنه عاهدنه
أبد متموت يحسين بضمايرنه
___

اجه شهر الحزن بالحسرة و الآهات
و كل شيعي لمصابك يهمل العبرات
عاهدناك نلطم نبقى بالعزيات
لو بالموكب انكتبت منيتنه
_

طلسم طفك امحير عقول الناس
بكثر دمعاتك الطاحن على العباس
يا مالك دليلي و كلشي بيه احساس
غيرك يا ابو اليمه فلا عدنه
__

ما نترك عزائك لو يجينه الموت
مهما حاولوا ما ينصه هذا الصوت
يقين و بالعهد باچر جنان انفوت
صحنه بيك صحنه و بيك آمنه
___

يل الضحيت لله بكلشي متبالي
اشما قدمنه الك يحسين من غالي
ما نوفيك لو نلطملك اليالي
عبيدك احنه نبقى و أنته آمرنه
_____

يل الواحد فلا مثلك بشر ينعد
على طول الزمن نحرك يظل ممتد
خدام الحضرتك يا حسين أشهد
شمحلاها لون يحسين تقبلنه
___

تربينه بمجالسكم على الخدمه
و أبد ما نترك امصابك يبو اليمه
نسير بدربك و ما نهمل النعمه
يحسين بخدمتك شان رافعنه
_

نعاهد ما نزل عن الدرب المره
إذا زلينه لا ترضى أمك الزهره
كل خادم يقدم منحره و عمره
لحد ما بالحشر چفك يساعدنه




كلمات / حسين أحمد الأمين

استهلالية شهر محرم الحرام 2
_ - _ - _

اجري دموعك .. والطم اعله الصدر ..
هالعمر .. بالعزه سجل ختامه
خلي المجالس .. چن صلاة واجبة
لكربله .. و الشرط تترك علامه

ويه الحمد اقره قصيده
ابديها من گطعة وريده

اجري دموعك اجري دموعك
______

اگصد مجالس للطهر گاضي ترى هذا العمر
سنينه
اذخر لجل باجر دمع ما ينفع و يقبل عذر
علينه
بس اليواصل مجلسه يرضى عليه حيدر علي
ونبينه

يهل عينك تصب .. باجر درب .. جنه أمامك
يمن تنحب حزن .. تضرب جفن .. ترضي إمامك
أبد لا تنشغل .. بالك تزل .. دربه سلامك

خلي اعله بالك موقفه .. بالحشر .. يفتخر
من يشوفك لجله حاضر
ما ينفعك غير الدمع .. و التعب .. و السبب
ما يعوفك حاشه باجر

يرضى عليك وهم تريده
ابديها من گطعة وريده
_____

واصل يخادم عالعهد ظل الهج بإسم التحب
زمانك
لا تحتمي بفي الغصن خلي العرش يصبح حصن
امانك
هاي المجالس منزله واهبها ربك و أرتقي
بمكانك

تعال المأتمه .. بي فاطمة .. و حيدر يحضره
همومك تنجلي .. واكف علي .. راسه يطبره
بدموعك انهظم .. خلي اللطم .. صدرك يفسره

لا تنسى حافر يسحك .. بريته .. مهجته
نايم بشمس الظهيره
خلي اعله بالك من تناثر .. وذر .. و الأثر
تالي ينلم ابحصيره

أذكر بعد طيحة عضيده
ابديها من گطعة وريده
_________

هالمجلس شكد بي عبر خطوه يقرب المنتظر
دمعنه
ابچي و بعد أضرب صدر ربنه لشعائرهم تره
خلقنه
راسك اطبره و لا تظن عقل اليحارب يفهمه
حزنه

و لا تهتم بعد .. عندك سند .. من الزجية
يمن تسحك جمر .. واسي الطهر ..وأخته السبيه
دموعك نازله .. للعايله .. البل الغاضريه

لا تنسى سهم إلي ذبح .. مهجته .. عبرته
طايحة و رگبه گطيعة
عيش و تصور هالامر .. يجرحك .. يذبحك
بيمنته ذبحوا رضيعه

ناشغ فتح لحسين أيده
ابديها من گطعة وريده
___________

هاي الشعائر واجبه منصوبه من گبل البشر
رساله
من ادم لحد آخر نبي أقره المصايب كربله
فعاله
واحد ضربها جبهته واحد ذرفها دمعته
دلاله

يخادم افتهم .. عندك علم .. عن اليخدمه
نبي يتبع نبي .. لابن النبي .. مصابه يعظمه
أبد لا لا تشك .. لا تفترك .. من الله نعمه

بهاي المجالس عظم .. و انتظم .. و اللطم
خله يكسرها عظامك
بلكت تواسي صدره من .. ينسحك .. ينطبك
حافر اعله اظلوع أمامك

ما نوفي لوعاته الشديده
ابديها من گطعة وريده
________

عندك مثل عن هالامر حمزه بخدمته شكد عله
مقامه
حمزه الزغير بالأمس صار الچبير و هم حصل
مرامه
من هالتراث أنته اعتبر همه أصل هذا الأمر
قيامه

يخادم مدرسه .. وي مجلسه .. محلا عشرته
بيمه ذكريني يون .. صوت الحزن .. أسمع عبرته
مشه بهذا النهج .. صارت وهج .. بينه حسرته

خادم حسين و هالصفه .. رفعته .. بخدمته
گضه كل عمره و حياته
سير بدربهم أنتبه .. لا تزل .. و الفضل
ميت و خالد مماته

للحشر عالي يظل نشيده
ابديها من گطعة وريده
_____

أذكر بعد ملا وطن صوته الحزين بكل زمن
تردد
لا تنسى ديون الشعر عبود غفلة و الشرع
تخلد
عبد الأمير شكد خلد كاظم تراه بكل سنه
تجدد

بعد أذكر خدم .. وأحد علم .. يمشي بطريقة
بعد باسم تره .. من منبره .. يلمع بريقة
خدم تتبع خدم .. بس الأهم .. توصل حقيقة

لمصيبته دفعوا عمرهم .. رهن .. و الثمن
خالدين بهل القضية
أفهمها زين و لا تشح .. الدمع .. وانفجع
باجر اتوفي الزجية

بهاي الخدامة و العقيدة
ابديها من گطعة وريده




كلمات / حسين أحمد الأمين

استهلالية شهر محرم الحرام 3
_ - _ - _

مجنون. عقلي بمحبتك
مجنون. رايد نظرتك
حلمي أحقق هالاماني. بمجلسك أمك تراني
______

نطيت بروحك همت بجروحك
كثر ما نوحك عشت بمصابك
دماك التجري اطبعتها بصدري
يحبي و ذخري وكفت ابابك
يمحبوب . هالذنوب . تطيح ابمجلسك
بهل الالطاف . شنو شاف . تجنن عابسك

ماريد. منك أجر
ماريد. بس هالامر
ابقه انوح بكل زماني. بمجلسك أمك تراني
____

العمر و سنينه عزه مسوينه
شكثر ما بينه ننوح الطفك
دمعتي التجري دماك التسري
لطمتي بصدري لدماك و نزفك
اعله كل آه . اويلاه . نصيح الطيحتك
عله أيتام . و الاسهام . تلوذ بخيمتك

أيتام. تسحك جمر
أيتام. رضها المهر
هذا موقف بي تعاني. بمجلسك أمك تراني
_____

تهت بدروبك بسمار اغروبك
سترني ثوبك و صرتلك خادم
تضيع أفكاري وارد بعذاري
عزائك داري اظلن هايم
الك دوم . يمظلوم . اصيرلك عبد
الك ثار . مثل نار . ابد ما تنخمد

هالثار. يشفي العلل
هالثار. ندعي العجل
بسيف ابنك ماله ثاني. بمجلسك أمك تراني
____

يثار المهدي يدمعة خدي
انه ما عندي فقط بس حبك
بحياتي و عمري بمصايب دهري
جنابك ذكري رجائي بتربك
من اصد ليك . اناديك . تسهل حاجتي
يبن هاشم . بفاطم . تردلي طلبتي

اطباع عدكم كرم
اطباع. بيكم قسم
بهل المجالس عالي شاني. بمجلسك أمك تراني
_____

شفت هالمنظر ملائك تحظر
الزجية و حيدر تهل ادمعهم
بطرف كل مأتم يظل يجري الدم
اعله صدر اتهشم لطم بضعتهم
يجي صوت . مثل موت . حضر طه النبي
يلطمون . يونون . على حرگ العبي

يا حيف. بت حيدره
يا حيف. و اميسره
اتنادي ما واحد اجاني بمجلسك أمك تراني




كلمات / حسين أحمد الأمين

#استهلالية_محرم 4
_________

يالناشدت عني و تريد اخباري
ايدليك بيه دمع عيني الجاري

يالتيهت عنواني بكل تعزيه تلگاني
___

يلّي رايد العنوان اسمع مني هالكلمه
تلگاني بظلام الليل تضوي دمعتي النجمه
لا تسألني وين اتعيش بيتي مجلس و خدمه
صحباني الدمع و الآه و اللجمات و اللطمه

اويايه دمعتي تنتقل بالعزيات
امسافر على اجناح الجرح و الحسرات

شوف الدمع حلاني بكل تعزيه تلگاني
______

ليليله اعله باب الشوگ كاتب مستهل و انعه
مجلس ناصب ابگلبي كل لحظه يون ضلعه
ياما حارگ ابروحي بس ما أشبه الشمعه
ما اطفه اويه هب الريح لا اذبل من الدمعه

لو چنت منغث السبب مو بيه
كل يوم افك ريگي الصبح لطميه

بحسين افك الساني بكل تعزيه تلگاني
_____

ميهمني تذم عذال بكفاي الحچي متروس
مهو البيده گمر ضاوي شلون ايبدله ابفانوس
خليني اعله باب حسين الداخل مجلسه محروس
ترى الشجره التحب حسين فشله اتخاف من الفوس

خليني يمه و بالمجالس شادود
لطام صاير شاعر و هم رادود

امگدي اعله بابه اني بكل تعزيه تلگاني
__

لتحاول تغير أفكار ما تگدر عليه ابهاي
ترى ظهري اسنده عباس من طاح اعله شاطي الماي
كل يوم الحرب تنعاد و يرجع منتصر مولاي
كافي بسك اتعادي حسين امسيطر اعله الراي

شگد حاربوني قبلك و روح أسأل
كلمن على المجلس تگرب ينذل

من هيبته انطاني بكل تعزيه تلگاني
____

عن هاي القضيه أبعد منك ما ردت مأجور
تدريني من ادگ صدري حيدر يعتني مطبور
قبل لا يبتدي المجلس توصل مرأة من النور
بآخر زاويه تگعد تبچي و ابضلع مكسور

يوصلني فارس بس بلايه چفين
من گتله ياهو گلي شادود حسين

الطم بلا ذرعاني بكل تعزيه تلگاني
_

كلما انحني ابابه يرد يرفع إلي الهامه
كلش زايده اعليه لو يحسبني خدامه
شمقدمله حتى اقنع ريت احترگ بخيامه
لو كون اكسر بصدري فدوه الكسرت اعظامه

نجري دمعنه و نلطم و هم نطبر
لا ما يساوي شوغه من الخنصر

لمصيبته أحزاني بكل تعزيه تلگاني





كلمات / حسين أحمد الأمين

استهلالية شهر محرم 5
_ - _ - _

مصابك نبي و عايش بغار خيامك
يل عالترب فرشت الخيل اعظامك
نايم وسط حر الشمس و ساكن دليلي
____

الحالتك تبچي السمه صار غيم من الدمه
وانته متوسد الترب طعنه و عذاب
نايم بطول الأرض مفرط و ما تعترض
فرشوا بجسمك مثل فرش التراب
حتى من لمك علي وصله وصله يالولي
و بحصيره جمعك أعظم مصاب
شلون حامل هالوضع موذر شلون الدمع
نايم أنته و كون لأجلك باضطراب

ضاع الفكر من شفت جسم بلا رأس
يالمنچتل و محروگ من نار الشمس
بألف و تسعمية جرح ساكن دليلي
______

اتغيرت ارسوم الوجه و للخيم من تتجه
تسمع أختك تندبك و أنته چتيل
شيخ تلهب غيرتك و الحميه اخذتك
تجمع بحيلك تريد و ماكو حيل
رغم كل هذا الحصل گمت و موذر وصل
من شفتها عالخيم هجمت الخيل
گطعوا الراس و گمت بموقفك هذا همت
غيرتك فزعت من ادماك التسيل

خالد صرت كل زمن شمسك تسطع
لا ما متت مو شمر نحرك يگطع
يل عالرمح راسك بقى ساكن دليلي
_____

طحت لكن عالسمه وانته ابن حامي الحمه
ما أظن الگاع تحمل وگعتك
حرت بيك و ما حرت لمن گالولي طحت
شلون توگع و أنته كون بصايتك
أجزم أنه بهل الأمر طحت بس واكف عمر
يلي طبع اجبال ماخذ هيبتك
ما متت لمن متت طول الزمان اتخلدت
و الشمس مصدر ضواها گبتك

يابو علي الباري اجتباك و إيدك
و ابموتتك لا ما متت مو موعدك
عايش على طول الدهر ساكن دليلي
_____

شفافك الصارن خشب وجهك بلون الذهب
ضامي لكن دمك امرويله كون
اتوذرت بس جمعت الدين بالدم احفظت
أنته مصفر و نطيت الدنيه لون
چم أخو شفته وگع چم إبن نحره انگطع
اتكابر بدمعك يملاچ العيون
نشفت ارياگ القلم من تخيلت الألم
فتشت بالطف جروحك ما تهون

شذكر إنه بكل جرح روحك تنچتل
يمهن متت بس ترد لخيامك عدل
وبجروحي بعدك ما متت ساكن دليلي
______

يا بشر ما مثلك بشر انطى للعالم عبر
بيك متجمعة المدامع و الألم
چنت وحدك بالحرب و اترست دلالي حب
يا حقيقة بلا خيال و لا وهم
عشت بيه بلايه حد بكثر طعنات الجسد
بكثر حيرة زينب بحرگ الخيم
عيشتني بلا سبب وخنصر ايمينك سلب
و عزبت عبدلله من جاك السهم

گلبك ردت و سلمته اليه بلا ثمن
راس برمح و عيالك لأجلي انسبن
يالمنذبح و المنسلب ساكن دليلي





كلمات / حسين أحمد الأمين

#استهلالية_محرم 6
_____

يعاشورك هلاله منرسم بيه
يعاشورك ما فاركته ليليه

كل يوم اليمر عاشر بكلبي و دمعتي امساهر
يعاشورك
___

اهلالك ما يغيب ابيوم خاطر هالشهر يظهر
يبو اليمه المصابك صار خدي ابدمعته امحفر
و بسابع نحيبي اعليك اشوفك عالثره اموذر
انسه أيامي و أهلي حسين و أذكر كطعة المنحر

على امصابك عاشرت الحزن عشره
على امصابك ما تكفيلك العشره

هلبت بالجزع ناصر بكلبي و دمعتي امساهر
يعاشورك
_____

عايش و العمر طرواك بيك أيامي كاضيها
هيه الدنيه دونك بيش غير انته المحليها
من عاشور و العاشور روحي تموت و احييها
الناس الذبحتك يحسين ريحة ناس ما بيها

يمذبوحي ماردني صبح حزنك
يمذبوحي رايدلي جرح منك

الجرحك انحسب شاعر بكلبي و دمعتي امساهر
يعاشورك
_____

ناسيك شوكت يحسين عاشر بيه يوميه
ناصبلك مجالس ليل و اقرالك بروحيه
حادي الجرح ما يرتاح يشبه ظعن مسبيه
انام بصوت لطميه و افز بصوت لطميه

يفدواتك سنيني و كل هلي و ناسي
يفدواتك مهجة روحي و إحساسي

لو ما انته ما صاير بكلبي و دمعتي امساهر
يعاشورك
______

ما فارك دمعتي عليك اليفاركنه بس كبري
إذا موش بجروحك هام ما يسواش كل عمري
مو عشرة لطم يحسين عشرة وياك ادك صدري
ياريت الاجر مولاي جمره من الخيام أجري

اروح الوين غيرك منهو سواني
اروح الوين خيرك كلي غطاني

بدونك ضايع و حاير بكلبي و دمعتي امساهر
يعاشورك
___

كلبي جن علك شباج حيل بمجلسك شدني
امشي اعليك أبو فاضل من ابتعد لتهدني
ابدي سنيني يمك ماي خاطر ترجع تلمني
هو العايش ابلياك لا حبه ولا يحبني

يفاتحتك تعيشني الجرح و التل
يفاتحتك اموت بساعة المقتل

من اسمع داسك الحافر بكلبي و دمعتي امساهر
يعاشورك





كلمات / حسين أحمد الأمين

#ليالي_العليلة 1
_ - _ - _

ما ارد اموت بعلتي وكثر الونين
خليني اموتن بالسبي بويه حسين

امشي واطيح بسمك اصيح
بويه حسين

- - - - - - - - - - - - - - - - - - - - -

بوية خليني أعلى بالك من تسافر
ارد اروح وياك لا تكسرلي خاطر
وي رقيه أمشي واطيحن يوم عاشر
واصبغ امتوني من ادموم المناحر

أركض ابين الخيم اسحگ جمر
ويه زينب حايره ابدرب اليسر

ومتني جريح بسمك اصيح
بويه حسين

- - - - - - - - - - - - - - - - - - - - -

صح عليلة وروحي ذبلانه ابألمها
بس تهاجر روحي تطلع من جسمها
بوية خذني وياك كل علتي اضمها
افرش امصلايتك و ارجع ألمها

ابمشيتك تترك عليلة للالم
خلني اموتن وسط دخان الخيم

ودمعي يسيح بسمك اصيح
بويه حسين

- - - - - - - - - - - - - - - - - - -

لا تخليني بدمعتي و الهجر
بعد عينك ما يظل ليه عمر
موتي يكرب والكلب وسطه جمر
ابقى وانه بلهفتي يمتى تمر

حفرت اعلى الخد تجاعيد الدموع
بعتبة الباب انتظر و اعلك شموع

بموتي استريح بسمك اصيح
بويه حسين

- - - - - - - - - - - - - - - - - - - - -

عكب ما تمشي احفر البنتك لحد
خلني من هسه المنيتي إستعد
تدري بعدك بويه يكتلني البعد
ياهو بعدك ينظر اعليه و يصد

الهجر بعدك ياكل بعمري سنين
حالي عگبك يصفى للهم و الونين

حال الذبيح بسمك اصيح
بويه حسين

- - - - - - - - - - - - - - - - - - - - -

من سمعت ابكربله اتراوت جروح
جن شفت راس الرمح شايله روح
جن يتامه بلايه واليها تنوح
هذا ابويه حسين دم نحره يلوح

تالي ابن حذلم ينادي بالدمع
حسينكم يا اهل يثرب منصرع

جسمه طريح بسمك اصيح
بويه حسين





كلمات / حسين أحمد الأمين

#ليالي_العليلة 2
__________

عفت المساهر إيست من طولت بالجيه
وغمّضت عيني الناطرت فوك الدرب يوميه
عايفني ليش ابوحدي متكول عندي ابنيه
__________

تيهت روحي اعترف بس ما نسيتك لحظه
ناسيني ليش ابوحدي معقوله كلبك يرضه
طرزت بحروفك صبح و الليل ماخذ حظه

وين ما ترجع ايام العمر لا يكضن
وين دزيتلك جم دمعه بس ما وصلن
وين خايفه لا نحرك بعد ما شمن

اتعودت وي طر الفجر انوي الدمع ليليه
كل يوم احاجي ارويحتي صرتي أظن منسيه
عايفني ليش ابوحدي متكول عندي ابنيه
_______

يالتارك بكلبي جرح لا يلتئم لا يبره
خليتني مثل الغصن مكطوع من الشجره
ماريد من عندك تجي وديلي طيفك مره

نار شبت بروحي و بس اشوفك تطفه
نار اشواكي خاطر فوك صدرك اغفه
نار تكبر اشما زادت عليك اللهفه

سافرت وانه حيرتي يابويه تاكل بيه
شيبني هجرك والجفه ابيتي وصرت مسبيه
عايفني ليش ابوحدي متكول عندي ابنيه
_______

تعبني هجرك واستمر واكعد اناجي اجروحي
و عالباب مرسوم الفكد ويه المدامع يوحي
دزيتلك كلشي إلي صبري ولهفتي و روحي

روح من تشم صدرك هالهوه بيها ايفوت
روح فرفحت لجلك مثل طير ابلا صوت
روح لمن تفارك غالي تدريها اتموت

مرسال وديت ابظرف من شوكي هاك اشويه
فعلاً شبيهة فاطمه من امشي هم محنيه
عايفني ليش ابوحدي متكول عندي ابنيه
_______

ليل وسهر نوح ودمع والنوم فارك عيني
احترك بشواك الكلب وبس عطرك ايطفيني
وي كل فجر اكبر سنه هيجي الهجر ماذيني

ليل من يلفي يترك بالكلب جم لجمه
ليل تارسني شيب ابكثر مابي نجمه
ليل ماخذ صباي و تاركالي الهظمه

مشبوحه عيني الجيتك ياذي الهجر طاريه
كل اليسافر أسأله لكربله بلكي النيه
عايفني ليش ابوحدي متكول عندي ابنيه
________

موش المرض علتي تره بغياب وجهك علتي
دزيت جم طارش الك جا ما تكول ابنيتي
لا علي ولا عمي اجوا ما تلجمك سالفتي

موت هجرك تره لا ينتهي ولا يبدي
موت كل يوم خطوه يقترب من عندي
موت تمنيت بيدك بويه تحفر لحدي

تمنيت موتي عالهزل من امشي ويه ارقيه
لو بالخرايب و الشمس يخلص هواها الريه
عايفني ليش ابوحدي متكول عندي ابنيه




كلمات / حسين أحمد الأمين

#ليالي_العليلة_ع ٤
_ - _ - _

گعدت بالليل وي نجم سهيل
مهدومة حيل بمدمع همال

يم أبوها گاعدة
مو طفلة جنها والده
منتظره يلفيها النده بمدمع همال
____

طفله ازغيره وجانت حلوه .. بس البلوه
حاطتها
بليل وسدر عنها الوالد .. ما ظل واحد
بمحنتها

محد إلها باقي عليله اتركوها
ياهو يواسي العليل و أهلها چفوها
لا أخ إلها لا عم و لا ظل أبوها
مشوا و بچلمة اوداع أحبكم لگوها

ديرة خلان چانت قرآن
صارت أحزان و بلايه أحباب

حايره اعليمن تصد
و الوجه مثل الورد
اتذبله چلمة بعد يشرح يا حال
__

گعدت يمهم مثل الشمعه .. بهيده الدمعه
من أطيح

گعدت واتانيهم بلكت .. واحد هلبت
ليها يصيح

تدعي وياهم اليوم تحضر هدمها
بلگت ثغر الحسين ينادي بسمها
وحيده ما تريدن تظل ابألمها
عليله و من يروحون تموت بحلمها

منتظره تروح متروسه اجروح
متهيد الروح فرگاهم بين

ظلت اتروح و تجي
من العيون الحجي
كثر ما بيها بجي عالخد شلال
_

ظلت تبچي اتعنى إلها .. حسين و گلها
لا تبچين
اعزيزه اعليه دمعة عينچ .. كافي ونينچ
فدوه حسين

زينب جتي الها تصبر الحبيبه
رجعتنه يعمه تراهي قريبه
تگلها من السفر هاذ أشاهد مصيبه
خافن من ترجعون قتيل و سليبه

ظلت بآلام و دمعة أيتام
من الاحلام شافت لوعات

ظلت ابحيره ورعب
و الجرح نايم بالگلب
غربه و بديرة غرب ما يصفه البال
_

بخدها الدمعه تنزل ترفه .. بس يا وسفه
عافوها
مثل الميته صارت بتهم .. من شافتهم
تركوها

أصبح مظلم البيت وحيده و عليله
الموت إلها أظن حان شفتها ثچيله
تحرك ظلت الباب و لا من وسيله
بلكت هالهوه الهاب يذكر دليله

بعتبات الدار سوت تذكار
بليل و بنهار أتاني الغياب

ادز سلام اويه الهوه
مخصوص لهلي بنينوى
گله بنتك بالضوه تنحب و ليال
___

كل هم الدنيا اعليها التم .. اعليها غيم
برسومه
بالباب اتسولف منحتها .. وابدمعتها
المهظومه

ظلت تنشد الراح و اليعود عليهم
لمن تدخل الدار يمر كل حچيهم
شابت بيها الأنفاس سوالفها بيهم
كل يوميه بالطيف للطفوف تجيهم

مرت بمصاب عذبها عذاب
من الغياب عاشت بآلام

اللحظة مرت چن سنه
أبد ما شافت هنه
و الحزن بيها بنه ديره من اجبال





كلمات / حسين الأمين

#ليالي_العليلة 4
_ - _ - _

سافر عني الظعن بي كل ريحة هلي
بيدي محضره الچفن من ما صاحوا الي

ميته بالمدامع يا دهر المواجع
من ما صاحوا الي
_

مشوا عني بليلة ظلمه و خطوة الماشي ثچيله
صوت من گلبي أسمعه استعدي يالعليلة
درت وجهي وكل اخوتي عني تمشي بلايه حيله
صحت بويه اركب اني سكت و المدمع يسيله

بدموعه أسمع حچه تصبري يبنيتي
من لاحظته بچه چن گربت موتتي

چنه ما هو راجع يا دهر المواجع
من ما صاحوا الي
_

هم ترد من مشه صحته ابعيد چان و ما سمعني
خطوه من يمشي احسن چنها تطلع روحي مني
فارگوني بلايه رجعه والدي بغربه تركني
يا دهر صرت الوحيد شيبت من زغر سني

أهلي لمن مشوا نام بگلبي الألم
ها رجعوا ها اجوا عشت بحيره و وهم

كلشي بيه ضايع يا دهر المواجع
من ما صاحوا الي
__

الچنت اغفى فوك صدره هسه أنام اعله الترايب
من اگعد اشتم بهدومه آه يا عطر الحبايب
غيم الحزن اعله روحي و ليلي يلفي بالمصايب
يخلص ويه السهر عمري جن شمع بالنار ذايب

ما فارگني السهر من فارگني الهوه
عشت بظلمة قهر يوم الهاجر ضوه

و لا شفت الهواجع يا دهر المواجع
من ما صاحوا الي
____

كثر ما ذابحني شوگي نايمه و تهل عبرتي
أحلم بطيفي يجيني و بيده يمسحها دمعتي
و اگعد بحظنه و أعاتب بعينه يرويها لهفتي
و ينظر الوجهي و يناشد من الحزن بويه ذبلتي

بحلمي يحضر ردت و احچي مصاب الغرب
من يوم إلي رحت عشت انه بلا گلب

احچي و هوه سامع يا دهر المواجع
من ما صاحوا الي
____

أنتظر ليليه هسه بلكي نجمه ترد خبرهم
بحال أبويه و حال اخوتي والله موتني هجرهم
شكثر مشتاگه أشوفه رايده بس نظره منهم
يا دهر محد فگدني عجبه چا موش انه بتهم

محد مشتاگ إلي الچنت انه امدلله
لا عمي و لا علي رجعوا من كربله

بس لا بالمصارع يا دهر المواجع
من ما صاحوا الي
__

إنه أحس گلبي لچمني چنه ما يرجع إليه
من مشيته اعرفت انه انذبح بارض الغاضريه
بس بقيت ابدربه اناطر بلكي عطره يمر عليه
من اجاني دم اشمه و ريحة الدم المنية

ها يا ريح الخبر ميت بعده عدل
أسمع چلمة نحر مذبوح و منچتل

و مسبيه الودايع يا دهر المواجع
من ما صاحوا الي




كلمات / حسين أحمد الأمين