#الليالي_الفاطميه ( عگيلي )
----------------------

ما ننسى امصابچ يالزهره
_

ما ننسى الباب و لوعاته
و لا گسرة ضلعچ و اهاته
و لا من المحسن ونّاته
و لا ننسى بخدچ چم سطره
_

صرختنه تبقى الكل ظالم
ويه الزهره لا منساوم
مجنونين بحبچ فاطم
ما يبخل كل شيعي بنحره
__

الونّه اعله امصابچ مرحومه
يا بنت الهادي المظلومه
وياچ الحبچ كل يومه
دمعه و صرخه و آه و عبره
_

الوقع ويه اعداچ و سلم
خل يتبوء نار اجهنم
باچر بالمحشر يتندم
و يعض صبعه غم و حسره
_

يشهد حيدر ما نتغير
عن دربچ منزل و نخسر
شنهو الروح و شنهو المنحر
الضلعچ فدوه الكون بكبره


منتظرين و نبقى اناطر
ايهل الرايه و صوته ايجاهر
ويه المهدي بجيشه باچر
الله ايعجل ثاره و نصره
____

نمشي اويه المهدي بالدمعه
الحد گبرچ يا أشرف بضعه
گبرچ عن الگاع انرفعه
و انسوي المجلس بالحضره




كلمات / حسين الأمين

#الليالي_الفاطميه
______

كون مو هذا الوضع يا حيدره
كون ذوالفقار بيدك تشهره
بعد شيفيد التمني و زهرتك بالمگبره
______________

امجتف بأمر الوصية والصبر بيك امتحن
كاعد و دارك تنظره تحرگه اتباع الوثن
شبوا النار اعله بيتك وگلبك أتحمل محن
عصروا الزهرة يحيدر وانته تعصر بالزمن

صعبه اليبچي الزلم كاعد يون
خيّم بگلبه المواجع و الحزن
من كثر دمع اليذرفه عيونه كلها محومره
بعد شيفيد التمني و زهرتك بالمگبره
_______________

چان اليفر من أمامك زلمه هذا مو جبان
مو فراغاً حامي جارك جنت لليندب أمان
هسه ياهو الخله دارك مظلمة بلاية حنان
گاعد تنوح بزويّه و تعصر بضلع الزمان

گاعد بلايه دفو جنك غريب
هذا حال اليدفن بچفه الحبيب
منهدل متنك يحيدر ليلك بهم ساهره
بعد شيفيد التمني و زهرتك بالمگبره
________________

كون ما عندك وصيه وللنبي ما چان أمر
عود واحد خلي يگدر يحرگ الدار و يمر
چان ذوالفقار خله بضلع كل واحد كسر
وبعتبتك يجري دمهم يا علي من كل كتر

چان ما مر اعله گلبك كل جرح
وتنظر بعين الزچية وتنشرح
چان خليت المنية تلزم اعليهم سره
بعد شيفيد التمني و زهرتك بالمگبره
______________

تودع بزهرة حياتك وانته مكسور الظهر
شلون صابر من شفتها تلوذ والباب انعصر
كل نبي يگلك يحيدر الصبر مثلك ما صبر
شلون متحمل دليلك من شفت خدها انسطر

حسرتك شابت يحيدر بالگلب
حب حياتك دافنه جوه الترب
و انته ما شاهر فقارك فقط دمعك تشهره
بعد شيفيد التمني و زهرتك بالمگبره
_________

لسه نوحك عالمصيبة ياعلي وحيلك ثچيل
ذبل جفنك وانته بعدك دمعتك عالخد تسيل
چنت تشبه جبل يمشي بالهوه هسه تميل
الموت الاحمر و الغضنفر هسه صار بلايه حيل

وسفه يا حيدر تنوح من الألم
وسفه والبسمار بالضلع انرسم
وسفه ما خليت دمهم عالارض يا قسورة
بعد شيفيد التمني و زهرتك بالمگبره
________________

شحالك بفگد الزجيه بلا گلب چنك صفيت
يالچنت كهف اليتامه بلايه خيمة أنته بقيت
هسه تدفن ذكرياتك بالكبر وياها ريت
شكثر زينب تشبها أمها ومن تباوعها بجيت

شسوت الفرگه بدليلك يا علي
تشوف زينب يبقى نوحك يعتلي
لفاطمة و زينب يحيدر دمعك اعليهن جره
بعد شيفيد التمني و زهرتك بالمگبره





حسين الأمين

#الليالي_الفاطميه
-------------------

غربه ليلي افراگچ هده حيلي بي مجروح
يالزچيه امتانيها المنيه تلفي الروح

أتاني أتاني يا فاطم أمشي عندچ
اماني اماني واحفر لحدي بصف لحدچ
_

عفتيني فاطم مخنوگ يالچنتي وسط الريّه
اتلگاني بالحسره الليل و الفرگه تاكل بيه

مدري عايش مدري ميت حيدر
الما يميل بنص حرب يتعثر
صرت مثل الميل كل لحظه اطيح
هذا حاله اليفگد و يتذكر

حياتي حياتي بعدچ بالمر اگضيها
مماتي مماتي يوصلني وارحل ليها اماني
_

درب المگابر بالشوگ امشيه وانه بلهفه
والگبرچ اگصد وارتاح وأسهر لحد ما اغفى

بترب گبرج گاعد اشتمّ و أنوح
لحد ما انترس من عطرچ جروح
و أرجع الداري جسم يمشي وحيد
قرب گبرچ ناسي من الحيره روح

غريبه غريبه الشاهدني ابهاي الحاله
مصيبه مصيبه مات اوياها أم اعياله
___

عالحلوه و المره اوياي نتشارك بعيشتنه
يا هوه بهيئة إنسان يالفرگتچ مو هينه

انه أول بشر عاش ابلا هواه
يشوف لكن بالصدگ فارگ ضواه
مو غريب الدار لا گلبي غريب
من مشى عني الگلب ويا خذاه

رحليچ رحليچ تارك جمرات بگلبي
سبيلچ سبيلچ راسم كل حيرة دربي
____

يا روحي ما ظلت روح راحت اوياچ أيامي
گبري قرب گبرچ كون هايه أعز احلامي

من دمع عيني عليچ البير صاح
الماي يا حيدر من الدمعات فاح
صبر چم أيوب شايل يالامير
شويه من الدمع مولاي استراح

دمعتي دمعتي اعليچ اشچم بير انترست
حسرتي حسرتي لسه ابنار و ما خمدت
_

راح ارد يالزهره اوحيد راجع البيتي الخالي
و خليت گلبي المجروح خايف تفز اطفالي

زينب ابوحدها أخاف اعليها
لو بچت من يركض ايواسيها
فگدت امها من زغر دمعه تبات
فوگ خدها انرسمت و تاذيها

زغيره زغيره و غابت عن الدار امها
يحيره يحيره هالموقف من يهظمها




كلمات / حسين الأمين

#الليالي_الفاطميه ( تجليبه )
_______

يمتى الثار يالمنتظر
___

يا آخر أمام الشيعة منتظره
ترد تحيّ المهج و اتحاسب الزمره
الغدروا بالوصي و ظلموها للزهره
يمتى الخيل عالهظموها تسرجها
_

يمتى سيفك اتشهره المصاب الباب
ترى اصواب الضلع يالمنتظر ما طاب
لليوم الزچيه اتهل دمع سچاب
اظهر و الأرض من صرختك رجها
_

يهز الگاع صوتك لو طلبت الثار
و اتحاسب يمهدي الباب و البسمار
و الثاني تحرگه من هذيچ النار
بس نارك دوه لهل الكفر وجها
_____

و ترد لأرض البقيع بقوتك و عزمك
و عالامه يخيّم عطفك و رحمك
ترد تكشف مكان البي گبر امك
و تبني بالگبر و الشيعه تثلجها
____

حتى لو بنيته ما تگرلك عين
إلا للزجيه توفي هذا الدين
لمن تصلب اعله الشجره هالجبتين
و گوم الهجموا من الگبر تخرجها
_

تحاسبها و أمرها ايصير للسياف
يا وارث علي بكل عدله و الانصاف
و اشما تذبح بسيفك فلا اسراف
منتظرين هاي الشده تفرجها




كلمات / حسين الأمين

#الليالي_الفاطميه
---------------------

بترب گبرچ اشم عطرچ
و اغفى بدمعي ليليه
____

يا زهرة حياتي اوياچ وسدت الگلب بتراب
علي يمچ تركها الروح وراجع والدمع سچاب
اليدفن حب حياته ايعود من كثر المصايب شاب
يظل بالغربه يتلفت لا خل يمه لا احباب

يواسيني دمع عيني
وحيد الزهره ما هيه
_

يا حسره التمر بالليل من أتذكر العشره
وتاخذني الجدم بالشوگ يم گبرچ اشم عطره
تره اليفگد عزيزه ايموت ويتمنى لحد كتره
وانه بعدچ بقيت انفاس عايش بس عله الذكره

اخذتي الروح عشت مجروح
كون الموت اجه ليه
__

انهدم حيلي على فرگاچ وبقيت ابغربه واتحسر
انه الما يوم رگ جدمي يفاطم عگبچ اتعثر
درت وجهي اعله ذاك الباب ليليه ابعتابه اسهر
تمنيت الكسر بگفاي ولا منچ ضلع كسّر

خذت عمري زدت كسري
يريتك منعصر بيه


عجب عايش اظل اشلون وانتي فاطمه الانفاس
يامن وحده بس تسوين بهاي الدنيه كل الناس
عشت هاي السنين اوياچ طيب وعاطفة وإحساس
لوما هالوصيه اتكون چا ما توصل الارجاس

أمر ديني وتعرفيني
چا ما گيدوا ايديه
_

قسم بالمصطفى وأمره چا دمهم مله هالدار
حيدر بالوغه اتعرفيه من ايشهره ذو الفقّار
چان الروس يم جدمچ و ارميهم حطب للنار
بس چلمة عهد منطي أصبر گتله للمختار

كضى امري وبگى صبري
المصيبه صعبت اعليه
__

وحكچ يم حسن تدرين من رحتي گبرت اسنين
اظلمت عگبچ الأكوان يالچنتي ضوه الهل العين
صفه فارغ هذاك البيت ما بي بس بچي و ونين
ينشدوني عليچ اهواي زينب والحسن وحسين

هظم حالي على اطفالي
ارجعي و شاهدي البيه




كلمات / حسين الأمين

#الليالي_الفاطميه
___

كون لو عنده إِذن
ويشهر السيف ... يرد حيف ... من الگالوا وإِن
_

كون ماكو وصيه العلي من النبي
چان گدروا يهجمون هذوله اهل العبي
الفارس ابلا رگبته يرد لهله حبي
و باب فاطم و لا چان يحرگه الناصبي

چان عادلهم بدر
بسيفه عالباب ... و الارگاب ... حدر جدمه صفن
__

ياهو يگدر يلاگي فقاره من يهد
چان بالنار حرگهم علي فرداً فرد
لامته الصفره حمره بدماهم من ترد
حتى عزريل ميلحگ وره حيدر يعد

مو ملك واحد نزل
يخطف انفاس ... عن الراس ... رگب ما ينحصن
_

اليحاول يواجه علي يقره السلام
الاسد ما تصيده سرب من النعام
چان حيدر على الموت يسويها ازدحام
اليشرد من ايده خزره تذبحه من الامام

ياهو يسلم لو غضب
اسد خيبر ... تبختر ... على أصحاب الوثن
_

كون لو بس على السيف يمدها يمنته
يا مدد هذا ينفع لونها ندبته
چان لسه بوجهم أثرها صفعته
چان يخطفها الأنفاس فقط من خزرته

الزهره لو صاحت علي
چان بالدار ... شعل نار ... حرگ أهل الفتن
__

الما مخيب محمد بحروبه إلي مضن
چم نهر بالمدينه كثر دمهم جرن
عود هاي السقيفه تظل الهل الزمن
چان قالعها بيده مثل باب الفتن

اسد تتراجف زلم
يعله ونها ... لونها ... علي بسيفه استعن




كلمات / حسين الأمين

#الليالي_الفاطميه
______

دافن بروحك كبرها حتى كل لحظة تمرها

تسولفلها عالمضى ما ناسي ذكرياتك
ما عايش بدنيا بعد بالمكبرة حياتك
__________

كاعد بكتر المصايب و الكلب حزنه ثجيل
تسولفلها ذكرياتك العشتهن مو قليل
تشيل بيمنك تراب تشمه بي ريحة خليل
تملي ذاكرتك صورها وترجع البيتك عليل
الجان أسد الله ورسوله والعرب عنده دخيل
هسه بالدمعة يسولف غيم اعله انهاره ليل

صار من بعد الزجية. ليل مابي كل ضويه

من بعد نور الزجية ضاعت أمنياتك
ما عايش بدنيا بعد بالمكبرة حياتك
________

راحت البسمة الوحيدة الجانت بليلك امان
فززت كل جرح غافي والدوه شوفتها چان
رافجتها بطيب عشرة محلى كل ذاك الزمان
الما مفاركها ثواني گلبك الها اصبح مچان
للگبر هسه دليلك يمشي صوب أم الحنان
كثر ليل الفرگه راسك يا علي بالشيب بان

بان شيب براسك. حسرتك بأنفاسك

ضيعت كلشي وراها بقت بس دمعاتك
ما عايش بدنيا بعد بالمكبرة حياتك
_______

چان ليلك بيه گمره الزهره چانتلك بدار
هسه كل أيام عمرك ليل عتمه بلا نهار
الواكف بوجه الشدايد تجدح عيونه شرار
الجان خصمه من يواجه سيفه يدري رأسه طار
هسه متكتر ينوح و كلبه من صوابه حار
الزهره بيت ارويحته وحركوا على الزهراء دار

العاش كل عمره يحبها. هو يشبهها و تشبها

وحيد هسه بلا خليلك تنتظر مماتك
ما عايش بدنيا بعد بالمكبرة حياتك
______

اخلاف عافيتك يحيدر ضيعت كل العمر
استوطنت بيك المآسي و عاشرت دنية هجر
منهدل متنك يحيدر و تعثر بدرب الگبر
مغيرات ارسوم وجهك من كثر دمع الصبر
الكبر من عندك تألم من تسولف عالكسر
اتنام و انته اتشم تربها لو عطر فاطم يمر

جانت بدلالك اطوف صارت باحلامك اطيوف

مصاب زهرائك يحيدر عايش ويه ذاتك
ما عايش بدنيا بعد بالمكبرة حياتك
____

اشكبره صبرك بالمصيبة والصبر بيك امتحن
سيفك بكلبك يجاهد و أعلنتها للعلن
شكد صبور وما شهرته من أسمعت كلمة وأن
السطرة والعصرة يشهدن أنته ببهن مؤتمن
قدمت فاطم يحيدر و انته باقي ابلا وطن
غربه من بعد الزجية اشسوه بالحال الزمن

الجانت أهلك ياذخرها. بيمنتك تحفر كبرها

ضاعت البسمة اعله شفتك ضيعت حلاتك
ما عايش بدنيا بعد بالمكبرة حياتك
______

ضاعت البسمة يحيدر كاعد بدارك غريب
ديرة أيتام ابدليلك ما أظن جرحك يطيب
وحيد و أطفالك يتامه و تسمع أصوات النحيب
يا علي و بدار حزنك هالامر كلش عجيب
زينب تريد أمها تنشد و أسألك تكدر تجيب
وانته وي كل كلمه دمعه روحك بلايه طبيب

زينبك كلش زغيرة. وشتجاوب والله حيرة

نزلت دمعتك حيدره واتكابر بثباتك
ما عايش بدنيا بعد بالمكبرة حياتك




كلمات / حسين أحمد الأمين

٢٩ / ١٠ / ٢٠٢٠
#الليالي_الفاطميه
____

يزهراء تبقى صرختنه
يزهراء الدمعه سلوتنه
يزهراء الحد المنيه
_

امصاب بابچ نبقى نذكر ما نعيفه
مهما رادت تمنع احفاد السقيفه
ما نجامل و العقيده اتظل شريفه
ما نبيض اوجوه سودتها الصحيفه
حتى لو هذا النحر يجري نزيفه
نبقى نصرخ حيدره أول خليفه

موالين و الضلع يشهد
موالين. يا بت محمد
موالين الزهره الزچيه
_______

الوقع اويه اعداچ يالزهره وثيقه
و حجته هاي الادله مو حقيقه
باجر بيوم الحشر يمشي و رفيقه
الثاني وياه الجهنم هم طريقه
ويه ضلعچ و اليساوم ما نطيقه
لون ضدنه اتصير كل هاي الخليقه

هالاكوان. لو تعادينه
هالاكوان. اوياج تدرينه
هالاكوان. لجلچ هديه
_

بدرب حبچ نمشي يا ام الامامه
و اليبغضچ ابد ما نسمع كلامه
لون يملك ذرة احساس و كرامه
ما ترك عالبضعه سطره اتظل علامه
باچر احسابه سقر يوم القيامة
و الهجم عالدار متنفعه ندامه

بالاحساب كلمن عصرها
بالاحساب امكانه سقرها
بالاحساب تبقى القضيه
_

البچي عالزهره من ضمن الولايه
لأن لو ما فاطمه ماكو هدايه
اتنزلت امن السمه عالگاع ايه
تشهد الكوثر عليها من البدايه
ديربالك تبتعد عنها لغايه
هيه درب الله بالاول و النهايه

للارواح فاطم محامي
للارواح بيها غرامي
للارواح توكف وفيه




كلمات / حسين أحمد الأمين

#الليالي_الفاطميه
_

جبل حيله هوه علي فارگ هوه
دافن ضوه البيت للزهره حنيت
علي فارگ هوه
__

راحت ام گلب الحنين و ظلت أحزان السنين
اويه المصيبه
روحه دافنها بتراب و راجع الداره بعذاب
بلا حبيبه

فگَد _ بعَد _ سنَد _ علي ____ غريب
هجُر _ عمُر _ كسُر _ فگِد ____حبيب

صفه بدنية غرب علي ودّع گلب
يا ليل ما جيت للزهره حنيت
علي فارگ هوه
__

ظلمه ليل اليفترگ اليدفن ابأيده الخلگ
وكل المحنه
دموعه وحدهن جرن راح من عنده وطن
يعلى ونه

غرُب _ گلُب _ صعُب _ هجُر ____ غوالي
قهَر _ ذكَر _ صوَر _ عشِگ ____ ليالي

بقى شايل ألم يظل عايش وهم
للوحده ماشيت للزهره حنيت
علي فارگ هوه
_________

ايشيب افراگ الورد و فاطمه ضمها بلحد
يا هظمها
الما تركها بكل أمر تركته الخاطر گبر
بي ألمها

يوِن _ حزِن _ يحِن _ دمِع ____ عيونه
ألَم _ رسَم _ سهَم _ ذبَح ___ ظنونه

تهد حيله الصور لون مره ذكر
شگد إلها ونيت للزهره حنيت
علي فارگ هوه
______

عالحلوه و المره سوه فاطمه چانتله دوه
الكل جروحه
بليل مظلم تركته بوحده عايش خلته
بس ويه نوحه

مشَه _ بچَه _ حچَه _الترُب ___ تسمعه
هلْي _ علْي _ الْي _ ترِد ___ يبضعه

انكسر مثل الغصن گعد يمها يون
يا ذكره خليت للزهره حنيت
علي فارگ هوه
_____

الما تهده أكبر حرب هسه يعثر من يطب
الداره
الچان من يوگف جبل اوياهه كل حيله انهدل
الزمن داره

هوَه _ سوَه _ ضوَه _ قِبْل ___ عمرها
شمِع _ ضلِع _ دمِع _ لوَن ____ ذكرها

صعب كلش صعب علي دمعه يصب
يا دمعه هليت للزهره حنيت





كلمات / حسين الأمين

#الليالي_الفاطميه
______

باب و ثجيله عالارض لو هوت ترجنها رجن
ياويلي واعله ام الحسن مطبوگه چن طبگ الجفن
____

باب و ثجيله عالضلع الله اليساعد فاطمه
دفعوها عالزهره بحقد ومن الضلع سال الدمه
من الكسر ونّت ألم هزّت ملائكة السمه
صاحت و نادت ياعلي وينك يحمّاي الحمه

جيش اوحدها فاطمه راواها انواع الألم
ما عدها بس چلمة علي وامگيد بحبل الصنم
____

سطروا جبين ام الحسن واحمر غده لون الأثر
وطاحت يويلي عالضلع و شجم ضلع منها انكسر
عالعتبه دم منها جره بهل الموقف ويضحك عمر
محنيه مهظومه و تون وتفسر الونّه الصخر

بت نبي و بعمر الورد ياوسفه يضربها النذل
تولّاها بسياط و شتم الما عنده غيره ولا أصل
_

لاذت وره الباب و عصر بسمار نابت بالمتن
يسمع ونين ام الحسن. ويعصرها أكثر من تون
بسمار واصل للصدر دمها نزف ويه الجفن
لوّعوها أصحاب الغدر خلوها متحيره بحزن

چم لچمه شافت فاطمه وشچم ألم وشچم جرح
بالسوط واحدهم ضرب قنفذ اجه بكعب الرمح
_

من كثر ما بيده دفع طاحت اويه المحسن سوه
يجري الدمع منها نهر شافت جنين الها هوه
نادت قتلتولي الطفل شنهو الذنب ما شم هوه
ست أشهر بعمر النده ما لحگ ايشوف الضوه

سمعوها لمن خاطبت و زادوا عليها بالأم
ردوا على الباب بحقد خاف الطفل منها سلم
__

ما رحموا ابفاطم ابد وجمعوا على الدار الحطب
حرگوها والزهره انچوت نادت عليمن يا عرب
طفلي انقتل مني الضلع مكسور والخد انضرب
بالحرب واحدكم شرد هسه اسد يمي انگلب

آه المصيبة فاطمه بين الذيابه مو بشر
يدرون حيدر ما يهد يدون بي طه أمر





كلمات / حسين أحمد الأمين

#الليالي_الفاطميه
______

راجع للدار بدمعه أمشي انه الدافن يمچ كلشي
وحدي يا فاطم عفتيني بعدچ ظلمه كل سنيني
_

انه الدافن زمانه و راجع بدربه
انه الميت و لكن ظل يدگ گلبه
انه الما يوم راجف حتى من حربه
انهدل متني يفاطم فرگتچ صعبه

انه التارك يمچ عمري ريت بصفچ احفر گبري
ليش بغربه خليتيني بعدچ ظلمه كل سنيني
___

ضايع گلبي بعدچ يالزچيه ايجود
ترى الفاگد عزيز ايعيش ما موجود
اموت اويه المواقف من ارد اردود
اظل بالغربه هايم و الگلب ممرود

انه العايش بس بجروحه ياهو الگادر يدفن روحه
بس حبچ باقي يواسيني بعدچ ظلمه كل سنيني
_

ما ظلت ملامح فاطمه بيه
اگعدي و عايني بعيونچ اعليه
من اشتاگ السبحتچ تركض ايديه
اشم عطرچ عليها و اغفى ليليه

من يفضحني شوگي الزمها خرزه خرزه انه اشتمها
حد ما تنشف دمعة عيني بعدچ ظلمه كل سنيني


كلشي ابغيبتچ متغير اهوايه
سجادة صلاتچ و الرحه هايه
مو بس حيدره مشدوه كل رايه
كلما انحني البيت انحنى اويايه

اوگع و انهض اتخيلي المنظر انه القسور صرت اتعثر
ما ناسيچ و لا تنسيني بعدچ ظلمه كل سنيني
____

لمن ودعيتچ رافگت همي
شكثر مشتاگ شفتچ تنده بأسمي
انه البيدي دفنت و شيعت حلمي
كل يوم احلم انتي راجعه يمي

ويه الدمعه يخلص ليلي ما نتلاگه و يرجع حيلي
هيچي و بالدار اتلاگيني بعدچ ظلمه كل سنيني




كلمات / حسين أحمد الأمين

#الليالي_الفاطميه
_

حرز گلبي الولهان ضوه بهيئة إنسان
يا أيه من القرآن فاطمه
____

يمشكاة الهدايه بكتاب الباري ايه
يأنوار الأرض حتى الشمس منچ ضواها
وجودي وكل حياتي يصومي ويا صلاتي
فقط انتي الرضه الباري تقارن وي رضاها

فلك بحروفچ دار تشع هاي الانوار
فضل من عندچ صار فاطمه
____

شذر خاتم محمد اليبغضچ والله مرتد
يمن چنتي المحمد أمه و بنيته سويه
يتفاحة جنانه رحمته و كل حنانه
نزلتي من السمه للمصطفى أجمل هديه

عطر بالجنه فاح شده كل الأرواح
محمد بسمچ صاح فاطمه
_

علي صرتيله روحه طبيبة كل جروحه
نذر لجلچ شبابه و هم نذرتيله شبابچ
حمل بعدچ مصيبه گلب فارگ حبيبه
دفن يمچ ضحكته و راجع الداره بمصابچ

بقه بدمعه المذروف انعمت عينه وميشوف
هظم شوگه الملهوف فاطمه
_

ترستي الدنيه طيبه بحنانچ يالحبيبه
انه بسمچ توكلت و سكن حبچ فؤادي
سكنتيها المشاعر ملكتيها الضماير
عبد عندچ تحسبيني صفه هذا مرادي

ردت نظره منچ ترس گلبي حزنچ
فده عمري الونچ فاطمه
____

يسر الاسم الاعظم النكر فضلچ تندم
الترك دربچ بعد ما تنفعه صومه و صلاته
يقبلة هالبريه اعله حبچ للمنيه
طريقچ ما ابدله منرسم عندي اشحلاته

درب حبچ وياه يفاطم ما عفناه
عهد دم وقعناه فاطمه




كلمات / حسين أحمد الأمين

#الليالي_الفاطميه
________

بين الترب يا فاطمه دلالي
مو ذاك حيدر لا تغير حالي
____

گاعد و اسولف عالگبر و الليل ماخذ حيلي
يا فاطمه انه علي هلبت هلا احچيلي
بعدچ و لا مرني صبح عايش بظلمة ليلي
مشتاگلچ كثر الدمع يا فاطمه رديلي

يا غاليه مشتاگلچ هالغالي
مو ذاك حيدر لا تغير حالي
_

اشگد اصبر الفگدچ بعد ما ظل صبر يالزهره
افراگج أخذ مني النظر وانهض واطيح بعثره
القلعتها خيبر يمنته ما يگدر يهز شجره
چنتي احله كلشي بدنيتي من رحتي صارت مره

بعدچ تره بهذا العمر ما بالي
مو ذاك حيدر لا تغير حالي


يا نسمة اعذيبي العلي يم الحچايه الترفه
من ارجع الداري چنت لشوفتچ عيني بلهفه
بغيابچ أتغير علي حتى انه اشك ماعرفه
اجدامي ياخذها الدرب يم ريحتچ حتى اغفه

لا تسأليني بغيبتچ شحوالي
مو ذاك حيدر لا تغير حالي
_

ما ناسي شي من عشرتچ خاطر اجي و اتذكر
إحساسي فاطم منجرح عالفرگه لا ما اگدر
انه الشجاع البالحرب البيده يلاوي العسكر
عگبچ مثل سعفه بهوه اتخيلي علي بهل المنظر

بس المنيه تاخذچ من بالي
مو ذاك حيدر لا تغير حالي
_

النفس لو ما بي اسم فاطم فلا أتنفس
تدرين بغيابچ صعب اعليه فرت محبس
امتاني المسيه من الفجر و اكعد بكترج اهمس
ميت علي يا فاطمه بالعمر صاير ما حس

بس الترب يا فاطمه تبرالي
مو ذاك حيدر لا تغير حالي
_

شمحلاها چلمة بو الحسن من تطلع من اشفافچ
لساع أنتي عايشه ما لحظه گلبي عافچ
مسرومه الي بوسط الگلب ما تنمحي اوصافچ
يرتاح بالي بصورتچ و الگلب هم لو شافچ

من انظرچ ترجعلي كل امالي
مو ذاك حيدر لا تغير حالي





كلمات / حسين أحمد الأمين

#ليالي_ام_البنين ( ميمر )
__

بالطف أبو اليمه كون ... يا يمه يفخر بيكم
__

الموعد گرب و أرض الطفوف اتناطر
شدوا حزمكم و استعدوا الباجر
ماريد أبو اليمه وحيد و حاير

صيروا ستر جيش حسين ... أربعة و امسميكم
__________

صيروا درع يم الخيم و الخدر
حتى الهوه يم الخدر لا يفتر
ماريد واحد عالخيم يتجسر

الزينبكم افدوا الارواح ... حيدر علي اموصيكم
______

اعله الخيم خلوها ترف الرايه
و يصبح اسمكم بالطف الوفايه
هذا الوعد مني و افهموا حجايه

إلي يرد دون حسين .. يحرم حليبي اعليكم
________

يم الحسين اتصغروا و اتكبرون
بلايه إذن يا يمه لا لا تحجون
هاذي وصيتي الكم يعبدالله و عون

حگ الربه توفي اليوم ... و بأمرته خليكم
_____

كون بقتالك يبني جعفر ترعد
و يابه الفضل أنته الذخر يوم الجد
طفيها عين اعله الخدر من اتصد

عيدوا علي بگطع الروس ... بسيفه علي مربيكم
_______

فروا الكواكب لو أمر يمه حسين
كونوا عبيدا ترفعوا اليوم الدين
لو يحجي يمكم لا ترفعون العين

صيروا جبل للحگ سيف ... واتمسكوا بواليكم
_______

ماريدن إسهام العطش تاخذ حيل
واحدكم الحد الخيم يصبح سيل
ما أرضه إلا ادماكم اعليها تسيل

لا ما تقصرون بروح ... من العطش ياذيكم
_______

رايتكم اعله المشرعه ركزوها
يم الحسين اترفرف و علوها
حارس العين اعله الخدر خلوها

دون الخدر طيحوا العين ... يا يمه أفخر بيكم





كلمات / حسين أحمد الأمين

#ليالي_ام_البنين
____________

گربت منيتچ بدمعتي اجيتچ
أتعذر هواي مگطوعة ادية
__

الليلة عباس الگمر بالطيف اجاها
لـأمه و بدمعة عيونه بون بجاها
اباله چلمة و رد ابو فاضل حجاها
ب اه يحسين و مصابه أمه رثاها

سولف ابفعاله وحيته لنضاله
بس ما جبت ماي لسكنه و رقيه
__

ردت اعليه بسلامه و ظلت اتكول
عفيه يا عباس گبل حسين مقتول
ظلت اسوالف الطف اترن بالعقول
عجبه عفت حسين صدره وسط الخيول

هالخبر كسرني يالوفي هظمني
شگد هظمني مولاي بالغاضرية
__

رد يسولف عالشريعة و ذيچ الأيام
القدر يا يمه كتبلي اخلد اعوام
انطيت لحسين الوفه و انطاني أحلام
انطاني جنحان و بعد ما ريد الاچدام

ما خيبت ظنونچ و غاليه عيونچ
اتعذر بهاي زينب سبية
__

يمه جايبلچ خبر من عند الحسين
گال خل تستعجل أمي بغمضة العين
گال فارگنه الدهر بس جامع البين
و اشكثر مشتاگ خويه لأم البنين

وارث الامامه خصچ بسلامه
وصله يوفاي لامنه الأبية
___

بعد هم عندي أمانه من الأولاد
جعفر يسلم عليچ و هالامر راد
يحجي عن عبدالله لمن بالدمه جاد
و عون ابشرچ خله سيفه عالركب ساد

ولدچ الغيارة خلدوا عبارة
للمنية شراي من نسل وفيه




كلمات / حسين أحمد الأمين

#ليالي_ام_البنين
_______

بعد الطف بتلث اسنين
انفجعت آيه ... عالوفايه لمن ماتت
شگد مشتاگه اتشوف حسين
آخر مره ... بالليل السفره اهواي اشتاگت

و بهذا الإحساس ماتت ام عباس
___________

اعتنى الموت و تشهدت عليمن دمع هلت
عجيبه
چبيره دمعه طاحت الولدها چنها ناحت
مصيبه

هاي ام البنين الضاله من دون البنين
مصيبه و الوحدها من اجه البين
چانت عدها اربع مو زلم چنهم كواكب
نطتهم اربعتهم فدوه راحوا دون الحسين

بلحظه لن وحدها اتصير
و تربايتها ... ما بخلتها لأبن الزهره
حگها ابهاي الساعه اتحير
ام الاربع ... منها المدمع عالخد يجره

و بهذا الإحساس ماتت ام عباس
_____

حچت شفتها كلمه و لكن ما أفهمه
بالانفاس
اظن عبدالله گالت الابنها چا اشتاگت
يهالناس

ما تدرون بالطف جسمه متوسد التربان
وگع وبصف اخوته منذبح والراس عالزان
شلون امه تريده تدري أبنها هناك مقتول
يم حسين اخيه مندفن عبدالله عطشان

عبدالله بالطف مذبوح
ياهو صاحت ... المن نادت هاي الحيره
يفهم كلمتها المجروح
شنهو نطقت ... ياهو ندبت ايحل تفسيره

و بهذا الإحساس ماتت ام عباس
_____

شفتها ادير العيون يمكن رايده عون
أبنها
لو جعفر تريده يجي ايوسدها بيده
أظنها

يا جعفر يجيها الموت أخذ من عدها الاولاد
و يا عون التريده بكربله بالروح هم جاد
يا وسفه تموت ام البنين ابعازة ابنين
يكفي لو فقط واحد حضر والفاطمه عاد

لا جعفر جاها لا عون
بهاي اللحظه ... آخر نبضه اتريد اموادع
راح اتموت امهم يدرون
چا ما حضروا ... ليش اتأخروا محد سامع

و بهذا الإحساس ماتت ام عباس
____

گرّب كلش الموت حچت بس خافت الصوت
سمعته
حرف واضح يهل الناس اكيد اتصيح عباس
ندهته

يبو فاضل الليله أم البنين اتريدك اتعود
ارجع يالوفي وفيت يم الشاطي العهود
آخر لحظه لمّك ارجعلها اتشوفك اتريد
ارجع يابو فاضل حتى لو من دون الزنود

آخر لحظه إلها اليوم
يابو الغيره ... بهاي الحيره وانته اتشاهد
يا عباس أرجع بدموم
أنظر لمّك ... چا متهظمك ابلايه واحد

و بهذا الإحساس ماتت ام عباس
_____

بده يثگل حچيها و ارتفعت اديها
بونيني
گلت شنهو تطلبين گالت رايده حسين
يجيني

لحظه لن شفتها ابتسمت و فتحت الايدين
هلا يبني تگول و ماتت و آخر چلمتين
شكثر مشتاگه گالت لنها منها فاضت الروح
اكيد من الطفوف الها المسيه اتعنى الحسين

نادت يا يمه يحسين
يا أنفاسي ... هجرك قاسي شگد اذاني
مرتاحه بسد الجفنين
لا متبالي ... جاها الغالي كافي أتاني

و بهذا الإحساس ماتت ام عباس





كلمات / حسين أحمد الأمين

#ليالي_ام_البنين ( تجليبه )
_________

يا رمز الوفاء الخالد بكل حين
تضحيتچ تراهي أعظم سماة الدين
______

منين أبدي اسولف يم المروه
يمربيه السباع و منبع الخوه
اختارچ حيدره من خيرة الصفوه

حتى الكربله اربع زلم تنطين
______

يالضحيتي لحسين بثمر چبدچ
عندچ اربعه چنهم و لا ولدچ
ما ناشدتي عنهم غالي بس عندچ

يرد حسين و تشوفينه گبل البين
______

وحده انتي مثلچ ما بعد حره
نذرتيهم نذر لحسين و الزهره
گلتي كلمن ايقدم إله نحره

انقتلوا و المهم سالم يرد حسين
___

يا أم الوفه الما مثلچ امايه
ربيتي زلم بالشده وفايه
واحدهم يصيح حسين مولايه

من ترباتچ الهالكلمه متعلمين
_______

لبن رضعتي ولدچ لو وفه صافي
أصل الخوه چان بمنبعچ غافي
لو عشرة زلم ما گلتي هم كافي

تقدميهم نذر لا والله متبخلين
_____

بدويه و نعرفچ گد الحچايه
نطيتي الروح وگت الناس شرايه
چنتي بكربله بيد الگمر رايه

و يم العلگمي خلد الچ امرين
_____

أمر أول وصيتچ ساعة السفره
من وصيتي ولدچ كلمن بأمره
گلتي اليرجع و سالم يرد نحره

ما أرضى عليه و لا يوفي الدين
_____

أمر ثاني من جالچ ابن حذلم
يواسيچ بمصابچ و اجرچ ايعظم
ما هموچ ولدچ صحتي ما اهتم

جاوبني يناعي ابن النبي چا وين





كلمات / حسين أحمد الأمين

#ليالي_ام_البنين
_____

ام أربعة انطت ولد وفايه
أولهم إلي سلمتله الرايه
من هذا الإحساس تتعلم الناس
انطت ولد وفايه
____

أربع كواكب سلمت و تكول خاف امقصره
لحسين لو عندي الف كلهم فداء النحره
بلكي يصيرولي حرز و ترضى عليه الزهره
مو مهم مات شچم ولد المهم اوفي العشره

تسولف ولكن مستحاها هوايه
بس لا يقصرون الولد من هايه
تتراجف أنفاس تتعلم الناس
انطت ولد وفايه
___

ماكو مثلها اعله الأرض بالوفه ما إلها أحد
مرة أبو تصبح خادمه الولده گلبها يمتد
تفديه شبان أربعه و منها الجفن ما يرتد
عدها بصيره و عالمه. بالطف تعرفه استشهد

دوم تلهج بالطفوف و بالبين
تكللهم انتو قدمتكم لحسين
واحدها نبراس تتعلم الناس
انطت ولد وفايه
___

كالت يولدي من مشوا اتذبحوا دون حسين
ماريدن اتردون إلي ياخذكم وياه البين
كون اربعتكم عالنهر طيحتكم اتعلي الدين
عباس منك رايده عزب سهم وسط العين

انطي جفوف و بعد انطي عينك
كل ذني سهله ولا يطيح حسينك
صوب بعد رأس تتعلم الناس
انطت ولد وفايه
____

تشهد عليها أم الحسن قدمتهم و محتاره
ظلت تناشد عن ولد واحد تريد اخباره
ما همها كل الاربعه بالگلب شبت ناره
تلهج يربي حسين إلي سالم يعود الداره

هذا الوفه ماله شبه لا والله
حتى ما صاحت عليهم ويلاه
شده و عظم باس تتعلم الناس
انطت ولد وفايه
_____

اتلگاها هاليوم السبط واكف يرحب بيها
يا هلا بأمي الغاليه بأم الوفه يسميها
مشتاگة جانتله اشكثر والخاطر يأذيها
يمسح دمعها بيمنته و الزهره گصدت ليها

مشكوره يم الأربعة و تسلمين
و حيدر اجه يبارك تعبها لحسين
گاصدها عباس. تتعلم الناس
انطت ولد وفايه




كلمات / حسين أحمد الأمين

#ليالي_ام_البنين
_ - _ - _

من رد الظعن و الحره شافت أم البنين
اجتمعن بالبواچي والسوالف عالميامين
يمه ولدي طاحوا عالترايب دون الحسين


گعدت تلطم العين و تنشد عن الحسين
زينب ييمه الگلب بيه لاهب
هلت زينب ادموع ييمه گلبي مفجوع
انه بعيني شفته انذبح فوك الترايب

صاحت آه يحسين يبني
صاحت ابد ما يهده حزني
صاحت يريت الموت أخذني

كل ليلي و نهاري چنت أتاني الوجهك انشوف
تالي عالتراب ابلابه راسك برض الطفوف
يمه هم تألم من وريده حزته اسيوف
__

أخبرني اعله ولدي وفو يا يمه عهدي
عبدالله ضحه إله بگطعة وتينه
أذكرها چلمته من راح و شبگته
ارفعي ييمه راسچ عالي بينه

وفه أخبريني بعهوده
وفه قدمهن زنوده
وفه ضحاله بوجوده

أخبرني بنزاله من رفع سيفه يحارب
راضي حسين عنه لو بقه بابني يعاتب
لو ما راضي عنه الگبره اكصدله و أحاسب
____

انشدچ بعد عن عون نطاهن فدوه العيون
وفه بالحرب لو بخل لحسين دمه
و اسألچ حال جعفر طب للحومه يزئر
عالتراب تگطع وذر يا يمه جسمه

فزعلچ لمن بسمه ندبتي
فزعلچ وفه ارباي و سهرتي
فزعلچ احچيلي يبنتي

وگف عالخيمه حارس و أنه گتله فدوه لختك
گتله دون أخيك تفدي روحك إنه ردتك
ما ريدك تردلي تنطي اريد بدم رگبتك


بعد واحد صفاته گمر يضوي شحلاته
راعي الكفالة يزينب خبرينه
انچتل من دون الحسين قدم روحه والعين
لخيه تگطعت يساره و يمينه

للحسين وفه بگطعة رگبته
للحسين قدم كل مهجته
للحسين إنه بزغره نذرته

خبريني اعله حربه من هجم و مراكض الناس
يشطر بالعساكر چن علي بضرباته عالراس
ييمه طمني گلبي و كولي وفه أبني عباس
_

من رحتي سبيه نهض من عالوطيه
بس لا بقه اعله النهر و أنتي مشيتي
گتله بيوم الوداع الزينب توكف اشراع
تحامي الظعينه و تعلي يمه صيتي

الكفاله بدماك وروحك اتصون
الكفاله اهم يمه من العيون
الكفاله عنها لا تقصرون

ها يابو الحميه تالي ظعنك يصفه بالشام
بخرابه امگعديهم كل مشيهم بين الازلام
مو هذا الوعد ما گتلي تغفه عيني و تنام




كلمات / حسين أحمد الأمين

#صاحب_الأمر_ع
___

ايامي عايشها جمعه ما ظلت بعيني دمعه
طال الهجر طال يا مهدي الآمال
_

دمعه دمعه الشوفتك يالمهدي هليت
نشفت اعيوني و اتاني و انته ما جيت
انتظر يوميه لــسهله تعنيت
شلون أعيش ابيت و انته ما الك بيت

ليليه امشيله لهفه ما لحظه هم عيني تغفه
بيه العشگ صال يا مهدي الآمال
_

ناذر امن المهد عمري الآخر أنفاس
حدر جدمك لو اجيت احنيلك الراس
خل تلوم وما تهمني شما حچت ناس
انه ما شفتك لچن شفتك بالاحساس

مو إلا بعيوني انظرك من الذر انه اعرفك
ما تنفع أقوال يا مهدي الآمال
__

بس اشوفك سيدي و اعميها هالعين
لحظه لو انظر حضرتك تسوه السنين
هيچ انه عندي بخت يا وارث الدين
بين ادينك موتتي يا محله هالبين

بدربك محله هالمنيه بعينك تلتفت عليه
بفكري الحلم جال يا مهدي الآمال
_

ثار مو واحد ينطرك تدري ثارات
حيدر و ام الحسن يا مهدي الذات
و بعد ثار المجتبى عندك علامات
و ثار الحسين الغريب بكربله مات
يالمهدي بعد مصايب انهض و انتفض يغايب
الهن دمع سال يا مهدي الآمال
__

أثر باقي اعله النهر منتظرك هواي
رايه تارك عالشريعه سيد الماي
و من الحسين السبط تارك الك هاي
خنصره المگطوع تثأرله يمولاي

حسين الجيتك يناطر لسه تسحگه الحوافر
ما تنظر الحال يا مهدي الآمال




كلمات / حسين الأمين