افراح

يل مهدي يل موعود بيك العزم مشدود
ارواح الك نفدي مولانه يل مهدي
مولانه يل مهدي
******************
مولانه عد عيناك انصارك ومنخاف
نقسم قسم وياك لو كطعونه انصاف
نرخص العمر ونجود هاي السنين اشهود
مولانه يل مهدي

***************
نورك يشع انوار يضوي بليالينه
يمحير الأفكار فكرك يغذينه
يجلي غيوم السود خير وسعاده يعود
مولانه يل مهدي
*************
انت الهوى والماي والكل محب زاده
بأسمك نوحد الراي سيد على القاده
بأمرك نصير جنود منك نشيم الزود
مولانه يل مهدي
***************
اخر هداة الكون والكل بشر هادي
تترقبك العيون صبح ومسى انادي
ونطشهه الك الورود مثلك فلا موجود
مولانه يل مهدي
**************
يبن النبي المختار عالي يظل سورك
اشتاكينه الك مولاي عجل ظهورك
ندعي العلي المعبود بطلتك علينه تجود
مولانه يل مهدي

الشاعر /هادي الساعدي

يسئلني العاذل من تعشق وبصوت احقاده ارشق
فأجبته عاشق للمهدي روحي ودمائي له أفدي
منقذ الإنسان من كل طغيان
. ○○○○○○○○○○○○○
يهدينه للحق بعدله أبن الأطهار
يقضي عل ظلم وكل اهله ابن الاطهار
مرعب كل طاغي ومذله ابن الاطهار
منقذ الإنسان للحق عنوان
○○○○○○○○○○○○○

مصلحته منقذ للعالم هذه الأخبار
هل تعلم إم لست بعالم هذه الأخبار
لا تبقى إنسان حالم هذه الأخبار
منقذ الإنسان مبكي العدوان
○○○○○○○○○○○○○
للحب ينادي والعدلي أحرار أحرار
لا للبغضي لا للقتلي احرار احرار
لا للظلمي لا للذلي احرار احرار
منقذ الانسان يأتي أبرهان
○○○○○○○○○○○○○
بلسم للجرحي وكل دائي اهواه اهواه
يسري حبه في اعضائي اهواه اهواه
.اعلموا هذا يا اعدائي اهواه اهواه
منقذ الانسان احساس و وجدان
○○○○○○○○○○○○○
شفتاي تلهج بالذكري مهدي مهدي
غذاء الروحي والفكري مهدي مهدي
وأشم حبه كالعطري مهدي مهدي
منقذ الانسان رمز الايمان


الشاعر / هادي الساعدي

ملاحظه* جعلت حرف الياء بدل الكسره فقط لتوضيح القراءه في النص الثالث والرابع والخامس

هوسه إلى الإمام المهدي

هل اهلال عيدك يا ابن طاهه
ملائكة الله بيك اليوم تتباهه
والدنيا بمحبتك جنه محلاهه
ها يا ابن الهادي
أنتم اسيادي
أنا وأجدادي
حبكم تاج وفوك الراس
خل الشامت يسمع
الشاعر / هادي الساعدي

وصيتي الك يبني هايه اسمعهه
ولاية علي وأهله لا تضيعهه
ضريبه من اجلهه الروح ادفعهه
اشما تملك افدي
وصير ويه المهدي
من أنصاره وجندي
ها ها::: هو الجنه وهو الدين
وياخذ ثار اجداده

الشاعر. ....هادي الساعدي ......

○○○○○○○○○○

أفراح إلى الإمام المهدي عج

عايش ابأنفاسنه يل ملكت احساسنه
اغلى من كل ناسنه
○○○○○○○▪○○○○

يابو صالح يا املنه يا عزيز الروح
يابو صالح أظهر النه وشافي الجروح
يا بو صالح يا سندنه حبنه الك ممدوح
يل سكنت ارواحنه اغلى من كل ناسنه

○○○○○○○○○○○○
نبقه نربح لا منخسر وشي اكيد انفوز
نبقه نربح الكلب منسر بس الك محجوز
نبقه نربح منتحسر والجنان انحوز
يل صرت عنوانه اغلى من كل ناسنه
○○○○○○○○○○○○○
احنه ننجح شي مؤكد ننصر الموعود
احنه ننجح وكلنه نسعد ارواح لجله انجود
احنه ننجح ربنه يشهد والعطاء ممدود
لجله نفدي اولادنه اغلى من كل ناسنه
○○○○○○○○○○○○○○
ندعي الله ايعجل النه تظهر النه الساعه
ندعي الله يا املنه بالولاء والطاعه
ندعي الله يا حلمنه حبك اغلى ابضاعه
فدوه كل اموالنه اغلى من كل ناسنه
○○○○○○○○○○○○○
يا ضوانه النورانه اشكد جميله احروفك
يا ضوانه الما نسانه أمنيات انشوفك
يا ضوانه ويارجانه كعبه انت انطوفك
علمونه اجدادنه اغلى من كل ناسنه

الشاعر /هادي الساعدي
2019/4/17

موال إلى الإمام المهدي عجل الله فرجه

يسئلوني وكلهم اني اهواك
يا عشكي وحياتي انت دنياي
يا بلسم جروحي وبيك مجنون
ومن انخاك اعرف ما يظل داي
اسمك من اذكره كلي أرتاح
وتظل ترتيل بيه ا ترتل اشفاي
دعاء الفرج ادعي يبن الأطياب
وكل احبابك ادري تدعي وياي
عجل بالظهور انريدك اليوم
عكدنه الرايه الك وتوحد الراي
منقذنه واملنه ياضوى العين
عطشانين الك ما ردنه كل ماي
نريد ابدولتك مولانه انعيش
مثل دوله علي للناس حماي

الشاعر/ هادي الساعدي
2019/4/17

تكحل العين
ما ريدك شمر بعيوني اتصير
اريدك عابس ومجنون يحسين

وما ريدك يزيد وباغي عل ناس
اريد أفعال منك تنذكر زين

اريدك جون كون أتصير مختار
تهد للثأر كون اتكحل العين

اريد إنسان كون اموالي كرار
نذر عمره وحياته الخدمة الدين

وريدك للأخوه أتصير عباس .
ألفدى لحسين عينه وانطه جفين

وريدك بالبلاء اتصير سجاد
عليل ورغم علته يصلي كل حين

ومثل زينب اريدك وكت الأهوال
جبل شامخ عزمهه وبجت البين

وريدنك شمس ومضوي أخلاق
وسكتهه الشماته والمبغضين

الشاعر .... هادي الساعدي

♡ هوسات بحق الامام الحسن المجتبى ع♡
نعرفك يل حسن قائد وأبن قائد
عدوك من تخزره يختل ولابد
والميدان الك يا سيدي شاهد
ها ها ....تشهدلك ساحات الحومه
♡♡♡♡♡♡♡♡♡
يا حامل لواء الدين يا سبط النبي المختار
امامي يل حسن معروف تشبه صولة الكرار
لو طبيت بالميدان سيفك جنه ذو الفقار
ها ها ها
● عدوانك ترجف مرهوبه ●

♡♡♡♡♡♡♡♡♡♡♡
شوصف بيك وانت الوصف بيك احتار
كريم آل النبي والكرم منك غار
عظيم الشأن سرك عجز الاسرار
♢ سر حبدر سرك والهادي ♢


الشاعر .... هاديالساعدي
2019 /4/30

♡ أفراح ولادة الامام الحسن المجتبى ع ♡


طيبته وأحسانه والكرم عنوانه
من يطب ميدانه تختنك عدوانه
الحسن هاذ الحسن هاذ
☆☆☆☆☆☆☆
كلبه يوسع دنيا وكله حنان .
واليجي يمه يحس بس بالآمان
عطره الفواح عطر كل مكان
ومن تمسك بيه فايز بالجنان
مولده هليله والورد نهديله
والكلب يمشيله بالعشك يحجيله
الحسن هاذ
☆☆▪☆☆☆▪☆☆☆☆
مثل جده طاهه اقره سيرته
بالكرم معروف تكتل شارته
ومثل حيدر بالمعارك طلعته
ترعب الفرسان قبضة يمنته
اتهاب كلهه اقدومه من يطب للحومه
الزلم مهزومه واضحه ومعلومه
الحسن هاذ
☆☆☆☆☆☆☆☆☆☆☆
كل موالي اينادي بالحب والولاء
بالكلب خطينه اله كلمة وفاء
هو من نوره أخذ نوره الضياء
اشواكنه نبعثهه بجناح الهواء
الروح اله ملهوفه هلعشك منعوفه
شيعته معروفه عاشكه لحروفه
الحسن هاذ
☆☆☆☆☆☆☆☆☆☆
هو للأيتام جان الهم ابو
ألما أله خوان يصبحله أخو
بالكرم معطاء حتى ويه العدو
يا بشرنه ابنهجه أمشوا وقتدو
اقتدوا بفعاله وأحفظوا أقواله
واليحب هنياله الشفاعه اتناله
الحسن هاذ
☆☆☆☆☆☆☆☆☆
اسمع انت زين وحفظ هالكلام
الحسن عنوان للحب والسلام
وسيفه غربل روس أرباب الظلام
ابن حيدر عل ظلم لا ما ينام
لله ناذر نفسه نقتبس من درسه
نستضيئ ابشمسه وفضله لا ما ننسه
الحسن هاذ



الشاعر ...هادي الساعدي
2019/4/24

الليله مولانه انولد حبه احلى من الشهد
ويانه فرحان الزمن حبه جنات وعدن
الليله مولانه انولد
*****************
الليله كل الكون فرحان وسعيد
اهلال بدره هل علينه الليله عيد
نلفظ اسمه مثل معزوفة نشيد
ابهل الولاده نحمد الباري المجيد
كل ملائكة السمه تهني حماي الحمه
الليله مولانه انولد
**************
ابن طاهه بمولده ما ظل جرح
شمس نوره بزغت ابأجمل صبح
يلي حبه جنه واملاك وربح
بالكرم مثله فلا واحد يصح
هو ابن خير البشر نوره عل امه ظهر
الليله مولانه انولد
*************

كل موالي الليله لازم يبتشر
وخبر مولد ابن حيدر ينتشر
حب امامي الحسن ينفع بالحشر
حبه خير وجنه ونور وأجر
يامحب شارك تعال كل حزن هليله زال
الليله مولانه انولد
***********

بكل جوامعنه و حسينياتنا
استقبلتنا وفرحت ابهيئاتنا
بيهه نقرأ بالعشك انشادنا
الليله باسم الحسن كل هوساتنا
بالعقيده والولاء للحسن يحلى النداء
الليله مولانه انولد
*************
الليله ننسى كل حزن وجروحنه
وبالفرح ننشد نبدل نوحنه
حبه يغذي النفوس وروحنه
رحمه النه وبيه نغذي اصروحنه
هذا حبنه معتقد بالحساب النه سند
الليله مولانه انولد


. الشاعر /هادي الساعدي

افراح


كلمن يشوفه انبهر ملك هذا لو بشر
هذا مولاي الحسن
************
كل خصال البيه جميله
بالكرم ماكو مثيله
روحه يهديهه قليله
لليكصده ويعتنيله
خيره فايض كل النهر ملك هذا لو بشر
هذا مولاي الحسن
*************
لله ناذر كل حياته
حير اعدائه بصفاته
يا جماله ويا حلاته
شوكه بعيون الشماته
خابت وماتت قهر ملك هذا لوبشر
هذا مولاي الحسن
************
امن الاله اجمل هديه
الفاطمه الحره الابيه
وللنبي خير البريه
والعلي حامي الحميه
وخبر مولوده انتشر ملك هذا لو بشر
هذا مولاي الحسن
************


بدره هل اعله الليالي
يفرح الليله الموالي
يشهد الله عندي غالي
اعز من كل الغوالي
بروحي افديه والنحر ملك هذا لو بشر
هذا مولاي الحسن
***********
الحمد لله اعلل ولاده
والحسن تقوى وعباده
فارس يحب الشهاده
في سبيل الله جهاده
دوم للحق انتصر ملك هذا لو بشر
هذا مولاي الحسن

الشاعر//هادي الساعدي

بويه زينب لاتونين اعله ابوج
ضمي ونج بعد كدامج طفوف

تهون طبرة هامتي ودمي اليسيل
راس اخوج اعله الرمح عينج تشوف

عل الرمال حسين مذبوح وسليب
جرح واحد بيه وجروحه الوف

ابنصكم انا ابينكم من راح اموت
ابلا نصير حسين وتحيطه الصفوف

وأبو فاضل يوصل الشط الفرات
بزوده يمشي ويوصل ويكسر أنوف

ايمد جفوفه والعطش صحرى ورمال
يصيح اخوي حسين ابو كلب العطوف

ابجوده يملي الجود ساقي كربلاء
الماي منه يعتذر تبجي الجروف

بويه زينب خاف أ ألمج من اكول
يوكع العباس مكطوع الجفوف.

بعينه نابت سهم يازينب تراه
البدر طايح تصبح الدنيا كسوف

الشاعر....هادي الساعدي

نعي إلى الإمام علي ع
ابطبرة هامتك مطبور الأسلام
يبو جف الكريم وابو الأيتام
ساجد ياعلي وطبرولك الهام
ماعدهم مروءه امنيلهم دين

يا أخ النبي وغيرك فلا آخه
وعنه دافعت وغيرك اتراخه
وابن ملجم تجاسر هو وشياخه
ابفعلتهم اكيد بهاي ملعونين .

علي ابيت الله ندريهه الولاده
ومماتك صار في بيت العباده
وكلت فايز ومحلاهه الشهاده
وحمدت الله وشكرته ها يبوحسين

الشاعر ... هادي الساعدي
2019/5/24

أين نحن من علي ع
1 .من هو علي ابن ايو طالب
2 .اذا عاد في هذا الزمان ما هو موقفنا هل نكون كمالك الأشتر وأبا ذر الغفاري ام مع السقيفه
3: ما موقفنا من الأحزاب التي تجمعت لقتل الرسول ص هل نصافحها أم نفدي ارواحنا من اجله كما فعل علي
4.. هل نتصدق على الأسير والسائل أم نتباهى بأن مالدينا هو من أنفسنا وننظر إليهم بأحتقار
5.. هل نعطي حق الأيتام ونجول الليل كي نتفقدهم أم نسلب حقهم
6... اذا كان سكوتنا عن حقنا الشرعي فيه حقن للدماء وحفظ للدين والإسلام رغم ما لدينا من قوه وليس ضعف ماذا يكون موقفنا
7.. لو كانت شجاعة علي وهيبته وقوته عندنا كيف نتعامل مع الضعفاء
9.. بماذا نوصي ولدنا اذا اعتدى علينا أحد قبل ان نموت
8.. ماذا اخذنا من علي ع
9..أين نحن من علمه ومروؤته وانسانيته
10.. ماذا نفعل في بيت المال وخزائن الدوله
11 هل نستولي على الأراضي والاملاك العامه ام نعطيها إلى مستحقيها ونحافظ عليها لئنها امانه
12..اذا كنا منذ اليوم الأول للرساله مع الرسول الأعظم ص ومن أقرب الناس إليه ما هي الامتيازات التي نتمتع بها هل تكون هناك خدمه جهاديه
13اذا اصبحنا خلفاء على اكثر من 44 دوله ماذا نفعل وماذا نجعل من أولادنا واقاربنا في اي مناصب .
14..........
وتستمر الاسئله
والجواب ؟؟؟
--------------------
اللهم عرفني نفسك فإنك أن لم تعرفني نفسك لم أعرف نبيك اللهم عرفني نبيك فأنك ان لم تعرفني نبيك لم أعرف حجتك اللهم عرفني حجتك فأنك إن لم تعرفني حجتك ضللت ديني .
اشهد ان لا آله الا الله
واشهد ان محمد رسول الله
واشهد ان علي حجة الله واولاده المعصومين حجج ونعم الحجج
اللهم ثبتنا على ولاية أمير المؤمنين
هادي الساعدي
2019/5/27

ما بين حزني والأمل 😌

كحل اعيوني بنضرتك

مشتاكلك انا وعلي

يوميه اموت ابغيبتك