انا من اكتب حسين العبره تخنكني ابجرح
ومن أنادي يا حسين جني طير ومنذبح
****&&&&&&&&&&&&&

الوادم بعالم تسولف وانا سالفتي الحسين
وانا نايم احجي بيهه يلا شعور ابجي ابونين
اصحى والكه ادموعي تجري بجفي الطم عل جبين
ومثل نشغة طفل انشغ وادعي ربي يا معين
بكل صباح وكل مساء
ابقى عل حب والوفاء
وماتغيرني السنين حب ابو اليمه ربح
ومن أنادي يا حسين جني طير ومنذبح
○○○○○○○○○○○○○○○○
سولفولي اشكد سوالف عل عشك والعاشكين
عشك عن نزوة عواطف مو عشك وعي ويقين
هذا يا مجنون ليلى واهم وأصبح رهين
مومثل عشك ابو اليمه شافعآ للمذنبين

هل عشك مابيه شقاء الحمد لله بكل دعاء
يشفع النه وفائزين ويبني ألنه اكبر صرح
ومن أنادي يا حسين جني طير ومنذبح
○○○○○○○○○○○○○○
استمع دكات كلبي من الزغر تنبض عشك
وكلبي باصم هو كلبي اشلون عن كلبي افترك
حسين هو سر وجودي ابلا هواه انا اختنك
ومثل حرك اخيامه روحي من اذكرى تحترك

واستمع صرخه ونداء من ضميري للسماء
بروحي وبكلشي أدين وغير دربه ما يصح
ومن أنادي ياحسين جني طير ومنذبح
○○○○○○○○○○○○
ارسم الطف بخيالي ابريشة الحب والوفاء
ونحر عبد الله ارسمه سايله منه الدماء
والجفوف الكلهه خوه اتعنونت رمز الفداء
لوحة الطف الحزينه ملحمة حب وعطاء

ملحمه اتربي النفوس تضحيه وأروع دروس
بيهه ضحى المتقين ويه الظلم ماكو صلح
ومن أنادي يا حسين جني طير ومنذبح
○○○○○○○○○○○○○
ألماله اول ماله تالي هذا معروف المثل
حسين أول شي مؤكد وبيه كلشي اكتمل
هو اجمل وطن عندي مثل أبوه خير العمل
أعلن انا بكل صراحه كلبي غيره ماقبل

عن هواه لا ما أحيد ابحبه اتمنى شهيد
هائم ويه الهائمين بكلب كل حاقد رمح
○○○○○○○○○○○○○
دوم صافي ونيتي بيضه هيجي رباني الامام
ورادني ما خون واحد ورايتي اترفرف سلام
والظلم رايد ارفضه ورفض الذل والظلام
وابد متغرني المناصب الدنيا تاليهه حطام

السلطه والكرسي زوال حسين ماعوفه محال

هو ثالث قبلتين وهو آيات الفتح




الشاعر ♢ هادي الساعدي

انتي ياعيناه محمد ياهواه
انتي وحدج كون يسبح في يقين

ابمولد فاطمه فرحانه الأنصار
نهني المرتضى وطاهه وولدهه
ونصلي اعلل نبي مو مره مرتين
جبريل ابعظمته ايهز مهدهه
هادي الساعدي

اللهم صل على محمد وال محمد

أفراح على ولادة الامام علي ع

فرحة فؤادي يا علي
شوكي و ودادي يا علي
بأسمك أنادي يا علي
يا علي ياعلي يا علي
○○○○○○○○○○
احلى فرحه ابهل الولاده
خير وآمال وسعاده
كل محب يعلن وداده
حب علي هو عباده
يا علي ياعلي يا علي

بيض الايادي يا علي
بأسمك أنادي يا علي
○○○○○○○○○○○○
انت روح الروح أليه
امن العلي أجمل هديه
وكل صفاتك أحمديه
نورك امنور البريه
ياعلي ياعلي يا علي

بيك اعتقادي يا علي
بأسمك أنادي يا علي
○○○○○○○○○○
اسمك ايطيب النفوس
وشمسك امضويه الشموس
لخصت اجمل دروس
أنف كل ظالم تدوس
يا علي ياعلي يا علي

اتذل الاعادي ياعلي
باسمك أنادي يا علي
○○○○○○○○○○○○○○○
انت تعويذة حياتي .
بيك أجمل كل صفاتي
الاخر انفاس ابمماتي
يا دعائي ويا صلاتي
ياعلي يا علي ياعلي

بيك اعتمادي ياعلي
بأسمك أنادي ياعلي
○○○○○○○○○○○○○
بيك من يتنخه سائل
انت حلال المشاكل
فارس واعظم مقاتل .
يشرد بروحه الينازل
يا علي ياعلي يا علي

اتذل المعادي يا علي
بأسمك أنادي ياعلي
○○○○○○○○○○○○○



الشاعر//هادي الساعدي
ا

مولد علي الليله فرحانه الاكوان
مولد علي الليله كل شيعي فرحان
*****************
هاي الولاده خير وسعاده بيهه ابتشرنه
مولد ابو حسين ياناصر الدين فرحة عمرنه
يارحمة الله اسمك يمحلاه ياضي بصرنه
ساكن بالعيون رغم اليضدون كل شيعي فرحان ○ ○○○○○○○○○○○○○○
انصافح بعصنه ونطش وردنه ورد المحبه
وتعم الافراح وننساهه الاجراح ونمشي اعلدربه
بعين البصيره ماكو نضيره جننه حبه
هاي الحقيقه نعشق طريقه كل شيعي فرحان
○○○○○○○○○○○○○○○•
والكل موالف شمس المعارف باب المدينه
والكل موالي حيدرنه غالي اسمه هوينه
ماعدنه غيره ألكل شيعي اميره هو ولينه
الكل يهنون ياضي العيون وكل شيعي فرحان
○○○○○○○○○○○○○○○○
صفكه وهلاهل وحتى اليلابل صدحت يمقدام
وزيدوا الصلاوات ورتلوهه الآيات ورفعوهه الإعلام
اعلام الموده نهواه نوده ناصر للأسلام
بالكعبه مولود والكل أله اشهود كل شيعي فرحان
○○○○○○○○○○○○○○○

هو وطنه ويجمعنه كلنه بروحه الحنينه
ضحى لجلنه بعطفه شملنه حيدر علينه
ساكن كلبنه ونبعثله ودنه هو و نبينه
اتشمه الأنفاس لا ماله مقياس وكل شيعي فرحان

الشاعر /هادي الساعدي
2019/3/18

أفراح ولادة الامام علي ع
دكة كلبي تنبض حيدر لحظه ابدونك لا ما اكدر

حبك بنفاسي وللموت والعالم يسمع هلصوت

لحظه ابدونك لا ما اكدر
○○○○○○○○○○○
يا اول عشكي ويا روحي
اسمك بلسم يشفي اجروحي
تبقه اترتل بيه اشفافي
يا نبع الحب نبعك صافي

والما حبك طبعآ يخسر
لحظه بدونك لا ما اكدر
○○○○○○○○○
مالك احساسي ووجداني
وغلى من اهلي وخلاني
اول انت وتبقى الأول
حبك هيبه وبيه اتجمل

ساقي الحوض ابيوم المعبر
لحظه بدونك لا ما اكدر
○○○○•○○○○○○○
والعالم كله بعرفونك
فارس والكل يهابونك
مرعبهم انت وفقارك
حامي دخيلك حامي جارك

كلمن ضدك تاه ويزغر
لحظه بدونك لا ما يكدر

○○○○○○○○○○○○○
كل همك نصر الإسلام
يل كلبك بيت الأيتام
وبروحك ظميت الناس
تسعدهم اجمل احساس

وعيونك حراس وتسهر
لحظه بدونك لا ما اكدر
○○○○○○○○○○○
عاشك وتفاخر حبيتك
مجنون بحبك ناديتك
غالي واغلى من كل غالي
ساكن بعيوني ودلالي
حتى الاعمى بحبك أبصر
لحظه بدونك لا ما اكدر


الشاعر/هادي الساعدي

( ابوذيات على الإمام الكاظم ع )

هاي انصار تبعث شوك ودهه
تضحي أرواح للمسوم ودهه
مكر تعلب بني العباس ودهه
بغدر سمو إمام الجعفريه

○○○○○○○○○○○○○
بسلاسل قيدوهه اشلون يداك
وامك فاطمه والنبي يداك
السمك مو شجاع وصار يداك -
لئن يعرف يمينك حبدريه

○○○○○○○○○○○

يصب دمعي على الكاظم ويهلي
ذنوبي بحظرته اغسلهن وبهلي
اله خادم اظل انا ويهلي
ونظل للموت شيعه وجعفريه



الشاعر /هادي الساعدي

ماذا أقول فيك ياسيد الصبري.
ويامن سكن الفؤاد وشغل الفكري
يا نبع الحياة ونهرك يجري
حبك غذائي في دمي يسري
فداك اهلي ومالي وعمري
لو قضيت الدهر ابحث واجري
وكان في هواك حزو نحري
اشدد حيازيمي واعقد امري
يهون العمر والموت اشري
يا ابن محمد السيد الطهري

الشاعر / هادي الساعدي

نبض قلبي دق حبا عاشقا مذ كنت طفلا
خطواتي تسري نحوك بيقينآ ليس جهلا
طائرا شوقي اليك انك للعشقي اهلا

انا احبك هاي كلمه بيهه تتوضى الشفايف
يا سفينه وبيهه آمان ومنك الطوفان خايف
جرحك االينزف لجلنه و جم جرح للناس رايف
ماكو شي يصعب عليك ومعجزاتك انا شايف

الشمس لن تحتاج شاهد نور اعجازك بان
من بعيدا اوقريبا انك في كل ز مان
لو بناديك منادي اوغريب في مكان

ابد ماتبخل عليه وحاجته تنطيهه بيده
رغم جرحك تشفي جرحه وهاي منك موجديده
جم عليل بعلته داخو وانت شافيته اكيده
الرايد الجنه وعبقهه جنة الله انت ورغيده
الكون يتوضى بحضرتك واليزورك هذا عيده
يأخذ العيديه منك بالكرم والحب تزيده

يا كريمآ وسخيا لم ترد سائلا
الخير فيك يتجسد بالعطايا هائلا
ارجو ان تقبل مني هذا مدحي قائلا

الما يحبك هذا خاسر عنده ماكو كل عذر
وبوسه من روحي الضريحك حتى تتغذى فكر
كل الهوى الدنيا خنكني وارد أشمنك عطر
واشكي ظيمي كله يمك دنيا اذتني اشكثر
واين ماحط جفي لسعه ووين ما روحن جمر
هيه بس يمك امعيده وحلوه ساعات العمر


الشاعر / هادي الساعدي

افراح
عاشك واحب حسين وزرع ورد دربه
هو النظر للعين عابس انه ابحبه

***************
عاشك انه ومشتاك دلوني وين الكاه
ما بيه حيل افراك ما اعيشن ابلياه
دلوني عنه وين عابس انه ابحبه
*****************
ولهانه روحي اعليه كل لحظه تسألني
صبح ومسى اتناديه بأفراحي و وني
وبكلبي عاش سنين عابس انه ابحبه

****************
مثل السفينه الحب والمرسر الهه انته
وريح العشك من هب حبك فلا عفته
من المهد للحين عابس انه ابحبه
***************
يسئلوني ليش اهواه وبحبه ليش انجن
طاهه النبي حباه وعن حبه هو اعلن
رافع لواء الدين عابس انه ابحبه
*****************
لأخر نفس بالروح اتنفس احروفه
برب العرش واللوح حبه فلا عوفه
ولو يقسي بيه البين عابس انه ابحبه


الشاعر//هادي الساعدي

افراح
جنه حب حسين حبه جننه
حبه اصل الخير يلي تسألنه
حبه جننه
******************
محلى هذا الحب كالعسل صافي
وصفه امجرب الكل مرض شافي
حير اهل الطب لغز هذا الحب
حبه جننه
*****************
تهيم بيه ارواح عشكه بالفطره
ورد كالقداح زاهي بعطرة
عمر نشتمه حبه كالنسمه
حبه جننه
************
بالكلب مزروع معتقد خضر
مو بجي ودموع نضحي اله ونثأر
قدوة الابرار ثورة الاحرار
حبه جننه
**************
انشوفه ونحسه عل ملئ واضح
واقع انلمسه حبك الراجح
هو روح الروح بلسم المجروح
حبه جننه
**************
نحبه بالأصلاب واله وقعنه
نبقى اله احباب نقسم بربنه
نقدم الارواح والمحب هل صاح
حبه جننه


الشاعر// هادي الساعدي

ابوذيات الى الامام الحسين ع
سفينه حسين للحق ولهه ربان
ونعرفه الركب بيهه والهرب بان
وبعض الناس تاهت ولهه ربان
نساء و مال ربهه وجاهليه
○○○○○●●●●●●●
لزمت القلم بيدي وخط الحسين
وظل جندي القضيتي وخطي الحسين
لئن لله بدمائه خط الحسين
اعظم تضحيه لشرف قضيه
هادي الساعدي

الدنيا ابهل الولاده اليوم مسروره
ومن نور النبي شع وسطع نوره
سبحان الخالقه وصوره ابهل الصوره .
الورد من عطره ظل يشتم
و اسمه للجرح بلسم
اكصده وما يظل كل هم
كل زاير ينطيه امراده

قصيده إلى علي الأكبر ع

بدر بالحومه ازهر
شبيهه النبي الأكبر
***********

لو طب بالميادين
يخلي أعدائه نصين
كلهه تسئل أمنين
هذا شبل الحسين
وبزوده ايتبختر
**********
يرجز بيهم أيصيح
سمعو منه تصريح
تكوم الزلم وطيح
مثل سعفه ابمهب ريح
منه أعدائه تحذر
*************
كل خطوه الخطاهه
وكل كلمه الحجاهه
بيهه احنه انتباهه
كله جنه طاهه
فعله بينه أثر
************

عينه ماخذت نوم
نسر وبزوده ايحوم
تشرد منه ا لكوم
يصيح انا الكم اليوم
و منكم لابد أثأر
************
يشع بنوره الكون
وتنسر بيه العيون
هيبه وبيه يحجون
شبيهه النبي يشوفون
كلمن شاهده أنسر


الشاعر// هادي الساعدي

ابوذيات للامام المهدي

اسئل متى أيهل بدره وناشد.
وكتبت اشعار عن حبه وناشيد
بفخر امدح ووصفنه وناشد
عزمي بعشك منقذهه البريه

*********
عشكتك بالمهد معروف وداي
وبعثت الروح وي الكلب وداي
مثل جدك طبيب العلل وال داي
ومنقذهه البشر من كل اذيه
********
بينه اجروح يبن الحسن شلهه
الهاي الناس غيرك كلي شلهه
مثل مشلول هذا الوكت شلهه
بظلم ورهاب اتباع ال اميه


الشاعر //هادي الساعدي

افراح

وين يل مهدي انت وين شوكي زايد والحنين
والله ما ناسيك صدك تشهد بهاي السنين
انسى روحي لو نسيتك يبن حيدر والامين
******************
فدوه الك كل العمر والله ماظل كل صبر
امشي دربك لو جمر وما أخاف المعتدين
وين يل مهدي انت وين
******************
صوت من اعماقي صاح بعد ما حمل جراح
شوك حبي عطره فاح ياس هيل وياسمين
وين يل مهدي انت وين
*******************
فاتت سنين وشهور اشوكت مولانه الظهور
الجنه انت والسرور وانت فرحة كل حزين
وين يل مهدي انت وين
*******************
روحي رفت كالطيور هايمه بحبك تدور
بلظلام انت الهه نور تضوي درب التائهين
وين يل مهدي انت وين
****************** .
تجلي شمسك كل غيوم الدين تحيي والعلوم
ودولتك بالحب تدوم رغم انف المعتدين
وين يل مهدي انت وين

الشاعر//هادي الساعدي