#مريوميات_كان_يا مكان

مهما شفت أو عشت في أي بيئة حقيقي ما في ازبط من الريف ولا ألطف من هواه وأصوات آلات الزراعه في الصباح بدري ، ومع المغرب وقت رجوعها ورجوع كل المزارعين ..
وأصوات الحمير وكأنها بتنبه على وصول أفواج العمال(ولا صوت لامبورغيني والله)😂 .

الشتاء الفات ومع عدم الموضوع والملل..
قررنا نسوان الأسره نطلع نشوف الرجال ديل بهببوا في شنو طول اليوم وزراعتهم دي يَعُول عليها ولا (كلام الطير في الباقير )...

وبعد الحصول على الاذونات اللازمه بعد أقناع دام ليومين ، طبعا ديل النسوان المتزوجات اما ناس هموله زي ديل كنا قرفانين من قصص النسوان دي
الواحده تقول عايزة تكوّن بعثه أممية من كتر النقاشات مع زوجها..

بعد ما اتحصلنا على الإذن المطلوب والتأشيره
وما لقينا زول يتكرم ويودينا بالعربية ، همة عاليه
طبعا 😂😂🔥 مشينا وبقت رحله مشي🙂💔.

اصلا دا حال الزواج يعّكس عليك حياتك ويمشيها
بالمقلوب، ياخ مرت خالي الكبير مرات تمشي وتتكلم مع الغنمايه كأنها بتها😂..
(اكيد طبعا في محبه وعشره عمر بينهم).

قبل الغداء الخبر فاح كل الفريق والشفع بقوا زي التماسيح في المويه الواحد كل شويه مطلع رأسه
يشوف الوفد أتحرك ولا لسه .. مترصدين عشان يمشوا معانا قسراً ..

اتقسمنا لفرق صغيره بتوجهات وهميه انا وبت عمي قلنا ماشين لخالتي نشوفا قالوا عيانه ..
وكل اتنين اختاروا وجهه وهميه بس مافي شافع
أقتنع..

وحصل العكس أقنعونا انهم ماشين يلعبوا واختفوا
بطريقة غامضه..

ونحنا طالعين من الحله جمب الجدول الشارع كله مويه، الجدول مغرق الشارع..
عشان نطلع من الحله إلا نرجع البيت ونمشي بالشارع التاني ..
أو كم دخله كده ببيوت الناس وده عادي عندنا لانو كل بيت بكون على الأقل فيه بابين😂😂😂

(ممكن الساعه اتنين صباحا تسمع صوت ود جيرانكم تلب بالحيطه وهو في الحقيقة ما حرامي بكون كان في حفله او ما شابه لانو كسل يمشي بالشارع واختصر المسافه😅🌚)

المهم بعد ما درسوا خريطة البيوت الواقع عليها المسلك بتاعنا انطلقنا، انا ما عجبتني قصة ندخل في بيت بدون مقدمات وهوب نجي طالعين بالباب التاني ، المهم شفت لي طوب منزل على جمب كده
وبعديه مافي اي مويه.. اتلفت يمين شمال ما شايفه زول في الشارع غيرنا ، طوالي ولا كضبت
رصيت لي كم طوبه كده زي سلم وطلعت بيهن
(ويا ليتني لم افعل) ...
يجي كلب من وين الله اعلم جهجه أفكاري أطلع حارس الطوب منه لله ، وبدون أي ترتيب اتشقلبت
ووقعت من فوق الطوب .. على علو قريب التلات أمتار 😂😂
حسبي الله ونعم الوكيل على دي فكره..
اكلت الوقعه ونفضت عبايتي ع السريع ..

بقيت ماشيه زي الزومبي ، واسب وألعن في
فكرة اختصار الطريق، لو كنت مشيت معاهم وخلاص..
أصلي ما اتكلمت ولا جبت سيره مشيت انتظرتهم جمب آخر بيت في الحله..

وعيني ما تشوف إلا قريب العشره شفع القبيل
قالوا ماشين يلعبوا، خدعونا أولاد ال ..
في لمح البصر اتلغت الرحله الاستكشافية..
ولشنو
عشان الشياطين ديل كما تزعم إحداهن..
المهم بعد نقاش طويل عريض معاهم ومع السيدات ديل وانا في العادي ما بناقش بجدع
بأي شيء في يدي، بس وصلنا لحل يسمعوا
كلامنا وما يمشو مننا بعيد ..
مع إنه في أحلامنا، هيعملوا الفي راسهم اكيد..
(إن شاء الله يسكهم الكلب القطع قلبي وكسر كراعي.)..

ماشين اكتر من خمسه نِمر والشفع ديل دابي فيهم
النشاط تقول صراصير ولا اتأثروا بالمسافه بالعكس
كل ما نمشي شويه يزيدوا همة..!
(للأسف النِمره دي حاجة انا زاتي ما عارفاها تشرح كيف، غايتو مسافه بعيده 😂💔)

المهم اقترحت عليهم بدل ما نمشي المكان البعيد
عندنا زراعه في نمره سته وإحنا اصلا وصلناها نشوفا هي وخلاص ..

وقفن مسافه يتشاورن ، كأنهن فاهمات شيء في الزراعه غايتو نسوان الله يصبرهن على انفسهن😂😂.

كان منظر رهيييب الخضره مغطيه كل شيء والاجواء تحس أنك في هولندا وفي بقرات كده
بالشارع حاجه في منتهي الريفيه😂 .

والاظرف كل واحده تصور في المكان والحيوانات اللافه..
اي صورن ما جايات من برلين انتن😂🔥

الغنمايات ديل الواحده مرات تاكل معاها في نفس
الصينيه..
ولا الشفع عاملين رعب لحمير الحله..
غايتو سبحان الله مسافه أقل من كيلو خلتهم
يتصرفوا تصرفات غريبه، لمن شكيت في المكان
يكون مسكون..

قمت حكيت ليهم قصة من وحي الخيال ونسبتها
لواحد من أصدقاء خالي المجهولين..
مضمون القصة إنه صاحب خالي ال ما عارفه إسمه
بالضبط قال لخالي عن الحصل معاه في المكان ده..
وبالصدفة هم زارعين جمبهم😂

خليتهم يتطقشوا كبار وصغار وجري الشارع
قلت ليهم اصلا قال الحادثه حصلت ليه في الشارع بره هنا وتمينا الجريه لمن بعدنا😂😂😂

اصلا بعد بياختهم دي الواحد يستكشف شجاعتهم
بدل العبط الحاصل😂🔥
في شافع وقع مرتين ولسه جاري..
وآيه اتدردقت لما ما لقت مفر واصلت تدردق تاني😂😂

اي تستاهلو وغلطان البجي معاكم تاني..
رجعنا مع مغيب الشمس نفسنا مقطوع والشفع
ما بتقدر تعرف الولد من البت من الطين والتراب😂😂💔
كده تبقى رحله استكشافية جد جد😂😂
غايتو ما في زول أستمتع زيي انتقمت وقعتي فيهم 😂😂
وحكيت ليهم بيها ،دخلنا الحله وأصوات الضحكات
ما أحلاها .. 🔥❤

وبحبك يا بلدي💜

#مريم_محمد

الليلة لاقيتو ملئ السرور قلبي وبي اسمو ناديتو ❤️💃🔥

اللهم أخرجني من حولي وقوتي إلى حولك وقوتك.

.♥️

ترتدي الأسود صاحبة الروح الملونة ❤️.

اللهم ان لي عزيزة علي قلبي اصابها مرض وتعلم رضاها بقضائك وحمدها لك اللهم عجل بشفائها واجعل ما اصابها تطهيراً لها يارب العالمين❤️.

اللهُم رب الناس اذهب البأس اشفي انت الشافي شفاء لايغادر سقما.

اللهم اشفِ كل مريض لا يعلم بحاله الا انت ، اللهم اشفي مرضانا و مرضى المسلمين❤️.

نتفق انو الشاي بنعناع ازبط بمية مره من الشاي بلبن 😂🌚

لما اقلق على احد بدعي ليو، ولما بشتاق لزول بدعي ليو ، بحس إن الدُعاء دا حاجة كبيرة جدًا وأهم وأعظم حاجة أقدر أقدمها ♥️

لا حرم اللهُ صاحبًا من لُقيا صاحبِه 🍃

من كان يظن أنه سيبتهج بعدما كان لا أثر للسرور في صدره .
‏-يقرأ سورة البقرة يومياً ❤️.

كوُنوا مّلاذ اللطف العالم سيء بما يكفي.

أمس و أنا بتونس مع الفرد قالو لي : " لا عندڪ واتس ولا فيس ولا أنستا .. ما بتسجر ما بتسف وما بتشرب شيشة .. م عندڪ حبيبة و ما متزوج ..
ما بتحضر مصارعة ولا ڪورة غير لمانشيستر يونايتد وما عندڪ علاقة بالتلفزيون نهائي..
عايش حياتڪ ڪيف إنت عليڪ الله🤯 ؟!".

أنا : التعود بس والله و بقي شيء طبيعي😂
مخي و قلبي : ...

القناة ريحتها بقت بنات بنات مش ؟!

اللهم اني اسألك ان تاخذ بيدي من الضلال الى الرشد وان تنجيني من الضيق والنكد !♥️♥️♥️ .