#قصص_الأنبياء(٢)
#السيرة_النبوية
#الحلقة_الثامنة_والتسعون
#أحداث_السنة_الخامسة_من_الهجرة
#الحجاب_في_الإسلام

وقفنا المرة إللي فاتت عند سؤال مهم بعد ما اتكلمنا عن نزول آية الحجاب، السؤال كان:
هل الحجاب خاص بزوجات رسول الله ﷺ فقط وباقي النساء لأ،
لكن قبل ما نعرف إجابة السؤال ده، في موقف حصل بين عمر بن الخطاب وسوْدة زوجة رسول الله ﷺ،
بعد نزول آية الحجاب ولبس زوجات رسول الله ﷺ الحجاب الكامل إللي بيغطي وجههم وإيدهم،
خرجت سوْدة بنت زمعة لقضاء الحاجة، وهم مكنش عندهم حمامات زي عندنا،
فكانت النساء يخرجن مرة واحدة كل يوم بالليل لقضاء الحاجة،
وهي خارجة شافها عمر بن الخطاب رضي الله عنه وعرفها لأنها كانت طويلة وجسِيمة يعني جسمها مليان فكان إللي يشوفها يعرفها ،فقال لها:
إنك والله يا سودة ما تخفين علينا فانظري كيف تخرجين!
يعني احنا عارفينك حتى لو لابسة الحجاب فمتخرجيش،
عمر بن الخطاب من غيرته على محارم رسول الله ﷺ مكنش عايز نسائه يخرجن من البيت إطلاقا،
وعمر كان معروف عنه الغيرة الشديدة

رجعت سودة وراحت لرسول الله ﷺ وكان في بيت عائشة رضي الله عنها بيتعشى، فقالت له عن إللي قاله لها عمر
فنزل الوحي في اللحظة دي فقال لها رسول الله ﷺ :
إن الله قد أَذِنَ لكُنّ أن تخرجنَ لحاجتكنّ👌

☆ عمر بن الخطاب رضي الله عنه كان عايز حتى يحجب شخوص زوجات رسول الله ﷺ ، يعني حتى هيأتها تكون محجوبة مش مجرد لابسة حجاب يغطيها وبس، للمبالغة لهن في السّتر، لكن ده هيبقى فيه مشقة وضرر عليهن،
عشان كده ربنا أنزل التخفيف عليهن،
يبقى حجاب زوجات رسول الله ﷺ دلوقتي هو:
تغطية كل الجسد حتى الوجه والكفين، وحتى في وقت الشهادة لا يجوز لهن كشف وجوههن ولا في غيرها،
وفي بعض أقوال العلماء إنهن لا يجوز لهن إظهار شخوصهن يعني هيأتهن إلا لضرورة حتى لو لابسين الحجاب الكامل.
إلا لضرورة، زي الحج والعمرة والخروج للخلاء وغيرها من الضرورات،
ولمّا كانت بعض زوجات رسول الله ﷺ بتقعد تحدث الناس بأحاديث رسول الله ﷺ كانت تحدثهم من وراء حجاب، بيكون بينها وبينهم ساتر يعني،
مكنوش بيقعدوا كده وش لوش ويكلموهن،
حتى لما زينب بنت جحش زوجة رسول الله ﷺ ماتت بعدين عملوا لها زي قُبة كده عليها وهي متكفنة عشان هيأتها متبنش وهم رايحين يدفنوها،
وكان الصحابة لا ينظرون إلى زوجات رسول الله ﷺ من بعد نزول آية الحجاب حتى لو كانت أمهات المؤمنين بحجابهن الكامل،
متخيلين إن كل ده بين الصحابة وأمهات المؤمنين😓

◇نرجع للسؤال بتاعنا، هل الحجاب خاص بزوجات رسول الله ﷺ فقط وباقي النساء لأ😊

شوفوا، عندنا قاعدة في الدين الإسلامي بتقول:
"الأصل في خطابِ الشرع العموم، إلا إذا دلّ الدليلُ على تخصيص ذلك الخِطاب"
يعني لما ييجي حكم شرعي مُوجه لشخص معين، ده معناه إن الكلام لكوووول الناس إلا لو الشرع قال باستثناء كذا،
لما ربنا يقول لرسول الله ﷺ:
"يَا أَيُّهَا النَّبِيُّ اتَّقِ اللَّهَ "
هل الكلام موجه لرسول الله ﷺ فقط، هل في الكلام دليل إن رسول الله ﷺ هو إللي يتقّ الله فقط،
لأ...الكلام مُوجه لرسول الله ﷺ ولينا احنا كمان👌

فلما ربنا يقول عن زوجات رسول الله ﷺ:
"وَإِذَا سَأَلْتُمُوهُنَّ مَتَاعًا فَاسْأَلُوهُنَّ مِن وَرَاءِ حِجَابٍ ۚ ذَٰلِكُمْ أَطْهَرُ لِقُلُوبِكُمْ وَقُلُوبِهِنَّ ۚ"
فالكلام عن زوجات رسول الله ﷺ وبرده عن كل نساء الأمة،
يعني لما الرجل ييجي يطلب من زوجة الرسول ﷺ شيء أو يسألها عن شيء يكون الكلام من وراء حجاب ...من وراء ساتر،
ولما الرجل ييجي يطلب شيء أو يستفسر عن شيء من أي امرأة مش من محارمه يجب إنه يكلمها من وراء حجاب...من وراء ساتر،
ونفس المعنى ده بالضبط كده قوله تعالى:
"وَقَرْنَ فِي بُيُوتِكُنَّ"
《هنتكلم عنه بالتفصيل بعد شوية إن شاء الله》

والسبب في وجود حجاب بين الرجل والمرأة زي ما ربنا قال:
"ذَٰلِكُمْ أَطْهَرُ لِقُلُوبِكُمْ وَقُلُوبِهِنَّ ۚ"
وطبعا مفيش أطهر من قلوب الصحابة ولا قلوب زوجات رسول الله ﷺ إللي هم أمهات المؤمنين ومحرمين عليهم زي أمهاتهم الحقيقيين بالضبط👌
فما بالنا بالرجال والنساء من بعدهم، مين أوْلى إنه يكلم النساء من وراء حجاب😕
الصحابة إللي ربنا شهد لهم بأنهم أفضل البشر بعد الأنبياء ولاّ الناس العادية إللي أقل منهم في طهارة القلب💁‍♂️

وده كان النوع الأول من الحجاب : حجاب البيت ، يعني زوجات رسول الله ﷺ والصحابيات وأي امرأة مسلمة هتيجي بعدهن،
لما حد ييجي البيت ويطلب حاجة أو يستفسر عن حاجة الكلام يكون من وراء ساتر..سواء كان ستارة أو باب، أي حاجة ساترة بين الاتنين،

طيب وخارج البيت المرأة هيبقى وضعها إيه
ربنا أنزل آية تانية توضح وضع المرأة خارج البيت تلبس إيه، سواء زوجات رسول الله ﷺ أو بناته أو نساء المؤمنين بصفة عامة، قال تعالى:
"يَا أَيُّهَا النَّبِيُّ قُل لِّأَزْوَاجِكَ وَبَنَاتِكَ وَنِسَاءِ الْمُؤْمِنِينَ يُدْنِينَ عَلَيْهِنَّ مِن جَلَابِيبِهِنَّ ۚ ذَٰلِكَ أَدْنَىٰ أَن يُعْرَفْنَ فَلَا يُؤْذَيْنَ "

يعني ربنا بيأمر رسول الله ﷺ إنه يأمر زوجاته وبناته ونساء المؤمنين بأنهن يغطين ويسترن وجوههن وجميع أجسادهن ويغطين الزينة عن الرجال من غير المحارم، عن طريق لبس الجلباب،
والجلباب ده عبارة عن عباءة تلبسها المرأة من رأسها وتنزل على باقي الجسم تغطيه كله، وده تعريف الجلباب في لسان العرب،
والتغطية دي عشان محدش يتعرض لهن بأذى، لأن كان في ناس من المنافقين والفُساق بيتعرضوا لزوجات رسول الله ﷺ وللمؤمنات بالأذى لما كانوا بيخرجوا لقضاء الحاجة في الليل،
فلما الصحابة كلموهم، قالوا احنا بنعمل كده للإماء منقصدش😒
فنزلت آية الحجاب لزوجات رسول الله ﷺ ونساء المؤمنين، فحصل التفرقة بين الحرة وبين الأَمة،

☆طبعا هنا سؤال مهم جدا👌
هو ليه التفريق بين الأَمة والحُرة في الحجاب أصلا، هي الأمة دي مش امرأة لا يجوز إيذاؤها زيها زي الحرة😕

الأصل في الحجاب إنه للحرائر، لكن الإماء ومِلك اليمين لا يتشبهن بالحرائر في الحجاب الكامل،
فالأَمة في عصر رسول الله ﷺ كان المتعارف عليه وكان حاجة عادية إنهن ممتهنات للخدمة وده الغالب عليهن،
وفرض الحجاب على الإماء كان هيبقى في مشقة كبيرة جدا عليهن،
فربنا وضع عنهن الحجاب شفقة بهن، فيجوز كشف رأسها ويديها ووجها،
عارفين، بن كثير بيقول في تفسير آية :
"ذَٰلِكَ أَدْنَىٰ أَن يُعْرَفْنَ فَلَا يُؤْذَيْنَ"
"أي إذا فعلنَ ذلكَ عُرِفْن أنهنّ حرائر، لسْنَ بإماءٍ ولا عَوَاهِر"
يعني لما المرأة تلبس الجلباب يتعرف عنها إنها حرة مش أَمة ولا عاهرة،
متخيلين المأساة إللي احنا وصلنا لها في عصرنا 😓

شوفوا بقى مع كل ده، فمفيش دليل من القرآن والسنة على إباحة النظر إلى عامة الإِماء، يعني مفيش حاجة بتقول إنه يجوز للرجل إنه ينظر للإماء، ولا في دليل إنهن يتركن الحجاب، ويُظهرن زينتهن،
الفرق بس إن القرآن لم يأمرهن بنفس إللي أمر به الحرائر،
هو أه في تفريق، بس زي ما قلنا التفريق عشان ميكونش عليهم مشقة، أما لو في فتنة فحكمهن زي الحرائر👌
وكان عمر الخطاب بيضرب الأمة إذا احتجبت زي الحرة ويُسقط عنها الحجاب، لأنها تشبهت بالحرائر،
وطبعا ده فيه مفسدة تانية،
وهي إن أخلاق الإماء كانت مختلفة عن أخلاق الحرائر،
فتخيلوا لو الأمة لبست الحجاب الكامل وعملت حاجات سيئة،
هتبقى شبهة لكل واحدة لابسة الحجاب الكامل من الحرائر، لكن زي ما قلنا إذا مكنش فيهن فتنة👌


نرجع بقى لرسول الله ﷺ،
رسول الله ﷺ بلّغ زوجاته وبناته وقرأ الآية على الصحابة والصحابة راحوا بلغوا الآيات لنسائهن،
زوجات رسول الله ﷺ وبناته لبسوا الحجاب الكامل إللي يغطي كامل جسدهن خلاص،
الصحابيات عملوا إيه بقى؟
نساء الأنصار خرجن للصلاة خلف رسول الله ﷺ لابسين ملابس سوداء نازلة من الرأس للقدم كأن على رؤوسهن الغربان من السكينة،
كلهن فهِمن الآية بنفس المعنى، ولبسن نفس اللون،
وصلّين خلف رسول الله ﷺ ورآهن رسول الله ﷺ ولم يُنكر على أي واحدة فيهن إنها مثلا فهمت الآية غلط أو طلب منهن إنهن يغيرن الملابس إللي لابسينها لأن مش هي الملابس المقصودة سواء في الشكل أو في اللون👌


◇طيب احنا اتكلمنا عن لبس الصحابيات وهم خارجين من بيوتهن، طيب إيه موضوع وقرن في بيوتكن🤔

آية وقرن في بيوتكن هي في الأصل مُوجهة لزوجات رسول الله ﷺ، وبالتالي موجهة لنساء المسلمين بصفة عامة لأن مفيش دليل بيقول عكس كده، زي ما شرحنا في البداية

فالأصل إن المرأة تقعد في البيت وتحرص إنها متخرجش من البيت إلا لضرورة حسب حاجتها وكل واحد أدرى بحاله وإيه الضروري بالنسبة له👌
ولما تخرج من البيت خروجها يكون بضوابط معينة،
زي مثلا إنها متختلطش بالرجال،
ورسول الله ﷺ نفسه كان حريص إنه يباعد بين الرجال والنساء حتى في المسجد وفي الطريق👌
يعني كان الرجال لما يصلوا يكونوا هم في مقدمة المسجد والنساء في آخره،
وكان ﷺ بعد ما يسلم من الصلاة يستنى شوية والرجال معاه عشان النساء تمشي الأول وميحصلش اختلاط بين الرجال والنساء بعد الصلاة وهم ماشيين،
حتى يوم العيد كانت النساء بتصلي في ناحية والرجال في ناحية،
وبعد الصلاة كان رسول الله ﷺ يخطب في الرجال خطبة العيد لوحدهم، وبعدين يروح للنساء يخطب عندهم خطبة تانية لهم،
وقال رسول الله ﷺ للنساء لما اختلطوا بالرجال في الطريق:
"اسْتَأْخِرْنَ ، فَإِنَّهُ لَيْسَ لَكُنَّ أَنْ تَحْقُقْنَ الطَّرِيقَ ، عَلَيْكُنَّ بِحَافَّاتِ الطَّرِيقِ،
فَكَانَتْ الْمَرْأَةُ تَلْتَصِقُ بِالْجِدَارِ حَتَّى إِنَّ ثَوْبَهَا لَيَتَعَلَّقُ بِالْجِدَارِ مِنْ لُصُوقِهَا بِهِ"
وقال: " ليس للنساء وسَط الطريق"

وكانت المرأه في الجاهليه بتمشي وسط الرجال وتحط حتة قماشه على شعرها
وساعات تظهر ضفائر شعرها والحلَق بتاعها من القماش دي ،
وطبعا رقبتها ظاهرة وصدرها باين، وتمشي كده وسط الرجال،
فجاء القرآن وأمر النساء بوضع جلابيبهن بصورة يغطين بها أجسادهن كاملة زي ما قلنا من شوية،

والمرأة في الجاهلية كانت لما تمشي وفي رجلها خلخال صامت فتقوم تضرب الأرض برجلها عشان يعمل صوت وتلفت الرجال إليها لما يسمعوا صوت رنة الخلخال،
فنهى الله النساء المؤمنات إنهم يعملوا زي النساء في الجاهلية،
ويدخل في النهي ده لو المرأة عملت أي حركة مُتعمدة عشان تبين الزينة إللي مش ظاهرة،
يعني لابسة سلسلة لابسة خاتم لابسة عباية مطرزة من فوق والخمار مغطي كل ده،
فتقوم عاملة أي حركة وهي متعمدة عشان تظهر الزينة دي للرجال فده لا يجوز وحكمها زي حكم إللي بتضرب برجلها في الأرض كده👌
رسول الله ﷺ كان حريص جدا إنه يفصل الرجال عن النساء ويبعدهم عنهم وكان دائما يحذرهم من النساء،
قال :
"إِيَّاكُمْ وَالدُّخُولَ عَلَى النِّسَاءِ"
والدخول هنا معناه إن الرجل يقعد مع المرأة من غير محارمه بغير حجاب شرعي أو يبقى فيه خُلوة بينهم، يعني يقعدوا مع بعض لوحدهم،
ولو المرأة بحجاب شرعي مينفعش الرجل يقعد معاها لوحدهم لو هو مش من محارمها،
"لا يخلون رجل بامرأة ، فإن الشيطان ثالثهما"
"لاَ يَخْلونَّ رَجُلٌ بِامْرَأةٍ إِلاَّ وَمَعَها ذُو مَحْرَم"

☆طب لو مفيش مَحرم للمرأة، تعمل إيه لو 《اضطرت》 لموقف هتكون فيه مع رجل لوحدها 🤔
تشوف امرأة تثق فيها تكون معاها وبكده مش هيبقى في خلوة، لكن الرجل إللي هيكونوا معاه ده يكون مأمون الجانب ميتخفش منه إنه يغلب المرأتين على أنفسهما👌

☆طيب وأقارب الزوج🤔
لما رسول الله ﷺ قال إياكم والدخول على النساء، واحد من الصحابة قال له :أرأيت الحَمْو؟
قال له رسول الله ﷺ: الحَمْوُ الموت👌
يعني رسول الله ﷺ بيقول أكثر ناس تخاف منهم هم أقارب الزوج، وتتوقع الفتنة والشر من ناحيتهم أكثر لأنه يقدر يوصل للمرأة أكثر من الرجل الأجنبي من غير ما حد ينكر عليه،
يعني مش بتسمعوا إللي بيقول عادي إقلعي النقاب قصاد أخو زوجك ده زي أخوكِ،
حتى الزوج نفسه ساعات بيتخانق ويرفض إن زوجته تلبس نقاب عشان اخواته، أو يشترط عليها إنها لو لبسته تقلعه قصاد اخواته الرجال أو أقاربه،
فعادة الناس إنهم بيتساهلوا في موضوع أقارب الزوج وتلاقوا الرجل يقعد مع زوجة أخوه لوحدهم عادي ومحدش ينكر عليهم، بعكس لو واحد من الشارع جه ودخل مش هيسمحوا بكده🤷‍♂️
فرسول الله ﷺ جعل أقارب الزوج من غير المحارم زي الموت كده، الواحد يحترس منهم لأن الشر والفتنة منهم أقرب👌


◇طيب مين هم بالضبط🤔
أي حد من أقارب الزوج من غير المحارم بالنسبة للمرأة يبقى مينفعش تقعد معاهم وتهزر وتكشف حجابها، ويكون بينهم خلوة👌
قعادها معاهم يكون وسط الاهل وبحجاب شرعي كامل

محارم الزوج بالنسبة للمرأة بقى هم :
أبو الزوج وجده لأمه أو أبيه سواء من النسب أو الرضاع، وأبناء الزوج لو له أبناء من زوجة تانية سواء من النسب أو من الرضاع غير كده يبقوا مش من محارم الزوجة 👌

☆طيب هو ليه التضييق على النساء كده، يعني هم سبب البلاوي إللي بتحصل دي مثلا😞

هنعرف إجابة السؤال ده المرة الجاية إن شاء الله 😊



#السيرة_النبوية
#ايمان_شلبي

🎧 أذكار المساء
بصوت الشيخ /
مشاري بن راشد العفاسي

كل هذا الظلم سيزول،

‏وكل هذه الوجوه القبيحة المستعلنة بشرّها سترى حسرتها في الدنيا قبل الآخرة، بإذن الله تعالى.
‏فالله حيّ قيوم لا يموت، وقد أمهل هؤلاء المجرمين وحلم عليهم، حتى غرهم حلمه، وهو سبحانه قد أذاق أسلافهم من المجرمين والظالمين ما كان فيه عبرة للمعتبرين، فلم يعتبروا، فلينتظروا العاقبة.

‏وهذه الأمة التي اجتهد المجرمون لتغييبها وتقييدها وإلهائها ستصحو وتنهض وتغمر بسيولها الأرجاء.

‏والمصلحون الذين حوربوا وأوذوا وشُوهت صفحتهم البيضاء وافتُري عليهم فقابلوا ذلك بالصبر والتقوى والثبات سيرفع الله شأنهم ويغيظ أعداءهم.

‏والله غالب على أمره ولكن أكثر الناس لا يعلمون

يا من تحمل هم دينك وإخوانك:

لا تجعل هذه الجراح تكسر ظهرك،
لا تيأس، ولا تستجب لرغبة عدوك في هزيمتك،
أنت الكنز من بين هذا الغثاء فلا تنكسر ولا تسقط،
هذا زمن اليقين والصبر والثبات والعمل؛ فلا تشكّ في وعد الله وقدرته وعظمته وتدبيره وحكمته.

مسؤوليتك أن تربي ولدك على العزّة والكرامة وحمل هم الإسلام وأن تجعل من أهم أهدافه المستقبلية: نصرة الإسلام والمسلمين.

إياك والتخلي عن هذه المسؤولية.

#علمتني_أمي_عائشة(٣٢)


أقسم النبي صلى الله عليه وسلم أقسم يدخل على زوجاته شهرا عقب مشكلة حدثت بينه وبينهن.

-مر تسع وعشرون ليلة ثم إذا بالنبي صلى الله عليه وسلم يدخل على زوجاته وبدأ بعائشة فماذا فعلت  أمنا عائشة حينذاك؟


لقد خاطبت أمنا عائشة النبي صلى الله عليه وسلم قائلة:

"يا رَسولَ اللهِ، إنَّكَ أَقْسَمْتَ أَنْ لا تَدْخُلَ عَلَيْنَا شَهْرًا، وإنَّكَ دَخَلْتَ مِن تِسْعٍ وَعِشْرِينَ أَعُدُّهُنَّ، فَقالَ: إنَّ الشَّهْرَ تِسْعٌ وَعِشْرُونَ." صحيح مسلم


- في هذا المشهد نرى أن أمنا عائشة رغم حبها الشديد للنبي صلى الله عليه و سلم واشتياقها له إلا أنها قدمت حق الله على مشاعرها واحتياجاتها.

كانت تظن أن الشهر لم ينته بعد فذكرت النبي بذلك مخاطبة إياه برسول الله فالموقف هنا يستدعي الخطاب والتذكير بكونه رسول الله صلى الله عليه وسلم.

لم ينسها حبها للنبي وشدة اشتياقها له حق ربها، فماذا عنك أنت أيتها الزوجة المسلمة؟

🔺هل تقدمين رضا زوجك على رضا ربك؟

🔺هل تقعين في بعض المحرمات لأنك تحبين زوجك و لا تتحملين أن ترفضين له طلبا  حتى لو كان هذا الأمر لا يحبه الله ولا يرضاه؟

⚠️ إن كنت كذلك فتوبي إلى ربك وابدئي حياة جديدة مع زوجك شعارها إرضاء الله أولا، وشعارها كذلك:  "ما عند الله لا ينال بمعصية الله"

رضا الجنيدي

✍️كلنا راحلون ويبقى الأثر. فلنترك أثرا قبل الرحيل

#قصص_الأنبياء(٢)
#السيرة_النبوية
#الحلقة_التاسعة_والتسعون
#أحداث_السنة_الخامسة_من_الهجرة
#لماذا_النساء

اتكلمنا المرة إللي فاتت عن الحجاب في الإسلام وعن وضع المرأة لمّا تخرج من البيت تبقى لابسة إيه وتمشي إزاي،
وشوفنا تحذير رسول الله ﷺ من الدخول على النساء،
وفي أحاديث تانية لرسول الله ﷺ وهو بيحذر الصحابة وبيحذر الرجال من بعدهم من النساء،
قال :
" المرأةُ عورةٌ ، وإنها إذا خرجت من بيتِها استشرفها الشيطانُ ، و إنها لا تكون أقربَ إلى اللهِ منها في قَعْرِ بيتِها"

يعني يجب تغطية المرأة زي ما بنغطي العورة كده، ومحدش يشوفها من غير المحارم، فهي يجب أن تُحفظ وتُصان،
ومش معنى الكلام إن المراة دي حاجة وحشة
زي ما كارهي الإسلام بيقولوا🙄

طيب مثلا السكّينة، بنبعدها خااالص عن الأطفال عشان لو شافوها وقدروا يوصلوا لها هتضرهم وتؤذيهم،
فالسكينة نفسها مش وحشة ومنقدرش نستغنى عنها ،لكن وجودها مع الشخص الغلط هو إللي مُضر
كذلك المرأة، المرأة مش حاجة سيئة عشان كده لازم نخبيها، المرأة بنبعدها وبنخفيها عن الأشخاص الغلط إللي هيسيؤوا لها أو يُسيؤوا استخدامها،
ومن الأشخاص دول الشيطان، قاعد لها بالمرصاد مستنيها تخرج، وأول ما تخرج من بيتها بيزينها في نظر الرجال فيوقعهم هم الاتنين في الفتنة،
المرأة أقرب ما تكون إلى الله وهي في قعر بيتها، شايفين الوصف، بيقول قعر البيت...يعني جوة أوي في العمق،
وبكده هتاخد أعظم أجر وثواب، والحديث ده بيشجع المرأة إنها متخرجش إلا لضرورة 👌

☆وطبعا ده يشمل تنزيل المرأة صورها على مواقع التواصل، زي الفيس وغيره🙂
ماهو إزاي في قعر بيتها وهي منزلة صورها الرايح والجاي يشوفها، دي سيئات جارية مش طاعة أبدا ،والكلام ده حتى لو لابسة نقاب يا جماعة لأن الأصل في النساء الستر👌

نرجع لحديث تاني لرسول الله ﷺ بيحذر فيها من فتنة النساء قوله:
" إنّ الدنيا حُلْوة خَضِرة، وإن الله مستخلِفَكم فيها فينظر كيف تعملون،
فاتقوا الدنيا واتقوا النساء، فإن أول فتنة بني إسرائيل كانت في النساء"

ربنا جعلنا في الدنيا دي عشان نشوف هنعمل إيه، هل هتبقى هي أكبر همنا ويغلب علينا الطمع ويقتل بعضنا بعض من أجلها، ونصرف أوقاتنا كلها على الدنيا،
ولا هنتقي الله ونأخذ منها ما يعيننا على طاعة الله، وهو ده إللي يقصده رسول الله ﷺ لما قال اتقوا الدنيا،
يعني خافوا من الدنيا وإنها تشغلكم عن عبادة الله، خذوا منها إللي يكفيكم بدون إفراط ولا تفريط، ومن الدنيا دي أكتر حاجة تخافوا منها وتبعدوا عنها النساء👌
"زُيِّنَ لِلنَّاسِ حُبُّ الشَّهَوَاتِ مِنَ النِّسَاءِ "
وقال رسول الله ﷺ:
"مَا تَرَكْتُ بَعْدِي فِتْنَةً أَضَرَّ عَلَى الرِّجَالِ مِنْ النِّسَاءِ"
وبداية الفساد في بني اسرائيل كان في النساء، كان الأغنياء بينفقوا أموالهم على المظاهر، ملابس وحُلي والأكل، وأموال كثيرة جدا بتتصرف على الزواج،

فانشغل بنو إسرائيل في ملاهي الدنيا بسبب المظاهر إللي بتكلف أموال كثيرة وضاع بينهم الدين،

◇كل الكلام ده هياخدنا للسؤال إللي قلناه في آخر الجزء إللي فات: ليه التضييق على النساء كده؟ وهل هم سبب كل البلاوي إللي بتحصل دي مثلا😓


طيب هو مين إللي خلقنا، مش ربنا، هو حط لنا منهج معين نمشي عليه لأن هو أعلم إيه المناسب للخلق إللي خلقه:
"أَلَا يَعْلَمُ مَنْ خَلَقَ وَهُوَ اللَّطِيفُ الْخَبِيرُ"
وحذرنا إن إللي هيعمل عكس المنهج ده حياته هتبوظ وهتبقى ضنك، فييجي بقى شياطين الإنس والجن يقولوا لا لا المنهج ده غلط وإيه التعقيدات والتشدد ده😤
وانتم عايزين تدفنوا النساء بالحياة، وإيه عورة دي هي المرأة حاجة بتستعروا منها عشان تغطوها،
وانتم بتسلبوا حريتها في إنها تقرر شؤون حياتها متخلوها تسافر وتقعد مع رجالة لوحدها دي بمائة راجل،
ولا انتم مش واثقين فيها، أيوة بقى قولوا إنكم مش واثقين فيها يا أعداء التحضر والمدنية...إلى آخره من الكلام ده😑
"وَيُرِيدُ الَّذِينَ يَتَّبِعُونَ الشَّهَوَاتِ أَنْ تَمِيلُوا مَيْلا عَظِيمً"

ناس مشيت ورا الشياطين دول والنتيجة كانت إيه 🙂
الحياة باظت زي ما ربنا حذرنا👌
انتشر جدا الحب والعشق المحرم والاغتصاب والزنا والانتحار والقتل ده غير الأطفال المولودين من الزنا، ومعاصي ملهاش أول من آخر،
حطينا البنزين جنب النار فحصل الانفجار🙃
ربنا خلق الرجل يميل للمرأ وخلق المرأة تميل للرجل.
وجعل بينهم الميل ده عشان الحياة البشرية تستمر على الأرض عن طريق الزواج الشرعي،
ولأن ربنا إللي خلقنا يعلم ضعف الرجال والنساء لما بيكونوا قريبين من بعض عمل لنا حدود معينة منعديهاش عشان ميحصلناش ضرر،
زي ما قلنا مثال السكّينة من شوية، منقدرش نستغنى عنها فلازم إللي يستخدمها يستخدمها صح وإلا هتضره🤷‍♂️
كذلك الرجل ضعيف أمام النساء، هو خلقته كده، فلازم نبعد النساء عن الرجال حتى رسول الله ﷺ نفسه قال:
"مَا رَأَيْتُ مِنْ نَاقِصَاتِ عَقْلٍ وَدِينٍ أَذْهَبَ لِلُبِّ الرَّجُلِ الحَازِمِ مِنْكُن"

يعني مش أي رجل ، ده الرجل الحازم إللي الناس تعمل له ألف حساب، المرأة تاكل بعقله حلاوة من شدة تأثيرها عليه🙂
يبقى حاجة خطيرة للدرجة دي ينفع نسيبها كده ومناخدش احتياطاتنا😕
طبعا لأ، عشانا كده ربنا وضع قوانين محددة للنساء عشان متفتنش الرجال وفي نفس الوقت متعرضش نفسها للخطر،

☆هل ده معناه بقى إن المرأة هي سبب كل البلاوي😑

شوفوا، المرأة بتكون سبب البلاوي لما تتعدى الحدود إللي ربنا وضعها لها،
والرجل بيكون سبب البلاوي لما بيتعدى الحدود إللي ربنا وضعها له 🙁
لو كانت هي السبب في فتنة رجل سواء بقول أو فعل أو ملابس، أو أي شيء فهي هتتحمل ذنب فتنته،
غير كده مش فهي ملهاش أي ذنب في حاجة🤷‍♂️

☆وبما إننا بنتكلم عن النساء، ففي سؤال محير نساء كتير وهو:
اشمعنى النساء إللي دايما بيتقال عنهم إنهن الفساق وأكثر أهل النار،
وإنهن لا يصبرن ولا يشكرن ، مع إن في رجال فيهم الصفات دي، والرجال بيعملوا ذنوب أكبر من كده زي القتل والظلم وإثارة الحروب😓

براحة كده وواحدة واحدة😁
قال رسول الله ﷺ: " إِنَّ الْفُسَّاقَ هُمْ أَهْلُ النَّارِ "
قِيلَ: يَا رَسُولَ اللهِ، وَمَنِ الْفُسَّاقُ؟
قَالَ: 《النِّسَاءُ 》
قَالَ رَجُلٌ : يَا رَسُولَ اللهِ، أَوَلَسْنَ أُمَّهَاتِنَا، وَأَخَوَاتِنَا، وَأَزْوَاجَنَا؟ قَالَ: "بَلَى، وَلَكِنَّهُنّ إِذَا أُعْطِينَ لَمْ يَشْكُرْنَ، وَإِذَا ابْتُلِينَ لَمْ يَصْبِرْنَ "
مش المقصود من الحديث ذم عموم النساء، لكن المقصود التحذير من الفعل ده ومعرفة جزاء إللي هيعمل كده يوم القيامة عشان العاقل ياخد باله وميقعش في الغلط ده👌
لكن لو مثلا إذا أُعطي رجل ولم يشكر، وإذا حصل له بلاء ولم يصبر، مش هيبقى حكمه زي النساء؟!
هيبقى نفس الحكم طبعا ، لأن ربنا مش بيحاسب على مين عمل الفعل لكن بيحاسب على الفعل نفسه👌
لكن تخصيص النساء بالكلام لأن الأخلاق دي غالبة عليهن، والأخلاق دي أقل في الرجال، فرسول الله ﷺ لما اتكلم عن الوعيد كان بيتكلم عن الأغلبية،
حتى في حديث تاني بيوضح المعنى ده رسول الله ﷺ بيقول فيه: "إِنَّ التُّجَّارَ هُمُ الْفُجَّارُ"
فقَالَ رَجُلٌ: يَا نَبِيَّ اللهِ أَلَمْ يُحِلَّ اللهُ الْبَيْعَ؟
قَالَ: "إِنَّهُمْ يَقُولُونَ فَيَكْذِبُونَ، وَيَحْلِفُونَ وَيَأْثَمُونَ "
فالذم هنا مش لعموم التجار والصحابة نفسهم كان فيهم تجار، لكن هو بيقول إن الغالب على جنس التجار الفجور والكذب، فبيحذر التجار من الفعل ده عشان يحرصوا على البر في البيع والشراء،
والنساء أكثر أهل النار زي ما رسول الله ﷺ قال:
"يَا مَعْشَرَ النِّسَاءِ، تَصَدَّقْنَ وَأَكْثِرْنَ الِاسْتِغْفَارَ، فَإِنِّي رَأَيْتُكُنَّ أَكْثَرَ أَهْلِ النَّارِ "
فَقَالَتِ امْرَأَةٌ مِنْهُنَّ : وَمَا لَنَا يَا رَسُولَ اللهِ أَكْثَرُ أَهْلِ النَّارِ؟
قَالَ: "تُكْثِرْنَ اللَّعْنَ، وَتَكْفُرْنَ الْعَشِيرَ "

فهو ده الغالب عليهن، كفران العشير واتباع الهوى والميل إلى عاجل زينة الحياة الدنيا، فتضعف المرأة عن عمل الآخرة والاستعداد لها،

وخدوا بالكم إن لو الرجل برده كفَر العشير وأكثر اللعن زي النساء برده هيبقى نفس مصيرهن بالضبط☝🏻
بس الحديث هنا زي ما قلنا بيتكلم عن الأغلبية.
أما موضوع إن الرجال بيعملوا أكثر من كده من إشعال حروب وقتل وظلم، فاللي يعمل كده ربنا هيعاقبه بالعقاب إللي يستحقه وذكره في القرآن أو السنة👌
لكن ده ملوش علاقة بالأحاديث بتاعة النساء،
والجرائم والمعاصي إللي الرجل بيعملها دي جزاؤها مش أقل من جزاء النساء،
لكن الأحاديث بتتكلم عن 《الأكثرية》 مش 《الشّديّة》،
يعني كفران العشير واللعن وعدم الصبر وعدم الشكر ينتشر في النساء 《أكثر》 من الرجال👌

عارفين كمان من الأسباب إللي ممكن تخلي النساء أكثر أهل النار إيه
إن مثلا لو الرجل ظلم زوجته أو آذاها أو...أو...هو عمل حاجة واحدة، المرأة بقى تروح تحكي لصاحبتها، وتحكي لأختها وتحكي لأمها وتحكي لفلانة وعلانة، شوفوا كام مرة اغتابت فيها زوجها،
وكم مرة الناس تعاطفوا معاها وراحوا شاتمينه وغلطوا فيه، وكل ده عداد السيئات شغال للمرأة😶
تخيلوا إن يوم القيامة ممكن الرجل يبجي قصاد ربنا وميتحاسبش وممكن كمان ياخد من حسنات زوجته🙂

فتيجي المرأه يوم القيامة وهي مفكرة نفسها مظلومة وفجأة تلاقي زوجها ده بياخد من حسناتها🙃
خدوا بالكم إن الميزان يوم القيامة بمثاقيل الذر 👌
"وَنَضَعُ الْمَوَازِينَ الْقِسْطَ لِيَوْمِ الْقِيَامَةِ فَلَا تُظْلَمُ نَفْسٌ شَيْئًا ۖ وَإِن كَانَ مِثْقَالَ حَبَّةٍ مِّنْ خَرْدَلٍ أَتَيْنَا بِهَا ۗ وَكَفَىٰ بِنَا حَاسِبِينَ"

فخدوا بالكم ربنا يحفظنا واياكم🤲🏻



#السيرة_النبوية
#ايمان_شلبي

🎧 أذكار المساء
بصوت الشيخ /
مشاري بن راشد العفاسي

#علمتني_أمي_عائشة(٣٣)


" يا رَسولَ اللهِ، إنَّكَ أَقْسَمْتَ أَنْ لا تَدْخُلَ عَلَيْنَا شَهْرًا، وإنَّكَ دَخَلْتَ مِن تِسْعٍ وَعِشْرِينَ أَعُدُّهُنَّ، فَقالَ: إنَّ الشَّهْرَ تِسْعٌ وَعِشْرُونَ." صحيح مسلم


أعدهن !!

🌸 كلمة واحدة عبرت بها أمنا عائشة عن اشتياق الزوجة المحبة لزوجها، وعن شديد حبها له.

🌸 كلمة واحدة كشفت لنا عن حكمة وذكاء الأنثى التي تجعل زوجها بكلماتها الأنثوية الحنون يتناسى ما كان بداخله من ضيق أو حزن أو غير ذلك تجاه ما حدث بينه وبين زوجته من مشكلات.

🌸 كلمة واحدة حملت كل معاني الحب والاشتياق وعدم إعطاء الفرصة للشيطان بأن يتسلل إلى القلوب والعقول والنفوس في لحظات الصفاء.



🌸 لقد علمتنا أمنا عائشة أن نجعل لحظات الصلح أجمل اللحظات، ولا نعكر صفوها بسموم العتاب.

وعلمتنا كذلك كيف نستمتع بحياتنا مع أحبابنا؛ فهنيئا لمن تعلم من أمه وعاش بما تعلمه!


رضا الجنيدي

✍️كلنا راحلون ويبقى الأثر. فلنترك أثرا قبل الرحيل

*رسالة اليوم إليك 💌*

‏صلاة الفجر
يقظة الروح وإشراقة النفس
إنها ترك الوثير لأجل القدير

مكافأة لمن كان في الظلمة مع الله
فينير آخرته بنوره وعفوه ورحمته .

اللهم اجعلنا من المحافظين عليها وأنر بها دنيانا وآخرتنا .
آمين آمين آمين.

💌💌

#رسالة_اليوم