#قصص_الأنبياء(٢)
#السيرة_النبوية
#الحلقة_التاسعة_والأربعون
#استقرار_رسول_الله_في_المدينة

كنا وافقين المرة إللي فاتت عند وصول رسول الله ﷺ ليثرب، وقلنا إن الأنصار كانوا بيخرجوا ينتظروا رسول الله ﷺ كل يوم الصبح لأنهم مكنوش عارفين الوقت إللي هييجي فيه بالضبط،
فكان أول ما الحر يشتد يرجعوا بيوتهم، ففي يوم لما رجعوا بيوتهم، كان في واحد من اليهود موجود فشاف حد جاي من بعيد فبدأ ينادي على الأنصار،
فتجمع الأنصار مرة ثانية وشافوا رسول الله ﷺ وأبو بكر قادمين،
والأنصار مكنوش يعرفوا رسول الله ﷺ ولا شافوه قبل كده، إللي يعرفوه إللي قابلوه في مكة فقط في البيعة

فكانوا بيقولوا هو إللي على اليمين ولا إللي على الشمال🤔
وهما حيرانين كده قام أبو بكر الصديق بتظليل رسول الله ﷺ من الشمس فعرفوا من هو رسول الله ﷺ 😊

أول ما قرب منهم قعدوا يقولوا جاء رسول الله ..جاء نبي الله
وعلى فكره مفيش ولا رواية صحيحة بتقول إن الأنصار استقبلوا رسول الله ﷺ بإنشادهم طلع البدر علينا👌

وفي رواية بتقول إن وصل عدد الأنصار إللي استقبلوا رسول الله ﷺ يصل إلى خمسمائة وكانوا بيحملوا السلاح من باب التشريف والإحتفال به ﷺ،

فدخلوا حدود المدينة في منطقة اسمها قِباء، وأحاط الأنصار بأبي بكر الصديق ورسول الله ﷺ ، والغلمان تفرقوا في الشوارع وقعدوا ينادوا يا محمد يا رسول الله..محمد يا رسول الله!
والنساء والرجال طلعوا فوق البيوت يشوفوا الموكب بتاع رسول الله ﷺ وكانوا فرحانين به جدا،
حتى قال صحابي من الأنصار وهو البراء بن عازب:
أنا مشفتش أهل المدينة فرحوا بحاجة زي فرحهم برسول الله ﷺ

"وَالَّذِينَ تَبَوَّءُوا الدَّارَ وَالْإِيمَانَ مِن قَبْلِهِمْ يُحِبُّونَ مَنْ هَاجَرَ إِلَيْهِمْ وَلَا يَجِدُونَ فِي صُدُورِهِمْ حَاجَةً مِّمَّا أُوتُوا وَيُؤْثِرُونَ عَلَىٰ أَنفُسِهِمْ وَلَوْ كَانَ بِهِمْ خَصَاصَةٌ"
وكان ده في يوم الإثنين الثاني عشر من شهر ربيع الأول للسنة الرابعة عشرة من البعثة.

☆يعني الهجرة كانت في شهر ربيع مش في محرم🤔

الهجرة كانت في شهر ربيع، لكن ابتداء العزم على الهجرة كان في محرم،
لأن بيعة العقبة الثانية كانت في شهر ذي الحجة وأول هلال بعد ذي الحجة هو محرم،
فلما عمر بن الخطاب تولى الخلافة وقالوا عايزين نؤرخ للمسلمين بتاريخ، قالوا نؤرخ من بداية العزم على الهجرة،
فدي كانت بداية التاريخ الإسلامي👍🏻

العجيب إن إزاي الأنصار كانوا فرحانين الفرح ده كله😮
إنتم عارفين معناه إيه دخول رسول الله ﷺ يثرب
معناه إن كل أهل الأرض بقوا أعداء أهل يثرب،
معناه إنهم بيعلنوا الحرب على كل العرب،
معناه العداء المستمر مع اليهود إللي كانوا عايشين معاهم وفي بينهم معاهدات،معناه تضحية وبذل وإنفاق وموت في سبيل الله،
وبرغم كل ده كانوا فرحانين كده😳
الأنصار مكنش همهم أي حاجة، كان همهم الثمن إللي اتفقوا عليه مع رسول الله ﷺ...الجنة😊
بعد دخول رسول الله ﷺ يثرب بقى اسمها
《المدينة النبوية》

دلوقتي رسول الله ﷺ بقى هو حاكم المدينة رسمي، فأول حاجة عملها بعد دخوله المدينة كانت بناء مسجد قباء،
فكان هو مسجد التقوى الذي أُسّس من أول يوم :
"لَّمَسْجِدٌ أُسِّسَ عَلَى التَّقْوَىٰ مِنْ أَوَّلِ يَوْمٍ أَحَقُّ أَن تَقُومَ فِيهِ"

بعد بناء المسجد جاء علي بن أبي طالب رضي الله عنه بعد ما أدى الأمانات، وجاء معه بعض المستضعفين من المسلمين،
وانطلق بعدها رسول الله ﷺ عشان يدخل المدينة،
فكان كل واحد بيحاول يأخذ الناقة إللي كان راكب عليها رسول الله ﷺ ويقولوا تعال عندنا عشان يضيفوه،
فكان يقول لهم اتركوها فإنها مأمورة👌

فضلت الناقة ماشية لحد ما وصلت عند أرض فيها نخل فبركت فيها ، قعدت يعني،فسأل رسول الله ﷺ عن أصحاب الأرض فلقاهم غلامين يتيمين،
فطلب منهم إنه يشتريها، فقالوا خذها يا رسول الله هبة،
فرفض رسول الله ﷺ وقال لازم ندفع ثمنها، فاشتراها منهم من أموال أبي بكر الصديق رضي الله عنه،
وكان أبو بكر الصديق قد أخذ ماله كله معاه في رحلة الهجرة وكان حاطه تحت أمر رسول الله ﷺ،
حتى أبوه سأل حفيدته أسماء : هو أبوكم ساب لكم فلوس أد إيه لما مشي مع محمد🤔
فأسماء رضي الله عنها جابت كيس قماش وحطت جواه حصى وخلت جدها الأعمى يضع يده على الكيس وهي بتقول له : ساب لنا الكيس ده،
فقال لها : والله لو ساب لكم ده يبقى ساب لكم كتير🙁

بعد ما اشتراها رسول الله ﷺ بدأ المسلمون يساووها عشان يبنوا عليها المسجد النبوي،

وكان رسول الله ﷺ بيبني مع الصحابة، مكنش قاعد يتفرج من غير ما يساعد، وهو ده القائد الحقيقي،
القائد هو إللي يشارك جنوده في العمل مش يقعد يتفرج عليهم وهم بيشتغلوا😑
خلال فترة بناء المسجد كان رسول الله ﷺ يسكن في بيت أبو أيوب الأنصاري لأن بيته كان أقرب بيت لمكان بناء المسجد،
وكان بيته من دورين، فطلب من رسول الله ﷺ إنه يقعد في الدور الثاني، لأنه مش هيقدر يمشي على سقف رسول الله ﷺ تحته،

فقال له رسول الله ﷺ إن الناس هتيجي تزوره فهيكون سهل عليهم في الدور الأول،
فوافق أبو أيوب، وسكن في الدور العلوي مع زوجته، فلما كان في ليلة من الليالي انكسرت لهم جرة ماء،
فبسرعة نشفوا المية باللحاف بتاعهم عشان المية متنقطش على رسول الله ﷺ ومكنش عندهم غيره

وثاني يوم قال لرسول الله ﷺ :
والله يا رسول الله ما أكون على سقف إنت تحته😥
فانت إطلع الدور إللي فوق فوافق رسول الله ﷺ،
وكان أبو أيوب لا يأكل إلا لما رسول الله ﷺ يأكل وكان يتتبع مكان يده وياكل وراه من شدة حبه واتباعه لرسول الله ﷺ
في يوم قدم له طعام فيه ثوم وبصل، فلم يأكل رسول الله ﷺ من البصل والثوم، فراح أبو ايوب بسرعة لرسول الله ﷺ يسأله، يارسول الله : هو أكل البصل والثوم حرام😲
فقال له رسول الله ﷺ:
لأ مش حرام، ولكني أكرهه بسبب ريحته!
فقال له أبو أيوب : فأنا اكره ما تكره يا رسول آلله 👌

قبل ما يكتمل بناء المسجد النبوي مات أسعد بن زرارة 😢
أسعد إللي بايع بيعة العقبة الأولى وكان بيأخذ عمار ويطوف به على الناس ويدعوهم للإسلام،
وهو كان أول واحد جمع المسلمين في بيته لصلاة الجمعة،
أسعد إللي بايع بيعة العقبة الثانية وكان نقيب من النقباء الاثنا عشر، مات أسعد بالذّبحة أو بالشهقة،
مات أسعد ورسول الله ﷺ لسه في بداية المشوار، لكنه كان ناوي يُوفي ببيعته👌

اشترك الجميع في بناء المسجد النبوي وكان بسيط جدا في بنائه، وكان كل مسلم بيشيل طوبة طوبة وكان عمار بن ياسر بيشيل طوبتين طوبتين فلما رآه رسول الله ﷺ قال :
"وَيح عمار تقتله الفئة الباغية"
وهنا رسول الله ﷺ بيحكي عن حاجة هتحصل بعد سنين وسنين من موته، بيحكي عن معركة هتحصل بين أصحابه🚫

استمر بناء المسجد فترة وبُنِي لرسول الله ﷺ حجرة بابها يفتح على المسجد،
لو لاحظنا هنلاقي إن أول حاجة رسول الله ﷺ كان بيعملها هي بناء المسجد ودي مش حاجة عشوائية نهائي👌
المسجد له دور مهم جدا في حياة المسلمين 🚫

بعد بناء المسجد ..مركز القيادة ..بدأ رسول الله ﷺ يشوف الأوضاع المحيطة به وهيتعامل معاها إزاي، وكمان الناس إللي ساكنين حول المدينة إيه نظامهم،
عندنا كذا ثلاث مجموعات في البلد ،

المجموعة الأولى هي مجموعة المسلمين وفيها خمس طوائف:
الطائفة الأولى:
كانت المسلمين من المهاجرين إللي جاؤوا من مكة ومعهمش أي مال ولا زاد ولا لهم بيت يقعدوا فيه،
والطائفة الثانية: كانت الأنصار أهل البلد الأصليين وكانوا من الأوس والخزرج،
الطائفة الثالثة: كانت المسلمين إللي كانوا موجودين في الحبشة بقالهم سنين،
والطائفة الرابعة:
المسلمين المتفرقين في القبائل وكانوا بعاد عن المدينة وهم أعزة في قبائلهم،
الطائفة الخامسة: كانت المسلمين المستضعفين في مكة إللي معرفوش يهاجروا،

المجموعة الثانية : طائفة المشركين من الأوس والخزرج، كان في لسه ناس من الأوس والخزرج على شركهم،
والمشركين من الأعراب إللي حول المدينة، ودول كانوا عايشين على السرقة والنخب وقطع الطريق،
فإزاي رسول الله ﷺ هيتعامل مع الناس دي
ولسه كمان المشركين من قريش، ماهم مش هيسيبوا رسول الله ﷺ والمسلمين في حالهم

المجموعة الثالثة : مجموعة اليهود بمختلف قبائلهم، واليهود معروف عنهم الغدر والخيانة وهما في الوقت ده كانوا أقوياء وعندهم الأموال والسلاح،

وفي مجموعة رابعة هتظهر بس مش دلوقتي لما يظهروا هنتكلم عنهم إن شاء الله،

فتخيلوا إن رسول الله ﷺ مطلوب منه يكون دولة يجمع فيها طوائف المسلمين المختلفة ، وإللي كل واحد منهم عاش في بيئة مختلفة عن التاني،
ومش بس كده ، ده مطلوب منه إنه يشوف حلول وطرق في التعامل مع أصناف الناس إللي قلناهم دول

وكمان فوق ده كله حصلت أزمة في المدينة
المسلمين المهاجرين أصابتهم الحمى، بسبب اختلاف طبيعة الجو، في المدينة عن مكة😮
فتحرك الحنين بداخلهم لمكة، فرسول الله ﷺ دعا الله عز وجل أن يحبب المدينة لنفوس المهاجرين كحب مكة بل أشد،
ودعا إنه يرفع عن أصحابه الحمى، فاستجاب الله دعاء رسول الله ﷺ وأصبح الصحابة يحبون المدينة أكثر من حبهم لمكة، ورفع الله عنهم الحمى.

إيه بقى الخطوات إللي رسول الله ﷺ عملها عشان يعالج المشاكل إللي واجهته في بداية بناء الدولة الإسلامية🤔

ده إللي هنعرفه الجزء الجاي إن شاء الله😊


#السيرة_النبوية
#ايمان_شلبي

*🌙همسة مسائية* 🌄

*أفضل الذكر وأكمله* :
*• قال العلامة ابن القيم رحمه الله : "أفضل الذكر ما تواطأ عليه القلب واللسان، وإنما كان ذكر القلب وحده أفضل من ذكر اللسان وحده* ؛ لأن ذكر القلب يُثمرُ المعرفة، ويهيج المحبة، ويُثيرُ الحياء، ويبعثُ على المخافة، ويدعو إلى المراقبة، ويردع عن التقصير في الطاعات، والتهاون في المعاصي والسيئات، *وذكر* *اللسان وحده لا يوجب شيئًا من ذلك* الإثمار، وإن أثمر شيئًا منها فثمرته ضعيفة

*بماذا تحتفلون⁉️*

#الأربعين_النسائية 🌿

ما الحكمة من منع الزينة أمام الرجال؟
هل هذا تقييد لحرية المرأة وحبها للتجمل؟

سبحان الله فرق كبير بين من يستشعر عظمة الإسلام في حفظ المرأة بإخفاء زينتها وبين من تقول ولماذا لا يفعل الرجال ذلك؟

إدراك نعمة الإسلام وأن تشريعاته خير لنا نعمة كبيرة

والحكمة في تحريم إظهار هذه الزينة :
هي صيانة المرأة والمحافظة على عفتها وكرامتها ، وسد باب الفتنة بها ، وقطع الطمع في إغوائها، فإن أصحاب القلوب المريضة يطمعون فيمن تظهر زينتها ، ويبتعدون عن صاحبة الحياء والستر.
وقد جاءت الشريعة بسد الأبواب المفضية إلى افتتان الرجال بالنساء أو العكس ، ولو لم تسد هذه
الأبواب لوقعت الفتنة وعم الفساد ، كما هو مشاهد في المجتمعات المتحللة من ضوابط الشرع
وأحكامه

*حكم وضع المكياج*

المكياج الذي تضعه المرأة إن كان لزوج أو يراه محارم فلا بأس بذلك وإن أرادت أن تخرج به فلا يجوز لها الخروج به إلا إذا كان وجهها مستورً ا بالحجاب فلا حرج عند ذلك في وضعه ، وأما إن كانت كاشفة للوجه فلا يجوز لها الخروج به مطلقًا لأن الله تعالى يقول: ﴿ولا يبدين زينتهن إلا ما ظهر منها وليضربن بخمرهن على جيوبهن ولا يبدين زينتهن إلا لبعولتهن ... ﴾ الآية

*إظهار الكحل والحناء والخاتم والأساور*

اختلف أهل العلم في ذلك تبعًا لاختلافهم في كونه من الزينة الظاهرة التي يجوز إبداؤها أو من الزينة الباطنة التي يجب سترها عن الأجانب.
فذهب بعض أهل العلم إلى أنها من الزينة الظاهرة التي يجوز للمرأة أن تبديها للناس ، لما رواه الطبراني عن ابن عباس في قوله تعالى:﴿ ولا يبدين زينتهن إلا ما ظهر منها ﴾قال: (هي ال كحل والخاتم).
وقال آخرون: إنها من الزينة التي يجب سترها.
ولذلك قال ابن عطية: (ويظهر لي بأن المرأة مأمورة بأن لا تبدي ، وأن تجتهد في الإخفاء لكل ما هو زينة ، وواقع الاستثناء فيما يظهر بحكم ضرورة حركة فيما لا بد منه ، أو إصلاح شأن ونحوه.
ف (ما ظهر) على هذا الوجه مما تؤدي إليه الضرورة في النساء فهو المعفو عنه.

ننتقل لقضية أخرى وحكم آخر يهم النساء
فمن القضايا التي يكثر فيها الجدال سفر المرأة بدون محرم للحج والعمرة أو للدراسة والعمل أو للنزهة *فما حكم ذلك؟*

#الأربعين_النسائية
#هبة_حلمي

إذا عجزت عن أذكار الصباح والمساء فلا تعجز عن هذه الكلمات الثلاث صباحاً ومساءً:

1-بسم الله الذي لا يضر مع اسمه شيء في الأرض ولا في السماء وهو السميع العليم "ثلاثا".
‏2-أعوذ بكلمات الله التامات من شر ما خلق "ثلاثا".
‏3-رضيت بالله رباً وبالإسلام ديناً وبمحمد ﷺ رسولاً "ثلاثاً".

#اذكار_الصباح

صباح التفاؤل 🌿

(لنختم القرآن سماعا)

الورد (١٩٦)

(الربع الرابع & الحزب التاسع والأربعين)

#القارئ: محمد جبريل
#ليدبروا على التليجرام
https://www.tg-me.com/GhRoooh/12079

إن لم ترغب بتحميل الملف الصوتي:
فتابعه مباشرة(مكتوبا) على اليوتيوب👇🏻

https://youtu.be/6tgFcMQCgqI?feature=shared
#صباحكم_قرآنٌ_يُتلى

‏لا أُخفيكم سِرًّا؛ كُنت ألحُّ على الله عز وجل بدعاء سيدنا موسى، وأتضرع إلى الله بتوسُّل وافتقار:
"رَبِّ إني لما أنزلتَ إليّ من خيرٍ فقير"
أي: يا رب أي خير تُقدِّره لي، وتُعطيه لي؛ فأنا فقير إليه، وفي أمَس الحاجة إليه؛ فوالله لما افتقرت إلى الله بهذاء الدعاء؛ انهالت عليّ العطاءات، ورزقني كُل ما تمنيته من زواج وعمل وغيره.

‏ -محمود الرفاعي.
‏

#قصص_الأنبياء(٢)
#السيرة_النبوية
#الحلقة_الخمسون
#تأسيس_الدولة_الإسلامية_في_المدينة

كنا واقفين المرة إللي فاتت عند المشاكل إللي واجهت رسول الله ﷺ والمفروض إنه يتعامل معاها عشان يقدر يقيم دولة إسلامية تكون مركز تنطلق منها الدعوة لكل أنحاء الأرض،
فلازم يتعامل بحكمة لأن المرحلة دي مهمة جدا لأن هي الأساس ولازم الأساس يكون متين وقوي عشان البناء إللي هيتبنى ميقعش بعدين😶

خلونا نشوف رسول الله ﷺ اتعامل مع المشاكل دي إزاي،
أول وأهم مجموعة بالنسبة لرسول الله ﷺ هي مجموعة المسلمين بطوائفها الخمسة،
أول طائفة المسلمين من الأوس والخزرج، ودول كان بينهم حروب من زمان لسه منتهية قريب بس لسه النفوس شايلة من بعض،
فرسول الله ﷺ من أول ما دخل المدينة أعطاهم درس عملي
هو التربية بالقدوة،
لما وصل لمكان بناء المسجد النبوي سأل :
أي دار أهلنا أقرب؟
فقالوا له : دار أبو أيوب الأنصاري، فنزل عنده زي ما شرحنا المرة إللي فاتت
فرسول الله ﷺ من قريش وقريش من العدنانيين، والأوس والخزرج من القحطانيين، يعني فرعين كبار جدا ومختلفين تماما عن بعض،
فرسول الله ﷺ إللي هو بعيد جدا عنهم في النسب بيقول عليهم أهلنا، فمن باب أولى إن الأوس والخزرج يعتبروا نفسهم أهل
فدي كانت الخطوة الأولى ، الخطوة الثانية إنه قعد مع الأوس والخزرج وبدأ يعلمهم إن إللي بيربط المسلمين ببعض هو رباط العقيدة، مش القبلية أو أي حاجة تانية،
ورسول الله ﷺ كان معتمد على صدق إيمان الأنصار في تنفيذ إللي هيقول لهم عليه،
واستجاب الأوس والخزرج وتغيرت قلوبهم ونسيوا كل إللي كان بينهم وتوحدوا مع بعض عشان هدفهم الرئيسي بناء الدولة الإسلامية👌
كده حلينا مشكلة أول طائفة، الطائفة الثانية من المسلمين دي مشكلتها مشكلة😶
ناس معندهمش لا مال ولا بيت ولا زاد ولا أي حاجة خالص، عشان نقرب المعنى بلغة عصرنا ممكن نقول عليهم لاجئين🤔
ومعروف إن الإنسان إللي بيهاجر من بلده بيحس بشي من الذِّلة والضعف فمحتاج تطييب خاطر،
وهما أصلا لولا الإسلام كان زمانهم قاعدين في بلدهم مرتاحين مُعززين،
والمشكلة الأكبر إن شغلتهم في مكة كانت التجارة، وفي المدينة مفيش تجارة، في زراعة لأن المدينة أرض خصبة تنفع للزراعة ومكة أرض صخرية، فحتى مفيش شغل يشتغلوا،
طيب إيه الحل بقى😕
رسول الله ﷺ عمل حاجة جديدة وطبعا كل ده بوحي لأن رسول الله ﷺ لا ينطق عن الهوى،

رسول الله ﷺ آخى بين المهاجرين والأنصار، يعني كل واحد من الأنصار هيبقى له أخ من المهاجرين،
والأخوة دي زي أخوة النسب يعني إللي يموت يورث الثاني،
موضوع الورث ده هيُنسخ بعدين لكن دلوقتي بقى فيه أخوة زي أخوة النسب،
وكان ربنا بيهون عليهم في القرآن :
"فَالَّذِينَ هَاجَرُوا وَأُخْرِجُوا مِن دِيَارِهِمْ وَأُوذُوا فِي سَبِيلِي وَقَاتَلُوا وَقُتِلُوا لَأُكَفِّرَنَّ عَنْهُمْ سَيِّئَاتِهِمْ وَلَأُدْخِلَنَّهُمْ جَنَّاتٍ تَجْرِي مِن تَحْتِهَا الْأَنْهَارُ ثَوَابًا مِّنْ عِندِ اللَّهِ ۗ وَاللَّهُ عِندَهُ حُسْنُ الثَّوَابِ "

فكان المهاجر يفتخر بأنه مهاجر وكان الأنصاري يفتخر بأنه يأوي مهاجرا،
ومن أمثلة المآخاة إن رسول الله ﷺ آخى بين عبد الرحمن بن عوف من المهاجرين وسعد بن الربيع من الأنصار،
فقال سعد بن الربيع لعبد الرحمن:
مالي هقسمه نصفين إنت نصف وأنا نصف، وأنا عندي زوجتين شوف أي واحدة فيهم تعجبك وأنا أطلقها، ولما تنتهي العدة بتاعتها، إنت تتزوجها😊

فقال له عبد الرحمن بن عوف رضي الله عنه:
بارك الله لك في أهلك ومالك، إنت بس وريني السوق بتاعكم فين؟

فدلّوه على مكان السوق عندهم، وكان سوق بني قينقاع، فتاجر في السوق وربح، ومعداش كم يوم إلا وتزوج ورآه، كل ده بسبب عفته وصدق توكله على الله👌
فبعد ما تزوج رآه رسول الله ﷺ وعليه أثر صُفرة من الزعفران تضعه النساء،
فرسول الله ﷺ قال : إيه مالك!
فقال له تزوجت يارسول الله
فقال له: وإنت أعطيتها مهر إيه؟
فقال عبد الرحمن بن عوْف: وزن نواة من ذهب، يعني أعطاها خمس دراهم من ذهب،
فقال رسول الله ﷺ له: بارك الله لك ، اعمل وليمة ولو بشاة،
يعني اعمل أكل لأصحابك،

فكان الحل لمشكلة المهاجرين إن يكون في بينهم وبين الأنصار أخوة، يسكنوا ويأكلوا معاهم، وقال الأنصار لرسول الله ﷺ:
يا رسول الله اقسم بيننا وبين المهاجرين النخيل!
فقال رسول الله ﷺ : لا!
فقال الأنصار للمهاجرين : خلاص إنتم تشتغلوا معانا في الزراعة ونتقاسم الثمار،
فوافق المهاجرون، وبدأ الأنصار يعلموهم الزراعة لحد ما تعلموا منهم ،
وكانوا يتناوبون في طلب العلم من رسول الله ﷺ وبين العمل،
يعني ده يوم وده يوم ،زي ما كان عمر بن الخطاب بيعمل هو وأخوه من الأنصار،
يعني المهاجرين مقعدوش بقى وقالوا الأنصار يصرفوا علينا وهم عندهم الأموال واحنا مش بنفهم في الزراعة وشغلتنا في التجارة،
لأ...دول اتعلموا وساعدوا وتعبوا👌

وكان السبب إللي جعل المهاجرين يهاجروا والأنصار يؤوهم وينصروهم هو الإيمان الراسخ بالله والإيمان بالبعث والإيمان بالجزاء من عند رب العالمين👍🏻
الطائفة الثالثة من المسلمين هم المسلمين الموجودين في الحبشة، أرسل لهم رسول الله ﷺ وطلب من بعضهم الرجوع للمدينة والأكثرية بقيادة جعفر بن أبي طالب يفضلوا موجودين في الحبشة وميرجعوش👌

☆طيب ليه مش المسلمين بقى لهم دولة دلوقتي ما يرجعوا وحتى يكون لهم دور في بناء الدولة الإسلامية😕

احنا دلوقتي في بداية بناء الدولة الإسلامية، وقريش مش هتسكت والمشركين واليهود داخل وخارج المدينة مش هيسكتوا،
فوضع المسلمين في المدينة دلوقتي خطر،
وممكن يتعرضوا للاستئصال، يعني ممكن يجتمع المشركين كلهم ويبيدوهم، وفعلا هيتعرضوا لموقف زي كده بعدين زي ما هنشوف إن شاء الله،
فلو كل المسلمين اتبادوا مين إللي هينشر الإسلام🤷‍♀️
فلازم نخلي مجموعة احتياطي في مكان آمن بعيدة عن أي مشاكل لحد ما الأوضاع تستقر في المدينة ،
ويطمئن رسول الله ﷺ إن بقى للمسلمين قوة تمنعهم من إنهم يبادوا👌

أما المسلمين في القبائل المتفرقة فخلاهم رسول الله ﷺ زي ما هم، ولم يأمرهم بالهجرة، لأنهم في قبائل بعيدة رسول الله ﷺ مش هيقدر يوصل لها الدعوة،
فهم مكان رسول الله ﷺ، لهم دور في مكانهم خليهم يدعوا في الناس،
وكمان لو طلب منهم رسول الله ﷺ إنهم ييجوا للمدينة دلوقتي المشركين هياخدوا بالهم إن في حركة في المدينة وهيلفت الأنظار للمدينة وممكن يحفزهم لحرب المسلمين وهما لسه في البداية ومش مستعدين👌
فالمصلحة إنهم يفضلوا مكانهم هما كمان لحد ما الاوضاع تستقر،
الطائفة الأخيرة من المسلمين كانت المسلمين المستضعفين في مكة وإللي مش عارفين يهاجروا ،دول رسول الله ﷺ أمرهم إنهم يكتموا إيمانهم على أد ما يقدروا ولا يجهروا بإسلامهم نهائي لحد ما ربنا ييسر لهم الأمور

خلصنا مجموعة المسلمين بطوائفها المختلفة ندخل في مجموعة المشركين إللي كانوا في المدينة 💁‍♀️
خطة رسول الله ﷺ معاهم إنه يدعوهم للإسلام ويحسن إليهم، وإنه يتجنب أي صِدام معاهم وكمان يتعاون معاهم في المصالح المشتركة بينهم👌
دي كانت خطة رسول الله ﷺ ، المشركين بقى كان موقفهم إيه منه🤔
كبداية كده في مشركين أول ما سمعوا عن مجيء رسول الله ﷺ سابوا المدينة ومشيوا،
زي واحد اسمه أبو عامر الراهب عبد عمرو بن صيفي،
الرجل ده كان بيقول إنه راهب وعنده علم وإنه كان على الحنيفية دين إبراهيم عليه السلام فقابل رسول الله ﷺ لما جاء للمدينة وسأله:
هو إيه الدين بتاعك إللي انت جيت بيه ده😒
فقال له رسول الله ﷺ: أنا جئت بالحنيفية دين إبراهيم !
فقال له أبو عامر: أنا عليها😤
فقال له رسول الله ﷺ: لا إنت مش على الحنيفية!
يقصد يعني إن في تحريف كبير في الديانة إللي إنت عليها دلوقتي،
فقال له أبو عامر: لأ أنا عليها، وإنت إللي أدخلت في الحنيفية ما ليس فيها😡
فقال له رسول الله ﷺ: أنا معملتش كده بالعكس أنا جئت بها بيضاء نقية👌
راح أبو عامر قايل له:
يارب الكذاب يموت طريد غريب وحيد😏
بيعرض برسول الله ﷺ وبيتهمه بالكذب وإن ربنا هيميته طريد غريب ووحيد،
فرسول الله ﷺ قال : أيوة صح، الكاذب هيحصله كده فعلا👌

واحنا هنتخطى الزمن عشان نعرف نهاية أبو عامر الراهب ده كانت إيه أو خلونا نسميه زي ما سماه رسول الله ﷺ أبو عامر الفاسق
لما لقى أبو عامر الفاسق الأنصار واقفين في صف رسول الله ﷺ بعد الحوار ده معاه، وبيعاملوه كزعيم مقدرش يستحمل الوضع فخرج من المدينة وراح عاش في مكة،
وقعد فيها لحد فتح مكة، وبعدها هرب للطائف ولما أسلم أهل الطائف هرب من الطائف وعاش في الشام وهناك مات طريدا غريبا وحيدا👌
عارفين بقى أبو عامر ده يكون مين ابنه
عارفين حنظلة الصحابي المشهور إللي غسلته الملائكة في غزوة أحد واتعرف بعد كده بغِسّيل الملائكة،
أهه حنظلة ده يبقى ابن أبو عامر الراهب 😮
وإن شاء الله هنعرف قصته لما ييجي وقتها 😉

فأبو عامر وأمثاله خرجوا من المدينة خالص وكانوا بضعة عشرة رجلا،
أما باقي المشركين ففضلوا قاعدين في المدينة وعلى رأسهم عبد الله بن أبي بن سلول،
الرجل إللي كان الأوس والخزرج اتفقوا عليه عشان يكون هو الملك على المدينة، وكان رجل شريف وزعيم في قومه الخزرج وكان غني وعنده سلطة،
فكان هيبقى أول ملك للمدينة ، لكن كل حاجة اتغيرت لما حصلت البيعة من الأنصار، والزعامة والرئاسة راحت لرجل غريب لا هو من الأوس ولا الخزرج، وده في عرف العرب مستحيل😶
فالرجل بقى عنده حقد رهيب على رسول الله ﷺ،
وطبعا لم يُسلم، قعد يراقب الأوضاع في المدينة وهو بيغلي من جواه،
ومكنش بيفوت فرصة ممكن يؤذي بها رسول الله ﷺ إلا واستغلها، وهنشوف أمثلة من أذيته لرسول الله ﷺ 👌
أما باقي المشركين فكانوا على الحياد،
ودول كان الصحابة بيمارسوا معاهم الدعوة بكل لطف وكان رسول الله ﷺ بيحسن إليهم عشان يؤلف قلوبهم ويدخلوا الإسلام.

أما المشركين خارج المدينة فكان التعامل معاهم إما عن طريق دعوتهم للإسلام، أو إنه يعمل معاهم معاهدات أو إنه هيبعث سرايا حول المدينة عشان يعرف المشركين إن المسلمين فيهم قوة،
والسّرِيّة معناها مجموعة عسكرية رسول الله يرسلها حول المدينة عشان يثبت قوة المسلمين،
أو للجهاد في سبيل الله في أماكن بعيدة

اتبقى عندنا عندنا مشركي قريش، ومجموعة اليهود ودول لهم قصة تانية خالص مش هينفع نقولها دلوقتي

السنة الأولى من الهجرة مليانة بالأحداث وخصوصا في البداية إنتم عارفين الحماس والقلق إللي بيكون في بداية أي مشروع عادي،
فما بالكم بمشروع بناء أمة الإسلام👌
بعد ما رسول الله ﷺ حل مشاكل المسلمين في المدينة محتاج لهم دستور أو قوانين تنظم لهم أمور حياتهم،

وخصوصا إن الطبائع مختلفة، يعني المهاجرين غير الأنصار فلازم يكون في قانون يمشي على الجميع👌

إيه هو الدستور إللي رسول الله ﷺ وضعه للمسلمين، ومين الرجل إللي جاء لرسول الله ﷺ وأسلم بعد رحلة طويييلة من البحث عن الحق،
ده إللي هنعرفه الجزء الجاي إن شاء الله😊


#السيرة_النبوية
#ايمان_شلبي

*تسجيل الحلقة ال5️⃣1️⃣ من فقه النكاح والطلاق وفيها*
*تعريف الطلاق من يصح طلاقه*
*ومشرعية الطلاق*
د/وفاء العبيدي
👆🏻👆🏻👆🏻👆🏻👆🏻👆🏻👆🏻👆🏻

قد يصل الانسان الى عمر الستين او السبعين .. والأعمال التي في ميزانه لا تتجاوز عمر سنتين ..
وقد يصل الإنسان إلى عمر العشرين والأعمال التي في ميزانه  تجاوزت الألفين ..

أسألوا الله أن يبارك في أعماركم ولا تضيعوا أوقاتكم باللهو ، فالغاية من خلقنا أن نعبد الله ونتزود للآخرة .. وليس للتنافس في الدنيا واعطائها أكبر من حجمها !.