لا تِنسُوني  ..  لا تِنسُوني     
بكِل شربَة ماي اتذَكرُوني
**

لا تِنسـُوني بيوم العاشر
من نَاديت ومامِن نَاصر
طايح بين الجيش الكافر
حاير بس انظر بعيُونـي
**

ياشيعه آنه احسين الدَامي
المَحّد شايـِل مثل آلامـي
آنه المذبـوح  آنه الظامي
مِن وِرِد المـَشرَب مِنعُوني
**

ﮔالوا إرضَه ابحُكم الوالي
لـُو نـِفنـِي الأوّل والتـالي
ﮔلـْت آنه الحِيد المَـيبالي
وماأقبل بـالذل تـِدرُوني
**

خاطبتِ الجيش بهالحَمله
لو أﮔضي آنه ابأبشع قـَتلَه
المِثلي لا مَـيبَايع  مِثلـه
ولو مـيّة  وذرَه اتوذرُوني
**

ماي ابذِل  ماأشرَب منّـه
وماضُوﮔن بـَردَه وأتهَـنّه
بَاچر اسلَافــِي البالجنّه
من حُوض الكوثر يسـﮔونيِ
                …………………                                                       
               لقمان بدران

الاداء ملا ستار الصالحي

الى مولاي صاحب الزمان

ياصاحب زمانك.. دلينه ابمكانك
وين ابيا عزيه.. هم شفت الزجيه
**
يالجروحك بچت اعيون الدهر
اشلونه حالك ليلة الحادي عشر
ساعد الله گلبك الشابـع قهــــر
نسألك عن فاطمـــه يالمنتظــــر
بلله امن التقيتو.. هالليله اشقريتـــو
نسألك هالمسيه.. هم شفت الزچيــه
**
يابو صالح شنهو بلله المستهــــل
اشلون زينب ضلت ابلايه أهـــــل
كلشي ماشايف أنه ودمعي همـــل
چا اشحالك يالشفت غاد اشحصل
خل نقره المصيبه.. زينب ياغريبـــه
برض الغاضريه.. هم شفت الزچيــه
**
وين هسه او وين ناصب منبـرك
اليامصيبه تهل دمعــــة ناظــــرك
سكنه لو عبد الله كسـرو خاطرك
لو رقيه لــو حميـــده اتمرمـرك
يالحيلك تهدم.. ابنيران المخيــــم
آخ اشهل رزيه.. هم شفت الزچيه
**
زينب آنه حالي……  منسي بيهه
وابد ماأنسه أمهه…..  منسه بيهه
يمهدي والله ماتت....  من سبيهه
وبس تبچي عله اهل الغاضريه

سيد علي الموسوي

شفتك صوره مو واقع و گلبي اتجنن بحبك
دعيت الله شكثر يحسين بس كون ادخل لگلبك
.......................................
شـفت بالصور عـطشان بس ما صدك هايه
وانته العلگمي يحسين من گصتك نبع مايه
شيخ الڪون انته تصير هاي الناس و دايه
صار براسي حض مولاي من حبيتك هوايه

واللهم بـالـزهـراء يـثــبـت جـدمـي بـدربـك
دعيت الله شكثر يحسين بس كون ادخل لگلبك
⚜️⚜️⚜️⚜️⚜️⚜️
عـطشانك عشك مو مواي آه يلمنذبح ضامي
يـوم الـمـا اذڪـر بـيـه ما يـنـعـد مـن ايامي
موش بزودي يا مولاي بزودك مـرتفـع هامي
انته اول بشر يحسين عاش بروحي يالدامي

حلات ايامي يالذبوح كون تخلص بگربك
دعيت الله شكثر يحسين بس كون ادخل لگلبك
⚜️⚜️⚜️⚜️⚜️⚜️
مـچـانك بالـگـلب يحسين محد ياخذ مچانك
امن اصياري ولهذا اليوم عليه فايض احسانك
صح ازلف و اروح بعـيد وانته تردني لحضانك
شما اجيلـك هلـه تگـلـي تـفـك گلبك و بيبانك

رغم ماذنبي حافر خيك واعرف سيدي امعذبك
دعيت الله شكثر يحسين بس كون ادخل لگلبك
⚜️⚜️⚜️⚜️⚜️⚜️
اليـهواك بـصـدگ يحسين ما يهوئ بعد غيرك
موش بخيري عايش دوم لا عايش انه بخيرك
يـا اجـمـل بـشـر بالڪون حيل اعشگ تعابيرك
ضريحك هوه عش گلبي احسبني سيدي طيرك

ما اندب بشر بالضيح گلبي بشدته يندبك
دعيت الله شكثر يحسين بس كون ادخل لگلبك
⚜️⚜️⚜️⚜️⚜️⚜️
شمقدملك انه يحسين هيچ انته ارفعت قدري
لا مـذبوح مـن اجـلك لا خيك اسحگت صدري
مجرد مجلس احضرلك و دمعي لغربتك تجري
سميتك حبيب الروح و طوع امرك صبح امري

متعبني بخدمتك دوم حيل ارتاح انه بتعبي
دعيت الله شكثر يحسين بس كون ادخل لگلبك
...............................

#الشاعر_حسين_عبدالزهره_الدراجي

الاداء ملا علي الرميثي

ولادة الحوراء زينب🌹🌹

همـتنه … حيدريه
جمعتنه… مزهريه
فرحتنه… زينــبيه
         نهديها الفاطمه وعلي
🌷🌷🌷🌷
بالحره احلفچ يالزچــــــيه
اتقبلي من عـدنه الهــــديه
وكلمن حظر هذا حفلنه
سجلي اسمه خادم بالهويه

يالحبكم … بي هدايه
نخدمكم … للنهـــــايه
فرحـتنه … بيهه غايه
          نهديها الفاطمه وعلي
🌷🌷🌷🌷
نبعث تهــاني المنتظــــرنه
ونشــــــارك اوياه ابفرحنه
يالمقتدر عجل ظهــوره
ننتظره بيده ايشل جرحنه

يا منــبر … للسياده
يامصدر … للسعاده
فرحتـنه … بالولاده
        نهديها الفاطمه وعلي
🌷🌷🌷🌷
شمس الهواشــــم نورتنه
ورغم المواجـــع فرحتنه
حـورية الجنه العظيمه
ابليلة ولادتهه اجمعـــتنه

اشمحلاهه… من مسيه
اتســـر طه… والزچــيه
فرحـــــتنه… هاشــميه
           نهديها الفاطمه وعلي
🌷🌷🌷🌷
وبمـــولد الدره المصــــونه
نهـــدي الفرح للمانســــونه
ياربي بس همه الوسيله
وفايه عدهــــم سجلـــونه

احنه الهم … نبقه شيعه
يالحبـــهم … ما نبـــيعه
فرحــــتنه … يعني بيعه
             نهديها الفاطمه وعلي
🌷🌷🌷🌷

✍كامل السعيدي

الاداء كامل السعيدي

هوسات لذكرى ولادة السيدة زينب عليها السلام

نهني الزهره والكرار حيدرنه

ميلاد العقيــــله اليوم بشّرنه

كلنا بهالمسه جينه وتحضّرنه

وبمولد زينب نتباهه

****

نتباهه بولادة زينب الحرّه

وصواني الشمع والياس مزدهره

عطر الفرح طش عالعالم بأسره

محلاته يا عطر الجنّه

****

عطر جنّه يفوح اعله الأرض عطرچ

يبنت المرتضى ونتشرف انذكرچ

هالليله إبتده مولاتنا عمرچ

هاي أجمل شمعه نضوّيهه

***

نضوي شموعنه ودمع الفرح بالعين

ونبعثهه التهاني للحسن وحسين

بميلادچ يزينب عيد بالكونين

يا محله العيد وعنوانه

*

خادم الحسين عليه السلام

عمار هليل الواسطي

فرحـه وعمَّـت بالـوسعـه
بـولادة بنـــت البـضـعــه
٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪
حــور او أمـلاك اويــانـه
بمــولـد زينـب فرحـانــه
غنـــىّ بأعــذب ألحـانــه
الصداح وصوته انسمعه
٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪
نشــكـر نعـمــة بـاريـنــه
رحمــه وانـزلهـا اعلينــه
نــور الحــره اليهــدينــه
وابحبـهــا انّـول الرفعــه
٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪
يــا محلــه النـور الزاهـر
مـن گبــر الحـره الطاهـر
يبـهــر وايـســر النــاظـر
يَحــزَن لــو راد ايودعـه
٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪
ريــت اليــوم انوافيـهــا
وبــمـولدهـــا انــهــنيهــا
نــزور الحضـره ونحييها
هالفــرحه ونعلـگ شمعه
٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪
جيــنــا انهنـــي غايبنــه
المهــدي طاووس الجنه
لاشـك يحضــر محفلنـه
ولهــذا المحفـــل يرعــه
٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪
عالموعد نحيــي الذكره
مولــد زينـــب ننـتظـره
كــل الـــوادم مبـتشــره
عالحب والــود مجتمعه
٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪
الشاعر عمار الراشدي

بصوت خادمكم الرادود ابو هاشم الربيعي