📜 القصيدة: تلث روايات
🎤 أداء: مسلم الوائلي
🖋 كلمات: محمد العقابي
~~~~
يغايب عدمن اتبات   وتحيي الفاطميات
الله يساعد عيونك     تبجي تلث روايات
~~~~
الروايه الأولى وين اتروح محد يدري وين انته
واذا جلجل عليك الليل ولا غفوة جفن نمته
تخلي أيدك عله عيونك وتبجي براحتك سكته
ولو هو الجروحه هواي ثگيله اتصير سالفته

حزنك حزنه عمرين     سهر ما عافلك عين ثگيله الغربه بضنونك   تبجي تلث روايات
~~~~
الروايه الثانيه من اتصير تمشي وايدك بظهرك
شعورك يبدي يتألم محد يمك يصبرك
ومن تاخذ نفس تلگه الهوه يتكسر بصدرك
المغرب ثگله هم عليك وهو انته بطرگ عمرك

شلون تخلص الليل    وانته منيلك حيل
حزن الدنيه بمتونك    تبجي تلث روايات
~~~~
الروايه الثالثه تأذيك تشعر بيها مال وداع
من گد ما بصدرك آخ من تگعد تكض الگاع
من اتگوم گوه اتگوم ما تگدر تگوم بساع
وانته منيلك ظل شوف تبجي وانته حيلك ضاع

تغير وضعك هواي      صعبه تشرب الماي
وناسك لو يشوفونك   تبجي تلث روايات
~~~~
شلون ارتاح وعرف بيك ما مرتاح كل لونك
وتبجي من الصبح لليل هسه شضال بعيونك
وعرفك منشلع گلبك ولكن اسأل شلونك
شلونك وانته شابع آخ من الغربه لضنونك

گوه اتگوم وطيح      بس ما تگدر اتصيح
وحته اليسأل شلونك  تبجي تلث روايات
~~~~
وعيونك تره احنه هواي صار هواي مشتاگين
لكن انته صح موجود بس ما ندري توگف وين
شخبارك يبعد الناس طمنه اعله وضعك زين
ولو انته بمجالسنه تجي لابس قميص حسين

تعال وشوفنه شلون    ناسك ضامه عيون
الك بيهن يشوفونك    تبجي تلث روايات
وعله الغربه يعينونك   تبجي تلث روايات
°°°°°°°°°°°°°°°°°°°°°°°°°°°°°°°°°°°°
#اللهم_عجل_لوليك_الفرج_والنصر_والعافية

ثلث روايات

الاداء ملا مسلم الوائلي

(( نعي للأحباب ))

وعلـي يا زيـــنهه أيام المحـــنه
الگضيناهه سوه وي ذيچ اهلنه
اهـواي اعزاز مـن عــدهم دفنه
اسنــين الفـــرح وياهـــم جفنه

نذكـــرهم امـــن ايحل الغــروب
ومن كثر الونين ارواحنه اتذوب
على الطيبين دوم اتحن الگلوب
جفونه وسافرو وبعيده الدروب

عزيزين وعليـــــنه اكلف بعدهم
ذكرى اويانه ضلت بس صورهم
يلچـــمون الگلب كل ما ذكــرهم
بعد هيـــــهات مايلتـــم شمــلهم

بعد هيـهات ما نرجـع ســـــويه
اولا نگعد ســــوه ابكل مغـربيه
اليســون العتـب شـــحو علــيه
بقيت الوحـــدي وصـــفچ بديه



الخادم
كامل السعيدي

الاداء ملا مهدي الزينبي

نعي مفجع
السيده زينب تشكو الى اباء الفضل


راح وكـتـي الـبـيـه چـنـت ام الـخـدر
هـذا وكـتـي الـسـوط والـنـار ويـسـر
خـويـه مـنـك رايـحـه وأطـلـب عـذر
بـاچـر اچفوفي تـره ايـصـيـرن سـتـر

بـاچـر اعـرف زيـن ينـشـاف الـخـيـال
وماضي هذا ايصيـر يـاخـويـه الدلال
ادري صعبه اعـلـيـك مـا گـلـك تـعـال
وهذا حـالـك يالـنـمـت فـوگ الـرمـال

نـام نـوم العافيه وخـلـنـي انـسـبـي
لاچـن اعذرنـي اذا جـرنـي أجـنـبـي
كلشي حرگوا يـبـن ابـوي الـطـالـبـي
زيـن يـا عـبـاس مــن ضـلـت عِـبـي

تـدري بـيّهـه الـصـار يالغـالـي وجـره
بـيـن نـار وخــيــل زيـنـب حــايـرّه
گبلي مـا طـلعـت تره الـهـاشـم مـره
ولا سبوهه الجيش مثلـي امـخَـدّره

                                    *---------------*---------------*

خادم زينب (ع)
✍الشاعر رعد الجريخي

((سماء حسين))


سماء حسين بالخـــــيرات ودث
وأما بخدمةّ المعشــــوگ حدث
أگلهم آنه هايم
أگلهم آنه خادم
بصدري وباللطم شوغات أحرث

على موعد جرح گلبي ودمعتي
گمــــــت أتفنن بحبي وخدمتي
أغار ألي يزاودني عـــلى حسين
أريدن تطلع جروح بحــــسرتي

كون أخدم صباحاً
وأرد ألطم مـــساءاً
بتالي الليل ونـــات
والدمعات طاحــن

حسينا وا غريبا
حسينا وا حبيبا

"""""""""""""""""""""""""""""""""""''''''''''

مناسك خدمتك حبهن تأرخ
مشيّ لَـــطام للــــزوار أطبخ
أضل بهاي ماسك
بالخدمه مناســك
هلا بزوار ابو السجاد اصرخ

هـــــلا يل ماترد واحــــد تنَدم
بخدمتك آنه والــــدمعات نلتم
على حبك اجينه من المتاهات
بمتاهت حبك من الناس نـسلم

العشــگ غربه ومتاها
اليـــــــريدك وشتراها
السكوت بدربك إيمان
الـــــروح ومســــتواها

حسينا وا غريبا
حسينا وا حبيبا

"""""""""""""""""""""""""""""""""""''''''''''

جرح حبك مثـــل ناگوط نگط
وحبك تاج فوگ الراس ينحط
العشگ من گلبي شَمَلّ
أعمـــــــــى شلون يندل
وشفتك بالبصيره منتهى الشط

شفتك مُلهمي بالحب توضيت
يَأَذن مجلسك وبلطمي صليت
لحد ما تنتهي بعروگي الدموم
من تشرب نداي الـــگاع ونيت

الگبر بــرزخ مجالس
نشوف أهناك عابس
نشوف حسين موجود
ومحمد يمنه جــالس

حسين وا غريبا
حسين وا حبيبا

"""""""""""""""""""""""""""""""""""''''''''''

بدونك چا حياةّ الحب ممله
لــو ما خدمتك چا هسه ذله
خدمتك احلا غايه
لــليمــــــلك درايه
اليعيــش بدونك بأيامه شله

كون ألي يحــبك وجه مكشوف
موش أعله المخيم يشهر سيوف
ياما جذبو بـــــالحب والاحساس
وأگبال الهزل دگــــو بالـــدفوف

الحــــــب تنطي التريده
العشگ مـــــو بالقصيده
العشگ بالخدمه فرحان
وتظـــل روحــــه وحيده

حسينا وا غريبا
حسينا وا حبيبا

"""""""""""""""""""""""""""""""""""''''''''''

القمر لمن سمع عطــــشان أنشق
لذلك بالضــــوه ويــــاك حَــــدقّ
يشوف الجيش غاير
على الخيــمات داير
شجاله الجيش من ذبحوك صفق

بجبينك والحجر يـــــترك علامه
طحت وتّسَلبتّ حــــــتى العمامه
الشمس تصهر بجسمك ياحسافه
يويل الكون صار ويــــــا ضـــلامه

طايح وانته حــاير
وتمر بيك الحوافر
التراب الحار أذاك
بـيا لوعه وتكـــــابر

حسينا وا غريبا
حسينا وا حبيبا


عبد زينب
محمد الابراهيمي

لحن(سماء حسين)
بصوت
ملا حيدر العبادي

(( شهيد الباب )) المحسن ع

…………………………………………………………..

شهيد الباب انا ابن الزجيه
انه المامرت النسمات بيه
ورد ميت ربيعه •• انه المحسن يشيعه
      شهيد الباب •• شهيد الباب

………………………………………………………………

متت عايز ضوه وكمره . من الظلمه للظلمه
متت واللهفه بعيوني . اشوفن شمس لو نجمه
اسيره وبقت بلساني . ماتت جلمة اليمه
انه المولود بين النار . تراب ومو مهد ضمه

انا المامش اذان ولا اقامه
متت ما شفت من امي ابتسامه
تون امي وصريعه ••انه المحسن يشيعه
          شهيد الباب •• شهيد الباب

…………… .................................................

انا الكوكب الرابع . انذبحت بالفضه انواره
ابطن امي وسمعت الاه . عليها الرجس شب ناره
عصرها وللنحر جاني . مثل السهم بسماره
صرخنه اثنينه وفد صوت . دمعي و دمها يتجاره

يا محسن تصيح وعين حمره
واصيحن انا يا يمه يزهره
صرخنه احنا ابفجيعه •• انه المحسن يشيعه
             شهيد الباب •• شهيد الباب

……………………………………………………………..

شهيد الباب والحايط . شهيد الجذع والعصره
غصن ماسمع صوت الطير . ولا صد للشمس نظره
حقد عالدنيه لمن شاف . وادم تعصر الشجره
انا المحسن وما اريد . دنيا وماكو اسم زهره

الفراشات وتحس مكسوره جنحين
اذا مامش ورد وحشه البساتين
الحياة تصبح فضيعه ••انا المحسن يشيعه
           شهيد الباب •• شهيد الباب

………………………………………………………………

انا الماشفت حيدر . ولا گعديت بحضانه
اسمي انذبح يم الباب . ولا صاحاني بلسانه
عيني ومثل صوم الصيف . لخوي الحسن عطشانه
اصبن كهوه للخطار . وامد سماط ديوانه

تمنيت انحسب لحسين ناصر
وكون ابداله تسحكني الحوافر
فده لرگبة رضيعه •• انه المحسن يشيعه
         شهيد الباب •• شهيد الباب

…………………………………………………… .………

منظر احد من السيف . وبكل لحظه يذبحني
اخيتي وتبجي وسط الدار . على التربان تنظرني
جنها اتگلي اريدك غاد . ليل اهدعش تحرسني
هديه والج رب الكون . بالعباس بدلني

عمامه يشيل فوگ الراس خدرج
وامه ام البنين اتصير امج
اجفوفه الكم گطيعه •• انا المحسن يشيعه
        شهيد الباب •• شهيد الباب

………………………………………………………………

ها يالمهدي يالموعود . انا وامي ليه صحنه
ثجيله الباب يالمهدي . طبكة جفن طبكتنه
هذا اليرفس برجليه . ذاك بنار يحركنه
يا بو الثار تاخذ ثار . من الرجس جاتلنه

امي وما تنخت بالصميده
ثاري بأيد ابو صالح اريده
ايا حامي الشريعه •• انا المحسن يشيعه
        شهيد الباب •• شهيد الباب

………………………………………………………………
✍️ ( سيد خضر الزاملي )